1-2. Segun ta 1 Timoteo 6:20, anni i nekargo kani Timoteo?

GAGANGAY laman nga ipatangngal tam ta tanakuan i nabalor ira nga gannug tam. Angngariganna, ideposito tam i kuartu tam ta bangku gafu ta ekspektattam nga matangngallan yatun tu mapia anna ari yatun nga mawawan onu makoko. Ammu tam gafu i kebalinan na pangikargo onu pangitalo ta tanakuan nga tolay ta ganna-gannug nga imammatattam tu nabalor.

² Bibbigan i 1 Timoteo 6:20. Niperaddam ni apostol Pablo kani Timoteo nga egga i nabalor nga nekargo nisa​—i fustu nga pakannammu ta gakkag na Dios para ta totolay. Nekargo gapa kani Timoteo i pribilehio nga ‘ilammuyag i uvovug na Dios’ anna ‘kuan i annungan na tadday nga mangilayyagayya ta mapia nga dumug.’ (2 Tim. 4:2, 5) Nipagaram gapa ni Pablo kani Timoteo nga tangngallanna i nekargo nisa. Kagitta ni Timoteo, egga gapa ira i nekargo nittam nga nabalor nga ganna-gannug. Anni danatun? Ngatta kawagattam nga tangngallan danatun nga minas nga nikargo ni Jehova nittam?

3-4. Ngatta nabalor i kinakurug ira ta Biblia?

³ Niddan ittam ni Jehova tu fustu nga pakannammu ta kinakurug ira ta Biblia. Nabalor danatun nga kinakurug megafu ta tudduan ittam natun nu kunnasi nga mapeggan tu makasta nga relasion kani Jehova anna ipakanawag danatun nu anni talaga i mamagayayya nittam. Nu kurugattam danatun nga kinakurug, ari ittam nga melogo na falsu ira nga tuttuddu anna meyarayyu ittam ta imoral ira nga annangngua.​—1 Cor. 6:9-11.

⁴ Nabalor gapa i kinakurug ta Biblia megafu ta ipakannammu laman yatun ni Jehova ta mapakalinno ira nga totolay  nga “mepangngo nga mangalawa tu mannanayun nga inango.” (King. 13:48, NW ) Kurugan danatun nga totolay nga i mekatalo anna nannono nga doroban i usu-usan ni Jehova tapenu ituddu nittam i Biblia. (Mat. 11:25; 24:45) Mawag tam i uffun tapenu malippawa i Biblia, anna awan ngana tu mas nabalor anne ta pakalippawa tatun.​—Prov. 3:13, 15.

5. Anni paga i nitalo nittam ni Jehova?

⁵ Nitalo gapa ni Jehova nittam i pribilehio nga tudduan i tanakuan ta kinakurug meyannung nisa anna ta gakkagna ira. (Mat. 24:14) Nabala-balor i mensahe nga ilayyagayya tam megafu ta uffunan natun i totolay tapenu mebilang ira nga parte na familia ni Jehova anna meddan ira tu tiansa nga mattolay tu mannanayun. (1 Tim. 4:16) Maski nu baddi onu dakal i makua tam ta pallayyagayya, masuportattam lagapa i pinaka-importante nga trabahu ta tiempo tam. (1 Tim. 2:3, 4) Fugurammu yatun nga pribilehio nga mabbalin tu katrabahu na Dios!​—1 Cor. 3:9.

6. Anni i nesimmu ta karuan nga ariadda nga sinangngallan tu mapia i nekargo nira?

⁶ Ta tiempo ni Timoteo, ari nga tinagibalor na karuan nga Cristiano i pribilehioda nga makipattrabahu ta Dios. Megafu ta inaya ni Dimas i mundo, nibattanna i pribilehio nga masserbi kavulu si Pablo. (2 Tim. 4:10) Niyemmang da Figelo anna Hermogenes i pallayyagayya megafu ta maganassing ira nga mapersigi gittana nesimmu kani Pablo. (2 Tim. 1:15) Nagapostata gapa da Himeneo, Alejandro, anna Fileto yatutta pinanawadda i kinakurug. (1 Tim. 1:19, 20; 2 Tim. 2:16-18) Dati nga matuyag i espiritualidad danaw nga totolay ngem ariadda nga sinangngallan tu mapia i nekargo tannira.

7. Anni ira i taktika ni Satanas?

⁷ Nadduruma i taktika ni Satanas tapenu ibbattattam i nikargo ni Jehova nittam. Usu-usanna i pagiraw anna i tanakuan paga nga dibersion tapenu influwensian i appana-panono anna agguyu-guyu tam adde sonu sisinu nga panawattam ngana i kinakurug. Ana-anassinganna ittam gukaban na pamipilit na kakavvulu onu pameppersigi tapenu iyemmattam i pallayyagayya. Fuera paga tatun, tentanna ittam nga ginnan i “abbattan na karuan tu ‘Pakannammu’” nga naggafu ta apostata ira tapenu panawattam i kinakurug.​—1 Tim. 6:20, 21.

8. Anni i magigiammum ta ekspiriensa ni Daniel?

⁸ Nu ari ittam magimmugug, awayyana nga sisinu nga panawattam i kinakurug. Kunnatun i ekspiriensa ni Daniel * nga dati nga  kakayàna i mavvideo game. Istorianna: “Namegafu ngà nga mavvideo game turi ta mafulu i dagukku. Ta ollu, awan mabba tu marake ta ginayakku ira. Ngem sisinu nga vayolente anna makademonio i ginayakku.” Ari nabbayag, 15 ngana nga oras i mofuna ta paggayang tu video game. “Ammù nga umarayyu ngà kani Jehova megafu ta klase na gaya-gayamakku anna na oras nga mofu ku tatun. Ngem nitagga ku nga ari ngana nga magaplika niakan i prinsipio ira na Biblia,” kunni Daniel. Nu ari ittam nga magimmugug, mabi laman nga iyarayyu ittam na dibersion ta kinakurug. Nu mesimmu yatun, baka mawawattam i nabalor ira nga ganna-gannug nga nekargo ni Jehova nittam.

9. Segun ta 1 Timoteo 1:18, 19, ta anni nga niyarig ni Pablo si Timoteo?

⁹ Bibbigan i 1 Timoteo 1:18, 19. Niyarig ni Pablo si Timoteo ta tadday nga suddalu anna kinagina nisa nga ‘usanna i armasna tapenu mapia i akkillabanna.’ Espiritual yatun nga pakillaban, ari tu literal. Anni i napparehuan na Cristiano ira ta suddalu nga makillaban? Anni ira nga kualidad i mawag nga egga nittam bilang suddalu ni Cristo? Egga i lima nga magigiammu tam ta ilustrasion ni Pablo. Moffunan ittam danatun tapenu matangngallattam tu mapia i kinakurug.

10. Anni i makadios nga debosion, anna ngatta egga nakuan nittam yatun?

¹⁰ Mapeggan tu makadios nga debosion. I malalaki nga suddalu ay matalo. Makillaban yayya tu mapia tapenu protektan i iddedduna onu i gannug nga nabalor nisa. Pinagaram ni Pablo si Timoteo nga mawag tu mapeggan yayya tu makadios nga debosion nga tumukoy ta pangikakua anna kinamatalo ta Dios. (1 Tim. 4:7) Nu mas dakal i aya anna i debosiottam ta Dios, mas karagatattam nga tangngallan tu mapia i kinakurug.—1 Tim. 4:8-10; 6:6.

11. Ngatta mawag tu egga i disiplina tam ta baggi?

¹¹ Mapeggan tu disiplina ta baggi. Mawag tu disiplinan na tadday nga suddalu i baggina tapenu kanayun yayya nga preparadu nga makillaban. Preparadu si Timoteo nga makillaban ta espiritual megafu ta sinuttulna i tabarang ni Pablo nga arayyuanna i marakay nga pakkaraga, mapeggan tu makadios ira nga kualidad, anna makikavulu ta kapangngurugna. (2 Tim. 2:22) Kawagan ni Timoteo i disiplina ta baggi. Kawagattam gapa yatun tapenu affutan i marake ira nga pakkaraga. (Roma 7:21-25) Mawag tam gapa i disiplina ta baggi tapenu ari ittam nga magimmang nga laffutan i dana nga kata-katoletam anna iyellung i bagu. (Efe. 4:22, 24) Nu nababbannag ngana gapa ittam ta interu aggaw nga pinattrabahu tam, baka mawag tu fuersattam i umay ta study.​—Heb. 10:24, 25.

12. Anni ira i kuattam tapenu mabbalin tu malalaki ta pangusa tu Biblia?

¹² Mawag tu kanayun nga massanay i tadday nga suddalu tapenu mabbalin yayya nga malalaki ta pangusana ta armasna. Massanay ittam nakuan gapa tapenu mabbalin ittam tu malalaki ta pangusa ta Biblia. (2 Tim. 2:15) Makua tam yatun ta study tam ira. Ngem nu kayà tam nga kurugan gapa na tanakuan nga kuruga nabalor i kinakurug ta Biblia, regular nakuan i personal nga paggigiammu tam tu Biblia. Usattam gapa i Biblia tapenu pasikannan i pangurug tam. Ariattam laman basta bibbigan yatun, nu ari, pannonopattam i nabibbig tam ira anna marresearch ittam ta publikasiottam ira tapenu fustu i pangalippawa anna pangipakanawag tam ta teksto ira. (1 Tim. 4:13-15) Kabalittam nga makua yatun, meyusa tam ngana gapa i Biblia tapenu tudduan i tanakuan. Ngem ariattam  nakuan laman nga basta ibibbig i teksto ira ta totolay. Uffunattam gapa ira nga malippawa i teksto anna nu kunnasi ira nga moffunan natun. Nu regular i iskediul tam ta personal nga paggigiammu tu Biblia, mabbalin ittam tu malalaki ta pangusa tatun tapenu tudduan i tanakuan.​—2 Tim. 3:16, 17.

13. Segun ta Hebreo 5:14, kunnasi tam nga mammuan i nadduman na mapia anna marake?

¹³ Ammuan i nadduman na mapia anna marake. Mawag tu masingan na tadday nga suddalu i mappange nga peligro tapus lillitanna yatun. Kawagattam gapa nga ammuan i situasion ira nga mamappeligro nittam tapus lillitan danatun. (Prov. 22:3; bibbigan i Hebreo 5:14.) Angngariganna, mawag tu piliattam tu mapia i dibersiottam. Kanayun nga nakivuan tu imoral i pagiraw ira ta TV anna i pelikula ira. Mamallussaw ta Dios i kuddanatun anna siguradu nga mamappeligro yatun nittam. Yatutta ibita tam i kunnatun ira nga dibersion nga sisinu nga mamakkafi ta aya tam ta Dios.​—Efe. 5:5, 6.

14. Anni i efektona kani Daniel turi ta natindianna nga marake i kukukuanna?

¹⁴ Kunnaw ngana i nesimmu kani Daniel nga nakagi ta gafu. Natindianna gabbalaman nga marake i maggayang tu vayolente anna makademonio ira nga video game. Yatutta narresearch yayya ta Watchtower Library tapenu marubanna i problemana. Anni i efekto natun nisa? Niyemmanna ngana i paggayang ta marake ira nga video game anna i subscription-na ta online game anna ari ngana yayya nga makiggayang ta tanakuan. Kunni Daniel, “Imbes tu maddian ngà laman ta balay nga maggayang tu video game, mallawa-lawan ngà ngana gapa onu makikavulu ta kokkofukku ta kongregasion.” Sangawe, payunir anna elder ngana si Daniel.

15. Ngatta delikadu i falsu ira nga istoria?

¹⁵ Maparigattam si Timoteo nu masingattam gapa nga delikadu i informasion ira nga ipalakag na apostata ira. (1 Tim. 4:1, 7; 2 Tim. 2:16) Angngariganna, baka mangiwara-wara ira tu kinaladdug meyannung ta wawwaragi tam onu falsu ira nga istoria tapenu paddudattam i organisasion ni Jehova. Pakkafian danatun i pangurug tam. Ariattam nakuan nga kurugan danatun. Ngatta? Megafu ta i kuddanatun nga istoria ay iwara-wara na “tolay ira nga marakay i appana-panono da, ta ariad-da ngana ammu i kurug.” Kayàda i “makitturu-turia anna makiddiddiskusion.”  (1 Tim. 6:4, 5) Kayàda gapa nga kurugattam i panara-daralda tapenu massuspetcha ittam ta wawwaragi tam.

16. Anni ira i makalsa ta fokus tam?

¹⁶ Maffokus. Bilang “mekatalo nga suddalu ni Cristo Jesus,” mawag tu maffokus si Timoteo ta ministeriona anne ta mappa-istorbo ta sekular nga addetan onu material nga ganna-gannug. (2 Tim. 2:3, 4) Kagitta ni Timoteo, manaki tam nga makagurun nittam i pakkaraga tam ta mas aru nga material nga ganna-gannug. Megafu ta “makelogo nga pakapangngua na kinariku,” makkafi i pangaya tam kani Jehova, i appresasiottam ta Uvovugna, anna i pakkaraga tam nga ikagi yatun ta tanakuan. (Mat. 13:22, NW ) Mawag tu pattalupaddianattam tu simple i pattoletam tapenu meyusa tam i tiempo anna siki-sikattam ta ‘tulu-tuloy nga pamagollu ta Pappatulan.’​—Mat. 6:22-25, 33, NW.

17-18. Kunnasi tam nga malillitan i mamappeligro ta espiritualidad tam?

¹⁷ Iplanom nga magguyu insigida. Mawag tu dati ngana nga neplano na tadday nga suddalu nu kunnasina nga protektan i baggina. Tapenu matangngallattam i ganna-gannug nga nekargo nittam ni Jehova, mawag tu insigida ittam nga magguyu nu meparubang ittam ta peligro. Kunnasi tam nga makua yatun? Mawag tu dati tam ngana nga ninono nu anni i reaksiottam ta tadday nga kapurueba.

¹⁸ Nonopan yaw: Nu magatende ta tadday nga okasion, ngatta tamma ta ipalegda ta audience i karannian nga pallawanan nige nga mamegafu i programa? Tapenu insigida ira nga makapanaw nu egga i emergency. Kunnatun gapa i situasiottam. Makasta nu dati tam ngana nga pinannonopan nu kunnasi ittam makapanaw nu gavva nga mappasingan i imoral anna brutal nga eksena onu i apostata ira nga material ta Internet onu ta TV. Nu dati tam ngana nga naplano i kuattam ta posible nga mesimmu, insigida ittam nga makaguyu tapenu panawan i mamappeligro ta espiritualidad tam anna marenu ittam lagapa ta pagimamma ni Jehova.​—Sal. 101:3; 1 Tim. 4:12.

19. Anni ira i bendisiottam nu matangngallattam i nabalor ira nga gannug nga nekargo ni Jehova nittam?

¹⁹ Mawag tu tangngallattam i nabalor ira nga gannug nga nekargo ni Jehova nittam, nelagum tatun i nabalor ira nga kinakurug ta Biblia anna i pribilehio tam nga ituddu danatun ta tanakuan. Nu kuattam yatun, mapeggan ittam tu marenu nga konsensia, kurug nga gakkag ta pattolay, anna magayayya ittam nga uffunan i tanakuan nga makilala si Jehova. Ta uffun ni Jehova, matangngallattam i nekargo ta nittam.​—1 Tim. 6:12, 19.