1-2. Sigun iti 1 Timoteo 6:20, ania ti naitalek ken Timoteo?

MASANSAN nga italektayo iti sabsabali dagiti napateg a sanikuatayo. Kas pagarigan, mabalin nga idepositotayo ti kuartatayo iti banko ta ekspektarentayo a natalged dayta ken saan a mapukaw wenno matakaw. Ammotayo ngarud ti kaipapanan ti panangitalek iti sabali a tao iti maysa a banag a napateg kadatayo.

² Basaen ti 1 Timoteo 6:20. Impalagip ni apostol Pablo ken Timoteo nga adda nakapatpateg a naawatna—ti umiso a pannakaammo iti panggep ti Dios para iti sangatauan. Naitalek met ken Timoteo ti pribilehio a ‘panangikasaba iti sao’ ken ‘panangaramid iti trabaho ti ebanghelisador.’ (2 Tim. 4:2, 5) Imparegta ni Pablo ken Timoteo a saluadanna ti naitalek kenkuana. Kas ken Timoteo, adda met dagiti napateg a banag a naitalek kadatayo. Ania dagita? Ken apay a masapul a saluadantayo ti intalek ni Jehova kadatayo?

3-4. Ania ti dadduma a rason a napateg dagiti kinapudno iti Biblia?

³ Inikkannatayo ni Jehova iti umiso a pannakaammo maipapan kadagiti napateg a kinapudno iti Saona, ti Biblia. Napateg dagitoy a kinapudno ta isurodatayo no kasano ti maaddaan iti nasayaat a relasion ken Jehova ken ilawlawagda no ania ti mangyeg iti pudno a kinaragsak. Idi inawat ken inyaplikartayo dagita a kinapudno, nawayawayaantayo manipud kadagiti ulbod a sursuro ken immoral nga aramid.—1 Cor. 6:9-11.

⁴ Ti sabali pay a rason no apay a napateg dagiti kinapudno iti Sao ti Dios ket ipakaammo laeng dagita ni Jehova kadagiti napakumbaba nga “addaan iti umiso a kababalin.” (Ara. 13:48) Akseptaren dagita a tattao ti matalek ken masirib nga adipen nga us-usaren ni Jehova a mangilawlawag ita kadagita a kinapudno. (Mat. 11:25; 24:45) Saantayo a maawatan dagita a datdatayo,  ken awanen ti napatpateg pay ngem iti pannakaawat kadagita.—Prov. 3:13, 15.

5. Ania pay ti intalek ni Jehova kadatayo?

⁵ Intalek met kadatayo ni Jehova ti pribilehio a mangisuro iti kinapudno maipapan kenkuana ken kadagiti panggepna. (Mat. 24:14) Nakapatpateg ti mensahetayo ta makatulong dayta kadagiti tattao tapno agbalinda a paset ti pamilia ni Jehova ken maaddaanda iti gundaway a manggun-od iti agnanayon a biag. (1 Tim. 4:16) Dakkel man wenno bassit ti maar-aramidantayo iti ministerio, supsuportarantayo ti kapatgan a trabaho a maar-aramid iti kaaldawantayo. (1 Tim. 2:3, 4) Anian a nagdakkel a pribilehio ti agbalin a katrabahuan ti Dios!—1 Cor. 3:9.

6. Ania ti napasamak iti dadduma a saan a nagaluad?

⁶ Dadduma a kapanawenan ni Timoteo dida inapresiar ti pribilehioda kas katrabahuan ti Dios. Gapu ta inayat ni Demas daytoy a sistema ti bambanag, tinallikudanna ti pribilehiona nga agserbi a kadua ni Pablo. (2 Tim. 4:10) Nalawag a binaybay-an da Figelo ken Hermogenes ti ministerioda gapu ta mabutengda a maidadanes a kas iti napasaran ni Pablo. (2 Tim. 1:15) Nagapostasia da Himeneo, Alejandro, ken Fileto ket pinanawanda ti kinapudno. (1 Tim. 1:19, 20; 2 Tim. 2:16-18) Nalawag a dati a nabileg ti espiritualidad dagita a tattao, ngem saanda a sinaluadan ti napateg a naitalek kadakuada.

7. Ania dagiti taktika nga us-usaren ni Satanas maibusor kadatayo?

⁷ Ania ti ar-aramiden ni Satanas tapno ibbatantayo dagiti gameng nga intalek ni Jehova kadatayo? Kitaentayo ti dadduma a taktika ni Satanas. Us-usarenna ti paglinglingayan ken ti media tapno isaknapna dagiti prinsipio, panagpampanunot, ken kababalin a namnamaenna a mangpalukay iti panangpetpettayo iti kinapudno. Padpadasennatayo a butbutngen babaen ti panangpilit dagiti kakaduatayo wenno ti panangidadanes tapno isardengtayo ti mangasaba. Ikagkagumaannatayo nga allukoyen a dumngeg iti “ulbod a ‘pannakaammo’” dagiti apostata tapno panawantayo ti kinapudno.—1 Tim. 6:20, 21.

8. Ania ti masursurom iti kapadasan ti kabsat a ni Daniel?

⁸ No ditay agannad, mabalin nga in-inut a lumukay ti panangpetpettayo iti kinapudno. Usigentayo ti kapadasan ni Daniel, * a pagay-ayatna dagiti video game. Inlawlawagna: “Sangapulo ti tawenko idi inrugik ti nagay-ayam iti video game. Idi damo, saan met a dakes dagiti ay-ayamek. Ngem in-inut a rinugiak ti nagay-ayam kadagiti naranggas ken  dinedemonio a video game.” Idi agangay, agarup 15 nga orasen kada aldaw nga agay-ayam. “Iti un-unegko, ammok a ti klase ti video game nga ay-ayamek ken ti kaadu ti oras a panagay-ayamko ti mangyad-adayon kaniak ken Jehova. Ngem kimmalion ti konsiensiak ket diakon patien nga agaplikar kaniak dagiti prinsipio ti Biblia,” kinuna ni Daniel. Ti di madmadlaw nga impluensia ti panaglinglingay ti nalaka a mangpalukay iti panangpetpettayo iti kinapudno. No mapasamak dayta, mapukawtayo ti napateg a bambanag nga inted kadatayo ni Jehova.

9. Sigun iti 1 Timoteo 1:18, 19, ania ti nangipadaan ni Pablo ken Timoteo?

⁹ Basaen ti 1 Timoteo 1:18, 19. Impada ni Pablo ni Timoteo iti maysa a soldado ken pinaregtana nga ‘itultuloyna ti nasayaat a pannakigubatna.’ Saan a literal no di ket naespirituan dayta a pannakigubat. Kadagiti ania a pamay-an a dagiti Kristiano ket kas kadagiti makigubgubat a soldado? Ania dagiti kualidad a masapul a patanorentayo kas soldado ni Kristo? Usigentayo ti lima a masursurotayo iti ilustrasion ni Pablo. Makatulong dagitoy tapno mapetpetantayo ti kinapudno.

10. Ania ti debosion iti Dios, ken apay a kasapulantayo dayta?

¹⁰ Patanoren ti debosion iti Dios. Ti nasayaat a soldado ket matalek. Ikagumaanna ti lumaban tapno maprotektaranna ti ay-ayatenna wenno ti banag a napateg kenkuana. Pinaregta ni Pablo ni Timoteo a maaddaan iti debosion iti Dios—kayatna a sawen, napudno a relasion iti Dios. (1 Tim. 4:7) No naun-uneg ti ayat ken debosiontayo iti Dios, nabilbileg met ti tarigagaytayo a mangpetpet iti kinapudno.—1 Tim. 4:8-10; 6:6.

11. Apay a kasapulantayo ti disiplina iti bagi?

¹¹ Patanoren ti disiplina iti bagi. Masapul a disiplinado ti maysa a soldado tapno kanayon a nakasagana a makigubat. Kanayon a nakasagana ni Timoteo a makigubat iti naespirituan ta sinurotna ti balakad ni Pablo nga adaywanna dagiti dakes a tarigagay, ikagumaanna nga ipakita dagiti nasayaat a kualidad, ken makilangen kadagiti kapammatianna. (2 Tim. 2:22) Agkasapulan dayta iti disiplina iti bagi. Masapul a disiplinadotayo tapno mangabaktayo iti pannakigubattayo kadagiti tarigagay ti lasag. (Roma 7:21-25) Kasapulantayo met ti disiplina iti bagi tapno maitultuloytayo nga ikkaten ti daan a personalidadtayo ken maisuottayo ti baro. (Efe. 4:22, 24) Ket no nabannogtayo iti agmalem a trabahotayo, baka masapul a pilitentayo ti bagitayo a makigimong.—Heb. 10:24, 25.

12. Kadagiti ania a pamay-an a mapasayaattayo ti panangusartayo iti Biblia?

¹² Masapul nga agsanay ti maysa a soldado a mangusar kadagiti armasna. Tapno agbalin nga eksperto, masapul a regular nga aramidenna dayta. Kasta met, masapul nga agbalintayo a nalaing a mangusar iti Sao ti Dios. (2 Tim. 2:15) Masursurotayo no kasano nga aramiden dayta kadagiti gimongtayo. Ngem tapno makombinsirtayo dagiti tattao a talaga a napateg ti kinapudno iti Biblia, masapul nga adda regular a personal a panagadaltayo iti Biblia. Masapul nga usarentayo ti Sao ti Dios tapno bumileg ti pammatitayo. Kaipapanan dayta a saantayo laeng a basta basaen ti Biblia. Masapul nga utobentayo ti mabasbasatayo iti dayta ken ag-research-tayo kadagiti publikasiontayo tapno umiso ti pannakaawat ken panangyaplikartayo iti Kasuratan. (1 Tim. 4:13-15) Iti kasta, mausartayo ti Sao ti Dios a mangisuro iti sabsabali. Manen, kaipapanan dayta a saantayo laeng a basta basaen ti maysa a teksto ti Biblia. Kayattayo a tulongan ida  a mangtarus iti teksto ken no kasanoda nga iyaplikar dayta. Isu a no adda regular a personal a panagadaltayo iti Biblia, mapasayaattayo ti abilidadtayo a mangusar iti Sao ti Dios a mangisuro iti sabsabali.—2 Tim. 3:16, 17.

13. Maitunos iti Hebreo 5:14, apay a masapul nga agpanunottayo a naimbag?

¹³ Agpanunot a naimbag. Masapul a sipapanunot ti maysa a soldado iti posible a peggad tapno maliklikanna dayta. Masapul met a sursuruentayo nga ilasin dagiti situasion a makadangran ket agtignaytayo tapno maliklikantayo ti peggad. (Prov. 22:3; basaen ti Hebreo 5:14.) Kas pagarigan, masapul a pilientayo a naimbag ti paglinglingayan ken pagpalpaliwaantayo. Dagiti pabuya iti telebision ken pelikula masansan nga ipakitada ti immoral nga ar-aramid. Kagura ti Dios dagita nga aramid ket sigurado a makadangran kadatayo. Isu a liklikantayo ti paglinglingayan nga in-inut a mangpabaaw iti ayattayo iti Dios.—Efe. 5:5, 6.

14. Kasano a nakatulong ken Daniel ti panagpanunotna a naimbag?

¹⁴ Nagpanunot a naimbag ni Daniel, a nadakamat itay. Naamirisna a problemana ti panagay-ayam kadagiti naranggas ken dinedemonio a video game. Isu a nag-research iti Watchtower Library tapno agbirok iti impormasion a makatulong iti panangsolbarna iti problemana. Ania ti naitulong dayta kenkuana? Naisardengna ti agay-ayam kadagiti dakes a video game. Kinanselarna dagiti subscription-na kadagiti online game ken insardengna ti makiay-ayam iti dadduma a player. Kinuna ni Daniel: “Imbes nga agay-ayamak kadagiti video game, rummuarakon iti balay tapno agaramid iti nadumaduma nga aktibidad wenno makikaduaak kadagiti gagayyemko iti kongregasion.” Maysa itan a payunir ken panglakayen ni Daniel.

15. Apay a napeggad dagiti di umiso nga estoria?

¹⁵ Kas ken Timoteo, masapul met a panunotentayo a naimbag dagiti peggad ti ulbod nga impormasion nga iwarwaras dagiti apostata. (1 Tim. 4:1, 7; 2 Tim. 2:16) Kas pagarigan, mabalin nga agiwarasda kadagiti di umiso nga estoria maipapan kadagiti kakabsattayo wenno agimulada iti panagduadua maipapan iti organisasion ni Jehova. Mapakapuy dagita a di umiso nga impormasion ti pammatitayo. Masapul a saantayo nga agpaallilaw iti kasta a propaganda. Apay? Gapu ta dagitoy a kita ti estoria ket iwarwaras “dagiti tattao a dakes ti  panunotda ken saan a makaammo iti kinapudno.” Panggepda ti mangirugi iti “panagsusupiat ken panagdedebate.” (1 Tim. 6:4, 5) Kayatda a patientayo ti pammadakesda tapno mapukaw ti panagtalektayo kadagiti kakabsattayo.

16. Ania dagiti pakasingaan a masapul a liklikantayo?

¹⁶ Liklikan dagiti pakasingaan. Kas “pudno a soldado ni Kristo Jesus,” masapul idi nga agtalinaed ni Timoteo a nakapokus iti ministeriona imbes nga agpasinga iti nailubongan wenno namaterialan a bambanag. (2 Tim. 2:3, 4) Kas ken Timoteo, ditay ipalubos a singaennatayo ti tarigagay a maaddaan iti ad-adu a material a banag. Ti “kinabaknang a mangal-allilaw iti adu” madadaelna ti ayattayo ken Jehova, ti apresasiontayo iti Sao ti Dios, ken ti tarigagaytayo a mangipakaammo iti dayta. (Mat. 13:22) Masapul a pagtalinaedentayo a simple ti biagtayo ken usarentayo ti tiempo ken pigsatayo tapno ‘maitultuloytayo a sapulen nga umuna ti Pagarian.’—Mat. 6:22-25, 33.

17-18. Ania dagiti mabalintayo nga aramiden tapno saan nga agpeggad ti espiritualidadtayo?

¹⁷ Agsagana tapno makapagtignay a dagus. Masapul nga iplano ti soldado no ania ti aramidenna. Tapno masaluadantayo ti bambanag nga intalek ni Jehova kadatayo, masapul nga agtignaytayo a dagus no adda makitatayo a peggad. Ania ti makatulong kadatayo? Masapul nga iplanotayo ti aramidentayo no adda peggad.

¹⁸ Kas pagarigan, no mapantayo iti maysa a pabuya, masansan a mayanunsio a biroken dagiti agbuya ti kaasitgan a pagruaran sakbay a mangrugi ti programa. Apay? Tapno alistoda a makaruar no adda emergency. Kasta met, mabalin nga iplanotayo ti “pagruarantayo” no bigla a makakitatayo iti immoral nga eksena, nakaro a kinaranggas, wenno propaganda dagiti apostata bayat nga agin-Internet-tayo wenno agbuybuyatayo iti TV. No saganaantayo ti posible a mapasamak, dagus a maprotektarantayo ti espiritualidadtayo ket agtalinaedtayo a nadalus iti imatang ni Jehova.—Sal. 101:3; 1 Tim. 4:12.

19. Ania dagiti bendision a maawattayo no saluadantayo ti napateg a bambanag nga inted kadatayo ni Jehova?

¹⁹ Masapul a saluadantayo ti napateg a bambanag nga intalek kadatayo ni Jehova—dagiti napateg a kinapudno iti Biblia ken ti pribilehiotayo a mangisuro kadagita. No aramidentayo dayta, maaddaantayo iti nadalus a konsiensia, makapnek a biag, ken rag-o a tumulong kadagiti tattao a mangam-ammo ken Jehova. Iti tulongna, masaluadantayo dagiti intalekna kadatayo.—1 Tim. 6:12, 19.