1-2. 1 Timohti 6:20 hku nga yang Timohti hpe hpa ap da ai kun?

ANHTE gaw, tinang manu shadan ai lam ni hpe makawp maga ya na matu kaga ni hpe ap da chye ai. Ga shadawn, tinang a ja gumhpraw shimlum hkra, n mat hkra, n mai lagu hkra, gumhpraw dum hta ap da chye ai. Dai majaw, tinang manu shadan ai lam ni hpe kaga ni hpe kamhpa let ap ai ngu ai gaw hpa hpe tsun mayu ai lam anhte chye na ai.

² 1 Timohti 6:20 hpe hti u. * Kasa Pawlu gaw, shinggyim masha ni a matu Karai a yaw shada lam hte seng ai tengman ai machye machyang hpe Timohti lu da ai ngu tsun ai. Dai gaw grai manu dan ai. “Mungga hpe hkaw dan” na ahkang, “kabu gara shi ga hkaw dan” na ahkang hpe mung Timohti ap da hkrum ai. (2 Tm 4:2, 5) Kamhpa let ap da ai lam hpe makawp maga na matu Timohti hpe Pawlu n-gun jaw ai. Timohti zawn sha, anhte mung manu dan ai lam ni hpe ap da hkrum ai. Dai ni gaw hpa ni rai kun? Yehowa jaw da ai manu dan ai lam ni hpe hpa majaw makawp maga ra ai kun?

3-4. Chyum Laika tengman lam manu dan ai lam nkau mi gaw hpa rai kun?

³ Yehowa gaw, Chyum Laika kaw na manu dan tengman lam re ai tup hkrak tengman ai machye machyang jaw da ai. Dai tengman ai lam ni gaw manu dan ai. Yehowa hte kaja ai hku hkau lam lu la mai ai lam, prat hta jet ai ngwi pyaw lam lu la mai ai lam ni hpe tsun da ya ai majaw re. Chyum Laika tengman lam hpe hkap la nna, dai hte maren asak hkrung na nga yang, shut shai ai sharin achyin ai lam ni, n kaja ai akyang lailen ni a mayam byin ai kaw nna lawt lu na re.​—1 Ko 6:9-11.

 ⁴ Chyum Laika tengman lam a manu dan ai kaga lam langai gaw, “Yehowa lau la” ai shagrit shanem ai ni hpe sha, dai tengman ai lam ni hpe hpaw dan ai majaw re. (Yhn 6:44) Shagrit shanem ai ni gaw, dai ni na aten hta tengman lam garan kachyan ya na matu, Yehowa akyu jashawn nga ai sadi dung ai hte myitsu ai mayam hpe hkap la ai. (Mat 11:25; 24:45) Chyum Laika tengman lam hpe tinang hkrai n chye na lu ai. Dai ni hpe chye na ai gaw, manu dan dik htum re.​—Gsh 3:13, 15.

5. Gara ahkaw ahkang hpe mung anhte hpe Yehowa ap da ai kun?

⁵ Karai Kasang hte seng ai lam, shi a yaw shada lam hte seng ai tengman lam hpe kaga ni hpe tsun dan na ahkang Yehowa jaw da ai. (Mat 24:14) Anhte hkaw tsun ai shiga gaw grai manu dan ai. Yehowa a nta masha byin wa hkra, masha ni hpe karum ya nna, htani htana asak lu na matu lam hpaw ya ai majaw re. (1 Tm 4:16) Anhte langai hpra gaw hkaw tsun bungli hta, kachyi mi sha raitim, law law raitim, shang lawm nga ai gaw grai ahkyak ai bungli hpe madi shadaw ya nga ai re. (1 Tm 2:3, 4) Karai Kasang a shingdep shingtau byin lu ai ahkang gaw, laklai ai ahkaw ahkang re.​—1 Ko 3:9.

6. Manu shadan ai myit mat mat ai nkau gaw hpa byin wa ai kun?

⁶ Karai Kasang a shingdep shingtau byin lu ai ahkang hpe Timohti prat na Hkristan nkau gaw, manu n shadan ai. Dema gaw, mungkan hpe tsawra mat ai majaw, Pawlu hte arau magam gun na ahkang hpe kau da mat ai. (2 Tm 4:10) Hpugelu hte Haramoge gaw, Pawlu zawn zingri zingrat hkrum na tsang nna, hkaw tsun bungli hpe kau da mat ai rai na re. (2 Tm 1:15) Humeni, Alesandru hte Hpilitu gaw, makam masham htak mat nna, tengman ai tara hpe kau da mat ai. (1 Tm 1:19, 20; 2 Tm 2:16-18) Shanhte yawng gaw, lai wa sai aten hta makam masham ngang kang ai ni raitim, ap da ai lam hpe manu n shadan ma ai.

7. Satan akyu jashawn nga ai ladat nkau gaw hpa rai kun?

⁷ Yehowa ap da ai manu dan ai lam ni hpe kau da na matu anhte hpe Satan gara hku chyam dinglik nga ai kun? Satan a ladat nkau hpe yu yu ga. Yehowa hpe tsawra ai myit, madat mara mayu ai myit angwi ngwi mat mat shangun ai myit mang ai lam ni, galaw ai lam ni nga wa hkra, shangwi shapyaw ai lam hte media hpe Satan akyu jashawn nga ai. Manang shada da a shadut ai lam hte zingri zingrat ai lam hpe akyu jashawn nna hkrit ai myit nga wa hkra, matut n hkaw tsun lu hkra Satan shakut nga ai. Tengman ai lam hpe kau da mat hkra, makam masham htak mat ai ni a “shut shai ai machye machyang” de lawm mat hkra mung hkalem nga ai.​—1 Tm 6:20, 21, NW.

8. Hpunau Deniye a mabyin kaw nna hpa chye lu ai kun?

 ⁸ Anhte n sadi yang, tengman ai tara kaw na angwi ngwi tsan mat wa chye ai. Video gim ni hpe ra sharawng ai Deniye * a lam hpe myit yu u. “Ngai asak 10 ning daram kaw nna video gim ni ginsup hpang wa ai. Nnan hta gaw, shoihpa nau n nga ai gim ni ginsup ai. Angwi ngwi hte zingri zingrat ai, nat hte seng ai gim ni ginsup wa ai ngu” shi tsun ai. Hpang jahtum, lani mi hta hkying hkum 15 daram ginsup wa ai. “Ngai ginsup ai amyu hpan hte ahkying gaw, Yehowa hte ngai hpe tsan gang mat shangun ai hpe chye ai. Raitim, tinang a myit gaw tinang hpe bai hkalem nna, Chyum Laika hte maren n galaw ra ai ngu myit wa ai” ngu Deniye tsun ai. Dai majaw, anhte n sadi yang, shangwi shapyaw ai lam gaw tengman ai tara hpe ngang ngang jum da na matu yak shangun chye ai. Dai hku byin wa yang, Yehowa ap da ai manu dan ai lam ni hpe manu shadan ai myit mat mat chye ai.

9. 1 Timohti 1:18, 19 hku nga yang Timohti hpe Pawlu kadai hte shingdaw da ai kun?

⁹ 1 Timohti 1:18, 19 hpe hti u. Pawlu gaw Timohti hpe hpyen la langai hte shingdaw da nna, ‘kaja ai gasat gala hpe’ matut gasat nga na matu n-gun jaw da ai. Ndai gasat gala ai gaw wenyi majan hpe tsun mayu ai re. Hkristan ni gaw, hpyen la ni zawn, gara lam ni hku nna majan gasat nga ai kun? Hkristu a hpyen la ni hku nna gara atsam ningja ni shalat ra ai kun? Pawlu a ga shadawn kaw nna sharin la mai ai lam 5 hpe yu yu ga. Dai lam ni gaw, tengman ai tara hpe ngang ngang jum da na matu karum ya lu ai.

10. Karai Kasang hpe manoi manat ai ngu ai gaw hpa rai kun? Hpa majaw ra ai kun?

¹⁰ Karai Kasang hpe manoi manat nga u. Kaja ai hpyen la gaw, sadi dung ai. Shi tsawra ai marai langai ngai (sh) manu shadan ai lama ma hpe makawp maga na matu shakut shaja let gasat ai. Karai Kasang hpe manoi manat na matu, lam mi hku tsun na nga yang, Karai Kasang hpe sadi dung na matu Timohti hpe Pawlu n-gun jaw wa ai. (1 Tm 4:7) Karai Kasang hpe tsawra ai myit hte Karai Kasang hpe manoi manat mayu ai myit rawt jat wa yang, tengman ai tara hpe ngang ngang jum da mayu ai myit grau rawt jat wa na re.​—1 Tm 4:8-10; 6:6.

11. Hpa majaw tinang hkum tinang hkang ra ai kun?

¹¹ Tinang hkum tinang hkang u. Hpyen la langai gaw, majan gasat ai hta jin jin rai nga na matu tinang hkum tinang hkang ra ai. Shut shai ai ra marin ai lam ni hpe koi na matu, kaja ai atsam ningja ni hpe shalat la na matu, makam masham bung ai ni hte kanawn mazum na matu Pawlu htet da ai hpaji jaw ga ni hpe Timohti hkan sa ai majaw, makam masham hta matut ngang kang nga ai. (2 Tm 2:22) Dai hku byin lu na matu tinang hkum tinang hkang ra ai. Anhte mung hkum shan ra marin ai myit hpe gasat ai majan hta awng dang na matu tinang hkum tinang hkang ra ai. (Rom 7:21-25) Gawng shing-yan dingsa hpe raw kau nna, gawng shing-yan ningnan hpe hpun na matu tinang hkum tinang hkang ra ai. (Ehp 4:22, 24) Grai pu ba taw ai raitim, shana maga hta galaw ai zuphpawng de sa na matu, tinang hkum tinang hkang ra chye ai.​—Heb 10:24, 25.

12. Gara lam ni hku nna Chyum Laika hpe atsawm chye lang wa na kun?

¹² Hpyen la langai gaw laknak ni lang chye hkra shaman da ra ai. Atsawm chye lang na matu, ayan akyu jashawn nga ra ai. Anhte mung, Chyum Laika hpe atsawm sharin achyin ya lu ai atsam nga ra ai. (2 Tm 2:15) Dai atsam ni hpe zuphpawng ni kaw nna lu la mai ai. Chyum Laika tengman ai tara manu dan ai hpe kaga ni kam wa hkra sharin ya ra ai. Dai hku galaw lu na matu tinang mung Chyum Laika ayan  hkaja nna, makam masham ngang kang hkra gawgap ra ai. Chyum Laika hti ai hta n ga galaw ra ai. Hti ai lam ni hpe myit sawn sumru ra ai. Anhte a laili laika ni hta sawk sagawn ra ai. Rai yang she, Chyum Laika hpe jaw ai hku chye na nna, tatut hkan sa lu na re. (1 Tm 4:13-15) Chyum Laika hpe akyu jashawn nna, kaga ni hpe sharin ya lu ai. Dai shaloi hta mung, Chyum Laika hpe hti dan ai daram hte sha n mai ai. Madat nga ai ni chye na na matu, tatut akyu jashawn lu ai lam ni hpe chye wa hkra karum ya u. Chyum Laika hpe ayan hkaja na nga yang, atsawm sharin ya lu ai ni byin wa na re.​—2 Tm 3:16, 17.

13. Hebre 5:14 hku nga yang garan ginhka chye ai lam nga na matu hpa majaw ra ai kun?

¹³ Garan ginhka chye u. Hpyen la langai gaw, shoihpa hpe tau hkrau mu nna koi yen chye ra ai. Anhte ni mung, shoihpa byin chye ai masa ni hpe tau hkrau mu nna koi ra ai. (Gsh 22:3; Hebre 5:14 hpe hti u.) Ga shadawn, ban sa ai lam, shangwi shapyaw ai lam ni hpe hpaji rawng ai hku lata ra ai. Nkau TV lamang ni, sumla hkrung ni hta hpye ai amu hte seng ai sumla ni hpe madun chye ai. Karai Kasang n ra ai dai akyang ni gaw, anhte hpe shoihpa byin shangun chye ai. Dai majaw, Karai Kasang hpe tsawra ai myit angwi ngwi yawm mat chye ai shangwi shapyaw lam ni hpe koi ra ai.​—Ehp 5:5, 6.

14. Garan ginhka chye ai atsam gaw Deniye hpe gara hku karum ya wa ai kun?

¹⁴ Dawsa nna, nat hte seng ai video gim ni gaw, shoihpa nga ai lam Deniye chye wa ai majaw, Sin Langchyi Laika Dum hta, tam sawk sagawn wa ai. Shi hpe gara hku karum ya wa ai kun? N htap htuk ai video gim ni, kaga ginsup ai masha ni hte matut mahkai nna ginsup ai lam ni hpe jahkring kau ai. “Ya nga yang, video gim ginsup ai aten hpe nta shinggan hta lama ma galaw ai, hpunau nauna ni hte kanawn mazum ai lam a matu jailang nga ai” ngu Deniye tsun ai. Ya shi gaw, ningshawng hte myitsu salang hku nna magam gun nga ai.

15. Shut shai ai shiga ni gaw hpa majaw shoihpa nga ai kun?

¹⁵ Makam masham htak mat ai ni shabra da ai shut shai ai shiga ni a shoihpa hpe Timohti zawn anhte mung garan ginhka chye ra ai. (1 Tm 4:1, 2, 7; 2 Tm 2:16) Ga shadawn, makam masham htak mat ai ni gaw, hpunau nauna ni hte uhpung hpe ntsen ai myit nga wa hkra, shiga jashut ni hpe shabra chye ai. Dai shiga ni gaw, anhte a makam masham hpe gawng kya mat shangun chye ai. Dai zawn shiga ni hpe koi ra ai. “Myit hten tsam mat ai ni, tengman ai tara  n nga ai ni” gaw, “dang rang hkat na matu, ga law hkat na matu” yaw shada lam hte n jaw ai shiga ni hpe shabra nga ai majaw re. (1 Tm 6:4, 5, NW) Makam masham htak mat ai ni gaw, shanhte a masu magaw ai ga ni kam shangun mayu nna, hpunau nauna ni a ntsa ntsen ai myit nga shangun ai.

16. Myit bra shangun ai gara lam ni hpe koi ra ai kun?

¹⁶ Myit bra shangun chye ai lam ni hpe koi u. “Hkristu Yesu a hpyen ma kaja” hku nna, Timohti gaw mungkan a bungli ni, arung arai ni tam ai majaw myit bra mat na malai, hkaw tsun bungli hpe myit maju jung wa ai. (2 Tm 2:3, 4) Arung arai ra marin ai myit a majaw, myit n bra mat ai Timohti zawn anhte mung byin mayu ga ai. “Sut gan marin myit” gaw, Yehowa hpe tsawra ai myit, Chyum Laika hpe manu shadan ai myit, Chyum Laika tengman lam hpe hkaw tsun mayu ai myit mat mat chye ai. (Mat 13:22, JCLB) Prat hpe asan sha tawn ra ai. Tinang a aten hte n-gun atsam hpe akyu jashawn nna, mungdan hpe shawng tam ra ai.​—Mat 6:22-25, 33.

17-18. Yehowa hte hku hkau ai lam hpe gara hku makawp maga lu ai kun?

¹⁷ Kalang ta bai htang chye hkra hkyen lajang da u. Hpyen la langai gaw tinang hkum tinang gara hku makawp maga ra na hpe tau hkrau lajang da ra ai. Anhte mung, Yehowa ap da ai lam ni hpe makawp maga na matu, shoihpa hpe mu ai hte kalang ta koi chye ra ai. Kalang ta koi lu na matu hpa gaw karum ya lu na kun? Tau hkrau hkyen lajang da ai hku nna re.

¹⁸ Ga shadawn, poi langai ngai de sa ai shaloi, poi garai n hpang shi yang pru ai shara hpe tam da na matu, poi sa lung ai ni hpe sadi jaw chye ai. Hpa majaw kun? N myit mada ai lam ni byin wa ai shaloi, kalang ta pru lu na matu re. Anhte mung, intanet lang ai shaloi, sumla hkrung (sh) TV yu ai shaloi, hpye ai amu hpe madun da ai sumla ni, grai dawsa ai sumla ni, makam masham htak mat ai ni mara da ai lam ni pru wa ai shaloi, kalang ta bai htang chye hkra tau hkrau lajang da ra ai. Byin wa chye ai lam ni a matu, tau hkrau hkyen lajang da na nga yang, Yehowa hte hku hkau ai lam hpe makawp maga lu nna, shi a man hta matut san seng nga lu na re.​—Shk 101:3; 1 Tm 4:12.

19. Yehowa ap da ai manu dan ai lam ni hpe makawp maga yang gara shaman chyeju ni hkamsha lu na kun?

¹⁹ Yehowa ap da ai manu dan ai lam ni hpe anhte makawp maga ra ai. Dai hta, manu dan ai Chyum Laika tengman ai tara hte dai tara hpe sharin achyin ya lu ai ahkang ni lawm ai. Rai yang, san seng ai myit nsam, lachyum nga ai prat, Yehowa a lam chye hkra kaga ni hpe karum ya ai kaw nna lu la ai ngwi pyaw ai lam hpe hkamsha lu na re. Yehowa ap da ai lam ni hpe Karai Kasang a karum shingtau ai lam hte matut makawp maga lu na re.​—1 Tm 6:12, 19.