1-2. Mutindu 1 Timoteo 6:20 ke monisa yo, nki Yehowa pesaka Timoteo?

MBALA mingi beto ke pesaka bantu ya nkaka bima na beto ya mfunu sambu bo bumbila beto. Mu mbandu, beto lenda bumba mbongo na beto na banki. Sambu beto ke tula ntima nde bo ta bumba yo mbote, yo ta vila ve to bo ta yiba yo ve. Yo ke monisa kibeni nde kupesa muntu ya nkaka kima ya mfunu sambu na kubumbila beto kele mbote.

² Tanga 1 Timoteo 6:20. Ntumwa Polo yibusaka Timoteo nde Yehowa pesaka yandi kima mosi ya mfunu mingi disongidila nzayilu ya sikisiki ya lukanu ya Nzambi sambu na bantu. Yehowa pesaka mpi Timoteo mukumba ya ‘kulonga nsangu’ mpi ya ‘kusala kisalu ya nsamuni.’ (2 Tim. 4:2, 5) Polo siamisaka Timoteo na kubumba mbote bima yina bo pesaka yandi. Bonso Timoteo, Yehowa me pesaka beto mpi bima ya mfunu mingi. Inki bima? Inki beto fwete sala sambu na kubumba mbote bimvwama yina Yehowa me pesaka beto?

3-4. Sambu na nki bakieleka ya Biblia kele mfunu mingi?

³ Yehowa me pesaka beto nzayilu ya sikisiki ya bakieleka ya mfunu yina kele na Ndinga na yandi, Biblia. Bakieleka yai kele mfunu sambu yo ke monisaka beto mutindu beto lenda sala kinduku ya mbote ti Yehowa mpi mambu yina beto fwete sala sambu na kuvanda ti luzingu ya kiese. Kana beto ke ndima bakieleka yai mpi ke sadila yo, beto ta katuka na kimpika ya malongi ya luvunu mpi ya mansoni.—1 Bak. 6:9-11.

⁴ Bakieleka ya Biblia kele mfunu mingi sambu Yehowa me songaka yo kaka na bantu ya kudikulumusa yina kele ti “nkadilu ya mbote.” (Bis. 13:48) Bantu yango ke ndimaka nzila yina Yehowa  ke sadilaka sambu na kupesa beto bakieleka yango bubu yai. (Mat. 11:25; 24:45) Beto lenda bakisa ve bakieleka yango mbote beto mosi mpi kubakisa yo kele mfunu mingi kuluta bima yonso.—Bing. 3:13, 15.

5. Inki Yehowa me pesaka beto diaka?

⁵ Yehowa me pesaka beto diaka dibaku ya kulonga bantu kieleka ya me tala yandi mpi balukanu na yandi. (Mat. 24:14) Nsangu yina beto ke longaka kele mfunu mingi kibeni sambu yo ke pesaka bantu dibaku ya kukota na dibuta ya Yehowa mpi ya kuzinga mvula na mvula. (1 Tim. 4:16) Ata beto ke samunaka mingi to fioti, beto yonso ke pesaka maboko na kisalu yai ya kuluta mfunu ya ke salama ntangu yai. (1 Tim. 2:3, 4) Beto kele ti dibaku ya nene ya kuvanda banduku ya kisalu ya Nzambi.—1 Bak. 3:9.

6. Inki kuminaka bantu ya nkaka yina bumbaka ve mbote bima yina Yehowa pesaka bo?

⁶ Na bilumbu ya Timoteo, bantu ya nkaka monaka ve mfunu ya dibaku na bo ya kuvanda banduku ya Nzambi. Mu mbandu, Demasi zolaka bima ya nsi-ntoto, yo yina yandi yambulaka dibaku na yandi ya kusala ti Polo. (2 Tim. 4:10) Yo ke monana nde Fizele ti Ermogene yambulaka kusamuna sambu bo vandaka kuwa boma nde bantu ta niokula bo mutindu bo vandaka kuniokula Polo. (2 Tim. 1:15) Imeneo, Alesandre mpi Filete kumaka baaposta mpi bo yambulaka kieleka. (1 Tim. 1:19, 20; 2 Tim. 2:16-18) Yo ke monana nde bantu yai yonso vandaka ntete ngolo na kimpeve kansi na nima bo kumaka kumona diaka ve mfunu ya bima yina Yehowa pesaka bo.

7. Inki mitambu Satana ke sadila sambu na kukusa beto?

⁷ Inki mutindu Satana ke sosaka kupusa beto na kuyambula bimvwama yina Yehowa me pesaka beto? Satana ke sadilaka mitambu mingi. Yandi ke sadilaka bansaka ya kulutisa ntangu mpi bima yina ke mwangaka bansangu sambu na kupanza bangindu mpi bikalulu yina lenda pusa beto na kuyambula kieleka. Yandi ke sosaka kupesa beto boma na nzila ya bambangika sambu beto yambula kusamuna. Yandi ke sosaka mpi kupusa beto na kundima “luvunu” ya baaposta ‘yina bo mosi ke bingaka nde “nzayilu”’ sambu beto yambula kieleka.—1 Tim. 6:20, 21.

8. Mbandu ya mpangi Daniele ke longa beto nki?

⁸ Kana beto keba ve malembe-malembe beto lenda yambula kieleka. Beto baka mbandu ya mpangi Daniele, * yina vandaka kuzola bansaka ya video. Yandi ke tuba nde: “Mono yantikaka kubula bansaka ya video ntangu mono vandaka ti bamvula kumi. Ntete mono  vandaka kubula bansaka yina vandaka mbi ve. Kansi malembe-malembe mono yantikaka kubula bansaka ya mubulu mpi ya kindoki.” Nsuka-nsuka, yandi kumaka kubula bansaka yango bangunga kiteso ya 15 konso kilumbu. Yandi ke yika nde: “Na kutuba masonga mono zabaka nde bansaka yina mono vandaka kubula mpi bantangu yina mono vandaka kulutisa na kubula yo vandaka kubebisa kinduku na mono ti Yehowa. Kansi ntima na mono vandaka kukusa mono nde bansiku ya Biblia ke tadila mono ve.” Yo yina, kana beto keba ve bansaka ya kulutisa ntangu lenda pusa beto na kuyambula kieleka. Kana yo me kumina beto, beto lenda yambula mambu ya mfunu yina Yehowa me pesaka beto.

9. Mutindu 1 Timoteo 1:18, 19 ke monisa yo, Polo fwanisaka Timoteo ti nani?

⁹ Tanga 1 Timoteo 1:18, 19. Polo fwanisaka Timoteo ti soda mpi yandi siamisaka Timoteo na “kulanda kunwana bitumba ya mbote.” Bitumba yina vandaka ya kimpeve. Inki mutindu Bakristu kele bonso basoda yina ke nwana bitumba? Inki bikalulu beto basoda ya Kristu fwete vanda ti yo? Beto tadila malongi tanu yina beto lenda longuka na mbandu ya Polo. Yo ta sadisa beto na kubumba mbote kieleka.

10. Kukangama na Nzambi kele nki mpi sambu na nki beto fwete kangama na Nzambi?

¹⁰ Beto fwete kangama na Nzambi. Soda ya mbote ke vandaka kwikama. Yandi ke nwanaka ngolo sambu na kutanina muntu yina yandi ke zolaka to kima yina kele mfunu mingi sambu na yandi. Polo siamisaka Timoteo na kukangama ngolo na Nzambi disongidila, kuvanda ya kwikama na Nzambi. (1 Tim. 4:7) Kana beto ke zola Nzambi mpi ke kangama na yandi, beto ta kuma ti mpusa ya ngolo ya kubumba mbote kieleka.—1 Tim. 4:8-10; 6:6.

11. Sambu na nki beto fwete kudiyala?

¹¹ Kudiyala. Soda fwete kudiyala sambu yandi vanda ntangu yonso ya kuyilama sambu na bitumba. Timoteo landaka kuvanda ngolo na kimpeve sambu yandi sadilaka bandongisila yina ntumwa Polo pesaka yandi na nsadisa ya mpeve santu na kutina banzala ya mbi, na kuvanda ti bikalulu ya mbote mpi na kuvukana ti Bakristu ya nkaka. (2 Tim. 2:22) Yo lombaka nde yandi kudiyala. Beto mpi fwete kudiyala sambu na kununga banzala ya mbi ya nitu. (Bar. 7:21-25) Diaka, beto fwete kudiyala sambu na kulanda kukatula kimuntu ya ntama mpi kulwata kimuntu ya mpa. (Baef. 4:22, 24) Ata na nsuka ya kilumbu beto me lemba sambu na kisalu ya beto me sala kilumbu ya mvimba, beto ke salaka kaka bikesa ya kukwenda na lukutakanu.—Baeb. 10:24, 25.

12. Inki mutindu beto lenda sadila mbote Biblia?

¹² Soda fwete meka kusadila binwaninu na yandi ya bitumba mbala na mbala sambu yandi zaba kusadila yo mbote-mbote. Mutindu mosi, beto fwete sadila mbote Ndinga ya Nzambi. (2 Tim. 2:15) Balukutakanu ke sadisaka beto na kuzaba kusadila yo mbote. Kana beto ke zola kusadisa bantu ya nkaka na kundima nde kieleka ya Biblia kele mfunu mingi, beto mosi fwete longukaka Biblia mbala na mbala. Beto fwete sadila Ndinga ya Nzambi sambu na kukumisa lukwikilu na beto ngolo. Yo ke tendula nde beto fwete suka ve kaka na kutanga Biblia. Beto fwete yindula mingi mambu yina beto ke longuka mpi kusala bansosa na mikanda na beto sambu beto bakisa mambu yango mbote mpi beto sadila yo. (1 Tim. 4:13-15) Mpidina, beto ta zaba kusadila Ndinga ya Nzambi sambu na kulonga bantu ya nkaka. Beto ta suka kaka ve na kutangila bantu baverse ya Biblia kansi beto ta sadisa bo na kubakisa yo mpi ta monisa bo mutindu bo lenda sadila yo. Kana beto ke longuka Biblia mbala na mbala, beto ta  zaba mutindu ya kusadila mbote Ndinga ya Nzambi sambu na kulonga bantu ya nkaka.—2 Tim. 3:16, 17.

13. Mutindu Baebreo 5:14 ke monisa yo, sambu na nki beto fwete sadila mayele ya kuswaswanisa mambu?

¹³ Vanda ti mayele ya kuswaswanisa mambu. Soda fwete vanda ti makuki ya kumona kigonsa na ntwala mpi kutina yo. Beto mpi fwete tina mambu yina lenda natila beto bampasi mpi kusala yonso sambu na kutina kigonsa. (Bing. 22:3; tanga Baebreo 5:14.) Mu mbandu beto fwete pona na mayele yonso bansaka ya kulutisa ntangu. Mbala mingi, mambu yina bo ke songaka na batelevisio mpi na bafilme ke monisaka bikalulu ya mansoni. Bikalulu yina ke vwezaka Nzambi mpi ke natilaka beto bampasi. Yo yina, beto fwete sala ve bansaka ya mbi sambu yo lenda bebisa malembe-malembe kinduku na beto ti Yehowa.—Baef. 5:5, 6.

14. Inki mutindu mayele ya kuswaswanisa mambu sadisaka Daniele?

¹⁴ Daniele yina beto me tubila na luyantiku, yantikaka kubakisa nde bansaka ya mubulu mpi ya kindoki yina yandi vandaka kubula vandaka mbi. Yo yina, yandi salaka bansosa na Watchtower Library sambu na kuzwa mambu yina lenda sadisa yandi na kununga diambu yina. Inki mutindu yo sadisaka yandi? Yandi yambulaka kubula bansaka yina ya mbi. Yandi vandaka kusadila diaka ve basite ya Internet yina vandaka ti bansaka yina mpi yandi fwaka kinduku ti bantu yina yandi vandaka kubula ti bo bansaka yango. Yandi ke tuba nde: “Na kisika ya kubula bansaka yina ya video, mono yantikaka kusala kinduku ti bampangi na dibundu mpi kukangama ti bo.” Bubu yai, mpangi Daniele kele mupasudi-nzila mpi nkuluntu.

15. Sambu na nki bansangu ya luvunu kele kigonsa?

¹⁵ Bonso Timoteo beto mpi fwete zaba nde bansangu ya luvunu yina baaposta ke panzaka kele kigonsa. (1 Tim. 4:1, 7; 2 Tim. 2:16) Mu mbandu, bo lenda sosa kupanza bansangu ya luvunu sambu na bampangi na beto to kusala nde beto kuma ti baketi-keti sambu na dibundu ya Yehowa. Bansangu ya mutindu yai lenda lembisa lukwikilu na beto. Beto fwete ndima ve bansangu yai. Sambu na nki? Sambu bantu ya ke panza bansangu yai kele “bantu yina mabanza na bo me bebaka mpi [bo] ke bakisaka diaka ve kieleka.” Lukanu na bo kele ya ‘kuswana mpi kutula bantembe.’  (1 Tim. 6:4, 5) Bo ke zolaka nde beto ndima mambu na bo ya luvunu mpi beto tudila diaka ve bampangi na beto ntima.

16. Inki mambu lenda katula dikebi na beto?

¹⁶ Kutula ve dikebi na mambu ya kukonda mfunu. Sambu Timoteo vandaka “soda ya mbote ya Kristu Yezu” yandi tulaka dikebi mingi na kisalu ya kusamuna kansi ve na bima ya kinsuni mpi na balukanu ya kinsuni. (2 Tim. 2:3, 4) Bonso Timoteo, beto fwete vanda ve ti nzala ya ngolo ya bima mingi ya kinsuni. “Kiyeka ya kimvwama ya ke kusaka” lenda bebisa kinduku na beto ti Yehowa, yo lenda sala nde beto monisa ve ntonda sambu na Ndinga ya Nzambi mpi beto longa yo ve bantu ya nkaka. (Mat. 13:22) Beto fwete vanda ti luzingu ya kukonda mindondo mpi kusadila ntangu na beto mpi kikesa na beto sambu na ‘kulanda kusosa ntete Kimfumu.’—Mat. 6:22-25, 33.

17-18. Inki beto fwete sala sambu na kutina mambu yina lenda bebisa kimpeve na beto?

¹⁷ Vanda ya kuyilama mpi sala mambu nswalu. Soda fwete yindula na ntwala mambu yina yandi ta sala mpi mutindu yandi ta sala yo. Kana beto ke zola kutanina mbote bima yina Yehowa me pesaka beto, beto fwete sala mambu nswalu ntangu beto me kutana ti kigonsa. Beto fwete yindula na ntwala mambu yina beto ta sala kana beto me kutana ti kigonsa mpi mutindu beto ta sala yo.

¹⁸ Sambu na kusadisa beto na kuzaba mambu yina beto lenda sala kana kigonsa me basika, beto baka mbandu ya bantu yina ke salaka bilanga. Mbala mingi bo ke tungaka mwa kisasa na lweka ya bilanga. Sambu kana mvula kunoka na kintulumukina, bo ta kwenda kubumbana na kisasa yina. Mutindu mosi, beto lenda yindula na ntwala mambu yina beto lenda sala sambu na kuditanina nswalu kana mansoni, mambu ya mubulu, mambu ya baaposta me basika ntangu beto ke sadila Internet to ke tala filme mosi na televizio. Kana beto me yindula yo na ntwala, yo ta sadisa beto na kutina nswalu mambu yina lenda bebisa kimpeve na beto sambu beto bikala bunkete na meso ya Yehowa.—Nk. 101:3; 1 Tim. 4:12.

19. Inki mambote beto ta baka kana beto ke bumba mbote mambu ya mfunu yina Yehowa me pesaka beto?

¹⁹ Beto fwete bumba mambu ya mfunu yina Yehowa me pesaka beto disongidila bakieleka ya mfunu ya Biblia mpi dibaku ya kulonga yo na bantu ya nkaka. Kana beto ke sala mutindu yina beto ta vanda ti kansansa ya mbote, luzingu ya mbote mpi beto ta vanda ti kiese ya kusadisa bantu ya nkaka na kuzaba Yehowa. Ebuna, Yehowa ta sadisa beto na kubumba mambu yina yandi me pesaka beto.—1 Tim. 6:12, 19.