1-2. Kala kilondekesa o divulu 1 Timote 6: 20, Timote amubhanene ihi?

ETU TWENEMUBHANA ima yetu yavalolo kwa akwetu phala ku ilanga. Mukifika etu nange tubhakesa o kitadi kyetu mu bangu. Kyoso kitubhanga kiki, tumesena kwila, o kitadi kyetu akilanga kyambote, phala kikitexike mba akinyana. Mukiki, tutendela kyambote o kilombolwelu kyakubhana kima kyala ni valolo yavulu ku muthu wengi phala kukilanga.

² Tanga 1 Timote 6:20. Poxolo Phawulu walembalesa Timote kwila, mwene watambwile kima kyala ni valolo yadikota. O kima kiki, okwijiya kwakidi kwalungu ni vondadi ya Nzambi phala o athu. Jihova wabhana kwa Timote o ujitu wa “kuboka” ni “kukalakala kala o mukunji wa njimbu yambote.” (2 Tim. 4:2, 5) Phawulu wadimuna Timote phala kulanga kyambote o ujitu wamubhanene mwene. Kala Timote etuwe atubhana ima yala ni valolo yadikota. Ima yahi yenyiyi? Mukonda dyahi twatokala kulanga kyambote o ujitu wenemutubhana Jihova?

3-4. Ihi ibhangesa okidi kya Bibidya kukala ni valolo yadikota?

³ Jihova ni henda yoso, watubhana o kwijiya kwakidi, kwa Maka mê o Bibidya kwala ni valolo yadikota. Okidi kiki kyala ni valolo yadikota mukonda kitulonga kyebhi kitutena kukala ni ukamba wambote ni Jihova, kijimbulula we ihi itubhekela okusanguluka kwa kidi kumwenyu. Kyoso kituxikina okidi kiki kya Bibidya, katunganala ni milongi yamakutu, tukala ni wendelu wambote.—1 Kol. 6:9-11.

⁴ Kima kyengi kibhangesa o Maka a Nzambi kukala ni valolo yadikota, o kwijiya kuma Jihova watangela ngó ku athu alenduka yo “afwamena o mwenyu.” (Ika. 13:48) O athu alenduka  axikina kwila, o kimbadi kya fiyele kitulonga o milongi ya Bibidya lelu. (Mat. 11:25; 24:45) Kitutena kutendela o Bibidya se kikwatekesu, okidi kiki kyala dingi ni valolo, kima kyosokyoso ndenge.—Jisa. 3:13, 15.

5. Ihi dingi yatubhana Jihova?

⁵ Jihova watubhana we ojitu wakulonga akwetu yalungu ni mwene ni vondadi yê. (Mat. 24:14) O njimbu ya Jihova itwene muboka, yala ni valolo yadikota mukonda ikwatekesa o athu kubhanga mbandu wa mwiji wa Jihova. Yabhana o ujitu wakukala ni mwenyu wakalelaku. (1 Tim. 4:16) Kikale se tuboka kyavulu mba bhofele, o kima kyabetakota okukwatekesa okikalakalu kiki, mu izuwa yiyi. (1 Tim. 2:3, 4) Ujitu wadikota kukalakala kumoxi ni Nzambi!—1 Kol. 3:9.

6. Ihi yabhiti ni amoxi alanduka kulanga o ujitu wâ?

⁶ Mu izuwa ya Timote, sayi Jikidistá kabhanene valolo mu ujitu wâ wakukalakala kumoxi ni Nzambi. Kuma Demaze wazolele o ima yamundu yú, mwene watexi o ujitu wakukalakala kumoxi ni Phawulu. (2 Tim. 4:10) Fijelo ni Helemojene nange eha okunji wâ mukonda exile ni wôma wakwazukutiza kala kya zukutisile Phawulu. (2 Tim. 1:15) Himenu, Xandele ni Filetu alungulukila okidi, abhana dikunda kwa Jihova. (1 Tim. 1:19, 20; 2 Tim. 2:16-18) O athu oso yâ nange azolele Jihova kudimatekenu, maji ene kasuluka ni kulanga o ima yavalolo ya abhanene Jihova.

7. Ihi ibhanga Satanaji phala kutubhangesa kubhanga o ima yamesena?

⁷ Kyebhi Satanaji kyatubhangesa kweha o mawujitu ene mutubhana Jihova? Tala o njindunge ja Satanaji. Mwene usota kuzozesa o ukamba wetu ni Jihova bhukaxi ka itonokenu, o itonokenu yiyi, yalungu ni mutelembe wa izuzumbya, jifileme, internete minangu ya jijurnale ni madivulu. Mwene usota kutukwatesa wôma bhukaxi ka ima izwela o athu yalungu netu, ni bhukaxi ka izukutisu yakweha okikalakalu kya kweha o kikalakalu kyakuboka. Mwene utubhangesa kukwata “jiphata ja wôwa u exana ene exi unjimu” manyi unjimu wamakutu wa akwa kulungulula okidi, phala ni tweha o ujitu wetu.—1 Tim. 6:20, 21.

8. Ihi i utena kudilonga kumusoso wa phange amwixana Daniyele?

⁸ Se kitudilange tutena kweha okidi bhofele bhofele. Xinganeka o musoso wa Daniyele, * wazolele o jividyogeyime. Mwene wambe: “Ngamateka kujokala o jividyogeyime kyoso kingexile hanji ni dikwinyi dya mivu. Kudimatekenu, jividyogyeme jingexile mu jokala kijexile ni kilwezu. Maji bhofele bhofele, ngamateka kujokala jividyogeyime jalungile  ni usweya ni wanga.” Kupholo dya kwenda ngexile mubhanga 15 dya ji ola mu kizuwa ni kujokala. “Se ngaditonginine kyambote, ngejimona kwila, o jividyogeyime jingexile mujokala ni kithangana kingexile mubhanga, jexile muzanga o ukamba wami ni Jihova, bhofele bhofele. Danyele wambe: Maji ngejidile kwila kingexile mukumbidila o itumu ya Bibidya.” Mu kiki, se kitudilange, o itonokenu itena kutubhangesa kweha okidi. Se kiki kibhita, tutena kutexa o ima yavalolo yadikota yene mutubhana Jihova.

9. Kala kilondekesa o divulu dya 1 Timote 1:18, 19, Phawulu wasokesa Timote ni nanyi?

⁹ Tanga 1 Timote 1:18, 19. Pawulu wasokesa Timote ni disoladi, mwene wamuswinisa ‘kwenda ni kuluwa ita yambote.’ Mwene kexile muzwela yalungu ni kuluwa ita ni athu muxitu, maji wexile muzwela yalungu ni kuluwa ita munzumbi. O Jikidistá edi kala masoladi amuluwa ita, mumawukexilu ebhi? Kuma tumasoladi a Kidistu, idifwa yebhi itwabhingi kukala nayu? Tumone ima itanu itutena kudilonga mukifika kya Phawulu. O ima yiyi, itena kutukwatekesa kulanga okidi.

10. Ihi ilombolola kukala ni wôma wa Nzambi?

¹⁰ Mukonda dyahi twabhingi kukala ni wôma yú? O disoladi dyambote fiyele. Mwene ubhânga ni nguzu yoso phala kulanga muthu wamuzolo mba kima kye kyala ni valolo yadikota. Phawulu waswinisa Timote kukala ni wôma wa Nzambi. Kikwa kulondekesa ufiyele kwa Nzambi. (1 Tim. 4:7) Se tukolesa o henda yetu kwa Nzambi anga tukala ni wôma wa mwene, twandamesena kulanga okidi.—1 Tim. 4:8-10; 6:6.

11. Mukonda dyahi twabhingi kudilonga kubhanga o ima yambote?

¹¹ Dilonge kubhanga o ima yambote. O disoladi watokala kubhanga yoso yatena, nakale polondo phala o ita. Timote watena kubhanga ni Satanaji ni mundu wê mukayela o kitendelesu kya Phawulu kyakutolola ojihanji jayibha kukala ni idifwa yambote, ni kubhita kithangana ni jiphange. (2 Tim. 2:22) Phala kubhanga kiki, kubhinga kudilonga. Twabhingi kudilonga kubhanga ima yambote phala kutolola ojihanji jayibha. (Loma 7:21-25) Kumbandu yamukwa twabhingi kudilonga kubhanga ombote phala kubhilula o idifwa yetu ni kukala ni idifwa yambote. (Efe. 4:22, 24) Kudisukilu dya kizuwa tutohoka, nange tubhinga kuya muyônge.—Jihe. 10:24, 25.

12. Mumawukexilu ebhi ututena kubandekesa o uhete wetu wakudilonga o Bibidya?

¹² O disoladi wabhingi kudilonga kuloza ni kukalakala ni jifalamenda ja ita. Phala kukala ni uhete, mwene wabhingi kudilonga ithangana yoso. Kyene kimoxi we netu twabhingi kubandekesa o uhete wetu wakudilonga o Mak’â Nzambi. (2 Tim. 2:15) Tutena kudilonga o uheteyu muyônge yetu. Maji se twamesena kukwatekesa we akwetu kuxikina kwila, okidi kya Bibidya, kitena kwakwatekesa, twabhingi kudilonga nayu izuwa yoso. Twabhingi kukolesa okixikanu kyetu bhukaxi ka Mak’â Nzambi. Kubhinga kubhanga dingi kima, o kutanga ngó o Bibidya ndenge. Kubhinga we kuxinganeka mu ima itwamutanga kutokwesa mu madivulu metu phala kutendela kyambote ni kukumbidila o itumu ya Bibidya. (1 Tim. 4:13-15) Mukubhanga kiki, twandatena kulonga o Maka a Nzambi ku akwetu. Kulonga kubhinga kubhanga dingi kutanga nawu ngo o jivelusu ja Bibidya ndenge. Twamesena kukwatekesa o athu kutendela o jivelusu ni kyebhi kyatena kujikumbidila. Mukiki, kyoso kitutanga o Bibidya ithangana yoso, tutena kukituka alongexi ambote a Maka a Nzambi.—2 Tim. 3:16, 17.

13. Ihi itwatokala okubhanga phala kutungula o ima yambote ni yayibha kala kilondekesa o divulu dya Jihebelewu 5:14?

 ¹³ Tungula o ima yambote mu ima yayibha. O disoladi watokala kukala ni uhete wakuxinganeka okilwezu kupholo ni kukilenga. Etu we twatokala kuxinganeka ima itenakuta omwenyu wetu mu kilwezu ni kubhanga kima phala kukilenga. (Jisa. 22:3; tanga Jihebelewu 5:14.) Mukifika twabhingi kusola o itonokenu yetu ni unjimu. Etu tulenga o itonokenu yiyi, mukonda itena kuzozesa o henda yetu kwa Jihova bhofele bhofele. Twejiya kwila Jihova wazembe owendelu wa ufusa ni kwila, o athu abhanga o ima ya ufusa adibhekela ndolo, abheka ndolo kwakwa.—Efe. 5:5, 6.

14. O kutungula o ima yambote mu ima yayibha kwakwatekesa kyebhi Danyele?

¹⁴ Danyele amutumbula kudima, wamateka kumona kwila, kujokala jividyogeyime jalungu ni usweya ni wanga, kyexile kilwezu kyadikota. Mwene watokwesa mu Watchtower Library (Biblioteca da Torre de Vigia) phala kusanga kikwatekesu kyalungile ni maka mê. Ihi yabhange mwene? Mwene weha o jijoko jayibha jexile mu jokala. Weha o ukexilu wakudilunga ni yo exile mu jokalanawu. Danyele wambe: “Muveji dya kusuluka ni kujokala jividyogeyime, ngamateka kubhanga ima ni makamba mami mu kilunga.” Lelu, Danyele kafunga, muboki wathembu yoso.

15. Mu misoso yamakutu mwala ilwezu. Mukonda dyahi?

¹⁵ Kala Timote, etutwatokala kuxinganeka mu kilwezu kijila mu minangu yamakutu yenemumwanga akwa kulungulula okidi. (1 Tim. 4:1, 7; 2 Tim. 2:16) Mukifika, ene asota kumwanga misoso yamakutu yalungu ni jiphange jetu, ni kutubhangesa kukala ni jiphata jalungu ni kilunga kya Jihova. O misoso yiyi, itena kuzozesa okixikanu kyetu. Kitutokala kuxikina omisoso yiyi. Mukonda dyahi? Mukonda o misoso yiyi, ene mu imwanga “ku athu abolo o kilunji atokola okidi.” Ene abhanga kiki phala kubhekesa “jiphata ni njivunda jakuzwela.” (1 Tim. 6:4, 5) Ene amesena kwila tuxikina mumakutu mâ, tumateka kufika ima yayibha yalungu ni jiphange jetu.

16. Ima yahi ilandukisa itwatokala kudituna?

¹⁶ Ditune o ima ilandukisa. Kala ‘disoladi kyambote dya Jezú Kidistu,’ Timote watokalele kudikwatenena mu ukunji we muveji dya kulunga o muxima kujimbote ni mu ima yamukwa. (2 Tim. 2:3, 4) Kala Timote  kitumesena kwila ojihanji jakukala ni jimbote javulu, jitulandukisa. “O kudyanguka kwa jimbongo,” kutena kuzozesa o henda yetu kwa Jihova, o kisakidilu kyetu ku Maka a Nzambi ni vondadi yakubokela akwetu. (Mat. 13:22) Twatokala kusosolola o ima kumwenyu wetu, “kudyanga kusota o Utuminu” mu kithangana ni nguzu itwala nayu.—Mat. 6:22-25, 33.

17-18. Ihi itutena kubhanga phala kulanga o ukamba wetu ni Jihova?

¹⁷ Kala polondo phala kubhanga kima ni lusolo mukumona o kilwezu. O disoladi watokala kusota jindunge jandamulanga. Se twamesena kulanga o ima yatubhana Jihova, twabhingi kubhanga kima ni lusolo kyoso kitumona o kilwezu. Ihi itena kutukwatekesa kubhanga kima ni lusolo? Twatokala kusota jindunge ni kithangana kyasoko, phala kumona ihi itwandabhanga se kumoneka kilwezu.

¹⁸ Kyoso athu kyaya muzowa mu menya akalunga, ene mwaswinisa kuzowa mujimbandu. Mukonda dyahi? Phala kikwabhonze kutunda sekumoneka kilwezu. Kyene kimoxi netu, twatokala kudipelepalala se mu kithangana ni mbandu kumoneka kima kya ufusa, usweya, milongi ya akwa kulungulula okidi mu internete mba kyoso kitutala filme mu mutelembe wa izuzumbya. Se tudipelepalala kyambote mu ima itenakubhita, twandabhanga kima ni lusolo phala kulanga o ukamba wetu ni Jihova. Se tubhanga kiki, twandakala tu athu azele kumesu Mê.—Jisá. 101:3; 1 Tim. 4:12.

19. Mabesa ebhi utwandatambula se tulanga kyambote o ima yavalolo yenemutubhana Jihova?

¹⁹ Twatokala kulanga kyambote o ima yavalolo yenemutubhana Jihova. Okidi kya Bibidya ni ujitu wakulonga akwetu. Kyoso kitubhanga kiki, twandakala ni kitongolwelu kyazele, mwenyu wetu ukala dingi ni valolo, tusanguluka mukukwatekesa akwetu kwijiya Jihova. Ni kikwatekesu kyê, twandatena kulanga o ima yavalolo yatubhana.—1 Tim. 6:12, 19.