1-2. Ngoku kiri omu 1 Timoteo 6:20, ni byahi ebyo Timoteo ahebawa?

MUGHULHU mungyi thukanaha abandi b’ebindu byethu eby’obughuli thuthi bathuthegherayebyo. Ng’eky’erileberyako, thukanahira esyosente syethu sy’omwa bbanka. Thwamakolha ekyo, thukabya ithunasi ngoku esyosente syethu sine omwa butheya kandi sisyanga thalha kutse er’ibwa. Neryo thukayitheghereraya ekya kikamanyisaya erihira ekindu ekyo thukalhangira mwa ky’obughuli omwa butheya bw’owundi mundu.

² Soma 1 Timoteo 6:20. Omukwenda Paulo mw’ibukya Timoteo ngoku abirihebwa ekindu ky’obughuli​—eriminya erihikire ery’ekighendererwa kya Nyamuhanga busana n’abandu. Kandi Timoteo mwahebwa olhusunzo lhw’erithulha ekinywe ‘n’erikolha omubiiri w’erithulha engulhu yuwene.’ (2 Tim. 4:2, 5) Paulo mwabwira Timoteo athi atheghaye ebyo abirihebwa. Nga Timoteo, thwabirihebwa ebindu by’obughuli. Ni byahi? Kandi busana naki thutholere ithwatheya eby’obughuli ebyo Yehova abirithuha?

3-4. Ni nzumwa nga syahi esikaleka ekwenene ye Biblia iyabya ini y’obughuli?

³ Yehova abirithuha eriminya erihikire ery’ekwenene ey’obughuli eriri omwa Kinywe kiwe, e Biblia. Ekwenene eyi ni y’obughuli kundi yikathukangiriraya ngoku thwangabya n’engolongana eyuwene na Yehova n’erithusoborera ekikaletha etseme y’okwenene omwa ngebe. Thwamaligha ekwenene eyo n’erighendera kuyo, thukabya bwiranda oko syongangirirya sy’amabehi n’emitse eyithisirire.​—1 Kor. 6:9-11.

⁴ Eyindi nzumwa eyikaleka ekwenene eyiri omwa Kinywe kya Nyamuhanga iyabya y’obughuli yiri yithi Yehova akabisulirayo  abayikehirye basa abawithe “amalengekania awakaleka ibatholera.” (Emib. 13:48, NW) Abandu ng’abo bakaligha enzira eyo akakolesaya munabwire erithuha ekwenene ye Biblia. (Mt. 11:25; 24:45) Sithwanga yitheghererya ekwenene eyo hathe obuwathikya, kandi sihali ekindi eky’obughuli ekirengire eriyitheghereryayo.​—Emi. 3:13, 15.

5. Ni kindi kyahi ekyo Yehova abirithuha?

⁵ Kandi Yehova abirithuha olhusunzo lhw’erikangirirya abandi b’ekwenene eyimuhambireko n’ebighendererwa biwe. (Mt. 24:14) Omwatsi owathuwithe ni w’obughuli bunene kundi akaleka abandu ibasa omw’ihiika lya Yehova n’eribaha akaghisa k’erisyabana engebe y’erikotha. (1 Tim. 4:16) Mbulha thukakolha bike kutse bingyi omwa mubiiri w’erithulira, thunemusighika omubiiri mukulhu owanemukolhwa lino. (1 Tim. 2:3, 4) Ka ni kitsumbi erikolha haghuma na Nyamuhanga!​—1 Kor. 3:9.

6. Ni kyahi ekyabya okwa balemawa eribya ibanatheghirye?

⁶ Omwa buthuku bwa Timoteo, abandi Bakristayo mubalemwa erilhangira olhusunzo lhwabu lhw’erikolha na Nyamuhanga mwa lhw’obughuli. Kundi Dema mwanza emyatsi y’ekihugho, mwasighania olhusunzo lhw’erikolha na Paulo. (2 Tim. 4:10) Kikalhangirika Filego na Hermogene mubasighania omubiiri wabu w’erithulira busana n’erisagha bathi bangana bana eriendereribwa eriri ng’erya Paulo abana. (2 Tim. 1:15) Himeneo, Alesanduro, na Fileto mubayisamambulha okw’ikirirya kandi bamasighania ekwenene. (1 Tim. 1:19, 20; 2 Tim. 2:16-18) Abosi aba banabya baghumire bunyakirimu, aliwe mubaleka erithasyalhangira ekwenene mwa y’obughuli.

7. Ni bithegho byahi ebyo Sitani akakolesaya?

⁷ Sitani akalengaho athi erileka thusighanaye eby’obughuli ebyo Yehova abirithuha? Lebaya ebighuma by’okwa bithegho bya Sitani. Akakolesaya eby’eriyitsemesya n’ebikakolhaya okwa bandu kw’omwatsi erikulha-kulhania amalengekania n’emitse ebyo akalengekanaya athi byangana leka ithwasighania ekwenene. Akalengesaya erithusaghisya erilhabira omwa kahathikano k’abanywani kutse eriendererya nuku thuleke erithulira. Kandi akathwohaya omwanza thuhulikirire abakayisamambulha okw’ikirirya nuku thusighanaye ekwenene.​—1 Tim. 6:20, 21.

8. Eky’erileberyako kya mughalha wethu Daniel kikathweghesayaki?

⁸ Thwamathendi yitheya, lyolho-lyolho ithwangana sighania ekwenene. Lengekanaya okwa ky’erileberyako kya Daniel, * oyuwabya anzire emisathu y’evidiyo. Akabugha athi: “Natsuka erisatha emisathu y’evidiyo ingane w’emyaka ikumi. Okw’itsuka, iningasatha  emisathu eyuwene. Aliwe, lyolho-lyolho munatsuka erisatha emisathu eyiri mw’eby’amalhwa n’eby’esyombinga.” Erighunzerera, abya iniali okw’isatha esyovidiyo habw’esyosaha nga 15 obuli kiro. Daniel akabugha athi: “Omo kwenene, nabya inganasi ngoku emisathu eyo nabya ingasatha n’obuthuku obo nabya ingaghunza byabya ibiri okw’inyisegherya haali oku Yehova. Aliwe, omwa muthima omw’eyo inabiriligha indi emisingyi ye Biblia siyinyihambireko.” Thwamathendi yitheya, eby’eriyitsemesya ibyangana leka ithwasighania ekwenene. Ekyo kyamabya, ithwangana yisanga ithuli okw’iherya ebindu by’obughuli ebyo Yehova abirithuha.

9. Ngoku kiri omu 1 Timoteo 1:18, 19, Paulo mwalinganisya Timoteo naki?

⁹ Soma 1 Timoteo 1:18, 19. Paulo mwalinganisya Timoteo ng’omusirikali kandi mwamubwira athi alhole embere ‘erilhwa amalhwa awuwene.’ Amalhwa ayo syabya malhwa awonyine-nyine, aliwe abya malhwa w’obunyakirimu. Ni mwanzira syahi Abakristayo bali ng’abasirikali abali omo lhuhi? Ni mibere yahi eyo thutholere ithwabya nayu ithwe ng’abasirikali ba Kristo? Thulebaye amasomo athano agho thwang’ighira okwa ky’erileberyako ekya Paulo aha. Amasomo aya anganaleka ithwamakirira ekwenene.

10. Busana naki thukayithagha erikenga Nyamuhanga?

¹⁰ Kenga Nyamuhanga. Omusirikali mubuya syali leghulha. Akalhwa kutsibu eritheya omundu oyo anzire kutse ekindu ekyo akalhangira mwa ky’obughuli. Paulo mwahira omu Timoteo mw’omuhwa w’erikenga Nyamuhanga​—ni bugha ambu, eryamakirira Nyamuhanga buthaleghulha. (1 Tim. 4:7) Thwamongera erianza n’erikenga Nyamuhanga, thukongera erianza eryamakirira ekwenene.​—1 Tim. 4:8-10; 6:6.

11. Busana naki thukayithagha eriyikasa erikolha ekihikire?

¹¹ Yikase erikolha ekihikire. Omusirikali atholere iniayikasa eribya inianayitheghekere amalhwa. Timoteo mwalholha embere iniane w’obunyakirimu kundi mwaghendera okw’ihabulha lya Paulo ery’eribya n’emibere ya Nyamuhanga, eribya haghuma n’abaramya balikyabo, n’erisagha esyongumbu nyibi. (2 Tim. 2:22) Ekyo kyabya kikayithagha erihiraho akaghalha kanene. Ithwe erithoka erisingura esyongumbu syethu nyibi thutholere ithwayikasa kutsibu. (Abar. 7:21-25) N’ekindi, thukayithagha erikolha kutsibu erilhusya omundu wakera n’eriambalha omundu muhya-muhya. (Efe. 4:22, 24) Kandi thwamabya ithwabirilhuha busana n’erikolha ekiro kyosi, ithwangana yithagha eriyikasa erighenda okwa mihindano.​—Ebr. 10:24, 25.

12. Ni byahi ebyanga thuwathikya eryongera erikolesya ndeke e Biblia?

¹² Omusirikali akayithagha eriyibegheresya erikolesya ebindu biwe by’amalhwa. Erithoka eribikolesya ndeke, atholere iniakolha ekyo mughulhu wosi. Kuthya, nethu thukayithagha eriminya ndeke erikolesya Ekinywe kya Nyamuhanga. (2 Tim. 2:15) Okwa mihindano kwa thuk’ighira esyonzira ndebe esy’erikikoleseryamo ndeke. Aliwe thwamabya thwanzire abandi balighe ngoku ekwenene ye Biblia ni y’omughaso munene, thutholere ithwakwama-kwamania ndeke endegheka yethu ey’eriyeghesya e Biblia. Thukayithagha erikolesya Ekinywe kya Nyamuhanga erighumya erikirirya lyethu. Eki sikirisubulira okw’ithasoma e Biblia lisa. Kikayithagha erighanirya okwa bya thukasoma n’erisekulya omwa bitabu byethu nuku thuyitheghereraye ndeke Amasako n’eriminya ngoku thwanga soboreragho. (1 Tim. 4:13-15) Neryo ithukendi thoka erikolesya Ekinywe kya Nyamuhanga erikangirirya abandi. Kandi eki sikwama kya somera abandi b’amasako lisa. Thwanzire eriwathikya abahulikiriri bethu eriyitheghererya  ndeke erisako kandi nga likabahambako lithi. Thwamakwama-kwamania ndeke endegheka yethu y’eriyeghesya e Biblia, ithukendyongera erikolesya ndeke Ekinywe kya Nyamuhanga thukakangirirya abandi.​—2 Tim. 3:16, 17.

13. Ngoku kiri omwa Abaebrania 5:14, busana naki thutholere ithwabya b’amenge?

¹³ Ibya w’amenge. Omusirikali atholere iniabya iniangana lhangira ahangasira akabi n’eriyitheya kuko. Nethu thutholere ithw’igha eriminya emibere eyanga thutsandya n’eriyira eky’erikolha eriyibalya oko kabi. (Emi. 22:3; soma Abaebrania 5:14.) Ng’eky’erileberyako, thutholere ithwasombolha ndeke eby’eriyitsemesya. Mughulhu mungyi okwa tivi n’emisathu kukabya eby’obutswatswa. Emibere ng’eyo yikaponesaya Nyamuhanga kandi ahathe erithika-thika yikatsandaya. Neryo thukayihighulha okw’iyitsemesya eryanga tsandya lyolho-lyolho olhwanzo olhwa thuwithire Nyamuhanga.​—Efe. 5:5, 6.

14. Amenge mwawathikya athi Daniel?

¹⁴ Daniel, oyo thulyakanayako, mwatsuka eriminya ngoku erisatha emisathu y’esyovidiyo ey’amalhwa n’ey’esyombinga ni kitsibu. Mwasekulya omwa Watchtower Library mw’omwatsi owanga muwathikya erirwanisya ekitsibu kiwe ekyo. Ekyo mukyamuhambako kithi? Mwaleka eribya akalebya esyovidiyo esithuwene. Mwaleka eribya akaghenda okwa mithahulha ey’emisathu eyo n’erithwa obunywani n’abalhue akasathayo nabu. Daniel akabugha athi, “Omwakanya k’erisatha emisathu eyo, munatsuka eribya ingakolha eyindi mibiiri eyihya kutse erisatha n’abanywani baghe omwa kithunga.” Lino Daniel ni mutemburi kandi ni musyakulhu w’ekithunga.

15. Busana naki emyatsi y’amabehi ni y’akabi?

¹⁵ Nga Timoteo, nethu thutholere ithwaminya akabi k’emyatsi y’amabehi eyo ababiriyisamambulha okw’ikirirya bakalhalhanaya. (1 Tim. 4:1, 7; 2 Tim. 2:16) Ng’eky’erileberyako, bangana lhalhania oko balikyethu kw’amabehi kutse erileka ithwathika-thikira ekithunga kya Yehova. Ebinyambwirwa ng’ebyo byangana tsekya erikirirya lyethu. Thutholere ithwayihighulha okw’ithebibwa omwa binyambwirwa ebyo. Busana naki? Kundi emyatsi ng’eyi yikalhalhanibawa ‘n’abandu b’obulengekania obutsandire, isibakiwithe omwatsi w’ekwenene.’ Ekilhubirirwa kyabu ly’eritsuka “obuhaka n’erineghena.” (1 Tim. 6:4, 5)  Banzire ithwaligha amabehi wabu n’erileka ithwayilhalikirira balikyethu.

16. Ni lengemeribwa lyahi eryo thutholere ithwayihighulhako?

¹⁶ Yihighule okw’ilengemeribwa. “Ng’omusirikali mubuya wa Kristo Yesu,” Timoteo mwahwerya obulengekania bwiwe okw’ithulira omwakanya k’erilengemeribwa omwa bindu by’ekihugho. (2 Tim. 2:3, 4) Nga Timoteo, sithutholere thukaligha erilengemeribwa omwanza ebindu bingyi by’ekinyamubiri. “Amathebo w’ebindu” angana kusya olhwanzo olho thuwithire Yehova, inialeka ithuthasima Ekinywe kya Nyamuhanga, n’eritsekya eriyisunza lyethu ly’erikibwirako abandi. (Mt. 13:22) Thutholere ithwolhobya engebe n’erikolesya obuthuku n’akaghalha kethu erilholha embere ‘eritsuka erisondya Obwami.’​—Mt. 6:22-25, 33.

17-18. Thwanga kolhaki eriyihighulha okw’itsandibwa bunyakirimu?

¹⁷ Yithegheke erikolha omwa byalhuba. Omusirikali akasangwa athegheka ekyo angakolha eriyitheya. Thwamabya b’eritheya ebindu ebyo Yehova abirithuha, thutholere ithwakolha omwa byalhuba thukalhangira akabi. Ni byahi ebyanga thuwathikya erikolha ekyo? Thutholere ithwasangwa thwathegheka ekyo thwanga kolha hamabya ekitsibu.

¹⁸ Ng’eky’erileberyako, wamaghenda okwa mukonga mulebe, abakasa kugho bakasangwa babwirwa indi babye ibanasi ahali esyonzira sy’erihulhukiramo. Busana naki? Nuku hamabanika akabi ibabya ibanganalhuaho ibahulhuka. Kuthya, thutholere ithwasangwa thwaminya aho thukendi “hulhukira” thwamalhangira kitsumbukirania eby’obutswatswa, eby’obwithi, kutse emyatsi y’abakayisamambulha okw’ikirirya thukakolesya e Intaneti kutse thukalebya omusathu kutse endegheka ye TV. Thwamayitheghekera ekyangabya, ithwangana kolha omwa byalhuba eriyihighulha oko kyanga tsandya obunyakirimu bwethu kandi ithwasighalha ithunahenirye embere sya Yehova.​—Esy. 101:3; 1 Tim. 4:12.

19. Ni mighisa yahi eyo thukendi yilhangirira thwamatheya ebindu by’obughuli ebyo Yehova abirithuha?

¹⁹ Thutholere ithwatheya ebindu by’obughuli ebyo Yehova abirithuha​—ekwenene ye Biblia ey’obughuli n’olhusunzo lhw’erikangiriryayo abandi. Thwamakolha ekyo, ithukendibya n’obunyamuthima-thima obuhenirye, engebe eyiwithe ekighendererwa, n’eribana etseme y’eriwathikya abandi eriminya Yehova. Busana n’obuwathikya bwiwe, ithukendi thoka eritheya ebyo thwabirihebwa.​—1 Tim. 6:12, 19.