1-2. Faso ke na zonzá 1 Timote 6:20, wapi responsabilite ba pesá na Timote?

BAMBALA mingi beto ke pesá bima ya beto ya valere na bantu ya nkaka samu ba kipe yawu. Na kifwani, beto lenda bumba mbongo ya beto na bank. Ntangu beto ke salak’ yawu, beto ke sosa ve ti mbongo ya beto zimbana to ba laba yawu, kasi ya vanda na sekurite. Na yina, beto me zaba yinki zola zonza kupesa bima ya beto ya valere na muntu ya nkaka.

² Tanga 1 Timote 6:20. Apotre Paul zonzá na Timote na kuzimbana ve ti, ba pesak’ yandi kima mosi ya valere: kuzaba mbote-mbote dikanisi ya Nzambi samu na bantu. Yehova pesá mpe Timote dikabu ya “kulonga mambu ya Nzambi” mpe ya “kumwangisa nsangu ya mbote.” (2 Tim. 4:2, 5) Paul zonzá na Timote na kubumba kima yina ba pesak’ yandi. Faso Timote, beto mpe ba me pesa beto bima ya valere. Wapi yina ke bima yango? Mpe wa’ faso beto zolá bumba mpe kukipe bima yina Yehova me pesa beto?

3-4. Wapi barezon ke na lakisá ti mambu yina ke na Biblia ke na valere ya kulutila?

³ Na ntima ya mbote nyonso, Yehova me sala ti beto zaba mambu ya kitoko yina ke na Biblia. Bamambu ya Biblia ke na valere mingi, samu ya ke zonzá na beto faso ya kuvanda na kikamarade ya mbote na Yehova, mpe ya ke lakisá beto yinki ke pesá vrai kilengi na luzingu. Si nge ndima mpe nge sadila mambu yina ya ke zonzá na luzingu ya nge, nge ke bika ve malongi ya luvunu kota na ntima ya nge, mpe nge ke vanda na ndyatulu ya mbote.—1 Ko. 6:9-11.

⁴ Rezon ya nkaka yina ke salá ti malongi ya Biblia vanda na valere ya kulutila, ke samu Yehova ke lakisak’ yawu kaka na bantu ya  kukuluka yina ke na “ntima ya mbote”. (Bis. 13:48) Bantu ya kukuluka ke ndimá ti, ni muumbu ya mayela mpe ya kukwikama muntu ke na longá beto mambu ya Biblia na bantangu yayi. (Mat. 11:25; 24:45) Beto lenda zaba ve mambu ya Biblia si ba sadisa ve beto, mpe ata kima me lutila kitoko na kuzaba mambu ya Biblia.—Bin. 3:13, 15.

5. Yinki Yehova me pesa dyaka beto?

⁵ Yehova me pesa dyaka beto dikabu ya kulonga mambu ya yandi mpe dikanisi ya yandi na bantu ya nkaka. (Mat. 24:14) Mambu ya Yehova yina beto ke longá ke na valere mingi samu ya ke sadisá bantu na kukota na kati ya famiye ya Yehova, mpe yandi ke pesa bawu luzingu ya ntangu nyonso. (1 Tim. 4:16) Ata beto sala mingi to fioti na kisalu ya predikasion, beto zaba ti, beto ke na tulá diboko na kisalu ya nene yina ke na salamá na ntangu yayi. (1 Tim. 2:3, 4) Ya ke kilengi mingi ya kuvanda mpangi ya kisalu ya Nzambi!—1 Ko. 3:9.

6. Yinki kuminá ba yina nyonso lembaná kubumba bima yina ba pesá bawu?

⁶ Na ntangu ya Timote, bakristo ya nkaka vandá pesa ve valere na dikabu ya bawu ya kuvanda bampangi ya kisalu ya Nzambi. Samu yandi zolá bima ya yinza, Demas losá bweso ya kusala na Paul. (2 Tim. 4:10) Ya lenda vanda ti, Phygèle na Hermogène biká kupreche samu ba vandá na boma ba talisa bawu mpasi faso ba salá Paul. (2 Tim. 1:15) Hyménée, Alexandre, na Philète kumá ba-aposta mpe ba biká kusadila Yehova. (1 Tim. 1:19, 20; 2 Tim. 2:16-18) Bantu nyonso yayi vandá sadilá Yehova, kasi awa ba me losa bima ya valere yina Yehova pesá bawu.

7. Yinki Satan ke sadilá samu na kupuse beto na kusala mambu yina yandi zola?

⁷ Yinki Satan ke sadilá samu na kupuse beto na kulosa bima ya valere yina Yehova me pesa beto? Beto zonzila mwa bima yina yandi ke sadilá. Yandi ke sadilá tele, bafilm, internet na ba-livre, samu na kunata beto na kukanisa mpe na kusala mambu yina ke nata beto malembe-malembe na kuzola dyaka ve Yehova, mpe na kulanda dyaka ve misiku ya yandi. Yandi ke sadilá mambu yina bantu ke zonzá na nkumbu ya batemwe ya Yehova, mpe bankwamusu samu na kupesa beto boma mpe kunata beto na kupreche dyaka ve. Mpe yandi ke sosá kunata beto na kuwa malongi yina ba ke “bokilá na luvunu nyonso ‘mayela’” ya ba-aposta samu na kunata beto bika kusadila Yehova.—1 Tim. 6:20, 21.

8. Disolo ya mpangi Daniel ke na longá nge yinki?

⁸ Si beto sala ve keba, fioti-fioti beto ke zola dyaka ve malongi ya Biblia. Beto zonzila disolo ya mpangi Daniel, * yandi vandá zolá ba-jeu video. Yandi me zonza: “Mu bandá kubula ba-jeu video ntangu mu vandá ntete na bamvula 10. Ntangu mu bandá, ba-jeu yina mu vandá bula  vandá ya yawu ve yimbi. Kasi fioti-fioti, mu bandá kubula ba-jeu ya ngolo mpe yina ke lakisá mambu ya bademon.” Mpe, ntangu ya nkaka na kilumbu, mu vandá lutisá 15 heures na kubula ba-jeu. Daniel me bwela: “Mu kwizá tala ti ba-jeu yina, mpe ntangu yina mu vandá lutisa, vandá nata mu ntama na Yehova. Kasi na ntima ya munu, mu kwizá ndima ti, mu vandá sala ve mambu yina Biblia ke zonzá.” Si beto sala ve keba, bima yina beto ke sadilá samu na kusakana to samu na kulutisa ntangu, lenda nata beto malembe-malembe na kukipe dyaka ve malongi ya Biblia. Si beto kubwa na mutambu yayi, beto lenda losa bima ya valere yina Yehova me pesa beto.

9. Faso ke na zonzá 1 Timote 1:18, 19, na yinki Paul compareke Timote?

⁹ Tanga 1 Timote 1:18, 19. Paul compareke Timote na soda, mpe zonzá na yandi na “kukontinye na kunwana guerre ya mbote.” Guerre yango ke guerre ya kimpeve. Na wa’ faso bakristo ke nete basoda yina ke na nwaná guerre? Faso basoda ya Yesu, wapi bifu ya mbote beto zolá vanda na yawu? Beto zonzila baleson 5 yina beto lenda longoka na ekzample yina Paul pesá. Baleson yango ke sadisa beto na kubumba malongi ya Biblia.

10. Kukangama na Nzambi ke yinki, mpe samu na yinki beto zolá vanda na kifu yayi?

¹⁰ Vanda ya kukangama na Nzambi. Soda ya mbote ke muntu yina ba lenda sala konfianse. Yandi ke nwaná samu na kubumba muntu yina yandi ke zolá to kima yina yandi ke pesá valere. Paul zonzá na Timote na kuvanda ya kukangama na Nzambi, ya zola zonza ti yandi zolá sala bangolo samu na kusadila kaka Nzambi. (1 Tim. 4:7) Luzolo ya ngolo samu na Nzambi mpe kuvanda ya kukangama na yandi, ke kulisa nsatu ya beto ya kubumba malongi ya Biblia.—1 Tim. 4:8-10; 6:6.

11. Samu na yinki beto zolá sala bangolo samu na kusala mambu ya mbote?

¹¹ Nata nzutu ya nge na kusala mambu ya mbote. Soda ke salá bangolo samu yandi vanda ntangu nyonso ya kuyidama samu na kunwana. Timote lendá kunwanisa makanisi ya Satan, samu yandi landá konseye yina Paul pesak’ yandi, mpe salá bangolo samu na kunwanisa bansatu ya yimbi, na kukulisa bifu ya mbote, mpe na kulutisa ntangu na bampangi ya yandi bakristo. (2 Tim. 2:22) Ya ke lombá ti muntu nata nzutu ya yandi na kusala mambu ya mbote. Beto ke na nsatu ya kunata banzutu ya beto na kusala mambu ya mbote, samu na kununga bansatu ya nzutu ya beto ya masumu. (Rom. 7:21-25) Beto ke dyaka na nsatu ya kunata nzutu ya beto na kusala mambu ya mbote, samu na kulwata kimuntu ya malu-malu, mpe kuvanda na bifu ya mbote. (Ef. 4:22, 24) Mpe ntangu beto ke salá mingi, na nsuka ya kilumbu, beto lenda vanda ya kulemba, na yawu, ya lenda vanda mpasi na beto na kukwenda na balukutakanu, kasi beto zolá sala bangolo.—Ebr. 10:24, 25.

12. Wa’ faso beto lenda bongisa faso ya beto ya kusadila Biblia?

¹² Soda zolá zaba faso ya kusadila minduki ya yandi. Mpe si yandi zola kusadila yawu na faso ya mbote, yandi zolá vanda na kifu ya kusadilak’ yawu. Faso mosi mpe, beto zolá zaba mbote-mbote kusadila Biblia. (2 Tim. 2:15) Beto lenda longoka bafaso ya nkaka ya kusadila yawu na balukutakanu ya beto. Kasi si beto ke na nsatu ya kusadisa bantu ya nkaka na kundima ti malongi ya Biblia lenda sadisa bawu, beto zolá longoka na bawu ntangu nyonso. Beto zola sadila Biblia samu na kukulisa kiminu ya bawu. Ya zola zonza ti, beto zolá nsuka ve kaka na kutanga Biblia. Ya ke lomba na beto na kukanisa mbote-mbote na mambu yina beto me tanga, kusala barecherche na mikanda ya beto samu na kuzaba yawu mbote mpe kusadila yawu. (1 Tim. 4:13-15) Na yawu, beto ke vanda na ngolo mpe mayela ya kusadila  Biblia samu na kulonga bantu ya nkaka. Ya zola zonza ve ti beto ke nsuka kaka na kutangila bawu baverse ya Biblia. Beto zolá sadisa bawu na kuzaba yinki verse ke na zonzá mpe faso ya kusadila yawu. Na yawu, si nge ke na kifu ya kulongoka Biblia ntangu nyonso, nge ke zaba bien faso ya kulonga bantu.—2 Tim. 3:16, 17.

13. Faso Baebre 5:14 ke na zonzak’ yawu, samu na yinki beto zolá zaba yinki ke mbote mpe yinki ke yimbi?

¹³ Zaba yinki ke mbote mpe yinki ke yimbi. Avant mambu ya yimbi kwiza, soda zolá tala deja yawu mpe kubumbana. Beto mpe zolá longoka faso ya kuzaba mambu ya yimbi yina lenda kumina beto mpe kubumbana. (Bin. 22:3; tanga Baebre 5:14.) Na kifwani, beto zolá sola na mayela nyonso, bima yina beto ke sadilá samu na kusakana to samu na kulutisa ntangu. Tele to bafilm ke lakisá mingi bima yina Biblia ke niminaka. Bima yango ke nyongisá Nzambi mpe ya ke puseke kaka beto na kusala mambu ya yimbi. Na yawu, beto lenda lutisa ve ntangu to kusakana na bima yina fioti-fioti lenda manisa luzolo ya beto na Nzambi.—Ef. 5:5, 6.

14. Wa’ faso mayela ya kuzaba yinki ke mbote mpe yinki ke yimbi sadisá Daniel?

¹⁴ Daniel, yina beto me zonzila deja, bandá kutala ti kubula ba-jeu video ya ngolo mpe yina ke lakisá mambu ya bademon, vandá yimbi. Yandi salá barecherche na Watchtower Library samu na kubika kifu ya yandi ya yimbi. Wa’ faso ya sadisak’ yandi? Yandi biká kubula ba-jeu video ya yimbi. Yandi katulá nkumbu ya yandi na kati ya bankumbu ya bantu yina ke bulá ba-jeu na internet mpe yandi zengá kikamarade ya yandi na ba yina vandá bulá na yandi. Daniel me zonza: “Na kisika ya kulutisa ntangu na kubula ba-jeu video, mu bandá kulutisa ntangu na bakamarade ya munu na kati ya kimvuka”. Bubu yayi, Daniel ke pionier mpe kuluntu na kati ya kimvuka.

15. Samu na yinki bansangu ya luvunu ke yimbi?

¹⁵ Faso Timote, beto mpe zolá zaba ti ya ke yimbi na kulanda bansangu ya luvunu yina ba-aposta ke mwangisá. (1 Tim. 4:1, 7; 2 Tim. 2:16) Na kifwani, ba lenda sosa kumwangisa mambu ya luvunu na bankumbu ya bampangi ya beto to kunata beto na kusala ntembe na malongi yina beto ke zwá na organizasion ya Yehova. Mambu ya faso yayi lenda bwisa kiminu ya beto. Beto zolá manga kutula ntima na mambu ya ba-aposta. Samu na yinki? Samu ti bantu yina ke mwangisá bansangu yina, ke “na mayela ya kutengama mpe ba zaba dyaka ve mambu ya [vrai].” Ba ke sosá kusala mambu yina ke nata  “na kuswana mpe na bantembe.” (1 Tim. 6:4, 5, nwt-MK) Ba zola beto ndima luvunu ya bawu mpe beto sala dyaka ve konfianse na bampangi ya beto.

16. Wapi faso beto lenda tula Kimfumu ya Nzambi na plase ya ntete?

¹⁶ Tula Kimfumu ya Nzambi na plase ya ntete. Faso “soda ya mbote ya Yesu Kristo,” Timote zolá tula kisalu ya Yehova na plase ya ntete na luzingu ya yandi, mpe kubika kulanda bimvwama ya yinza yayi na bima ya nkaka. (2 Tim. 2:3, 4) Faso Timote, beto zolá manga kutula ntima ya beto na bimvwama ya yinza yayi. “Ngolo ya luvunu yina ke pesá bimvwama” lenda manisa luzolo ya beto samu na Yehova, samu na Biblia, mpe samu na kisalu ya predikasion. (Mat. 13:22) Beto zolá kontinye na kunata luzingu ya muntu yina ke sepela na fioti yina ke na yandi mpe kusadila ntangu ya beto samu na “kukontinye [. . .] kusosa ntete Kimfumu ya Nzambi.”—Mat. 6:22-25, 33.

17-18. Yinki beto zolá sala samu na kubumba kikamarade ya beto na Yehova?

¹⁷ Yidama samu na kusala na mbangu. Soda ke zabá avant mambu talana yinki ya kusala samu na kubumba nzutu ya yandi. Si beto zola kubumba bima yina Yehova pesá beto, ya ke na kima beto zolá sala ntangu mambu ya yimbi ke talaná. Yinki lenda sadisa beto na kusala yawu? Beto zolá zaba deja avant, yinki beto ke sala si mambu ya yimbi talana.

¹⁸ Na kifwani, muntu yina ke salá bilanga, yina ke talá ntama, ke tungá mwa yinzo ya fioti na kati ya bilanga ya yandi avant ntangu ya bamvula. Samu na yinki? Samu ti si mvula banda kunoka ntangu yina yandi ke ntete na kati ya bilanga, yandi lenda kwenda bumbana na kati ya yinzo yina. Faso mosi mpe, beto zola zaba yinki ya kusala si meso ya beto me kubwa na zulu ya foto to video yina ke na lakisá bantu bimpene to na bilele ya nkufi, mambu ya kunwana, to bima ya ba-aposta ya vanda na internet, na bafilm to na tele. Si beto yidama na bamambu yina beto lenda kutana na yawu, beto ke sala kima na mbangu samu na kubumba kikamarade ya beto na Yehova mpe kuvanda propre na meso ya yandi.—Nku. 101:3; 1 Tim. 4:12.

19. Wapi bambote beto ke kuzwa si beto bumba bima nyonso ya valere yina Yehova me pesa beto?

¹⁹ Beto zolá bumba bima nyonso ya valere yina Yehova me pesa beto: malongi ya Biblia mpe kisalu ya predikasion. Si beto sala yawu, beto ke tala kilengi ya kuvanda na ntima ya kuzuna, beto ke nata luzingu ya mbote mpe ke vanda na kilengi ya kusadisa bantu na kuzaba Yehova. Samu Yehova ke sadisa beto, beto ke vanda na ngolo ya kubumba bima yina yandi pesá beto.—1 Tim. 6:12, 19.