1-2. Kuliza na-1 Timoteusa 6:20, yisinke va mu pere Timoteusa?

RORUNZI ose kugava yininke yetu yomulyo kovakwetu yipo va yi tu pungwire. Pasihonena, ose kuvhura tu pungure yimaliwa kombanga. Apa atu yi rugana, ose twa yi diva nawa-nawa asi yimaliwa oyo kuvhura va yi tu pungwire ya hana kuzumbana. Ngesi tuna kwata nye egano eyi ayi tanta kugava yuma kwagumwe unene po eyi atu mono asi mulyo.

² Resa 1 Timoteusa 6:20. Mupositoli Paurusa kwa diworokesere Timoteusa asi age kwa gwene yininke yomulyo kukwatera mo Nonkango daKarunga nositambo sendi kovantu. Jehova kwa pere hena Timoteusa situmbukira sokukara “muudisi goMbudi zoNgwa.” (2 Tim. 4:2, 5) Paurusa kwa tanterere Timoteusa a takamese ndi a kunge eyi va mu pere. Nose kwa tu pa yininke yomulyo sili. Yininke musinke oyo? Ntani morwasinke natu takamesera yininke yomulyo eyi ga tu pa Jehova?

3-4. Morwasinke usili womoBibeli wa karera nomulyo?

³ Jehova kwa tu pa usili ou wa kara moNonkango dendi Bibeli. Usili ou mulyo unene morwa awo kuturonga omu natu tulisa po elikwatakano naJehova ntani awo kuturonga asi yisinke ayi reta ruhafo rosili meparu. Nsene tu tambura usili nokuparuka kuliza nawo, ose ngatu nyokera po marongo goyimpempa ntani noyirugana yoyidona.—1 Kol. 6:9-11.

⁴ Konda zimwe zeyi usili womoBibeli wa karera nomulyo kuna kara asi Jehova kwa u gava tupu kovantu wokulinunupika, “ava gwa tumbukira mwenyo gwanarunye.” (Yirug. 13:48) Vantu wokulinunupika va yi tambura asi mukareli gokulimburukwa gonondunge kuna kuturonga usili womoBibeli posiruwo esi. (Mat. 11:25; 24:45) Kapi tatu vhuru kukwata egano  Bibeli twa hana kugwana evatero ntani ayo mulyo unene tu kwate egano Bibeli.—Yis. 3:13, 15.

5. Yisinke hena ga tu pa Jehova?

⁵ Jehova kwa tu pa hena situmbukira sokuronga wopeke usili womoBibeli ntani nositambo sendi. (Mat. 24:14) Mbudi ezi atu zuvhisa mulyo unene, morwa azo kuvatera vantu va ya hamene kepata lyaJehova ntani kugava mpito kwawo yipo va ka gwane mwenyo gwanarunye. (1 Tim. 4:16) Yi kare asi ose kulitura mo unene mokuzuvhisa ndi nakauke, ayo mulyo morwa ose kuna kukwatesa ko sirugana esi somulyo vana kurugana momazuva aga. (1 Tim. 2:3, 4) Ee, mfumwa musi mokukara varugani kumwe naKarunga!—1 Kol. 3:9.

6. Yisinke ya horokerere vantu vamwe ava va dilire kutakamesa eyi va va pere?

⁶ Vakaume vamwe vaTimoteusa kapi va mwene mulyo gositumbukira esi va kere naso sokukara murugani kumwe naKarunga. Pasihonena, Demasa kwa here unene yininke yomouzuni, ano konyima ga ya hagekere kugenda kumwe naPaurusa. (2 Tim. 4:10) Ayo kumoneka asi Figerusi naHeremogenesi kwa hagekere kuzuvhisa morwa kwa tjilire asi nawo ngava va hepeka ngwendi Paurusa. (2 Tim. 1:15) Himeneusa naArekisandeli kwa ya kere varwanesi usili makura tava ya hageke kukarera Jehova. (1 Tim. 1:19, 20; 2 Tim. 2:16-18) Vantu navenye ava va here Jehova pomuhowo, konyima va ya hagekere kugazara asi yininke eyi gava pere Jehova mulyo.

7. Nonkedi musinke a ruganesa Satana yipo a tu pukise?

⁷ Ngapi omu Satana a hetekere ko kutupukisa yipo tu sige yininke yomulyo eyi ga tu pa Jehova? Tu tareni nonkedi dimwe omu Satana a yi rugana. Age kuruganesa yilihafeso nonombudi nositambo sokutuninkisa tu gazare nokurugana yininke eyi nayi tu ninkisa kanunu-kanunu tu hageke kukarera Jehova nokulimburukwa nompango dendi. Age kuhetekera ko kututjilisa kupitira momahepeko ntani moyininke eyi ava uyunga vakwetu yipo tu hageke kuzuvhisa. Age kutupukisa tu purakene “konompata dougova” dovarwanesi usili yipo asi tu sige usili ou twa lironga moBibeli.—1 Tim. 6:20, 21.

8. Yisinke ono lirongere ko kosihonena samunazinyetu Daniel?

⁸ Nsene kapi tuna kutakamesa, kuvhura tu sige usili kanunu-kanunu. Tu tareni sihonena saDaniel, * ogu ga here kudana maudano gokoserefoni. Age kwa tanta asi: “Ame kwa tamekere kudana maudano ogo apa na kere koyiha yonomvhura murongo. Pomuhowo, ame ngani dana maudano gomawa koserefoni. Nye  mwaza siruwo ame kwa ya tamekere kudana maudano gonyanya ntani ngava likida mo yininke youmpure.” Daniel nga dana maudano ogo novili 15 nkenye ezuva. Age kwa tanta asi: “Na yi divire asi maudano ogo ngaga mana siruwo sange ntani ngaga ninkisa nge ni dire kukarera Jehova nomutjima nagunye. Nye mutjima gwange kwa tanterere nge asi kapisi hepero ni rugane eyi azi uyunga Bibeli.” Yipo nye, nsene kapi tuna kutakamesa, yilihafeso kuvhura kutuninkisa tu hageke kuhara usili kanunu-kanunu. Nsene yi horoka ngoso, ose ngatu zumbanesa yininke yomulyo eyi ga tu pa Jehova.

9. Kuliza na-1 Timoteusa 1:18, 19, kosinke Paurusa ga hetakanesere Timoteusa?

⁹ Resa 1 Timoteusa 1:18, 19. Paurusa kwa hetakanesere Timoteusa komukwayita ntani ga mu tumangedere a ka rwe “yita yoyiwa.” Yita eyi kwa kere yopampepo nye kapisi eyi ava ru novantu. Ngapi omu Vakriste va lifana novakwayita ava ava ru yita? Yikara musinke twa hepa kutunga po ngovakwayita vaKristusa? Tu zeni tu ka zogere yitwa yitano eyi natu lirongera ko kosifanekeso saPaurusa. Yitwa eyi tayi katu vatera yipo tu dire kuzumbanesa usili womoBibeli ou twa lironga.

10. Yisinke etjirokarunga ntani morwasinke twa li hepera?

¹⁰ Tunga po etjirokarunga. Mukwayita gomuwa, kulimburukwa. Age kuza a ka rwe paapa ga hulira yipo a popere muntu ogu ga hara ndi yininke eyi a tara asi mulyo. Paurusa kwa korangedere Timoteusa a tunge po etjirokarunga, kutanta asi kuhara unene Jehova Karunga. (1 Tim. 4:7) Nsene tu hara unene Karunga nokumutjira, ngayi tu vatera tu dire kusiga usili ou twa lironga moBibeli.—1 Tim. 4:8-10; 6:6.

11. Morwasinke twa hepera elipangero?

¹¹ Tunga po elipangero. Mukwayita ga hepa kulideura mwene yipo a kare ana liwapaikire yita. Timoteusa ga nyokerere po mapukiso gaSatana morwa age kwa kweme magano gaPaurusa ntani nga rugana unene yipo a nyokere po magano gomadona nokutunga po yikara yoyiwa ntani age ga litulilire po siruwo sokukara novapuli vakwawo. (2 Tim. 2:22) Mokuyisikisa mo nainye oyo, ga hepere elipangero. Twa hepa elipangero yipo tu nyokere po magazaro gomadona. (Rom. 7:21-25) Twa hepa hena elipangero mokuhutura muntu gomukuru-kuru ntani tu dware muntu gomupe. (Efe. 4:22, 24) Ano nsene kulizuvha eroroko apa atu tundu koyirugana, twa hepa kukondja ngorooro tu wize komapongo.—Heb. 10:24, 25.

12. Yisinke nayi tu vatera tu dive nawa kuruganesa Bibeli?

¹² Mukwayita ga hepa kuliyomberesa kuruganesa yirwiso yendi. Mokuninka asi a dive nawa kuruganesa yirwiso yendi, ga hepa kuliyomberesa nkenye apa. Nose twa hepa kudiva nawa omu natu ruganesa Nonkango daKarunga. (2 Tim. 2:15) Komapongo kuvhura tu lironge ko nonkedi dimwe, omu natu diva nawa kuruganesa Nonkango daKarunga. Nye nsene tuna hara kuvatera wopeke va yi pure asi Bibeli kuvhura kuvavatera, twa hepa kuzilironga nkenye apa. Twa hepa kuruganesa Nonkango daKarunga tu nkondopeke epuro lyetu. Eyi kapi ayi tanta asi kuresa tupu Bibeli makura. Nye kwa kwatera mo hena kuteda ko kweyi tuna kuresa ntani nokurugana epaparo moyimbapiratjangwa yetu, yipo tu kwate egano eyi tuna kuresa moBibeli nokuyitura pasirugana. (1 Tim. 4:13-15) Nsene tu yi rugana ngoso, ngayi tu vatera tu ruganese nawa Bibeli yipo tu ronge vantu. Nye eyi kapi yina kutanta asi tatu resere tupu vantu etjangwa lyomoBibeli.  Tuna hara kuvatera ava tuna kuronga va kwate egano velise nokuzitura pasirugana meparu lyawo. Nsene tu twikira kulironga nkenye apa Bibeli, ngayi tu vatera tu kare nediwo yipo tu ronge vantu Nonkango daKarunga.—2 Tim. 3:16, 17.

13. Kuliza noVahebeli 5:14, morwasinke twa hepera kukara nonondunge?

¹³ Kara nonondunge. Mukwayita ga hepa kudimburura siponga sina kara komeho, yipo a si henduke. Nose twa hepa kudimburura maukaro aga ngaga tu tura mosiponga ntani nokurugana ko yuma yipo tu ga henduke. (Yis. 22:3; resa Vahebeli 5:14.) Pasihonena, twa hepa kuhorowora nawa yilihafeso yetu. Kotivi ntani monomuvi, kulikida mo yininke yokunyata. Yininke oyo kuswaukisa Karunga ntani kuvhura kutura elikwatakano lyetu naJehova mosiponga. Yipo nye, twa hepa kunyokera po yilihafeso eyi nayi tu ninkisa tu ya hageke kuhara Jehova kanunu-kanunu.—Efe. 5:5, 6.

14. Ngapi omu nondunge da vaterere Daniel?

¹⁴ Daniel ogu tuna tumbura ga ya tamekere kudimburura asi ayo kwa kere sili udigu wounene kwendi mokudana maudano gokoserefoni omu mwa hamenene yininke yonyanya neyi youmpure. Age kwa rugene epaparo moWatchtower Library, yipo a gwane yirongwa eyi nayi mu vatera moudigu owo. Mauwa musinke ga gwanenene mo? Age kwa ya hagekere kudana maudano gomadona gokoserefoni. Ntani ga hagekere kudana novakwawo ava nga dana nawo. Daniel kwa tanta asi “Mevango lyokudana maudano ogo, ame kwa ya tamekere kuruganesa siruwo sange koyininke yoyiwa ntani nokukara novakwetetu womombungakriste.” Daniel ngesi muzuvhisi gokukarerera ntani mukuronambunga.

15. Morwasinke nombudi doyimpempa da karera siponga?

¹⁵ Ngwendi Timoteusa, nose twa hepa kukara nonondunge tu dimburure siponga sa kara monombudi doyimpempa edi ava hanesa varwanesi usili. (1 Tim. 4:1, 7; 2 Tim. 2:16) Pasihonena, awo kuvhura va hanese nombudi doyimpempa kuhamena vanavazinyetu ndi vatu ninkise tu kare nomasinganyeko kuhamena mbunga zaJehova. Nombudi dangoso doyimpempa kuvhura kutuninkisa tu dire kukara nepuro lyokupama. Twa hepa kunyokera po kupura nombudi dangoso. Morwasinke? Morwa nombudi odo kudihanesa ‘vantu ava va kara nonondunge dokuzonauka, ano usili  nare wa va diruka.’ Sitambo sawo kuna hara “nompata nomalitatagano.” (1 Tim. 6:4, 5) Vana hara tu pure nombudi dawo doyimpempa ntani tu hageke kuhuguvara vanavazinyetu.

16. Madonganeso musinke twa hepa kunyokera po?

¹⁶ Nyokera po madonganeso. Ngomukwayita “gomuwa gwaJesus Kristusa,” Timoteusa ga hepere kudemenena unene kosirugana sokuzuvhisa mevango lyokudemenena koyininke yopanyama ntani nayimwe yemeparu. (2 Tim. 2:3, 4) Nose twa hepa kunyokera po kuhara unene yininke yopanyama. “Eyivayiwo lyemona” kuvhura kutuninkisa tu hageke kuhara Jehova kanunu-kanunu Nonkango dendi Bibeli, ntani alyo kuvhura kutuninkisa tu dire kupa ko wopeke yininke yopanyama eyi twa kara nayo. (Mat. 13:22) Twa hepa kurerupika eparu lyetu nokuruganesa siruwo setu nononkondo detu yipo tu ture Uhompa muhowo.—Mat. 6:22-25, 33.

17-18. Yisinke natu rugana yipo tu popere elikwatakano lyetu naJehova?

¹⁷ Liwapaikira o rugane ko yuma usimbu. Mukwayita ga hepa kutura po mawapaiko, a dive eyi na rugana yipo a lipopere mwene. Nsene tuna hara kupopera yininke eyi ga tu pa Jehova, twa hepa kurugana ko yuma usimbu nsene tuna mono siponga. Yisinke nayi tu vatera yipo tu rugane ko yuma usimbu? Twa hepa kuliwapaikira komeho zosiruwo tu dive eyi ngatu rugana, apa ngava tu tjilisa vantu.

¹⁸ Mokuyifanekesa, apa vantu ava zi kevango oku kuna kara silika, vantu kuvalikida evero eli nava pwagera nsene simpagwa sina horoka. Morwasinke? Yipo va vhure kutunda usimbu mevango olyo nsene sina horoka simpagwa. Mokulifana, twa hepa kuliwapaikira tu dive eyi ngatu rugana nsene ngatu ligwanekera nomafano goruhonda, mafano gonyanya, ndi vantu wokurwanesa usili apa ngatu tarera kotivi ndi nomuvi. Nsene tu liwapaikira ngesi tu dive eyi ngatu rugana, ose ngatu kara tuna kuhuka pampepo ntani ngatu popera elikwatakano lyetu naJehova.—Epis. 101:3; 1 Tim. 4:12.

19. Mauwa musinke ngatu gwana nsene tu takamesa ndi tu popera yininke yomulyo eyi ga tu pa Jehova?

¹⁹ Twa hepa kutakamesa yininke yomulyo eyi ga tu pa Jehova ngwendi usili womoBibeli ntani nositumbukira sokuronga vantu mbudi zongwa. Nsene tu yi rugana ngoso, ngatu kara nezwi lyewa lyokomutjima, eparu lyetu ngali kara nositambo ntani ngatu hafa morwa kuna kuvatera wopeke va dive Jehova. Nevatero lyaJehova, ose ngayi tu tompoka kutakamesa eyi ga tu pa.—1 Tim. 6:12, 19.