1-2. Kweelana a 1 Timoti 6:20, ino Timoti wakalinga kweelete kucita nshi?

LIINJI tulapa bamwi kutulaminaako kabotu shintu shiyandika. Kucakubonenaako, inga twaya mukubikisha maali esu ku banki. Alimwi na twacita boobo tulalangila kwaamba ayi maali esu alaakulamwa kabotu alimwi teshi akeepwe. Aboobo makani akupa umwi cintu ciyandika kwaamba ayi atulamineeko ngamakani ngotushi kabotu.

² Amubelenge 1 Timoti 6:20. Mutumwi Paulo wakebalusha Timoti kwaamba ayi wakapekwa cintu cimwi ciyandika abuumbi, nkokwaamba ayi lushibo lwancinencine paluyaando Lesa ndwaakalengela bantu. Alimwi Yehova wakapa Timoti coolwe ca “kushimikila maswi” alimwi “akucita ncito ya shikushimikila.” (2 Timo. 4:2, 5, NWT) Paulo wakayuminisha Timoti kulama kabotu nshaakapekwa. Bweenka mbuli Timoti, aswebo twakapekwa shintu shiyandika abuumbi. Ino nshintu nshi? Alimwi ino nceebonshi tulyeelete kulama kabotu buboni Yehova mbwakatupa?

3-4. Ino nceebonshi cancine camu Baibo cilayandika abuumbi?

³ Yehova wakatupa coolwe cakushiba cancine ciyandika abuumbi ncetucana mu Maswi akwe, Baibo. Cancine ici cilayandika abuumbi mukwiinga cilatucafwa kushiba nsheenga twaciita kwaamba ayi tube abushicibusa buyumu a Yehova, akucana lusangalalo lwancinencine. Na twashoma cancine akucikonkela tulaleya kuba basha kunjiisho shakubeca alimwi akuleya mibo ibiibi.​—1 Koli. 6:9-11.

⁴ Cimwi cipa kwaamba ayi cancine camu Maswi akwe Lesa cibe ciyandika abuumbi, ncakwaamba ayi Yehova alaciyubululabo kubantu baliceesha alimwi “bacite myoyo ibotu.” (Milimo 13:48) Bantu baliceesha balasumina kwaamba ayi munshiku shino Yehova atootwiisha kwiinda mukusebensesha musebenshi ushomeka alimwi  ucite maano. (Mate. 11:25; 24:45) Inga tatunyumfwishishi cancine camu Baibo kwakubula lucafwo, alimwi taakuwo cintu cibotu abuumbi kwiinda kunyumfwisha cancine.​—Tus. 3:13, 15.

5. Ino ncoolwe nshi cimwi Yehova ncaakatupa?

⁵ Yehova watupa acoolwe cakwiisha bamwi cancine pali nguwe alimwi akuyanda kwakwe. (Mate. 24:14) Makani ngotushimikila alayandika abuumbi mukwiinga alacafwa bantu kuba lubasu lwa mukwashi wakwe Yehova akubapa coolwe cakuba abuumi butamaani. (1 Timo. 4:16) Inga caba ayi tulasebensa abuumbi na mpashi tulacikonshabo paniini kwaabanamo lubasu muncito yakushimikila, tutoocafwilisha muncito iyandika abuumbi itoocitwa pacecino ciindi. (1 Timo. 2:3, 4) Ncoolwe cinene abuumbi kusebensa pomwi a Lesa!​—1 Koli. 3:9.

6. Ino nciinshi cakacitika kubaabo bakaalilwa kulama kabotu nshobakalinga bapekwa?

⁶ Beneklistu bamwi bakalingaako paciindi comwi a Timoti, tabakwe kubikila maano kucoolwe cakusebensa pomwi a Lesa. Mukwiinga Dimasi wakalinga kusuni bunene shintu shamucishi, wakacisowa coolwe cakusebensela pomwi a mutumwi Paulo. (2 Timo. 4:10) Figelasi alimwi aEmojenesi abalo citooboneka anga bakacileka kusebensa ncito yakushimikila ceebo cakuloonda kupenshekwa bweenka mbuli Paulo mbwaakapenshekwa. (2 Timo. 1:15) Aimeneyusi, Alekisanda, alimwi a Filetasi bakaswa mucancine akutalika kukonkela njiisho shakubeca. (1 Timo. 1:19, 20; 2 Timo. 2:16-18) Aba boonse mbotwaambawo pakutaanguna bakalinga bayumu lwakumushimu, sombi bakacileka kubikila maano kushintu shiyandika abuumbi.

7. Ino Satana alacita buyani kwaamba ayi atulengeshe kucita nshaasuni?

⁷ Ino Satana alacita buyani kwaamba ayi atulengeshe kucileka kubikila maano kushintu nshotwakapekwa? Atubandike nshila nshaasebensesha. Alasebensesha shakulikondelesha alimwi amapulogilamu apa TV, mafilimu, intaneti, makani amumanyusipepa, mabuku, alimwi amamagazini akucishi ayo ayuminisha mibo, miyeeyo, alimwi abukaalo mbwaacishi ayi inga bwatupa kucileka kunyumfwila milawo yakwe Yehova. Aleelesha kutukoonga kwiinda mukusebensesha makani bantu ngobaamba, na kupa kwaamba ayi banootupensha kwaamba ayi tucileeke kushimikila. Alimwi aleelesha kutuyunga kwaamba ayi tunookutika ‘kukupikisha’ kwa baabo bakaswa mucancine ‘uko bantu nkobaamba ayi “ndushibo,”’ kakuli balisuni kutuyunga ayi tushiye cancine.​—1 Timo. 6:20, 21.

8. Ino mweeya nshi kuswa kushakacitikila mukwesu waliina lya Daniel?

⁸ Na tatuna kucenjela, inga twatalika kuswa mucancine paniini paniini. Amuyeeye shakacitikila mukwesu waliina lya Daniel, * uyo wakalinga kusuni bunene kusekana mageemu apakompyuta.  Wakaamba ayi: “Ndakatalika kusekana mageemu apakompyuta kaancitebo myaaka 10. Ndyendakatalika, ndakalinga kusekanabo mageemu ali kabotu. Ano paniini paniini ndakatalika kusekana mageemu atabete kabotu.” Mukuya kwaciindi, wakalinga kumana mawoola 15 kasekanabo mageemu pakompyuta. Wakatolelela akwaamba ayi: “Panshi lyamoyo ndakalinga kucishi kwaamba ayi mageemu aya alimwi aciindi ncentosekana shitontalamusha kuli Yehova. Nacibi boobo, ndakatalika kulibeca ayi nsheelete kukonkela njiisho shamu Baibo.” Aboobo na tatuna kucenjela shakulikondelesha inga shatupa kwaamba ayi tucileeke kubikila maano kucancine. Alimwi na ishi shacitika inga twaalilwa kulama kabotu shintu shiyandika Yehova nshaakatupa kulama.

9. Kweelana a 1 Timoti 1:18, 19, ino Paulo wakakoshanisha Timoti ku nshi?

⁹ Amubelenge 1 Timoti 1:18, 19. Paulo wakakoshanisha Timoti kuli shilumamba akumuyuminisha ayi ‘tolelela kulwana nkondo ibotu.’ Iyi tayakalinga nkondo iine sobwe, sombi yakalinga nkondo yakumushimu. Ino Beneklistu bali buyani anga mbashilumamba batolwana nkondo? Ino njimibo nshi njotweelete kubaayo mbuli bashilumamba bakwe Klistu? Amuleke tubandike shiiyo shosanwe kuswa kucikoshanyo Paulo ncakaamba. Shiiyo ishi inga shatucafwa kucatisha cancine.

10. Ino kusebensela Lesa cakulyaaba cilaamba nshi, alimwi ino nceebonshi kulayandika?

¹⁰ Amusebensele Lesa cakulyaaba. Shilumamba usebensa kabotu ngulya ushomeka. Alasebensa cankusu kwaamba ayi ashitilishe baabo mbwaasuni na cintu cimwi ncaabona ayi cilayandika. Paulo wakayuminisha Timoti kusebensela Lesa cakulyaaba​—nkokwaamba ayi kutolelela kushomeka kuli Lesa. (1 Timo. 4:7) Na katusuni Lesa abuumbi alimwi akulyaaba kuli nguwe, tulaakuba alusuno lwakutolelela kucatisha cancine.​—1 Timo. 4:8-10; 6:6.

11. Ino nceebonshi tulyeelete kuliisha kabotu?

¹¹ Amuliishe kucita shiluleme. Shilumamba alyeelete kusebensa cankusu kwaamba ayi acikoonshe kuba ulibambite kulwana. Timoti wakatolelela kuba muyumu lwakumushimu, mukwiinga wakalinga kukonkela Maswi akwe Lesa Paulo ngaakamuyuminisha ayi alyeelete kuleya lunkumbwa lutabete kabotu, kukonkela mibo ibotu, alimwi akucana ciindi cakuba pomwi abashominyina. (2 Timo. 2:22) Kucita boobo kwakalinga kuyandika kuliisha kabotu. Tulyeelete kuliisha kabotu kwaamba ayi tucikoonshe kulwana lunkumbwa lutabete kabotu. (Loma. 7:21-25) Kwiilikaawo, tulyeelete kuliisha kabotu kwaamba ayi tutolelele kufuula buntu bwakale kale akufwala buntu bupya. (Efe. 4:22, 24) Alimwi na tutolinyumfwa kulema pakumana kwa bushiku, inga twayandika kulikakatisha kucanika kumabungano.​—Ebu. 10:24, 25.

12. Ino nshiinshi sheenga shatucafwa kushiba kabotu bwakusebensesha Maswi akwe Lesa?

¹² Shilumamba alyeelete kunookwiiya bwakusebensesha shilwanisho shakwe. Alimwi na alisuni kuba alushibo, alyeelete kunooliisha lyoonse. Aswebo tulyeelete kwiiya bwakusebensesha kabotu Maswi akwe Lesa. (2 Timo. 2:15) Inga tweeya kucita boobo kumabungano. Ano kwaamba ayi tucikoonshe kucafwa bamwi kushoma kwaamba ayi ncakwiila cancine camu Baibo inga cabacafwa, lyoonse tulyeelete kuba aciiyo ca Baibo capalweesu. Tulyeelete kuyumya lushomo lwesu kwiinda mukusebensesha Maswi akwe Lesa. Nkokwaamba ayi tatweelete kweelabo pakubelenga Baibo. Tulyeelete kukutumana akuyeeya nshotubelenga akulangoola makani amwi kuswa mumabuku esu, kwaamba ayi tunyumfwishishe kabotu akushiba bwakusebensesha Malembo. (1 Timo. 4:13-15) Lyalo ndyeenga twacikonsha kwiisha kabotu bamwi Maswi akwe Lesa. Alimwi bweenka mbotwaambawo kale, kucita boobo kulayandika kutelabo pakubelenga mavesi kubaabo mbotutokwiisha. Sombi kubacafwa kunyumfwishisha mbweenga bakonkela nshebatokwiiya. Aboobo  na lyoonse katucita ciiyo ca Baibo capalweesu, tulaakushiba kabotu bwakwiisha bamwi Maswi akwe Lesa.​—2 Timo. 3:16, 17.

13. Kweelana a Bene Ebulu 5:14, ino nceebonshi tulyeelete kuyeeyela limwi shakucita?

¹³ Amuyeeyele limwi nsheenga mwaciita. Shilumamba alyeelete kuyeeyela limwi mapenshi ngeenga wacana alimwi ambweenga waaleya. Aswebo tulyeelete kuyeeyela limwi bukaalo bweenga bwatubika mumapensho lyalo akubuleya. (Tus. 22:3; amubelenge Bene Ebulu 5:14.) Kucakubonenaako, tulyeelete kusala shakulikondelesha shili kabotu. Liinji mapulogilamu apama TV alatondesha mibo ibiibi. Mibo iyi ilakalasha Lesa alimwi inga yatuletela mapensho. Tulyeelete kuleya shakulikondelesha sha mushobo uyo mukwiinga inga shapa kwaamba ayi tucileeke kusuna Lesa mukuya kwaciindi.​—Efe. 5:5, 6.

14. Ino nciinshi cakacafwa mukwesu Daniel kucileka kusekana mageemu apakompyuta atabete kabotu?

¹⁴ Mukwesu Daniel ngotwaambawo kale, wakatalika kubona kwaamba ayi mageemu apakompyuta ngaakalinga kusekana taakalinga kabotu. Wakalangoola makani kuswa mu Watchtower Library kwaamba ayi amucaafwe. Ino akamucafwa buyani? Wakacileka kusekana mageemu atabete kabotu. Wakacileka kubandika abaabo mbwaakalinga kusekanaabo mageemu ayo pa intaneti. Lyalo wakaamba ayi: “Muciindi cakusekana mageemu apakompyuta, ndakatalika kucitako shintu shimwi akucanika pomwi abeshicibusa bamulibungano.” Pacecino ciindi mukwesu Daniel ngu painiya alimwi munene mulibungano.

15. Ino nceebonshi makani akubeca ngabiibi?

¹⁵ Bweenka mbuli Timoti, tulyeelete kuyeeya mapensho ngeenga twalibikaamo na katukutika makani akubeca aambilisha baabo bakaswa mucancine. (1 Timo. 4:1, 7; 2 Timo. 2:16) Kucakubonenaako, cimwi ciindi inga batalika kwaambilisha makani akubeca pabamakwesu na makani eenga atupa kutalika kutoonsha libunga lyakwe Yehova. Makani amushobo uyu inga apa kwaamba ayi tucileeke kuba alushomo luyumu. Aboobo tatweelete kukutika kumakani akubeca. Ino nceebonshi? Nceebo cakwaamba ayi makani aya alaswa “kubantu bacite miyeeyo ibiibi batakoonshi kushiba lushinisho.” Luyaando lwabo nkutalika “kupikisha akwaambana.” (1 Timo. 6:4, 5) Balisuni kwaamba ayi tushome bubeshi bwabo akutalika kutoonsha bamakwesu.

16. Ino nshintu nshi sheenga shatupilinganya nshotweelete kuleya?

¹⁶ Amuleye shintu shipilinganya. Mbuli “shilumamba mubotu wakwe Klistu Yesu,” Timoti wakalinga kweelete kubikila maano kuncito yakushimikila muciindi ca kupilinganishikwa  ashintu shakumubili. (2 Timo. 2:3, 4) Bweenka mbuli Timoti, tatweelete kupilinganishikwa alunkumbwa lwakusuna shintu shakumubili. ‘Kubecekwa abubile’ inga kwapa kwaamba ayi tucileeke kusuna Yehova, kubona bubotu bwa Maswi akwe Lesa alimwi akwiishako bamwi. (Mate. 13:22) Tulyeelete kukala buumi bwakutalila shiinji akusebensesha ciindi ankusu shesu ‘kutolelela . . . kulangoola sha Bwaami citaanshi.’​—Mate. 6:22-25, 33.

17-18. Ino inga twacita buyani kwaamba ayi tushitilishe bushicibusa bwesu a Yehova?

¹⁷ Munoofwambaana kucitawo comwi. Shilumamba alyeelete kulibambila limwi shakucita kwaamba ayi alishitilishe. Kwaamba ayi tushitilishe shintu shiyandika Yehova nshaakatupa ayi tulame, tulyeelete kufwambaana kucitawo comwi na twabona cimwi ceenga catubika mumapensho. Ino nciinshi ceenga catucafwa kucita boobo? Tulyeelete kulibambila limwi nsheenga twaciita na twabona lipenshi.

¹⁸ Kucakubonenaako, na bantu baya kumusena kuli cakucitika cimwi, balalwiitikwa kushibila limwi mulyaango uli pafwiifwi cakucitika ico kacitana kutalika. Ino nceebonshi? Nceebo cakwaamba ayi na kwabuka lipenshi lili lyoonse inga bacikonsha kuswa cakufwambaana. Aswebo tulyeelete kuyeeyela limwi shakucita na kwakubula kwiingashila ndyetuli pa intaneti na ndyetutokweebela TV twabona shikope shibiibi, kucayana, na makani aamba baabo bakaswa mucancine. Cilaakuba cuubu kufwambaana kucita sheenga shashitilisha bushicibusa bwesu a Yehova na twalibambila limwi.​—Kulu. 101:3; 1 Timo. 4:12.

19. Ino nshoolwe nshi nsheshi tukacane na tukashitilishe shintu shiyandika Yehova nshaakatupa?

¹⁹ Tulyeelete kushitilisha shintu shiyandika abuumbi Yehova nshaakatupa​—cancine ciyandika abuumbi camu Baibo alimwi acoolwe cakwiisha bamwi. Kucita boobo kulaakutupa kuba anjeelacaamba isalalite, buumi bucite mpindu, alusangalalo ndotucana ceebo cakucafwa bantu kushiba Yehova. Kwiinda mulucafwo lwakwe, tulaakucikonsha kushitilisha sheesho nshotwakapekwa.​—1 Timo. 6:12, 19.