ບົດຄວາມສຶກສາທີ 40
“ຂໍໃຫ້ຮັກສາສິ່ງທີ່ຝາກໄວ້ກັບເຈົ້າໃຫ້ດີ”
“ຕີໂມທຽວລູກຮັກ ຂໍໃຫ້ຮັກສາສິ່ງທີ່ຝາກໄວ້ກັບເຈົ້າໃຫ້ດີ.”—1 ຕມ. 6:20
ເພງ 29 ໃຊ້ຊີວິດໃຫ້ສົມກັບຊື່ຂອງພວກເຮົາ
ໃຈຄວາມສຳຄັນ *
1-2. ຕາມ 1 ຕີໂມທຽວ 6:20 ຕີໂມທຽວໄດ້ຮັບຫຍັງ?
ເຮົາມັກຝາກສິ່ງທີ່ມີຄ່າຂອງເຮົາໄວ້ໃຫ້ຄົນອື່ນເບິ່ງແຍງ. ຕົວຢ່າງເຊັ່ນ: ເຮົາອາດຝາກເງິນຢູ່ທະນາຄານເພາະເຮົາຄາດໝາຍວ່າເງິນຂອງເຮົາຈະປອດໄພ ບໍ່ເສຍ ຫຼືບໍ່ມີໃຜລັກເອົາ. ຈາກເລື່ອງນີ້ເຮັດໃຫ້ເຮົາເຫັນວ່າເມື່ອເຮົາຝາກສິ່ງທີ່ມີຄ່າໄວ້ນຳຜູ້ໃດຜູ້ໜຶ່ງ ເຮົາກໍຄາດໝາຍວ່າລາວຈະຮັກສາໄວ້ດີໆ.
2 ອ່ານ 1 ຕີໂມທຽວ 6:20. ອັກຄະສາວົກໂປໂລເຕືອນຕີໂມທຽວວ່າລາວໄດ້ຮັບສິ່ງໜຶ່ງທີ່ມີຄ່າຫຼາຍ ນັ້ນແມ່ນຄວາມຮູ້ທີ່ຖືກຕ້ອງຈາກພະເຢໂຫວາ. ນອກຈາກນັ້ນ ພະເຢໂຫວາຍັງໃຫ້ຕີໂມທຽວ “ເຮັດໜ້າທີ່ຂອງຜູ້ປະກາດຂ່າວດີ.” (2 ຕມ. 4:2, 5) ໂປໂລແນະນຳຕີໂມທຽວໃຫ້ຮັກສາສິ່ງທີ່ຝາກໄວ້ນຳລາວ. ຄືກັບຕີໂມທຽວ ພະເຢໂຫວາໄດ້ຝາກສິ່ງທີ່ມີຄ່າຫຼາຍຢ່າງໄວ້ນຳເຮົາ. ສິ່ງທີ່ມີຄ່າເຫຼົ່ານັ້ນມີຫຍັງແດ່? ແລະເປັນຫຍັງເຮົາຕ້ອງຮັກສາໄວ້?
ເຮົາໄດ້ຮັບຄວາມຈິງທີ່ມີຄ່າ
3-4. ເປັນຫຍັງຄວາມຈິງໃນຄຳພີໄບເບິນຈຶ່ງມີຄ່າ?
3 ພະເຢໂຫວາໃຫ້ເຮົາມີຄວາມຮູ້ທີ່ຖືກຕ້ອງ ເຊິ່ງແມ່ນຄວາມຈິງທີ່ຢູ່ໃນຄຳພີໄບເບິນ. ຄວາມຈິງເຫຼົ່ານີ້ມີຄ່າ ເພາະສອນເຮົາໃຫ້ຮູ້ວິທີທີ່ຈະມີສາຍສຳພັນທີ່ດີກັບພະເຢໂຫວາ ແລະຍັງຊ່ອຍເຮົາໃຫ້ຮູ້ວ່າຈະມີຄວາມສຸກແທ້ໃນຊີວິດໄດ້ແນວໃດ. ເມື່ອເຮົາເຊື່ອແລະເຮັດຕາມຄວາມຈິງທີ່ເຮົາຮຽນ ເຮົາກໍຈະຫຼຸດພົ້ນຈາກຄຳສອນຕົວະແລະເຊົາຊີວິດແບບທີ່ບໍ່ດີ.—1 ກຣ. 6:9-11
4 ອີກເຫດຜົນໜຶ່ງທີ່ຄວາມຈິງໃນຄຳພີໄບເບິນມີຄ່າແມ່ນຍ້ອນພະເຢໂຫວາໄດ້ເປີດເຜີຍຄວາມຈິງນີ້ໃຫ້ຄົນຖ່ອມເພາະເຂົາເຈົ້າ “ເຕັມໃຈຕອບຮັບຄວາມຈິງ.” (ກຈກ. 13:48) ຄົນແບບນີ້ຍອມຮັບວ່າທາດສັດຊື່ແລະສຸຂຸມເປັນຜູ້ທີ່ພະເຢໂຫວາໃຊ້ສອນຄວາມຈິງໃນທຸກມື້ນີ້. (ມທ. 11:25; 24:45) ເຮົາບໍ່ສາມາດຮຽນຮູ້ຄວາມຈິງໃນຄຳພີໄບເບິນດ້ວຍໂຕເອງແລະກໍບໍ່ມີຫຍັງທີ່ມີຄ່າຫຼາຍກວ່າການເຂົ້າໃຈຄວາມຮູ້ນີ້.—ສຸພາ. 3:13, 15
5. ພະເຢໂຫວາໃຫ້ເຮົາມີສິດທິພິເສດຫຍັງ?
5 ພະເຢໂຫວາຍັງໃຫ້ເຮົາມີສິດທິພິເສດທີ່ຈະສອນຄົນອື່ນກ່ຽວກັບເລື່ອງຂອງເພິ່ນແລະຈຸດປະສົງຕ່າງໆຂອງເພິ່ນນຳ. (ມທ. 24:14) ຄວາມຮູ້ທີ່ພະເຢໂຫວາໃຫ້ເຮົາສອນມີຄ່າຫຼາຍ ຍ້ອນຄວາມຮູ້ນີ້ຊ່ອຍຄົນໃຫ້ເຂົ້າມາເປັນສ່ວນໜຶ່ງໃນຄອບຄົວຂອງພະເຢໂຫວາ ແລະໃຫ້ເຂົາເຈົ້າມີໂອກາດທີ່ຈະໄດ້ຊີວິດຕະຫຼອດໄປ. (1 ຕມ. 4:16) ບໍ່ວ່າເຮົາຈະປະກາດໄດ້ຫຼາຍຫຼືໜ້ອຍ ເຮົາກໍກຳລັງຊ່ອຍໃນວຽກທີ່ສຳຄັນທີ່ສຸດທີ່ກຳລັງເຮັດຢູ່ໃນຕອນນີ້. (1 ຕມ. 2:3, 4) ເຮົາໄດ້ຮັບກຽດແທ້ໆທີ່ໄດ້ເປັນເພື່ອນຮ່ວມງານຂອງພະເຈົ້າ.—1 ກຣ. 3:9
ຮັກສາສິ່ງທີ່ຝາກໄວ້ນຳເຈົ້າ
ຕີໂມທຽວຍັງຮັບໃຊ້ພະເຢໂຫວາຕໍ່ໆໄປເຖິງວ່າຄົນອື່ນຈະຖິ້ມຄວາມຈິງ (ເບິ່ງຂໍ້ 6)
6. ເກີດຫຍັງຂຶ້ນກັບບາງຄົນທີ່ບໍ່ຮັກສາຄວາມຈິງໄວ້?
6 ໃນສະໄໝຂອງຕີໂມທຽວ ຄລິດສະຕຽນບາງຄົນບໍ່ໄດ້ເຫັນຄ່າສິດທິພິເສດຂອງການເປັນເພື່ອນຮ່ວມງານຂອງພະເຈົ້າ. ຍ້ອນເດມາຮັກໂລກນີ້ ລາວຈຶ່ງຖິ້ມສິດທິພິເສດທີ່ໄດ້ຮັບໃຊ້ກັບໂປໂລ. (2 ຕມ. 4:10) ເບິ່ງຄືວ່າຟູເຄໂລແລະເຮຣະໂມເກນກໍໄດ້ປະຖິ້ມວຽກຮັບໃຊ້ຍ້ອນເຂົາເຈົ້າຢ້ານວ່າຈະຖືກຂົ່ມເຫງຄືກັບໂປໂລ. (2 ຕມ. 1:15) ຮີເມນາໂອ ອາເລັກຊັນເດີ ແລະຟີເລໂຕໄດ້ກາຍເປັນຜູ້ທີ່ທໍລະຍົດພະເຈົ້າແລະຖິ້ມຄວາມຈິງ. (1 ຕມ. 1:19, 20; 2 ຕມ. 2:16-18) ຄົນເຫຼົ່ານີ້ເຄີຍຮັກພະເຢໂຫວາ ແຕ່ເຂົາເຈົ້າເຊົາຄິດເຖິງຄຸນຄ່າຂອງຄວາມຈິງທີ່ພະເຢໂຫວາໃຫ້ເຂົາເຈົ້າ.
7. ຊາຕານໃຊ້ວິທີໃດແດ່ເພື່ອເຮັດໃຫ້ເຮົາຖິ້ມຄວາມຈິງ?
7 ຊາຕານພະຍາຍາມແນວໃດເພື່ອໃຫ້ເຮົາເຊົາເຫັນຄຸນຄ່າຂອງຄວາມຈິງທີ່ພະເຢໂຫວາໃຫ້ເຮົາ? ໃຫ້ເຮົາເບິ່ງວິທີຕ່າງໆຂອງຊາຕານ. ມັນໃຊ້ຄວາມບັນເທີງແລະສື່ຕ່າງໆເພື່ອສົ່ງເສີມຄວາມຄິດແລະການກະທຳທີ່ຈະເຮັດໃຫ້ເຮົາຖິ້ມຄວາມຈິງ. ມັນພະຍາຍາມຂູ່ເຮົາໂດຍທາງຄວາມກົດດັນຈາກໝູ່ຄູ່ຫຼືການຂົ່ມເຫງເພື່ອໃຫ້ເຮົາຈະເຊົາປະກາດ. ມັນຍັງພະຍາຍາມຊັກຊວນເຮົາໃຫ້ຟັງສິ່ງທີ່ເອີ້ນກັນຜິດໆວ່າ “ຄວາມຮູ້” ຈາກຄົນທີ່ທໍລະຍົດພະເຈົ້າເພື່ອເຮົາຈະຖິ້ມຄວາມຈິງ.—1 ຕມ. 6:20, 21
8. ເຈົ້າຮຽນຫຍັງຈາກເລື່ອງຂອງດານຽນ?
8 ຖ້າເຮົາບໍ່ລະວັງເຮົາຈະຄ່ອຍໆຖິ້ມຄວາມຈິງ. ໃຫ້ເບິ່ງປະສົບການຂອງດານຽນ * ທີ່ມັກຫຼິ້ນວິດີໂອເກມ. ດານຽນບອກວ່າ “ຂ້ອຍເລີ່ມຫຼິ້ນວິດີໂອເກມຕອນອາຍຸປະມານ 10 ປີ. ທຳອິດຂ້ອຍຫຼິ້ນເກມທີ່ບໍ່ມີອັນຕະລາຍຫຍັງ. ແຕ່ຕໍ່ມາຂ້ອຍກໍຄ່ອຍໆເລີ່ມຫຼິ້ນເກມທີ່ມີຄວາມຮຸນແຮງແລະກ່ຽວຂ້ອງກັບເລື່ອງຜີ.” ໃນທີ່ສຸດ ລາວກໍຫຼິ້ນວິດີໂອເກມມື້ລະປະມານ 15 ຊົ່ວໂມງ. ດານຽນເວົ້າຕໍ່ວ່າ “ເລິກໆໃນໃຈແລ້ວຂ້ອຍຮູ້ວ່າເກມທີ່ຂ້ອຍຫຼິ້ນແລະເວລາທີ່ຂ້ອຍໃຊ້ໃນການຫຼິ້ນເກມເຮັດໃຫ້ຂ້ອຍເຫີນຫ່າງຈາກພະເຢໂຫວາ ແຕ່ຍ້ອນໃຈຂ້ອຍມັນດ້ານແລ້ວຂ້ອຍຈຶ່ງຄິດວ່າຫຼັກການໃນຄຳພີໄບເບິນໃຊ້ບໍ່ໄດ້ກັບຂ້ອຍ.” ຖ້າເຮົາບໍ່ລະວັງ ຄວາມບັນເທີງສາມາດເຮັດໃຫ້ເຮົາຖິ້ມຄວາມຈິງໄດ້ງ່າຍໆ. ຖ້າເລື່ອງແບບນີ້ເກີດຂຶ້ນ ເຮົາອາດສູນເສຍສິ່ງທີ່ມີຄ່າທີ່ພະເຢໂຫວາເອົາໃຫ້ເຮົາ.
ເຮົາຈະຮັກສາຄວາມຈິງໄວ້ໄດ້ແນວໃດ?
9. ຕາມ 1 ຕີໂມທຽວ 1:18-19 ໂປໂລສົມທຽບຕີໂມທຽວກັບໃຜ?
9 ອ່ານ 1 ຕີໂມທຽວ 1:18-19. ໂປໂລສົມທຽບຕີໂມທຽວວ່າເປັນຄືກັບທະຫານແລະແນະນຳລາວໃຫ້ “ສູ້ຕໍ່ໄປໃນສົງຄາມເພື່ອຄວາມຖືກຕ້ອງ.” ສົງຄາມນັ້ນບໍ່ແມ່ນການຕໍ່ສູ້ກັບທະຫານແທ້ໆ ແຕ່ແມ່ນການຕໍ່ສູ້ທາງຄວາມເຊື່ອ. ໃນດ້ານໃດແດ່ທີ່ຄລິດສະຕຽນເປັນຄືກັບທະຫານທີ່ຕໍ່ສູ້ໃນສົງຄາມ? ເຮົາຕ້ອງເຮັດຫຍັງແດ່ເພື່ອຈະເປັນທະຫານຂອງພະຄລິດ? ໃຫ້ເຮົາເບິ່ງ 5 ຈຸດນຳກັນທີ່ເຮົາຮຽນໄດ້ຈາກຕົວຢ່າງປຽບທຽບຂອງໂປໂລ. ບົດຮຽນທີ່ເຮົາໄດ້ຈາກຈຸດເຫຼົ່ານີ້ຈະຊ່ອຍເຮົາໃຫ້ຮັກສາຄວາມຈິງເອົາໄວ້.
10. ຄວາມເຫຼື້ອມໃສໃນພະເຈົ້າແມ່ນຫຍັງ ແລະເປັນຫຍັງເຮົາຕ້ອງມີສິ່ງນີ້?
10 ສ້າງຄວາມເຫຼື້ອມໃສໃນພະເຈົ້າ. ທະຫານທີ່ດີຈະພັກດີ. ລາວຈະຕໍ່ສູ້ເອົາແທ້ເອົາວ່າເພື່ອປົກປ້ອງຄົນທີ່ລາວຮັກຫຼືເພື່ອປົກປ້ອງສິ່ງທີ່ລາວຖືວ່າມີຄ່າ. ໂປໂລກະຕຸ້ນຕີໂມທຽວໃຫ້ສ້າງຄວາມເຫຼື້ອມໃສໃນພະເຈົ້າ ເຊິ່ງໝາຍເຖິງການສະແດງຄວາມພັກດີຕໍ່ພະເຈົ້າ. (1 ຕມ. 4:7) ແຮ່ງເຮົາຮັກແລະເຫຼື້ອມໃສພະເຈົ້າຫຼາຍ ເຮົາກໍແຮ່ງຢາກຮັກສາຄວາມຈິງເອົາໄວ້.—1 ຕມ. 4:8-10; 6:6
ຫຼັງຈາກເຮັດວຽກໝົດມື້ ເຮົາອາດຕ້ອງບັງຄັບໂຕເອງໃຫ້ໄປປະຊຸມ ແຕ່ເຮົາຈະໄດ້ຮັບປະໂຫຍດແນ່ນອນເມື່ອເຮັດແບບນັ້ນ! (ເບິ່ງຂໍ້ 11)
11. ເປັນຫຍັງເຮົາຕ້ອງຝຶກຝົນໂຕເອງ?
11 ພະຍາຍາມຝຶກຝົນໂຕເອງ. ທະຫານຕ້ອງຝຶກຝົນໂຕເອງຖ້າລາວຢາກກຽມພ້ອມທີ່ຈະຕໍ່ສູ້. ຕີໂມທຽວມີຄວາມເຊື່ອທີ່ເຂັ້ມແຂງຍ້ອນລາວເຮັດຕາມຄຳແນະນຳຂອງໂປໂລແລະພະຍາຍາມເອົາແທ້ເອົາວ່າທີ່ຈະໜີໄປໄກໆຈາກຄວາມຕ້ອງການທີ່ບໍ່ດີ ປູກຝັງຄຸນລັກສະນະທີ່ດີ ແລະໃຊ້ເວລາກັບພີ່ນ້ອງ. (2 ຕມ. 2:22) ເພື່ອຈະເຮັດແບບນີ້ໄດ້ກໍຕ້ອງຝຶກຝົນໂຕເອງ. ເຮົາຕ້ອງຝຶກຝົນໂຕເອງເພື່ອຈະຊະນະໃນການຕໍ່ສູ້ກັບຄວາມຕ້ອງການຂອງຮ່າງກາຍ. (ຣມ. 7:21-25) ນອກຈາກນັ້ນ ເຮົາຕ້ອງຝຶກຝົນໂຕເອງຕໍ່ໆໄປເພື່ອຖິ້ມນິດໄສເກົ່າແລະປູກຝັງນິດໄສໃໝ່. (ອຟຊ. 4:22, 24) ເຖິງວ່າເຮົາເມື່ອຍຈາກການເຮັດວຽກໝົດມື້ ເຮົາອາດຕ້ອງບັງຄັບໂຕເອງໃຫ້ໄປປະຊຸມ.—ຮຣ. 10:24, 25
12. ເຮົາຕ້ອງເຮັດຫຍັງແດ່ເພື່ອຈະຊ່ອຍເຮົາໃຫ້ໃຊ້ຄຳພີໄບເບິນໄດ້ເກັ່ງຂຶ້ນ?
12 ທະຫານຕ້ອງຝຶກໃຊ້ອາວຸດຂອງລາວ. ຖ້າທະຫານຢາກໃຊ້ອາວຸດເກັ່ງ ລາວກໍຕ້ອງຝຶກໃຊ້ເປັນປະຈຳ. ຄ້າຍຄືກັນ ຖ້າເຮົາຢາກໃຊ້ຄຳພີໄບເບິນເກັ່ງ ເຮົາກໍຕ້ອງຝຶກຄືກັນ. (2 ຕມ. 2:15) ເຮົາຮຽນຮູ້ວິທີໃຊ້ຄຳພີໄບເບິນຢູ່ການປະຊຸມ. ແຕ່ຖ້າເຮົາຢາກຊ່ອຍຄົນອື່ນໃຫ້ເຊື່ອວ່າຄວາມຈິງໃນຄຳພີໄບເບິນສາມາດຊ່ອຍເຂົາເຈົ້າໄດ້ ເຮົາກໍຕ້ອງສຶກສາແລະຄົ້ນຄວ້າຄຳພີໄບເບິນເປັນປະຈຳ. ເຮົາຕ້ອງໃຊ້ຄຳພີໄບເບິນເພື່ອເຮັດໃຫ້ຄວາມເຊື່ອເຂັ້ມແຂງ. ນີ້ໝາຍຄວາມວ່າເຮົາບໍ່ພຽງແຕ່ອ່ານຄຳພີໄບເບິນເທົ່ານັ້ນ ແຕ່ເຮົາຕ້ອງຄິດຕຶກຕອງໃນສິ່ງທີ່ອ່ານແລະຄົ້ນຄວ້າປຶ້ມຕ່າງໆຂອງອົງການເພື່ອເຮົາຈະເຂົ້າໃຈພະຄຳພີຢ່າງຖືກຕ້ອງແລະຮູ້ວິທີໃຊ້ນຳອີກ. (1 ຕມ. 4:13-15) ເມື່ອເຮັດແບບນັ້ນເຮົາກໍຈະຮູ້ໃຊ້ຄຳພີໄບເບິນເພື່ອສອນຄົນອື່ນ. ເຮົາບໍ່ພຽງແຕ່ອ່ານຂໍ້ພະຄຳພີໃຫ້ຄົນຟັງເທົ່ານັ້ນ ແຕ່ເຮົາຢາກຊ່ອຍເຂົາເຈົ້າໃຫ້ເຂົ້າໃຈຂໍ້ພະຄຳພີແລະຮູ້ຈັກເອົາໄປໃຊ້ໃນຊີວິດ. ເມື່ອເຮົາສຶກສາຄົ້ນຄວ້າຄຳພີໄບເບິນເປັນປະຈຳ ເຮົາກໍຈະໃຊ້ຄຳພີໄບເບິນໄດ້ເກັ່ງຂຶ້ນເພື່ອສອນຄົນອື່ນ.—2 ຕມ. 3:16, 17
13. ຕາມເຮັບເຣີ 5:14 ເປັນຫຍັງເຮົາຕ້ອງແຍກໃຫ້ອອກວ່າອັນໃດຖືກອັນໃດຜິດ?
13 ຮູ້ຈັກໄຈ້ແຍກ. ທະຫານຕ້ອງຮູ້ວ່າຈະມີອັນຕະລາຍຫຍັງແດ່ ແລະຕ້ອງຮູ້ວິທີຫຼີກລ່ຽງ. ເຮົາເອງກໍຕ້ອງເບິ່ງໃຫ້ອອກວ່າມີສະຖານະການຫຍັງແດ່ທີ່ເປັນອັນຕະລາຍຕໍ່ເຮົາ ແລ້ວເຮົາກໍຕ້ອງຫຼີກລ່ຽງອັນຕະລາຍນັ້ນຄືກັນ. (ສຸພາ. 22:3; ອ່ານເຮັບເຣີ 5:14) ຕົວຢ່າງເຊັ່ນ: ເຮົາຕ້ອງເລືອກດີໆໃນເລື່ອງການພັກຜ່ອນແລະຄວາມບັນເທີງ. ລາຍການໂທລະທັດແລະໜັງມັກມີເລື່ອງທີ່ຜິດສິນລະທຳທາງເພດ ເຮົາບໍ່ເບິ່ງເລື່ອງແບບນີ້ຍ້ອນຮູ້ວ່າມັນຈະຄ່ອຍໆເຮັດໃຫ້ເຮົາຮັກພະເຢໂຫວາໜ້ອຍລົງ. ເຮົາຮູ້ວ່າພະເຢໂຫວາກຽດຊັງການຜິດສິນລະທຳທາງເພດແລະຄົນທີ່ເຮັດສິ່ງແບບນີ້ກໍເຮັດໃຫ້ໂຕເອງແລະຄົນອື່ນເສຍຫາຍ.—ອຟຊ. 5:5, 6.
14. ດານຽນເລີ່ມໄຈ້ແຍກຫຍັງໄດ້?
14 ດານຽນທີ່ເວົ້າເຖິງກ່ອນໜ້ານີ້ເລີ່ມໄຈ້ແຍກໄດ້ວ່າການຫຼິ້ນວິດີໂອເກມທີ່ຮຸນແຮງແລະກ່ຽວຂ້ອງກັບເລື່ອງຜີເປັນບັນຫາສຳລັບລາວ. ດານຽນໄດ້ຄົ້ນຄວ້າໃນຫ້ອງສະໝຸດວັອດສ໌ທາວເວີ້ (Watchtower Library) ສຳລັບຂໍ້ມູນທີ່ຈະຊ່ອຍລາວໃນເລື່ອງນີ້. ການຄົ້ນຄວ້າແບບນີ້ມີຜົນດີຕໍ່ດານຽນແນວໃດ? ລາວເຊົາຫຼິ້ນວິດີໂອເກມທີ່ບໍ່ດີນັ້ນ ແລະຍົກເລີກການຕິດຕາມເກມອອນລາຍແລະພ້ອມທັງເຊົາຫຼິ້ນເກມກັບພວກທີ່ຫຼິ້ນເກມອອນລາຍ. ດານຽນເວົ້າວ່າ “ແທນທີ່ຈະຫຼິ້ນວິດີໂອເກມ ຂ້ອຍເລີ່ມໃຊ້ເວລາໄປເຮັດແນວອື່ນຢູ່ທາງນອກຫຼືໄປຫຼິ້ນກັບພີ່ນ້ອງ.” ຕອນນີ້ດານຽນຮັບໃຊ້ເປັນໄພໂອເນຍແລະຜູ້ດູແລ.
15. ເປັນຫຍັງເລື່ອງຕົວະຈຶ່ງອັນຕະລາຍ?
15 ຄືກັບຕີໂມທຽວ ເຮົາກໍຕ້ອງຮູ້ຈັກໄຈ້ແຍກກ່ຽວກັບອັນຕະລາຍຂອງຂໍ້ມູນຜິດໆທີ່ພວກຜູ້ທໍລະຍົດພະເຈົ້າເຜີຍແຜ່ອອກໄປ. (1 ຕມ. 4:1, 7; 2 ຕມ. 2:16) ຕົວຢ່າງເຊັ່ນ: ເຂົາເຈົ້າອາດພະຍາຍາມແຜ່ເລື່ອງຕົວະກ່ຽວກັບພີ່ນ້ອງຂອງເຮົາ ຫຼືເຮັດໃຫ້ເຮົາສົງໄສກ່ຽວກັບອົງການຂອງພະເຢໂຫວາ. ຂໍ້ມູນຜິດໆແບບນີ້ສາມາດເຮັດໃຫ້ຄວາມເຊື່ອຂອງເຮົາອ່ອນລົງ. ເຮົາຕ້ອງບໍ່ເຊື່ອເລື່ອງຕົວະແບບນີ້. ຍ້ອນຫຍັງ? ຍ້ອນ “ຄົນທີ່ຄິດຊົ່ວແລະບໍ່ຍອມເຂົ້າໃຈຄວາມຈິງ” ເຜີຍແຜ່ເລື່ອງແບບນີ້. ເປົ້າໝາຍຂອງເຂົາເຈົ້າແມ່ນເພື່ອເລີ່ມ “ໂຕ້ແຍ້ງແລະໂຕ້ຖຽງ.” (1 ຕມ. 6:4, 5) ເຂົາເຈົ້າຢາກໃຫ້ເຮົາເຊື່ອຄຳຕົວະຂອງເຂົາເຈົ້າແລະເຊົາໄວ້ໃຈພີ່ນ້ອງ.
16. ເຮົາບໍ່ຄວນໃຫ້ສິ່ງໃດມາດຶງຄວາມສົນໃຈຂອງເຮົາ?
16 ໃຫ້ຈົດຈໍ່. ຄືກັບ “ທະຫານທີ່ດີຂອງພະຄລິດເຢຊູ” ຕີໂມທຽວຕ້ອງຈົດຈໍ່ໃນວຽກຮັບໃຊ້ແທນທີ່ຈະໃຫ້ວຽກອາຊີບແລະຊັບສິນເງິນຄຳດຶງຄວາມສົນໃຈຂອງລາວອອກໄປຈາກວຽກນີ້. (2 ຕມ. 2:3, 4) ຄືກັບຕີໂມທຽວ ເຮົາຕ້ອງບໍ່ປ່ອຍໃຫ້ຊັບສິນເງິນຄຳມາດຶງຄວາມສົນໃຈຂອງເຮົາອອກໄປຈາກຄວາມເຊື່ອ. “ຄວາມຫຼົງໄຫຼໃນຊັບສົມບັດ” ສາມາດເຮັດໃຫ້ເຮົາສູນເສຍຄວາມຮັກທີ່ມີຕໍ່ພະເຢໂຫວາ ບໍ່ເຫັນຄຸນຄ່າຄວາມຮູ້ໃນຄຳພີໄບເບິນ ແລະບໍ່ຢາກບອກຄົນອື່ນກ່ຽວກັບຄວາມຮູ້ນີ້. (ມທ. 13:22) ເຮົາຕ້ອງຈັດຊີວິດໃຫ້ຮຽບງ່າຍແລະໃຊ້ເວລາກັບກຳລັງຂອງເຮົາເພື່ອ “ເຮັດໃຫ້ການປົກຄອງຂອງພະເຈົ້າ . . . ເປັນສິ່ງທີ່ສຳຄັນທີ່ສຸດໃນຊີວິດສະເໝີ.”—ມທ. 6:22-25, 33
17-18. ເຮົາຕ້ອງເຮັດຫຍັງເພື່ອຈະຮັກສາສາຍສຳພັນຂອງເຮົາກັບພະເຢໂຫວາ?
17 ກຽມພ້ອມທີ່ຈະລົງມືເຮັດ. ທະຫານຕ້ອງຄິດລ່ວງໜ້າວ່າຈະເຮັດແນວໃດເພື່ອປົກປ້ອງໂຕເອງ. ຖ້າເຮົາຢາກປົກປ້ອງຄວາມຮູ້ທີ່ມີຄ່າທີ່ພະເຢໂຫວາຝາກໄວ້ນຳເຮົາ ເຮົາຕ້ອງລົງມືເຮັດທັນທີເມື່ອເຫັນອັນຕະລາຍ. ມີຫຍັງຈະຊ່ອຍເຮົາໃຫ້ເຮັດແບບນັ້ນໄດ້? ເຮົາຕ້ອງຄິດລ່ວງໜ້າວ່າຈະເຮັດແນວໃດເມື່ອເຈິອັນຕະລາຍ.
18 ເພື່ອເປັນຕົວຢ່າງ ເມື່ອໄປຮ່ວມໃນງານໃດງານໜຶ່ງ ກ່ອນທີ່ລາຍການຈະເລີ່ມ ສ່ວນຫຼາຍແລ້ວຈະມີການປະກາດໃຫ້ຜູ້ຊົມຮູ້ວ່າທາງອອກສຸກເສີນທີ່ຢູ່ໃກ້ທີ່ສຸດຢູ່ໃສ. ຍ້ອນຫຍັງ? ຍ້ອນວ່າຄົນຈະອອກໄປໄດ້ໄວທີ່ສຸດຖ້າມີເຫດການສຸກເສີນເກີດຂຶ້ນ. ຄ້າຍຄືກັນ ເຮົາຕ້ອງຄິດລ່ວງໜ້າວ່າຈະເຮັດແນວໃດຖ້າມີສາກທີ່ມີຜິດສິນລະທຳທາງເພດ ສາກທີ່ມີຄວາມຮຸນແຮງ ຫຼືມີຂໍ້ມູນທີ່ເຜີຍແຜ່ໂດຍຄົນທີ່ທໍລະຍົດພະເຈົ້າປາກົດຂຶ້ນມາຕອນທີ່ເຮົາກຳລັງໃຊ້ອິນເຕີເນັດ ຫຼືກຳລັງເບິ່ງໜັງຫຼືລາຍການໂທລະທັດ. ຖ້າເຮົາກຽມໄວ້ກ່ອນວ່າອາດຈະເກີດຫຍັງຂຶ້ນ ເຮົາກໍພ້ອມທີ່ຈະລົງມືເຮັດທັນທີແລະເປັນຄົນທີ່ສະອາດໃນສາຍຕາຂອງພະເຢໂຫວາຕໍ່ໆໄປ.—ເພງ. 101:3; 1 ຕມ. 4:12
19. ເຮົາຈະໄດ້ສິ່ງດີໆຫຍັງແດ່ຖ້າເຮົາຮັກສາຄວາມຈິງທີ່ມີຄ່າທີ່ພະເຢໂຫວາຝາກໄວ້ນຳເຮົາ?
19 ເຮົາຕ້ອງຮັກສາສິ່ງທີ່ມີຄ່າທີ່ພະເຢໂຫວາຝາກໄວ້ນຳເຮົາ ນັ້ນແມ່ນຄວາມຈິງທີ່ຢູ່ໃນຄຳພີໄບເບິນແລະສິດທິພິເສດທີ່ໄດ້ສອນຄວາມຈິງນີ້ໃຫ້ຄົນອື່ນ. ຖ້າເຮັດແບບນີ້ ເຮົາຈະມີໃຈຮູ້ຜິດຮູ້ຖືກທີ່ສະອາດ ມີຊີວິດທີ່ມີຄວາມໝາຍແທ້ໆ ແລະມີຄວາມສຸກໃນການຊ່ອຍຄົນອື່ນໃຫ້ຮູ້ຈັກພະເຢໂຫວາ. ດ້ວຍຄວາມຊ່ວຍເຫຼືອຈາກພະເຢໂຫວາ ເຮົາຈະສາມາດຮັກສາຄວາມຈິງທີ່ມີຄ່າທີ່ເພິ່ນຝາກໄວ້ນຳເຮົາ.—1 ຕມ. 6:12, 19
ເພງ 127 ຂ້ອຍຄວນເປັນຄົນແບບໃດ?
