1-2. Ka luwore gi 1 Timotheo 6:20, en ang’o ma nomi Timotheo?

KINDE ka kinde, waheroga miyo jomamoko gigewa ma wageno mondo giritnwa. Kuom ranyisi, wanyaloga kano pesawa e bengi. Sama watimo kamano, wageno ni pesawa ibiro rit maber ma onge ng’ato ang’ata ma kwalogi. Ranyisino konyowa ng’eyo tiend miyo ng’at machielo gima wageno ahinya mondo oritnwa.

² Som 1 Timotheo 6:20. Jaote Paulo noparo ne Timotheo ni Nyasaye nosemiye gimoro makende mondo oriti, ma en adiera ma nosepuonjore e wi dwach Nyasaye ne dhano. Gima chielo ma nomi Timotheo mondo oriti en migawo mar ‘yalo wach’ maber kendo timo “tij jaland-injili.” (2 Tim. 4:2, 5) Paulo nojiwo Timotheo ni orit gima nosemiye. Mana kaka Timotheo, wan bende omiwa gik ma nengogi tek ahinya mondo warit. Gin ang’o? To ang’o momiyo nyaka warit ahinya gima Jehova osemiyowa?

3-4. Moko kuom gik momiyo wageno adiera ma ni e Muma gin mage?

³ Jehova osemiyo wang’eyo adiera makende ma yudore e Muma ma en Wachne. Adiera ma ni e Muma gin adiera ma wageno ahinya nikech gikonyowa ng’eyo kaka wanyalo bedo gi winjruok maber gi Jehova, kendo gileronwa gik ma kelo mor madier e ngima. Rwako adierago kendo dak ka luwore kodgi gonyowa kuom puonj mag dinde mag miriambo kod timbe mochido mag pinyni.​—1 Kor. 6:9-11.

⁴ Gima chielo momiyo adiera ma ni e Wach Nyasaye gin adiera makende en ni Jehova elogi mana ne joma obolore kendo ma ‘chunygi ni kare.’ (Tich 13:48) Joma kamago oyie gi yo ma Jehova tiyogo e puonjo ji adiera e ndalowagi. (Mat. 11:25; 24:45) Ok wanyal puonjore adierago kendwa wawegi ma wawinj tiendgi, to bende, onge gimoro amora ma dipim gi adierago.​—Nge. 3:13, 15.

5. En migawo mane makende ma Jehova odhialowago?

 ⁵ Wan bende Jehova odhialowa gi migawo mar puonjo jomamoko adierane kod dwache. (Mat. 24:14) Adiera ma wapuonjo ji gin adiera makende ahinya nikech gikonyo ji mondo gibi e riwruok mar oganda Jehova kendo giyud thuolo mar dak nyaka chieng’. (1 Tim. 4:16) Bed ni walendo kuom thuolo malach kata matin, waduto wasiro tich maduong’ moloyo tije te mitimo sani. (1 Tim. 2:3, 4) To mano kaka en thuolo makende tiyo kanyachiel gi Nyasaye!​—1 Kor. 3:9.

6. Ang’o ma notimore ne jomoko ma ne ok orito yiegi maber?

⁶ Moko kuom Jokristo ma nodak e kinde Timotheo ne ok kaw mapek thuolo makende ma ne gin-go mar tiyo kanyachiel gi Nyasaye. Kuom ranyisi, Dema nohero pinyni, to mano nomiyo oweyo tiyo kanyachiel gi Paulo. (2 Tim. 4:10) Fugelo kod Hermogene bende nenore ni noweyo tijgi mar lendo nikech ne giluor ni gin be ninyalo sandgi kaka nisando Paulo. (2 Tim. 1:15) Humenayo, Aleksander, gi Fileto bende noweyo yiegi odok chien nikech tudruok gi joma nong’anjo moweyo adiera, mi gikone gin be giweyo adiera. (1 Tim. 1:19, 20; 2 Tim. 2:16-18) Nitie kinde ma joma wawuoyo kuomgigo duto ne gin agina Jokristo motegno, kata kamano, ne ok gidhi nyime rito gima nomigi.

7. Gin yore mage ma Satan tiyogo mondo ogolwa e adiera?

⁷ Ang’o ma Satan timoga mondo omi wawe kawo mapek migawo ma Jehova osemiyowa? Ne ane moko kuom yore motiyogo. Otiyo gi yore mag manyo mor kod gige fwambo gi keyo mondo ojiwgo timbe kod paro maricho mong’eyo ni ka waluwo to wabiro weyo makore motegno gi adiera. Bende, otemo tiyo gi aola mar mbese kod sand mondo obwogwa mi wawe lendo. E wi mago, otemo mondo oyondhwa kotiyo gi gik ma joma oweyo adiera wacho ma ‘giluongo ni ng’eyo to chutho ok gin ng’eyo.’​—1 Tim. 6:20, 21.

8. Ranyisi mar Daniel opuonji ang’o?

⁸ Ka ok wasiko ka watang’, mosmos wanyalo weyo makore motegno gi adiera. Ne ane ranyisi mar Daniel * ma nohero tuke mag vidio. Owacho kama: “Nachako tugo tuke mag vidio ka ne an jahigni apar kama. Tuke ma nachakogo ne ok richo ahinya. Kata kamano, mosmos nachako tugo tuke mopong’ gi timbe gero kod juok.” Nochopo kama Daniel nochako tugo tuke vidiogo kuom seche 15 kama odiechieng’  kodiechieng’. Owacho kama: “E chunya ma iye, nang’eyo maber ni tuke ma natugogo kod thuolo ma natiyogo e tugogi ne keta mabor gi Jehova. Kata kamano, nasedhil mokalo tong’ ma koro ne ok ane kaka puonj mag Muma ne mulo tukego.” Ka ok watang’ gi yore mag mor ma waluwo, wanyalo po ka waweyo mako motegno adiera ma wasepuonjore, to mano nyalo miyo wawe gik ma Jehova osemiyowa.

9. Ka luwore gi 1 Timotheo 1:18, 19, jaote Paulo nopimo Timotheo gi ng’a?

⁹ Som 1 Timotheo 1:18, 19. Jaote Paulo nopimo Timotheo gi jalweny, kendo nojiwe ni ‘odhi nyime kedo e lweny maberno.’ Paulo ne ok wuo kuom lweny ma dhano kedoe e kindgi giwegi. Kar mano, nowuoyo kuom lweny mar chuny ma Jokristo kedoe. Jokristo chalo gi jolweny ma kedo e yo mane? Kaka jolweny mag Kristo, gin kido mage monego wabedgo? We wane ane weche moko abich ma wanyalo puonjore e ranyisi ma Paulo notiyogono. Puonjgo nyalo miyo wadhi nyime mako motegno adiera ma wasepuonjore.

10. Chiwruok chuth ne Nyasaye tiende en ang’o, to ang’o momiyo mano en kido ma dwarore kuom Jakristo?

¹⁰ Chiwri chuth ne Nyasaye. Jalweny maber chiwore chuth ne jatende. Obiro timo duto monyalo mondo oked ne ng’ama ohero kata gima ohero. Paulo nojiwo Timotheo ni otim kinda mondo ochiwre chuth ne Nyasaye. (1 Tim. 4:7) Kaka wamedo hero Nyasaye kendo chiworene chuth, e kaka wabiro medo makore motegno gi adiera.​—1 Tim. 4:8-10; 6:6.

11. Ang’o momiyo dwarore ni wamakre gi gima waseng’ado ni wadwaro timo?

¹¹ Makri gi gima iseng’ado ni idwaro timo. Mondo jalweny obed koikore ne lweny seche te, nyaka omakre gi gima oseng’ado ni odwaro timo. Timotheo nosiko koikore ne lweny seche te nikech noluwo puonj ma jaote Paulo nomiye mondo owere gi gombo maricho, onyag kido ma Nyasaye oyiego, kendo obed machiegni gi Jokristo wetene. (2 Tim. 2:22) Mondo notim mago duto, ne nyaka omakre motegno gi yiero ma nosetimo. Mano e gima wan be nyaka watim ka wadwaro kedo gi gombo mag ringruok. (Rumi 7:21-25) Timo kamano konyowa bende e lonyo kit dhano machon kendo rwako kit dhano manyien. (Efe. 4:22, 24) Bende, bang’ tiyo matek odiechieng’ mangima, pod dwarore ni watim kinda mokalo mapile mondo wadhi e chokruok godhiambo.​—Hib. 10:24, 25.

12. Gin yore mage ma nyalo konyowa medo lony e tiyo gi Muma?

¹² Jalweny nyaka tiegre e tiyo gi ligangla ma en-go. Mondo obed molony, nyaka otiegre nyading’eny. Wan be dwarore ni wabed molony e tiyo gi Wach Nyasaye. (2 Tim. 2:15) Achiel kuom kuonde ma wamedoe lony en chokruogewa. Kata kamano, mondo wabed gi lony mar puonjo jomamoko ma gine kaka adiera nyalo konyogi, nyaka wamakre gi chenro ma waseketo mar puonjore Muma wan wawegi. Dwarore ni wati gi Wach Nyasaye e tiego yiewa. Mano nyiso ni somo asoma Muma kende ok oromo. Dwarore ni wapar matut kuom gik ma wasomo kendo watim nonro e bugewa mondo wabed gadier ni wawinjo maber tiend gik ma wapuonjore kendo wati kodgi. (1 Tim. 4:13-15) Ka watimo kamano, wabiro tiyo maber gi Wach Nyasaye e puonjo jomamoko. E puonjo bende, somo asoma ne ji Muma ok oromo. Dwarore ni wakonygi mondo giwinj tiend gik ma wasomonegi kendo ging’e kaka ginyalo tiyo gi  ndikogo e ngimagi. Ka wamakore motegno gi chenro ma waseketo mar puonjore Muma wan wawegi, wanyalo medo lony e yo ma watiyogo gi Wach Nyasaye e puonjo jomamoko.​—2 Tim. 3:16, 17.

13. Ka luwore gi Jo-Hibrania 5:14, ang’o momiyo nyaka watem fwenyo gik ma nyalo hinyowa?

¹³ Fweny gik ma nyalo hinyi. Jalweny nyaka bed gi nyalo mar fwenyo gik ma nyalo hinye kendo otang’ gi gigo. Wan be nyaka wapuonjre fwenyo gik ma nyalo hinyowa, kae to watang’ kodgi. (Nge. 22:3; som Jo-Hibrania 5:14.) Kuom ranyisi, dwarore ni wati gi rieko ahinya sama wayiero yore mag manyo mor. Programbe minyisoga e TV thothne oting’o mana chode lilo. Timbego ok mor Nyasaye, to gikone wan be gibiro hinyowa. Nikech mano, watang’ gi yore mag manyo mor ma nyalo ketho winjruokwa gi Jehova mosmos.​—Efe. 5:5, 6.

14. Nikech Daniel nofwenyo gik ma ne nyalo hinye, mano nokonye nade?

¹⁴ Bang’ kinde, Daniel ma ne wasewuoyo kuome motelocha nochako fwenyo ni tugo tuke mopong’ gi timbe gero kod juok ne dhi kelone chandruok. Notimo nonro e Watchtower Library mondo oyud weche ma ne nyalo konye loyo nyawono. Nonrono nokonye nade? Noweyo tugo tuke vidio maricho kod mag intanet, kendo nong’ado osiep gi joma notugogo tukego. Owacho kama: “Kar tugo tuke mag vidio, nachako tiyo gi thuolona e tugo tuke mirieyogo del, kendo bedo kanyachiel gi owete gi nyimine ma ni e kanyakla.” Sani Daniel en painia kendo jaduong’-kanyakla.

15. Ang’o momiyo miriambo nyalo kelo hinyruok?

¹⁵ Mana kaka Timotheo, wan bende nyaka wafweny mapiyo hinyruok ma wanyalo yudo kokalo kuom weche mag miriambo ma joma ong’anjo moweyo adiera lando. (1 Tim. 4:1, 7; 2 Tim. 2:16) Kuom ranyisi, joma ong’anjogo nyalo wacho miriambo e wi owetewa gi nyiminewa kata wacho gik ma nyalo miyo wabed gi kiawa gi gik ma riwruok mar oganda Jehova timo. Miriambo ma kamago nyalo ketho yiewa. Nyaka watamre luwo miriambogo kata yie kodgi. Nikech ang’o? En nikech joma landogi gin “jo ma pachgi orochore kendo ma koro ok ong’eyo adiera.” Dwachgi maduong’ en kelo “piem e mbaka kod mino wach.” (1 Tim. 6:4, 5) Gidwaro ni wayie kuom weche ma gikethogo nying owetewa  kendo wachak chich gi gik ma owetewa timo.

16. Gin ang’o ma nyalo chochowa kata galowa monego watang’go?

¹⁶ Ket pachi e tich ma Nyasaye omiyi. Nikech Timotheo ne en “jalweny maber mar Kristo Yesu,” ne nyaka oket pache duto e tij yalo ma nomiye, kar yie mondo gik pinyni ochoche. (2 Tim. 2:3, 4) Mana kaka Timotheo, ok onego wayie mondo gombo mag gik ringruok ochochwa kata ogalwa. “Galruok ma mwandu kelo” nyalo miyo hera ma waherogo Jehova odog chien, wawe kawo Wach Nyasaye e yo mapek, kendo wadwok kindawa piny e lando ne jomamoko Wach Nyasaye. (Mat. 13:22) Nyaka waket ngimawa obed mayot kendo wati gi thuolowa kod tekowa e timo gik ma nyiso ni waketo Pinyruoth obed mokwongo e ngimawa.​—Mat. 6:22-25, 33.

17-18. Ang’o ma wanyalo timo mondo wageng’ gimoro amora ma nyalo ketho winjruokwa gi Jehova?

¹⁷ Ikri kawo okang’ mapiyo sama mano dwarore. Jalweny onego ochan motelo okenge mobiro kawo ka po ni monj moro osieko. Ka wadwaro mondo warit gik ma Jehova osemiyowa, nyaka wakaw okang’ mapiyo sa asaya ma waneno gimoro ma nyalo kelonwa chandruok. Ang’o ma nyalo konyowa timo kamano? Dwarore ni wachan motelo gima wabiro timo ka po ni wach moro ma nyalo monjo yiewa osieko.

¹⁸ Kuom ranyisi, nitie romo moko ma ka ji odhiye, to ka pok program ochakore, inyisoga joma obiro dhoudi ma ginyalo wuokgo ka masira moro otimore apoya. E yo ma kamano, wan bende onego wapar motelo gima wabiro timo ka po ni gimoro ma apoya osiekonwa sama wan e intanet, waneno movie, kata waneno TV. Gigo nyalo bedo gik ma nyiso terruok, timbe gero, kata weche mag joma ong’anjo moweyo adiera. Ka waikore motelo ne gima rach ma nyalo timorenwa, wabiroga kawo okang’ mapiyo sama waneno gimoro amora ma nyalo ketho winjruokwa gi Jehova, mondo wasik ka waler e nyim Jehova.​—Zab. 101:3; 1 Tim. 4:12.

19. Gin gueth mage ma wayudo ka warito maber gik ma Jehova osemiyowa?

¹⁹ Nyaka wadhi nyime rito gik ma Jehova omiyowa, ma gin, adiera mowuok e Muma to kod thuolo makende mar lando ne jomamoko adierago. Ka watimo kamano, wabiro bedo gi chuny maler, ngimawa biro bedo makare, kendo wabiro bedo gi mor sama waneno ka wakonyo jomamoko mondo gin bende ging’e Jehova. Jehova oikore konyowa mondo kinde duto warit maber gigo mosemiyowa.​—1 Tim. 6:12, 19.