1-2. Timothea thawn khat 6:20-a sawi angin, Timothea hnênah eng nge pêk a nih?

KAN thil hlu neihte chu mi dangte kan kawltîr ṭhîn a. Entîr nân, kan sum neihte chu bank-ah kan dah ṭha pawh a ni thei. Chutianga kan dah chuan, kan sumte chu rûk bo theih loh leh him taka dah ṭhat a nih kan beisei a ni. Chuvângin, kan thil ngaihhlutte mi dangte hnêna kawltîr tih awmzia chu kan hre thiam a ni.

² Timothea thawn khat 6:20 chhiar rawh. Tirhkoh Paula chuan Timothea chu thil hlu tak—mihringte tâna Pathian thiltum chungchânga hriatna dik tak—a dawng tih a hriatnawntîr a. Ani chu ‘thu hril’ tûr leh “chanchin ṭha hriltu lam hna thawk” tûra mawhphurhna pêk a ni bawk. (2 Tim. 4:2, 5) Chuvângin, a hnêna kawltîr chu vawng ṭha tûrin a fuih a. Timothea angin, keini pawh, thil hlu takte kawltîr kan ni a. Chûngte chu eng nge ni? Engvângin nge Jehova min pêk chûng thil hlute chu kan vawn ṭhat a ngaih?

3-4. Bible thutak a hlut chhan ṭhenkhat chu engte nge ni?

³ Jehova chuan a Thu, Bible-a chuang thutak hriatna dik tak min pe a. Chûng thutak chuan Jehova nêna inlaichînna ṭha tak neih dân leh hlimna dik tak neih dân min hriattîr avângin a hlu hle a ni. Chûng thutak chu kan hriat a, kan nunpui hian zirtîrna dik lo leh nungchang bawlhhlawhna bâwih ata chhuah zalên kan ni.—1 Kor. 6:9-11.

⁴ Bible-a kan hmuh thutak a hlut chhan dang leh chu Jehova’n chûng thutakte chu “rilru dik tak” neitu mi inngaitlâwmte  hnênah chauh a hriattîr vâng a ni. (Tirh. 13:48, NW) Chutiang mite chuan Jehova’n chûng thutak pe chhuak tûra tûn laia a mi hmante chu an thlâwp a. (Mt. 11:25; 24:45) Bible thutak chu mi dangte ṭanpuina tel lo chuan hriatthiam theih a ni lo va, chumi hriatthiamna aia hlu zâwk thil dang engmah a awm lo.—Thuf. 3:13, 15.

5. Jehova’n eng chanvo hlu dang nge min pêk?

⁵ Jehova chuan mi dangte hnêna amah leh a thiltumte chungchânga thutak zirtîr theihna chanvo hlu min pe bawk. (Mt. 24:14) Kan thuchah ken chuan mite chu Jehova chhûngkuaa tel theihna leh chatuana nun theihna hun remchâng a pêk avângin a hlu hle a ni. (1 Tim. 4:16) Rawngbâwlnaa kan inhman zât chu a tam emaw, a tlêm emaw pawh ni se, tûn laia thawh mêk hna azawnga hna pawimawh berah kan tel tihna a ni. (1 Tim. 2:3, 4) Pathian hnathawhpuite nia rawng kan bâwl thei chu chawimawina a va ni êm!—1 Kor. 3:9.

6. Pathian hnathawhpuite nia an chanvo ngaihhlut nachâng hre lo mi ṭhenkhat chunga thilthleng chu eng nge ni?

⁶ Timothea dam rualpui mi ṭhenkhat chuan Pathian hnathawhpuite nia an chanvo chu ngaihhlut nachâng an hre lo va. Dema chuan he khawvêl hi a ngainat avângin Paula nêna rawngbâwl theihna chanvo hlu chu a kalsan a. (2 Tim. 4:10) Phugella leh Hermogena te pawhin Paula tawrh ang tihduhdahna tawrh an hlauh avângin an rawngbâwlna chu an kalsan niin a lang. (2 Tim. 1:15) Chu bâkah, Humenaia te, Alexsandra te, leh Phileta te chu thutak chhuahsana kalpêngte an lo ni a. (1 Tim. 1:19, 20; 2 Tim. 2:16-18) Chûng mite chuan thlarau lama chak tak lo ni tawh ṭhîn mah se, an thil ngaihhlutte chu an ngaihlu tawh lo a ni.

7. Setana chuan min beih nân eng tih dânte nge a hman?

⁷ Engtin nge Setana chuan Jehova min kawltîr thil hlute chu min hlohtîr a tum? Setana tih dân ṭhenkhat hi lo chhinchhiah teh. Ani chuan intihhlimna leh chanchin theh darhnate chu thutak min hlohtîr theitu tûr nia a beisei khawvêl mite thil ngaihhlut zâwng te, ngaihtuahna te, leh nungchangte chawilâr nân a hmang a. Thu hrilh kan bânsan nân ṭhiante nêksâwrna leh tihduhdahnate hmanga min tihhlauh a tum a. Chu bâkah, thutak kan kalsan nân kalpêngte zirtîrna ngaithla tûra min thlêm a tum bawk.—1 Tim. 6:20, 21.

8. Unau Daniel-a thiltawn aṭangin nge eng kan zir?

⁸ Kan fîmkhur loh chuan thutak chu zawi zawiin kan thlah thei a ni. Video games ngaina tak Daniel-a * thiltawn hi han ngaihtuah  teh. Ani chuan: “Kum sâwm vêl ka nihin video games ka khêl ṭan a. A tîr chuan, him nia ngaih chin chauh ka khêl a. Mahse, zawi zawiin, tharum thawhna leh ramhuai lam telna games-te chu ka khêl chho a ni,” tiin a sawi. A tâwpah chuan, nî tin dârkâr 15 vêl a khêl ṭhîn a. “Dik taka sawi chuan, ka games khelhte leh chumi atâna ka hun hman zât chuan Jehova min hlattîr tih ka hria a. Mahse, Bible thu bulte nunpui ngai ti lo khawpin ka thinlung chu a lo chawlawl tawh,” tiin a sawi belh a ni. Kan fîmkhur loh chuan, intihhlimna chuan zawi zawia thutak thlah tûrin min thunun thei a. Chutiang thil a thleng a nih chuan, Jehova min pêk thil hlute chu kan hloh hlen thei a ni.

9. Timothea thawn khat 1:18, 19-a sawi angin, Paula’n Timothea chu tu nên nge a khaikhin?

⁹ Timothea thawn khat 1:18, 19 chhiar rawh. Paula chuan Timothea chu sipai nêna khaikhinin, ‘indona ṭha chu do’ zawm zêl tûrin a fuih a. Chu chu indona tak tak ni lovin, thlarau lam indona a ni. Eng kawngtein nge Kristiante chu indonaa tel sipaite ang kan nih? Krista sipaite kan nih angin eng miziate nge kan neih ngai? Paula tehkhin thu aṭanga kan zir theih pangate chu i lo ngaihtuah ang u. Chûngte chuan thutak vuan tlat tûrin min ṭanpui thei a ni.

10. Pathian ngaihsakna chu eng nge ni a, engvângin nge chu chu kan neih a ngaih?

¹⁰ Pathian ngaihsakna nei rawh. Sipai ṭha chu a rinawm hle a. A mi hmangaih tak emaw, a thil ngaihhlut tak emaw vênghim tûrin theih tâwp a chhuah ang. Paula chuan Timothea chu Pathian ngaihsakna—Pathian nêna rinawm taka inzawmna—nei tûrin a fuih a. (1 Tim. 4:7) Pathian kan hmangaihna leh ngaihsakna a nasat poh leh thutak vawn ngheh duhna kan nei lehzual ang.—1 Tim. 4:8-10; 6:6.

11. Engvângin nge mahni inthununna kan neih a ngaih?

¹¹ Mahni inthununna nei rawh. Sipai chu a mawhphurhna chelh reng thei tûr chuan mahni a inthunun tûr a ni. Timothea chuan châkna ṭha lo hnâwl tûr te, Pathian duh zâwng mizia nei tûr te, leh Kristiante chauh kâwm tûrtea thlarau thâwk khuma Paula fuihnate a zawm avângin thlarau lamah a chak reng a ni. (2 Tim. 2:22) Chutiang ni thei tûr chuan mahni inthununna a neih a ngai a. Chutiang bawkin, châkna ṭha lote do thei tûrin mahni inthununna kan neih a ngai a ni. (Rom 7:21-25) Chu bâkah, mihring hlui chu hlîp a, mihring thara inthuam thei tûr pawhin mahni inthununna kan neih a ngai bawk a. (Eph. 4:22, 24) Nilênga hna thawh hnua kan chauh hle hunah pawh inkhâwm tûra kan tih hrâm hrâm a ngai bawk.—Heb. 10:24, 25.

12. Bible kan hmannaa hma kan sâwn theih dân kawngte chu eng nge ni?

¹² Sipai chuan a râlthuamte hman dân a zîr a ngai a. Thiam taka hmang thei tûr chuan, a zir ziah a ngai bawk. Chutiang bawkin, keini pawhin thiam taka Bible kan hman a ngai a. (2 Tim. 2:15) Chûng thiamna ṭhenkhat chu inkhâwmahte kan zir thei a ni. Mi dangte chu Bible thutakin a ṭanpui thei tih ring tûra ṭanpui kan duh chuan, mahnia Bible zirna kan neih ziah a ngai a. Bible chu kan rinna tihchak nân kan hmang tûr a ni. Chutianga ti tûr chuan Bible chhiar mai aia tam kan tih a ngai a. Kan thu chhiarte chhût ngun a, dik taka hre thiam tûr leh nunpui thei tûra kan thu leh hla chhuahte hmanga zir bingna kan neih a ngai a ni. (1 Tim. 4:13-15) Chutianga kan tih chauhvin, Bible chu mite zirtîr nân thiam takin kan hmang thei ang. Hetah pawh hian, Bible chângte chhiarsak mai aia tam kan  tih a ngai a. Thu ngaithlatute chu Bible châng hre thiam tûr leh nunpui dân hre tûrin ṭanpui kan duh a ni. Mahnia Bible zirna neih ziahna hmangin, thlarauva thâwk khum Pathian Thu chu mi dangte zirtîr nân kan hmang thiam lehzual thei ang.—2 Tim. 3:16, 17.

13. Hebrai 5:14 nêna inmilin, engvângin nge hriatthiamna kan neih a ngaih?

¹³ Hriatthiamna nei rawh. Sipai chuan dinhmun hlauhawm chu a hre lâwkin, a pumpelh thei tûr a ni a. Keini pawhin, kan tâna dinhmun hlauhawm theite chu hriaa pumpelh thei tûrin hma kan la tûr a ni. (Thuf. 22:3; Hebrai 5:14 chhiar rawh.) Entîr nân, intihhlimna chu fîmkhur taka kan thlan a ngai a. TV leh film-ahte chuan nungchang bawlhhlawhna lam târ lan a ni fo va. Chûng nungchangte chu Pathian huat zâwng tak a ni a, kan chungah pumpelh theih loh chhiatna a rawn thlen ang. Chuvângin, Pathian kan hmangaihna zawi zawia tinêp thei intihhlimnate chu kan pumpelh tûr a ni.—Eph. 5:5, 6.

14. Engtin nge hriatthiamnain unau Daniel-a chu a ṭanpui?

¹⁴ A chunga kan târ lan tâk Daniel-a chuan a khelh ṭhin tharum thawhna leh ramhuai lam telna games-te chu a harsatna thlentu a ni tih a hre ta a. A harsatna hneh thei tûra amah ṭanpuitu thu leh hla chhuahte chu Watchtower Library-ah a zawng a ni. Chu chuan engtin nge a ṭanpui? Video games ṭha lote khelh chu a bânsan ta a. Online-a a games khelh ṭhinte chu a paihbo va, a khelhpuite nêna an inzawmna pawh a titâwp bawk. Ani chuan, “Video games khelh aiin, pâwn lama infiam nân leh kohhrana unaute nêna inkawm nân hun ka hmang tawh zâwk a ni,” tiin a sawi. Daniel-a chuan pioneer leh kohhran upa niin rawng a bâwl tawh a ni.

15. Engvângin nge thu dik lo theh darhte chu thil hlauhawm tak a nih?

¹⁵ Timothea angin, kalpêngte theh darh thu dik lote hlauhawmzia chu kan hre tûr a ni a. (1 Tim. 4:1, 7; 2 Tim. 2:16) Entîr nân, anni chuan kan unaute chanchin dik lo taka theh darh emaw, Jehova inawpna pâwl min rinhlelhtîr emaw chu an tum mai thei a. Chûng thu dik lote chuan kan rinna a tichak lo thei a ni. Chutiang thu theh darhte bumin kan awm tûr a ni lo. Engvângin nge? Chûng thu dik lote chu ‘rilru chhe pu leh thutak nei lo mite’ theh darh a nih vâng a ni.  An thiltum chu ‘inhnialbuai leh intihbuaina’ chawh chhuah hi a ni a. (1 Tim. 6:4, 5, Baptist Mid- Missions’ Translation) An mi sawichhiatna thute ring tûr leh kan unaute ringhlel tûrin min duh a ni.

16. Kan rilru pêntîr thei eng thilte nge kan pumpelh ngai?

¹⁶ I rilru pêntîr suh. Timothea tân “Krista Isua sipai ṭha tak” a nih angin, khawvêl hausakna lama rilru pêntîr aiin, rawngbâwlna ngaihven tlat a ngai a. (2 Tim. 2:3, 4) Amah angin, keini pawhin khawvêl hausakna lama kan rilru pêntîr chu kan phal tûr a ni lo. “Hausakna bumna” chuan Jehova kan hmangaihna te, Bible kan ngaihhlutna te, leh mi dangte hnêna thu hrilh kan duhnate chu a dîp thei a. (Mt. 13:22) Kan nun tisamkhaiin, kan hun leh thate chu ‘Lalram zawn hmasak’ nân kan hmang zâwk tûr a ni.—Mt. 6:22-25, 33.

17-18. Thlarau lam dinhmun hlauhawm pumpelh tûrin eng nge kan tih theih?

¹⁷ Hma la vat tûrin inpeih rawh. Sipai chuan chêt a lâk dân tûr chu a ruahman lâwk a ngai a. Kan tân pawh, Jehova min kawltîr thil hlute vawng tlat tûr chuan, hlauhawm kan hmuh hunah hma lâk nghâl vat a ngai a ni. Hma la nghâl vat tûrin engin nge min ṭanpui thei ang? Dinhmun hlauhawm kan hmachhawn hmaa kan inruahman lâwk a ngai a ni.

¹⁸ Entîr nân, puipunna thiltih a awm hunah, mipuite chu program inṭan hmain an chhuahna tûr kawngkhâr hre tûra ngen an ni fo ṭhîn. Engvângin nge? Rîkrum thil a thlen palha rang taka an chhuah theih nân a ni. Chutiang bawkin, keini pawhin, Internet kan hman lai emaw, TV leh film kan en lai emawa nungchang bawlhhlawhna te, tharum thawhna te, a nih loh leh kalpêngte thu theh darhte a lo lang thut a nih chuan, kan “chhuahna tûr kawngkhâr” chu thlangin, chhuah dân tûr kan inzir sa thei a ni. Thilthleng mai theite atâna kan inbuatsaih lâwk a nih chuan, thlarau lam dinhmun hlauhawm aṭanga chhuak tûrin hma kan la nghâl vat theiin, Jehova mithmuhah kan thianghlim reng thei ang.—Sâm 101:3; 1 Tim. 4:12.

19. Jehova min kawltîr thil hlute kan vawn ṭhat chuan eng malsâwmnate nge kan dawn ang?

¹⁹ Jehova min kawltîr thil hlu tak—Bible thutak leh mi dangte zirtîr theihna chanvo hlute—chu kan vawng ṭha tûr a ni. Chutianga kan tih chuan, chhia leh ṭha hriatna thiang tak te, nun awmze nei tak te, leh Jehova hre tûra mi dangte ṭanpuina aṭanga lo awm hlimnate chu kan nei thei ang a. Chu bâkah, Jehova ṭanpuinain, min kawltîr thil hlute chu kan vawng ṭha thei ang.—1 Tim. 6:12, 19.