1, 2. Ik tzeʼn in tzaj tqʼamaʼn 1 Timoteo 6:20, ¿tiʼtoq tuʼn tbʼant Timoteo?

QA AT jun tiʼ nim toklen te jun xjal, at maj in xi tqʼamaʼn te juntl tuʼn tok t-xqʼuqin. Jun techel, qa at nim tpwaq, in xi tkʼuʼn toj banco tuʼntzun miʼn t-xi tzʼaq moqa tuʼn miʼn tel elqʼaʼn. Tuʼn jlu in nel qnikʼ tiʼj tiʼ t-xilen aj t-xi qoqxenin jun tiʼ nim toklen te jun xjal.

² (Kjawil uʼjit 1 Timoteo 6:20). Xi tnaʼn apóstol Pablo te Timoteo qa otoq txi tkʼamoʼn jun tiʼ nim toklen: aju tojtzqibʼil tiʼj Tyol Dios. Ax ikx otoq txi tqʼoʼn Jehová toklen Timoteo tuʼn tpakbʼan tiʼj yol axix tok ex tiʼj «tqanil kolbʼil» (2 Tim. 4:2, 5). Xi tqʼamaʼn Pablo te Timoteo tuʼn tok t-xqʼuqin aju otoq txi oqxenin te. Ax ikx, o tzaj toqxenin Jehová junjun tiʼchaq nim toklen qe. ¿Alkyeqe? ¿Ex tiquʼn nim toklen tuʼn kyok qxqʼuqin qʼinumabʼil lu?

3, 4. Qʼamantza tiquʼn nim kyoklen axix tok tkuʼx toj Tyol Dios.

³ Noq tuʼn t-xtalbʼil Jehová o tzʼel qnikʼ tiʼj axix tok tkuʼx toj Tyol. Nim kyoklen xnaqʼtzbʼil lu tuʼnju in tzaj kyyekʼin qe tzeʼn jaku qo ok te tamiw Jehová ex tzeʼn jaku qo tzalaj. Aj tok qeʼ qkʼuʼj kyiʼj xnaqʼtzbʼil lu ex aj kykubʼ qanqʼin, ya mintiʼ in qo kubʼ sbʼuʼn kyuʼn xnaqʼtzbʼil nya ax tok nix tuʼn nya bʼaʼn kybʼinchbʼen xjal (1 Cor. 6:9-11).

⁴ Ax ikx, nim kyoklen xnaqʼtzbʼil toj Tyol Dios tuʼnju oʼkx in xi tyekʼin Jehová kye xjal in kubʼ kyin kyibʼ ex at «jun tbʼanel kyanmi» (Hech. 13:48, TNM). In nok qeʼ kykʼuʼj xjal lu tiʼjju tumel in najbʼen tuʼn Jehová tuʼntzun tel qnikʼ tiʼj  axix tok toj ambʼil jaʼlo (Mat. 11:25; 24:45). Mlay tzʼel qnikʼ kyiʼj axix tok lu qjunalx. Aj tel qnikʼ kyiʼj, mas nim toklen twitz alkyexku juntl tiʼ (Prov. 3:13, 15).

5. ¿Tiʼ juntl tiʼ o tzaj toqxenin Jehová qe?

⁵ Ax ikx o tzaj toqxenin Jehová qe tuʼn t-xi qxnaqʼtzaʼn axix tok kye txqantl tiʼj ex tiʼjju kbʼantel tuʼn (Mat. 24:14). Mlay che chjet xnaqʼtzbʼil lu kyuʼn xjal tuʼnju in xi tqʼoʼn ambʼil kye tuʼn kyten kyukʼil toj tja Jehová ex tuʼn kyanqʼin te jumajx (1 Tim. 4:16). Qa in qo pakbʼan nim ambʼil moqa noq chʼin, in qo onin tiʼj aqʼuntl mas nim toklen toj ambʼil jaʼlo (1 Tim. 2:3, 4). ¡Jun tbʼanelxix qoklen tuʼnju in qo onin tiʼj Jehová! (1 Cor. 3:9).

6. ¿Tiʼ bʼaj kyiʼj junjun okslal mintiʼ ok kyxqʼuqin kyibʼ?

⁶ Toj tqʼijlalil Timoteo, e ten junjun okslal mintiʼ ok kykʼujlaʼn oklenj tuʼn kyonin tiʼj Dios. Jun techel, ok tkʼujlaʼn Demas qe tiʼchaq te twitz txʼotxʼ ex tuʼntzunju kyaj tkolin oklenj tuʼn tpakbʼan junx tukʼil Pablo (2 Tim. 4:10). Atzunte Figelo ex Hermógenes, mintiʼ e pakbʼan tuʼnju e tzajlo xobʼ tej tkubʼ kyximen qa jaku che el ikʼun ik tzeʼn bʼaj tiʼj apóstol Pablo (2 Tim. 1:15). Ex kyaj ttzaqpiʼn Himeneo, Alejandro ex Fileto axix tok ex e ok te apóstata (1 Tim. 1:19, 20; 2 Tim. 2:16-18). Tuʼn jlu in nel qnikʼ tiʼj qa chʼiy kyokslabʼil xjal lu tiʼj axix tok, pero xi kyqʼoʼn ambʼil tuʼn tkyaj kytzaqpiʼn.

7. ¿Alkyeqe sbʼubʼil in che ajbʼen tuʼn Satanás tuʼn tsbʼun qiʼj?

⁷ ¿Alkyeqe sbʼubʼil in che ajbʼen tuʼn Satanás tuʼntzun miʼn tok qxqʼuqin qe qʼinumabʼil o tzaj toqxenin Jehová qe? Qo xnaqʼtzan kyiʼj junjun. In che ajbʼen junjun saqchbʼil tuʼn ex qeju qʼol tqanil tuʼn t-xi tsputin nya bʼaʼn ximbʼetz, ex tuʼn jlu jaku kyaj qtzaqpiʼn axix tok. Ax ikx in che ajbʼen xjal tuʼn tuʼn qok obligarin tuʼn tkubʼ qbʼinchaʼn nya bʼaʼn moqa tuʼn qel ikʼun kyuʼn tuʼntzun qtzaj xobʼ ex tuʼn ya miʼn qpakbʼan. Ex taj tuʼn tok qqʼoʼn qwiʼ tiʼj nya ax tok xnaqʼtzbʼil in tzaj kyqʼamaʼn apóstata tuʼntzun tkyaj qkolin axix tok (1 Tim. 6:20, 21).

8. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Daniel?

⁸ Qa mintiʼ ma tzʼok qxqʼuqin qibʼ, chebʼe chebʼe jaku kyaj qtzaqpiʼn axix tok. Qo ximen tiʼjju bʼaj tiʼj Daniel, * aju otoq naqʼet kyiʼj videojuego. Tqʼama Daniel jlu: «Xi tzyet tuʼn nsaqchane kyiʼj videojuego tej qʼiʼntoq 10 abʼqʼi wuʼne. Tnejel,  kubʼ nximane qa mintiʼ jun nya bʼaʼn in netz yekʼin kyoj juego. Pero xi tzyet tuʼn nsaqchane kyiʼj juego at bʼiybʼil toj ex kyaqʼun chman». Pon jun ambʼil jatumel ok tqʼoʼn Daniel 15 or kyiʼj juego tkyaqil qʼij. Tqʼamatl jlu: «Tuʼnju el npaʼne nim ambʼil kyiʼj juego, el nnikʼe tiʼj qa in neltoq npan wibʼe tiʼj Jehová. Tuʼntzunju, kubʼ nximane qa nya iltoq tiʼj tuʼn t-xi nbʼiʼne aju in tzaj tqʼamaʼn Tyol Dios». A jlu in tzaj tyekʼin qe qa jaku kyaj qtzaqpiʼn axix tok kyuʼn nya bʼaʼn juego ex mlaylo qnaʼ. Qa ma bʼaj jlu qiʼj, jaku txi qnajsaʼn qe tbʼanel tiʼchaq o tzaj tqʼoʼn Jehová qe.

9. Ik tzeʼn in tzaj tqʼamaʼn 1 Timoteo 1:18 ex 19, ¿alqukʼil ok tmojbʼaʼn apóstol Pablo Timoteo?

⁹ (Kjawil uʼjit 1 Timoteo 1:18, 19). Ok tmojbʼaʼn apóstol Pablo Timoteo ik tzeʼn jun soldad ex xi tqʼamaʼn te tuʼn kukx tqʼojin. Pero mintiʼ in yolin jlu tiʼj jun ax tok qʼoj in nok kyuʼn xjal, sino at toklen jlu tukʼil qokslabʼil. ¿Alkye tten in qo ok ik tzeʼn jun kʼloj soldad in cheʼx toj jun qʼoj? ¿Alkyeqe qmod che tel tuʼnju tsoldad Cristo qoʼ? Aju techel tqʼama apóstol Pablo, in tzaj tyekʼin qe tuʼn tbʼant jweʼ tiʼchaq quʼn tuʼntzun miʼn tkyaj qtzaqpiʼn axix tok. Qo xnaqʼtzan tiʼj alkyeqe.

10. ¿Tiʼ aju tuʼn qnimen te Dios ex tiquʼn nim toklen?

¹⁰ Qxnaqʼtzanx qibʼ tuʼn tok qkʼujlaʼn Dios. In nok tilil tuʼn jun soldad tuʼn tok t-xqʼuqin jun xjal kʼujlaʼn tuʼn moqa jun tiʼ nim toklen toj twitz. Xi tqʼamaʼn Pablo te Timoteo tuʼn tnimen te Dios, toj juntl yol, tuʼn tok tkʼujlaʼn ex tuʼn kukx tten tzʼaqli twitz (1 Tim. 4:7). Qa mas ma chʼiy qkʼujlabʼil tiʼj Jehová, mas kchʼiyil qkʼujlabʼil tiʼj axix tok ex mlay kyaj qtzaqpiʼn (1 Tim. 4:8-10; 6:6).

11. ¿Tiquʼn il tiʼj tuʼn qjakʼunte qibʼ?

¹¹ Qxnaqʼtzanx qibʼ tuʼn qjakʼunte qibʼ. Qa taj jun soldad tuʼn tbʼant taqʼun, nim toklen tuʼn tbʼant tjakʼunte tibʼ. Japun toklen Timoteo ik tzeʼn tsoldad Cristo tuʼnju xi tbʼiʼn nabʼil xi tqʼamaʼn Pablo te, el tpan tibʼ tiʼj nya bʼaʼn tajbʼil, ten tbʼanel tmod ex ok tmojbʼan tibʼ kyukʼil erman (2 Tim. 2:22). Tuʼn tbʼant jlu tuʼn, iltoq tiʼj tuʼn tjakʼunte tibʼ. Ax ikx qe, il tiʼj tuʼn qjakʼunte qibʼ qa qaj tuʼn tkubʼ tiʼj nya bʼaʼn qajbʼil (Rom. 7:21-25). Ex il tiʼj tuʼn tok tilil quʼn tuʼn tel qiʼn ojtxe qten tuʼntzun tok qqʼoʼn aju akʼaj (Efes. 4:22, 24). Ex qa otoq qo sikt aj tex bʼaj jun qʼij, il-lo tiʼj tuʼn tok tilil quʼn tuʼn qxiʼ toj chmabʼil (Heb. 10:24, 25).

12. ¿Tiʼ kʼonil qiʼj tuʼn qok te tbʼanel aj xnaqʼtzal tiʼj Tyol Dios?

¹² Qa taj jun soldad tuʼn kyajbʼenxix qe arma tuʼn toj tumel, nim toklen tuʼn kukx t-xnaqʼtzan kyiʼj. Ax ikx qe, il tiʼj tuʼn tajbʼen Tyol Dios quʼn tojxix tumel (2 Tim. 2:15). In che onin chmabʼil qiʼj tuʼn tbʼant jlu quʼn. Noqtzun tuʼnj, qa qaj tuʼn telxix kynikʼ xjal tiʼj qa nim toklen axix tok, il tiʼj tuʼn tel qpaʼn ambʼil tuʼn qxnaqʼtzaʼn tiʼj Tyol Dios qjunalx. Qa qaj tuʼn tchʼiy qʼuqbʼil qkʼuʼj, nim toklen tuʼn tajbʼen Tyol Dios quʼn. Pero nya oʼkx tuʼn tjaw quʼjin, sino il tiʼj tuʼn qximen kyiʼj taqikʼ in che jaw quʼjin ex tuʼn qjyon tqanil kyiʼj kyoj quʼj tuʼntzun telxix qnikʼ kyiʼj ex tuʼn t-xi qchikʼbʼaʼn toj tumel (1 Tim. 4:13-15). Iktzun tten qo naqʼetel tuʼn tajbʼen Tyol Dios quʼn aj t-xi qyekʼin kye txqantl. Ex nya oʼkx kjawil quʼjin jun texto kye, sino qaj tuʼn qonin kyiʼj tuʼn tel kynikʼ tiʼj ex tzeʼn jaku tzʼonin kyiʼj. Tuʼntzunju, qa kukx ma qo xnaqʼtzan tiʼj  Tyol Dios, qo okel te tbʼanel aj xnaqʼtzal (2 Tim. 3:16, 17).

13. Ik tzeʼn in tzaj tqʼamaʼn Hebreos 5:14, ¿tiquʼn il tiʼj tuʼn tel qnikʼ tiʼjju bʼaʼn ex tiʼjju nya bʼaʼn?

¹³ Bʼaʼn tuʼn tel qnikʼ tiʼj «alkyeju bʼaʼn ex alkyeju mya bʼaʼn». Nim toklen tuʼn tel tnikʼ jun soldad tiʼj alkye nya bʼaʼn jaku tzʼok weʼ twitz ex tuʼn tel oq tiʼj. Ax ikx qe, bʼaʼn tuʼn tel qnikʼ tiʼj alkyeqe nya bʼaʼn jaku qo ok weʼ twitz tuʼntzun qel oq tiʼj (kjawil uʼjit Hebreos 5:14; Prov. 22:3). Jun techel, il tiʼj tuʼn qximen tiʼj tiʼ kʼokel qkeʼyin toj televisión moqa toj Internet, tuʼnju chʼixme tkyaqil maj in che etz yekʼin película at yaẍbʼil toj. In nel qikʼun tkyaqil jlu, tuʼnju chebʼe chebʼe jaku chewix qkʼujlabʼil tiʼj Jehová tuʼn. Bʼiʼn quʼn qa in nel tikʼun Jehová yaẍbʼil, ex aʼyeju xjal in che yaẍin, in tzaj nya bʼaʼn kyiʼjx ex kyiʼj txqantl (Efes. 5:5, 6).

14. Tuʼnju el tnikʼ Daniel tiʼjju bʼaʼn ex tiʼjju nya bʼaʼn, ¿tzeʼn onin jlu tiʼj?

¹⁴ El tnikʼ Daniel tiʼj, aju ma qo yolin tiʼj toj taqikʼ wajxaq, qa nya bʼaʼn tuʼn tsaqchan kyiʼj juego at bʼiybʼil ex kyaqʼun chman toj. Jyon tqanil tiʼj jlu toj Watchtower Library tuʼntzun tkubʼ tiʼj nya bʼaʼn lu tuʼn. ¿Tiʼ tzaj tuʼn jlu? Kyaj ttzaqpiʼn qe nya bʼaʼn juego, ya mintiʼ okx ttzʼibʼin tbʼi tuʼn tsaqchan toj Internet ex el tpan tibʼ kyiʼj xjal in che saqchan kyiʼj juego. Tqʼama jlu: «Ya mintiʼ in saqchane kyiʼj juego, xi ttzyet tuʼn tel npaʼne mas ambʼil kyiʼj junjuntl tiʼchaq ex tuʼn ntene kyukʼil erman toj kʼloj okslal». Toj ambʼil jaʼlo in najbʼen Daniel te precursor ex te ansyan.

15. ¿Tiquʼn jaku tzaj nya bʼaʼn qiʼj kyuʼn nya ax tok tqanil?

¹⁵ Ik tzeʼn bʼant tuʼn Timoteo, il tiʼj tuʼn tel qnikʼ tiʼj qa jaku tzaj nya bʼaʼn qiʼj tuʼn tqanil in tzaj kyqʼamaʼn apóstata (1 Tim. 4:1, 7; 2 Tim. 2:16). Jun techel, bʼalo jaku tzaj kyqʼamaʼn nya ax tok tqanil kyiʼj erman ex tiʼj ttnam Jehová. Tuʼn jlu jaku chewix qʼuqbʼil qkʼuʼj. Miʼn txi qqʼoʼn ambʼil tuʼn qkubʼ sbʼuʼn kyuʼn tqanil lu tuʼnju atz tzajni kyukʼil xjal ma naj kynabʼil ex o kubʼ kychʼexpuʼn axix tok, ex kyaj tuʼn tkubʼ qximen nya bʼaʼn tiʼj Jehová (1 Tim. 6:4, 5). Kyaj tuʼn t-xi qbʼiʼn nya ax tok kyyol ex tuʼn miʼn tok qeʼ qkʼuʼj kyiʼj erman.

16. ¿Alkyeqe tiʼchaq mintiʼ tuʼn tok qqʼoʼn qwiʼ kyiʼj?

 ¹⁶ Miʼn tzʼok qqʼoʼn qwiʼ kyiʼj junjuntl tiʼchaq. Tuʼn tok Timoteo te tbʼanel tsoldad Cristo, iltoq tiʼj tuʼn tok tqʼoʼn twiʼ tiʼj pakbʼabʼil ex tuʼn miʼn tok tqʼoʼn twiʼ kyiʼj tiʼchaq te twitz txʼotxʼ nix kyiʼj junjuntl tiʼchaq (2 Tim. 2:3, 4). Ik tzeʼn bʼant tuʼn Timoteo, ax ikx qe mintiʼ tuʼn t-xi qqʼoʼn ambʼil tuʼn tok qqʼoʼn qwiʼ kyiʼj junjuntl tiʼchaq. Jaku tzaj nya bʼaʼn qiʼj «tuʼn qʼinumabʼl», tuʼnju jaku chewix qkʼujlabʼil tuʼn tiʼj Jehová, tiʼj Tyol ex ya mlay ten qgan tuʼn qpakbʼan (Mat. 13:22). Bʼaʼn tuʼn tkubʼ qximen tuʼn qanqʼin kyukʼil nya nim tiʼchaq ex tuʼn tajbʼen ambʼil quʼn ex qipumal tuʼn qjyon tnejel tiʼj Tkawbʼil Dios (Mat. 6:22-25, 33).

17, 18. ¿Tiʼ jaku bʼant quʼn tuʼn miʼn tnaj qamiwbʼil tukʼil Jehová?

¹⁷ Qbʼinchanku qten tuʼn qel oq tiʼj nya bʼaʼn. Naʼmxtoq tok weʼ jun soldad twitz jun nya bʼaʼn, il tiʼj tuʼn tbʼaj t-ximen tiʼ kbʼantel tuʼn. Qa qaj tuʼn tok qxqʼuqin qe tiʼchaq o tzaj toqxenin Jehová qe, il tiʼj tuʼn qel oq tiʼj nya bʼaʼn. ¿Tiʼ jaku tzʼonin qiʼj tuʼn tbʼant jlu quʼn? Naʼmxtoq qok weʼ twitz jun nya bʼaʼn, il tiʼj tuʼn tbʼaj qximen tiʼ kbʼantel quʼn.

¹⁸ Jun techel, aj tok kychmon kyibʼ nim xjal, chʼixme tkyaqil maj in xi qʼamaʼn kye kykyaqil aj t-xi tzyet chmabʼil qa il tiʼj tuʼn tok kykeʼyin jatumel taʼ ttzi ja tuʼn kyex. ¿Tiquʼn? Tuʼnju qa ma tzaj jun nya bʼaʼn, ya ojtzqiʼn kyuʼn jatumel jaku che ex. Chʼixme ik tzeʼn jlu, qo ximen tiʼj jatumel tuʼn qex qa noq minabʼen in netz yekʼin jun tqanil kyuʼn apóstata, jun nya bʼaʼn tilbʼilal moqa bʼiybʼil akux in najbʼen Internet quʼn moqa in qo keʼyin jun película toj televisión. Qa otoq bʼaj qximen tiʼ kbʼantel quʼn, kʼelel qnikʼ tiʼj tiʼ kbʼantel quʼn tuʼntzun miʼn tnaj qamiwbʼil tukʼil Jehová ex tuʼn qten saq twitz (Sal. 101:3; 1 Tim. 4:12).

19. ¿Tiʼ kʼiwlabʼil tzul qkʼamoʼn qa ma tzʼok qxqʼuqin qe tbʼanel tiʼchaq o tzaj tqʼoʼn Jehová qe?

¹⁹ Nim toklen tuʼn tok qxqʼuqin qe tbʼanel tiʼchaq o tzaj toqxenin Jehová qe: aqeju tbʼanel axix tok tkuʼx toj Tyol Dios ex aju qoklen tuʼn t-xi qxnaqʼtzaʼn kye txqantl. Qa ma bʼant jlu quʼn, ktel tbʼanel qximbʼetz, ktel ttxolil qanqʼibʼil ex qo tzalajel aj qonin kyiʼj txqantl tuʼn tel kynikʼ tiʼj Jehová. Noq tuʼn onbʼil in tzaj tqʼoʼn, jaku tzʼok qxqʼuqin aju o tzaj toqxenin qe (1 Tim. 6:12, 19).