1-2. Toko cinthoonyeraaya 1 Timotiyu 6:20, isiyani Timotiyu yaavahaceriyaawe?

IKWAHA cinci, hiiva ninawaavahacera citthu cihu atthu akiina wiira awacere. Wootakihera, enci ansunka nsurukhwaaya upanku. Hiiva nimpheela wiira uyo nsurukhuuyo usunkiye saana, uhirimele ni uhinnyiye. Phimaana, hiiva ninaacuwela isiyani ikhanle unvahacera ntthu itthwiihu yofayita wiira awacere.

² Nsome 1 Timotiyu 6:20. * Apostolu Paulu ahomuupusera Timotiyu wiira uyo ahaakhela itthu yofayita cinene—ucuwela ikhweeli nhina citthu Nluku cinhalaawe waapankela apinaatamu. Ni Timotiyu ciicammo ahaakhela iparakha ‘yoolalyaa nuulumo’ ni uvara nteko ‘woolalyeera ihapari comaana.’ (2 Tim. 4:2, 5) Phimaana, Paulu ahonkurumica Timotiyu wiira asunke itthu yaavahaceriyaawe. Yehova honivahacera citthu cofayita khampa canvahacenryaawe Timotiyu. Citthuni? Ni ninlamuliya ukhikicera cani citthu cofayita Yehova cinivahacenryaawe?

3-4. Citthuni cinthoonyera wiira ikhweeli co mbiiblyani cihaana ifayita venci?

³ Athoonyeraka unamaana, Yehova honivaha ikhweeli cofayita cimphwanyannya nnuulumoni nawe, Ibiiblya. Itthu inthoonyera wiira ikhweeeli co mbiiblyani cihaana ifayita ukhalaka wiira cinaaniitthuciha mananna ookhalana upatthani ni Yehova ni cinaanithoonyera mananna cinhaleehu ukhitiri ukhala ootteeliya muukumini wihu. Neetthucaka nnyo ikhweelinnyo ni neettelaka, ninaakhala ootaphuwa, khaninthepiya ni citthu cowoothiya cineetthucihiya ni ninaakhitiri uhiya meettelo oohinamaana.—1 Akor. 6:9-11.

 ⁴ Itthu ikhwaawe inoonihera wiira ikhweeli co nnuulumoni na Nluku cikhanle cofayita, ukhalaka wiira nnyo ikhweelinnyo Yehova naathoonyera paahi atthu owiiyeviha ni ‘anoonihera uratteene’ wiira anaapheela ucuwela. (Mite. 13:48) Ayo atthwaayo anaakhuluvela mphwinko Yehova uvahacenryaawe wiitthuciha nnyo ikhweelinnyo ilelo. (Mat. 11:25; 24:45) Veekha cihu, khanaahala ukhitiri wiitthuca nnyo ikhweelinnyo, ni ntuninyani motheene khiivo itthu yookhalana ifayita cinene upwaha nnyo ikhweelinnyo.—Miru. 3:13, 15.

5. Ntekoni Yehova univahalyaawe?

⁵ Yehova honivaha iparakha yoowiitthuciha akhwiihu wiira ancuwele ni acuwele citthu cinhalaawe upanka uhoolo. (Mat. 24:14) Myaha cinlalyeehu cihaana ifayita venci. Cinawaakavihera atthu upanka mphantte ikhurupu yaamuci a Yehova ni cinawaakavihera uphwanya ukumi woohimala. (1 Tim. 4:16) Hataa ukhalaka wiira hiiva ninkhitiri ulalyeera cinene awula vakaani, otheene cihu ninvara nteko uverihenle ukhalana ifayita ula ukatyuula. (1 Tim. 2:3, 4) Khweeliini, ikhanle iparakha yuulupale unvarana nteko Nluku!—1 Akor. 3:9.

6. Isiyani yaakhumelenle makristau akiina yeetthaalale?

⁶ Makristau enci yaakhala ukati wa Timotiyu yahohiya ulemeliha iparakha yaarinaaya yonvarana nteko nkhayi Nluku. Demas caanancivela cinene citthu co ntuninyani, phimaana ahohiya iparakha yaarinaawe yoovara nteko nkhayi ni Paulu. (2 Tim. 4:10) Figelo ni Hermógenes ciicammo yahohiya uvara nteko wa Nluku, atthunaka nlattu wowoova ulupatthiya toko Paulu caalupatthiyaawe. (2 Tim. 1:15) Himeneu, Alexandre ni Fileto yahohapusiya ni citthu cowoothiya coolumiya ni yahohiya ikhweeli. (1 Tim. 1:19, 20; 2 Tim. 2:16-18) Unoonannyaa wiira wiipaceroni, alopwana otheene ayo yahaana waamini woolipa, masi yahohiya uvaresera itthu yofayita yaakhenlyaaya.

7. Itaphani Sotwani cinvarelaawe nteko wiira anihiihe ikhweeli?

⁷ Ilelo, Sotwani mpheela unihiiha citthu cofayita Yehova cinivahalyaawe. Itaphani uyo cinvarelaawe nteko wiira anihiihe? Itapha yoopacera, akhanle mathukelo, toko ifiilime, interneti, iteeve ni ilivuru. Avarelaka nteko nnyo citthunnyo, Sotwani naamwarusela moopuwelelo ni meettelo oohala unihiiha ikhweeli. Itapha yonayeeli invarelaawe nteko, ukhanle woova. Nakhanyererihiyaka naatthu anaasomaneehu awula anaavaraneehu nteko, ni nalupatthiyaka, Sotwani mpheela wiira nihiye ulalyeera. Ni itapha yoneeraru, akhanle atthu ahiyale ikhweeli anhimya citthu cowoothiya. Sotwani naamananiha unikupaliha citthu coohikhweeli cinoolumaaya atthu ni cineehanaaya “ucuwelaca,” ni uyo noweherera wiira nnyo citthunnyo cinihiihe ikhweeli.—1 Tim. 6:20, 21.

8. Mwiitthucale isiyani niitthu yankhumelenle munneehu mmoca neehaniya Daniel?

 ⁸ Neetthaalaka, hiiva pooti wancera uhiya ikhweeli vakaani-vakaani. Moone itthu yankhumelenle Daniel. * Uyo waanancivela cinene uttikha ikeemi. Uyo naattonka: “Mi kancenre uttikha ikeemi kinarina myaakha 10. Wuupaceroni, ikeemi caattikhaaka khacaari cootakhala. Masi wahoolo, kahancera uttikha ikeemi conttewo ni caathoonyera ukhwiri.” Daniel mpaka ahancera uviriha iwoora 15 khula nihuku attikhaka ikeemi. Uyo heera-tho: “Mi kaanaacuwela wiira kahancera unhiya Yehova vakaani-vakaani nlattu wookhala ukati mwinci kattikhaka ikeemi ni nlattu woottikha ikeemi coohinamaana. Mi koopuwela wiira pooti waheettelaaka itthu inhimyaaya Ibiiblya.” Iyo itthwiiyo pooti unkhumelela khula ntthu iriyariihu. Mathukelweehu pooti unihapusa hiiva woohicuwelela ni unihiiha ikhweeli. Yanikhumelelaka iyo, hiiva pooti uhaleela citthu cofayita Yehova cinivahalyaawe.

9. Toko cinthoonyeraaya 1 Timotiyu 1:18, 19, Paulu nlattanihale Timotiyu nipani?

⁹ Nsome 1 Timotiyu 1:18, 19. * Paulu honlattaniha Timotiyu ni natoropa ni ahonkurumica, amwiirelaka: ‘Waane ikhotto yomaana.’ Iyo khayaari ikhotto yo khweeli, masi yaari ikhotto yoominepani. Masi makristau anlikanaca cani naanatoropa anaana ikhotto? Hiiva nikhanle anatoropa a Kristu, makhaleloni ninlamuliyeehu ukhalana? Nttwee noone citthu 5 cinniitthucihaaya nlattanihero na Paulu. Citthu cinhaleehu wiitthuca cinaahala unikavihera uvaresesa ikhweeli.

10. Unvaresesa Nluku maanaaya isiyani, ni nlattuni ninlamuliyeehu unvaresesa?

¹⁰ Munvaresese Nluku. Natoropa haana akhalaka ntthu oovaresesa. Uyo nawiikurumica waana ikhotto niikuru cawe cotheene wiira aakhikicere atthu anaafentaawe awula itthu inoonaawe ukhala yofayita. Paulu ahonkurumica Timotiyu wiira anvaresese Nluku cinene—iyo maanaaya wiira uyo khaalamuliya uhiya unswalela Yehova. (1 Tim. 4:7) Nanfentaka cinene Nluku, ninaahala utepa upheela uvaresesa ikhweeli.—1 Tim. 4:8-10; 6:6.

11. Kontha isiyani nihaana niivaracaka?

¹¹ Mwiivarace. Natoropa haana eevaracaka wiira khula ukati akhale owiitthenkaceene. Timotiyu ahokhitiri waana ikhotto wiira hihapusiye ni Sotwani kontha aheettela ikano yaavahiyaawe ni Paulu: uyo aheekurumica unyema citthu coohinamaana cancivela wanrimani, aaneekurumica ukhalana makhalelo eekristau ni aanaapatthanana mayamunnaawe o wanlokoni. (2 Tim. 2:22) Uyo ahaana eevaracaka wiira akhitiri upanka citthu cotheene nnyo. Inanna imoca, hiiva ciicammo nihaana niivaracaka. Neevaracaka phinhaleehu ukhitiri waana ikhotto wiira ninyeme citthu coohinamaana cinnicivela wanrimani wihu. (Aroo. 7:21-25) Nihaana niivaracaka wiira nikhitiri uhiya meettelo oohinamaana yaarineehu khalayi ni wancera utthara meettelo ophiyaaru. (Efesu 4:22, 24) Ni nihuku ninkhaleehu owoocya cinene, nihaana niivaracaka wiira nirwee unkutthaanoni.—Mabere. 10:24, 25.

12. Isiyani ninlamuliyeehu upanka wiira nicuwele uvarela nteko ratta Ibiiblya?

¹² Natoropa haana eetthenkacaka wiira acuwele uvarela nteko saana ikaruma cawe cokhotto. Uyo nolamuliya upanka iyo khula ukati wiira acuweleehe uvarela nteko ratta ikaruma cookhottoni. Inanna imoca, hiiva nihaana nicuwelaka uvarela nteko ratta Nuulumo na Nluku. (2 Tim. 2:15) Mananna makhwaawe oovarela nteko Ibiiblya nineetthucihiyaka umikutthaanoni cihu. Masi napheelaka waakavihera akhwiihu ukupali Ibiiblya, hiiva nihaana nihihiyaka ukumiha ukati wiira nisome Ibiiblya veekha. Nihaana nivarelaka nteko Nuulumo na Nluku wiira nilipihace waamini wihu. Iyo maanaaya wiira khuntosa paahi usoma Ibiiblya. Nihaana nikumihaka ukati wiira nuupuwele itthu insomeehu ni  utotha ucuweleeha mmalivuruni cihu. Commo phinhaleehu ukhitiri wiiweeha Ibiiblya ni weettela muukumini wihu citthu cinniitthucihaaya. (1 Tim. 4:13-15) Napankaka iyo, ninaahala ukhitiri uvarela nteko Nuulumo na Nluku wiira niwiitthucihe akhwiihu. Ni wiira naakavihere, khuntosa paahi waasomela iveerusu co mbiiblyani. Nihaana naakaviheraka wiiweeha itthu inhimyaaya iveerusu isomaleehu ni waahimyera itthu inlamuliyaaya upanka wiira yeettele muukumini waya. Naahihiyeke ukumiha ukati wiira nisome Ibiiblya veekha, ninaahala utepa ucuweleeha uwiitthuciha akhwiihu Nuulumo na Nluku.—2 Tim. 3:16, 17.

13. Toko cinthoonyeraaya Maberewu 5:14, nlattuni ninlamuliyeehu ukhala atthu ankhili?

¹³ Nkhale ntthu ankhili. Natoropa haana acuwelaka woona itthu yowoopiha ni uhuluwa. Hiiva ciicammo nihaana nicuwelaka woona citthu cowoopiha ni unyema nnyo citthunnyo. (Miru. 22:3; nsome Maberewu 5:14. *) Wootakihera, nihaana nithanlaka ratta mathukelweehu. Ifiilime ni iporokaraama co TV cinci cinaathoonyera uraruwa. Ayo meettelwaayo ananveeha Nluku, ni wahoolo anaahala unipanka pusya. Phimaana, nihaana ninyemaka khula mathukelo anhala vakaani-vakaani unihiiha unfenta Nluku.—Efesu 5:5, 6.

14. Ukhalana ankhili unkavihenre cani Daniel?

¹⁴ Daniel, romoliye wiipaceroni, ahoona wiira uttikha ikeemi conttewo ni coothoonyera ukhwiri yaari itthu yoohinamaana. Phimaana, uyo ahovarela nteko ibibliyoteka Watchtower Library wiira atothe myaha coohala unkavihera. Yankhumelenle isiyani? Daniel ahohiya uttikha ikeemi coohinamaana. Uyo ahokhuma isayiti cokeemi ceecantikhihalyaawe mwinternetini, ni ahohiya uwuulumana atthu yaawiiranaawe ikeemi mwinternetini. Daniel neera: “Uhiya uttikha ikeemi, kahancera uvarela nteko ukati waakhalanaaka wiira kipanke citthu cikhwaawe vate ni kaathukane mayamunna o wanlokoni.” Nnava, Daniel nvara nteko weepiyoneeru ni khanle humu o wanlokoni.

15. Myahani cinoopiha hiiva wiiwelela?

¹⁵ Toko Timotiyu, hiiva nihaana nicuwelelaka citthu cowoothiya cinoolumaaya awananiihu ahiile weettela ikhweeli. (1 Tim. 4:1, 7; 2 Tim. 2:16) Wootakihera, ayo pooti uwootheriha citthu mayamunneehu ni upheela uniiriha uhikhuluvela mphwinko woothotokanihiya wa Yehova. Nnyo citthu cowoothiyannyo pooti uhonona waamini wihu. Nihaana nihiitthaalaka wiira nnyo citthunnyo cihinithepye. Kontha isiyani? Kontha nnyo  myaha cowoothiyannyo ammwarusela ‘apinaatamu ahinankhili omaana ni ahincuwela ikhweeli.’ Itthu impheelaaya ukhanle ukumihera “moolumo oovaanyihanaciya.” (1 Tim. 6:4, 5) Ayo ampheela wiira naamini citthu cowoothiya cinhimyaaya ni ampheela wiira nihaakhuluvele mayamunneehu.

16. Citthuni caahala uniitthaaliha?

¹⁶ Nhiitthaale. Ukhala wiira Timotiyu aari “natoropa omaana a Yesu Kristu,” uyo ahaana avaraka ntekwaawe wohiitthaala. Uyo khaalamuliya uhiya nsurukhu ni citthu cikhwaawe cimwiitthaalihaka. (2 Tim. 2:3, 4) Toko Timotiyu, hiiva khaninlamuliya uhiya mihakhu ciniitthaalihaka. “Ikuru yoothepya yomihakhu” pooti unihiiha unfenta Yehova ni Nuulumo nawe. Ni pooti uniiriha uhinicivela waalalyeera akhwiihu. (Mat. 13:22) Phimaana, khaninlamuliya uhoolelihera mihakhu muukumini wihu, masi nihaana nivarelaka nteko ukatiihu ni ikuru cihu wiira ‘nihihiye uhoolelihera Umwene wa Nluku’ muukumini wihu.—Mat. 6:22-25, 33.

17-18. Isiyani inlamuliyeehu upanka wiira nikhikicere upatthani urineehu ni Yehova?

¹⁷ Mwiitthenkace wiira nrwee mwacuwele itthu yoopanka woohipicapica. Natoropa haana eetthenkacaka khalayiiru, wiira yakhumelelaka itthu yowoopiha akhitiri wiikhikicera. Yanikhumelelaka itthu yowoopiha, nihaana niikurumicaka woohipicapica wiira niikhikicere itthu Yehova inivahalyaawe. Isiyani inhala unikavihera upanka itthu woohipicapica wiira niikhikicere? Nihaana niitthenkacaka khalayiiru wiira nacuwele wiikhikicera yanikhumelelaka itthu yowoopiha.

¹⁸ Muupuwele nna nlattaniheronna: mapuro makiina ampankiyaka mikutthaano, atthu ankhala wankutthaanoni anaathoonyeriya mapuro yaattamenle ikhateraaya, unhalaaya uvira wiira yaakuve ukhumela vate yakhumelelaka itthu yowoopiha. Nlattuni? Kontha umpheeliya wiira ayo yaakuve ukhuma nno nipuronno woohipicapica. Inanna imoca, hiiva pooti wiitthenkaca khalayiiru wiira nicuwele itthu yoohala upanka wakhalaka wiira ukati unooneehu iteeve awula ukati ninvareleehu nteko internenti, uhothoonyeriya uraruwa, inttewo awula citthu cowoothiya caalupatthi. Neetthenkacaka khalayiiru, ninaahala ucuwela itthu yoopanka woohipicapica; ninaahala ukhikicera upatthaniihu ni Yehova ni uyo naahala unoona ukhala atthu oomaana.—Isaa. 101:3; 1 Tim. 4:12.

19. Iparakhani cinhaleehu waakhela navaresesaka citthu cofayita Yehova cinivahalyaawe?

¹⁹ Nihaana uvaresesa citthu cofayita Yehova cinivahalyaawe—ikhweeli cofayita co mbiiblyani ni iparakha inivahalyaawe yoowiitthuciha akhwiihu nnyo ikhweelinnyo. Napankaka commo, ninaahala ukhalana nrima wootaphuwa, ukumi womaana, ni unaahala unitteela nrima nlattu wowaakavihera akhunanihu uncuwela Yehova. Nkupali wiira Yehova naahala wuukaviherani uhihiya uvaresesa citthu cuuvahalyaaweni.—1 Tim. 6:12, 19.