1-2. Ukulingana na 1 Timoti 6:20, i vyani vino Timoti wapeezilwe ukuomba?

INSITA zimwi tukapeela yamwi ivintu ivicindame kuti yatusungile. Limwi tungasungisya impiya zitu uku banki. Nga twacita vivyo tukaenekela ukuti impiya zitu zimasungwa ningo, zitange ziponge nanti umwi ukwiya. Fwandi twamanya vino cikapiliula ukulasika umuntu muze ivintu vino twatemwa sana.

² Welengini 1 Timoti 6:20. Umutumwa Paulo wiwisyeko Timoti ukuti wapokeliile icintu cimwi icicindame sana kuli kuti amano akumanya ukulonda kwakwe Leza pa antu. Yeova wapeezile Timoti umulimo wakunenako yauze api izwi lyakwe nu “mulimo uwakukosola Ilandwe Lisuma.” (2 Tim. 4:2, 5) Paulo wakomelizye Timoti ukusunga ningo vino wapeezilwe. Wakwe Timoti, naswe kwene twapeelwa ivintu vicindame. I vintu ci vivyo? Nupya u mulandu ci uno tulinzile ukusungila ningo ivintu ivicindame vino Yeova watupeela?

3-4. I vyani vimwi vyalenga icumi ca muli Baibo ukucindama?

³ Yeova walenga tuye na mano akuti tumanye icumi icaya umwi Izwi lyakwe, Baibo. Icumi cii cacindama pano cikatusambilizya vino tungaya na ucuza usuma na Yeova na vino tungacita pakuti tuye ni nsansa zya cumi. Ndi cakuti twapokelela icumi cii nu kulondela vino tukusambilila tutalasombwa ni visambilizyo vya ufi ni miyele iipe.—1 Kol. 6:9-11.

⁴ Umulandu nauze uno icumi icaya umwi Izwi Lyakwe Leza cacindamila u wakuti, Yeova akacisokolwela ku antu afuuke aaya nu “mwenzo wakulondesya ukuya nu umi.” (Mili. 13:48) Antu yaa afuuke yakazumila vino umuomvi mutailwe uwa mano akatusambilizya pali Baibo ndakai. (Mate. 11:25; 24:45)  Tutange tuvwikisye ivyaya muli Baibo ukwaula uwa kutwazwa, nupya kutaya icacindama ukucila ukuvwikisya icumi icaya muli Baibo.—Mapi. 3:13, 15.

5. I milimo ci na yuze ino Yeova watupeela?

⁵ Yeova nupya watupeela isyuko lya kusambilizya yauze icumi pali aliwe nu kulonda kwakwe. (Mate. 24:14) Vino tukasimikila vyacindama sana pano vikaazwa antu ukuya umu lupwa lwakwe Yeova nu kukwata isyuko lya kuya nu umi wa pe. (1 Tim. 4:16) Asi mulandu tukasimikila sana nanti panono, swensi kwene tukaazwilizyako ukuomba umulimo ucindame sana ukuombwa ndakai. (1 Tim. 2:3, 4) Ala isyuko sana ukuombela pamwi na Leza!—1 Kol. 3:9.

6. I vyani vyacitikiile yamwi afizilwe ukutwalilila ukuombesya umu milimo ino yapeezilwe?

⁶ Mu nsita yakwe Timoti, Aina Klistu yamwi yatacindike umulimo uno yapeezilwe uwa kuombela pamwi na Leza. Pa mulandu wa kuti Demasi watemilwe sana ivya mu nsi, watiile ukuombela pamwi na Paulo. (2 Tim. 4:10) Figelo na Hemogenesi yafwile yatiile ukuomba umulimo wa kusimikila pa mulandu wakuti yatiinanga ukuti nayo kwene yalayacuzya wakwe vino Paulo yamucuzyanga. (2 Tim. 1:15) Himenaesi, Alekizanda na Filetusi izile iyaya asangu nu kuta ukuombela Yeova. (1 Tim. 1:19, 20; 2 Tim. 2:16-18) Antu yaa yonsi yafwile pa nsita imwi yali Aina Klistu acincile, nomba izile iyata ukulola imilimo ino yapeezilwe ukuti yali icindame.

7. Iinzila ci zimwi zino Satana akaomvya pakuti tucite ukulonda kwakwe?

⁷ Uzye Satana akacita uli pakuti atulenga tuvilwe ukutwalilila ukuomba imilimo ino Yeova watupeela? Lolini inzila zimwi zimwi zino Satana akaomvya. Akaomvya ivya kuizanzya ni vyakutamba ivikalenga twaelenganya nu kucita ivintu ivingalenga tute ukuombela Yeova. Akaezya ukututiinya pa mulandu na vino yauze yakaelenganya nanti pa mulandu nu kutucuzya pakuti tute ukusimikila. Nupya akatutunka ukukutika kuli “vino antu yamwi mukuluvyanya kwao yakati, ‘ukumanya,’” ivikafuma uku asangu pakuti tufume umu cumi.—1 Tim. 6:20, 21.

8. I vyani vino mukusambilila kuli vino vyacitikiile umwina Daniel?

⁸ Nga cakuti tutacenjiile, panono panono tungata ukuombela Yeova. Elenganyini pali vino vyacitikile Daniel * uwatemilwe ivyangalo vya pa kompyuta. Walanzile ukuti: “Natandike ukuteya ivyangalo vii ala indi ni myaka 10. Pa kutandika, nateyanga  ivyangalo ivisuma. Nomba nizile intandika ukuteya ivyangalo umwali sana unkalwe ni vya mipasi.” Wizile atandika ukuteya ivyangalo vii mupipi na maawazi 15 cila wanda. Daniel walanzile nu kuti: “Kulanda sile icisinka ivyangalo vino nateyanga vyansendelanga sana insita nupya vyantalusyanga kuli Yeova. Nomba natandike ukwelenganya ukuti visinte vya muli Baibo vitanga vingazwe.” Fwandi nga tutacenjiile, ivyakuizanzya vingalenga tutandike panono panono ukuta ukuombela Yeova. Ndi cakuti icamusango uwo cacitika, cingalenga tupokwe imilimo yonsi ino Yeova watupeela.

9. Kulingana na 1 Timoti 1:18, 19, uzye Paulo wakolinye Timoti kuli weni?

⁹ Welengini 1 Timoti 1:18, 19. Paulo wakolinye Timoti ku musilika nupya wamukomelizye ukuomvya ‘amazwi wa vyanzo pakuti alwe ningo.’ Ulwi uu asi wa cumicumi lelo u wa muli vyakwe Leza. Uzye Aina Klistu yaya uli wa asilika aakulwa ulwi? Pa mulandu wakuti sweswe yasilika yakwe Klistu, i miyele ci ino tulinzile ukukwata? Lekini tulande pa vintu 5 vino tungasambilila ku cilangililo cakwe Paulo. Vino tumasambilila, vingatwazwa ukutwalilila ukuombela Yeova.

10. Uzye ukutemwa Leza wenga sile kuli kutuuli, nupya u mulandu ci uno tulinzile ukucitila vivyo?

¹⁰ Mwatemwa Leza wenga sile. Musilika umusuma waya ni cisinka. Angezya na maka ukucingilila umuntu wino watemwa nanti ivintu vino wacindika. Paulo wakomelizye Timoti ukutemwa sile Leza kuli kuti ukuya uwacisinka kuli aliwe. (1 Tim. 4:7) Ndi cakuti twatemwa Leza nu kumupepa sile wenga tulalondesya ukutwalilila ukumuombela.—1 Tim. 4:8-10; 6:6.

11. U mulandu ci uno tulinzile ukuisambilizizya?

¹¹ Mwaisambilizya ukucita ivisuma. Umusilika alinzile ukuombesya pakuti lyonsi aipekanya ukulwa ulwi. Timoti watwalilile ukuya umucincile pano uvwilile vino Paulo wamunenyile nu kuombesya ukutaluka uku imiyele iipe, ukuya ni miyele isuma nu kuya sana pamwi na ina na ya nkazi. (2 Tim. 2:22) Ukucita vivyo kwalondekwanga ukuisambilizya. Pakuti tucimvye ivilondwa iviipe tulinzile ukuisambilizya sana. (Loma 7:21-25) Nupya tulinzile ukuisambilizya ivya kusenula imiyele itu nu kuya ni miyele isuma. (Efes. 4:22, 24) Nupya nga twatonta pa cisila ca kuombesya uwanda onsi, limwi tungaipatikizya ukuya umu kulongana.—Ayeb. 10:24, 25.

12. Tungacita uli pakuti tumanye ivya kuomvya Baibo ningo?

¹² Umusilika alinzile ukusambilila ivya kuomvya ivyanzo. Nupya pakuti amanye ivya kuviomvya ningo alinzile ukulasambilila lyonsi. Naswe kwene tulinzile ukumanya ivya kuomvya ningo Izwi Lyakwe Leza. (2 Tim. 2:15) Tukasambilila inzila zya kucitilamo vivyo pa kulongana. Nomba ndi cakuti tukulonda ukwazwa na yauze ukuzumila cumi ica muli Baibo icingayazwa, tulinzile ukulabelenga Baibo lyonsi. Tulinzile ukuomvya Izwi Lyakwe Leza ukukomya utailo witu. Cii cikupiliula ukuti tutalinzile sile ukubelenga Baibo. Tulinzile nu kwelenganya pali vino tukubelenga nu kulondelezya umu mpapulo pakuti tuvwikisye nu kumanya ivya kuomvya malembelo. (1 Tim. 4:13-15) Nga twacita vivyo tulaomvya Izwi Lyakwe Leza pa kusambilizya yauze. Nupya kwene ukucita vii kukapiliula ukuti tutalinzile sile ukuyabelengela ilembelo. Tukalonda ukwazwa yano tukusimikila ukuvwikisya icikomo cimwi na vino yangaciomvya. Fwandi ndi cakuti tukubelenga  Baibo lyonsi, tungaya ya kasambilizya asuma.—2 Tim. 3:16, 17.

13. Ukulingana ni lembelo lya Ayebulai 5:14, u mulandu ci uno tulinzile ukwilukila?

¹³ Mwailuka. Umusilika alinzile ukumanya ukuyelile intazi nu kutalukako. Naswe kwene tulinzile ukumanya ivintu vimwi ivingatuletelela nu kucitapo vimwi pakuti tutalukeko. (Mapi. 22:3; welengini Ayebulai 5:14.) Tulinzile ukusoolola ningo ivyakuizanzya. Ilingi vino yakatambisya pa TV nu mumafilimu mukaya imiyele iipe. Imiyele ya musango uwo ikasosya Leza nupya ingatuletelela. Tukataluka uku vyakuizanzya vya musango uu pano vingalenga tute ukutemwa Yeova.—Efes. 5:5, 6.

14. Uzye ukwiluka kwazwilizye uli Daniel?

¹⁴ Daniel wino itulandapo mpiti, wizile atandika ukwiluka ukuti i ciipe ukuteya ivyangalo vya pa kompyuta umwaya uunkalwe ni vya mipasi. Walondelizye ivyeo ukuomvya Watchtower Library ivya kumwazwa ukumala intazi ino wakweti. Uzye ivyeo vivyo vyamwazwilizye uli? Watiile ukuteya ivyangalo vya pa kompyuta. Wafuusile ivyangalo vivyo nu kuta ukuvwana na yonsi yano wateyanga nayo. Daniel watiile: “Ukucila ukulateya ivyangalo vii, natandike ukusumba insita ikulu ukucita ivintu vyuze nanti ukuzanwa pamwi na ina na ya nkazi amu cilongano.” Ndakai Daniel a painiya nupya a eluda.

15. U mulandu ci uno malyasi ya ufi yaipila?

¹⁵ Wakwe Timoti tulinzile ukwiluka nu kulola iviipe ivingafumamo nga twakonkelezya malyasi ya ufi yano asangu yakalanda. (1 Tim. 4:1, 7; 2 Tim. 2:16) Insita zimwi yangasalanganya amalyasi ya ufi pa ina na ya nkazi nanti kutulenga twatwisika iuvi lyakwe Yeova. Malyasi ya musango uwo yangalenga utailo witu ukutonta. Tulinzile ukwezya na maka ukukanazumila malyasi yaa aufi. U mulandu ci? A pa mulandu wakuti malyasi yaa yakafuma uku “antu yano myenzo yao isi ya mpomvu nupya yatakwata cumi.” Cino yakalondesya u “kupazyanya nu kulemanila.” (1 Tim. 6:4, 5) Yakalonda tuzumile ufi uno yakalanda nu kutandika ukutwisika aina itu.

16. I vyani vino tutalinzile ukulenga vitupumbule?

¹⁶ Mwaikako mano. Pa mulandu wakuti Timoti wali u “musilika uwakutailwa wakwe Klistu Yesu” walinzile ukwika mano uku mulimo  wa kusimikila ukucila ukwika mano uku vintu ivili vyonsi ivya mu nsi. (2 Tim. 2:3, 4) Wakwe Timoti, tutalinzile ukuleka ukulondesya ivyuma kutupumbule. “Kusombwa nu ukama” vingalenga tute ukutemwa Yeova, ukukanataizya api Izwi Lyakwe Leza nu kuta ukulondesya ukunenako yauze pali Leza. (Mate. 13:22) Tulinzile ukwangupazya umi nu kuomvya insita na maka itu uku kulonda “Uwene” inkoleelo.—Mate. 6:22-25, 33.

17-18. I vyani vino tulinzile ukucita pakuti tucingilile ucuza witu na Yeova?

¹⁷ Mwaipekanya ukucitapo vimwi zuwa zuwa. Umusilika alinzile ukupekanyizizya limwi vino angacita pakuti aicingilile. Ndi cakuti tukulonda ukucingilila ivintu vino Yeova watulasika, tulinzile ukucitapo vimwi zuwa zuwa nga twalola uzanzo. I cani cingatwazwa ukucita vivyo? Tulinzile ukupekanyizizya limwi vino tungacita nga kwaya uzanzo.

¹⁸ Katulangilile: nga kuli ukukomaana kumwi amwi umba ilingi yakayalangilila ukwakufumila lino puloglamu itatala yatandika. U mulandu ci uno cikayela vivyo? Pakuti cize ciyangukile ukufuma nga kwaya uzanzo umwi. Mu nzila ili imwi kwene tungapekanyizizya limwi vino tungacita ndi cakuti ukwaula ukwenekela twalola imiyele iipe ili wa uzelele, unkalwe nanti mazwi ya asangu lino tukuomvya intaneti nanti lino tukutamba filimu nanti puloglamu imwi pa TV. Nga twaipekanyizizya limwi kuli vino vingacitika, tungacingilila ucuza witu na Yeova nu kutwalilila ukuya asanguluke kuli aliwe.—Masa. 101:3; 1 Tim. 4:12.

19. A mapaalo ci yano tulapokelela ndi cakuti twacingilila ivintu ivicindame vino Yeova watulasika?

¹⁹ Tulinzile ukucingilila ivintu ivicindame vino Yeova watulasika kuli kuti icumi ca muli Baibo ni syuko lino twapeelwa ilya kusambilizya yauze. Nga twacita vivyo, tulaya na kampingu musuma, umi witu ulazipilako nupya tulaya nu luzango ulwa kwazwa yauze ukumanya Yeova. Ndi cakuti Yeova watwazwa tulakwanisya ukucingilila vino watulasika.—1 Tim. 6:12, 19.