1-2. Ekkar ñan 1 Timote 6:20, ta eo kar lel̦o̦k ñan Timote?

EKKÃ ad likũt men ko m̦weied raorõk ippãn ro jet bwe ren kõjparoki. Ñan waanjoñak, jemaroñ kakon̦i jããn ko ad ilo ad kadel̦o̦ñi ilo pããñ. Ñe jej kõm̦m̦ane men in, jej kõtmãne bwe jããn kein ad renaaj pãdwõt ijin im reban jako ak ejjel̦o̦k enãj ko̦o̦tti. Alikkar bwe jemel̦el̦e kõn mel̦el̦ein ñan kappeik bar juon armej kõn men ko jej watõki bwe raorõk.

² Riit 1 Timote 6:20. Rijjilõk Paul ear kakeememej Timote bwe em̦õj kappeiki kõn juon men eaorõk​—jel̦ãl̦o̦kjen̦ eo ejim̦we kõn karõk eo an Anij ñan armej. Kar bar kappeik ak lel̦o̦k ñan Timote jeraam̦m̦an eo ñan “kwal̦o̦k kõn naan eo” im ñan “kõm̦m̦ane jerbal eo an ro rej ri-kwal̦o̦k naan.” (2 Tim. 4:2, 5) Paul ear rõjañ Timote ñan kõjparok men eo kar kappeiki kake. Ãinwõt Timote, em̦õj kappeik kõj kõn men ko raorõk. Ta kein? Im etke jej aikuj kõjparok menin aorõk kein me Jeova ear litoki ñan kõj?

3-4. Ta jet iaan un ko unin an lukkuun aorõk men ko rem̦ool jãn Baibõl̦?

³ Jeova ear kwal̦o̦k an jouj ñan kõj ilo an letok jel̦ãl̦o̦kjen̦ eo ejim̦we kõn men ko rem̦ool ilo Naan eo an, Baibõl̦ eo. Men kein rem̦ool relukkuun aorõk kõnke rej katakin kõj wãween jemaroñ ejaak juon kõtaan em̦m̦an ippãn Anij im rej kõmel̦el̦eik wãween jemaroñ lo m̦õn̦õn̦õ eo em̦ool ilo mour. Ñe jej kwal̦o̦k ad tõmak men kein rem̦ool im mour ekkar ñani, jej anemkwõj jãn ad ri-kõm̦akoko ñan katak ko reriab im mour ak kõm̦m̦an ko rejjab erreo.​—1 Kor. 6:9-11.

⁴ Bar juon unin an men ko rem̦ool jãn Naanin Anij lukkuun aorõk ej kõnke Jeova ej kwal̦o̦ki wõt ñan ro ettã bũrueer me rekkar ak “em̦m̦an bũrueer.” (Jrb. 13:48) Rein rej m̦õn̦õn̦õ in  l̦oor kumi eo me ej kõjerbal er ñan litok katak kein rem̦ool rainin. (Matu 11:25; 24:45) Jejjab maroñ make ekkatak im mel̦el̦e men kein rem̦ool, im ejjel̦o̦k bar jabdewõt men el̦apl̦o̦k an aorõk jãn men in.​—JK. 3:13, 15, UBS.

5. Bar ta eo juon em̦õj an Jeova kappeik kõj kake?

⁵ Jeova ear bar kappeik kõj kõn jeraam̦m̦an eo ñan katakin ro jet kõn m̦ool eo kõn e im karõk ko an. (Matu 24:14) Ennaan eo jej kwal̦o̦ke elukkuun aorõk kõnke ej jipañ armej ñan erom m̦õttan baam̦le eo an Jeova im ej lel̦o̦k jeraam̦m̦an eo ñan aer maroñ bõk mour indeeo. (1 Tim. 4:16) Meñe emaroñ l̦ap ak dik ijo kun̦aad ilo jerbalin kwal̦o̦k naan, jej aolep rejetake jerbal eo eaorõktata me ej wal̦o̦k kiiõ. (1 Tim. 2:3, 4) Ej juon jeraam̦m̦an el̦ap ilo ad ri-jerbal ippãn Anij!​—1 Kor. 3:9.

6. Ta eo ear wal̦o̦k ñan ro im rar jab kõjparok aer ekkõl wõt?

⁶ Jet iaan ro ilo tõre ko an Timote rar jab kwal̦o̦k aer kaorõk jeraam̦m̦an eo rar bõke ñan aer ri-jerbal ippãn Anij. Kõnke Dimas ear yokwe men ko an jukjukun pãd in, ear jol̦o̦k jeraam̦m̦an eo an ñan jerbal ippãn Paul. (2 Tim. 4:10) Paijelos im Hermojinis remaroñ kar ilo̦k jãn jerbalin kwal̦o̦k naan eo aer kõnke rar mijak ñe rebar eñtaan ilo ejja wãween ko wõt renana me Paul ear jelm̦aiki. (2 Tim. 1:15) Haimeniõs, Alexander, im Pailitõs rar oktak im ri-jum̦ae im rar el̦l̦o̦k jãn m̦ool eo. (1 Tim. 1:19, 20; 2 Tim. 2:16-18) Aolep armej rein rekõn kar jet ro rekajoor ilo tõmak, bõtab tokãlik ear jako aer kile men ko relukkuun aorõk.

7. Ta wãween ko Setan ej kõjerbali n̦ae kõj?

⁷ Ewi wãween an Setan kajjioñ kõm̦m̦an bwe jen bõjrak jãn ad kaorõk menin aorõk ko me em̦õj an Jeova kappeik kõj kaki? L̦õmn̦ak kõn jet iaan wãween kein Setan ej kõjerbali. Ej kõjerbal menin kam̦õn̦õn̦õ ko im jikin bõk mel̦el̦e ko jet ñan kajeeded ta ko raorõk, l̦õmn̦ak ko, kab kõm̦m̦an ko me ej kõjatdikdik bwe renaaj kõm̦m̦an an dikl̦o̦k ad kaorõk m̦ool eo. Ej kajjioñ kaamijak kõj ikijjeen ijjiped ko jãn ro jet ak matõrtõr bwe jen bõjrak jãn ad kwal̦o̦k naan. Im ej kajjioñ aujiidi kõj ñan roñjake “men ko reriab . . . me armej rej watõki ‘jel̦ãl̦o̦kjen̦’” me rej jãn ri-jum̦ae ro bwe jen el̦l̦o̦k jãn m̦ool eo.​—1 Tim. 6:20, 21.

8. Ta eo kwaar katak jãn bwebwenato eo an likao eo jeid im jatid etan Daniel?

⁸ El̦aññe jejjab kõjparok, jemaroñ jidik kõn jidik jino el̦l̦o̦k jãn m̦ool eo. L̦õmn̦ak kõn bwebwenato in an Daniel, * eo me em̦m̦an ippãn iukkure kõn mijjin. Ej kõmel̦el̦e im ba: “Iar jino iukkure kõn mijjin jãn ke emaroñ kar joñoul aõ iiõ. Ilo jinoin, ikõn iukkure kõn keem ko me rejjab lukkuun nana. Bõtab jidik  kõn jidik, ikar jino iukkure kõn keem ko me rellãj im keem ko rej kowõnm̦aanl̦o̦k l̦õmn̦ak im kõm̦m̦an ko an jetõb ko rettoon.” Ejjabto tokãlik, Daniel ear jino jol̦o̦k enañin 15 awa ko kajjojo raan ñan iukkure kõn mijjin. Daniel ej ba, “Itulowa, iar jel̦ã bwe kain keem rot kein ij iukkure kaki im joñan iien ko ij julo̦ki ñan iukkure rar kõm̦m̦an aõ jino ettol̦o̦k l̦o̦k jãn Jeova. Bõtab, ear pen bũruõ kõn l̦õmn̦ak eo bwe naanin kakapilõklõk ko ilo Baibõl̦ rar jab jerbal ñan ña.” Ilo ad jab lukkuun kile, emaroñ pidodo an menin kam̦õn̦õn̦õ ko jelõt kõj im kõm̦m̦an ad jol̦o̦k ad dãpij wõt m̦ool eo. Ñe men in ej wal̦o̦k, jemaroñ oktak im luuji men ko raorõk Jeova ear litok ñan kõj.

9. Ekkar ñan 1 Timote 1:18, 19, wõn eo Paul ear keidi Timote ñane?

⁹ Riit 1 Timote 1:18, 19. Paul ear keidi Timote ñan juon rũttarin̦ae im rõjañe ñan “wõnm̦aanl̦o̦k wõt im tarin̦ae ilo tarin̦ae eo em̦m̦an.” Tarin̦ae in ear jab juon lukkuun tarin̦ae, ear juon tarin̦ae ilo kõkkar. Ilo wãween et Kũrjin ro rej ãinwõt rũttarin̦ae ro me rej pãd ilo tarin̦ae? Ta kadkad ko jej aikuj kaddeke ippãd ãinwõt ro im rej rũttarin̦ae an Christ? Jen lale l̦alem men ko jemaroñ katak jãn waanjoñak eo an Paul. Men kein remaroñ jipañ kõj ñan dãpij wõt m̦ool eo.

10. Ta mel̦el̦ein tiljek ñan Anij, im etke jej aikuj kõm̦m̦ane men in?

¹⁰ Kal̦apl̦o̦k ad tiljek ñan Anij. Juon rũttarin̦ae eo em̦m̦an, etiljek. Enãj lukkuun kate ire ñan kõjparok juon eo ej yokwe ak juon men eo el̦ap an kaorõke. Paul ear rõjañ Timote ñan kal̦apl̦o̦k an tiljek ñan Anij—mel̦el̦ein, eddãp wõt ilo tiljek ñan Anij. (1 Tim. 4:7) Ñe em̦wilal̦l̦o̦k yokwe eo ad ñan Anij im l̦apl̦o̦k ad tiljek ñane, enaaj l̦apl̦o̦k ad kõn̦aan dãpiji wõt m̦ool eo.​—1 Tim. 4:8-10; 6:6.

11. Etke jej aikuj kate kõj kammineneik kõj make?

¹¹ Kate eok ñan kammineneik eok make. Juon rũttarin̦ae ej aikuj lukkuun kammineneik e make bwe en maroñ pojak wõt ñan jerbal eo an. Timote ear maroñ pen wõt ilo tõmak kõnke ear l̦oor naanin kakapilõklõk ko Paul ear jei ñan ko jãn kõn̦aan ko renana, jibadek ak kaddekl̦o̦k kadkad ko kadkadin Anij, im kobal̦o̦k ippãn rũttõmak ro m̦õttan. (2 Tim. 2:22) Ñan an juon maroñ ãindein, ej aikuj kate kammineneik e make. Jej aikuj kate kõj ñan kammineneik kõj make bwe jen maroñ anjo̦ ilo tarin̦ae eo n̦ae kõn̦aan ko an kanniõk. (Rom 7:21-25) Bareinwõt, jej aikuj kate kõj kammineneik kõj make bwe jen maroñ wõnm̦aanl̦o̦k wõt ilo ad utũk mour eo m̦okta im kõn̦ak mour eo ekããl. (Eps. 4:22, 24) Im ñe jelukkuun m̦õk ilo jem̦l̦o̦kin juon raan eaetok, jemaroñ aikuj iuun kõj make ñan etal im kweilo̦k.​—Hib. 10:24, 25.

12. Ewi wãween jemaroñ kal̦apl̦o̦k ad kapeel ilo ad kõjerbal Baibõl̦ eo?

¹² Juon rũttarin̦ae ej aikuj kamminene kilen kõjerbal kein tarin̦ae ko an. Bwe en l̦apl̦o̦k an kapeel, ej aikuj ekkeini an kõm̦m̦ane men in. Ejja ãindeinl̦o̦k wõt, ej aikuj l̦apl̦o̦k ad kapeel ilo ad kõjerbal Naanin Anij. (2 Tim. 2:15) Jemaroñ katak jet iaan wãween kein rekapeel ilo kweilo̦k ko ad. Bõtab ñe jekõn̦aan jipañ armej ro ñan lukkuun tõmak bwe elukkuun l̦ap tokjãn m̦ool eo ilo Baibõl̦, jej aikuj ekkeini ad katak Baibõl̦ ippãd make. Jej aikuj kõjerbal Naanin Anij ñan kõkajoor tõmak eo ad. Mel̦el̦ein bwe jejjab baj aikuj riiti wõt Baibõl̦ im m̦õj. Ak jej aikuj kõl̦mãnl̦o̦kjen̦ kõn ta ko jej riiti im kappok mel̦el̦e ko ilo bok ko ad bwe en jim̦we ad mel̦el̦e im kõjerbali Eoon ko. (1 Tim. 4:13-15) Innem jenãj maroñ kõjerbal Naanin Anij ñan katakin ro jet. Bar juon alen, mel̦el̦ein bwe jeban baj aikuj riitil̦o̦k wõt eoon ko im  m̦õj. Jekõn̦aan jipañ ri-roñjake ro ad ñan mel̦el̦e eoon eo im wãween an maroñ jipañ ak jerbal ñan er. Ilo ad kajejjet wõt laajrak eo ad ñan katak Baibõl̦ ippãd make, jemaroñ kal̦apl̦o̦k ad kapeel ilo ad kõjerbal Naan ko an Anij me em̦õj an kakũrm̦ooli ñan katakin ro jet.​—2 Tim. 3:16, 17.

13. Ekkejell̦o̦k wõt ippãn Hibru 5:14, etke jej aikuj kwal̦o̦k lol̦o̦kjen̦?

¹³ Kwal̦o̦k lol̦o̦kjen̦. Juon rũttarin̦ae ej aikuj jel̦ã kile an itõn wal̦o̦k juon men ekauwõtata im kõjparok jãne. Kõj bareinwõt jej aikuj katak ñan kile wãween ko me remaroñ kõjorrããn kõj im em̦m̦akũt ñan kõjparok kõj jãn kauwõtata eo. (JK. 22:3; riit Hibru 5:14.) Ñan waanjoñak, jej aikuj kããlõt menin kam̦õn̦õn̦õ ko jej kõm̦m̦ani ak alwõji ilo mãlõtlõt. Bũrookraam̦ ak show ko me rej kwal̦o̦ki ilo TV im pijain alwõj ko ekkã aer kwal̦o̦k mour im kõm̦m̦an ko renana. Kain kõm̦m̦an rot kein rej kõmetak Anij im renaaj bõktok jorrããn. Eñin unin jej kõjparok kõj jãn kain menin kam̦õn̦õn̦õ rot kein me jidik kõn jidik remaroñ kam̦õjn̦o̦ikl̦o̦k yokwe eo ad ñan Anij.​—Eps. 5:5, 6.

14. Ewi wãween an lol̦o̦kjen̦ kar jipañ Daniel?

¹⁴ Daniel, eo me kar kwal̦o̦k kake l̦o̦k im̦aan, ear jino kile bwe iukkure kõn keem ko el̦ap lãj ie kab keem ko rej kowõnm̦aanl̦o̦k l̦õmn̦ak im kõm̦m̦an ko an jetõb ko rettoon ear juon apañ. Ear kappok mel̦el̦e ko jãn kein katak ko ilo Watchtower Library ñan jipañe kõn apañ in an. Ta eo ear wal̦o̦k ñane jãn an kar kõm̦m̦ane men in? Ear bõjrak jãn an iukkure kõn keem kein me rejjab ekkar. Ear jol̦o̦k an pãd ilo keem ko ilo online im jol̦o̦k an iukkure ippãn rukkure ro jet. Daniel ej ba, “Ijello̦kun aõ iukkure mijjin, ikar jino jol̦o̦k iien im kõm̦m̦ani men ko ijoko inabõj ak kobal̦o̦k ippãn ro m̦õttad ilo eklejia eo.” Daniel ej kiiõ juon bainier im juon iaan em̦m̦aan ro rej lale eklejia.

15. Etke bwebwenato ko reriab rekauwõtata?

¹⁵ Ãinwõt Timote, jej aikuj bar kwal̦o̦k lol̦o̦kjen̦ kõn kauwõtata eo kõn mel̦el̦e ko reriab me ri-jum̦ae ro rej kajeededi. (1 Tim. 4:1, 7; 2 Tim. 2:16) Ñan waanjoñak, remaroñ kajjioñ kajeeded bwebwenato ko reriab kõn ro jeid im jatid ak kõm̦m̦an ad pere doulul eo an Jeova. Kain mel̦el̦e rot kein reriab remaroñ kam̦õjn̦o̦ikl̦o̦k tõmak eo ad. Jej aikuj kõjparok ñan jab kõtl̦o̦k an mel̦el̦e rot kein reriab m̦on̦e kõj. Etke? Kõnke kain bwebwenato rot kein, “armej ro  enana l̦õmn̦ak ko aer im ejako aer jel̦ã kõn m̦ool eo,” er eo rej kajeededi. Kõttõpar eo aer ej ñan kõm̦m̦an “akwããl im kõbo̦uwe.” (1 Tim. 6:4, 5) Rekõn̦aan bwe jen tõmak naanin ruruwe ko aer im jino nana ad l̦õmn̦ak kõn ro jeid im jatid.

16. Ta menin kõm̦ad ko jej aikuj kõjparok kõj jãni?

¹⁶ Kõjparok jãn menin kõm̦ad ko. Ãinwõt “juon rũttarin̦ae em̦m̦an an Christ Jesus,” Timote ear aikuj l̦õmn̦ak wõt kõn jerbalin kwal̦o̦k naan eo an ijello̦kun an m̦ad kõn m̦weiuk ko ilo kanniõk ak kõttõpar ko jet ilo mour. (2 Tim. 2:3, 4) Ãinwõt Timote, jejjab aikuj m̦ad kõn kõn̦aan eo ñan koorl̦o̦k m̦weiuk. “Aujiid eo kõn m̦weiuk” emaroñ ko̦kkure yokwe eo ad ñan Jeova, kam̦m̦oolol eo ad kõn Naanin Anij, im kõn̦aan eo ad ñan kwal̦o̦ke ñan ro jet. (Matu 13:22) Jej aikuj kõm̦m̦an bwe en l̦amwaan ad mour im kõjerbal iien im maroñ ko ad ñan “wõnm̦aanl̦o̦k wõt im pukot m̦okta Aelõñ eo.”​—Matu 6:22-25, 33.

17-18. Ta ko jemaroñ kõm̦m̦ani ñan kõjparok bwe jen jab jorrããn ilo tõmak?

¹⁷ Pojak ñan em̦m̦akũt ilo m̦õkaj. Juon rũttarin̦ae ej aikuj pepel̦o̦k im̦aan kõn wãween an nãj em̦m̦akũt. El̦aññe jekõn̦aan kõjparok men ko Jeova ear kappeik kõj kaki, jej aikuj em̦m̦akũt ilo m̦õkaj ñe jej lo juon men ekauwõtata. Ta eo emaroñ jipañ kõj ñan em̦m̦akũt ilo wãween in? Jej aikuj pepel̦o̦k im̦aan kõn wãween jenaaj em̦m̦akũt kõn juon men ekauwõtata.

¹⁸ Ñan kõm̦m̦ane juon waanjoñak kõn men in, ñe jej kobal̦o̦k ilo juon iien el̦ap, ekkã aer kajjitõk ippãn ro rej pãd ilo iien in ñan pukot jikin diwõjl̦o̦k eo epaaktata ñan er m̦okta jãn an jino bũrookraam̦ eo. Etke? Kõnke ren kab maroñ m̦õkaj im diwõjl̦o̦k ñe ewõr idiñ. Ilo ejja wãween in wõt, jemaroñ kõmmãlmel l̦o̦k im̦aan kõn ia eo ak wãween jenaaj “diwõjl̦o̦k” ñe ejidimkij an wal̦o̦k baat ko rejjab em̦m̦an, wãween ko rellãj, ak men ko jãn ri-jum̦ae ro ñe jej kõjerbal Internet ak ñe jej alwõje juon pija ak bũrookraam̦ ko ilo TV. El̦aññe jenaaj pojak ñan ta ko remaroñ wal̦o̦k, jemaroñ em̦m̦akũt ilo m̦õkaj ñan ko jãn ad jorrããn ilo tõmak im dãpij wõt ad erreo im̦aan mejãn Jeova.​—Sam 101:3; 1 Tim. 4:12.

19. Ta jeraam̦m̦an ko jenaaj loi ñe jenaaj kõjparok men ko raorõk em̦õj an Jeova litok ñan kõj?

¹⁹ Jej aikuj kõjparok men ko raorõk Jeova ear litoki ñan kõj​—men ko rem̦ool im aorõk jãn Baibõl̦ im jeraam̦m̦an eo ñan katakin ro jet kaki. Ñe jenaaj kõm̦m̦ane men in, enaaj erreo bõklõkõt eo ad, jenãj bõk juon mour eo el̦ap tokjãn, im lañlõñ kõn jeraam̦m̦an eo ñan jipañ ro jet ñan aer jel̦ã kajjien Jeova. Ikijjeen jipañ eo an, jenaaj maroñ kõjparok men eo kar kappeik kõj kake.​—1 Tim. 6:12, 19.