1, 2. Nda̱a̱ táki̱ʼva káchi 1 Timoteo 6:20, ¿ndáaña xi̱niñúʼu keʼé ta̱ Timoteo?

KI̱VI̱ kúúmií iin na̱ yiví iin ña̱ʼa ña̱ ndáyáʼvi, sava yichi̱ táxinaña ndaʼa̱ inka na̱ yiví ña̱ va̱ʼa kundaanaña. Tá kúú, kivi chika̱a̱na xu̱ʼún ña̱ kúúmiína ti̱xin banco ña̱ va̱ʼa ná va̱ása sandáñúʼunaña á ixakuíʼná inkanaña. Ña̱kán kúnda̱a̱-iniyó ndáaña kúni̱ kachi ña̱ taxiyó iin ña̱ʼa ña̱ ndáyáʼvi ndaʼa̱ inkana.

² (Kaʼvi 1 Timoteo 6:20). * Ta̱ apóstol Pablo sa̱ndákaʼánra ta̱ Timoteo ña̱ nda̱kiʼinra iin ña̱ ndáyáʼviní: ña̱yóʼo kúú ña̱ ni̱xa̱a̱ra ku̱nda̱a̱-inira xa̱ʼa̱ ña̱ kúni̱ Ndióxi̱ taxira ndaʼa̱ na̱ ñuyǐví. Ta saátu, Jehová ta̱xira iin ña̱ ndáyáʼviní ndaʼa̱ ta̱ Timoteo, ña̱ ku̱ʼu̱nra natúʼunra xíʼin na̱ yiví xa̱ʼa̱ tu̱ʼunra (2 Tim. 4:2, 5). Ta̱ Pablo ni̱ka̱ʼa̱nra xíʼin ta̱ Timoteo ña̱ xíniñúʼu kundaara ña̱ ta̱xina ndaʼa̱ra. Saátu miíyó, Jehová ta̱xira ña̱ ndáyáʼviní ndaʼa̱yó. ¿Ndáaña kúúña? Ta, ¿nda̱chun xíniñúʼu kundaayóña?

3, 4. Ka̱ʼa̱n nda̱chun kúú ña̱ ndáyáʼviní ña̱ nda̱a̱ ña̱ va̱xi nu̱ú Biblia.

³ Xa̱ʼa̱ ña̱ va̱ʼa-ini Jehová, ta̱xira ña̱ ná kunda̱a̱ káxi-iniyó xa̱ʼa̱ ña̱ nda̱a̱ ña̱ va̱xi nu̱ú tu̱ʼunra ña̱ Biblia. Ña̱ nda̱a̱ yóʼo ndáyáʼviníña saáchi sánáʼa̱ña miíyó ndáa ki̱ʼva kivi xa̱a̱yó kitáʼanyó xíʼin Jehová, ta saátu ña̱ si̱íní kooyó. Tá kándíxayó ña̱ nda̱a̱ yóʼo ta kéʼéyóña, ndátaváña miíyó ndaʼa̱ ña̱ vatá ña̱ sánáʼa̱ inkana ta va̱ása kéʼékayó ña̱ kini (1 Cor. 6:9-11).

 ⁴ Ta saátu ndáyáʼviní ña̱ nda̱a̱ ña̱ va̱xi nu̱ú tu̱ʼun Ndióxi̱, saáchi iinlá na̱ yiví na̱ vitá-ini na̱ ndixa kúni̱ sakuaʼa xa̱ʼa̱ra kúú na̱ táxiraña ndaʼa̱ (Hech. 13:48). Na̱yóʼo kándíxana ña̱ xíniñúʼu Ndióxi̱ “ta̱ esclavo ta̱ ndíchiní ta̱ nda̱kúní káchíñu”, ña̱ va̱ʼa chindeétáʼanra xíʼinyó ña̱ kunda̱a̱-iniyó xa̱ʼa̱ ña̱ nda̱a̱ yóʼo tiempo vitin (Mat. 11:25; 24:45). Ña̱ va̱ʼa sakuaʼayó xa̱ʼa̱ ña̱ nda̱a̱ xíniñúʼu chindeétáʼanna xíʼinyó chi va̱ása kuchiñu iinlá miíyó keʼéyó ña̱yóʼo. Ña̱ kunda̱a̱-iniyó xíʼin ña̱yóʼo ndáyáʼviníkaña nu̱ú inkaka ña̱ʼa (Prov. 3:13, 15).

5. ¿Ndáa inkaka ña̱ʼa ta̱xi Jehová ndaʼa̱yó?

⁵ Ta saátu, Jehová ta̱xira iin ña̱ ndáyáʼviní ndaʼa̱yó, ña̱ ku̱ʼu̱nyó sanáʼa̱yó inka na̱ yiví xa̱ʼa̱ra xíʼin ña̱ kúni̱ra keʼéra (Mat. 24:14). Ña̱ nátúʼunyó xíʼin na̱ yiví ndáyáʼviníña saáchi chíndeétáʼanña xíʼinna ña̱ xa̱a̱na koona na̱ veʼera, ta ndakiʼinna ña̱ kutakuna ndiʼi tiempo (1 Tim. 4:16). Ni loʼo á ku̱a̱ʼá kúú ña̱ kéʼéyó, soo sáxi̱nuyó iin chiñu ña̱ ndáyáʼviní tiempo vitin (1 Tim. 2:3, 4). Iin ña̱ ndáyáʼviní kúú ña̱ káchíñuyó xíʼin Ndióxi̱ (1 Cor. 3:9).

6. ¿Ndáaña ndo̱ʼo sava na̱ cristiano?

⁶ Tá tiempo ña̱ ni̱xi̱yo ta̱ Timoteo, sava na̱ cristiano va̱ása níchindayáʼvina ña̱ va̱ʼa ña̱ xi̱kuumiína ña̱ kachíñuna xíʼin Ndióxi̱. Tá kúú, ta̱ Demas ni̱kuʼvi̱ka-inira xi̱nira ña̱ íyo ñuyǐví yóʼo, ña̱kán sa̱ndákoora ña̱ kachíñura xíʼin ta̱ Pablo (2 Tim. 4:10). Ta̱ Figelo xíʼin ta̱ Hermógenes sa̱ndákoona ña̱ ku̱ʼu̱nna natúʼunna xíʼin na̱ yiví xa̱ʼa̱ Ndióxi̱, saáchi sana ni̱yi̱ʼvína xo̱ʼvi̱na nda̱a̱ táki̱ʼva ni̱xo̱ʼvi̱ ta̱ Pablo (2 Tim. 1:15). Ta̱ Himeneo, ta̱ Alejandro xíʼin ta̱ Fileto sa̱ndákoona ña̱ nda̱a̱ ta ndu̱una apóstata (1 Tim. 1:19, 20; 2 Tim. 2:16-18). Ndiʼi na̱ yiví yóʼo ni̱xi̱yo iin tiempo ña̱ ni̱kuʼvi̱-inina xi̱nina Jehová, soo va̱ása níchindayáʼvikana ña̱ ta̱xira ndaʼa̱na.

7. ¿Ndáaña xíniñúʼu ta̱ Ndi̱va̱ʼa xa̱ʼa̱ ña̱ kúnira sandáʼvira miíyó?

⁷ ¿Ndáaña xíniñúʼu ta̱ Ndi̱va̱ʼa ña̱ va̱ʼa sandákooyó ña̱ ndáyáʼviní ta̱xi Jehová ndaʼa̱yó? Ná ka̱ʼa̱nyó xa̱ʼa̱ savaña. Xíniñúʼura ña̱ xítonde̱ʼéyó á ña̱ sísikíyó ña̱ va̱ʼa nasamara ña̱ ndákanixi̱níyó xíʼin ña̱ kéʼéyó, tasaá sandákooyó ña̱ nda̱a̱. Ta saátu, xíniñúʼura na̱ yiví ña̱ ka̱ʼa̱nna ña̱ va̱ása va̱ʼa xa̱ʼa̱yó á ixandi̱va̱ʼana xíʼinyó ña̱ va̱ʼa yi̱ʼvíyó ta va̱ása ku̱ʼu̱nkayó natúʼunyó xa̱ʼa̱ Ndióxi̱. Ta kúnira sandáʼvira miíyó ña̱ kandíxayó ña̱ vatá ña̱ sánáʼa̱ na̱ apóstata ta sandákooyó ña̱ nda̱a̱ (1 Tim. 6:20, 21).

8. ¿Ndáaña sákuaʼayó xíʼin ña̱ ndo̱ʼo ta̱ Daniel?

⁸ Tá ná va̱ása kiʼinyó kuenta, loʼo tá loʼo kivi xa̱a̱yó sandákooyó ña̱ nda̱a̱. Ná kotoyó ña̱ ndo̱ʼo ta̱ Daniel, * ta̱ xi̱kutóoní kusíkí videojuego. Ta̱yóʼo káchira: “Ki̱xáʼíi̱ sísikíi̱ videojuego tá  xi̱kuumiíi̱ 10 ku̱i̱ya̱. Tá xa̱ʼa̱, ña̱ xi̱sisíkíi̱ kǒo níxikuumiíña ña̱ va̱ása va̱ʼa. Soo loʼo tá loʼo ki̱xáʼíi̱ sísíkíi̱ nu̱ú xi̱kanitáʼanna á ña̱ xi̱kuumií ña̱ʼa ña̱ kúú kuenta ta̱ Ndi̱va̱ʼa”. Ta ni̱xa̱a̱ iin tiempo ña̱ xi̱sisíkíra 15 hora ndiʼi ki̱vi̱. Ta̱ Daniel káchira: “Xi̱kunda̱a̱-inii̱ ña̱ videojuego yóʼo xíʼin tiempo ña̱ xi̱sisíkíi̱ña, xi̱sakúxíkaña yi̱ʼi̱ nu̱ú Jehová. Ta nda̱a̱ ni̱xa̱i̱ nda̱kanixi̱níi̱ ña̱ va̱ása xíniñúʼuví keʼíi̱ ña̱ káʼa̱n Biblia”. Xíʼin ña̱yóʼo sákuaʼayó ña̱ sísikíyó á ña̱ xítonde̱ʼéyó kivi chindaʼáña miíyó ña̱ sandákooyó ña̱ nda̱a̱. Tá saá ná ndoʼoyó, kivi sandáñúʼuyó ña̱ ndáyáʼviní ta̱xi Jehová ndaʼa̱yó.

9. Nda̱a̱ táki̱ʼva káchi 1 Timoteo 1:18, 19, ¿ndáana chi̱táʼan ta̱ Pablo xíʼin ta̱ Timoteo?

⁹ (Kaʼvi 1 Timoteo 1:18, 19). * Ta̱ Pablo chi̱táʼanra ta̱ Timoteo xíʼin iin ta̱ soldado, ta ni̱ka̱ʼa̱nra xíʼinra ña̱ ná ndakundeéra kanitáʼanra. Soo ña̱ ni̱ka̱ʼa̱n ta̱ Pablo xa̱ʼa̱ va̱ása kúni̱ kachiña ña̱ ku̱ʼu̱n ta̱ Timoteo kanitáʼanra xíʼin inka na̱ soldado. ¿Nda̱chun inkáchi íyo ña̱ kéʼé miíyó na̱ cristiano xíʼin ña̱ kéʼé na̱ soldado na̱ ku̱a̱ʼa̱n nu̱ú ku̱a̱chi? ¿Ndáaña va̱ʼa xíniñúʼu kuumiíyó na̱ kúú soldado ta̱ Cristo? Xíʼin ña̱ ni̱ka̱ʼa̱n ta̱ Pablo sákuaʼayó xa̱ʼa̱ u̱ʼu̱n ña̱ʼa ña̱ xíniñúʼu keʼéyó ña̱ va̱ʼa kundaayó ña̱ nda̱a̱. Ná kotoyó ndáaña kúú ña̱yóʼo.

10. ¿Ndáaña kúni̱ kachi ña̱ iinlá Ndióxi̱ ndasakáʼnuyó, ta nda̱chun ndáyáʼvi ña̱yóʼo?

¹⁰ Iinlá Ndióxi̱ ná ndasakáʼnuyó. Iin ta̱ va̱ʼaní kúú soldado nda̱kúní-inira. Chíka̱a̱níra ndee̱ ña̱ va̱ʼa sakǎkura iin na̱ kúʼvi̱ní-inira xínira á iin ña̱ʼa ña̱ ndáyáʼviní nu̱úra. Ta̱ Pablo ni̱ka̱ʼa̱nra xíʼin ta̱ Timoteo ña̱ ná ndasakáʼnura iinlá Ndióxi̱, ña̱yóʼo kúni̱ kachiña ña̱ kuʼvi̱-inira kunira Ndióxi̱ ta nda̱kú koo inira xíʼinra (1 Tim. 4:7). Tá ná kuʼvi̱ka-iniyó kuniyó Ndióxi̱, va̱ása kuni̱yó sandákooyó ña̱ nda̱a̱ (1 Tim. 4:8-10; 6:6).

11. ¿Nda̱chun xíniñúʼu chika̱a̱níyó ndee̱?

¹¹ Ná chika̱a̱yó ndee̱ keʼéyó ña̱ va̱ʼa. Iin ta̱ kúú soldado xíniñúʼu chika̱a̱ra ndee̱ ña̱ saxínura chiñura. Ta saátu ta̱ Timoteo sa̱xínura chiñura ña̱ xi̱kuura soldado ta̱ Cristo, saáchi xi̱ndiku̱nra consejo ña̱ ta̱xi ta̱ Pablo ndaʼa̱ra ña̱ kǒo keʼéra ña̱ va̱ása va̱ʼa, ña̱ kuumiíra ña̱ va̱ʼa ña̱ xíniñúʼu kuumií na̱ ndíku̱n ta̱ Cristo ta saátu ña̱ kutáʼanra xíʼin na̱ hermano (2 Tim. 2:22). Xi̱niñúʼu chika̱a̱níra ndee̱ ña̱ va̱ʼa keʼéra ña̱yóʼo. Ta saátu miíyó xíniñúʼu chika̱a̱yó ndee̱ ña̱ kǒo keʼéyó ña̱ va̱ása va̱ʼa (Rom. 7:21-25). Ta xíniñúʼu chika̱a̱yó ndee̱ ña̱ nasamayó ña̱ xi̱keʼéyó tasaá keʼéyó ña̱ kúni̱ Ndióxi̱ (Efes. 4:22, 24). Ta, tá íyo iin ki̱vi̱ ña̱ ku̱naáníyó sana saá kúú ña̱ xíniñúʼu chika̱a̱níkayó ndee̱ ña̱ ku̱ʼu̱nyó reunión (Heb. 10:24, 25).

12. ¿Ndáaña chindeétáʼan xíʼinyó ña̱ va̱ʼaníka sanáʼa̱yó xa̱ʼa̱ Biblia?

¹² Tá kúni̱ iin ta̱ soldado vií kuniñúʼura ña̱ʼa ña̱ xíniñúʼuna tá kánitáʼanna, ndiʼi ki̱vi̱ xíniñúʼu sakuaʼara kuniñúʼuraña. Saátu xíniñúʼu keʼé miíyó na̱ cristiano, xíniñúʼu kuxini̱yó kuniñúʼuyó tu̱ʼun Ndióxi̱ (2 Tim. 2:15). Reunión kúú ña̱ chíndeétáʼan xíʼinyó ña̱ sakuaʼayó ndáa ki̱ʼva keʼéyó ña̱yóʼo. Soo tá kúni̱yó ña̱ ná kandíxa na̱ yiví ña̱ ndáyáʼviní ña̱ nda̱a̱ ña̱ va̱xi nu̱ú Biblia, xíniñúʼu taváyó tiempo ña̱ kaʼviyóña ndiʼi ki̱vi̱. Ná kaʼviyó tu̱ʼun Ndióxi̱ ña̱ va̱ʼa kandíxakayóra. Soo va̱ása xíniñúʼu kaʼvi kuitíyóña. Chi xíniñúʼu ndakanixi̱níyó xa̱ʼa̱ versículo ña̱ káʼviyó, ta nandukúyó xa̱ʼa̱ña nu̱ú tutu ña̱ tává na̱ ñuu Ndióxi̱ ña̱ va̱ʼa kunda̱a̱-iniyó xíʼinña ta kuchiñuyó ka̱ʼa̱nyó xa̱ʼa̱ña xíʼin inkana (1 Tim. 4:13-15). Tasaá koo tu̱ʼvayó ña̱ kuniñúʼuyó Biblia ña̱ sanáʼa̱yó inkana. Va̱ása kúni̱yó  kaʼvi kuitíyó iin texto nu̱úna. Chi ña̱ kúni̱yó kúú ña̱ chindeétáʼanyó xíʼinna ña̱ kunda̱a̱-inina xa̱ʼa̱ña, ta kotona ndáa ki̱ʼva chindeétáʼanña xíʼinna. Ña̱kán tá ná kaʼviyó Biblia ndiʼi ki̱vi̱ va̱ʼaníka sanáʼa̱yó na̱ yiví (2 Tim. 3:16, 17).

13. Nda̱a̱ táki̱ʼva káchi Hebreos 5:14, ¿nda̱chun xíniñúʼu ndakuniyó ndáaña kúú ña̱ va̱ʼa xíʼin ña̱ va̱ása va̱ʼa?

¹³ Ná ndakuniyó ndáaña kúú ña̱ va̱ʼa xíʼin ña̱ va̱ása va̱ʼa. Iin ta̱ kúú soldado xíniñúʼu ndakunira iin tu̱ndóʼo ta kuxíkara nu̱úña. Ta saátu miíyó, xíniñúʼu ndakuniyó ndáa ña̱ʼa kúú ña̱ kivi saxóʼvi̱ miíyó ta kuxíkayó nu̱úña (kaʼvi Hebreos 5:14; Prov. 22:3). * Tá kúú, xíniñúʼu vií ndaka̱xinyó ña̱ kotonde̱ʼéyó á kusíkíyó. Ku̱a̱ʼání ña̱ kána nu̱ú televisión á nu̱ú película kúúmiíña ña̱ kini. Miíyó na̱ cristiano va̱ása xítonde̱ʼéyó ña̱yóʼo saáchi loʼo tá loʼo kivi sandíʼi-xa̱ʼa̱ña ña̱ kúʼvi̱-iniyó xíniyó Jehová. Kúnda̱a̱-iniyó ña̱ kúndasí Ndióxi̱ xínira ña̱ kini, ta na̱ yiví na̱ kéʼé ña̱yóʼo sáxo̱ʼvi̱na miína ta saátu inkana (Efes. 5:5, 6).

14. ¿Ndáa ki̱ʼva nda̱kuni ta̱ Daniel ndáaña kúú ña̱ va̱ʼa xíʼin ña̱ va̱ása va̱ʼa?

¹⁴ Ta̱ Daniel ta̱ xa̱a̱ ni̱ka̱ʼa̱nyó xa̱ʼa̱ nu̱ú párrafo 8, ki̱ʼinra kuenta ña̱ va̱ása va̱ʼa kusíkíra videojuego nu̱ú kánitáʼanna á ña̱ kúúmií ña̱ʼa ña̱ kúú kuenta ta̱ Ndi̱va̱ʼa. Nu̱ú Watchtower Library na̱ndukúra ña̱ kivi chindeétáʼan xíʼinra ña̱ va̱ʼa sandákoora kusíkíra ña̱yóʼo. ¿Ndáaña va̱ʼa nda̱kiʼinra xa̱ʼa̱ ña̱yóʼo? Sa̱ndákoora ña̱ kusíkíra videojuego ña̱ va̱ása va̱ʼa, ta saátu sa̱ndákoora ña̱ kutáʼanra xíʼin na̱ sísikí táʼan ña̱yóʼo. Ta̱yóʼo káchira: “Nu̱úka ña̱ kusíkíi̱ videojuego, ki̱xáʼíi̱ kéʼíi̱ inkaka ña̱ʼa ta saátu ki̱xáʼíi̱ kítáʼi̱n xíʼin na̱ hermano na̱ íyo ti̱xin congregación”. Ta̱ Daniel vitin kúúra precursor ta saátu kúúra anciano.

15. ¿Nda̱chun xíniñúʼu kundaayó miíyó nu̱ú ña̱ vatá?

¹⁵ Nda̱a̱ táki̱ʼva ke̱ʼé ta̱ Timoteo, saátu miíyó xíniñúʼu kundaayó miíyó nu̱ú ña̱ vatá ña̱ káʼa̱n na̱ apóstata chi iin ña̱ i̱yoní kúú ña̱yóʼo (1 Tim. 4:1, 7; 2 Tim. 2:16). Tá kúú, kivi kixáʼana ka̱ʼa̱nna ña̱ vatá xa̱ʼa̱ na̱ hermano á kuni̱na ña̱ na̱ kaka-iniyó xa̱ʼa̱ na̱ ñuu Jehová. Ña̱ vatá yóʼo kivi sandíʼi-xa̱ʼa̱ña ña̱ kándíxayó Ndióxi̱. Ná va̱ása taxiyó ña̱ sandáʼvina miíyó, saáchi na̱ ta̱a na̱ káʼa̱n ña̱yóʼo va̱ása kúúmiína ña̱ nda̱a̱, chi ña̱ kúni̱na kúú ña̱ va̱ása kitáʼan viíyó ta natúʼun kúáchiyó (1 Tim. 6:4, 5). Ña̱ kúni̱ na̱yóʼo kúú ña̱ ná kandíxayó ña̱ vatá  ña̱ káʼa̱nna ta ná va̱ása kandíxayó na̱ hermanoyó.

16. ¿Ndáaña kúú ña̱ va̱ása xíniñúʼu kuni̱yó kuumiíyó?

¹⁶ Iinlá chiñu Ndióxi̱ ná kundi̱ʼi̱-iniyó xa̱ʼa̱. Ta̱ Timoteo, iinlá chiñu Ndióxi̱ xi̱ndi̱ʼi̱-inira xa̱ʼa̱ ta va̱ása níkuni̱ra kuumiíra ña̱ ku̱i̱ká á ña̱ kuni̱ra keʼéra inkaka ña̱ʼa (2 Tim. 2:3, 4). Nda̱a̱ táki̱ʼva ke̱ʼé ta̱yóʼo, ná va̱ása kuni̱yó kuumiíyó ña̱ ku̱i̱ká chi kivi sandákooyó ña̱ kundi̱ʼi̱-iniyó xa̱ʼa̱ chiñu Ndióxi̱. Ña̱ kuni̱yó kuumiíyó ña̱ ku̱i̱ká kivi sandíʼi-xa̱ʼa̱ña ña̱ kúʼvi̱-iniyó xíniyó Jehová, ta va̱ása kundayáʼvika tu̱ʼunra nu̱úyó ni va̱ása kuni̱kayó natúʼunyó xíʼin na̱ yiví xa̱ʼa̱ ña̱ káʼa̱nña (Mat. 13:22). Va̱ʼaka ná chika̱a̱yó ndee̱ ña̱ loʼo ña̱ʼa kuumiíyó, ta kuniñúʼuyó tiempoyó xíʼin ndee̱yó ña̱ ndakundeéyó kachíñuyó nu̱ú Ndióxi̱ (Mat. 6:22-25, 33).

17, 18. ¿Ndáaña kivi keʼéyó ña̱ va̱ʼa kundaayó ña̱ kítáʼanyó xíʼin Jehová?

¹⁷ Ná koo tu̱ʼvayó. Iin ta̱ kúú soldado xa̱a̱ ya̱chi̱ka xíniñúʼu ndakanixi̱níra ndáaña keʼéra nu̱ú iin tu̱ndóʼo. Saátu miíyó xíniñúʼu koo tu̱ʼvayó ña̱ va̱ʼa kundaayó ña̱ ta̱xi Jehová ndaʼa̱yó. ¿Ndáaña chindeétáʼan xíʼinyó ña̱ keʼéyó ña̱yóʼo? Xa̱a̱ ya̱chi̱ka ndakanixi̱níyó ndáaña keʼéyó tá ná ya̱ʼayó nu̱ú iin tu̱ndóʼo.

¹⁸ Tá kúú, tá iin na̱ yiví kúni̱na kaʼndana iin yitu̱n siʼna xíniñúʼu kotona ndáa míí kununa. ¿Nda̱chun? Saáchi tá ná nduva tú yitu̱n yóʼo xa̱a̱ kúnda̱a̱-inina ndáa míí kununa. Ki̱ʼva saá xíniñúʼu keʼé miíyó, xa̱a̱ ya̱chi̱ka ná ndakanixi̱níyó ndáaña keʼéyó tá xíniñúʼuyó Internet á tá xítonde̱ʼéyó iin película á televisión, ta kíxáʼa kána ña̱ vatá ña̱ káʼa̱n na̱ apóstata, na̱ kéʼé ña̱ kini á na̱ kánitáʼan. Tá xa̱a̱ íyo tu̱ʼvayó, kunda̱a̱-iniyó ndáaña keʼéyó ña̱ va̱ʼa kundaayó ña̱ kítáʼanyó xíʼin Jehová ta va̱ása kuumiíyó ña̱ yaku̱a̱ (Sal. 101:3; 1 Tim. 4:12).

19. ¿Ndáaña va̱ʼa ndakiʼinyó tá ná kundaayó ña̱ ndáyáʼviní ta̱xi Jehová ndaʼa̱yó?

¹⁹ Miíyó na̱ cristiano xíniñúʼu kundaayó ña̱ ndáyáʼviní ta̱xi Jehová ndaʼa̱yó: ña̱yóʼo kúú ña̱ nda̱a̱ ña̱ va̱xi nu̱ú tu̱ʼunra ta saátu ña̱ sánáʼa̱yó inkana. Tá ná keʼéyó ña̱yóʼo, va̱ʼaní koo ña̱ xínitúni̱yó, vií kutakuyó ta kusi̱í-iniyó tá ná chindeétáʼanyó xíʼin inkana ña̱ sakuaʼana xa̱ʼa̱ Jehová. Ta miíra kúú ta̱ kivi chindeétáʼan xíʼinyó ña̱ kundaayó ña̱ ta̱xira ndaʼa̱yó (1 Tim. 6:12, 19).