1, 2. Kemej kijtoua 1 Timoteo 6:20, ¿toni monekia kichiuas Timoteo?

KEMAN se taltikpaknenkej kipia se taman tein semi kipia ipatiuj, kemansa kimaka okse taltikpaknenkej maj kiyekpia. Kemej neskayot, xa kikauati itomin itech banco porin amo kineki kipolos nion kineki maj kiichtekilikan. Yejua ika tikajsikamatij toni kijtosneki se kimakas se taltikpaknenkej teisa tein tikpatiuitaj.

² (Xikonixtajtolti 1 Timoteo 6:20, TNM). Tatitanil Pablo kielnamiktij Timoteo ke kiselijka se taman tein semi kipia ipatiuj: Jiova kimatiltijka keniuj kiixtalijtok maj nemikan taltikpakneminij. Uan no kimakaka okse ueyi tatiochiualis: maj kiteixmatilti iTajtol (2 Tim. 4:2, 5). Pablo kiluij Timoteo ke monekia kiyekpias tein Dios kimaktilijka. Jiova no techmakani miak taman tein kipia ipatiuj. ¿Toni techmakani? ¿Uan keyej moneki tikyekpiaskej?

3, 4. Xikonijto seki taman tein kinextia ke tein tamachtia Biblia semi kipia ipatiuj.

³ Kemej Jiova semi kualtakat, techpaleuiani maj tikixmatikan tamachtilis tein melauak tein moajsi itech iTajtol, Biblia. Nejin tamachtilis semi kipia ipatiuj porin techpaleuia maj tikmatikan keniuj uelis kuali timouikaskej iuan Jiova uan keniuj uelis tiyolpakiskej. Keman tikneltokaj nejon tamachtilis uan tiktakamatij, amo tikneltokajok tamachtilis tein amo melauak uan tichipaujkanemij (1 Cor. 6:9-11).

⁴ Tamachtilis tein moajsi itech iTajtol Dios no semi kipia ipatiuj porin Jiova sayoj kinmatiltia akin yolyemankej uan akin  ‘kiyolnejnekij kiseliskej tein melauak’ (Hech. 13:48, TNM). Akin yolyemankej kikauaj maj kinmachti takeual takuaujtamach uan tamatkej (Mat. 11:25; 24:45). Amo ueli toselti tikajsikamatij tein tamachtia Biblia, uan se kiajsikamatis okachi kipia ipatiuj ke okseki taman (Prov. 3:13, 15).

5. ¿Toni no techmaka Jiova?

⁵ Jiova no techmaka ueyi tatiochiualis maj tikinpaleuikan oksekin maj kiixmatikan yejuatsin uan tein kiixtalijtok kichiuas (Mat. 24:14). Tein tikinmachtiaj semi kipia ipatiuj porin kinpaleuia maj moajsikan kemej ichankauan Jiova uan maj kichiakan nemiskej nochipaya (1 Tim. 4:16). Komo ueli titanojnotsaj miak tonalmej oso amo, titapaleuijtokej maj mochiua tekit tein okachi moneki itech nejin tonalmej (1 Tim. 2:3, 4). ¡Se ueyi tatiochiualis maj ueli titekitikan iuan Dios! (1 Cor. 3:9).

6. ¿Toni kinpanok seki itekitikauan Dios?

⁶ Itech itonaluan Timoteo, seki itekitikauan Dios amo kipatiuitakej ueyi tatiochiualis tein kipiayaj tekitiskej iuan Dios. Kemej neskayot, Demas okachi kipatiuitak tein onkak nikan taltikpak uan amo kinekikok tekitis iuan Pablo (2 Tim. 4:10). Nesi ke Figelo uan Hermógenes kimouilijkej maj no kintajyouiltianij kemej Pablo uan yejua ika amo kiteixmatiltijkejok iTajtol Dios (2 Tim. 1:15). Himeneo, Alejandro uan Fileto kikaujkej tamachtilis tein melauak uan kiixnamikkej (1 Tim. 1:19, 20; 2 Tim. 2:16-18). Nesi ke achto nejin takamej kitasojtayaj Jiova, sayoj ke amo kipatiuitakejok tein yejuatsin kinmakaka.

7. ¿Keniuj kitemoua techkajkayauas Satanás?

⁷ ¿Keniuj kitemoua Satanás maj tikpolokan tein Jiova techmakak? Maj tikitakan seki taman. Ika tein kipanoltiaj itech televisión, tein moita itech Internet uan amaixmej kitemoua maj tikpatakan kemej titanemiliaj uan tein tikchiuaj uan ijkon yolik tikaujtiaskej Jiova. No kitemoua maj timouikan uan maj amo titanojnotsakanok keman kichiua maj oksekin techiluikan miak taman oso maj techtajyouiltikan. Uan no, kitemoua techkajkayauas ika tein kiteixmatiltiaj akin kikaujkej uan kiixnamikij tamachtilis tein melauak (1 Tim. 6:20, 21).

8. ¿Toni techmachtia tein kipanok Daniel?

⁸ Komo amo timoyekpiaj, uelis yolik tikaujtiaskej tamachtilis tein melauak. Maj tikitakan tein kipanok Daniel, * akin semi kiuelitaya videojuegos. Yejua kijtoua: “Peuak nimauiltia videojuegos keman nikpiaya kemej majtakti xiuit. Yekinika, ika nimauiltiaya tein amo kipiaya tein amo kuali. Sayoj ke satepan peuak  nimauiltia videojuegos kampa se tamijmiktia uan se kitekitiltia naualot”. Satepan, mojmostaj mauiltiaya hasta quince horas. Daniel kijtoua: “Nikmatia ke nejon videojuegos uan horas tein nimauiltiaya kichiujtoyaj maj amo semi kuali nimouikaniok iuan Jiova. Sayoj ke niknemiliaya ke tein Biblia kijtoua amo nejua nechnamikia”. Nejin techmachtia ke tein ika timoixpetaniaj uelis kichiuas maj tikauakan tamachtilis tein melauak. Komo techpanoskia nejon, ueliskia tikpoloskej nochi tein kipia ipatiuj tein Jiova techmakak.

9. Kemej kijtoua 1 Timoteo 1:18, 19, ¿toni kijtoj Pablo ke kichiuaya Timoteo?

⁹ (Xikonixtajtolti 1 Timoteo 1:18, 19, TNM). Pablo kijtoj ke Timoteo katka kemej se tateuijkej uan kinauatij maj kisentokani tateuiani itech neteuilis. Sayoj ke Pablo amo ika tajtojtoya se yekmelauj neteuilis. ¿Keyej moijtoua ke tiitekitikauan Dios kemej yeskia titateuianij? ¿Toni kualneskayomej moneki tikpiaskej tiitateuijkauan Cristo? Tein Pablo ika tajtoj techmachtia makuil taman tein moneki tikchiuaskej tein techpaleuis maj amo tikauakan tein melauak. Maj tikitakan katiyejua nejin makuil taman.

10. ¿Keyej moneki semi tiktasojtaskej Dios?

¹⁰ Maj tiktasojtakan Dios. Se kuali tateuijkej amo tekaua. Tateuia ika nochi ichikaualis keman kineki kipaleuis se akin kitasojta oso teisa tein kipatiuita. Pablo kiyolchikauak Timoteo maj semi kitasojtani Dios uan maj amo kikauani (1 Tim. 4:7). Komo semi tiktasojtaj Dios, amo tiknekiskej tikauaskej tein melauak (1 Tim. 4:8-10; 6:6).

11. ¿Keyej moneki timochikauaskej tikchiuaskej tein kuali?

¹¹ Maj timochikauakan tikchiuaskej tein kuali. Se tateuijkej moneki mochikauas nochipa kichiuas tein kipaleuis keman monekis tateuis. Kemej itateuijkauj Cristo, Timoteo uelik kiixnamikik Satanás porin kichiuak tein Pablo kiyolmajxitij uan mochikauak amo kipias amo kuali tanejnekilis, kinextis ikualneskayouan Cristo uan kitemoj yetos iniuan tokniuan (2 Tim. 2:22). Uelik kichiuak nejon porin mochikauak. Uan tejuan no moneki timochikauaskej komo tiknekij timoajchiuiliskej amo kuali tanejnekilis (Rom. 7:21-25). Uan no moneki timochikauaskej komo tiknekij tiksentokaskej timopataskej uan tiknextiskej kualtsitsin kualneskayomej (Efes. 4:22, 24). Uan keman semi tisioujtokej satepan ke titekitikej nochi tonal, xa monekis timochikauaskej tiaskej nechikol (Heb. 10:24, 25).

12. ¿Toni techpaleuis maj okachi kuali titamachtikan ika Biblia?

¹² Komo se tateuijkej kineki kuali kitekitiltis tein ika tateuia, moneki nochipa momamachtis. No ijkon, tiitekitikauan Dios moneki kuali tiktekitiltiskej iTajtol (2 Tim. 2:15). Nechikolmej techpaleuiaj maj tikmatikan seki taman kemej uelis tikchiuaskej. Sayoj ke komo tiknekij maj taltikpakneminij kineltokakan ke Biblia yekmelauj tepaleuia, moneki nochipa timomachtiskej. Moneki tikchikauaskej totakuaujtamatilis ika inepaleuil iTajtol Dios. Sayoj ke amo moneki sayoj tikixtajtoltiskej. Moneki itech titanemiliskej tajkuilolmej tein tikixtajtoltiaj uan tiktemoskej okachi tamachtilis itech toamaixuan porin nejin techpaleuis maj okachi tikajsikamatikan uan maj tikmatikan keniuj tikmelauaskej (1 Tim. 4:13-15). Ijkon tikmatiskej keniuj tikinmachtiskej oksekin. Nejin amo kijtosneki ke sayoj moneki tikinixtajtoltiliskej se tajkuilol. Tiknekij tikinpaleuiskej maj kiajsikamatikan uan maj kiitakan keniuj uelis kinpaleuis. Yejua ika, komo  nochipa timomachtiaj Biblia, okachi kuali titamachtiskej (2 Tim. 3:16, 17).

13. Kemej kijtoua Hebreos 5:14, ¿keyej moneki kuali titaixejekoskej?

¹³ Maj kuali titaixejekokan. Se tateuijkej moneki kimatis toni uelis panos itech neteuilis uan kichiuas tein kipaleuis maj amo teyi kipano. Tejuan no moneki tikitaskej toni uelis kichiuas maj timouejkatilikan iuan Jiova, uan tikchiuaskej tein techpaleuis maj amo techpano nejon (Prov. 22:3; xikonixtajtolti Hebreos 5:14). Kemej neskayot, moneki kuali tikixpejpenaskej tein ika timoixpetaniaj. Miakpa, tein kipanoltiaj itech televisión uan tein moita itech películas kipia auilnemilis. Tiitekitikauan Dios amo ika timoixpetaniaj porin yolik uelis kichiujtias maj amo tiktasojtakanok Jiova. Tikmatij ke Dios kitauelita auilnemilis uan ke akin auilnemij motajyouiltiaj uan kintajyouiltiaj oksekin (Efes. 5:5, 6).

14. ¿Keniuj kipaleuij Daniel keman kuali taixejekoj?

¹⁴ Daniel, akin ika titajtojkej itech párrafo 8, kiajsikamatik ke amo kuali yetoya maj mauiltiani ika videojuegos kampa se tamijmiktia uan se kitekitiltia naualot. Kitemoj tamachtilis itech Watchtower Library tein kipaleuiskia maj amo mauiltianiok. ¿Keniuj kipaleuij? Kikauak videojuegos tein kipiayaj tein amo kuali uan amo iniuanok mouikak akin no mauiltiayaj. Daniel kijtoua: “Amo nimauiltiayaok ika videojuegos, okachi kuali peuak nikchiua okseki taman kalampa oso iniuan nimosentiliaya tokniuan”. Axkan Daniel precursor uan tayekankej.

15. ¿Keyej tamouilil tein kiteixmatiltiaj akin kikaujkej uan kiixnamikij tamachtilis tein melauak?

¹⁵ Kemej Timoteo, tejuan no moneki tikajsikamatiskej ke tamouilil tein kiteixmatiltiaj akin kikaujkej uan kiixnamikij tamachtilis tein melauak (1 Tim. 4:1, 7; 2 Tim. 2:16). Kemej neskayot, xa kintakajkayauiliskej tokniuan oso kitemoskej maj amo titakuaujtamatikanok iuan inechikol Jiova. Inintakajkayaualis uelis kichiuas maj amo semi titakuaujtamatikanok. Maj amo tikneltokakan, porin kiteixmatiltiaj “taka takajkayauani” akin “nintanemililis kuekueptok san” uan sayoj kinekij maj timotajtolteuikan (1 Tim. 6:4, 5). Yejuan kinekij maj tikneltokakan tein kijtouaj uan maj amo titakuaujtamatikanok iniuan tokniuan.

16. ¿Toni moneki amo techtapololtis?

¹⁶ Maj amo tikauakan maj nion teyi techtapololti.  Kemej se kuali itateuijkauj Cristo, Timoteo monekia kitayekanaltis tanojnotsalis uan amo kikauas maj kitapololtiani tomin nion kiixtalis kichiuas okseki taman (2 Tim. 2:3, 4). Ijkon kemej Timoteo, maj amo tiknejnekikan tikpiaskej okachi taman porin nejon uelis techtapololtis. “In ricojyot” uelis kichiuas maj amo tiktasojtakanok Jiova, maj amo tiktasojkamatikanok iTajtol nion maj tiknekikanok tikinmatiltiskej oksekin tein tamachtia (Mat. 13:22). Maj amo tiktemokan tikpiaskej miak taman uan maj ika totiempo uan tochikaualis tiksentokakan tiktayekanaltikan iTekiuajyo Dios (Mat. 6:22-25, 33).

17, 18. ¿Toni uelis tikchiuaskej tein techpaleuis maj amo tikpolokan tein Jiova techmakatok?

¹⁷ Maj achto tiknemilikan toni tikchiuaskej. Se tateuijkej moneki achto kinemilis toni kichiuas komo teisa panoua. Komo tiknekij tikyekpiaskej tein Jiova techmakatok, moneki niman tikixtopeuaskej tein uelis kichiuas maj tikpolokan. ¿Toni techpaleuis maj ijkon tikchiuakan? Maj achto tiknemilikan toni tikchiuaskej komo teisa panoua.

¹⁸ Kemej neskayot, keman se takat kineki kimayouis se ueyi kouit, achto kiita kanikauin uetsis. ¿Keyej? Porin ijkon kimatis kanikauin ijsiujka tsikuinteuas. No ijkon, maj achto tikitakan kanikauin titsikuinteuaskej oso toni tikchiuaskej komo keman tikitstokej se película, se taman itech televisión oso keman tikuitokej Internet, moita auilnemilis, tateuilis oso tein kiteixmatiltiaj akin kikaujkej uan kiixnamikij tamachtilis tein melauak. Komo tiknemilijkejya toni tikchiuaskej, niman tikixtopeuaskej porin tiknekij tiksentokaskej kuali timouikaskej iuan Jiova uan tichipaujkanemiskej (Sal. 101:3; 1 Tim. 4:12).

19. ¿Toni tatiochiualismej tikpiaskej komo tikyekpiaj tein Jiova techmakatok?

¹⁹ Tiitekitikauan Jiova moneki tikyekpiaskej tein techmakatok tein semi kipia ipatiuj. Nejin yejua tamachtilis tein melauak uan tatiochiualis tein tikpiaj tikinmachtiskej oksekin. Komo tikyekpiaj, amo techkuejmolos totanemilil, tiyolpakiskej uan kuali timomachiliskej porin tikinpaleuiaj oksekin maj kiixmatikan Jiova. Ika inepaleuil yejuatsin, uelis tikyekpiaskej tein techmakak (1 Tim. 6:12, 19).