1, 2. Ijkon ken kijtoua 1 Timoteo 6:20, ¿tlen omonekiaya kichiuas Timoteo?

IJKUAK ikaj kipia itlaj tlen miak ipati, kitemaka para ma kimaluilikan. Tla kipia miak tomin, kikauati itech banco para amo ma kichtekilikan. Ken tikitaj ijkuak tikpiaj itlaj tlen miak ipati, tiknekij kuali ma kimaluikan.

² (Xiktlajtolti 1 Timoteo 6:20). Tlatitlanil Pablo okilnamikti Timoteo okiseli itlaj miak ipati: okimatiaya tlen kineki kichiuas toTajtsin Dios para nochtin kuali yetokan. Jehová noijki okikauili Timoteo ma ‘tetlapowi n kualitlájtoli’ (2 Tim. 4:2, 5). Pablo okilui Timoteo omonekiaya kuali kichiuas tlen okinauati. Jehová noijki yotechilui tlen tejuan moneki tikchiuaskej. ¿Tlen moneki tikchiuaskej uan tleka moneki tikpatioitaskej?

3, 4. ¿Tleka miak ipati tlen kijtoua iTlajtol toTajtsin Dios?

³ Ika iTlajtol Jehová yotechmatilti tlen kineki ma tikmatikan. Tlen kijtoua iTlajtol miak ipati porque techpaleuia iuan ma timouikakan uan ma tiyolpakikan. Ijkuak tikkauiliaj Jehová ma techmachti uan tiktlakamatij, ayakmo tikneltokaj tlen amo melauak nion tiauilnemij (1 Cor. 6:9-11).

⁴ Tlen kijtoua iTlajtol toTajtsin Dios miak ipati porque san kinmatiltia akinmej yolyamankej uan akinmej kinekij kiseliskej (Hech. 13:48). ToTajtsin Dios kiyekana “tlakeuali yolmelajki uan ixtlamatki” uan akinmej yolyamankej kiseliaj ma kinmachti tlen kijtoua Biblia (Mat. 11:25; 24: 45). San toselti amo uelis tikmatiskiaj tlen ompa kijtoua. Okachi miak ipati ijkuak tikajsikamatij (Prov. 3:13, 15).

5. ¿Tlen yotechilui Jehová ma tikchiuakan?

⁵ Jehová noijki yotechilui ma tiktematiltikan akin ye uan tlen kichiuas (Mat. 24:14). Tlen tiktematiltiaj miak ipati porque ijkon miakej uelis pouiskej itech ialtepe Jehová uan noijki uelis yoltoskej nochipa (1 Tim. 4:16). Maski miak horas titetlapouiaj noso amo, titlapaleuijtokej ma mochiua se tekitl tlen miak ipati (1 Tim. 2:3, 4). ¡Se ueyi tlateochiualistli tikpaleuiskej toTajtsin Dios! (1 Cor. 3:9).

6. ¿Tlen okinpanok sekimej tlen okichiuayaj ken Cristo?

⁶ Ijkuak okatka Timoteo sekimej amo okipatioitakej kitekichiuiliskej toTajtsin Dios. Demas ijkon okichi porque “okiyoltilanki tlan onka itech nin tlaltíkpaktli” uan ayakmo otetlapouito iuan Pablo (2 Tim. 4:10). Figelo uan Hermógenes noijki ayakmo otetlapouijkej porque xamo amo okinekiayaj tlajyouiskej ijkon ken Pablo (2 Tim. 1:15). Himeneo, Alejandro uan Fileto ayakmo okichijkej ken Cristo (1 Tim. 1:19, 20; 2 Tim. 2:16-18). Yejuan okitlasojtlayaj Jehová pero satepan ayakmo ijkon okichijkej.

7. ¿Ken kineki techkajkayauas Satanás?

⁷ ¿Tlen kichiua Satanás para ayakmo ma tikpatioitakan tlen Jehová techmatiltia? Satanás kitekitiltia tlen ika moyolpaktiaj sekimej. Noijki kitekitiltia tlen kipanoltiaj itech televisión, películas, Internet uan okseki tlamantli. Noijki kichiua oksekimej ma techkualankaitakan para ma timomojtikan uan ijkon ayakmo ma titetlapouikan. Noijki kintekitiltia akinmej ayakmo kitekichiuiliaj Jehová uan kixnamikij. Kintekitiltia para ma tikneltokakan tlen yejuan tlamachtiaj uan ma tikkauakan Jehová (1 Tim. 6:20, 21).

8. ¿Tlen techmachtia tlen okipanok Daniel?

⁸ Tla amo timomaluiaj ayakmo tikpatioitaskej tlen Jehová techmachtia. Ma tikitakan tlen okipanok Daniel, * ye sapanoua okipaktiaya mauiltis ika videojuegos. Ye okijto: “Ijkuak onikpiaya majtlaktli xiuitl opejki nimauiltia videojuegos. Achto amo onimauiltiaya ika tlen amo kuali. Pero satepan opejki nimauiltia ika  videojuegos kanin omoteuiayaj uan tlen okipiayaj naualotl”. Ualeua omauiltiaya hasta 15 horas. Ye okijto: “Ne onikmatiaya nonmej videojuegos okichijtokaj ayakmo kuali ma nimouika iuan Jehová. Ayakmo onikitaya onitlajtlakolchijtoka uan onimokuayejyeko amo omonekiaya nikchiuas tlen kijtoua Biblia”. Nin techmachtia tla amo timomaluiskej, san niman tikilkauaskej tlen toTajtsin Dios techmachtia.

9. Ijkon ken kijtoua 1 Timoteo 1:18, 19, ¿ken akin okijto Pablo okatka Timoteo?

⁹ (Xiktlajtolti 1 Timoteo 1:18, 19). Pablo okilui Timoteo okatka ken se soldado. Noijki okilui ma ‘kitlanili tlan amokualiʼ. Non amo kijtosneki kanaj yaskia moteuiti, omonekiaya tlatlanis ika ‘itlaneltokalis’. ¿Tleka akinmej tikchiuaj ken Cristo tiyetoskiaj ken soldados tlen moteuijtokej? ¿Ken moneki tikpiaskej toyelis akinmej tikchiuaj ken Cristo? Tlen okijto Pablo techmachtia makuili tlamantli tlen moneki tikchiuaskej para amo tikkauaskej Jehová.

10. ¿Tleka san toTajtsin Dios moneki tiktekichiuiliskej?

¹⁰ San toTajtsin Dios ma tiktekichiuilikan. Se soldado kichiua tlen moneki. Nochipa mochijchikaua kimaluis tlen kipia noso akin kitlasojtla. Pablo okilui Timoteo ma kitekichiuili toTajtsin Dios. Ijkon kichiuaskia tla nochipa kitlasojtlaskia uan amo keman kikauaskia (1 Tim. 4:7). Ijkuak okachi tiktlasojtlaskej Jehová, amo tiknekiskej tikkauaskej (1 Tim. 4:8-10; 6:6).

11. ¿Tleka moneki tikchiuaskej tlen moneki?

¹¹ Ma tikchiuakan tlen moneki. Se soldado moneki nochipa moyektlalijtos tla kineki tlaxikos ijkuak moteuiti. Timoteo nochipa omochijchika kichiuas tlen okilui Pablo. Timoteo amo okichi tlen amo kuali, kuali okipiaya iyelis uan omouikaya iuan tokniuan (2 Tim. 2:22). Pero omonekiaya mochijchikajtos uan tejuan noijki moneki timochijchikajtoskej para amo tikchiuaskej tlen amo kuali (Rom. 7:21-25). Noijki moneki timoyolpatlaskej uan ijkon tikpiaskej kuali tonemilis (Efes. 4:22, 24). Xamo ualeua tisotlauaj pero moneki timochijchikauaskej timonechikoskej iuan tokniuan (Heb. 10:24, 25).

12. ¿Tlen techpaleuis okachi kuali ma titlamachtikan?

¹² Tla se soldado kineki kuali kitekitiltis tlen ika tlateuis, moneki moyektlalijtos. Tejuan noijki moneki kuali tiktekitiltiskej iTlajtol toTajtsin Dios (2 Tim. 2:15). Ijkuak timonechikouaj timomachtiaj ken tiktekitiltiskej Biblia. Pero tejuan moneki achto timomachtiskej Biblia tla tiknekij oksekimej ma kineltokakan kinpaleuis tlen ompa kijtoua. Tla tiknekij okachi titlaneltokaskej, moneki timomachtiskej Biblia. Pero amo san moneki tiktlajtoltiskej. Moneki timokuayejyekoskej tlen kijtoua uan timomachtiskej amatlajkuilolmej para kuali tikajsikamatiskej uan tikyekijtoskej (1 Tim. 4:13-15). Ijkon tikmatiskej ken tikinmachtiskej oksekimej ika Biblia. Pero amo san moneki tikinmititiskej se texto. Ma tikinpaleuikan ma kajsikamatikan uan ma kimatikan ken kinpaleuis itech innemilis. Ken tikitaj,  okachi kuali titlamachtiskej tla nochipa timomachtiaj Biblia (2 Tim. 3:16, 17).

13. Ijkon ken kijtoua Hebreos 5:14, ¿tlen techpaleuis ‘matikyejyekolikah tlan kuali iwa tlan amokuali’?

¹³ ‘Matiyejyekolikah tlan kuali iwa tlan amokuali’. Se soldado moneki kimatis tlen kiouijtilis uan tlen kichiuas para amitlaj ma kipano. Tejuan noijki tikitaskej tlen uelis techouijtilis uan tlen techpaleuis amo ma tikchiuakan tlen amo kuali (Prov. 22:3; xiktlajtolti Hebreos 5:14). Ijkon tikchiuaskej tla kuali tikpejpenaj tlen ika timoyolpaktiaj porque ualeua itech películas motaj auilnemij. Pero tejuan amo tikitaj porque non uelis kichiuas ayakmo ma tiktlasojtlakan Jehová. Tikmatij ye amo kipaktia ikaj ma auilnemi uan akin ijkon kichiua tlajyouia uan noijki oksekimej kintlajyouiltia (Efes. 5:5, 6).

14. ¿Tlen okipaleui Daniel ma kita tlen amo kuali okichijtoka?

¹⁴ Tokni Daniel tlen achto itech yotimotlapouijkej, okajsikamatki amo kuali videojuegos tlen okinmitaya porque omotaya kanin omoteuiayaj uan okipiayaj naualotl. Okitemo itech Watchtower Library tlen uelis kipaleuiskia ayakmo ma kinmita nonmej videojuegos. ¿Tlen okichi? Ayakmo okinmitak videojuegos tlen amo kuali, ayakmo okinkixti itech Internet uan ayakmo omauilti iuan oksekimej. Tokni okijto: “Axkan nechpaktia nikchiuas okseki tlamantli uan niyetos iuan tokniuan”. Axkan ye tlapaleuia ken precursor uan tlayekanki.

15. ¿Tleka amo kuali ma tikinneltokilikan akinmej ayakmo kinekij kitekichiuiliskej Jehová?

¹⁵ Ijkon ken Timoteo moneki tikajsikamatiskej amo kuali tlen kijtouaj akinmej ayakmo kinekij kitekichiuiliskej Jehová (1 Tim. 4:1, 7; 2 Tim. 2:16). Xamo kijtoskej itlaj tlen amo melauak okichijkej tokniuan noso xamo kinekiskej amo ma tikneltokakan tlen techiluia ialtepe Jehová. Tla tikinkauiliskej ma techkajkayauakan, kichiuaskej ayakmo ma titlaneltokakan itech Jehová. Ik non, amo ma tikneltokakan tlen kijtouaj porque uits itech akinmej “amo kuali  intlalnamikilis” uan kinekij techtlapololtiskej (1 Tim. 6:4, 5). Yejuan kinekij ayakmo ma tikinneltokilikan tokniuan uan kinekij yejuan ma tikinneltokilikan.

16. ¿Tlen amo moneki tikchiuaskej?

¹⁶ Amo ma tikchiuakan okseki tlamantli. Timoteo okatka “kuali soldado de Cristo Jesús”, ik non, omonekiaya kitekichiuilijtos toTajtsin Dios uan amo kimotemolis okseki tlamantli (2 Tim. 2:3, 4). Ma tikchiuakan ijkon ken Timoteo uan amo ma tiktemokan tomin uan okseki tlamantli. Tla ‘tomi pewas techixkajkayawas’, ayakmo tiktlasojtlaskej Jehová, ayakmo tikpatioitaskej iTlajtol nion titetlapouiskej (Mat. 13:22). Ma tiyolpakikan san ika tlen tikpiaj uan nochipa ‘achto matikchiwakah tlan Dios technawatia’ (Mat. 6:22-25, 33).

17, 18. ¿Tlen techpaleuis ok ma timouikakan iuan Jehová?

¹⁷ Ma timoyektlalikan para san niman tikchiuaskej tlen moneki. Soldado moneki mokuayejyekos ken mopaleuis. Tejuan noijki para amo tikpoloskej tlen Jehová techmakatok, moneki san niman tikitaskej tlen uelis techijtlakos. ¿Tlen techpaleuis ma timomaluikan? Moneki timokuayejyekoskej tlen tikchiuaskej ijkuak itlaj tikixnamikiskej.

¹⁸ Ma tikijtokan ikaj kineki kitekis se ueyi kuauitl pero achto kita ik kanin yas san niman. ¿Tleka? Porque ijkuak uetsiti kuauitl, yikimatos ik kanin yas. Noijki ijkon moneki tikitaskej tlen tikchiuaskej tla ijkuak tiktekitiltiaj Internet noso tikitaj se película, ualmonextia kanin auilnemij noso kanin momiktiaj. Tla timoyektlaliaj, tikmatiskej tlen tikchiuaskej uan ok timouikaskej iuan Jehová uan amo tikyolkokoskej (Sal. 101:3; 1 Tim. 4:12).

19. ¿Ken techteochiuas Jehová tla tikpatioitaj tlen techmaka?

¹⁹ Akinmej tiktekichiuiliaj Jehová moneki tikilnamiktoskej miak ipati tlen ye techmachtia uan non kajki itech iTlajtol, Biblia uan techkauilia oksekimej ma tikinmachtikan. Tla ijkon tikchiuaj, kuali tikpiaskej totlalnamikilis, kuali timomachiliskej uan tiyolpakiskej porque tikinpaleuiskej oksekimej ma kixmatikan Jehová. Ye techpaleuis ma tikpatioitakan tlen techmaka (1 Tim. 6:12, 19).