1-2. Mukuzwirana 1 Timoti 6:20, Timoti wakapuwenyi?

KAZINJI itusu tinovigisa zviro zvedu zvinosisira maningi no vandhu vamweni. Inga muezaniso, tingavigisa mare yedu ku bhanko. Patinoita kudaro, tinoimira kuti mare yedu inova yakangwaririka ushoni zve aizovori kana kubiwa. Ngokudaro, tinozwisisa kuti zvinoda kurevenyi kuthemba mundhu ngo kumupa ciro cinosisira maningi.

² Verenganyi 1 Timoti 6:20. Mupostori Pauro wakaceuja Timoti kuti iyena wainga wakaashira ciro cinosisira maningi, uzivi hwo zvokadi ngo pamusoro po zviro zvinozoita Mwari kuitira vandhu. Jehovha wainga wakapazve Timoti, cidakajiso co ‘kutokotesa izwi’ no ‘kuita basa ro kujijisa vhangeri.’ (2 Timoti 4:2, 5) Pauro wakangwaja Timoti kuti angwarire zviro zvaaingari akapuwa. Inga ndi Timoti, itusu takapuwa zviro zvinosisira maningi. Ngozvapi zviro zvondhozvo? Waro, tingangwaririsa kudini zviro zvinosisira zvotakapuwari ndi Jehovha?

3-4. Ngozvapi zvokadi zvimweni zvo Bhaibheri zvinosisira maningi?

³ Jehovha ngo unyasha hwese wakatipa zivo inosisira inowanika mu Soko rake, Bhaibheri. Zvokadi zvo Bhaibheri zvinosisira ngokuti izvona zvinotijijisa kuti tingaviisa kudini no ushamwari hwaushoni na Jehovha no kutisanangurira manera atingawana mudakaro wokadi-kadi. Patinotendera zvokadi izvi no kupona mukuzwirana nazvo, atizocengejwi ngo majijisiro o kunyepa zve atizovi no mufambiro wakashata.—1 VaKorinto 6:9-11.

⁴ Ciro cimweni cinovonesa kuti zvokadi zviri mu Soko ra Mwari zvinosisira ngo zvokuti Jehovha anozvikhombija basi kuno vandhu vanojidodokesa vano ‘cido cakanaka.’ (Maitiro o Vapostori  13:48, Shanduro yeNyika Itsva) Vandhu ava, vanotendera kuti muranda wakagondeka no wakangwara ari kutijijisa ngo pamusoro po Bhaibheri nyamasi uno. (Mateu 11:25; 24:45) Aticaizokwanisa kujija zvokadi izvi tega zve apana ciro cimweni cinosisira maningi kupinda kuzwisisa zvokadi izvi.—Mazwi Akangwara 3:13, 15.

5. Jehovha wakatipa basa ro kuitenyi?

⁵ Jehovha wakatipa mukana wo kujijisa vamweni ngo pamusoro pake no zvidisiso zvake. (Mateu 24:14) Masoko atinojijisa ngo pamusoro pa Jehovha anosisira maningi. Ngokuti anobesera vandhu kuti vave divi ro mbhuri yake no kuvapa mukana wo kuzopona kwenda no kwenda. (1 Timoti 4:16) Patinonga tecibatikana mu mushando, tinonga tecibesera basa guru rinosisira maningi raizoitwa mazuva ano. (1 Timoti 2:3, 4) Zvokadi kamare, cidakajiso cikuru kushanda pamwepo na Mwari.—1 VaKorinto 3:9.

6. Zvicinyi zvakaitika no vamweni povakatama kungwarira?

⁶ Mu njiku ja Timoti, Makristu amweni aazivi kureremeja cidakajiso cavo co kushanda na Mwari. Zvecivoneka kuti Dhema waida maningi nyika ino, iyena wakasiya kushanda na Pauro. (2 Timoti 4:10) Zvinovonekazve inga kuti, Fijhero na Erimojhene vakasiya kucumaera ngokuti vaithya kuzoteverehwa inga zvaiitika na Pauro. (2 Timoti 1:15) Emineu, Areshandre na Fileto vakava vapanduki vosiya kunamata Jehovha. (1 Timoti 1:19, 20; 2 Timoti 2:16-18) Vandhu vese ava, vaivoneka inga kuti vanoda Jehovha, asi vakatanga kuva no murangariro wo kuti cokwadi acicaisisira.

7. Sathana anoshandisa murau japi kuti tiite zvaanoda?

⁷ Sathana anoejesa kudini kutiita kuti titame kungwarira upfumi hwatakapuwa ndi Jehovha? Vonanyi basi murau munganani jinoshandisa Sathana. Wokutanga, iyena anoshandisa mabungaijo pomwe no zvatinovona mu terevhizau, vhidhiyo, interneti, zvatinoverenga mu jhoronari, mabhuku no marevhista. Ecishandisa zviro izvi, iyena anokwanisa kucinja murangariro wedu no manera atinoita zviro kuti tisiye kushandira Jehovha no kuzwira mupango jake. Wocipiri, anoeja kushandisa vadoni vedu kuti vatiteverere zvoita kuti tisiye kucumaera masoko akanaka. Wocitatu, anoejazve kutiita kuti tigare tecipurukira “uzivi hwokunyepa” unoshandiswa ngo vapanduki, vecida kuti itusu tisiye cokwadi.—1 Timoti 6:20, 21.

8. Ngozvapi zvamajija kuvhira ku muezaniso wa hama Dhanyeri?

⁸ Kudari tikatama kungwarira, padoko ngo padoko tinozosiya cokwadi. Vonanyi muezaniso wa hama Dhanyeri, * vaidakarira maningi vhidheyo geme. Ivona vakati: “Ndakatanga  kutamba vhidheyo geme pondainga no gumi ro makore. Pakutanga ndaitamba vhidheyo geme jicizivi kushata. Asi pakufamba ko nguva ndakatanga kutamba vhidheyo geme jaivonesa zvokutakana no zvo madhimoni.” Pakufamba ko nguva, hama Dhanyeri vakatanga kupeja nguva jinokwana kuita gumi na shanu pa njiku vecitamba geme. Ivona vakati: “Ndakanasa kujipopora pacangu, ndovona kuti mushovo wo magemi ondaitambaya no mukuvo wondaipeja, zvaindiita kuti ndigare ndhambo na Jehovha. Mwoyo wangu wakaguma pa kutindivara. Ndecirangarira kuti ndhungamiro jinowanika mu Bhaibheri ajishandi kwandiri.” Kudari tikatama kungwarira, mabungaijo anozotiita kuti titamezve kubatisisa cokwadi. Kudari zvikaitika, kangaije tinozoruza zviro zvinosisira maningi zvotakapuwa ndi Jehovha.

9. Mukuzwirana na 1 Timoti 1:18, 19, Pauro wakaezanisa Timoti naani?

⁹ Verenganyi 1 Timoti 1:18, 19. Pauro wakaezanisa Timoti no musoca zve wakamungwaja kuti ‘avangirire kurhwa uxoni.’ Pauro aacaibhuya ngo pamusoro po hondo inoitwa ngo masoca. Mu njira japi Makristu angaezaniswa no masoca ari kurhwa pa hondo? Ngojapi mugariro jatinodikana kuva najo inga masoca o Cikristu? Ngatende tivone zvijijo zvishanu zvatingawana kuvhira ku muezaniso wa Pauro. Zvijijo zvondhozvo, zvingatibesera kuti tibatisise cokwadi.

10. I cinyi kuda Mwari ngo mwoyo wese zve ngenyi kunosisira maningi?

¹⁰ Engejeranyi kuda kwenyu Mwari ngo mwoyo wese. Musoca wakanaka nga wiya wakagondeka. Anoita zvese kamare kuti avhikire mundhu waanoda kana zviro zvaanoreremeja maningi. Pauro wakavangisa Timoti kuti ade Mwari ngo mwoyo wese kana kuti ave wakagondeka kamare. (1 Timoti 4:7) Patinoengejera rudo hwatinahwo kuna Mwari, atizosii cokwadi.—1 Timoti 4:8-10; 6:6.

11. Ngenyi tinodikana kuvangisira?

¹¹ Ivanyi mundhu anovangisira. Musoca anodikana kuvangisira pacake kuti nguva jese ave wakanasiririka kuti arhwe hondo. Timoti wakakwanisa kuhwisana no mazano a Sathana ngokuti iyena wakatevera ngwajo jakafemehwa ja Pauro zve wakashanda ngo simba kuti akwanise kunyisa zvido zvakashata zve wosakurira mugariro jaushoni no kupeja nguva no hama no hambzaji jake jo Cikristu. (2 Timoti 2:22) Kuti aite izvo, waidikana kuvangisira. Tinodikana kuvangisira kuti tikwanise kuhwisana no zvido zvo kunyama. (VaRoma 7:21-25) Mukuengejera, tinodavo kuvangisira kuti tikwanise kucinja undhu hwokare tova no undhu hupsa. (VaEfeso 4:22, 24) Patinonga takaremba pa kupera ko njiku, kangaije tinodikana kuvangisira kuti tiende kumusongano.—Vaheberi 10:24, 25.

12. Ngojapi njira jingatibesera kuitisa nane mashandisire atinoita Bhaibheri?

¹² Musoca kuti anase kuziva ushoni nvuti jake anodikana kujishandisa nguva jese. Mukufananavo, tinodikana kuva vandhu vanonasa kushandisa Soko ra Mwari. (2 Timoti 2:15) Tingajijira kuita zvondhozvo mu musongano jedu. Asi kudari tecida kubesera vamweni vatende kuti zvokadi zvo Bhaibheri zvingavabesera, tinodikana kurijija nguva jese. Tinodikana kushandisa Soko ra Mwari, kuti tivangise rutendo hwedu. Izvi zvinobatanija zvizinji kusiyapo kuverenga Bhaibheri basi. Ngokuti zvinoda kuti itusu tirangarijisise zvotaperaya kuverenga no kupsakisisa mu mabhuku edu kuti tinase kuzwisisa no kushandisa Matahwa. (1 Timoti 4:13-15) Perapo, tinozokwanisa kushandisa Soko ra Mwari kuti tijijise vamweni. Tinophindazve, izvi zvinobatanija zvizinji kusiyapo kuvaverengera vhesi yo Bhaibheri basi. Itusu tinoda kuti vandhu vanongaya vacitipurukira  vazwisise vhesi no kuziva mashandisire ovangaiita. Ngokudaro, patinojija Bhaibheri nguva jese, tinozokwanisa kuva vajijisi vaushoni vo Bhaibheri.—2 Timoti 3:16, 17.

13. Mukuzwirana na Vaheberi 5:14, ngenyi tinodikana kuva vandhu vanorangarijisisa?

¹³ Ivanyi mundhu anorangarijisisa. Musoca anodikana kukwanisa kuvona kuti kuri kuviya ngozi no kukwanisa kuitiza. Itusu tinodikanavo kukwanisa kuvona mugariro jingatibarira ngozi no kukwanisa kujitiza. (Mazwi Akangwara 22:3; verenganyi Vaheberi 5:14.) Inga muezaniso, tinodikana kusana mabungaijo edu ngo ungwaru. Mafirimi mazinji no urongwa hwo mu terevhizau unokhombija mufambiro ucizivi kucena. Mufambiro jondhojo kazinji jinonyangajisa Mwari zve zvinonesa kamare kunanga kuti ajizotikhuvazi. Tinotiza mabungaijo ondhoo, ngokuti padoko ngo padoko anorembesa rudo hwedu kuna Mwari. Tinoziva kuti Jehovha anonyenya mufambiro wondhowo zve vandhu vanoita zvondhozvo vanojikhuvaza zve vanokhuvazavo vamweni.—VaEfeso 5:5, 6.

14. Kurangarijisisa kwakabeseresa kudini hama Dhanyeri?

¹⁴ Hama Dhanyeri vanangwaya pakutanga, vakatanga kurangarijisisa kuti kutamba magemi aivonesa zvokutakana no zvo madhimoni, cainga cineso. Ivona vakapsakisisa mu Watchtower Library masoko aizovabesera kuhwisana no cineso cavo. Ngowapi wakava muviyo wakona? Ivona vakasiya kutamba magemi akashata. Vakaimavo kushamwarijana no vandhu vavaitamba navo gemi. Hama Dhanyeri vakati: “Kusiyapo kuima basi kutamba gemi, ndakatanga kupeja nguva ndeciita zviro zvimweni no kushamwarijana no hama no hambzaji jo mu ungano.” Wari, ivona vari kushanda inga piyona zve mukuru.

15. Ngenyi masoko anodhandhaniswa ngo vapunduki akashata?

¹⁵ Inga ndi Timoti, tinodikana kuziva ngozi inovepo kuvha ku masoko anondhandhaniswa ngo vapanduki. (1 Timoti 4:1, 7; 2 Timoti 2:16) Inga muezaniso, kangaije ivona vangaeja kundhandhanisa masoko ngo pamusoro po hama jedu kana kutotiita kuti titange kukana-kana ngo pamusoro po sangano ra Jehovha. Masoko awo okunyepa, angarembesa rutendo hwedu. Atidikani kutendera kucengejwa ndiwona. Ngenyi? Ngokuti mushovo uwo wo manyepo uri kundhandhaniswa nga “vaya vakavora mwiha vacina bzokadi.” Cido cavo ngo co kutanga  ‘ndava no kupipana.’ (1 Timoti 6:4, 5) Ivona vanoda kuti titende manyepo avo no kutiita kuti titamezve kuthemba hama jedu.

16. Ngozvapi zviro zvingatiphingaija?

¹⁶ Mucatendera kuphingaijwa. “Inga soca rakanaka ra Kristu Jesu,” Timoti waidikana kubatikana pa basa rake ro kucumaera kusiyapo kupsaka zviro zvokunyama. (2 Timoti 2:3, 4) Inga ndi Timoti, atidikani kutendera kuphingaijwa ngo cido co kuda zviro zvizinji zvo kunyama. “Kucengejwa [ngo] upfumi,” kungaita kuti tiruze rudo hwedu kuna Jehovha, kungaitazve kuti titame kubongesera ngo Soko ra Mwari no kutiita kuti titame kuva no cido co kuda kucumaera vamweni. (Mateu 13:22) Tinodikana kupungura zvatinazvo mu upenyu no kushandisa nguva no simba redu kuti ‘tiambe kupsanga Umambo.’—Mateu 6:22-25, 33.

17-18. Zvicinyi zvatinodikana kuita kuti tijivirire ushamwari hwedu na Jehovha?

¹⁷ Ivanyi makanasiririka kuti mukwanise kuita ciri cese ngo kukasika. Musoca anodikana kuita urongwa wokuvona kuti anozoitisa kudini kuti akwanise kujijivirira pacake. Kudari tinoda kungwarira zviro zvotakapuwa ndi Jehovha, tinodikana kuita ciri cese ngo kukasika patinovona ngozi. Zvicinyi zvinozotibesera kuti tiite zvondhozvo? Itusu tinodikana kuita urongwa wo zvatinozodikana kuita patinovona ngozi.

¹⁸ Inga muezaniso, vandhu pavanoenda ku mutambo uri wese, kazinji vanotanga vavhunjisa kuti ngokwapi kuno musuvo wo kubuda ndiwona kudari pakabuda ngozi. Ngenyi vanoita zvondhozvo? Ngokuti pakazobuda ngozi ivona vanozoziva pokubuda ndipona ngo kukasika. Ngo njira yakafanana, tinodikana kutanga tajijira kuti “tinozobuda” ngokwapi, kudari tecishandisa interneti kana tecivona terevhizau pobuda zviro zvo uhure, zvokutakana, kana vandhu vakapanduka. Kudari tikanasirira kuitira zviro zvinozoitika, tingazoita ciri cese ngo kukasika kuti tijivirire ushamwari hwedu na Jehovha no kuva takacena mu mavonero ake.—Nduyo 101:3; 1 Timoti 4:12.

19. Makomborero api atinozova nao kudari tikangwarira zviro zvinosisira zvotakapuwa ndi Jehovha?

¹⁹ Tinodikana kungwarira zviro zvinosisira zvotakapuwa ndi Jehovha, cokwadi co Bhaibheri no cidakajiso co kucijijisa vamweni. Patinoita kudaro, tinozova no hana yakacena, upenyu unodakajisa no kuva no mudakaro wo kubesera vamweni kuti vazive Jehovha. Ngo besero ra Jehovha, tinozokwanisa kungwarira zvese zvotakapuwa ndiyena.—1 Timoti 6:12, 19.