1-2. Shi ikolelela kuTimoteus gwotango 6:20, Timoteus okwa li a pewa shike?

OLUNDJI ohatu inekelele yalwe yetu kwatele iinima yetu mbyoka yi na ongushu. Pashiholelwa, otashi vulika tu ka pungule iimaliwa yetu kombaanga. Ngele osho twa ningi, ohatu kala tu na einekelo kutya iimaliwa yetu otayi ka kala ya gamenwa, noitayi ka kana nenge yi yakwe po. Onkee ano, otu uvite ko kutya okwi inekelela omuntu e tu kwatele oshinima shontumba shoka twa tala ko shi na ongushu, otaku ti shike.

² Lesha 1 Timoteus 6:20. Omuyapostoli Paulus okwa li a dhimbulukitha Timoteus kutya ota ka pewa oshinima shi na ondilo, ano ontseyo yokutseya ehalo lyaKalunga li na ko nasha naantu. Jehova okwa li wo a pe Timoteus uuthembahenda ‘wokuuvitha’ ‘nowokulonga oshilonga shomuuvithi gwelaka etoye.’ (2 Tim. 4:2, 5) Paulus okwa li a ladhipike Timoteus a kwate nawa uuthembahenda mboka a li i inekelelwa. Ngaashi Timoteus, natse otwi inekelelwa iinima yi na ondilo. Iinima mbyoka oyinipo? Omolwashike tu na okudhiginina omaliko ngoka Jehova e tu pa?

3-4. Omolwomatompelo gamwe geni oshili yOmbiimbeli yi na ondilo?

³ Jehova okwe tu pa ontseyo. Oyini mbela? Oshili yi na ondilo ndjoka tayi adhika mOohapu dhe, Ombiimbeli. Oshili yOmbiimbeli oyi na ondilo, molwaashoka ohayi tu longo nkene tatu vulu okukala nekwatathano ewanawa naJehova, nohayi tu kwathele tu uve ko shoka hashi eta enyanyu lyashili monkalamwenyo. Uuna twa taamba ko oshili ndjoka noku yi tula miilonga, ohatu manguluka mo muupika womalongo giifundja neihumbato lya nyata. — 1 Kor. 6:9-11.

⁴ Etompelo limwe kutya omolwashike oshili ndjoka tayi adhika mOohapu dhaKalunga yi na ondilo, olyo kutya Jehova okwe yi tseyithila owala mboka aaifupipiki, ano ‘mboka ya halelela oku ka  mona omwenyo gwaaluhe.’ (Iil. 13:48, NW) Aantu mboka aaifupipiki ohaya taamba ko omukalo ngoka Jehova ta longitha kunena e tu longe oshili. (Mat. 11:25; 24:45) Itatu vulu okwiilonga oshili kutse yene, noitatu vulu oku yi yelekanitha nasha. — Omayel. 3:13, 15.

5. Oshike ishewe Jehova e tu inekelela?

⁵ Jehova okwe tu inekelela wo uuthembahenda wokulonga yalwe oshili kombinga ye noyomalalakano ge. (Mat. 24:14) Etumwalaka ndyoka hatu uvitha oli na ondilo molwaashoka ohali kwathele aantu ya ninge oshitopolwa shuukwanegumbo waJehova, noha li ya pe wo ompito ya ka mone omwenyo gwaaluhe. (1 Tim. 4:16) Kutya nduno ohatu kutha ombinga miilonga yokuuvitha shi thike peni, atuheni otatu ambidhidha iilonga ya simanenena mbyoka tayi longwa kunena. (1 Tim. 2:3, 4) Kashi shi tuu uuthembahenda uunene okukala aalongi pamwe naKalunga! — 1 Kor. 3:9.

6. Oshike sha li sha ningilwa yamwe mboka ya li inaaya dhiginina shoka pewa?

⁶ Pethimbo lyaTimoteus, Aakriste yamwe kaya li ya lenga uuthembahenda wokukala aalongi pamwe naKalunga. Molwaashoka Demas okwa li e hole uuyuni, okweetha po uuthembahenda we wokulonga pamwe naPaulus. (2 Tim. 4:10) Osha fa shi li ngeyi kutya Figelus naHermogenes oya li ye etha po iilonga yawo yokuuvitha, molwaashoka ya li ya tila omapataneko ngoka Paulus a li a taalele. (2 Tim. 1:15) Himeneus, Aleksander naFiletus, oya ningi aashunimonima, e taya thigi po oshili. (1 Tim. 1:19, 20; 2 Tim. 2:16-18) Aantu ayehe mboka pompito yimwe otashi vulika ya li ye na eitaalo lya kola, ihe oya li ya tameke okukala inaaya lenga we iinima yongushu mbyoka Jehova e ya pa.

7. Oomwigo dhini Satana ha longitha e tu yule?

⁷ Satana oha kambadhala ngiini e tu ningithe tu ekelehi omaliko ngoka Jehova e tu inekelela? Ndhindhilika oomwigo dhimwe ndhoka Satana ha longitha. Oha longitha omainyanyudho niikundaneki e tu ningithe tu kale hatu dhiladhila nokwiihumbata momukalo ngoka tagu vulu oku tu ningitha kaa tu kale we tu hole Jehova noku vulika kuye. Oha kambadhala oku tu ningitha tu kale twa tila ookuume ketu nenge tu kale twa tila okupatanekwa, opo tu ethe po okuuvitha. Oha kambadhala wo oku tu ningitha tu pulakene ‘kuunongo wuugoya’ waashunimonima, opo tu thige po oshili. — 1 Tim. 6:20, 21.

8. Oshike to ilongo koshimoniwa shomumwatate gwedhina Daniel?

⁸ Ngele inatu kotoka, mokweendela ko kwethimbo, otashi vulika tu thige po oshili. Natu ka tale koshimoniwa shaDaniel *, ngoka a li e hole okudhana uudhano wuuvidio. Okwa ti: “Onda tameke okudhana uudhano wuuvidio sho nda li ndi na omimvo omulongo lwaampono. Petameko, onda li owala handi dhana uudhano wuuvidio mboka tawu opalele. Ihe mokweendela  ko kwethimbo onda tameke okudhana uudhano wuuvidio mboka wa kwatela mo elongithonkondo nuumpulile.” Lwanima okwa tameke wo okukala ha dhana uudhano wuuvidio uule woowili 15 kehe esiku. Daniel ota ti: “Onda li ndi shi kutya oludhi lwuuvidio mboka nda li tandi dhana, nosho wo ethimbo ndyoka nda li tandi longitha oku wu dhana, olya li ta li hedhitha ndje kokule naJehova. Nonando ongawo, onda li ndi itaala kutya omakotampango gOmbiimbeli itaga longo kungame.” Ngele inatu kotoka, omainyanyudho otaga vulu oku tu ningitha kaatu kale we twa lenga oshili. Ngele shoka osha ningwa, otashi vulika tu kanithe iinima yondilo mbyoka Jehova e tu pa.

9. Shi ikolelela kuTimoteus gwotango 1:18, 19, Paulus okwa li a faathanitha Timoteus nashike?

⁹ Lesha 1 Timoteus 1:18, 19. Paulus okwa li a faathanitha Timoteus nomukwiita nokwa li e mu ladhipike ‘a kondje ekondjo lya mana mo.’ Ekondjo ndyoka kalya li ekondjo lyo lyenelyene, ihe olya li lyopambepo. Omomikalo dhini Aakriste ya fa aakwiita mboka haya kondjo miita. Omaukwatya geni tu na okukokeka tu li aakwiita yaKristus? Natu ka kundathaneni iiyilongomwa itano mbyoka tatu vulu okwiilonga kethaneko lyaPaulus. Iiyilongomwa mbyoka, otayi vulu oku tu kwathela tu dhiginine oshili.

10. Etilokalunga oshike, nomolwashike twe li pumbwa?

¹⁰ Kala wu na etilokalunga. Omukwiita omuwanawa, omudhiginini. Oha ningi ashihe shoka ta vulu a gamene ngoka e hole, nenge shoka a lenga. Paulus okwa li a ladhipike Timoteus a kale e na etilokalunga, ano a kale omudhiginini kuKalunga. (1 Tim. 4:7) Mpoka ngaa pu thike ohole yetu yokuhola Kalunga noku mu tila, opo ngaa tapu ka kala pu thike ehalo lyetu lyokudhiginina oshili. — 1 Tim. 4:8-10; 6:6.

11. Omolwashike twa pumbwa eipangelo?

¹¹ Kala wu na eipangelo. Omukwiita oku na aluhe okukala e na eipangelo ngele okwa hala okukala aluhe i ilongekidhila olugodhi. Timoteus okwa li a vulu okutsikila okukala e na uupambepo uuwanawa, molwaashono okwa li ha landula omayele gaPaulus ga nwethwa mo a yande omahalo ga puka, a kokeke omaukwatya gopakalunga nokukale he endathana nAakriste ooyakwawo. (2 Tim. 2:22) Shoka osha li tashi pula eipangelo. Otwa pumbwa eipangelo, opo tu vule okusinda uuhalu wetu wopantu. (Rom. 7:21-25) Shimwe ishewe, otwa pumbwa eipangelo opo tu tsikile okwiihula omuntu omukulu, e ta tu zala omuntu omupe. (Ef. 4:22, 24) Nonando omathimbo gamwe ohatu zimbuka kiilonga twa vulwa, otashi vulika tu kale twa pumbwa okuninga oonkambadhala tu ye kokugongala. — Heb. 10:24, 25.

12. Omomikalo dhini tatu vulu okuhwepopala mokulongitha Ombiimbeli?

¹² Omukwiita okwa pumbwa okukala hi idheula okulongitha omatati gawo. Opo a kale e shi oku yi longitha nawa, okwa pumbwa okukala hi idheula pandjigilile. Sha faathana, natse wo otwa pumbwa okukala tu shi nawa okulongitha Oohapu dhaKalunga. (2 Tim. 2:15) Otatu vulu okwiilonga nkene tatu vulu oku shi ninga, pokugongala kwetu. Ihe ngele otwa hala okukwathela yalwe yi itaale wo kutya oshili yOmbiimbeli otayi vulu oku ya kwathela, otwa pumbwa okukala hatu konakona Ombiimbeli paumwene pandjigilile. Otwa pumbwa okulongitha Oohapu dhaKalunga tu koleke eitaalo lyetu. Shoka osha kwatela mo oshindji kaashi shi owala okulesha Ombiimbeli. Otwa pumbwa okukala hatu tedhatedha kwaashoka tatu lesha, nokuninga omapekapeko miileshomwa yetu, opo tu uve ko Omanyolo noku ga tula miilonga. (1 Tim. 4:13-15) Ngele osho twa ningi, otatu ka vula okulongitha Oohapu dhaKalunga tu longe yalwe. Shoka natango osha kwatela mo oshindji, kaashi shi owala oku ya leshela oovelise dhoMbiimbeli. Otwa hala okukwathela aapulakeni yetu yu uve ko oovelise dhOmbiimbeli, nankene taya vulu oku dhi tula  miilonga. Onkee ano, ngele otwa kala hatu konakona Ombiimbeli paumwene pandjigilile, otashi ke tu kwathela tu hwepopale moku longa yalwe Oohapu dhaKalunga dha nwethwa mo. — 2 Tim. 3:16, 17.

13. Metsokumwe nAahebeli 5:14, omolwashike twa pumbwa okulongitha oondunge dhetu dhokuyoolola?

¹³ Kala wu shi okuyoolola. Omukwiita oku na okukala e shi okumona oshiponga manga shi li kokule, noku shi yanda. Natse wo otu na okwiilonga okukala hatu ndhindhilike oonkalo ndhoka tadhi vulu oku tu etela oshiponga, nokukatuka oonkatu tu dhi yande. (Omayel. 22:3; lesha Aahebeli 5:14.) Pashiholelwa, otu na okukala hatu hogolola pandunge omainyanyudho getu. Oopolohalama dhokotiivii nosho wo oomuvi, olundji ohadhi kala dha kwatela mo eihumbato lya nyata. Ohatu yanda omainyanyudho ngoka, molwaashoka ohaga teya po ekwatathano lyetu naJehova. Otu shi wo kutya Jehova oku tonde eihumbato inaali yogoka nosho wo kutya mboka hayi ihumbata momukala ngoka, oha yi iyetele owala omaupyakadhi nosho wo yalwe. — Ef. 5:5, 6.

14. Oondunge dhokuyoolola odha li dha kwathele ngiini Daniel?

¹⁴ Daniel ngoka a popiwa metetekelo, okwe shi ndhindhilike mo kutya okudhana uudhano wuuvidio mboka wa kwatela mo elongithonkondo nuumpulile, otawu mu etele uupyakadhi. Okwa ningi omapekapeko mo-Watchtower Library, opo a vule oku mona uuyelele mboka tawu vulu oku mu kwathela ungaunge nuupyakadhi mboka a li e na. Shoka osha li she mu kwathele ngiini? Okwe etha po thiluthilu okudhana uudhano wuuvidio mboka inaawu yogoka, nokwa hulitha po okweendathana naamboka a li he wu dhana nayo. Daniel ota ti: “Pehala lyokukala tandi dhana uuvidio, onda tameke okukala handi zi mo megumbo ndi ka ninge iinima yilwe nenge ndi ye kookuume kandje yomegongalo lyetu.” Daniel ngashingeyi oku li omukokolindjila nomukuluntugongalo.

15. Omolwashike omapopyo giifundja ga nika oshiponga?

¹⁵ Ngaashi Timoteus, otwa pumbwa okukotokela omapopyo giifundja ngoka haga taandelekwa kaashunimonima. (1 Tim. 4:1, 7; 2 Tim. 2:16) Pashiholelwa, otashi vulika ya kambadhale okutaandeleka uuyelele wiifundja kombinga yaamwatate, nenge ya kambadhale oku tu ningitha tu kale twa limbililwa ehangano lyaJehova. Uuyelele mboka wiifundja otawu vulu okunkundipaleka eitaalo lyetu. Otwa pumbwa oku wu yanda. Omolwashike mbela? Oshoka uuyelele wa tya ngaaka ohawu taandelekwa ‘kaantu mboka yaa na oondunge noihaa landula oshili.’  Elalakano lyawo okutameka ‘omaludhi nokutompathana’ kwaa na oshilonga. (1 Tim. 6:4, 5) Oya hala tu itaale iifundja yawo notu kale twa limbililwa aamwatate.

16. Otwa pumbwa okuyanda okupiyaganekwa kushike?

¹⁶ Gandja eitulomo. “Ongomukwiita ofule gwaJesus Kristus,” Timoteus okwa li e na okugandja eitulomo kuukalele we, pehala lyokugandja eitulomo kiinima yopamaliko nenge komalalakano ge gopaumwene. (2 Tim. 2:3, 4) Ngaashi Timoteus, natse otwa pumbwa okuyanda ehalo lyokulalakanena iinima yopamaliko. ‘Efundjaleko lyuuyamba’ otali vulu oku tu ningitha kaatu kale we tu hole Jehova, kaatu kale we twa pandula Oohapu dhe, nokaa tu kale we tu na ehalo lyoku dhi lombwela yalwe. (Mat. 13:22) Otwa pumbwa okukaleka onkalamwenyo yetu paunathangwa, nokulongitha ethimbo lyetu noonkondo dhetu, tu tsikile ‘okukonga Oshilongo shaKalunga.’ — Mat. 6:22-25, 33.

17-18. Oshike tatu vulu okuninga tu gamene uukuume wetu naJehova?

¹⁷ Kala wi ilongekidha okukatuka oonkatu mbala. Omukwiita oku na okukala i ilongekidha komeho yethimbo nkene te ki igamena. Ngele otwa hala tu kwate nawa iinima mbyoka Jehova e tu inekelela, otwa pumbwa okukala hatu katuka meendelelo uuna tu wete oshiponga. Oshike tashi vulu oku tu kwathela tu katuke oonkatu meendelelo? Otu na okukala twi ilongekidha komeho yethimbo nkene tatu ki inyenga, uuna tu wete oshiponga.

¹⁸ Natu shi thaneke ngeyi, uuna aantu ya gongala pehala lyontumba, manga opolohalama inaayi tameka, olundji aantu ohaya lombwelwa ya ndhindhilike kutya omiyelo dhokuza mo mehala moka odha gamena peni. Omolwashike? Opo ya vule oku za mo nziya mehala moka, uuna pwa holoka sha. Sha faathana, otatu vulu okwiilongekidha komeho yethimbo shoka tatu ka ninga po uuna tatu tala omuvi, opoloholama yontumba kotiivii nenge tu li kointaneta, e ta ku ya sha inaashi yogoka, elongithonkondo nenge omapopyo giifundja gaashunimonima. Ngele otwi ilongekidha komeho yethimbo, otatu ka katuka nziya, opo tu kaleke po uukuume wetu naJehova, noku tsikila okukala twa yogoka momeho ge. — Eps. 101:3; 1 Tim. 4:12.

19. Omayambeko geni tatu ka mona, ngele otwa dhiginine iinima yondilo mbyoka Jehova e tu pa?

¹⁹ Otu na okudhiginina iinima yondilo mbyoka Jehova e tu pa, ano oshili yOmbiimbeli yi na ondilo, nuuthembahenda woku yi longa yalwe. Ngele otwe shi ningi, otatu ka kala tu na eiyuvo lya yela, onkalamwenyo yi na eityo, notatu ka kala twa nyanyukwa okukwathela yalwe ya tseye Jehova. Kekwatho lye, otatu ka vula okudhiginina shoka e tu inekelela. — 1 Tim. 6:12, 19.