1-2. Simane nisura ba 1 Timoteo 6:20, hadia manö zi no mufaduhusi tödö khö Dimoteo?

ASESE tafaduhusi tödö niha böʼö ba wondrorogö gama-gama sebua böli niʼokhögöda. Tafalua daʼö börö me faduhu dödöda wa tola irorogö gama-gamada. Duma-dumania, na taʼiröʼö gefeda ba bank, faduhu dödöda wa lö taya gefeda andrö mazui latagö.

² Baso 1 Timoteo 6:20. Ifasugi ba dödö Dimoteo Faulo wa no tebeʼe khönia mbuala sebua böli, yaʼia daʼö faʼaboto ba dödö si tefaudu sanandrösa ba gohitö dödö Lowalangi ba niha gulidanö. No göi tebeʼe döi si sökhi khö Dimoteo ba ”wanuriaigö taromali” hegöi ba wamalua ”halöwö fanuriaigö turia somuso dödö”. (2 Tim. 4:2, 5) Ifarou dödö Dimoteo Faulo enaʼö irorogö fefu zi no mufaduhusi tödö khönia andrö. Simane Timoteo, no göi mufaduhusi tödö khöda ngawalö zebua böli. Hadia manö daʼö? Ba hana wa moguna tarorogö zi no ibeʼe khöda Yehowa?

3-4. Hadia manö dane-dane wa no sebua böli zindruhu si so ba Zura Niʼamoniʼö?

³ No ibeʼe khöda Yehowa waʼaboto ba dödö si tefaudu sanandrösa ba zindruhu si so ba Daromalinia, Sura Niʼamoniʼö. No sebua böli fefu zindruhu andrö. Hadia mbörö? Börö me tola ifahaʼö ita ba wangokhögö amakhaita si sökhi khö Yehowa hegöi faʼowua-wua dödö sindruhu. Na tafaduhusi tödö zindruhu andrö, tola teʼefaʼö ita moroi ba wangosawuyu wamahaʼö sofaya hegöi ba ngawalö gamuata si fatuwu khö Lowalangi.​—1 Kor. 6:9-11.

⁴ Baero daʼö, no göi sebua böli zindruhu si so ba Zura Niʼamoniʼö börö me ha ba niha ”si sökhi amuata” sangokhögö fangide-ngideʼö ifatunö daʼö Yehowa. (Hal. 13:48) Niha sangokhögö fangide-ngideʼö, lafaduhusi tödö wa iʼogunaʼö ndra sawuyu si lö faröi ba satua-tua Yehowa ba wamahaʼö yaʼita sanandrösa  ba Zura Niʼamoniʼö ba ginötö andre. (Mat. 11:25; 24:45) Lö tola aboto ba dödöda Zura Niʼamoniʼö na lö sanolo yaʼita. No fondrege zebua böli waʼaboto ba dödö si tefaudu niʼokhögöda sanandrösa ba Zura Niʼamoniʼö.​—Gamd. 3:13, 15.

5. Hadia nasa nifaduhusi tödö Yehowa khöda?

⁵ No göi ibeʼe khöda döi si sökhi Yehowa ba wamahaʼö niha böʼö ba zindruhu sanandrösa khönia hegöi ohitö dödönia. (Mat. 24:14) No sebua böli duria nifaʼemada börö me daʼa zanolo niha tobali ösi nomo Yehowa ba sameʼe khöra inötö ba wangokhögö faʼauri si lö aetu. (1 Tim. 4:16) Gofu hawaʼoya ginötö si tola taʼogunaʼö ba wamalua halöwö fanuriaigö, no tatuhini halöwö sabölö tohude nifalua ba ginötö andre. (1 Tim. 2:3, 4) Sindruhu-ndruhu wa no töi sökhi me tola tobali ita si falulu fohalöwö khö Lowalangi!​—1 Kor. 3:9.

6. Börö me so ösa niha si lö moʼameʼegö tödö döi si sökhi nibeʼe Yehowa khöra, hadia nifaluara?

⁶ Me götö Dimoteo, so ösa niha Keriso si lö mangosinangegö töi si sökhi niʼokhögöra tobali si falulu fohalöwö khö Lowalangi. Börö me iʼomasiʼö gulidanö andre Dema, lö saʼae omasi ia falulu fohalöwö khö Waulo ba wamosumange Lowalangi. (2 Tim. 4:10) Laböhöli wamalua halöwö fanuriaigö ira Figelo hegöi Hemogene, te börö me ataʼu ira na göna ira folohi simane salua khö Waulo. (2 Tim. 1:15) Laröi zindruhu ira Himenaiʼo, Alesandro, hegöi Fileto, ba laböhöli ba wamosumange Yehowa. (1 Tim. 1:19, 20; 2 Tim. 2:16-18) No niha saro ba wamati ira ba wamobörö, hizaʼi lö saʼae laʼameʼegö tödö döi si sökhi nibeʼe Yehowa khöra.

7. Hadia manö dandrawa niʼogunaʼö Zatana enaʼö lö saʼae taʼameʼegö tödö döi si sökhi si no ifaduhusi tödö khöda Yehowa?

⁷ Iforege Satana enaʼö lö saʼae taʼameʼegö tödö döi si sökhi si no ifaduhusi tödö khöda Yehowa. Hewisa lalania ba wamalua daʼö? Datatutunö hadia manö dandrawa niʼogunaʼönia. Iʼogunaʼö ngawalö hiburan si so ba TV, film, internet, koran, buku, hegöi majalah, enaʼö taʼoʼö lala wangera-ngera hegöi amuata si lö sökhi, irege taböhöli ba wamosumange Yehowa ba lö saʼae taʼoʼö gamakhoitania. Iʼogunaʼö göi dandrawa moroi ba niha böʼö mazui folohi, enaʼö ataʼu ita ba taböhöli wamalua halöwö fanuriaigö. Baero daʼö, iʼogunaʼö göi niha si no mondröi sindruhu ba wamaehagö khöda famahaʼö faya irege taröi zindruhu.​—1 Tim. 6:20, 21.

8. Hadia wamahaʼö si tola tahalö moroi ba zalua khö dalifusöda ira matua sotöi Daniel?

⁸ Na lö mangelama ita, tola manö olifu ita wa no sebua böli zindruhu andrö si no taʼokhögö. Nehegö hadia zalua khö Daniel, * somasi sibai famai game. Imane wanutunö,  ”No ubörögö famai game iʼotarai me fulu fakhe ndröfigu. Ba wamobörö, tenga game si lö sökhi niʼogunaʼögu. Hizaʼi itugu ara, ibörögö ulau famai game safönu fabunusa hegöi fakelemusa.” Ba gafuriata, iʼogunaʼö ginötö 15 za ero maʼökhö ba womaikö game. Imane nasa Daniel, ”Sindruhu sa, aboto ba dödögu wa tola tekiko wahuwusagu khö Yehowa börö game niʼogunaʼögu andrö, ba börö me oya sibai ginötö niʼogunaʼögu ba womaikö yaʼia. Hewaʼae simanö, no abeʼe dödögu wa lö moguna ufalua goi-goi Zura Niʼamoniʼö.” Na lö mangelama ita ba hiburan nifilida, tola manö lö saʼae taʼameʼegö tödö zindruhu. Na daʼö zalua, hasambalö taya khöda ngawalö zebua böli si no tebeʼe ba dangada.

9. Moloʼö 1 Timoteo 1:18, 19, haʼökhö ifagölösi Dimoteo Faulo?

⁹ Baso 1 Timoteo 1:18, 19. Ifagölösi Dimoteo Faulo simane samösa saradadu. (2 Tim. 2:3) Ibeʼe göi khönia mene-mene enaʼö ’iforege wasöndrata ba gohitö dödö si sökhi’. Fasöndrata nitutunö Waulo andre, manandrösa ia ba wamati. Hadia waʼafagölö niha Keriso ba zaradadu si möi fasuwö? Hadia manö mbua-bua sinangea tadouʼö börö me no tobali ita saradadu Keriso? Datatutunö lima ngawalö wamahaʼö si tola tahalö moroi ba gamaedola nibeʼe Waulo. Famahaʼö andre dania zanolo yaʼita ba woʼameʼegö tödö zindruhu.

10. Hadia mbörö wa moguna tafosumange Lowalangi soroi ba dödö?

¹⁰ Böi faröi ndraʼugö ba wamosumange Lowalangi soroi ba dödö. Lö faröi zi samösa saradadu si sökhi. Hasambalö iforege wasöndrata ba wolumöʼö niha niʼomasiʼönia mazui ngawalö zebua böli ba wamaiginia. Ifarou Dimoteo Faulo enaʼö lö faröi ia ba wamosumange Lowalangi soroi ba dödö. (1 Tim. 4:7) Na itugu taʼomasiʼö Lowalangi ba lö faröi ita khönia, itugu terou dödöda ba woʼameʼegö tödö zindruhu.​—1 Tim. 4:8-10; 6:6.

11. Hana wa moguna tafomaha ita ba wamalua satulö?

¹¹ Fomaha ndraʼugö ba wamalua satulö. Moguna iforege si samösa saradadu enaʼö lö mamalö tefaʼanö ia ba wamalua halöwönia. Lö aetu tefaʼanö Dimoteo ba wamalua halöwönia ba wamati, börö me iʼoʼö mene-mene nibeʼe Waulo ba wondröi isö-isö dödö si fasala, ba wondrouʼö bua-bua si sökhi, hegöi ba wariawösa khö ndra talifusönia ba wamati. (2 Tim. 2:22) Enaʼö tola ifalua daʼö Timoteo, moguna ifomaha ia ba wamalua satulö. Moguna göi tafalua zimane daʼö enaʼö tola talawa gisö-isö dödöda si fasala. (Rom. 7:21-25) Baero daʼö, moguna tafomaha ita ba wamalua satulö enaʼö tola taheta khöda gamuata si tohöna ba tabohouni gamuatada. (Ef. 4:22, 24) Na no marase mbotoda me no aefa tafalua halöwöda sero maʼökhö, te moguna tafaso ita weʼamöi ba gangowuloa.​—Heb. 10:24, 25.

12. Hewisa lala enaʼö tola itugu onekhe ita ba wangogunaʼö Sura Niʼamoniʼö?

¹² Moguna onekhe zi samösa saradadu ba wangogunaʼö fakake wasuwöta. Enaʼö tola onekhe ia ba wangogunaʼö fakake andrö, moguna asese ifomaha ia ba wangogunaʼö daʼö. Simanö göi, moguna onekhe ita ba wangogunaʼö Daromali Lowalangi. (2 Tim. 2:15) Tola tatema wamomaha simane daʼö na möi ita ba gangowuloa. Hizaʼi, na omasi tatolo niha enaʼö faduhu dödöra wa tola möi fanolora Zura Niʼamoniʼö, moguna owölö-ölö ita ba wamalua famahaʼö samösa ba Zura Niʼamoniʼö enaʼö itugu aro wamatida. Börö daʼö, lö obönö na ha asala tabaso manö Zura Niʼamoniʼö. Moguna taʼangerönusi hadia nibasoda ba tafalua riset ba publikasida enaʼö tola aboto ba dödöda ayati Zura Niʼamoniʼö ba taʼila hewisa wanutunö nösinia. (1 Tim. 4:13-15) Na no tafalua daʼö, awena tola taʼogunaʼö  Daromali Lowalangi ba wamahaʼö niha böʼö. Sakali tö, lö obönö na ha asala tabaso khöra ayati. Omasi tatolo ira enaʼö aboto ba dödöra ayati andrö hegöi bua nitemara moroi ba daʼö. Na owölö-ölö ita ba wamalua famahaʼö samösa ba Zura Niʼamoniʼö, tola itugu onekhe ita ba wangogunaʼö Daromali Lowalangi ba wamahaʼö niha böʼö.​—2 Tim. 3:16, 17.

13. Simane nisura ba Heberaiʼo 5:14, hadia mbörö wa moguna taʼokhögö waʼatua-tua?

¹³ Okhögö waʼatua-tua. Moguna alio anehe zi samösa saradadu ba deʼala si tola alua, ba iʼila hewisa lala ba wanimbagö daʼö. Simanö göi, moguna anehe ita ba ngawalö hadia ia zi tola möi famaʼalada, ba taforege ba wanimbagö daʼö. (Gamd. 22:3; baso Heberaiʼo 5:14.) Duma-dumania, moguna taforomaʼö waʼatua-tua ba wamili rekreasi hegöi hiburan. Oya sibai acara TV hegöi film sangoromaʼö amuata fohorö. Fatuwu khö Yehowa gamuata simane daʼö, ba hasambalö alua gabula dödö ba niha samalua yaʼia. Andrö, moguna tatimbagö hiburan si lö sökhi enaʼö lö tefakiko wahuwusada khö Yehowa.​—Ef. 5:5, 6.

14. Hadia mbua nirasoi Daniel börö me iʼogunaʼö waʼatua-tua?

¹⁴ Ibörögö aboto ba dödö Daniel si no mututunö moroi yawa, wa so deʼala na ilau famai game soʼamakhaita ba wabunusa hegöi fakelemusa. Börö daʼö, iʼogunaʼö Watchtower Library ba wamalua riset, ba iʼalui duho si tola manolo yaʼia. Hadia mbuania? Ba gafuriata, tola iböhöli ba womaikö game simane daʼö. Iböhöli göi ba wowöli game online ba lö saʼae fao ia famai game khö ndra awönia tanö böʼö. Imane Daniel, ”Abölö oya ginötögu iadaʼa ba wamalua halöwö baero ba nomo mazui fariawö khö ndra talifusöda ba mbanua niha Keriso.” Iadaʼa, no tobali ia perintis biasa hegöi satua sokubaloi.

15. Hana wa tola möi famaʼalada informasi nifazaewe niha si no mondröi sindruhu?

¹⁵ Simane Timoteo, moguna göi aboto ba dödöda hadia deʼala niʼasogö informasi nifazaewe niha si no mondröi sindruhu. (1 Tim. 4:1, 7; 2 Tim. 2:16) Duma-dumania, tola manö laforege ba wamazaewe falimosa sanandrösa khö ndra talifusöda mazui ba organisasi Yehowa. Böi telimo ita ba nifazaewera andrö. Hadia mbörö? Börö me yaʼira andrö ”niha si tekiko fangera-ngera ba si lö faʼaboto ba dödö sindruhu”. Ohitö dödöra yaʼia daʼö ”fadaʼawa ba fabuʼa-buʼa ba wehede”. (1 Tim. 6:4, 5) Omasi ira na tafaduhusi tödö walimosara ba lö saʼae faduhu dödöda khö ndra talifusöda.  Börö daʼö, moguna tatimbagö informasi moroi ba niha si no mondröi sindruhu enaʼö lö awuwu wamatida.

16. Hadia manö wamangoloi dödö sinangea tatimbagö?

¹⁶ Böi Mangoloi Dödömö. Börö me ”saradadu si sökhi khö Keriso Yesu” Dimoteo, moguna lö aetu iʼosambuaʼö dödönia ba halöwönia ba wamati. Tebai mangoloi dödönia ba wolohi faʼakayo mazui ohitö dödö tanö böʼö ba gulidanö andre. (2 Tim. 2:3, 4) Simane Timoteo, moguna göi tatimbagö wolohi faʼakayo enaʼö lö mangoloi dödöda. Na taʼoʼö ’walimosa ganaʼa’, tola taya waʼomasida khö Yehowa, lö saʼae taʼameʼegö tödö Daromali Lowalangi, ba lö göi saʼae khöda faʼowölö-ölö ba wanuriaigö ösinia ba niha böʼö. (Mat. 13:22) Moguna taʼöna-önaiʼö waʼaurida ba ’taʼofönaiʼö wangalui Famatörö Lowalangi’.​—Mat. 6:22-25, 33.

17-18. Hadia zinangea tafalua enaʼö tola tarorogö wahuwusada khö Yehowa?

¹⁷ Faʼanö ndraʼugö ba wangai angetula fatua lö alua deʼala. Moguna iʼangeragö si samösa saradadu hadia zinangea ifalua na so deʼala. Simanö göi, na omasi tarorogö ngawalö zi no ifaduhusi tödö khöda Yehowa, moguna taʼangeragö hadia zinangea tafalua na so deʼala. Na tafalua daʼö, tola iʼanemaiʼö tahalö gangetula si tefaudu na so zi möi famaʼalada.

¹⁸ Duma-dumania, fatua lö tebörögö zi sambua acara, moguna laʼila ira niha sangondrasi hezo mbawandruhö sahatö weʼamöi baero. Hadia mbörö? Enaʼö tola iʼanemaiʼö laröi nahia andrö na so zalua si lö mudöna-döna. Simanö göi, ba ginötö tabokai internet, mazui na tafaigi film hegöi acara TV, tola manö ba zi lö tadöna-döna taʼila gambara sangoromaʼö amuata fohorö, fabunusa sataʼu ita famaigi, mazui informasi moroi ba niha si no mondröi sindruhu. Börö daʼö, moguna taʼangeragö hadia zinangea tafalua na alua zimane daʼö. Na no tafaʼanö ita, tola iʼanemaiʼö tahalö gangetula si tefaudu. Buania, tola tarorogö wahuwusada khö Yehowa ba lö mosinegu ita ba wamaiginia.​—Zin. 101:3; 1 Tim. 4:12.

19. Hadia mbua nirasoida na tarorogö fefu zi no ifaduhusi tödö khöda Yehowa?

¹⁹ Moguna tarorogö ngawalö zebua böli si no ibeʼe khöda Yehowa, yaʼia daʼö sindruhu si so ba Zura Niʼamoniʼö hegöi töi si sökhi ba wamahaʼö niha böʼö sanandrösa ba zindruhu andrö. Na tafalua daʼö, tola taʼokhögö dödö side-ide si lö sinegu, itugu moʼeluaha waʼaurida, ba omuso dödöda börö me tola tatolo niha böʼö ba wangokhögö faʼaboto ba dödö sanandrösa khö Yehowa. Börö wanolo moroi khö Yehowa, tola tarorogö fefu zi no ifaduhusi tödö khöda.​—1 Tim. 6:12, 19.