1-2. Go ya ka Timotheo wa Pele 6:20, Timotheo o be a swanetše go dira’ng?

GANTŠI re nea batho dilo tšeo di lego bohlokwa go rena gore ba di hlokomele. Ka mohlala, re ka bea tšhelete ya rena pankeng. Ge re e beile pankeng re nyaka gore e šireletšege, e se ke ya lahlega goba ya utswiwa. Ka gona re a kwešiša gore go bolela eng go nea motho yo mongwe selo se bohlokwa gore a se hlokomele.

² Bala 1 Timotheo 6:20. Moapostola Paulo o ile a gopotša Timotheo gore o be a neilwe selo se itšego se bohlokwa, e lego go tseba morero wa Modimo ka batho. Le gona Timotheo o be a neilwe tokelo ya go ‘bolela lentšu la Modimo’ le go “dira modiro wa moebangedi.” (2 Tim. 4:2, 5) Paulo o ile a kgothaletša Timotheo gore a hlokomele seo a se gafetšwego goba a se neilwego. Go swana le Timotheo, le rena re neilwe dilo tša bohlokwa. Dilo tšeo ke’ng? Gona ke ka baka la’ng re swanetše go hlokomela dilo tše bohlokwa tšeo Jehofa a re neilego tšona?

3-4. Mabaka a mangwe ao a dirago gore ditherešo tšeo di lego ka Beibele di be bohlokwa ke afe?

³ Jehofa o re neile tsebo e nepagetšego ya ditherešo tše bohlokwa tšeo di lego ka Lentšung la gagwe Beibele. Ditherešo tšeo di bohlokwa ka gobane di re ruta kamoo re ka bago le tswalano e botse le Jehofa e bile di re hlalosetša seo re ka se dirago e le gore re thabe e le ka kgonthe bophelong. Ge re amogela ditherešo tšeo e bile re phela ka go dumelelana le tšona, ga re sa dumela dithuto tša maaka e bile re kgona go phela ka tsela yeo Modimo a e amogelago.—1 Bakor. 6:9-11.

⁴ Lebaka le lengwe leo le dirago gore ditherešo tšeo di lego ka Lentšung la Modimo di be bohlokwa, ke gore Jehofa o di utollela feela batho ba ba ikokobeditšego bao ba nago le “tshekamelo  e swanetšego,” e lego bao ba tlogago ba nyaka go ithuta ka yena. (Dit. 13:48) Batho bao ba ikokobeditšego ba dumela gore lehono Jehofa o diriša mohlanka yo a botegago le wa temogo go re ruta ditherešo tšeo di lego ka Beibeleng. (Mat. 11:25; 24:45) Go kwešiša seo Beibele e se rutago go bohlokwa kudu, eupša re ka se kgone go kwešiša seo Beibele e se rutago ge go se na motho yo a re thušago.—Die. 3:13, 15.

5. Ke’ng se sengwe gape seo Jehofa a re neilego sona?

⁵ Jehofa o re neile le tokelo ya go ruta ba bangwe therešo ka yena le go ba ruta ka seo a tlago go re direla sona. (Mat. 24:14) Molaetša wo re ba rutago wona o bohlokwa ka gobane o ba thuša gore e tle e be karolo ya lapa la Jehofa, e bile o ba nea sebaka sa go tlo hwetša bophelo bjo bo sa felego. (1 Tim. 4:16) Go sa šetšwe gore re fetša nako e ntši goba e nyenyane re bolela ditaba tše dibotse, re tšea karolo modirong o bohlokwa kudu wo o dirwago gona bjale. (1 Tim. 2:3, 4) Ruri ke tokelo go ba bašomigotee le Modimo!—1 Bakor. 3:9.

6. Go ile gwa direga’ng ka ba bangwe ba bao ba ilego ba palelwa ke go tšeela godimo tokelo ya go ba bašomigotee le Modimo?

⁶ Mehleng ya Timotheo, Bakriste ba bangwe ga se ba ka ba tšeela godimo tokelo ya bona ya go ba bašomigotee le Modimo. Ka mohlala, ka ge Dema a be a rata lefase, o ile a tlogela go šoma gotee le Paulo. (2 Tim. 4:10) Le gona go bonagala Figelo le Heremogene ba ile ba tlogela go bolela ditaba tše dibotse ka ge ba be ba boifa gore le bona ba tla tlaišwa go swana le Paulo. (2 Tim. 1:15) Himeneo, Aleksandere le Fileto ba ile ba fetoga bahlanogi gomme ba tlogela go hlankela Jehofa. (1 Tim. 1:19, 20; 2 Tim. 2:16-18) Go bonagala batho ba ka moka e kile ya ba Bakriste bao ba tiilego tumelong, eupša ba ile ba tlogela go nagana ka dilo tše bohlokwa tšeo Jehofa a ba neilego tšona.

7. Sathane o diriša’ng go leka go re dira gore re se sa hlankela Jehofa?

⁷ Sathane o diriša’ng go leka go re dira gore re se sa tšeela godimo dilo tše bohlokwa tšeo Jehofa a re neilego tšona? Tše dingwe tša dilo tšeo Sathane a di dirišago ke thelebišene, dimubi, Inthanete le dilo tšeo re di balago. O diriša dilo tšeo go dira gore re thome go nagana le go dira dilo tšeo di tla dirago gore mafelelong re tlogele go rata Jehofa goba go latela melao ya gagwe. O leka go re tšhošetša gore re tlogele go bolela ditaba tše dibotse ka go dira gore re tšhabe dithaka tša rena goba re tšhabe go tlaišwa. Le gona o nyaka gore re theetše maaka a bahlanogi ao a “bitšwago gore ke tsebo” e le gore re tle re tlogele therešo.—1 Tim. 6:20, 21.

8. Re ithuta’ng phihlelong ya ngwanabo rena yo a bitšwago Daniel?

⁸ Ge e ba re se šedi, re ka tlogela therešo ganyenyane-ganyenyane. Nagana ka mohlala  wa Daniel, * yo a bego a rata go bapala dipapadi tša bidio tšeo di bapalwago didirišweng tša elektroniki. O re: “Ke thomile go bapala dipapadi tšeo ge ke be ke na le mengwaga e ka bago e lesome. Mathomong ke be ke bapala dipapadi tšeo di se nago bothata. Eupša ganyenyane-ganyenyane ke ile ka thoma go bapala dipapadi tšeo di nago le bošoro le botemona.” Mafelelong, Daniel o be a bapala dipapadi tšeo diiri tše 15 ka letšatši. Daniel o re: “Ka pelong ke be ke tseba gore dipapadi tšeo ke di bapalago le nako yeo ke e fetšago ke di bapala, di dira gore ke se sa ba le segwera se sebotse le Jehofa. Eupša ke be ke ipoditše gore ga go hlokagale gore ke dire seo Beibele e rego ke se dire. Ka gona ge e ba re se šedi, go ka ba bonolo gore dilo tšeo re ithabišago ka tšona di dire gore re tlogele therešo. Ge e ba seo se ka direga, re ka feleletša re lahlegelwa le ke dilo tše bohlokwa tšeo Jehofa a re neilego tšona.

9. Go ya ka Timotheo wa Pele 1:18, 19, Paulo o ile a swantšha Timotheo le eng?

⁹ Bala 1 Timotheo 1:18, 19. Paulo o ile a swantšha Timotheo le lešole gomme a mo kgothaletša gore a tšwele pele a “elwa ntwa e botse.” Paulo o be a sa bolele ka ntwa ya kgonthe ya go lwa le mašole a mangwe. Bakriste ba swana bjang le mašole ao a lego ntweng? Ka ge re le mašole a Kriste, re swanetše go ba le dika dife? A re boneng dilo tše tlhano tšeo re ka ithutago tšona papišong ye ya Paulo. Dilo tšeo di tlo re thuša gore re swarelele ka go tia therešong.

10. Boineelo go Modimo ke’ng, gona ke ka baka la’ng re bo hloka?

¹⁰ Bontšha boineelo go Modimo. Lešole la nnete le a botega. Le lwa ka thata gore le šireletše batho bao le ba ratago goba dilo tšeo di lego bohlokwa go lona. Paulo o ile a kgothaletša Timotheo gore a bontšhe boineelo go Modimo, e lego go hlankela Modimo ka go mmotegela. (1 Tim. 4:7) Ge re rata Modimo kudu e bile re ineetše go yena, seo se tlo dira gore re swarelele ka go tia therešong.—1 Tim. 4:8-10; 6:6.

11. Ke ka baka la’ng re swanetše go itlwaetša go dira se se lokilego?

¹¹ Itlwaetše go dira se se lokilego. Lešole le swanetše go šoma ka thata e le gore le tle le kgone go dula le swanelega go ya ntweng. Timotheo o ile a kgona go lwa le Sathane ka gobane o ile a latela keletšo yeo Paulo a mo neilego yona, gomme a šoma ka thata gore a lwantšhe dikganyogo tše di fošagetšego, a be le dika tše dibotse e bile a fetše nako a na le bana babo le dikgaetšedi ka phuthegong. (2 Tim. 2:22) Gore Timotheo a kgone go dira seo, o be a swanetše go šoma ka thata. Le rena re swanetše go šoma ka thata gore re tle re fenye dikganyogo tše di fošagetšego. (Baroma 7:21-25) Le gona re swanetše go šoma ka thata gore re fetoše semelo sa rena gomme re be le dika tše dibotse. (Baef. 4:22, 24) E bile ge re hlwele re šoma ka thata gomme re lapile, re ka swanelwa ke go ikgoga gore re ye dibokeng.—Baheb. 10:24, 25.

12. Re ka dira’ng gore re kaonefatše tsela yeo re dirišago Beibele ka yona?

¹² Lešole le swanetše go itlwaetša go diriša dibetša tša lona. E le gore le be le bokgoni, le swanetše go itlwaetša ka mehla. Le rena re swanetše go ba le bokgoni bja go diriša Lentšu la Modimo. (2 Tim. 2:15) Re ka ithuta go ba le bokgoni bjoo dibokeng tša rena. Eupša ge re nyaka go thuša ba bangwe gore le bona ba dumele gore therešo yeo e lego ka Beibeleng e ka ba thuša, re swanetše go ithuta Beibele ka mehla. Re swanetše go diriša Lentšu la Modimo go matlafatša tumelo ya rena. Se ga se bolele feela go no bala Beibele. Se ra gore re swanetše go naganišiša ka seo re balago, re dire le nyakišišo ka dikgatišong tša rena e le gore re tle re kgone  go kwešiša Mangwalo gabotse le go a diriša. (1 Tim. 4:13-15) Ge re ka dira seo, re tlo kgona go diriša Lentšu la Modimo go ruta ba bangwe. Ge re ruta batho ga se ra swanela go no ba balela ditemana tša Beibele. Re nyaka go ba thuša go di kwešiša le gore ba ka di diriša bjang. Ka gona ge re ithuta Beibele ka mehla, re tlo kgona go kaonefatša bokgoni bja rena bja go e diriša ge re ruta ba bangwe.—2 Tim. 3:16, 17.

13. Baheberu 5:14, e re re swanetše go dira’ng gore re kgone go tseba phapano magareng ga se se nepagetšego le se se fošagetšego?

¹³ Eba le temogo. Lešole le swanetše go bona kotsi e sa tla ke moka le itšhireletše. Le rena re swanetše go lemoga maemo ao a ka re tsenyago mathateng gomme re dire se sengwe gore re se ke ra welwa ke kotsi. (Die. 22:3; bala Baheberu 5:14.) Ka mohlala, re swanetše go kgetha ka bohlale dilo tšeo re ithabišago ka tšona. Mananeo a thelebišene le dimubi, gantši di bontšha batho bao ba sa itshwarego gabotse. Seo ga se kgahliše Modimo e bile se dira gore mafelelong batho ba wele kotsing. Ga re nyake go ithabiša ka dilo tša mohuta woo ka gobane di ka dira gore segwera sa rena le Jehofa se senyege ganyenyane-ganyenyane.—Baef. 5:5, 6.

14. Go ba le temogo go ile gwa thuša Daniel bjang?

¹⁴ Daniel yoo re boletšego ka yena pejana o ile a thoma go lemoga gore go bapala dipapadi tšeo di nago le bošoro le botemona, e be e le bothata bjo bogolo. O ile a dira nyakišišo ka dikgatišong tša rena go mo thuša go rarolla bothata bjo. O ile a dira’ng ka morago ga moo? O ile a tlogela go bapala dipapadi tša bidio tšeo di bego di na le bošoro le botemona. O ile a se sa bapala le batho bao a bego a bapala le bona dipapadi tšeo Inthaneteng. Daniel o re: “Ke ile ka tlogela go bapala dipapadi tšeo tša bidio gomme ka thoma go dira dilo tše dingwe ke na le batho ba bangwe goba go fetša nako ke na le bana bešo le dikgaetšedi ka phuthegong.” Gona bjale Daniel ke mmulamadibogo e bile ke mogolo.

15. Ke ka baka la’ng ditaba tša maaka di le kotsi?

¹⁵ Go swana le Timotheo, re swanetše go lemoga kotsi ya ditaba tša maaka tšeo di bolelwago ke bahlanogi. (1 Tim. 4:1, 7; 2 Tim. 2:16) Ka mohlala, ba ka leka go phatlalatša ditaba tša maaka ka bana babo rena goba ba dira gore re se sa tshepa mokgatlo wa Jehofa. Ditaba tše bjalo tša maaka di ka fokodiša tumelo ya rena. Ka gona ga se ra swanela go dumela ditaba tšeo. Ka baka la’ng? Ka gobane ditaba tše bjalo di phatlalatšwa ke “batho ba ba senyegilego  monaganong le bao ba hlaelelwago ke therešo.” Ba rata ‘go phegišana le go ngangišana.’ (1 Tim. 6:4, 5) Ba nyaka gore re dumele maaka a bona gomme re thome go se sa tshepa bana babo rena.

16. Ke ditšhitišo dife tšeo re swanetšego go di phema?

¹⁶ Phema ditšhitišo. Ka ge Timotheo e be e le “mohlabani yo mobotse wa Kriste Jesu” o ile a swanelwa ke go dula a naganne ka bodiredi bja gagwe go e na le go šitišwa ke go ba le dilo tše dintši goba go nyaka go dira dilo tše dingwe bophelong. (2 Tim. 2:3, 4) Go swana le Timotheo, ga se ra swanela go nyaka go ba le dilo tše dintši. “Matla a forago a mahumo” a ka dira gore re se sa rata Jehofa, re se sa tšeela godimo Lentšu la Gagwe e bile re se sa nyaka go le botša ba bangwe. (Mat. 13:22) Go e na le go nyaka go ba le dilo tše dintši bophelong re swanetše go diriša nako ya rena le matla a rena ‘go tšwela pele re tsoma Mmušo pele.’—Mat. 6:22-25, 33.

17-18. Re ka dira’ng go šireletša segwera sa rena le Jehofa?

¹⁷ Itokišeletše go gata mogato kapejana. Lešole le swanetše go nagana e sa le pele gore le tlo dira eng go itšhireletša. Go swana le lešole leo, le rena re swanetše go gata mogato kapejana ge re bona kotsi e le gore re kgone go šireletša dilo tšeo Jehofa a re neilego tšona. Ke’ng seo se ka re thušago go gata mogato kapejana? Re ka thušwa ke go nagana e sa le pele gore re tlo dira eng ge kotsi e tšwelela.

¹⁸ Ka mohlala, ge batho ba le lefelong le itšego ba botšwa pele lenaneo le ka thoma gore ba lebelele gore ba tlo tšwa kae ge kotsi e ka tšwelela. Ke ka baka la’ng ba swanetše go tseba gore ba tlo tšwa kae? Ka gobane seo se tlo ba thuša gore ba kgone go tšwa kapejana ge kotsi e ka direga. Ka mo go swanago, le rena re swanetše go nagana e sa le pele gore re tlo dira eng ge re ka re re diriša Inthanete, re bogetše mmubi goba thelebišene, kapejana gwa tšwelela batho bao ba itshwerego ka tsela e gobogilego, bošoro goba dilo tša bahlanogi. Ge e ba re itokišeletša e sa le pele seo se ka diregago, re ka kgona go gata mogato kapejana e le gore re šireletše segwera sa rena le Jehofa gomme a dule a re amogela.—Ps. 101:3; 1 Tim. 4:12.

19. Re tlo hwetša ditšhegofatšo dife ge e ba re šireletša dilo tše bohlokwa tšeo Jehofa a re neilego tšona?

¹⁹ Re swanetše go šireletša dilo tše bohlokwa tšeo Jehofa a re neilego tšona, e lego go tseba ditherešo tše bohlokwa tša ka Beibeleng le tokelo ya go di ruta ba bangwe. Ge re ka dira bjalo, re tlo ba le letswalo le le hlwekilego, ra phela bophelo bjo bo nago le morero e bile ra thabela go thuša ba bangwe go tseba Jehofa. Le gona Jehofa o tla re thuša go šireletša dilo tšeo a re neilego tšona.—1 Tim. 6:12, 19.