1-2. Kɛ mɔɔ 1 Timote 6:20 kile la, duzu a bɛvale bɛwulale Timote asa a?

YƐTA yɛfa yɛ ninyɛne mɔɔ sonle bolɛ la yɛmaa awie mɔ yɛmaa bɛnea zo. Kɛ neazo la, yɛfa yɛ ezukoa yɛto bange. Na yɛ nye la kɛ bɛbanlea zo boɛ amaa bɛanwua anzɛɛ yeamminli. Yemɔti, saa yɛka yɛ debie mɔɔ sonle bolɛ mɔɔ yɛfa yɛamaa awie mɔ yɛamaa bɛanlea zo la anwo edwɛkɛ a, yɛze mɔɔ ɔkile a.

² Kenga 1 Timote 6:20. Ɛzoanvolɛ Pɔɔlo hakyele Timote kɛ, bɛva debie mɔɔ sonle bolɛ mɔɔ le bodane mɔɔ Nyamenle lɛ maa alesama la anwo nɔhalɛ ndelebɛbo bɛwula ɔ sa. Eza bɛhanle bɛhilele Timote kɛ, “[ɔha] edwɛkɛ ne” na “[ɔyɛ] edwɛkpakavolɛ gyima ne.” (2 Tim. 4:2, 5) Pɔɔlo zele Timote kɛ ɔbɔ ninyɛne mɔɔ bɛva bɛwula ɔ sa nu la anwo bane. Le kɛ Timote la, bɛva ninyɛne mɔɔ sonle bolɛ la bɛwula yɛ sa nu. Bɛmɛ a le boni? Na duzu ati a ɔwɔ kɛ yɛbɔ ninyɛne mɔɔ sonle bolɛ mɔɔ Gyihova ɛva ɛwula yɛ sa nu la anwo bane a?

3-4. Ndelebɛbo boni mɔ ati a nɔhalɛ mɔɔ wɔ Baebolo ne anu la sonle bolɛ a?

³ Gyihova ɛyɛ yɛ boɛ, yemaa yɛnyia nɔhalɛ mɔɔ sonle bolɛ mɔɔ wɔ ye Edwɛkɛ Baebolo ne anu la anwo nɔhalɛ ndelebɛbo. Nɔhalɛ ɛhye mɔ sonle bolɛ, ɔluakɛ bɛkilehile yɛ kɛ ɔkɛyɛ na yɛ nee Gyihova anyia agɔnwolɛvalɛ kpalɛ, eza bɛmaa yɛnwu kɛ ɔkɛyɛ na yɛanyia nɔhalɛ anyelielɛ la. Saa yɛdie nɔhalɛ zɔhane mɔ yɛto nu na yɛfa yɛbɔ yɛ ɛbɛla a, ɔbamaa yɛanyia fanwodi yɛavi adalɛ ngilehilelɛ nwo na yɛahwe yɛ nwo yɛavi ɛbɛlatane nwo.​—1 Kɔl. 6:9-11.

⁴ Ndelebɛbo bieko mɔɔ ɔti nɔhalɛ mɔɔ wɔ Nyamenle Edwɛkɛ ne anu sonle bolɛ la a le kɛ, bɛdabɛ mɔɔ bɛbɛlɛ bɛ nwo aze  na “bɛ subane kile kɛ bɛfɛta” la ala a Gyihova maa bɛnwu ye a. (Gyi. 13:48) Menli zɛhae mɔ die adenle mɔɔ ɔdua zo ɔmaa yɛnwu nɔhalɛ ɛhye mɔ ɛnɛ la to nu. (Mat. 11:25; 24:45) Saa bɛamboa yɛ a, yɛ ngomekye yɛnrɛhola yɛnrɛde Baebolo ne abo, yɛɛ ɔ bo mɔɔ yɛbade la sonle bolɛ tɛla debie biala.​—Mrɛ. 3:13, 15.

5. Duzu bieko a Gyihova ɛva ɛwula yɛ sa a?

⁵ Eza Gyihova ɛmaa yɛnyia nwolɛ adenle kɛ yɛhilehile awie mɔ nɔhalɛ mɔɔ fale ɔ nwo nee ye bodane ne mɔ anwo la. (Mat. 24:14) Edwɛkɛ ne mɔɔ yɛbɔ ye nolo la sonle bolɛ, ɔluakɛ ɔboa awie mɔ ɔmaa bɛbaboka Gyihova abusua ne anwo, eza ɔmaa bɛnyia dahuu ngoane nwo anyelazo. (1 Tim. 4:16) Saa mɔɔ yɛlɛyɛ ye wɔ ɛzonlenlɛ gyima ne anu la le kpole o anzɛɛ ekyi o, yɛlɛboa gyima mɔɔ anwo hyia kpalɛ mɔɔ bɛlɛyɛ ye wɔ mekɛ ɛhye anu la. (1 Tim. 2:3, 4) Nea nwolɛ adenle kpole mɔɔ yɛnyia kɛ Nyamenle le yɛ gɔnwo gyimayɛvo a!​—1 Kɔl. 3:9.

6. Duzu a dole menli bie mɔ mɔɔ bɛammaa bɛ nye anla ɛkɛ ne la ɛ?

⁶ Timote mekɛ zo amra bie mɔ anye anzɔ nwolɛ adenle mɔɔ bɛnyianle kɛ Nyamenle le bɛ gɔnwo gyimayɛvo la. Ɔluakɛ Dimase hulole ewiade ɛhye la ati, ɔkpole nwolɛ adenle mɔɔ ɔnyianle kɛ ɔ nee Pɔɔlo bazonle la. (2 Tim. 4:10) Ɔbayɛ kɛ Fegyɛlɛse nee Hɛmɔgyɛnize kpole bɛ ɛzonlenlɛ gyima ne, ɔluakɛ ɛnee bɛsulo kɛ bɛbakpɔ bɛ kɛ mɔɔ ɛnee bɛlɛkpɔ Pɔɔlo la. (2 Tim. 1:15) Haemɛneeyɛse, Alɛzanda yɛɛ Faelitɛse yɛle kpɔkyevolɛma na bɛvile nɔhalɛ ne anu. (1 Tim. 1:19, 20; 2 Tim. 2:16-18) Ɔbayɛ kɛ, mekɛ bie, ɛnee menli ɛhye mɔ anwo yɛ se wɔ sunsum nu, noko bɛambɔ nɔhalɛ ne mɔɔ sonle bolɛ mɔɔ bɛnyianle la anwo bane.

7. Ndenle boni mɔ a Seetan dua zo amaa ɔ sa aha yɛ a?

⁷ Seetan bɔ mɔdenle kɛ ɔmaa yɛakpo nɔhalɛ mɔɔ sonle bolɛ mɔɔ Gyihova ɛva ɛwula yɛ sa nu la. Yɛ ndenle mɔɔ ɔdua zo ɔyɛ zɔ la bie mɔ nzonlɛ. Ɔdua anyelielɛ ninyɛne, TV nee yintanɛte zo gyimalilɛ zo ɔsɛkye yɛ adwenle nee yɛ subane amaa yɛakpo nɔhalɛ mɔɔ sonle bolɛ mɔɔ Gyihova ɛva ɛwula yɛ sa la. Ɔbɔ mɔdenle kɛ ɔdua atipɛnema ngyegyelɛ nee ɛkpɔlɛ zo yeanwunlonwunla yɛ amaa yɛagyakyi edwɛkɛhanlɛ gyima ne. Eza ɔbɔ mɔdenle kɛ ɔbamaa yɛadie “adalɛ ‘nrɛlɛbɛ’” mɔɔ kpɔkyevolɛma si nwolɛ adua la amaa yɛakpo nɔhalɛ ne.​—1 Tim. 6:20, 21.

8. Duzu a yɛsukoa yɛfi adiema nrenyia bie mɔɔ bɛfɛlɛ ye Daniel la edwɛkɛ ne anu a?

⁸ Saa yɛammaa yɛ nye anla ɛkɛ a, ngyikyi ngyikyi yɛbagyakyi nɔhalɛ ne anu. Suzu Daniel * mɔɔ ɛnee ɔkulo video game la  anwubielɛ ne anwo. Ɔka kɛ: “Membɔle ɔ bo kɛ mebɔ video game la, ɛnee meli kɛyɛ ɛvolɛ bulu. Alimoa ne, ɛnee mebɔ video game mɔɔ nvonleɛ biala ɛnle nwolɛ la. Noko ngyikyi ngyikyi, membɔle ɔ bo kɛ mebɔ video game mɔɔ basabasayɛlɛ nee sunsum ɛtane nyɛleɛ wɔ nu la.” Ɔkadwu mekɛ bie la, ɛnee akee ɔfa dɔnehwele kɛyɛ 15 ɔyɛ ɛhye alehyenlɛ biala. Daniel ka kɛ: “Wɔ me ahonle nu, ɛnee meze kɛ video game mɔɔ mebɔ nee mekɛ dodo mɔɔ mefa mebɔ la ɛlɛmaa meahwe me nwo meavi Gyihova anwo. Noko me ahonle solole na ɔmaanle menyianle adwenle kɛ Baebolo ngyinlazo ɛnvale mɔɔ melɛyɛ la anwo.” Anyelielɛ ninyɛne le adenle ko mɔɔ Seetan dua zo maa yɛgyakyi nɔhalɛ ne anu ngyikyi ngyikyi a. Saa ɔba ye zɔhane a, ɔbamaa yɛakpo ninyɛne mɔɔ sonle bolɛ mɔɔ Gyihova ɛva ɛwula yɛ sa nu la.

9. Kɛ mɔɔ 1 Timote 1:18, 19 kile la, nwane a Pɔɔlo vale Timote totole ɔ nwo a?

⁹ Kenga 1 Timote 1:18, 19. Pɔɔlo vale Timote totole sogyanli nwo, na ɔzele ye kɛ ‘ɔhɔ zo ɔho konle kpalɛ ne.’ Ɛnee konle zɔhane le sunsum nu konle. Ndenle boni mɔ azo a Kilisienema le kɛ sogyama mɔɔ gyi konle nloa ɛ? Subane boni mɔ a ɔwɔ kɛ yɛnyia kɛ Kelaese sogyama a? Bɛmaa yɛzuzu ninyɛne nnu mɔɔ yɛsukoa yɛfi Pɔɔlo ndonwo ne anu la anwo. Ɛzukoalɛdeɛ ɛhye mɔ baboa yɛ amaa yɛahɔ zo yɛazɔ nɔhalɛ ne anu.

10. Duzu a le nyamenlezonlenlɛ kpalɛ, na duzu ati a yɛhyia nwo a?

¹⁰ Maa ɛ nye ɛlie nyamenlezonlenlɛ kpalɛ nwo. Sogyanli kpalɛ di nɔhalɛ. Ɔko ɛsesebɛ ɔbɔ awie mɔɔ ɔkulo ye anzɛɛ debie mɔɔ sonle bolɛ maa ye la anwo bane. Pɔɔlo maanle Timote anwosesebɛ kɛ ɔva nyamenlezonlenlɛ kpalɛ ɔtete ɔ nwo, kile kɛ ɔbavi nɔhalɛlilɛ nu yeabeta Nyamenle anwo. (1 Tim. 4:7) Saa yɛnyia ɛlɔlɛ nee ɛhulolɛ kpole kɛ yɛsonle Nyamenle a, ɔbamaa yɛabɔ nɔhalɛ ne mɔɔ yɛlɛ la anwo bane.​—1 Tim. 4:8-10; 6:6.

11. Duzu ati a ɔwɔ kɛ yɛtete yɛ nwo a?

¹¹ Tete ɛ nwo. Sogyanli kpalɛ tete ɔ nwo amaa yeahɔ zo yeayɛ ye gyima ne kpalɛ dahuu. Timote anwo hɔle zo yɛle se wɔ sunsum nu ɔluakɛ ɔdiele Pɔɔlo folɛdulɛ mɔɔ se ɔkpo atiakunluwɔzo ɛtane, ɔnyia subane kpalɛ na ɔ nee ɔ mediema diedima ɛdu la ati. (2 Tim. 2:22) Ɛnee ɔwɔ kɛ ɔtete ɔ nwo na yeahola yeayɛ zɔ. Ɔwɔ kɛ yɛdayɛ noko yɛtete yɛ nwo na yɛahola yɛali yɛ nwonane nu atiakunluwɔzo ne mɔ azo. (Wlo. 7:21-25) Bieko, ɔwɔ kɛ yɛtete yɛ nwo amaa yɛahola yɛaye subane dɛba ne yɛagua na yɛawula subane fofolɛ ne. (Ɛfɛ. 4:22, 24) Yɛɛ bie a yɛkakpɔne gyima la ɛnee yɛvɛ na ɔwɔ kɛ yɛyele yɛ nwo amaa yɛahɔ debiezukoalɛ.​—Hib. 10:24, 25.

12. Kɛ ɔkɛyɛ na yɛanyia anyuhɔlɛ wɔ kɛzi yɛfa Baebolo ne yɛdi gyima la anu ɛ?

¹² Ɔwɔ kɛ sogyanli sukoa kɛzi ɔbava ye akodeɛ ne mɔ yeayɛ gyima la. Amaa yeanwu ɔ nye zo la, ɔwɔ kɛ ɔyɛ zɔ dahuu. Zɔhane ala a ɔwɔ kɛ yɛdayɛ noko yɛnyia anyuhɔlɛ wɔ kɛzi yɛfa Nyamenle Edwɛkɛ ne yɛdi gyima la anu a. (2 Tim. 2:15) Yɛbahola yɛanwu kɛzi yɛbayɛ zɔ la wɔ yɛ ayia ne mɔ abo. Noko amaa yɛahola yɛamaa awie mɔ alie ali kɛ Baebolo nu nɔhalɛ ne sonle bolɛ amgba la, ɔwɔ kɛ yɛfa yɛyɛ yɛ subane kɛ yɛbazukoa Baebolo ne dahuu. Ɔwɔ kɛ yɛfa mɔɔ wɔ Nyamenle Edwɛkɛ ne anu la yɛyɛ gyima amaa yɛ diedi nu amia. Saa yɛkenga ala a ɛnee yɛtɛwiele, ɔwɔ kɛ yɛdwenledwenle mɔɔ yɛkenga la anwo na yɛyɛ neɛnleanu wɔ yɛ mbuluku ne mɔ anu amaa yɛade Ngɛlɛlera ne abo kpalɛ na yɛava yɛayɛ gyima. (1 Tim. 4:13-15) Ɛhye baboa yɛ yeamaa yɛava Nyamenle Edwɛkɛ ne yɛahilehile  awie mɔ kpalɛ. Ɔnle kɛ yɛkenga Ngɛlɛlera ne ala yɛkile awie mɔ, yɛkulo kɛ yɛboa yɛ tievolɛma yɛmaa bɛte mɔɔ ngyɛnu bie kile la abo nee kɛzi ɔfale bɛ nwo la. Saa yɛkɔ zo yɛdi ngyehyɛleɛ mɔɔ yɛyɛ yɛfa yɛsukoa Baebolo ne dahuu la azo a, ɔbamaa yɛanyia anyuhɔlɛ wɔ kɛzi yɛfa Nyamenle Edwɛkɛ ne yɛkilehile awie mɔ la anu.​—2 Tim. 3:16, 17.

13. Kɛ mɔɔ Hibuluma 5:14 kile la, duzu ati a ɔwɔ kɛ yɛnyia nwunu a?

¹³ Nyia nwunu. Ɔwɔ kɛ sogyanli kola nwu esiane na ɔtwe ɔ nwo ɔfi nwolɛ. Ɔwɔ kɛ yɛdayɛ noko yɛkola yɛnwu tɛnlabelɛ mɔɔ bahola aboda yɛ la na yɛtwe yɛ nwo yɛfi nwolɛ. (Mrɛ. 22:3; kenga Hibuluma 5:14.) Kɛ neazo la, ɔwɔ kɛ yɛkpa ninyɛne mɔɔ yɛfa yɛdielie yɛ nye la nrɛlɛbɛ nu. TV zo gyimalilɛ nee vidio ngakyile ta si ɛbɛlatane nwo adua. Nyɛleɛ ɛhye ka Nyamenle ɛya na awieleɛ bɔkɔɔ ne, ɔboda menli mɔɔ fa bɛ nwo wula nu la. Yemɔti ɔwɔ kɛ yɛkpo anyelielɛ ninyɛne mɔɔ maa ɛlɔlɛ mɔɔ yɛlɛ yɛmaa Nyamenle ka aze ngyikyi ngyikyi la.​—Ɛfɛ. 5:5, 6.

14. Kɛzi nwunu boale Daniel ɛ?

¹⁴ Daniel mɔɔ yɛlimoa yɛha ɔ nwo edwɛkɛ la nwunle kɛ, video game mɔɔ basabasayɛlɛ nee sunsum ɛtane nyɛleɛ wɔ nu la ɛnle kpalɛ. Ɔyɛle neɛnleanu wɔ Watchtower Library ne anu amaa yeanwu edwɛkɛ mɔɔ baboa yeamaa yeali ye ngyegyelɛ ne anwo gyima la. Kɛzi ɛhye boale ye ɛ? Ɔgyakyile video game mɔɔ ɛnle kpalɛ la ɛbɔlɛ yɛɛ ɔgyakyile kɛ ɔ nee menli gyɛne babɔ video game. Daniel ka kɛ, “Kɛ anrɛɛ mebavea sua nu meabɔ video game la, membɔle ɔ bo kɛ me nee me gɔnwo mɔ mɔɔ wɔ asafo ne anu la bavinde ali nwɔhoa.” Kɛkala, Daniel ɛlɛsonle kɛ adekpakyelɛ yɛɛ asafo nu kpanyinli.

15. Duzu ati a esiane wɔ nu kɛ yɛbadie adalɛ edwɛkɛ a?

¹⁵ Ɔwɔ kɛ yɛdayɛ noko yɛnwu esiane mɔɔ wɔ adalɛ edwɛkɛ mɔɔ kpɔkyevolɛma ka la anu kɛ mɔɔ Timote yɛle la. (1 Tim. 4:1, 7; 2 Tim. 2:16) Kɛ neazo la, bie a bɛbaha yɛ mediema nwo adalɛ edwɛkɛ anzɛɛ bɛbamaa yɛ adwenle nu ayɛ yɛ kesee wɔ Gyihova ahyehyɛdeɛ ne anwo. Adalɛ edwɛkɛ ɛhye mɔ kola sɛkye yɛ diedi. Ɔnle kɛ yɛmaa bɛfa adalɛ edwɛkɛ ɛhye mɔ bɛbɛlɛbɛla yɛ. Duzu ati ɔ? Ɔluakɛ “menli mɔɔ bɛ adwenle ɛzɛkye na bɛnde nɔhalɛ ne abo la” a ka edwɛkɛ ɛhye mɔ a. Bɛ bodane a le kɛ bɛfa ‘kpolerazulɛ nee butulelilɛ’ bara yɛ  avinli. (1 Tim. 6:4, 5) Bɛkulo kɛ yɛdie bɛ adalɛ edwɛkɛ ne yɛdi na yɛnyia yɛ mediema nwo adwenle ɛtane.

16. Ninyɛne boni mɔ a ɔnle kɛ yɛmaa bɛtwehwe yɛ adwenle a?

¹⁶ Mmamaa ninyɛne twehwe wɔ adwenle. Kɛ “Kelaese Gyisɛse sogyanli kpalɛ la,” ɛnee ɔwɔ kɛ Timote fa ye adwenle sie ɛzonlenlɛ gyima ne azo kpalɛ amaa gyima nee nwonane afoa nu ninyɛne andwehwe ye adwenle. (2 Tim. 2:3, 4) Le kɛ Timote la, ɔwɔ kɛ yɛnea boɛ na nwonane afoa nu ninyɛne dɔɔnwo ɛkpondɛlɛ andwehwe yɛ adwenle. “Anwonyia mɛlɛbɛla” bahola amaa Gyihova anwo ɛlɔlɛ, anyezɔlɛ mɔɔ yɛlɛ yɛmaa Nyamenle Edwɛkɛ ne yɛɛ ɛhulolɛ mɔɔ yɛlɛ kɛ yɛdi awie mɔ daselɛ la aha aze. (Mat. 13:22) Ɔwɔ kɛ yɛtete ninyɛne zo wɔ yɛ ɛbɛlabɔlɛ nu na yɛfa mekɛ nee anwosesebɛ mɔɔ yɛlɛ la ‘yɛkɔ zo yɛdimoa yɛkpondɛ Belemgbunlililɛ ne.’​—Mat. 6:22-25, 33.

17-18. Duzu a yɛbahola yɛayɛ amaa yɛabɔ agɔnwolɛvalɛ mɔɔ yɛ nee Gyihova lɛ la anwo bane a?

¹⁷ Siezie ɛ nwo sie. Ɔwɔ kɛ sogyanli dimoa siezie ɔ nwo maa mɔɔ bazi la. Saa yɛbahola yɛabɔ ninyɛne mɔɔ Gyihova ɛva ɛwula yɛ sa la anwo bane a, ɔwɔ kɛ yɛyɛ yɛ ninyɛne ndɛndɛ wɔ mekɛ mɔɔ yɛbanwu esiane la. Duzu a bahola aboa yɛ amaa yɛayɛ yɛ ninyɛne ndɛndɛ a? Ɔwɔ kɛ yɛnwu mɔɔ yɛbayɛ la kolaa na esiane bie azi.

¹⁸ Kɛ ndonwo la, saa menli dɔɔnwo kɔ gyimalilɛ bie abo a, bɛkile bɛ ɛleka mɔɔ saa esiane bie si a, bɛbahola bɛava ɛkɛ bɛavinde la. Duzu ati ɔ? Amaa saa esiane bie si a, bɛ nye zo anda bɛ. Zɔhane ala a ɔwɔ kɛ yɛsiezie yɛ nwo yɛsie amaa yɛanwu mɔɔ yɛbayɛ la wɔ mekɛ mɔɔ yɛlɛnea TV anzɛɛ yɛwɔ yintanɛte ne azo na yɛ nye babɔ nla nu ɛbɛlatane, basabasayɛlɛ anzɛɛ kpɔkyevolɛma edwɛkɛ bie azo la. Saa yɛsiezie yɛ nwo yɛmaa mɔɔ bahola azi la a, ɔbamaa yɛayɛ yɛ ninyɛne ndɛndɛ amaa yɛabɔ agɔnwolɛvalɛ mɔɔ yɛ nee Gyihova lɛ la anwo bane na yɛ nwo ade wɔ ɔ nyunlu.​—Edw. 101:3; 1 Tim. 4:12.

19. Saa yɛbɔ ninyɛne mɔɔ sonle bolɛ mɔɔ Gyihova ɛva ɛwula yɛ sa la anwo bane a, nyilalɛ boni mɔ a yɛbanyia a?

¹⁹ Ɔwɔ kɛ yɛbɔ ninyɛne mɔɔ sonle bolɛ mɔɔ Gyihova ɛva ɛwula yɛ sa, mɔɔ le Baebolo nu nɔhalɛ ne mɔɔ sonle bolɛ yɛɛ nwolɛ adenle mɔɔ yɛnyia kɛ yɛbahilehile awie mɔ la anwo bane. Saa yɛyɛ zɔ a, yɛbanyia adwenle mɔɔ anu te, ɛbɛlabɔlɛ mɔɔ gyi bodane zo yɛɛ yɛ nye balie kɛ yɛlɛboa awie mɔ yɛamaa bɛaranwu Gyihova la. Ɔlua Gyihova moalɛ zo, yɛbahola yɛabɔ ninyɛne mɔɔ yeva yewula yɛ sa la anwo bane.​—1 Tim. 6:12, 19.