1-2. Lele oborẹ ọ ha uvuẹn 1 Timothy 6:20, me ya yẹ Timothy?

ỌGBỌ buebun a ha ekwakwa eghoghanren rẹn awọrọ mọrọn. Jerẹ udje, ọwan a sẹrorẹ igho ọwan rhẹ ibanki. Orhianẹ a sẹrorẹ igho rhẹ ibanki, e vwo imwẹro taghene o vrẹ-ẹ, e ji so yi-i. Omarana, ọwan i dabu vwẹruọ oborẹ o mevirhọ ra na ha emru ọghoghanren rẹn ohworho mọren.

² Se 1 Timothy 6:20. Ọnyikọ Paul ọ karorhọ i Timothy taghene e tiobọnu emru ọghoghanren riẹn, nọyẹ irherhe ọgbagba kpahen egbemwuo Osolobrugwẹ rẹn ituakpọ. A ji yẹ Timothy uphẹn ọghoghanren ro no ghwoghwo ẹmro na, ji “wian owian oghwoghwẹmro.” (2 Tim. 4:2, 5) Paul ọ ha urhebro rẹn Timothy nọ sẹrorẹ oborẹ e tiobọnu riẹn na. Jerẹ Timothy, o ji vwo ekwakwa eghoghanren ra yẹre ọwan. Me yẹ ekwakwa enana? Mesoriẹ o fo na sẹrorẹ ekwakwa eghoghanren enana ri Jehova ọ yẹre ọwan na?

3-4. Me yẹ iroro ezẹko ri lẹrhẹ irhomẹmro i Baibol na ghanren?

³ Jehova ọ yẹre ọwan irherhe ọgbagba kpahen irhomẹmro eghoghanren ri ha uvuẹn i Baibol na. Irhomẹmro enana eghoghanren fọkime aye e yono ọwan oborẹ ene ru vwo omamọ onyerẹnkugbe rhẹ i Jehova, aye e ji dje rẹn ọwan oborẹ ọ yẹ ohworho omamerhomẹ uvuẹn akpenyerẹn yen. Erhe rhiabọ dede irhomẹmro enana ji ha aye ruiruo, na sabu vabọ iyono efian ọrhẹ irueruo ijẹfuọn.—1 Cor. 6:9-11.

⁴ Iroro ọrọrọ rọ soriẹ irhomẹmro i Baibol na a ghanren yẹ, Jehova o dje aye rẹn ihworho ri homariotọre ri “vwo omamọ ẹhẹn.” (Acts 13:48) Ihworho enana i vwo ekwerhọ taghene ọvrẹn ra hẹrosua ro ji vwo ẹghwanren na, yo yono ọwan kpahen i Baibol na inyenana. (Matt. 11:25;  24:45) Ọwan ọvo i sabu yono irhomẹmro enana-a, ọ ji ghanren na dabu vwẹruọ ye.—Prov. 3:13, 15.

5. Me yẹ emru ọrọrọ ri Jehova ọ yẹre ọwan?

⁵ Jehova ọ yẹre ọwan uphẹn re ne yono awọrọ urhomẹmro ro sekpahiẹn ọrhẹ egbemwuo ọnẹyen. (Matt. 24:14) Aghwoghwo ọwan ọghoghanren fọkime ọ ha uphẹn rẹn awọrọ rhiẹ ukoko i Jehova, ji yẹ aye uphẹn aye ine vwo arhọ i bẹmẹdẹ. (1 Tim. 4:16) Sẹ ọwan e ghwoghwo ọgbọ buebun yanghene ibiesuọn, ọwan a hobọtua owian rọ mai ghanren kparobọ uvuẹn ọke ọnana. (1 Tim. 2:3, 4) Ghini emru omamerhomẹ re ne lele Osolobrugwẹ wian!—1 Cor. 3:9.

6. Me yọ phia rẹn ihworho ezẹko ri vwe kwe dẹrẹ?

⁶ Ihworho ezẹko uvuẹn ọke i Timothy, e vwo ọdaremẹro kpahen uphẹn aye ine lele Osolobrugwẹ wian kugbe-e. Fọkime Demas o vwo ẹguọlọ kpahen irueruo akpọ ọnana, no tiẹn uphẹn ro no leli Paul wian kugbe. (2 Tim. 4:10) Phygelus ọrhẹ Hermogenes i sẹrerhumuji owian aghwoghwo na, fọkime aye a zofẹn taghene ana kparehaso aye jerẹ i Paul. (2 Tim. 1:15) Hymenaeus, Alexander, ọrhẹ Philetus ni rhiẹ inyikọ efian, ji sẹrerhumuji urhomẹmro na. (1 Tim. 1:19, 20; 2 Tim. 2:16-18) Itiọrurhomẹmro, ihworho enana i vwo ẹguọlọ kpahen Jehova bi, ọrẹn aye ni sẹrerhumuji irhomẹmro eghoghanren re tiobọnu rẹn aye.

7. Ena ego yẹ Echu ọ ha ruiruo hasuẹ ọwan inyenana?

⁷ Marhẹ Echu o ru damoma nọ lẹrhẹ ọwan sẹrerhumuji irhomẹmro eghoghanren ri Jehova ọ yẹre ọwan ne? Djokarhọ ena Echu ezẹko. Ọ ha iruẹn ọrhẹ ughe jiri irueruo, iroro ọrhẹ iruemru ro fiẹrorhọ taghene ọnọ lẹrhẹ ọwan sẹrerhumuji urhomẹmro na. Ọ damoma djofẹn mwu ọwan nyoma ọhiẹn otuẹdẹre yanghene ẹkparehaso, neneyo a dobọ owian aghwoghwo na ji. Ọ ji damoma rọ nọ riẹriẹ ọwan na kerhọ “iyono efian re se ‘irherhe’” rẹ idibo ẹkparehaso i haphia, na sẹrerhumuji urhomẹmro na.—1 Tim. 6:20, 21.

8. Me wu yono nẹ udje omizu ọhworhare owu re se Daniel?

⁸ Arha jomarhotọre-e, ana sabu sẹrerhumuji urhomẹmro na bibiesuọn. Roro kpahen udje i Daniel, * ro vwo ẹguọlọ kpahen iruẹn ekpetughe. Nọ tare: “Mi ha emrẹ ẹgbukpe ikpe ọke mia tuẹn iruẹn ekpetughe rhọ. Ọke ukaro, mie ruẹn iruẹn  ekpetughe ro vwo vwo imwofẹn. Ọrẹn, bibiesuọn ni mi tuẹn iruẹn rọ vuọnren rhẹ ozighi ọrhẹ irueruo ikpodje rhọ.” Ọke oru, Daniel nọ ghwọghọ inọke 15 kẹdẹkẹdẹ e ruẹn iruẹn ekpetughe. Daniel nọ tare, “Mi dabu rhe taghene aruẹ iruẹn mie ruẹn ọrhẹ inọke mia ghwọghọ rhọ ye, ọ lẹrhe mẹ tephe rẹn Jehova. Ọrẹn, mi brorhiẹn uvuẹn ọmudu mẹ ne taghene iruemru-urhi Baibol na e sekpahen mẹ-ẹ.” Oriẹriẹme rọ ha iruẹn ọrhẹ ughe, ọnọ sabu lẹrhẹ ọwan sẹrerhumujẹ urhomẹmro na. Ọrana ọrhọ phia, irhomẹmro eghoghanren ri Jehova ọ yẹre ọwan, ọnọ sabu vru nẹ ọwan obọ.

9. Lele oborẹ ọ ha uvuẹn 1 Timothy 1:18, 19, ọrọmo yi Paul ọ ha Timothy dje?

⁹ Se 1 Timothy 1:18, 19. Paul ọ ha Timothy dje isodja, nọ ji ha urhebro riẹn no rho “fiuvweri orhorhomu na.” Uvweri ọrana orhiẹ uvweri re rhiẹromẹrẹ-ẹn, ọrẹn ọrẹ ene ru ọhọre Osolobrugwẹ. Izede ego yẹ Ilele Kristi i ru họhọ isodja re fiuvweri? Iruemru ego ya guọlọre ne vwo, re rhiẹ isodja i Kristi na? Jene yono kpahen iyono isionrin ra na sabu yono nẹ udje i Paul. Iyono enana ina ha userhumu rẹn ọwan dabu sẹrorẹ urhomẹmro na.

10. Me yẹ uruemru ọ ga Osolobrugwẹ, mesoriẹ o fo ne vwo yi?

¹⁰ Vwo uruemru ọ ga Osolobrugwẹ. Omamọ isodja o vwo atamwu. Ọye ọ dabu wọnrọn nọ sẹrorẹ ohworho ro vwo ẹguọlọ kpahen yanghene emru ọghoghanren ro vwori. Paul ọ ha urhebro rẹn Timothy no vwo uruemru ọ ga Osolobrugwẹ, nọyẹ ẹguọlọ atamwu kpahen Osolobrugwẹ. (1 Tim. 4:7) Ọke uruemru ọ ga Osolobrugwẹ ọrhẹ ẹguọlọ re vwori orho kodo rhọ, omwemẹ ra na sẹrorẹ urhomẹmro na nọ nọ gbanhon.—1 Tim. 4:8-10; 6:6.

11. Mesoriẹ a guọlọ omerhesun?

¹¹ Vwo omerhesun. Nẹ isodja ọ sabu mwuegbe hẹrhẹ uvweri, ono vi vwo omerhesun. Timothy ọ sabu mevi gbanhon uvuẹn ukoko na fọkime ọ nyalele urhebro ri Paul ọ yẹriẹ, nọ zẹ nẹ ojemẹ esọsọ, no vwo iruemru ọ ga Osolobrugwẹ, no ji kwomakugbe imizu ukoko na. (2 Tim. 2:22) Ọrana ọ guọlọ omerhesun. A ji guọlọ omerhesun na sabu wọnrọn haso ojemẹ ugboma ọwan. (Rom. 7:21-25) Habaye, a guọlọ omerhesun na sabu ti uruemru ahwanren na nẹ oma, ji ku uruemru ọkpokpọ rhọ. (Eph. 4:22, 24) Orhianẹ oma ọ ghwọgherẹ ọwan uvuẹn obẹta ẹdẹ na ne, o fori na damoma riẹ uyono ukoko.—Heb. 10:24, 25.

12. Izede ego ye ne ru ru rhomurhọ uvuẹn oborẹ a ha i Baibol na ruiruo lele?

¹² O fori nẹ isodja ọ dabu yono oborẹ a ha ekwakwa uvweri ruiruo. Nọ sabu ten ona, o fori no rho yono ọke ephian. Omaran ọ ji havwọ, o ji fo na ten ona oborẹ a ha i Baibol na ruiruo lele. (2 Tim. 2:15) Ana sabu yono ena enana ezẹko uvuẹn uyono ukoko. Ọrẹn, orhianẹ a guọlọ ha userhumu rẹn awọrọ vwo imwẹro taghene urhomẹmro i Baibol na ọ ghini ghanren, o fori ne yonie ọke ephian. O fori na ha i Baibol na bọn esegburhomẹmro ọwan gbanhon. Ọnana ọ ghwẹ ọrẹ ene se i Baibol na ọvo. O fori ne roro kodo kpahen oborẹ e seri, ji guọlọ riarorhọ uvuẹn ẹbe ukoko na, neneyo a dabu vwẹruọ i Baibol na jeghwai haye ruiruo. (1 Tim. 4:13-15) Ọke ọrana, na na sabu ha i Baibol na yono awọrọ. Ọgbọrọrọ, ọnana ọ ghwẹ ọrẹ ana ghwai se ikerẹmro i Baibol  na ọvo. A guọlọ ha userhumu rẹn ihworho ra vware vwẹruọ oghwẹmro i Baibol na, ọrhẹ oborẹ ọ ru sekpahen aye. Nyoma re ne vwo ẹkwaphiẹrhotọre uyono i Baibol omobọ ọke ephian, ana sabu ru rhomurhọ uvuẹn oborẹ a ha i Baibol na yono awọrọ lele.—2 Tim. 3:16, 17.

13. Lele oborẹ ọ ha uvuẹn Hebrews 5:14, mesoriẹ o fo ne vwo ọmẹrẹnvwrurhe?

¹³ Vwo ọmẹrẹnvwrurhe. Isodja ono vi vwẹruọ ọke okpetu ọ sa, jeghwai kẹnoma riẹn. Omarana, o ji fo ne vwẹruọ erhirhiẹ ri na sabu rhua ẹkuọn vwe ọwan, ji kẹnoma rẹn imwofẹn na. (Prov. 22:3; se Hebrews 5:14.) Jerẹ udje, o fori na ha ẹghwanren djẹ iruẹn ọrhẹ ughe ọwan. Ughe buebun e jiri irueruo ijẹfuọn. Aruẹ irueruo erana i vwa merhen Osolobrugwẹ oma-a, aye a ji rhua ẹkuọn vwe ọwan. Omarana, ana vi kẹnoma rẹn iruẹn ọrhẹ ughe ri na sabu lẹrhẹ ẹguọlọ re vwo kpahen i Jehova seriotọre bibiesuọn.—Eph. 5:5, 6.

14. Marhẹ ọmẹrẹnvwrurhe o ru ha userhumu rẹn Daniel?

¹⁴ Daniel ra hunute vrẹn ne, nọ mẹrẹnvwrurhe taghene iruẹn re jiri ozighi ọrhẹ ikpodje ro ruẹn uvuẹn ekpetughe, ọ suẹ obẹnbẹn riẹn. Nọ guọlọ riarorhọ uvuẹn ẹbe ri na sabu ha userhumu riẹn fi obẹnbẹn na kparobọ uvuẹn Watchtower Library. Marhẹ ọnana ọ hobọte yi lele? Nọ dobọ iruẹn ekpetughe ri vwe fo ji. No ji fioba rhẹ iruẹn ro ruẹn uvuẹn itanẹti, o vwo rho ji lele awọrọ ruẹn iruẹn na-a. Daniel nọ tare, “Ukperẹ mi ne ruẹn iruẹn ekpetughe, ni mie ruẹ ekwakwa erọrọ yanghene kwomakugbe imizu uvuẹn ukoko na.” Vwana, Daniel ọ ga ẹrhẹ ọkobaro ọke ephian ọrhẹ ọkpako ukoko.

15. Mesoriẹ iyẹnrẹn efian o mwuofẹn?

¹⁵ Jerẹ Timothy, ene vi vwrurhe imwofẹn rọ ha iyẹnrẹn efian rẹ idibo ẹkparehaso e jirẹ. (1 Tim. 4:1, 7; 2 Tim. 2:16) Jerẹ udje, aye ina sabu kerabọ iyẹnrẹn efian kpahen imizu ukoko na yanghene lẹrhẹ ọwan vwo ẹhẹn eveva kpahen ukoko i Jehova. Aruẹ iyẹnrẹn efian enana ina sabu lẹrhẹ esegburhomẹmro ọwan seriotọre. O fo ne vwo imwẹro kpahen aruẹ iyẹnrẹn enana-a. Mesoriẹ? Fọkime “ehworhare ri vwo ẹhẹn obiobiomu ri vwe rhe urhomẹmro na,” ye titi aruẹ iyẹnrẹn efian enana.  Ẹkẹ aye ọrẹ aye ina tuẹn “itietio ọrhẹ ẹfro” rhọ. (1 Tim. 6:4, 5) Aye i guọlọre ne vwo imwẹro kpahen efian aye, ji vwo ẹhẹn eveva kpahen imizu ukoko na.

16. Me ya na kẹnoma riẹn?

¹⁶ Tẹnrovi owian i Jehova. Rẹ Timothy “o rhiẹ omamọ isodja i Kristi Jesu na,” o fori nọ tẹnrovi owian Uvie na, ukperẹ ọnọ tẹnrovi ekwakwa ugboma ọrhẹ ekwakwa erọrọ uvuẹn akpọ na. (2 Tim. 2:3, 4) Jerẹ Timothy, o fo na ha uphẹn rẹn ojemẹ re ne vwo ekwakwa ugboma rhọ-ọ. “Ọphiẹrhọ omẹgbanhon efe” ọnọ sabu lẹrhẹ ẹguọlọ re vwo kpahen Jehova, ọdaremẹro kpahen i Baibol na ọrhẹ oruru re ne yono awọrọ kpahiẹn seriotọre. (Matt. 13:22) Ene vi ruẹ akpenyerẹn ọwan lọhọ, ji ha ọke ọrhẹ omẹgbanhon ọwan “rha guọlọ Uvie na vwẹre.”—Matt. 6:22-25, 33.

17-18. Me ye ne ruo na sabu sẹrorẹ onyerẹnkugbe ọwan rhẹ i Jehova?

¹⁷ Mwuegbe wu na kpare udjoghwẹ ogege. O fori nẹ isodja o mwuegbe rhotọre oborẹ ono ru sẹrorẹ omayen. Orhianẹ a guọlọ sẹrorẹ ekwakwa ri Jehova o tiobọnu rẹn ọwan, o fori na kpare udjoghwẹ ogege ọke arha dẹrughwaroghwu imwofẹn. Me yọ nọ sabu ha userhumu rẹn ọwan kpare udjoghwẹ ogege? O fori ne mwuegbe rhotọre oborẹ ene ruo arha mẹrẹn erhirhiẹ imwofẹn.

¹⁸ Jerẹ udje, erhe riẹ irueruo rẹ ihworho buebun e koko, na ta rẹn otu na nẹ aye i guọlọ ekete rọ phẹrẹre aye ina sabu nya ze, bọmọke ẹkwaphiẹrhotọre na ọnọ ki tonrhọ. Mesoriẹ? Neneyo aye i sabu nẹ ekete na phẹphẹrẹ orhianẹ erhirhiẹ kpregede ọ homaphia. Omaran ọ ji havwọ, ana sabu roro kpahen “udjoghwẹ” ra na kpare rhotọre, sekpahen oborẹ ene ruo orhianẹ a mẹrẹn ughe ọfanrhiẹn, ozighi yanghene iyẹnrẹn idibo ẹkparehaso, ọke ra ha itanẹti ruiruo yanghene ọke re ni ekpetughe. Erhe mwuegbe rhotọre, na kiki kpare udjoghwẹ re ne je ruẹ oborẹ ọsọre, ji sẹrorẹ uruemru rọ fonron uvuẹn ukẹro i Jehova.—Ps. 101:3; 1 Tim. 4:12.

19. Ebrurhọ ego ya na mẹrẹn arha sẹrorẹ ekwakwa eghoghanren ri Jehova o tiobọnu rẹn ọwan ne?

¹⁹ Ana vi sẹrorẹ ekwakwa eghoghanren ri Jehova o tiobọnu rẹn ọwan, nọyẹ, irhomẹmro i Baibol na ọrhẹ uphẹn re vwori re ne yono awọrọ kpahiẹn. Erhe ruẹ ọnana, ene vwo ẹhẹn obrorhiẹn rọ fonron, obọdẹn akpenyerẹn, ọrhẹ aghọghọ ana ha userhumu rẹn ihworho yono kpahen Jehova. Nyoma userhumu i Jehova, na na sabu sẹrorẹ ekwakwa re tiobọnu rẹn ọwan ne.—1 Tim. 6:12, 19.