1, 2. 1 Timoteo 6:20 nisqanman hinaqa, ¿imatam Timoteoqa ruwanan karqa?

PIPAPAS qullqin utaq achka qullqipa chanin imanpas kaptinqa mana wischurunanpaqmi utaq pipas mana suwarunanpaqmi hukman churapachikun.

² (Qaway 1 Timoteo 6:20). Apostol Pablom Timoteota yuyarichirqa runakunapaq Diospa ima munaynin kasqanmanta yachasqanta. Chayqa karqa quri-qullqi hina ancha chaninniyuqmi. Timoteoqa runamasinkunamantaqmi willakunan karqa Jehova Diosmanta sumaq willakuykunata (2 Tim. 4:2, 5). Chaymi Pabloqa Timoteota nirqa yachasqankunata waqaychananpaq. Ñuqanchikmanpas Jehova Diosqa quri-qullqi hina sumaq yachachikuykunatam quwarqanchik. Kamachiwanchiktaqmi chaykunata willakunapaqpas.

3, 4. ¿Imanasqataq bibliamanta yachachikuykunaqa quri-qullqi hina?

³ Jehova Diosqa anchata kuyawasqanchikraykum imam kaqta yachachiwanchik, chayqa tarikun bibliapim. Chay yachachikuykunaqa quri-qullqi hinam. Yanapawanchikmi Jehova Dioswan kuyachikunapaq hinaspa kusisqa kawsakunapaq. Chayman hina kawsakuspaqa pantay yachachikuykunatam qipanchachkanchik. Hinaspapas manam wakin runakuna hinañachu kawsakunchik (1 Cor. 6:9-11).

⁴ Jehova Diosqa palabranpi sumaq yachachikuykunataqa llampu sunqu runakunallamanmi yachachin (Hech. 13:48).  Chayna runakunaqa manam iskayrayankuchu Jehova Diosqa llaqtanpi punta apaqkunawan chay yachachikuykunata willawasqanchikmantaqa (Mat. 11:25; 24:45). Ñuqanchikqa manamá chay yachachikuykunataqa kikillanchikmanta yachaytaqa atichwanchu. Chaykunamanta yachayqa quri-qullqita tariy hinam (Prov. 3:13, 15).

5. ¿Imata ruwanapaqwanmi Jehova Diosqa kamachiwanchik?

⁵ Jehova Diosqa kamachiwanchiktaqmi paymanta imam kaqta runamasinchikkunaman yachachinanchikpaqpas, chaypas quri-qullqi hinam (Mat. 24:14). Jehova Diospa yachachikuyninkunata yachaspankum runamasinchikkunaqa Jehova Diosman asuykuspa wiñaypaq kawsakuyta haypanqaku (1 Tim. 4:16). Chaymi Diosmanta willakunanchikpaq hinalla kallpanchakunanchik, astawanraqmi kay tukupay punchawkunapiqa (1 Tim. 2:3, 4). Chayta ruwaspanchikqa Diostam yanapachkanchik (1 Cor. 3:9).

6. ¿Imaynataq Timoteopa tiemponpi wakin iñiqkuna rikurirurqaku?

⁶ Timoteopa tiemponpi wakin iñiqkunam manaña tukuy sunqunkuwanchu Diosta yupaycharqaku. Hinaspankum paymanta karunchakururqaku. Hukninmi Demas, payqa ‘kay pachapi kaqkunata kuyaruspanmi’ manaña Pablota yanaparqañachu (2 Tim. 4:10). Figelo hinaspa Hermogenes sutiyuq iñiqkunapas yaqachusmi Pablo hina chiqnisqa kayta manchakuspanku Diosmanta willakuyta saqirurqaku (2 Tim. 1:15). Himeneo, Alejandro hinaspa Filetoñataqmi pantaykunata yachachispanku Diosmanta karunchakururqaku (1 Tim. 1:19, 20; 2 Tim. 2:16-18). Qallariypiqa yaqapaschá paykunaqa tukuy sunqunkuwan Diosta kuyarqaku, chaymantam ichaqa manaña chaynachu karqaku.

7. ¿Imakunatam satanasqa ruwachkan Diosmanta karunchakurunanchikpaq?

⁷ Satanasqa munan Diospa yachachiwasqanchikta hinaspa kamachiwasqanchikta yanqapaq hapinatam, chaypaqmi rikurichin mana allin kusirikuykunata. Diospa chiqnisqan kaqkunatataqmi rikurichin televisionpi hinaspa internetpipas. Chaymantapas, tukuytam ruwan runamasinchikkuna chiqniwananchikpaq, chaynapi manchakuspa Diosmanta manaña willakunanchikpaq. Satanasqa munantaqmi Dios qipanchaqkunapa yachachisqankuta uyarispanchik paymanta karunchakurunanchikta (1 Tim. 6:20, 21).

8. ¿Imatam yachachwan Danielta ima pasarusqanmanta?

⁸ Rikchan-rikchanllam kananchik, mana chayqa Diospa yachachiwasqanchikkunatam  yanqapaqña hapiyta qallaykuchwan. Rimarisun Daniel * sutiyuq iñiqmasinchikmanta. Paymi computadorapi pukllayman qukururqa. Kikinmi willakun: “Chunka wataypi kachkaspaymi computadorapi pukllayta qallaykurqani. Qallariypiqa manamá mana allin pukllaykunapichu pukllaq kani. Chaymantam ichaqa satanaspa munasqan manchakuypaq pukllaykunapiña pukllayta qallaykurqani”, nispa. Chaymantam Danielqa sapay punchawña achikyaqmanta tutaykuqkama pukllaq. Paymi nin: “Sunquypiqa yachakurqanim sapay punchaw chay mana allinkunapi pukllasqaywan Jehova Diosmanta karunchakusqayta. Ichaqa rumi sunqu rikuriruspaymi bibliapa nisqankunataqa yanqapaqña hapiyta qallaykurqani”, nispa. ¿Imatam yachachwan Danielta ima pasarusqanmanta? Daniel hina mana allinkunawan kusirikuspaqa Diospa yachachikuyninkunatam yanqapaqña hapiyta qallaykuchwan. Chaynapimá Diosmanta karunchakuruchwan.

9. 1 Timoteo 1:18, 19 nisqanman hinaqa, ¿imawanmi apostol Pabloqa Timoteota tupachirqa?

⁹ (Qaway 1 Timoteo 1:18, 19). Apostol Pablom Timoteota kaynata nirqa: “Guerrapi peleachkaq soldado hina hinalla peleay, chay peleasqaykiqa allinpunim”, nispa. ¿Imapitaq Diosta yupaychaqkunaqa guerrapi peleachkaq soldado hina kachwan? Chaypaqyá soldadowan apostol Pablopa tupachisqanmanta yachaykusun.

10. ¿Imataq yanapawasun Diospa kamachikuyninkunata yanqapaq hinata mana hapinapaq?

¹⁰ Sunqumantayá Diosta kuyasun. Allin soldadoqa kuyasqan runakunata yanapananpaqmi sunqumanta pelean. Chaymi apostol Pabloqa Timoteota kallpancharqa tukuy sunqunwan Jehova Diosta kuyananpaq (1 Tim. 4:7). Ñuqanchikpas sunqumanta Jehova Diosta kuyaspaqa manam yachachikuyninkunataqa yanqapaqchu hapisun (1 Tim. 4:8-10; 6:6).

11. ¿Imakunapaqtaq anchata kallpanchakunanchik?

¹¹ Allin kaqta ruwanapaqyá kallpanchakusun. Soldadoqa anchatam kallpanchakunan allin peleaq kananpaqqa. Chaymi Timoteopas Diosmanta mana karunchakunanpaqqa anchata kallpanchakunan karqa. Chayraykum apostol Pablopas nirqa mana allin munapayaykunamanta ayqikunanpaq, Diospa munasqanman hina kawsakunanpaq hinaspa iñiqmasinkunawan hukllawakunanpaq (2 Tim. 2:22). Ñuqanchikpas anchatam kallpanchakunanchik mana allin munapayaykunawan mana aysachikunanchikpaq (Rom. 7:21-25). Kallpanchakunanchiktaqmi mana allinkunata saqispa Diospa munasqanman hina kawsakunanchikpaqpas (Efes. 4:22, 24). Pisipasqaña kaspanchikpas anchatam kallpanchakunanchik huñunakuypi kanapaq (Heb. 10:24, 25).

12. ¿Imataq yanapawasun Diosmanta allin yachachiq kanapaq?

¹² Soldadoqa manaraq peleaq richkaspanmi peleayta yachanan. Chaynam ñuqanchikpas runamasinchikkunaman manaraq richkaspanchik bibliamanta allintapuni yachananchik (2 Tim. 2:15). Chaypaqqa huñunakuykunapim yachachiwanchik allin willakuq kananchikpaq. Chaywanpas runamasinchikkunaman allintapuni yachachinapaqqa kikinchik yachanapaqraqmi tiempochakunanchik. Ichaqa manam ñawinchayllachu-ñawinchananchik, aswanqa yuyaymanaspanchikmi mana entiendesqanchik kaqkunata qillqanchikkunapi  astawan yachananchik (1 Tim. 4:13-15). Chaynapimá runamasinchikkunaman Diosmanta yachachispanchikqa bibliata allinta servichikusun, hinaspapas yanapasunmi Diospa munasqanman hina kawsakunankupaq (2 Tim. 3:16, 17).

13. Hebreos 5:14 nisqanman hinaqa, ¿imanasqataq allin tantiaq kananchik?

¹³ Allin tantiaqyá kasun. Soldadoqa allintam yachanan imakuna mana allinman aparunanmantaqa. Ñuqanchikpas allintam yachananchik imakuna mana allinman aparuwananchikmanta (qaway Hebreos 5:14; Prov. 22:3). Chaypaqqa imakunawan kusirikunanchikpaqmi allinta tantiananchik. Chaymi Diosta yupaychaqkunaqa Jehova Diosmanta mana karunchakurunanchikpaq mana allin kusirikuykunataqa mana qawanchikchu televisionpipas nitaq internetpipas. Yachanchikmi mana allinkunataqa Dios chiqnisqanta. Yachanchiktaqmi munasqankuman hina kawsakuq runakunaqa kikinkutapas chaynataq runamasinkutapas ñakarichisqankuta (Efes. 5:5, 6).

14. ¿Imaynatam Danielta yanaparqa allin tantiaq kasqan?

¹⁴ Computadorapi mana allinkunawan pukllaq iñiqmasinchik Danielmi cuentata qukururqa chaykunaqa mana allin kasqanta. Chaymi qillqanchikkunapi yanapakuykunata maskarqa. Chayta ruwasqanraykum chay mana allin pukllaykunata saqirurqa, manañataqmi hukllawakurqachu pukllaqmasinkunawanpas. Danielmi nin: “Computadorapi pukllanaymantaqa iñiqmasinchikkunawan astawan hukllawakunaypaqmi kallpanchakurqani”, nispa. Danielqa Diosmanta 70 horata willakuqñam kunanqa, hinaspapas iñiqkunapi punta apaqmi.

15. ¿Imanasqataq Diosta qipanchaqkunapa nisqantaqa mana uyarinanchikchu?

¹⁵ Timoteo hinam yachanchik Diosta qipanchaqkunapa yachachisqankuqa Diosmanta karuncharuwananchikta (1 Tim. 4:1, 7; 2 Tim. 2:16). Ichapas iñiqmasinchikkunamanta utaq Diospa llaqtanpi punta apaqkunapa tantiasqankumanta llullakunata rimanmanku. Chay llullakunata uyarispaqa Diostam qipancharuchwan, hinaspapas iñiqmasinchikkunamantam karunchakuruchwan. Chaytamá paykunaqa munanku (1 Tim. 6:4, 5). Chaynaqa, amayá Diosta qipanchaqkunapa rimasqankutaqa uyarisunchu.

16. ¿Imakunawanmi mana aysachikunanchikchu?

 ¹⁶ Amayá huk ruwaykunawanqa aysachikusunchu. Timoteoqa ‘Jesucristopa allin soldadon’ kasqanraykum Diospa munayninta ruwananpaqqa mana ima negociomanpas chapukunanchu karqa, nitaqmi ima maskaymanpas qukurunanchu karqa (2 Tim. 2:3, 4). Timoteo hinam ñuqanchikpas tukuy ima kapuqniyuq munaywanqa mana aysachikunanchikchu. Apuyayta munaspanchikmi Jehova Diosta manaña kuyachwanñachu, palabrantapas manañam ñawinchachwanñachu, nitaqmi runamasinchikkunamanpas paymantaqa willakuchwanñachu (Mat. 13:22). Imapas kapuqllanchikwanmi kawsakunanchik, hinaspapas tiemponchiktam servichikunanchik Diospa munayninta puntapi churanapaq (Mat. 6:22-25, 33).

17, 18. ¿Imatam ruwananchik Jehova Diosmanta mana karunchakurunanchikpaq?

¹⁷ Mana allinkunata chaylla qipanchaytayá yachasun. Soldadoqa manaraq peleaq richkaspanmi yachananña imapas kaptin ima ruwananmanta. Ñuqanchikpas yachananchikmi mana allinkuna kaptin chaylla qipanchanapaq ima ruwanamanta.

¹⁸ Hatun huñunakuykuna kaptinqa manaraq qallarichkaptinmi willawanchik maylawpi punkunkuna kasqanta, chaynapi imapas kaptin maynin lluqsina kasqanta yachanapaq. Chaynam ñuqanchikpas ima ruwayta yachananchik internetta utaq televisionta qawachkaptinchik ima mana allinpas lluqsiramuptinqa. Mana allinkunata chaylla qipanchayta yachaspaqa manam haykapipas Jehova Diosmantaqa karunchakusunchu (Sal. 101:3; 1 Tim. 4:12).

19. ¿Imaynam kasun Jehova Diosmanta yachasqanchikta hinaspa paymanta willakusqanchikta quri-qullqita hina qawaspaqa?

¹⁹ Jehova Diosmanta imam kaqta yachasqanchikqa hinaspa runamasinchikkunaman paymanta willasqanchikqa quri-qullqi hinam. Chayraykum yanqapaqta hinaqa mana hapinanchikchu. Chaypaqmá Jehova Diosninchik yanapawasun. Chaynapim hawka tarikusun, kusisqataqmi tarikusun runamasinchikkunaman Jehova Diosmanta yachachispapas (1 Tim. 6:12, 19).