1, 2. 1 Timoteo 6:20 nisqan jina, ¿imatan ruwanan karan Timoteo?

ANCHA valorniyoq kaqninchistaqa manan jinallataqa pimanpas jap’ichikusunmanchu. Chaymi qolqenchistapas bancoman churanchis ama chinkachinanchispaq otaq ama suwachikunanchispaq. Chaypin reparanchis imapas ancha valorniyoq kaqninchistaqa confiasqanchis runallaman qosqanchista.

² (Leey 1 Timoteo 6:20). Apóstol Pablon Timoteota yuyarichiran imachus chaskisqanqa ancha valorniyoq kasqanta. ¿Imatan Timoteo chaskiran? Diospa munayninmanta cheqaq kaq yachachikuyta. Chaymantapas “allin willakuykunata” willananpaq llank’ayta (2 Tim. 4:2, 5). Chaymi Pablo Timoteota kallpacharan imachus chaskisqanta allinta cuidananpaq. Noqanchismanpas Jehová Diosqa jap’ichiwanchismi ancha valorniyoq kaqkunata. ¿Iman chaykuna? ¿Imaraykun imachus chaskisqanchiskunata allinta cuidananchis?

3, 4. ¿Imakunaraykun Bibliapi kaq yachachikuykuna ancha valorniyoq?

³ Sumaq sonqo kayninpin Jehová Diosqa qowaranchis Bibliapi cheqaq kaq yachachikuyninkunata. Chay yachachikuykunan yanapawanchis amigon kananchispaq, kusisqa kausananchispaqpas. Chay yachachikuyninkunata kasukuspan, manaña pantasqa yachachikuykunaman jinañachu kausanchis, nitaq qhelli ruwaykunaq kamachinñachu kanchispas (1 Cor. 6:9-11).

 ⁴ Bibliapi cheqaq kaq yachachikuykunan ancha valorniyoq kallantaq Jehová Dios ‘llapa munaqkunallaman’ qosqanrayku (Hech. 13:48). Chay runakunan chaskikunku Diospa cheqaq yachachikuyninkunata Diospa llaqtanpa yanapayninwan (Mat. 11:25; 24:45). Manan noqallanchismantaqa chay cheqaq yachachikuykunata yachaytaqa atisunmanchu. Chaymi chay yachasqanchisqa imamantapas aswan valorniyoq (Prov. 3:13, 15).

5. ¿Imatawanmi Jehová Dios confiawallanchistaq?

⁵ Jehová Diosmi confiawallanchistaq cheqaq yachachikuyninkunata jujkunaman yachachinanchispaq (Mat. 24:14). Chay yachachikuykunaraykun runakunaqa Jehová Diospa familian kapunkuman, wiñay kausaytapas chaskikunkuman (1 Tim. 4:16). Pisitaña askhataña Diosmanta willanchis chaypas, aswan importante llank’aypin yanapakushanchis (1 Tim. 2:3, 4). ¡May allinmi Jehová Diospaq llank’ayqa! (1 Cor. 3:9).

6. ¿Iman pasaran wakin cristianokunata?

⁶ Timoteoq tiemponpin wakin cristianokunaqa mana valorarankuchu Jehová Dios llank’ayta paykunaman qosqanta. Jujninmi karan Demas payqa kay tiempo kausaytan astawan munakuran, chaymi Diospaq llank’ayninta saqerpariran (2 Tim. 4:10). Chaymantapas Figelo, Hermógenes runakunapas saqerparirankun Diosmanta willay llank’ayta, yaqapaschá paykunaqa Pablo jina qatikachasqa kayta manchakuranku (2 Tim. 1:15). Himeneo, Alejandro, Fileto runakunapas apóstata kapuspan cheqaq yachachikuyta seqepuranku (1 Tim. 1:19, 20; 2 Tim. 2:16-18). Cheqaq kaqta mana valorasqankuraykun iñiyninkuta saqepuranku.

7. ¿Imakunawanmi Satanás Diospa cheqaq yachachikuyninkunamanta t’aqayta munawanchis?

⁷ Satanasqa imaymanawanmi t’aqayta munawanchis Jehová Diospa qowasqanchis cheqaq yachachikuyninkunamanta. Chaykunan kashan, imaymana kusirikuykuna, mana allin willakuykuna ima. Chaykunawanmi piensayninchista cambiayta munan. Chaymantapas jujkunaq burlakusqanwanmi otaq qatikachawasqanchiswanmi manchachiyta munawanchis manaña Diosmanta willananchispaq. Engañaytan munawallanchistaq apóstata runakunaq ‘yanqa rimayninkunawanpas’, chhaynapi cheqaq kaqta saqepunanchispaq (1 Tim. 6:20, 21).

8. ¿Imatan yachanchis Danielmanta?

⁸ Manachus cuidakusun chayqa pisi-pisimantan cheqaq kaqta chinkachisunman.  Danielmanta * yachasun, paymanqa internetpi pujllaymi gustaran. Paymi chaymanta willakun: “Chunka wataypi kashaspan pujllayta qallarirani. Qallariypiqa allin pujllaykunallawanmi pujllaq kani. Pisi-pisimantan ichaqa millay pujllaykunawan pujllayta qallaripurani”, nispa. Payqa sapa p’unchaymi 15 horakuna jinaña pujllasharan. Danielmi nillantaq: “Sonqoy ukhupiqa yacharanin chay millay pujllaykuna askha horakuna pujllasqaypas Jehová Diosmanta t’aqawashasqanta. Sonqoymi rumiyapusharan chaymi piensarani Bibliaq yachachikuyninkunaqa mana noqapaq jinachu kasqanta”, nispa. Kaymi reparachiwanchis mana allin kusirikuykunaqa cheqaq yachachikuykunamanta t’aqawasqanchista. Jehová Diospa qowasqanchiskunatapas chinkachiy atisqanchista.

9. 1 Timoteo 1:18, 19 nisqan jina, ¿imawanmi Pablo Timoteota tupanachiran?

⁹ (Leey 1 Timoteo 1:18, 19). Pabloqa juj soldadowanmi Timoteota tupanachiran, chaymi niran: “Maqanakushallaypuni allin kaq guerrapi”, nispa. Ichaqa manan cheqaq guerrapichu maqanakunan karan. Chhaynari, ¿imaynapitaq cristianokuna guerrapi maqanakuqkuna jina kasunman? ¿Ima allin kaqkunatan Cristoq soldadonkuna wiñachinanchis? Chaypaqmi Pabloq tupanachisqan pisqa ruwaykunamanta yachasun.

10. ¿Iman Dios sonqo kay, imaraykun allinpuni?

¹⁰ Dios sonqo kasun. Juj allin soldadoqa tukuy kallpawanmi maqanakunan piraykupas otaq imatapas munakusqanrayku. Chayraykuchá Pablopas kallpacharan Timoteota, juj soldado jina junt’aq sonqowan Jehová Diosta servinanpaq (1 Tim. 4:7). Noqanchispas junt’aq sonqo kasun chayqa, manan cheqaq kaqtaqa kacharisunchu (1 Tim. 4:8-10; 6:6).

11. ¿Imaraykun kallpachakunanchis allinta imatapas ruwananchispaq?

¹¹ Kallpachakusun allinta imatapas ruwanapaq. Juj soldadoqa allintan imatapas ruwanan, ruwanankunawan junt’ananpaq. Pablon Timoteota kallpacharan mana allin munapayaykunamanta ayqekunanpaq, allin cristiano kananpaq, iñiqmasikunawan juj nisqalla kausananpaqpas, chaykunata kasukuspan Timoteoqa allinta ruwanankunawan junt’aran Cristoq soldadon jina kananpaq (2 Tim. 2:22). Noqanchispas allintan kallpachakunanchis kanqa mana allin munapayaykunamanta ayqekunanchispaq (Rom. 7:21-25). Kallpachakunallanchistaqmi mauk’a runa kasqanchista mosoq runa kaywan cambiananchispaq (Efes. 4:22, 24). Yaqapaschá sayk’usqa kaspapas astawanraq kallpachakunanchis kanqa juñunakuykunaman rinanchispaqpas (Heb. 10:24, 25).

12. ¿Iman yanapawasun Bibliamanta allin yachachiq kananchispaq?

¹² Juj soldado maqanakuypi atipananpaqqa allintan preparakunan. Chhaynallataqmi cristianokunapas allinta preparakunanchis Diospa siminmanta allinta yachachinanhispaq (2 Tim. 2:15). Chaypaqqa juñunakuykunan yanapawanchis. Ichaqa runakuna Bibliapi cheqaq yachachikuykunata valoranankuta munanchis chayqa, kallpachakunanchismi sapallanchispi Bibliata t’aqwinanchispaq. Iñiyninchistan kallpachananchis Diospa siminwan, chaypaqqa manan leeyllachu leenanchis. Aswanpas yuyaymanananchismi leesqanchispi, kallpachakunanchistaqmi  qelqanchiskunawan kuska astawan Bibliata t’aqwinanchispaq (1 Tim. 4:13-15). Chhaynapin Bibliawanpuni runakunaman yachachisun. Ichaqa runakunaman yachachispaqa manan leenallanchischu, aswanpas yanapananchismi allinninkupaq kasqanta entiendenankupaq. Chhaynaqa, sapa p’unchay Bibliata leesun allin yachachiq kananchispaq (2 Tim. 3:16, 17).

13. Hebreos 5:14 nisqan jina, ¿imaraykun allin yuyayniyoq kananchis?

¹³ Yuyayninchista allintan llank’achisun. Juj soldadoqa ñaupaqmantañan yuyaykunan ima sasachakuypas jamunanpi. Noqanchispas ñaupaqmantañan yuyaykunanchis imakunapi tarikunanchista chhaynapi ama ima mana allinpipas tarikunanchispaq (leey Hebreos 5:14; Prov. 22:3). Yuyaykunanchismi imakunawan kusikushasqanchista. Televisionpi peliculakunapi iman qhelli ruwaykuna rijurimun. Cristianokunaqa manan qhawananchischu chay qhelli ruwaykunataqa, chaykunan Jehová Dios munakusqanchista pisi-pisimanta chiriyachipunman. Jehová Diosqa cheqnikunmi chay qhelli ruwaykunataqa. Chay ruwaykunapi puriq runakunaqa paykuna kikinkutan manan allinta ruwakunku (Efes. 5:5, 6).

14. ¿Iman Danielta yanaparan?

¹⁴ Pusaq parrafopi rimamusqanchis Danielmi repararan pujllasqanwan kusikusqanqa mana allinchu kasqanta. Chaymi “Watchtower Library” nisqapi maskharan yanapaykunata. Maskhasqan qelqakunan yanaparan internetpi pujllaykunata saqepunanpaq, manañan juñukuranchu pujllaqmasinkunawanpas. Paymi nin: “Millay pujllaykunapi pujllanaymantaqa, iñiqmasikunawanmi juñukuyta qallarirani, cambiaranitaqmi imakunawan kusirikusqaytapas”, nispa. Danielmi kunanqa yanapakushan umalliq jina tukuy tiemponwantaqmi Diosmanta willashan.

15. ¿Imaraykun llulla yachachikuykunata mana uyarinanchischu?

¹⁵ Timoteo jinan noqanchispas reparananchis apóstata runakunaq yachachisqanqa mana allinchu kasqanta (1 Tim. 4:1, 7; 2 Tim. 2:16). Yaqapaschá iñiqmasinchiskunamanta, Diospa llaqtanmantapas llullakuspa mana allinta rimankuman iskayananchispaq. Chay llulla yachachikuykunaqa  iñiyninchistapas chiriyachinmanmi. Ama chaykunawanqa engañachikusunchu, chaykunaqa “ismusqa yuyayniyoq, cheqaq kaqta manaña entiendeq runakunamantan’ jamun, paykunaqa t’aqanasqa, ch’aqwapi kananchistan munanku (1 Tim. 6:4, 5). Chaymantapas paykunaq nisqankuta creespa iñiqmasinchiskunapi manaña confiananchistan munanku.

16. ¿Imakunamantan cuidakunanchis tukuy yuyaywan llank’ashanallanchispaq?

¹⁶ Tukuy yuyaywan llank’asun. ‘Jesuspa soldadon’ jinan Timoteoqa Diosmanta willaypi llank’ashallaran, manan qhapaq kaykunapichu ni juj ruwaykunapichu yuyayninqa kasharan (2 Tim. 2:3, 4). Noqanchispas Timoteo jina ama munapayasunchu “qhapaq kaykunata”, Noqanchisqa munakunchismi Jehová Diosta, Bibliata, Diosmanta willaytapas, manan chaykunataqa chinkachiyta munanchischu (Mat. 13:22). Imachus kaqninchiskunallawan kusisqa kausasun, tukuy tiemponchista kallpanchista ima churasun “Diospa gobiernonta” maskhayman (Mat. 6:22-25, 33).

17, 18. ¿Imatan ñaupaqmantaña ruwananchis iñiyninchispi allillan kananchispaq?

¹⁷ Usqhaylla imatapas ruwananchispaq listo kashasun. Juj soldadoqa ñaupaqmantañan piensanan imaña kaqtinpas ima ruwananta. Chhaynallataqmi noqanchispas Jehová Diospa qowasqanchiskunata cuidayta munanchis. ¿Iman chaypaq yanapawasunman? Ñaupaqmantañan piensananchis imapas kaqtin imatapas usqhaylla ruwananchispaq.

¹⁸ Jatun juñunakuykunapiqa ñaupaqmantañan willakun chaypi kaqkunaman imaña pasaqtinpas mayninta lloqsinankuta. Chhaynapi usqhaylla lloqsinankupaq. Chhaynallataqmi noqanchispas imaña kaqtinpas ñaupaqmantaña yachananchis ima ruwananchista. Yaqapaschá internetpi otaq televisionpi lloqsimunman apostatakunaq yachachisqan otaq qhelli kaqkuna maqanakuykunapas. Sichus yachanchisña ima ruwananchista chayqa usqhayllan cambiasun otaq apagasun, chhaynapi Diospaq ñaupaqenpi ch’uya kananchispaq (Sal. 101:3; 1 Tim. 4:12).

19. ¿Ima saminchaykunatan chaskisun Diospa qowasqanchis valorniyoq kaqkunata allinta cuidaspa?

¹⁹ Jehová Diosqa ancha valorniyoq kaqkunatan qowaranchis allintan cuidananchispaq. Chaykunan kashan Bibliapi cheqaq kaq yachachikuykuna, jujkunaman yachachiypas. Chaykunawan junt’aspan thaj concienciayoq kasun, kusisqataqmi kasunpas Diosta reqsinankupaq jujkunata yanapasqanchismanta. Jehová Diospa yanapayninwanqa allintan cuidasun ancha valorniyoq kaqkunata (1 Tim. 6:12, 19).