1-2. Kia tau ia 1 Timoteo 6:20, eaa tei orongaia kia Timoteo?

E ORONGA ana tatou i tetai apinga akaperepere ki tetai tangata kia akono. Tetai akaraanga, penei na te tuku anga i tetai moni ki roto i te bank. Me rave tatou i te reira, ka kite tatou e ka paruruia e kare e keiaia. No reira, ka mārama tatou i te aiteanga kia irinaki i tetai tangata me tukuia atu tetai apinga akaperepere kiaia.

² E tatau ia 1 Timoteo 6:​20. Akamārama te apotetoro ko Paulo kia Timoteo e kua rauka iaia tetai apinga akaperepere—te kite tika tikai no te akakoroanga o te Atua no te tangata. Kua tukuia kia Timoteo tetai apainga akaperepere kia “akakite ua [aia] i te tuatua” e kia “rave i te angaanga a te apii evangelia.” (2 Timo. 4:2, 5) Kua akaue a Paulo ia Timoteo kia akono meitaki i tei tukuia atu kiaia. Mei ia Timoteo rai, kua tukuia mai tetai au apinga akaperepere kia tatou. Eaa te reira? E eaa tatou ka paruru ei i teia apinga manea ta Iehova i oronga mai?

3-4. Eaa te tumu i akaperepereia ai te tuatua mou Pipiria?

³ Kua oronga mai a Iehova i te kite tika tikai o te tuatua mou akaperepereia i roto i tana Tuatua, te Pipiria. Ko teia au tuatua mou, e mea akaperepereia no te apii ia tatou kia rauka tetai pirianga meitaki kia Iehova e kia rauka tetai oraanga mataora tikai. Me āriki tatou i te tuatua mou, kua matara mai tatou mei te tuikaa e te apiianga pikikaa.​—1 Kori. 6:​9-​11.

⁴ Tetai tumu i kitea ai te tuatua mou i roto i te Tuatua a te Atua, e mea akaperepereia ta Iehova i oronga ki te aronga  akaaka tei rauka ia ratou “te aronga i akonoia” ra. (Anga. 13:48) Kua āriki teia aronga i te kaveinga tana i taangaanga kia oronga mai i te tuatua mou i teia tuatau. (Mata. 11:25; 24:45) Kare tatou e mārama i teia tuatua mou, e kare atu e apinga puapinga e aite ki te reira.​—Mase. 3:​13, 15.

5. Eaa atu ta Iehova i tuku mai kia tatou?

⁵ Kua tuku katoa mai a Iehova kia apii tatou i tetai ke ki te tuatua mou no runga iaia e tona akakoroanga. (Mata. 24:14) Te karere ta tatou e akakite nei e mea akaperepereia te ka tauturu i te tangata kia riro ei ngutuare no Iehova e kia rauka ia ratou te ora mutu kore. (1 Timo. 4:​16) Me ō atu tatou ki teia angaanga orometua, te turu ra tatou i teia angaanga puapinga rava tei raveia i teia tuatau. (1 Timo. 2:3, 4) E mea ngateitei kia riro ei oa rave angaanga no te Atua!​—1 Kori. 3:9.

6. Eaa tei tupu ki tetai pae tei kore i akarongo?

⁶ Kare tetai au taeake o Timoteo i āriki ana i ta ratou apainga akaperepere ei oa rave angaanga na te Atua. No te mea, kua inangaro a Dema i te apinga o teia akatereanga, kua kopae aia i tana apainga kia tavini i te pae ia Paulo. (2 Timo. 4:10) Kua akaruke a Phugelo e Heremogene i te angaanga orometua no te mea kua mataku raua e ka tamamaeia raua mei ia Paulo rai. (2 Timo. 1:​15) Kua akaruke a Humenaio, Alekanedero, e Phileto i te tuatua mou. (1 Timo. 1:​19, 20; 2 Timo. 2:​16-​18) Kua inangaro ana teia aronga ia Iehova, inara kua akamutu i te akaperepere i te tuatua mou.

7. Eaa te au ereere ta Satani i taangaanga kia tatou?

⁷ Akapeea a Satani te tauta anga kia kore tatou e akaperepere i ta Iehova i tuku mai kia tatou? Akamanako ana i te au ereere a Satani. Ka taangaanga aia i te tu tamataora e te media kia turu i tona anoano, tona manako, e tona tu kia kopae tatou i te tuatua mou. Ka timata aia ia tatou na roto i te au taomianga a te au oa e te takinokino anga e kia akamutu tatou i te tutu aere. E ka tauta aia i te akavare ia tatou kia akarongo ki te ‘tapikipiki anga kite’ a te aronga tei akaruke i te tuatua mou.​—1 Timo. 6:​20, 21.

8. Eaa ta tatou i apii mei te tupuanga o te taeake ko Daniel?

⁸ Me kare tatou e matakite, ka kore aere to tatou inangaro i te tuatua mou. Akamanako ana i te tupuanga o Daniel, * tei inangaro i te kanga vitio. Akamārama aia: “Akamata au i te kanga vitio i toku 10  mataiti. Te akamata anga, kua āriki au i te kanga vitio tau ua. Inara kua akamata au i te kanga vitio tā ua e te peu temoni.” I muri mai, kua kanga vitio aia e 15 ora i te rā. “Iaku uaorai, kua kite mai au i te tu kanga vitio e te taime te ka pou iaku i te kanga vitio e ka akamamao iaku mei ia Iehova. Inara, kua māro ketaketa toku ngakau i te irinaki e kare te au kaveinga Pipiria e tau ana kiaku,” i karanga ai a Daniel. Me kare tatou e matakite i te tamataora te ka akavare ia tatou, kare tatou e mou piri ki te tuatua mou. Me tupu ra te reira, ka ngere tatou i te au mea puapinga ta Iehova i oronga mai kia tatou.

9. Ia 1 Timoteo 1:​18, 19, kua akaaite a Paulo ia Timoteo kiaai?

⁹ E tatau ia 1 Timoteo 1:​18, 19. Kua akaaite a Paulo ia Timoteo ki tetai vaeau e kua akaunga iaia “kia ta [aia] i te tamaki meitaki i taua tuatua ra.” Kare a Paulo e tuatua ra no tetai tamaki ki te vaeau tangata, mari ra i te pae vaerua. Eaa te au mataara ka aite te au Kerititiano mei te vaeau i roto i te tamaki? Eaa te au tu ka anoano tatou kia rauka ei vaeau no Karaiti? Akamanako ana e rima apiianga ta tatou i apii mei ta Paulo akatutuanga. Ka tauturu teia ia tatou kia mou piri ki te tuatua mou.

10. Eaa te tu akono i te Atua, e eaa tatou ka anoano ei i te reira?

¹⁰ E akono i te Atua. E tu tiratiratu to te vaeau meitaki. Ka tereni pakari aia i te paruru i tetai tana e aroa ra e e akaperepere ra. Kua akamaroiroi a Paulo ia Timoteo kia akono i te Atua—na te piri tiratiratu anga ki te Atua. (1 Timo. 4:7) Me aroa tatou e te akono i te Atua, ka maata atu to tatou mou piri anga ki te tuatua mou.​—1 Timo. 4:​8-​10; 6:6.

11. Eaa tatou ka anoano ei i te akoanga?

¹¹ Akarongo ki te ako. Ka tereni pakari te vaeau ma te angaanga pakari no te tamaki. Kua tinamou a Timoteo i te pae vaerua no te mea kua aru aia i ta Paulo tuatua akauruia kia rere ke mei te anoano tika kore, kia aru i te tu akono i te Atua, e te piri atu ki te au oa irinaki. (2 Timo. 2:​22) Kua anoanoia te akoanga. Ka anoanoia te akoanga kia autu tatou i te au anoano o te kopapa. (Roma 7:​21-​25) Inara, ka anoanoia te akoanga kia angaanga pakari kia kopae i te tu tangata taito e kia akatangata ou oki. (Ephe. 4:​22, 24) Me roiroi tatou i te openga o te rā, penei ka aruaru ua atu tatou i te aere ki te uipaanga.​—Ebe. 10:24, 25.

12. Eaa te au mataara te ka akamaata atu i te taangaanga i te Pipiria?

¹² Ka anoano tetai vaeau kia apiipii i te taangaanga i tana apinga tamaki. Ka anoanoia aia kia karape. Aite rai, ka anoanoia tatou kia karape i te rave i te Tuatua a te Atua. (2 Timo. 2:​15) Ka apii tatou i teia au tu karape i ko i te uipaanga. Inara me akakeu tatou i tetai e e tuatua mou te Pipiria e te akaperepereia, ka anoano putuputuia tatou kia rave i ta tatou apii Pipiria. Ka anoano tatou i te Tuatua a te Atua ei akaketaketa i to tatou akarongo. E maata atu te ka ō mai ki te tatau anga Pipiria. Ka akakeu ia tatou kia akamanako oonu i ta tatou e tatau ra e kia kimikimi i roto i ta tatou au puka, na te reira e akamārama mai e te taangaanga i te au Irava. (1 Timo. 4:​13-​15) Ka rauka ia tatou i te taangaanga i te tuatua a te Atua kia apii i tetai ke. E maata akaou atu te ka ō mai ki te tatau anga i te au irava Pipiria. Ka ina ngaro tatou i te tauturu i te aronga te akarongo maira kia mārama i te irava e akapeea ratou me taangaanga i te reira. Na te rave putuputu anga i tetai apii Pipiria naau uaorai, ka karape atu tatou i te Tuatua akauruia a te Atua ei apii i tetai ke.​—2 Timo. 3:​16, 17.

13. Ia Ebera 5:​14, eaa ta tatou ka akamanako?

¹³ Kia kite meitaki. Ka tapapa atu tetai vaeau i te kino e te kopae i te reira. Ka tapapa katoa tatou i te turanga te ka takino ia tatou e te kopae viviki i te reira. (Mase. 22:3; e tatau ia Ebera 5:​14.) Ei akaraanga, ka anoanoia tatou kia iki meitaki i ta tatou tamataora anga e te tarekareka. Akaari mai te tivi e te au teata i te angaanga tau kore. Ka akariri teia au angaanga i te Atua e ka akatupu i te kino. Ka kopae tatou i te tamataora anga te ka akaparuparu i to tatou aroa no te Atua.​—Ephe. 5:5, 6.

14. Eaa tei tauturu ia Daniel kia akamanako meitaki?

¹⁴ Ko Daniel, tei taikuia ake nei, kua kite mai aia ko te kanga vitio tā ua e te peu temoni, e manamanata te reira. Kua rave aia i tetai kimikimi anga i roto i te Watchtower Library ei tauturu iaia kia akakore i tona manamanata. Akapeea te reira te taui anga iaia? Kua akamutu aia i te kanga vitio tau kore. Kua takore aia i tana membership fee i runga i te initaneti e kua takore i tona pirianga ki tetai aronga kanga vitio. Karanga a Daniel, “Kua akapou au i toku taime i te rave angaanga i vao e te piri atu ki te au taeake mei te putuputuanga.” I teianei te tavini nei a Daniel ei painia e e tangata pakari.

15. Eaa te au tua pikikaa i kino ei?

¹⁵ Mei ia Timoteo rai, ka matakite katoa tatou i te tuatua pikikaa tei akatotoaia e te aronga tei akaruke i te akarongo. (1 Timo. 4:1, 7; 2 Timo. 2:​16) Ei akaraanga, ka tauta ratou i te akatotoa i te au tua pikikaa no te au taeake e te au tuaine e te akatupu i te ekoko no to Iehova akaaerenga. Ka akaparuparu teia au manako pikikaa i to tatou akarongo. Ka kopae tatou kia kore e akavareia e te au tuatua pikikaa. Eaa ra? No te mea kua akatotoaia teia au tua e “te aronga ngakau kino ra, e kare ua e tuatua-mou.” To ratou akakoroanga kia akatupu “i te ui e te māro anga tuatua.” (1 Timo. 6:4, 5)  Ka inangaro ratou ia tatou kia irinaki i ta ratou pikikaa e te akatupu i te tarotokaka i to tatou au taeake.

16. Eaa te au akavare anga ta tatou ka kopae?

¹⁶ Kopae i te au akavare anga. Ei “toa meitaki ki o Iesu Mesia ra,” kua akamou a Timoteo ki runga i te angaanga orometua kia kore e akavareia e te au apinganui. (2 Timo. 2:3, 4) Mei ia Timoteo rai, kare tatou e anoanoia kia akavareia e teia apinganui. Ka akakore “te pikikaa o te apinga” i to tatou aroa no Iehova, te akaperepere i te Tuatua a te Atua, e te oronga i te reira ki tetai ke. (Mata. 13:22) Kia akamāmā tatou i to tatou oraanga e kia maroiroi “na mua . . . i te kimi i te basileia.”​—Mata. 6:​22-​25, 33.

17-18. Akapeea tatou me kopae i te kino i te pae vaerua?

¹⁷ Kia papa ua no te rave viviki. Ka anoanoia te vaeau kia parani i mua ake ka rave viviki ei aia i te angaanga. Me rauka ia tatou i te paruru i te au mea ta Iehova i tuku mai kia tatou, ka anoanoia tatou kia rave viviki me kite tatou i te kino. Eaa te ka tauturu ia tatou kia ariu viviki atu? Ka anoanoia tatou kia parani i mua ake ka tupu ei te kino.

¹⁸ Ei akatutuanga, me aere ki tetai akaputuputu anga, ka patiia te katoatoa kia akara i te au ngai no te oro me tupu te kino i mua ake ka akamata ai te porokaramu. No teaa ra? No te mea ka rauka viviki ia ratou i te akaruke me tupu mai te manamanata. Taua taime rai, ka apiipii tatou eaa ta tatou ka “rave” me kite viviki tatou i tetai tutu tau kore, tā ua, e te au apiianga pikikaa ia koe i runga i te Initaneti e ia koe e akara teata ra me kore porokaramu tivi. Me papa tatou, ka oro viviki tatou mei teia au kino i te pae vaerua, kia noo mā tatou ki mua i te aroaro o Iehova.​—Sala. 101:3; 1 Timo. 4:​12.

19. Eaa te au akameitakianga ka kite tatou me paruru i te au mea akaperepere ta Iehova i oronga mai?

¹⁹ Ka paruru tatou i te au apinga akaperepereia ta Iehova i oronga mai—te tuatua mou Pipiria e te apiianga i tetai ke. Me rave tatou i teia, ka mataora tatou ma te akavangakau mā, ma te oraanga tika tikai, e te rekareka i te tauturu i tetai ke kia kite ia Iehova. Ma tana tauturu, ka rauka ia tatou i te paruru i tei tukuia mai kia tatou.​—1 Timo. 6:​12, 19.