1-2. Sprema 1. Timotej 6:20, so sine dendo e Timoteeske?

SIGURNO nekogaš dengjem nekaske nesave vredna bukja te šaj te arakhel len amenge. Na primer, nekoj so džala nesavo vreme ki javer phuv, ponekogaš mukhela plo kher te arakhel le nesavo amal ili nekoj tari familija. Najčesto adava kerela le soske mislinela kaj adava amal ili familija šukar ka grižinel pe bašo kher. Taro akava primer jasno dikhela pe kaj valjani te ovel amen doverba ki nekaste te šaj te mukha te arakhel nešto soj tano amenge but skapoceno.

² Čitin 1. Timotej 6:20. O apostol Pavle setinkergja e Timotee kaj leske tano dendo nešto soj but skapoceno — sine leske vakerdi e Devleskiri namera e manušencar. Osven adava, sine leske dendi i čest te propovedinel e Devleskoro lafi, ili o šukar haberi (2. Tim. 4:2, 5). O Pavle pottikningja e Timotee te arakhel adava soj leske dendo. Isto sar o Timotej, amenge da tano dendo nešto soj tano skapoceno. Soj tano adava? Hem soske mora te arakha adava barvalipe so dengja amen o Jehova?

3-4. Kola tane nesave pričine soske o čačipa tari Biblija tane skapocena?

³ O Jehova pomožingja amenge te haljova o čačipa taro leskoro Lafi, i Biblija. Akala čačipa tane skapocena soske pomožinena amenge te ovel amen šukar odnos e Jehovaja hem vakerena sar šaj te ova čače bahtale. Keda prifatinaja akala čačipa hem živinaja sprema lende, oslobodime siem taro hovavne sikljojba hem šaj te ova moralno čista (1. Kor. 6:9-11).

 ⁴ Javer pričina soske o čačipa taro e Devleskoro Lafi tane skapocena tani adaleske so o Jehova otkrinela len samo e ponizna manušenge kola so „ispravno dikhena ko večno životo“ (Dela 13:48). Asavke manuša priznajnena kaj avdive „o verno hem razborito robo“ otkrinela amenge adala čačipa (Mat. 11:25; 24:45). Amen siem svesna kaj našti korkori te haljova len, a ola tane doborom skapocena so ništo javer našti te sporedinel pe lencar (Izr. 3:13, 15).

5. So javer dengja amen o Jehova?

⁵ O Jehova isto agjaar dengja amen i čest te sikava e javeren o čačipe baši leste hem baši leskiri namera (Mat. 24:14). I poraka so propovedinaja la tani but skapoceno adaleske so pomožinela e manušenge te oven delo tari e Jehovaskiri familija hem dela len prilika te dobinen večno životo (1. Tim. 4:16). Bizi razlika dali propovedinaja ki pobari ili ki potikni mera, amen poddržinaja i najvažno buti so kerela pe ko amaro vreme (1. Tim. 2:3, 4). Amenge tani but bari čest te ova e Devleskere sorabotnikija! (1. Kor. 3:9).

6. So ulo nesave hristijanenge taro prvo veko so na pazingje dovolno?

⁶ Ko e Timoteeskoro vreme, nesave hristijanja čhinavgje te ceninen i prednost te oven e Devleskere sorabotnikija. Adaleske so mangela sine o sveto, o Dimas otkažingja pe tari prednost te služinel zaedno e Pavlea (2. Tim. 4:10). O Figel hem o Ermogen izgleda čhinavgje te služinen e Jehovaske adaleske so darana sine kaj ka oven progonime isto sar o Pavle (2. Tim. 1:15). O Imenej, o Aleksandar hem o Filet mukhle o čačipe hem ule otpadnikija (1. Tim. 1:19, 20; 2. Tim. 2:16-18). Izgleda sa akala manuša ko početok mangena sine e Jehova, ama čhinavgje te ceninen o skapocena bukja so sine lenge dende.

7. Kola taktike koristinela o Satana protiv amende?

⁷ Sar o Satana trudinela pe te čhivel amen te otkažina amen taro barvalipe so dengja le amenge o Jehova? Te dikha nesave taktike so ov koristinela len. O Satana koristinela i zabava hem o mediumija te šaj te mislina hem te ponašina amen agjaar so hari po hari ka čhinava te manga e Jehova hem te na šuna leskere zakonija. Osven adava, ov koristinela o pritisok tari okolina hem o progonstvo te šaj te daravel amen hem te terinel amen te čhinava te propovedina. Isto agjaar, trudinela pe te hovavel amen te šuna o „hovavno pendžaribe“ kova so širinena le o otpadnikija te šaj te otkažina amen taro čačipe (1. Tim. 6:20, 21).

8. So sikljovea taro adava so ulo e Danieleske?

⁸ Ako na pazinaja, šaj hari po hari te  cida amen taro Jehova. Te dikha o primer e Danieleskoro, * kova so but mangela sine te khelel videoigre. Ov vakerela: „Počmingjum te khelav videoigre keda sine man deš berš. Ko početok akala igre na sine but lošna. Ama hari po hari počmingjum te khelav igre soj nasilna hem demonska“. Ko krajo, ov khelela sine 15 saatija ko dive. O Daniel vakerela: „Svesno sium sine kaj adala igre hem o vreme so trošinava sine ki lende, cidena man sine taro Jehova. Ama, ubedinava sine korkori man kaj adava so khelava sine adala igre na sine protiv o bibliska merilija“. Ako na pazinaja, i zabava šaj pohari te cidel amen taro čačipe. Ako slučingja pe amenge nešto asavko, ko krajo šaj te našava o skapocena bukja so dengja len amenge o Jehova.

9. Sprema 1. Timotej 1:18, 19, so pottikningja o Pavle e Timotee?

⁹ Čitin 1. Timotej 1:18, 19. O Pavle sporedingja e Timotee sar jekh vojniko hem pottikningja le te vodinel borba. Adaja borba na sine doslovno, nego duhovno. Ko kova način o hristijanja sine sar vojnikija so borinena pe? Save osobine valjani te oven amen sar vojnikija e Hristoseskere? Te dikha pandž pouke so šaj te sikljova tari e Pavleskiri sporedba. Akala pouke ka pomožinen amenge te arakha o čačipe soj tano amenge dendo.

10. Soske valjani te ačhova verna samo e Devleske?

¹⁰ Ov verno samo e Devleske. Jekh šukar vojniko tano verno. Ov ka borinel pe sa ple silencar te šaj te zaštitinel e manušen so mangela len ili o bukja soj leske važna. O Pavle ohrabringja e Timotee te ačhovel verno samo e Devleske hem hor te poštujnel le (1. Tim. 4:7). Kobor posilno tano o mangipe hem amari vernost sprema o Jehova, doborom poviše ka manga te arakha o čačipe soj amenge dendo (1. Tim. 4:8-10; 6:6).

11. Soske valjani amenge samodisciplina?

¹¹ Neka ovel tut samodisciplina. Te šaj jekh vojniko te ovel sekogaš spremno baši borba, mora te ovel le samodisciplina. O Timotej šaj sine te borinel pe protiv e Satanaskoro vlijanie adaleske so šungja e Pavleskoro sovet taro 2. Timotej 2:22. Ov boringja pe ple pogrešno želbencar, razvingja šuže osobine hem nakhavgja plo vreme e phralencar hem e phenjencar. Bašo adava valjani sine leske samodisciplina. Amenge da valjani akaja osobina te šaj te pobedina amare grešna želbe (Rim. 7:21-25). Osven adava, valjani amenge samodisciplina te šaj te huljava i purani ličnost hem te urava i nevi (Ef. 4:22, 24). A keda siem umorna palo jekh naporno dive, ponekogaš mora te terina amen te dža ko sostanok (Evr. 10:24, 25).

12. So ka pomožinel amenge panda pošukar te pendžara i Biblija?

¹² Jekh vojniko valjani šukar hem redovno te vežbinel te šaj te džanel sar te koristinel plo oružje. Slično agjaar, amen da valjani te sikljova šukar te koristina e Devleskoro Lafi (2. Tim. 2:15). O sostanokija pomožinena amenge ko adava. Ama, te šaj te uverina e javeren kaj o bibliska čačipa tane but korisna, mora korkori amen te proučina e Devleskoro Lafi. Ko asavko način bajraraja amari vera. Akava na značinela samo te čitina i Biblija, nego te razmislina bašo adava so čitingjem hem te istražina ko amare publikacie te šaj šukar te haljova o bibliska stihija te džana sar te primenina len hem sar te objasnina len (1. Tim. 4:13-15). Tegani ka šaj te koristina e Devleskoro Lafi keda sikavaja e javeren. Akava značinela kaj nane dovolno samo te čitina  lenge nesavo biblisko stiho. Amen mangaja te pomožina lenge te haljoven o stihija hem te džanen sar te primeninen len. Ako redovno proučinaja i Biblija, ka šaj panda pošukar te koristina la keda sikava e javeren (2. Tim. 3:16, 17).

13. Sprema Evreite 5:14, soske mora mudro te procenina o bukja?

¹³ Neka ovel tut sposobnost mudro te procenine o bukja. Jekh vojniko mora angleder te dikhel i opasnost te šaj te izbeginel la. Amen da mora te sikljova te pendžara o opasna situacie hem te kera adava soj potrebno te šaj te izbegina len (Izr. 22:3; čitin Evreite 5:14.) Na primer, mora mudro te birina amari zabava hem i rekreacija. Ko televiziska emisie hem ko filmija često isi nemoral. Ako dikhaja nešto asavko, adava šaj hari po hari te tiknjarel amaro mangipe sprema o Jehova. Džanaja kaj ov mrzinela o nemoral, hem kaj okola so postapinena nemoralno kerena šteta peske hem e javerenge (Ef. 5:5, 6).

14. Sar pomožingja e Danieleske i sposobnost mudro te proceninel o bukja?

¹⁴ O Daniel kova so khelela sine nasilna hem demonska videoigre, počmingja te haljovel kaj adava tano seriozno problemi. Adaleske istražingja ko amare publikacie te dikhel sar šaj te ikljol ko krajo adale problemea. Sar adava vlijajngja upri leste? Ov čhinavgja te khelel asavke lošna igre. Otkažingja pe taro onlajn-igre hem čhinavgja sa o kontaktija e manušencar so khelela sine. O Daniel vakerela: „Namesto te khelav videoigre, počmingjum te ikljovav ki priroda hem te družinav man e phralencar hem e phenjencar taro sobranie“. Akana ov služinela sar pioneri hem starešina.

15. Soske o izmislime bukja so širinena len o otpadnikija tane opasna?

¹⁵ Isto sar o Timotej, amen da valjani te haljova kobor tane opasna o hovavne informacie so širinena len o otpadnikija (1. Tim. 4:1, 7; 2. Tim. 2:16). Na primer, ola šaj širinena izmislime bukja bašo amare phralja hem mangena te keren te sumnina amen ki e Jehovaskiri organizacija. Asavke hovajba šaj te keren poslabo amari vera. Na smejnaja te dozvolina te hovavgjova tari asavki propaganda. Soske? Adaleske so asavke izmislime bukja širinena „manuša so isi len rumime misle hem nane len o čačipe ki peste“. Lengiri cel tani te počminen raspravie hem akošibe  (1. Tim. 6:4, 5). Ola mangena te verujna ko bukja so nane točna hem te na ovel amen doverba ko amare phralja.

16. Taro so valjani te arakha amen?

¹⁶ Ačhov koncentririmo. Sar „šukar vojniko e Hristos Isuseskoro“, o Timotej mora sine te ačhovel koncentririmo ki služba namesto te dozvolinel o materijalna bukja ili javera celija te len leskoro vnimanie (2. Tim. 2:3, 4). Isto sar o Timotej, amen da na smejnaja te dozvolina te manga te ovel amen poviše ko materijalno pogled. „O hovavno barvalipe“ šaj te kerel te našava amaro mangipe sprema o Jehova, pohari te cenina e Devleskoro Lafi hem ma te ovel amen želba te kera e javerencar lafi baši Biblija (Mat. 13:22). Mora te trudina amen te vodina ednostavno životo hem te koristina amaro vreme hem sila te roda „najangle e Devleskoro Carstvo“ (Mat. 6:22-25, 33).

17-18. Sar šaj te zaštitina amaro amalipe e Jehovaja?

¹⁷ Ov spremno odma te kere nešto. O vojniko valjani angleder te džanel so ka kerel ako isi nesavi opasnost te šaj te zaštitinel pe. Ako mangaja te arakha adava so o Jehova dengja le amenge, valjani sigate te reagirina keda ka dikha nesavi opasnost. So ka pomožinel amenge te kera adava? Valjani angleder te razmislina bašo adava so ka kera ako arakhljovaja ki opasno situacija.

¹⁸ Te dikha jekh primer. Keda isi nesavo javno nastan, angleder te počminel i programa, e manušenge vakerela pe te dikhen kote tano o najpaše izlez. Soske? Te šaj odma te ikljoven ako nešto ulo. Ko slično način valjani angleder te razmislina kova bi ovel o najšukar „izlez“ ako taro jekh puti pojavinena pe angli amende nemoralna ili nasilna scene, ili materijali taro otpadnikija. Akava šaj te ovel džikote siem ko internet ili džikote dikhaja televizija. Ako angleder siem spremna bašo asavke situacie, ka šaj sigate te reagirina te šaj te ačhova čista anglo e Jehovaskere jakhja hem agjaar ka zaštitina amaro amalipe lea (Ps. 101:3; 1. Tim. 4:12).

19. Kola bereketija ka oven amen ako arakhaja o skapocena bukja so dengja len amenge o Jehova?

¹⁹ Mora te arakha o skapocena bukja so dengja len amenge o Jehova — o but šuže bibliska čačipa hem i čest te sikava e javeren baši lende. Agjaar ka ovel amen čisto sovest, ka ovel amen smisla ko životo hem ka ova bahtale so šaj te pomožina e javerenge te pendžaren e Jehova. Adaleske so ov ka pomožinel amenge, ka šaj te arakha adava soj amenge dendo (1. Tim. 6:12, 19).