1-2. Premali 1. Timoteju 6:20, so hine dindo e Timotejese?

BUT putija amen daja averenđe te arakhen amare vredna buća. Na primer, šaj te ćhiva amare pare ki banka. Ked ćeraja odova, amen očekujinaja amare pare te oven ko sigurno than hem te na našalđon ja te oven ćorde. Odolese haljovaja so značini te de averese te arakhi odova soj tano tuće vredno.

² Čitin 1. Timoteju 6:20. O apostol Pavle podsetinđa e Timoteje so dobinđa diso but vredno, a odova tano o tačno spoznanje andi e Devlesi namera e manušencar. Isto ađahar, o Timotej hine le čast te propovedini e Devleso lafi (2. Tim. 4:2, 5). O Pavle podstakninđa e Timoteje te arakhi odova soj tano lese dindo. Sar e Timotejese, hem amenđe tane dinde vredna buća. Kola tane odola buća? Sose valjani te arakha odola vredna buća kola dinđa amen o Jehova?

3-4. Kola tane disave razlogija sose o ćaćipe ando e Devleso Lafi tano vredno?

³ O Jehova mothovđa amenđe čast, ađahar so dinđa amen te đana o ćaćipe, kova nalazini pe ko oleso Lafi, ki Biblija. Odova ćaćipe tano vredno, odolese so sikavi amen sar šaj te ova e Jehovase amala hem sar šaj te ova bahtale. Ked prihvatinaja o ćaćipe hem ićeraja amen ko odova so sikljovaja, amen ovaja oslobodime ando hovavne sikljoviba hem na živinaja nemoralno (1. Kor. 6:9-11).

⁴ Pana jekh razlog sose o ćaćipe ando e Devleso Lafi tano vredno, tano sebepi so Jehova mothovi le samo e ponizno  manušenđe kola isi len ispravno stav (Dela 13:48). Odola ponizna manuša prihvatinena so o verno hem razborito robo sikavi amen o ćaćipe andi Biblija (Mat. 11:25; 24:45). Amen našti kokri te haljova i Biblija hem ništa nane odobor vredno sar o ćaćipe (Posl. 3:13, 15).

5. So o Jehova pana dinđa amen?

⁵ Isto ađahar, o Jehova hem amenđe dinđa čast te sikava averen o ćaćipe olestar hem andi olesi namera (Mat. 24:14). I poruka koja vaćeraja tani but vredno sose pomožini e manušenđe te oven deo andi e Jehovasi porodica hem dela len prilika te ovel len večno đivdipe (1. Tim. 4:16). Bizo obzir da li učestvujinaja ki služba but ja hari, amen odoleja so ćeraja podržinaja o najvažno delo kova ćerela pe ko amaro vreme (1. Tim. 2:3, 4). Ćaće tani bari čast te ova e Devlese saradnikija (1. Kor. 3:9).

6. So ulo disavenđe kola na hine oprezna?

⁶ Ko e Timotejeso vreme, disave hrišćanija na ceninđe i čast te oven e Devlese saradnikija. Sebepi so manglja o sveto, o Dimas na manglja više te služini e Pavleja (2. Tim. 4:10). Izgleda so o Figel hem o Ermogen ćhinavđe te propovedinen sebepi so darandilje so hem on ka oven progonime sar o Pavle (2. Tim. 1:15). O Imenej, o Aleksandar hem o Filit ulje otpadnikija hem mukhlje o ćaćipe (1. Tim. 1:19, 20; 2. Tim. 2:16-18). Izgleda so sa akala manuša jekh vreme hine duhovno zorale, ama palo odova ko buća kola tane lenđe dinde više na dikhlje sar diso soj tano but vredno.

7. Kola taktike o Satana koristini protiv amende?

⁷ Sar o Satana pokušini te ćhivel amen te mukha o vredna buća kola o Jehova dinđa amen? Zapazin disave ando e Satanase taktike. Ov koristini i zabava hem o medije te ćhivel amen te razmislina hem te postupina ko način, kova ka ćhivel amen postepeno te ćhinava te manga e Jehova ja te šuna olese zakonija. Ov pokušini te daravi amen ađahar so koristini o pritisak ando vršnjakija ja o progonstvo, te ćhinavi amen te propovedina. Isto ađahar, ov pokušini te ćhivel amen te šuna o hovavne sikljoviba, kola avena ando otpadnikija hem ađahar te mukha o ćaćipe (1. Tim. 6:20, 21).

8. So sikljovaja kotar iskustvo kotar o phral kova vićini pe Danijel?

⁸ Ako na pazinaja, amen šaj hari po hari te mukha o ćaćipe. Akana ka dikha o primer ando Danijel *, kova volinđa te ćhelel video igrice. Ov phenela: „Ked hine man oko deš  berš, počminđum te ćhelav video igrice. Ki početka, ćhelđum o igrice kola hine prikladna e hrišćanenđe. Ama, sar đelo o vreme počminđum te ćhelav igrice ko kola hine nasilje hem spiritizam.“ Ko krajo, ov po 15 satija svako dive ćhelđa igrice. O Danijel pana phenela: „Hor ano mande, đanđum so o igrice kola ćhelđum hem o vreme kova đelo maje ko odova, cidena man hine ando Jehova. Ama, mo vilo ubedinđa man te verujinav so e biblijake načelija na odnosinena pe upro mande.“ Ako na pazinaja, i zabava šaj lokho te anel đi odova te mukha o ćaćipe. Ako odova desini pe, amen šaj te našala o vredna buća kola o Jehova dinđa amen.

9. Premali 1. Timoteju 1:18, 19, kasa o Pavle uporedinđa e Timoteje?

⁹ Čitin 1. Timoteju 1:18, 19. O Pavle uporedinđa e Timoteje jekhe vojnikoja hem podstakninđa le te „vodini šukar maribe.“ Odova maribe na hine doslovno, već duhovno. Ko kola načinija tane o hrišćanija sar o vojnikija kola borinena pe ko maribe? Sar e Hristese vojnikija, kola osobine valjani te razvijina? Akana ka dikha panđ buća kola šaj te sikljova andi e Pavlesi ilustracija. Odola buća ka pomožinen amen te na mukha o ćaćipe.

10. So značini te ova odana e Devlese hem sose tano odova važno?

¹⁰ Barjaćer ti odanost premalo Devel. O šukar vojniko tano verno. Ov ka del sa pestar te borini pe te zaštitini nekas kas ov mangela ja diso soj tano olese vredno. O Pavle ohrabrinđa e Timoteje te barjaćeri pi odanost premalo Devel, odnosno te ovel paše Oleja (1. Tim. 4:7). So pobuter barjola amaro mangipe hem amari odanost premalo Devel, ka ova pana poodlučna te na mukha o ćaćipe (1. Tim. 4:8-10; 6:6).

11. Sose valjani te ova disciplinovana?

¹¹ Razvijin i samodisciplina. Jekh vojniko mora te ovel disciplinovano ako mangela uvek te ovel spremno aso maribe. O Timotej aćhilo duhovno zoralo, odolese so šunđa e Pavleso savet te našel ando neispravna želje, te razvijini o šukar osobine hem te odvojini vreme te ovel pe phraljencar hem phenjencar (2. Tim. 2:22). Te šaj te ćerel odova, valjanđa te ovel disciplinovano. Isto ađahar, hem amen valjani te ova disciplinovana te šaj te pobedina ko maribe, ko kova borinaja amen protiv amare pogrešna želje (Rimlj. 7:21-25). Uzo odova, amen valjani te ova disciplinovana te šaj hem ponodri te huljava i purani ličnost hem te urava i nevi ličnost (Ef. 4:22, 24). Isto ađahar, ked hijam umorna sebepi so celo dive ćerđam bari buti, šaj ka valjani te terina kokri amen te đa ko sastanak (Jevr. 10:24, 25).

12. Sar šaj pana pošukar te koristina i Biblija?

¹² Jekh vojniko valjani te vežbini sar te koristini po oružje. Te šaj te ovel šukar ko odova, ov valjani redovno te vežbini. Isto ađahar, hem amen valjani te đana sar šukar te koristina e Devleso Lafi (2. Tim. 2:15). Ko sastankija sikljovaja sar šaj pošukar te koristina i Biblija. Ama, ako mangaja nekas te uverina so o ćaćipe andi Biblija tano ćaće vredno, valjani redovno te proučina la. Isto ađahar, te šaj amari vera ovel zorali, valjani te koristina e Devleso Lafi. Odova značini so nane dovoljno samo te čitina le. Valjani hor te razmislina ando odova so čitinđam ja te istražujina ko amare publikacije te šaj ispravno te haljova hem te primenina e Devleso Lafi (1. Tim. 4:13-15). Tegani ka ova sposobna te koristina e Devleso Lafi te sikava averen. Ama, nane dovoljno samo te čitina e manušenđe dijekh stih andi Biblija. Amen  mangaja te pomožina e manušenđe te haljon o stih hem te đanen sar te primeninen le. Ked redovno proučinaja i Biblija, tegani šukar ka koristina la te šaj te sikava averen (2. Tim. 3:16, 17).

13. Premalo Jevrejima 5:14, sose mora te ova razborita?

¹³ Ov razborito. Jekh vojniko mora te đanel sar te penđari kuri tani opasnost hem te cidel pe. Isto ađahar, hem amen mora te sikljova te penđara ko kola situacije šaj te ova povredime hem palo odova te cida amen andi odija opasnost (Posl. 22:3; čitin Jevrejima 5:14.) Na primer, amen valjani mudro te birina i rekreacija hem i zabava. But putija, ki televizija ja ko filmija mothovi pe nemoralno ponašanje. Asavko ponašanje vređini e Devle hem ljegari đi o štetna posledice. Odolese, amen cidaja amen kotar i zabava koja hari po hari šaj te ljel amaro mangipe premalo Devel (Ef. 5:5, 6).

14. Sar i razboritost pomožinđa e Danijelese?

¹⁴ O Danijel, kolestar vaćerđam angleder, počminđa te haljol so oleso problemi hine odova so ćhelđa video igrice ko kola hine nasilje hem spiritizam. Ov istražujinđa ko amare publikacije so šaj te pomožini lese te šaj te borini pe pekle problemeja. Sar odova pomožinđa lese? Ov ćhinavđa te ćhelel o video igrice kola tane neprikladna. Ov otkažinđa i pretplata aso onlajn igrice hem ćhinavđa te ćhelel odola igrice averencar. O Danijel phenela: „Umesto te ćhelav video igrice, počminđum te ikljovav avrijal te ćerav avera buća hem te družinav man e phraljencar kotar i skupština.“ Akana o Danijel služini sar pionir hem sar starešina.

15. Sose tane opasna o hovajba kola širinena o otpadnikija?

¹⁵ Sar o Timotej, hem amen mora te đana sose tane opasna o hovajba kola širinena o otpadnikija (1. Tim. 4:1, 7; 2. Tim. 2:16). Na primer, on šaj te pokušinen te širinen hovajba ando amare phralja ja te ćhiven amen te sumnjina ki e Jehovasi organizacija. Asavke hovajba šaj te anen đi odova te slaboni amari vera. Amen mora te cida amen ando otpadnikija kola širinena asavke hovajba. Sose? Odolese so asavke hovajba avena ando „manuša kola isi len rumimi godi, kola više na haljona o ćaćipe.“ Olengo cilj tano te počminen te „svađinen pe hem te raspravinen pe“ (1. Tim. 6:4, 5). On mangena amen  te verujina ko olenge klevete, a na te verujina amare phraljenđe.

16. Kola buća valjani te izbegnina?

¹⁶ Ov usredsredimo. Sar „šukar vojniko ando Isus Hrist“, o Timotej valjanđa te ovel usredsredimo ki služba, a na ko odova te ovel le materijalna buća hem avera ciljija ko đivdipe (2. Tim. 2:3, 4). Sar o Timotej, ni amen na valjani te dozvolina te barjol amari želja aso materijalna buća. Sebepi o „zavodljivo barvalipe“ amen šaj te našala amaro mangipe premalo Jehova, amaro cenjenje aso e Devleso Lafi hem amari želja averenđe te vaćera o ćaćipe (Mat. 13:22). Odolese, valjani te trudina amen te ovel amen jednostavno đivdipe hem te koristina amaro vreme hem amari snaga „najangleder te roda o Kraljevstvo“ (Mat. 6:22-25, 33).

17-18. So šaj te ćera te bi zaštitinaja amaro amalipe e Jehovaja?

¹⁷ Ov spremno te reagujine sigate. Jekh vojniko valjani angleder te planirini sar te zaštitini kokri pes. Ako mangaja te arakha o buća kola o Jehova dinđa amen, valjani sigate te reagujina ked dikhaja i opasnost. So ka pomožini amen te ćera odova? Valjani angleder te razmislina so ka ćera ako avaja ki opasno situacija.

¹⁸ Aće te dikha jekh primer. Ked tane prisutna ko jekh događaj, o manuša tane zamolime, angleder so ka počmini o program, te dikhen kova izlaz tano olenđe najpaše. Sose? Te šaj so posig te ikljon ako avela đi opasnost. Isto ađahar, hem amen valjani angleder te razmislina kova „izlaz“ ka koristina, odnosno so ka ćera ako ki televizija, ko film ja ko internet, iznenada ikljola disavi nemoralno scena, o scene kaj isi but nasilje ja o materijali ando otpadnikija. Ako angleder spreminaja amen aso odova so šaj te ovel, šaj sigate te reagujina te zaštitina amaro amalipe e Jehovaja hem te aćhova čista anglo e Jehovase jaćha (Ps. 101:3; 1. Tim. 4:12).

19. Kola blagoslovija ka ovel amen ako arakhaja o vredna buća kola o Jehova dinđa amen?

¹⁹ Amen mora te arakha o vredna buća kola o Jehova dinđa amen, a odola tane o ćaćipe andi Biblija hem i čast te sikava averen ando ćaćipe. Ked odova ćeraja, amen ka ovel amen čisto savest, ka đana sose živinaja hem ka ova bahtale sose pomožinaja averenđe te penđaren e Jehova. Uzi olesi pomoć, amen ka uspina te arakha odova soj tano amenđe dindo (1. Tim. 6:12, 19).