1-2. Ti gue oko na 1 Timothée 6:20, aye wa la a mû lani na Timothée?

MINGI ni, e yeke zia aye ti e ti ngangu ngere na ambeni zo ti bata. Na tapande, peut-être e zia nginza ti e na banque. Tongana e sara ni, e ye ti tene a bata ni nzoni, a girisa ape nga a nzi ni ape. Ye so afa so e hinga ye so aye ti tene ti zia na mbeni zo mbeni ye ti e so e bâ ni tongana ye ti ngangu ngere ti bata.

² Diko 1 Timothée 6:20. Bazengele Paul adabe ti Timothée so a mû na lo lani mbeni ye ti ngangu ngere: tâ hingango ye na ndö ti ye so Nzapa aleke ti sara ndali ti azo. Jéhovah amû nga na Timothée pasa ti “fa tënë ti Nzapa” nga ti “sara kusala ti wafango nzoni tënë”. (2 Tim. 4:2, 5). Paul awa Timothée ti bata nzoni ye so a zia na maboko ti lo ti bata. Tongana ti Timothée, a zia na maboko ti e aye ti ngangu ngere. A yeke aye wa? Ngbanga ti nyen la a lingbi e bata aye ti ngangu ngere so Jéhovah amû na e?

3-4. Ambeni raison so ndali ni atâ tënë ti Bible ayeke aye ti ngangu ngere ayeke so wa?

³ Na nzoni bê, Jéhovah asara si e hinga nzoni atâ tënë so ayeke aye ti ngangu ngere so ayeke na yâ ti Mbeti ti lo, Bible. Atâ tënë so ayeke aye ti ngangu ngere ndali ti so afa na e tongana nyen ti duti na nzoni songo na Jéhovah nga tongana nyen ti duti na tâ ngia. Tongana e yeda na atâ tënë so nga e sara ye alingbi na ni, a yeke zi e na gbe ti ngbâa ti afango ye ti wataka nga na ti asioni sarango ye.—1 aCor. 6:9-11.

⁴ Mbeni raison so ndali ni atâ tënë ti Bible ayeke aye ti ngangu ngere ayeke so Jéhovah afa ni gï na azo so asara  terê ti ala kete so ayeke “nduru ti yeda na” ni (Kus. 13:48). Azo so asara terê ti ala kete ayeda so Jéhovah ayeke sara kua na ngbâa be-ta-zo so ayeke sara ye na ndara ti fa na e atâ tënë so laso (Mat. 11:25; 24:45). E lingbi pëpe ti mä yâ ti atâ tënë so sân mungo maboko ti mbeni zo, nga mbeni ye so ngere ni ayeke ngangu ahon mango yâ ti atâ tënë so ayeke dä ape.—aProv. 3:13, 15.

5. Mbeni ye nde wa la Jéhovah amû na e?

⁵ Jéhovah amû nga na e pasa ti fa na azo tâ tënë na ndö ti lo nga na aye so lo leke ti sara (Mat. 24:14). Tënë so e yeke fa ayeke ye ti ngangu ngere mingi ndali ti so amû maboko na azo ti ga na yâ ti sewa ti Jéhovah nga amû lege na ala ti wara fini ti lakue lakue (1 Tim. 4:16). Atâa e fa tënë mingi wala mingi ape, e yeke mû maboko na yâ ti kua so ayeke tâ kota mingi na ngoi ti e (1 Tim. 2:3, 4). So e na Nzapa e sara kua oko ayeke mbeni ye ti gonda.—1 aCor. 3:9.

6. Nyen la asi lani na ambeni Chrétien so abâ na nene ni pëpe pasa so ala yeke na ni ti sara kua oko na Nzapa?

⁶ Na ngoi ti Timothée, ambeni Chrétien abâ na nene ni pëpe pasa so ala yeke na ni ti tene ala na Nzapa asara kua oko. Démas adö pasa so lo yeke na ni ti sara kua oko na Paul lo zia ndali ti so lo ndoye lani aye ti dunia (2 Tim. 4:10). Na bango ni, Phygèle na Hermogène azia lege ti kua ti ala ti fango tënë ndali ti so mbeto asara ala ti tene a sara na ala aye ti ngangu tongana ti so a sara na Paul (2 Tim. 1:15). Hyménée, Alexandre nga na Philète aga a-apostat na ala zia lege ti vorongo Jéhovah (1 Tim. 1:19, 20; 2 Tim. 2:16-18). Na bango ni, azo so kue aye lani Jéhovah, me a si na mbeni ngoi ala bâ lani pëpe aye so lo mû na ala tongana aye ti ngangu ngere.

7. Akode wa la Satan ayeke sara na kua ti pusu e ti sara ye so lo ye?

⁷ Tongana nyen la Satan ayeke gi ti pusu e ti dö aye ti ngangu ngere so Jéhovah azia na maboko ti e ti zia? Bâ ambeni kode so Satan ayeke sara na kua. Lo yeke sara kua na angia nga na aye tongana télé, afilm, Internet nga na ambeti ti sara si e pensé nga e sara ye na mbeni fason so asara si yeke yeke e ye Jéhovah encore ape wala e sara ye alingbi na andia ti lo encore ape. Lo yeke gi ti sara si e sara mbeto ti ye so azo ayeke pensé na ndö ti e wala ti aye ti ngangu so a peut ti sara na e, tongaso si e zia lege ti fango tënë. Nga lo yeke gi ti pusu e ti dengi mê na “ye so a iri ni a tene a yeke ‘hingango ye’, andâ a yeke tënë ti mvene” ti a-apostat, tongaso si e zia lege ti tâ tënë.—1 Tim. 6:20, 21.

8. Nyen la mo manda na lege ti ye so asi na mbeni ita-koli so iri ti lo ayeke Daniel?

⁸ Tongana e sara hange ape, peut-être yeke  yeke e yeke zia lege ti vorongo Jéhovah. Bâ ye so asi na Daniel, * so aye lani ajeu vidéo mingi. Lo tene: “Mbi komanse ti sara ajeu vidéo na ngoi so mbi yeke na ngu bale-oko tongaso. Na tongo nda ni, mbi sara ajeu so ayeke sioni ape. Me yeke yeke, mbi komanse ti sara ajeu so aye ti ngangu nga na sarango yorö ayeke dä.” Na nda ni, lo yeke sara ajeu vidéo l’heure 15 tongaso lâ oko oko. Daniel atene: “Na gbe ti bê ti mbi, mbi hinga so ajeu so mbi sara nga ngoi so mbi mû ti sara na ni ayeke gue na mbi lani yongoro na Jéhovah. Ye oko, bê ti mbi akpengba juska ti tene mbi pensé so ajeu so mbi sara ague nde na amama-ndia ti Bible ape.” Tongana e sara hange ape, angia alingbi ti sara si yeke yeke e zia lege ti tâ tënë. Tongana a si na e tongaso, peut-être na nda ni e yeke perdre aye ti ngangu ngere so Jéhovah amû na e.

9. Ti gue oko na 1 Timothée 1: 18, 19, Paul ahaka lani Timothée na zo wa?

⁹ Diko 1 Timothée 1:18, 19. Paul ahaka lani Timothée na mbeni turugu nga lo wa lo ti “ngbâ ti tiri pendere bira”. Bira ni ayeke lani vrai bira ape, me a yeke na lege ti yingo. Na lege wa la aChrétien ayeke tongana aturugu so ayeke tiri bira? Asarango ye wa la e aturugu ti Christ e bezoin ti gi ti duti na ni? Zia e bâ aye oku so e lingbi ti manda na lege ti tapande ti turugu so Paul amû. Aye ni so alingbi ti mû maboko na e ti ngbâ ti bâ tâ tënë na nene ni.

10. Ti voro Nzapa na bê kue aye ti tene nyen? Ngbanga ti nyen la e bezoin ti sara ni?

¹⁰ Gi ti voro Nzapa na bê ti mo kue. Mbeni nzoni turugu ayeke be-ta-zo. Lo yeke tiri ngangu ti bata zo so lo ye lo mingi wala ti bata mbeni ye so lo bâ ni na nene ni mingi. Paul awa Timothée ti gi ti voro Nzapa na bê ti lo kue, so ti tene, ti ngbâ be-ta-zo na Nzapa (1 Tim. 4:7). Tongana e ye Jéhovah mingi nga e voro lo na bê ti e kue ahon ti kozo e yeke ngbâ ti bâ tâ tënë na nene ni mingi.—1 Tim. 4:8-10; 6:6.

11. Ngbanga ti nyen la e bezoin ti sara kue ti sara ye na lege ni?

¹¹ Gi ti sara kue ti sara ye na lege ni. Tongana mbeni turugu aye ti duti lakue nduru ti sara bira, a lingbi lo leke terê ti lo nzoni. Timothée angbâ lani ti duti na kpengba songo na Jéhovah ndali ti so lo sara ye alingbi na wango ti Paul ti ke asioni nzara ti bê, ti gi ti duti na anzoni sarango ye nga ti bungbi legeoko na amba ti lo aChrétien (2 Tim. 2:22). Ti sara aye so, a lingbi lo sara kue ti sara ye lani na lege ni. E nga kue, ti sö benda na yâ ti bira so e yeke sara ti hon ndö ti asioni nzara ti e, e bezoin ti sara kue ti sara ye na lege ni (aRom. 7:21-25). Na ndö ni, ti ngbâ ti sara ngangu ti zi ngbene zo nga ti yü fini zo, e bezoin ti sara kue ti sara ye na lege ni (aÉph. 4:22, 24). Nga tongana e fatigué na peko ti so e sara kua mingi na yâ ti lango ni, peut-être e bezoin ti sara effort ti gue na bungbi.—aHéb. 10:24, 25.

12. Tongana nyen la e lingbi ti manda ti sara kua nzoni mingi na Bible?

¹² Mbeni turugu adoit ti manda ti sara kua na aye ti bira ti lo. Tongana lo ye ti sara kua na ni nzoni mingi, lo doit ti manda ti sara kua na ni lakue. Legeoko nga, a lingbi e hinga ti sara kua nzoni mingi na Bible (2 Tim. 2:15). Na ngoi ti abungbi, a yeke fa na e ambeni lege ti sara ni. Me tongana e ye ti mû maboko na azo ti hinga so tâ tënë so ayeke na yâ ti Bible alingbi ti mû maboko na ala, a lingbi e manda ni lakue. E bezoin ti sara kua na Bible ti kpengba mabe ti e. So aye ti tene so gï dikongo Bible alingbi ape. A lingbi e gbu li ti e na ndö ti ye so e diko nga e sara recherche na yâ ti ambeti ti e, tongaso si e lingbi ti mä yâ ni nzoni nga ti sara kua na ni nzoni (1 Tim. 4:13-15). Na pekoni, e yeke hinga  ti sara kua nzoni na Bible ti fa ye na azo. So aye ti tene e yeke diko gï aversê na azo ape. E ye ti mû maboko na ala so e diko mbeni versê na ala ti comprendre ni nga ti hinga tongana nyen ti sara ye alingbi na ni. Tongaso, tongana e yeke manda Bible lakue, e lingbi ti sara kua na Bible nzoni mingi ahon ti kozo ti fa ye na azo.—2 Tim. 3:16, 17.

13. Ti gue oko na aHébreu 5:14, ngbanga ti nyen la a lingbi e hinga ti bâ yâ ti aye nzoni?

¹³ Hinga ti bâ yâ ti aye nzoni. A lingbi mbeni turugu agi ti hinga mbeni kpale so alingbi ti si na ti kpe ni. E nga a lingbi e gi ti hinga ambeni ye so alingbi ti sara sioni na songo ti e na Jéhovah na e sara mbeni ye ti kpe ni. (aProv. 22:3; diko aHébreu 5:14.) Na tapande, e bezoin ti soro angia ti e na ndara. Fani mingi, a yeke fa asioni sarango ye na télé nga na yâ ti afilm. Asioni sarango ye so ason bê ti Nzapa nga kite ayeke dä ape so ayeke sara sioni na zo. Ndani la, e yeke kpe angia so alingbi ti sara si yeke yeke e ye Nzapa mingi encore ape.—aÉph. 5:5, 6.

14. Tongana nyen la bango yâ ti aye nzoni amû lani maboko na Daniel?

¹⁴ Daniel, so e sara tënë ti lo fade, akomanse lani ti bâ so sarango ajeu vidéo so aye ti ngangu nga sarango yorö ayeke dä asara sioni na lo. Lo gi na ndö ti Watchtower Library a-article so alingbi ti mû maboko na lo ti hon ndö ti kpale ti lo. A sara nyen na ndö ti lo? Lo zia lege ti sarango ajeu vidéo so ayeke sioni. Nga lo zia lege ti sarango ajeu vidéo legeoko na ambeni zo. Daniel atene: “Ahon ti tene mbi sara ajeu vidéo, mbi komanse ti mû ngoi ti sigi ti sara ambeni ye wala ti sara ambeni ye legeoko na aita ti congrégation.” Laso, Daniel ayeke pionnier nga ancien.

15. Ngbanga ti nyen la atënë ti mvene ti a-apostat ayeke sioni?

¹⁵ Tongana ti Timothée, a lingbi e hinga kpale so ayeke ga na peko ti amvene so a-apostat ayeke kangbi ni (1 Tim. 4:1, 7; 2 Tim. 2:16). Na tapande, ala lingbi ti gi ti kangbi atënë ti mvene na ndö ti aita ti e wala ti sara si e yeke na confiance kue ape na bungbi ti Jéhovah. Atënë ti mvene so alingbi ti woko mabe ti e. A lingbi e sara hange si ala handa e na atënë ti ala ape. Ngbanga ti nyen? Ngbanga ti so a yeke atënë so “alondo na mbage ti azo so bibe ti ala abuba awe si tâ tënë ayeke na yâ ti li ti ala pëpe”. Ala gi ti sara si “atënë ti dengo kite na ti dengo gaba” alondo (1 Tim. 6:4, 5). Ala ye ti  tene e yeda na asioni mvene ti ala nga e duti na confiance na aita ti e encore ape.

16. Aye wa la alingbi ti gboto lê ti e so a lingbi e kpe ni?

¹⁶ Zia si mbeni ye agboto lê ti mo ape. So Timothée ayeke lani “mbeni nzoni turugu ti Christ Jésus”, lo doit ti zia li ti lo gï na ndö ti kua ti lo ti fango tënë ahon ti zia si aye ti sese nga na gingo ti sara ambeni ye nde agboto lê ti lo (2 Tim. 2:3, 4). Tongana ti Timothée, a lingbi e zia pëpe si nzara ti warango aye ti sese mingi agboto lê ti e. “Ngangu so mosoro ayeke na ni ti handa zo” alingbi ti sara si e ye Jéhovah encore ape, e bâ Bible na nene ni encore ape nga e yeke na nzara encore ape ti fa ni na azo (Mat. 13:22). A lingbi e duti na aye mingi ape na yâ ti gigi ti e nga e sara kua na ngoi nga na ngangu ti e ti “ngbâ ti gi kozoni Royaume ti Nzapa”.—Mat. 6:22-25, 33.

17-18. Nyen la e lingbi ti sara ti bata songo ti e na Jéhovah?

¹⁷ Duti nduru ti sara ye hio. Mbeni turugu adoit ti gbu li ti lo kozo ti bâ tongana nyen la lo yeke sara ye ti bata terê ti lo. Tongana e ye ti bata nzoni aye so Jéhovah azia na maboko ti e, a lingbi e sara ye hio tongana e tingbi na mbeni kpale. Nyen la alingbi ti mû maboko na e ti sara ni? A lingbi e gbu li ti e kozo ti bâ nyen la e yeke sara tongana e tingbi na mbeni ye so alingbi ti sara sioni na e.

¹⁸ Na tapande, tongana ambeni zo ague na mbeni ndo so ala hinga so mbeni kpale alingbi ti si, ala yeke duti nduru na porte. Ngbanga ti nyen? Ti tene tongana mbeni kpale asi, ala sigi hio na porte ni. Legeoko tongaso, e lingbi ti leke terê ti e kozo ti hinga ye so e yeke sara tongana gï gbagburu tongaso mbeni ye so afa lango-sioni, mbeni kota ye ti ngangu so zo ayeke sara na mba ti lo, wala aye ti a-apostat asigi na ngoi so e gue na ndö ti Internet wala e yeke bâ mbeni film wala télé. Tongana e leke terê ti e kozo ndali ti ye so alingbi ti si, e lingbi ti sara ye hio ti bata songo ti e na Jéhovah nga ti ngbâ ti duti nzoni kue na lê ti lo.—Ps. 101:3; 1 Tim. 4:12.

19. Tongana e bata nzoni aye ti ngangu ngere so Jéhovah amû na e, anzoni ye wa la e yeke wara?

¹⁹ A lingbi e bata nzoni aye ti ngangu ngere so Jéhovah amû na e: atâ tënë ti Bible so ayeke aye ti ngangu ngere nga na pasa so e yeke na ni ti fa atâ tënë so na azo. Tongana e sara ni, e yeke duti na mbeni nzoni conscience, gigi ti e ayeke nzere na e mingi nga e yeke duti na ngia so e mû maboko na azo ti hinga Jéhovah. Na mungo maboko ti lo, e yeke bata nzoni aye so lo zia na maboko ti e ti bata.—1 Tim. 6:12, 19.