1-2. Laha hentea ty 1 Timoty 6:20, ino ty raha nankiny tamy Timoty?

OLO hafa matetiky ro engantsika hirakarakara ty raha lafovily ananantsika. Mety hapetrakintsika amy banky, ohatsy, ty dralantsika. Lafa manao ani-zay tsika, le mitamà hoe ho voaaro soa dralantsika iny ka tsy ho trobo na hisy hangalatsy. Haintsika soa baka amin’io hoe manao akory mananky raha lafovily amin’olo zao.

² Vakio 1 Timoty 6:20. Nampitiarovini-Paoly ani-Timoty hoe nahazo raha lafovily ie, tsy ino zay fa ty fahaiza hoe ino ty raha tea-Ndranahary hatao ho ahi-ty olombelo. Nankiny tamy Timoty koa ty tombontsoa ‘hitory ty safà’ noho ‘hanao ty asani-mpitory ty vaovao soa.’ (2 Tim. 4:2, 5) Nampirisiky ani-Timoty Paoly mba hitanjaky soa ani-ze raha nankiny taminy. Nanankina raha lafovily koa tsika, manahaky ani-Timoty. Ino iaby raha reo? Le manino tsika ro mila miaro soa ani-raha nankinini-Jehovah amintsika reo?

3-4. Manino ro lafovily ty fahamarina amy Baiboly ao?

³ Nisoa fanahy tamintsika Jehovah ka natorony antsika ty fahamarina lafovily amy Safàny ao. Lafovily fahamarina reo satria mampianatsy antsika mba hana fifandrambesa soa amy Jehovah, sady manampy antsika mba hahita fahasambara vatany. Lafa maneky ani-fahamarina rey tsika sady miay mifanaraky amy zay, le tsy andevozini-fampianara diso sasy sady mana fomba fiaina malio.​—1 Kor. 6:9-11.

⁴ Lafovily koa ty fahamarina amy Safà-Ndranahary ao, satria ty olo miambany noho ‘mana fo soa’ avao ro anambarani-Jehovah azy. (Asa. 13:48) Eken’olo reo fa ty mpanompo  azo atokisa noho mahihitsy ro ampiasany mba hizara ani-fahamarina rey henanizao. (Mat. 11:25; 24:45) Tena vatan-draha amintsika ty mahatakatsy ani-fahamarina rey, fe tsy ho nivitantsika raiky avao raha zay.​—Ohab. 3:13, 15.

5. Ino koa ty nankinini-Jehovah tamintsika?

⁵ Nankinini-Jehovah tamintsika ty tombontsoa hampianatsy ty fahamarina mikasiky azy noho ty raha teany hatao. (Mat. 24:14) Tena vatan-draha ty hafatsy andesintsika, satria mitariky olo ho anatini-fianakaviani-Jehovah sady manampy an-drozy hitamà ho velo zisiky farany. (1 Tim. 4:16) Lafa manompo iha, ndre be ndre kely ty vitanao, le fa manoha ani-asa farani-ze bevata amy andro henanizao iny raha zay. (1 Tim. 2:3, 4) Voninahitsy vatany miaraky miasa amy Ndranahary zao!​—1 Kor. 3:9.

6. Nanao akory ty olo sisany lafa tsy niamby soa?

⁶ Nisy Kristiana sisany tamy androni-Timoty, tsy nahay nankasitraky ty tombontsoany, hoe miaraky miasa amy Ndranahary. Tea ani-tontolo toy, ohatsy, Demasy ka nafoiny ty tombontsoany niaraky niasa tamy Paoly. (2 Tim. 4:10) Niala tamy fanompoan-drozy koa Fygelo noho Hermogena. Natahotsy vasa rozy hoe hijaly laha tratsini-fanenjeha nahazo ani-Paoly rey. (2 Tim. 1:15) Fa ry Hymeneo, Aleksandra, noho Fileto, latsaky tamy fivadiham-pinoa ka niala tamy fahamarina. (1 Tim. 1:19, 20; 2 Tim. 2:16-18) Atao raha natanjaky ara-panahy iaby olo reo taloha, fe nanjary tsy hain-drozy sasy ty tena vatan-draha.

7. Ino ty tetiky ampiasani-Satana amintsika?

⁷ Ino ty ezaky ataoni-Satana mba hamoizantsika ty raha lafovily nankinini-Jehovah tamintsika? Mba diniho moa ty tetikini-Satana. Ampiasany, ohatsy, ty raha amy tele, filma, Internet, na amy boky noho gazety mba hampirisiha antsika hana toe-tsay na fandaisam-bata sisany, le tsy hitanjaky soa amy fahamarina. Ataony ze hahavy antsika hatahotsy fanenjeha na ty raha volanin’olo mikasiky antsika, amy zay tsy hitory sasy tsika. Verevereny koa tsika mba hijanjy ty “fahaiza” sandoky baka amy mpivadi-pinoa, le hiala amy fahamarina. ​—1 Tim. 6:20, 21.

8. Ino ty ianaranao baka amy tantarani-rahalahy Daniel?

⁸ Laha tsy miamby soa tsika, le mety hivaha tsikelikely ty fivaharantsika amy fahamarina. Mba diniho moa ty tantarani-Daniel *. Nitea fisà video ie. Nanazava ie hoe: “Nanomboky nihisa jeu video aho tamy zaho folo tao. Azy  tsy manahy rey tse ty nihisako tamy voalohany. Fa lafa nandeha ty fotoa, le nihisa amy azy misy hasatà noho resaky demonia rey aho.” Nihisa 15 lera sanandro ie tamy farany. Hoy ty asany: “Tsy havandy aloha aho, fa haiko avao hoe manalavitsy ahy amy Jehovah fisà nifiliko rey, noho ty fotoa laniko ihisà azy. Fe mbo nataoko avao ze hieritsereta hoe tsy mahakasiky ahy torolalani-Baiboly io.” Mety tsy ho ambintsika mihintsy hoe nanjary tsy nivahatsy soa amy fahamarina sasy tsika vokatsini-fialam-boly nataontsika. Amy farany, le mety hafointsika ndre ty raha lafovily nameani-Jehovah antsika.

9. Nampitovizini-Paoly tamin’ino Timoty lafa hentea ty 1 Timoty 1:18, 19?

⁹ Vakio 1 Timoty 1:18, 19. Nampitovizini-Paoly amy maramila Timoty, le nampirisihiny mba ‘hanohy ani-aly soa iny.’ Tsy aly ara-bakiteny niresahiny io. Manino ty Kristiana ro azo volany hoe manao aly? Ino iaby ty toetsy mila ananantsika maramilani-Kristy? Hanenty raha limy azontsika ianara baka amy fanoharani-Paoly io tsika henanizao. Hanampy antsika hitanjaky ty fahamarina avao raha reo.

10. Ino fahafoizam-bata ho a Ndranahary zao, le manino tsika ro mila ani-zay?

¹⁰ Manàna fahafoizam-bata ho a Ndranahary. Tsy mivaliky ty maramila soa. Mahavita miatriky aly tena sarotsy ie mba hiarova ty olo teany na ty raha lafovily aminy. Nampirisihini-Paoly koa Timoty mba hana fahafoizam-bata ho a Ndranahary, zany hoe tsy hivaliky fa ho tea a-Ndranahary raiky avao. (1 Tim. 4:7) Lafa mitombo ty fitiava noho fahafoizam-batantsika ho a Ndranahary, le vomaiky tsika haniry hitanjaky ty fahamarina.​—1 Tim. 4:8-10; 6:6.

11. Manino tsika ro mila mamola-bata?

¹¹ Mianara mamola-bata. Mila mamolaky ty vatany ty maramila mba ho parè avao. Niparè hialy amy fitaomani-Satana avao Timoty satria norihiny ty torohevitsy niresahini-Paoly. Nilaisany ty faniria raty, le niezaky hana toetsy tea-Ndranahary ie, sady niaraky amy Kristiana namany. (2 Tim. 2:22) Tena nila namola-bata ie. Mialy amy faniriani-nofotsy tsika, ka mila mamola-bata mba handresy. (Rom. 7:21-25) Mila mahay mamola-bata koa tsika mba hahavita hangalaky ty toetsy taloha noho hisiky ty toetsy vaovao. (Efes. 4:22, 24) Ho zay koa fa ndre fa vozaky tsika amy andro raiky, le mety mbo mila manao forosè vata mba hivory.​—Heb. 10:24, 25.

12. Ino iaby ty hanampy antsika hahay hampiasa Baiboly?

¹² Tokony hizatsy mampiasa ani-fitaovam-pialiany rey ty maramila. Laha ataony matetiky raha zay, le ho hainy soa ty mampiasa azy. Mila mahay mampiasa soa ty Safà-Ndranahary koa tsika. (2 Tim. 2:15) Manampy antsika hahay raha sisany ty fivoria. Fe laha teantsika ty handresy lahatsy olo hoe tena lafovily ty fahamarina amy Baiboly ao, le mila mana fandahara hianara Baiboly am-batantsika tsika, sady hanao ani-zay tsy tampaky. Mila mampiasa ty Safà-Ndranahary tsika mba hanatanjaha ty finoantsika. Fe tsy ampy ty hoe mamaky Baiboly avao. Mila mametsivetsy ani-ze raha vakintsika tsika, sady mila manao fikaroha amy boky noho gazetintsika rey. Ho haintsika amy zay ty tena hevitsy amy Soratsy Masy ao noho ty fomba hanoriha azy. (1 Tim. 4:13-15) Lafa manao ani-zay tsika le ho afaky mampianatsy ty Safà-Ndranahary. Fe mbo tsy ampy avao ndraiky ty mamaky Baiboly. Teantsika ho haini-mpijanjy antsika hoe ino ty dikani-andinin-teny iny noho ty antony ilàny azy. Laha manao fianara am-bata tsy tampaky  tsika, le hitombo ty fahaizantsika mampiasa ty Safà baka amy herini-fanahy masi-Ndranahary, mba hampianara olo.​—2 Tim. 3:16, 17.

13. Laha hentea ty Hebreo 5:14, manino tsika ro tokony hahay hanavaky?

¹³ Mahaiza manavaky. Tokony ho arakini-maramila sandrany ty loza mety ho avy sady ho hainy ty miala azy. Tokony ho arakintsika koa ze raha mety hahavoan-doza antsika, le bakeo mila manao raha tsika mba tsy ho tratsini-raha zay. (Ohab. 22:3; vakio Hebreo 5:14.) Mila mahay mifily fialam-boly, ohatsy, tsika. Misy fandaisam-bata maloto matetiky ty fandahara noho filma amy tele. Mampeloky a Ndranahary ty olo mana fandaisam-bata maloto sady mikai-doza amy ty vatany noho amin’olo hafa. Zay ro mahavy antsika manalavitsy ani-ze fialam-boly mety hampihena tsikelikely ty fitiavantsika ani-Jehovah.​—Efes. 5:5, 6.

14. Nanino ro nanampy ani-Daniel ty fahaiza-manavaky?

¹⁴ Nanomboky nihaini-Daniel, azy voaresaky taloha teo iny, fa tena tsy mety laha mbo manohy ani-fisà misy hasatà noho resaky demonia iny ie. Nanao fikaroha tamy Fanajaria Bokini-Vavolombeloni-Jehovah tao ie mba hanampy azy hamaha ani-raha manahira iny. Ino ty vokany? Tsy nihisa ani-fisà video raty rey sasy ie. Tsy nisoratsy anara amy fisà amy Internet ao sasy ie, sady tsy niaraky nihisa amin’olo hafa. Nivola Daniel hoe: “Tsy manao fisà video sasy aho, fa aleoko manao raha mbamonto mbeny na miaraky amy nama amy fiangona eo.” Mpisava lala Daniel henanizao, sady anti-panahy.

15. Manino ro mikai-doza ty tantara tsy marina?

¹⁵ Tokony ho haintsika koa ty manavaky ty fanazavà baka amy mpivadi-pinoa. (1 Tim. 4:1, 7; 2 Tim. 2:16) Mety hanohatsy hampiparitaky tantara tsy marina mikasiky ty rahalahy noho anabavintsika, ohatsy, rozy na hanao ze hahavy antsika tsy hatòky ty fandaminani-Jehovah. Mety hampihena ty finoantsika fanazavà diso rey. Tsy tokony hino ani-raha rey tsika. Manino? Satria “olo maloto say noho tsy mana ty fahamarina sasy” ro mampiparitaky azy. Ta hanomboky “aly hevitsy” avao rozy. (1 Tim. 6:4, 5) Tean-drozy laha mino ani-fanarasarà ataon-drozy rey tsika, le manomboky tsy matokitoky ani-rahalahy noho anabavintsika reo.

16. Ino iaby ty raha mety hahavy antsika tsy hifantoky?

 ¹⁶ Mifantoha soa. “Maramila soani-Kristy” Timoty ka nila nifantoky soa amy fanompoany avao fa tsy tandrena amy asa fiveloma na filà hanana. (2 Tim. 2:3, 4) Manahaky ani-Timoty, le tsy irintsika mihintsy ty ho tandrè hamory hanana. Mety ho tratsini-“famitahani-hanana” tsika, farany tsy ho tea ani-Jehovah, sady tsy hahay hankasitraky ty Safà-Ndranahary na haniry hizara azy amin’olo hafa. (Mat. 13:22) Mila manatsotra ty fiainantsika avao tsika, le hampiasa ty fotoa noho hery ananantsika mba hila ani-Fanjakà iny avao, alohani-raha iaby.​—Mat. 6:22-25, 33.

17-18. Ino ty azontsika atao mba tsy ho simba ty fifandrambesantsika amy Jehovah?

¹⁷ Miomàna hanao raha malaky. Tokony fa homanini-maramila sandrany hoe ino ty hataony mba hiarovany ty vatany. Laha teantsika hotanjaha ty raha nankinini-Jehovah tamintsika, le mila manao raha malaky tsika lafa mahita loza. Ino ty hanampy antsika hanao raha malaky? Tokony fa ho haintsika sandrany ty raha hataontsika laha vo misy raha atahora hanimba ty fifandrambesantsika amy Jehovah.

¹⁸ Mbo tsy manomboky, ohatsy, ty fotoa bevata raiky, le ampirisihy ty olo avy eo mba hanenty ty varavara fiboaha marìny azy. Ino ty antony? Amy zay ho afaky miboaky malaky rozy laha vo misy loza. Tokony hanao manahaky ani-zay koa tsika lafa manao Internet na manenty tele na filma. Tokony fa ho haintsika sandrany ty “varavara hiboahantsika” laha misy fandaisam-bata maloto miseho tampoky, na hasatà, na raha aboakini-mpivadi-pinoa. Laha parè amy ze raha mety hiseho tsika, le afaky manao raha malaky mba tsy ho azon-doza, sady halio ty fahitani-Jehovah antsika.​—Sal. 101:3; 1 Tim. 4:12.

19. Ino iaby ty fitahia ho azontsika laha tanjahantsika soa ty raha lafovily nameani-Jehovah antsika?

¹⁹ Mila tanjahantsika soa ty raha lafovily nameani-Jehovah antsika, tsy ino zay fa ty fahamarina amy Baiboly ao noho ty tombontsoa hampianatsy ani-raha zay. Laha manao ani-zay tsika, le halio ty feoni-fieritseretantsika, tena hisy dikany ty fiainantsika, sady ho falifaly tsika manampy olo hahay ani-Jehovah. Hanampy antsika ie, ka ho vitantsika ty hitanjaky ty raha nankiny tamintsika.​—1 Tim. 6:12, 19.