1-2. Lá nkilika 1 Timɔte 6:20, kɛkɔnge kiyapɛyɛ Timɔte?

MBALA EFULA tɔngɔpɛyɛke anto ankina n’kete djɛso djɛ n’tsho dj’iwɔ ntowombela. Ndjɔmbɔmba, iso nkoka mbomba nfalanga yɛso lá bankɛ. Wina wonanghaso nghɔsɔ, iso ndjalaka l’eshikikelo ente nfalanga yɛso ilekɔ lá bomba djɛ wɔlɔ edjinge ipangotshɔ, wapangɔngɔla. Lasɔ tomboka kɛnɛ kesakisola mpɛyɛ onto ekekete kɛso kɛmɔtshi kɛ n’tsho djɛ ntowombela.

² Wala 1 Timɔte 6:20. Ɔpɔstɔlɔ Poolo avungolaka Timɔte ante nde awaka ekete kɛmɔtshi kɛ n’tsho efula ntepela ente, balo djɛ djɔ djelendana l’ikanyi yɛ Ndjambe lá n’kambo dj’anto. Wapɛyɛka Timɔte lonkina odjito wɔ ‘mpoposanyɛ otepela’ edjinge wɔ ‘nangha olemo w’osambisha.’ (2 Ti. 4:2, 5) Poolo alɔmbaka Timɔte djɛnde mbomba kɛnɛ k’iyɔpɛyɛ. Etengo Timɔte, watɔpɛyɛka edjinge iso n’kete djɛ n’tsho. N’kete djɛkɔnge djɛsɔ? Edjinge ladjikɛnge oyɛso ladjɛ mbomba n’kete djɛkɔ wɔlɔ?

3-4. Donga djɛkɔnge djɛnyɛ ente, akambo wa nsɔsɔlɔ welá Bible walekɔ la n’tsho?

³ Yehova atilaka lumo má wopo wɔ ndɔtɔpɛyɛ balo djɛ djɔ dj’akambo wa nsɔsɔlɔ wa n’tsho w’imá Otepela wɔnde, Bible. Akambo wa nsɔsɔlɔ wasɔ walekɔ n’tsho ladjikɛnde watolakanyɛ wopo wɔ ndjala la djokanelo djɛ wɔlɔ la Yehova edjinge watosipisoyɛ wopo wokokaso ndjala l’osasa wɔ nsɔsɔlɔ lá lowiko. Wina w’awolaso akambo wa nsɔsɔlɔ wasɔ edjinge wokambaso l’akambo wakɔ lá lowiko lɔso, iso ntshungɔka má elakanyelo w’engolo edjinge má nanghedji djɛ mbindo.​—1 Kɔ. 6:9-11.

⁴ Elonga k’enkina kɛnyɛ dj’akambo wa nsɔsɔlɔ w’imá Otepela wɔ Ndjambe walekɔ la n’tsho nde, Yehova ndawisolaka ngo le anto w’okitshakitshɛ walekɔ ‘entshupa djɛ ndjawola.’  (Ele. 13:48) Anto walekɔ l’okitshakitshɛ nghɔsɔ ndjawolaka epeko k’ekamba lande lɔɔko kɛnɛ djɛ ntɔpɛyɛ akambo wansɔsɔlɔ wasɔ. (Mat. 11:25; 24:45) Topango koka ndjoka akambo wa nsɔsɔlɔ wasɔ ntsha topawisa onto wotokotshɛ, edjinge lak’ekete keleká ndjoka akambo wa nsɔsɔlɔ wasɔ djonyi.​—Woo. 3:13, 15.

5. Odjito onkina wɔkɔnge wɔtɔpɛyisa Yehova?

⁵ Yehova atɔpɛyɛka lonkina odjito wɔ ndjekɛ anto ankina akambo wa nsɔsɔlɔ walendana lande edjinge ikanyi yɛnde. (Mat. 24:14) Losango l’opoposanyɛso lɔsɔ, lolekɔ la n’tsho ladjikɛnde longokotshɛke anto djɛ ndjingela l’anteyi kɛ nkfumbo kɛ Yehova edjinge ndapɛyɛka mbamba k’iwɔ mba lowiko l’etshinda. (1 Ti. 4:16) Ayale kaanga tongo poposanyɛke efula kana daambi, iso nkotshɛka olemo wɔ djonyi w’onanghema l’eleko kɛnɛ. (1 Ti. 2:3, 4) Ɔsɔngo lumo lowaso má ndjala ntombe y’olemo yɛ Ndjambe!​—1 Kɔ. 3:9.

6. Kɛkɔnge kekomelisa anto amɔtshi watawadjɛ?

⁶ Anto amɔtshi wel’etsho wɛ Timɔte watakindjɛ nkɔpa mpeyi kiyawa kɛ nkamba esanga la Ndjambe. Ladjikɛnde Demasɛ akɔpaka n’kfumbo dj’akambo wanɛ, nde atshikaka mpeyi kindawa kɛ nkamba nya Poolo. (2 Ti. 4:10) Nyɛnamaka ngete Fingɛlɔsɛ nya Hɛrɛmɔngɛnɛ watshikaka olemo wɔwɔ ladjikɛnde wokaka wɔma ambɔ wangɔyɛɛna ndjolo etengo Poolo ndɛɛnaka. (2 Ti. 1:15) Himeneya, Alɛksandɛrɛ, edjinge Filɛtɔ wakomaka w’apɔsta edjinge watshikaka akambo wa nsɔsɔlɔ. (1 Ti. 1:19, 20; 2 Ti. 2:16-18) Nyɛnamaka entengo anto ankfumɔ wasɔ wayalaki la lonyuma lɔ wolo, koko wayɛka ndotshika nkanela ambɔ n’kete dj’iyapɛyɛ dj’elekɔ la n’tsho efula.

7. Tosawo tɔkɔnge tokamba la Satana djɛ ntonanyɛ?

⁷ Wopo wɔkɔnge Satana ohonande ntopapola n’kete djɛso djɛ n’tsho djɛtɔpɛyisa Yehova? Tólende tosawo tɔmɔtshi tɔ Satana onanghande. Nde nkambaka l’etombo edjinge n’kete djekamba l’anto djɛ nsawola etengo televiziɔ, radio, telefɔnɛ, Ɛntɛrnɛtɛ edjinge tojurnalɛ djɛ ntotshinda djɛ nkɔpa, ndjala la tokanyi edjinge nanghedji djekoka ntotshutsheyɛ ngandji kɛso k’akambo wa nsɔsɔlɔ. Nde mponaka ntokɛ wɔma kana ntɛnyɛ ndjolo dj’iso ntshika mpoposanyɛ. Nde mponaka totshinda djɛ ndjekameyɛ ‘kɛnɛ k’etawɔ weteta ambɔ ‘balo’’ djɛ w’apɔsta dj’iso ndotshika akambo wa nsɔsɔlɔ.​—1 Ti. 6:20, 21.

8. Olakanyelo wɔkɔnge ngombowa má ndjɔmbɔmba kɛ wɔnanyɔ ɔmɔtshi wetawɔ Daniel?

⁸ Ntsha topawadjisa, tongotatshutshɛka ndambo ndambo ngandji kɛso k’akambo wa nsɔsɔlɔ. Tokolenda ndjɔmbɔmba kɛ Daniel, * kanga lɔkɔpaki etombo welá tovidɛo. Nde mpakisolaka ante: “Ntateyɛka ntomba etombo welá  tovidɛo wina wimayalaka l’ɛnɔnyi djomi. Má bango, látombaki etombo wɛ wɔlɔ. Koko ndambo ndambo ntateyɛka ntomba etombo wɛ wayi walopango edjinge wayi w’ɛdjɛngɛ.” L’ekomo, nde akomaka polo ndɔsaka wina 15 l’etombo loshi tshɛ. Daniel nkotshɛka lonkina ante: “M’anse k’oloko wɔmi, ndjewaki ente wopo w’etombo w’otombami edjinge wina wimɔsaka djɛ ntomba etombo wɛkɔ wetambangoyɛki la Yehova. Koko, nkembɛka oloko ente tɔkfɔ tɔ Bible topalendana la lemi.” Ntsha topawadjisa, etombo w’otombaso nkoka mbalakɛkɔ kɛmɔ ntodjimbola dj’ipa iso ndɔsa akambo wa nsɔsɔlɔ l’odjito. Ntsha akambo wa nghɔsɔ tokomela, iso koka tshutshɛ n’kete djɛ n’tsho djɛ Yehova ndatɔpɛyɛ.

9. Lá nkilika 1 Timɔte 1:18, 19, Poolo ndɛdjɛ Timɔte nyana?

⁹ Wala 1 Timɔte 1:18, 19. Poolo ɛdjɛka Timɔte ny’ongala edjinge ɔlɔmbaka djɛ nde ‘nana mbandji k’akambo wa wɔlɔ.’ Mbandji kɛsɔ k’epalekɔ kɛ lolelemba, koko kɛ nyuma. Lá wopo wɔkɔnge Akristo oyɛwɔ etengo angala tá mbandji? Etengo oyɛso angala wa Kristo, wekeka wakɔnge woyɛso ladjɛ ndjala la wɔ? Nyotshɔ tokolenda elakanyelo etano wokokaso mba ma ndjɔmbɔ kɛpɛyisa Poolo. Elakanyelo wɛsɔ wengotokotshɛ dj’iso nkɔpa akambo wa nsɔsɔlɔ.

10. Imama la Ndjambe ɔkɔpande ntepela nge, endjinge ladjikɛnge oyɛso la djɛ nangha n’kambo n’tshɔ?

¹⁰ Ɛnyɛ ente wɛ olekɔ imama la Ndjambe. Ongala wɔ wɔlɔ alekɔ la n’kɔmano. Nde nanaka la wolo djɛ mbikɛ onto ɔmɔtshi wɔkɔpande kana ekete kɛmɔtshi k’ɔsande la n’tsho. Poolo akembɛka Timɔte djɛ nde ndjala imama la Ndjambe ntepela ente ndjala la n’kɔmano te Ndjambe. (1 Ti. 4:7) Ntsha iso ndjoka Ndjambe ngadji efula, mposɛ kɛso kɛ mbomba akambo wa nsɔsɔ k’engofula.​—1 Ti. 4:8-10; 6:6.

11. Ladjikɛnge oyɛso ladjɛ ndaalakaka?

¹¹ Ɛnyɛ ente wɛ ndaalakaka. Ongala ladjɛ ndaalakaka djɛnde ndjala wina onkfumɔ entshupa djɛ nana mbandji. Timɔte akindjɛka ndjala la lonyuma lɔ wɔlɔ, ladjikɛnde nde akilikaka dako djɛ Poolo dj’inda fune djɛnde ndota nsaki yɛ nyɛtshi, nkilika wekeka wa wɔlɔ, edjinge nsanghanaka esanga la winande Akristo. (2 Ti. 2:22) n’kambo n’tshɔ ndɔmbamaka dankfumba. Iso ladjɛ ndankfumba djɛ ndjila otshumba lá mbandji k’onanaso la mposɛ yɛso yɛ demba. (Ɔrɔ. 7:21-25) M’asɔ, iso ladjɛ ndankfumba djɛ nkindjɛ ndjoola lonto lɔ ntondo endjinge ndɔta lɔ mbango. (Ɛfɛ. 4:22, 24) Lonkina, ntsha tɔmbɔlɛmba l’ekomo kɛ lotshi l’otale, iso nkoka ndakelembɛ djɛ ntingela lá losanghanyɛ.​—Heb. 10:24, 25.

12. Lá topo tɔkɔnge tokokaso ndɔnghɔsɔla lɛdji lɔso lɔ nkamba la Bible?

¹² Ongala ladjɛ ndjekela nkamba la m’peko djɛnde djɛ mbandji. Edjinge, ntsha nde nkɔpaka nkamba wɔlɔ la m’peko djɛnde n’tshɔ, ngo nde ndjekaka mbala la mbala djɛ ndjekesanela la m’peko djɛkɔ. Wopo wɔkɔmɔ ndeke, iso ladjɛ ndjala la balo wina wokamboso l’Otepela wɔ Ndjambe. (2 Ti. 2:15) Iso nkoka ndjeka topo tɔmɔtshi toyɛso ladjɛ nangha n’kambo djɛsɔ lá nsanghanyɛ yɛso. Koko, ntsha iso nkɔpaka anto ankina w’awole ambɔ, wayi we lá Bible walekɔ nsɔsɔlɔ la n’tsho, iso ladjɛ nanghaka wekelo wɔ Bible w’onto nyɔmɛlɛ mbala la mbala. Iso ladjɛ nkambaka l’Otepela wɔ Ndjambe djɛ nkembɛ djawo djɛso. N’kambo n’tshɔ ndɔmbaka wayi efula, koko ape ngo mbala Bible toko. N’kambo n’tshɔ ndɔmbaka ntɔnɔla lá kɛnɛ k’ingowalaki edjinge nanghaka ehonelo lá ekanda wɛso dj’iso ndjala la loka lɔ wɔlɔ edjinge nkamba l’Afunelo wɔlɔ. (1 Ti. 4:13-15) wina wonanghaso nghɔsɔ, tongoyala l’akoka wa ndakanyɛ anto Otepela wɔ Ndjambe. N’kambo n’tshɔ ndɔmbaka lonkina akambo efula, apengo mbala avɛrse we lá Bible  toko. Iso nkɔpaka nkotshɛ anto wasawola laso dj’iwɔ nsipisoyɛ avɛrse edjinge wopo wolendanawɔ la n’kambo n’tshɔ. Wina wɔlɛmɛyɛso mbala la mbala nonghanyi kɛ wekelo wɔso wɔ Bible w’onto nyɔmɛlɛ, iso nkoka nfudjɛ akoka waso wa nkamba l’Otepela wofunamisá ma wolo wɔ nyuma k’ekina djɛ ndakanyɛ anto ankina.​—2 Ti. 3:16, 17.

13. Lá nkilika Hebero 5:14, ladjikɛnge oyɛso ladjɛ ndjala la n’tɔnɔ?

¹³ Yala la n’tɔnɔ. Ongala ladjɛ ndjala l’akoka wa ndjewa okakasano w’olekɔ lá ntondo edjinge mpengɔ. Edjinge iso ladjɛ ndjewa wayi wamɔtshi wakoka ntonanghela nyɛtshi k’iso mpengɔ. (Woo. 22:3; wala Hebero 5:14.) Ndjɔmbɔmba, iso ladjɛ nsɔnaka asɛkɛlɔ waso edjinge etombo wɛso la balo. Win’ɛmɔtshi televiziɔ edjinge filmɛ nyɛnyɛka wayi wa mbindo. Ndjɔmbɔmba, wayi watshutshumadjɛ Ndjambe edjinge wakoka tokomɛ tá nyɛtshi. Djɛko ndeke, iso ndotaka etombo wekoka nkitshakitshɛ ngandji kɛso te Ndjambe.​—Ɛfɛ. 5:5, 6.

14. Wopo wɔkɔnge n’tɔnɔ iyakotshɛ Daniel?

¹⁴ Daniel, dj’isotepelaki má djiko ayɛka ndosipisoyɛ ante etombo wɛ wayi wa lopango edjinge w’ɛdjɛngɛ wapalekɔ wɔlɔ. Nde ananghaka ehonelo lá Watchtower Library djɛnde ndjisola wayi wamɔtshi wakokisa ndokotshɛ djɛ nde nana l’okakasano wɔsɔ. Eposelo wɛkɔnge weyalisa la n’kambo n’tshɔ? Nde ayɛka ndotshika ntomba etombo wɛ vidɛo wɛ nyɛtshi wɛsɔ. Nde opaka losambi la sitɛ y’Ɛtɛrnɛtɛ y’eyalaki l’etombo wɛkɔ edjinge opaka losambi ny’anto watombaki etombo wɛkɔ. Daniel ntepelaka ante: “L’idjena yɛ ntombaka etombo we lá videɛo, ntateyɛka ndɔsa wina djɛ nangha akambo welá bandja kana ndjala esangha la ntombe ye l’otshumano.” Daniel alekɔ win’ɔsɔ yatekalo edjinge ikokolo.

15. Ladjikɛnge wamba w’engolo okokawɔ ntilá l’okakasano?

¹⁵ Lá ndjɔmbɔmba kɛ Timɔte, iso ladjɛ nsipisoyɛ lonkina ekakasano wokokaso mba má wayi w’engolo wetshanghanyɛ w’apɔsta. (1 Ti. 4:1, 7; 2 Ti. 2:16) Ndjɔmbɔmba, iwɔ nkoka mpoposanyɛ wamba w’engolo lá n’kambo djɛ wananyɔ kana ntotshinda djɛ ndjila ehamu te olonghanyelo wɔ Yehova. Wayi w’engolo wɛ nghɔsɔ nkoka nkitshakitshɛ djawo djɛso. Iso ladjɛ ndota dj’ipa ndjimbama lá wayi w’opoposanyɛwɔ. Ladjikɛnge? Ladjikɛnde ‘anto walekɔ la tokanyi tɔ nyɛtshi la wapatepela nsɔsɔlɔ ndeke waapoposanyɛ wamba wa nghɔsɔ.’ Okoma wɔwɔ nde, mbanga ‘l’ampɔsɔ edjinge l’ehamo.’ (1 Ti. 6:4, 5) Iwɔ nkɔpaka dj’iso  ndjawola esamanyɛ wɛwɔ l’engolo wɛwɔ edjinge ntshika ndawɛkɛ te wananyɔ waso.

16. Wayi wakɔnge wɛkɔla yimba woyɛso ladjɛ ndota?

¹⁶ Tona wayi wɛkɔla yimba. Etengo ‘ongala wɔ wɔlɔ wɔ Kristo Yeso,’ Timɔte akindjɛka ndjila yimba l’olemo l’idjena yɛ ndjɛkɔla yimba lá n’kete djɛ l’andja wanɛ kana nkilika onkfudji wɔ n’kete djelá demba . (2 Ti. 2:3, 4) Lá ndjɔmbamba kɛ Timɔte, topakoke ndjawola djɛ ndjɛkɔla yimba yɛso lá ndjala la mposɛ kɛ mba onkfudji wɔ n’kete djelá demba. ‘Lokeso l’olekɔ l’onkfudji’ nkoka ntotshutsheyɛ ngandji k’okaso Yehova, djedjɛ djɛso tá Otepela wɔ Ndjambe, edjinge mposɛ kɛso kɛ mpoposanyɛ anto ankina. (Mat. 13:22) Iso ladjɛ nkidjɛ ntshika lowiko lɔso onghanghunya edjinge nkamba la wina edjinge la wolo wɔso djɛ ‘nkindjɛ mpona ntondo ntondo Onkfumi.’​—Mat. 6:22-25, 33.

17-18. Kɛkɔnge koyɛso la djɛ nangha djɛ ndota ekakasano wekoka ntokomela lá lonyuma?

¹⁷ Yalonghanyɛ djɛ nangha akambo la n’keke la n’keke. Ongala ladjɛ nonghanyɛ ntondo kɛnɛ koyɛnde la djɛ nangha djɛ ndalama. Ntsha iso nkɔpaka mbomba n’kete djɛtɔpɛyisa Yehova, mbɔ iso ladjɛ nangha akambo la n’keke la n’keke wina wɛnaso ekakasano. Kɛkɔnge kekoka ntokotshɛ djɛ nangha n’kambo n’tshɔ? Iso ladjɛ nonghanyɛ ankambo lá ntondo djɛ ndjewa kɛnɛ k’isongonangha wina woposa okakasano.

¹⁸ Ndjɔmbɔmba, wina wotateyɛ olando ɔmɔtshi wosambelana l’idjena imɔtshi, anto ndɔmbamaka mbala imɔtshi djɛ nkilika nonghanyi imɔtshi wɔlɔ lá ntondo k’olando nkoma lá tondjena tɔkɔ. Ladjikɛnge? L’okoma w’iwɔ ndalama la dj’ipa ndosambela. Wopo wɔk’ɔmɔ ndeke, iso ndalɔngɔsɔlaka lá ntondo djɛ ndjewa kɛnɛ k’isongonangha ntsha l’isasimoyɛ foto yɛ nyɛtshi, wayi walopango kana wayi wa w’apɔsta wamboposa wina wokambaso l’Ɛtɛrnɛtɛ kana wolendaso filmɛ kɛmɔtshi kana televiziɔ. Ntsha iso ndalɔngɔsɔla lá n’kambo djekoka ntokomela, mbɔ tongonangha akambo la n’keke la n’keke djɛ nama dj’okanelo djɛso la Yehova edjinge ntshikala piyɔɔ lá wiso wande.​—Yee. 101:3; 1 Ti. 4:12.

19. Ɛtshɔkɔ wɛkɔnge nsongowa ntsha iso mbomba n’kete djɛ n’tsho djɛ Yehova ndɔtɔpɛyɛ?

¹⁹ Iso ladjɛ mbomba n’kete djɛ n’tsho djɛ Yehova ndɔtɔpɛyɛ, ntepela ente akambo wa nsɔsɔlɔ wa n’tsho welá Bible edjinge mpeyi kokotshɛso kɛ ndakanyɛ anto ankina. Ntsha iso nangha nghɔsɔ, tongoyala la nkfumoloko kɛ piyɔɔ, tongoyala la lowiko lolekɔ l’okoma wɔ nsɔsɔlɔ edjinge tongoyala l’osasa djɛ nkotshɛ anto ankina djɛ ndjewa Yehova. L’okotshɔ wɔnde, tongoyala l’akoka wa mbomba kɛnɛ kindɔtɔpɛyɛ.​—1 Ti. 6:12, 19.