1-2. Muyile 1 Timote 6:20, kinyi kibaadi akitungu’shi Timote akite?

KEBUNGI atupeya bantu bintu byetu bya muulo bwa’shi betulamine. Bu kileshesho, atukatulaa makuta etu ku Banque. Patukitshi bino, atukumiina’shi betulamine makuta etu kalolo kushii kwiayiba sunga kwiashimisha. Byabya, abipushika’shi twibakulupile bangi nsaa y’atwibapa bintu byatumono’shi bii na muulo.

² Badika 1 Timote 6:20. Mpoolo baadi mutentekyeshe Timote’shi mmupete kintu kii na muulo​—kiukilo kilombane pabitale mpángo y’Efile Mukulu bwa bantu. Yehowa baadi dingi mupe Timote bushito bwa “kulungula eyi” na bwa “kufuba mudimo wa bulungudi.” (2 Tim. 4:2, 5, Kilombeeno kipya 2014) Mpoolo baadi munyingishe Timote bwadya kulama kyakya kibaadi kimupeebwe. Nka bu Timote, n’atwe namu mbetupe bintu bi na muulo. Mbintu kinyi? Na bwakinyi abitungu tulame bwabwa bupeta bwitupe Yehowa?

3-4. Ntubingilo kinyi atulesha’shi bya binyibinyi bi mu Bible bii na muulo?

³ Na kalolo kooso, Yehowa mmwitupe kiukilo kya binyibinyi kyatusangana mu Bible. Bino bya binyibinyi, bii na muulo ngofu mwanda abitulongyesha mushindo watudi balombene kwikala mu kipwano ki buwa na Yehowa, na abilesha myanda yatudi balombene kukita bwa kwikala na muloo mu muwa wetu. Patukumiina bino bya binyibinyi na kwibifubila mu nshalelo etu, atwikalwila ku malongyesha a madimi na ku bikitshino bii bubi.​—1 Kod. 6:9-11.

⁴ Kangi kabingilo akalesha’shi bya binyibinyi bi mwiyi dy’Efile Mukulu bi na muulo nka’shi, Yehowa ebifumbwila nka ba sha kwiyisha na “baba ba sha mashimba alombane.” (Bik. 13:48, NWT) Bantu beyishe abakumiina’shi, mpika a lulamato na mudimukye nyi kwete kwitulongyesha bya binyibinyi bi mu Bible ano mafuku etu. (Mat. 11:25; 24:45) Tatwibalombene kupusha  bya binyibinyi bi mu Bible mu’twe banabene nya, na kwibipusha kwi na muulo.​—Nki. 3:13, 15.

5. Nkineemo kinyi dingi kitupe Yehowa?

⁵ Yehowa mwitupe dingi kineemo kya kulongyesha bangi pabimutale, na pabitale mpángo yaye. (Mat. 24:14) Mukandu watulungula wi na muulo, mwanda aukwasha bantu bwadya kutwela mu kifuko kya Yehowa, na awibapa mushindo wa kupeta muwa wa ikalayika. (1 Tim. 4:16) Sunga tukwete kulungula mukandu wibuwa ngofu sunga bipela, tukwete kukwatshishena mudimo ukata ukwete kukitshika ano mafuku. (1 Tim. 2:3, 4) Nyi kineemo kikata kya kufuba pamune n’Efile Mukulu!​—1 Kod. 3:9.

6. Nkinyi kibadi kifikile bano bashii baadi baate na muulo kineemo kyabo kya kufuba pamune n’Efile Mukulu?

⁶ Mu mafuku a Timote, bangi bena Kidishitu t’abaadi abata na muulo kineemo kyabo kya kufuba pamune n’Efile Mukulu. Pa mwanda Demase baadi mufule bintu bya uno ndumbulwilo, baadi mulekye kineemo kibaadi nakyo kya kufuba pamune na Mpoolo. (2 Tim. 4:10) Abimweka’shi Figele na Elemogene, abalekyele kulungula mukandu wibuwa mwanda abaadi abatshinyi’shi, bekubingwabingwa nka bu Mpoolo. (2 Tim. 1:15) Himene, Aleksandre na Filete abasumbwile lukumiino lwabo, abo nkuleka kufubila Yehowa. (1 Tim. 1:19, 20; 2 Tim. 2:16-18) Bano bantu booso abaadi bafule Yehowa kumpala, anka abaadi balekye kwata na muulo bintu byabaadi bebape.

7. Miteo kinyi ikwete Satana kufubisha bwa’shi tukite kya kyebe?

⁷ Mushindo kinyi ukwete Satana kutompa kwitukutshisha kwaata na muulo bintu bitupe Yehowa? Tala imo ya ku miteo yaye. Satana kwete kufubisha bintu bya kukisha nabyo kapapi bu Televizion, ma video, Internete, bisashi, mikanda na ma jurnale mwi bintu bilombene kapelakapela kwitukutshisha bwa kufubila Yehowa na kutumikila miiya yaye. Kwete kutompa kwitutshinyisha na myanda ibubi ayitwakula bantu na kubingwabingwa bwashi tulekye kulungula mukandu wibuwa. Na dingi, kwete kwitutakula bwa’shi tulonde “kyuukilo kya-madimi” kya bantu basumbule lukumiino bwa’shi tulekye kufubila Efile Mukulu.​—1 Tim. 6:20, 21.

8. Nkinyi kibolongyela ku kileshesho kya mukwetu Daniel?

⁸ Su ta twibadimukye, twi balombene kwenda na kuleka kufubila Yehowa kapelakapela. Banda kutala kileshesho kya Daniel, * baadi mufule maasha a video. Amba’shi: “Panabangile kwasha maasha a video, naadi na bipwa ekumi. Kumpala, naadi nasha maasha ebuwa. Anka, kapelakapela nabangile kwaasha e na  bu ntomboshi na myanda ya malenganyi.” Babangile kwaasha ano maasha a video peepi na nsaa 15 efuku dyooso. Daniel amba’shi: “Mwishimba dyande, naadi nauku’shi ano maasha na nsaa inaadi nakisha kuanka, bibaadi abibofusha kipwano kyande na Yehowa. Anka naadi nakoposha eshimba dyande pa kwamba’shi mayi a kulonda e mu Bible ta ngatale nshalelo ande nya.” Su ta twibadimukye, kukisha kwa kapapi nkulombene kutshimbisha kisumi kyetu bwa bya binyibinyi. Su bino byakitshika, twi kushimisha bintu byooso bya muulo byabadi betupe kwi Yehowa.

9. Muyile 1 Timote 1:18, 19, Mpoolo baadi mupwandjikishe Timote na nanyi?

⁹ Badika 1 Timote 1:18, 19. Mpoolo baadi mupwandikishe Timote na musalayi, na aye kumunyingisha bwa “kulwa ngoshi iibuwa.” Anka ino ngoshi ibaadi ya mu kikudi. Mu mishindo kinyi mwi bena Kidishitu bu basalayi be mu ngoshi? Ngikashi kinyi yatudi balombene kudima bu byatudi basalayi ba Kidishitu? Tutaluuleyi malongyesha atano atudi balombene kupeta ku kileshesho kibaadi Mpoolo mutushe. Ano malongyesha aetukwasha bwa kulama bya binyibinyi.

10. Kulamata kwi Efile Mukulu akulesha kinyi, na bwakinyi twinako lukalo?

¹⁰ Nyisha kulamata Efile Mukulu. Musalayi ebuwa ekalaa na lulamato. Alwiyaa n’eshimba dimune bwa kukalwila muntu adi mufule sunga kintu kyataa na muulo. Mpoolo baadi munyingishe Timote bwa kunyisha kulamata Efile Mukulu​—kwamba’shi kwikala mulamate kwi Efile Mukulu na lulamato looso. (1 Tim. 4:7) Patunyisha kutamisha kifulo na lulamato lwetu bw’Efile Mukulu, atwikala na lukalo lwa kulama bya binyibinyi.​—1 Tim. 4:8-10; 6:6.

11. Bwakinyi abitungu twikitshishe?

¹¹ Etatshishe bwa kukita bibuwa. Abitungu’shi musalayi etatshishe bwa kwikala mwilumbuule bwa ngoshi. Timote baadi mobeshe kukambila bukitshishi bwi bubi bwa Satana, mwanda baadi mulonde elango dya Mpoolo na kukita mwaye mooso bwa kukambila binangu bi bubi, kudima ngikashi ibuwa na kukisha nsaa pamune na bakwabo bena Kidishitu. (2 Tim. 2:22) Bino bibaadi abitungu kwikitshisha. Abitungu twikitshishe bwa kukambila binangu bi bubi. (Lom. 7:21-25) Na dingi, abitungu twikitshishe bwa kushintuula bu muntu bwetu, na kudima ngikashi ibuwa. (Ef. 4:22, 24) Sunga twekala bakookye ku nfudiilo kw’efuku, abitungu twikitshishe bwa kutwela mu bisangilo.​—Eb. 10:24, 25.

12. Mu mushindo kinyi watudi balombene kulumbuula ngobesha yetu ya kufubisha Bible?

¹² Abitungu musalayi ekale alongo bwa kwiubidishena na bina ngoshi byaye. Bwa kwiuka bya kwibifubisha kalolo, abitungu ebilongye efuku dyooso. Natwe namu, abitungu tuukye bya kufubisha Eyi dy’Efile Mukulu kalolo. (2 Tim. 2:15) Twi balombene kulonga ingi mishindo ya kufubisha Eyi dy’Efile Mukulu mu bisangilo byetu. Bwa kushinkamisha bangi’shi bya binyibinyi bi mu Bible bii na muulo, abitungu twikale na kyubishi kya kwilongyela Bible efuku dyooso. Abitungu tufubishe Eyi dy’Efile Mukulu, bwa kunyingisha lukumiino lwetu. Bino t’abitekye nka penda kubadika Bible bisumanga nya. Bino abitutekye kunangushena pa bya tubadika, na kukimbuula mu mikanda yetu bwa’shi tupushe bifundwe kalolo na kwibitumikila. (1 Tim. 4:13-15) Paapa atwikala na mushindo wa kufubisha Eyi dy’Efile Mukulu bwa kulongyesha bangi. Na dingi, bino t’abipushisha nka penda kwibabadikila bifundwe nya. Abitungu kwibakwasha bwabadya kwibipusha kalolo, na kwibalesha mushindo wabidi bibatale. Nsaa y’atwilongyela Bible efuku dyooso,  atufiki balongyeshi b’Eyi dy’Efile Mukulu bebuwa.​—2 Tim. 3:16, 17.

13. Muyile Beena-Ebelu 5:14, bwakinyi abitungu twikale na kapatupatu?

¹³ Ikala na kapatupatu. Abitungu musalayi ekale na ngobesha ya kutundula masaku alombene kumufikila na kwiasuka. Natwe namu, abitungu tulongye bya kutundula myanda ilombene kwitutwadila masaku na kukimba bya kwiasuka. (Nki. 22:3; badika Beena-Ebelu 5:14.) Bu kileshesho, abitungu tukishe kapapi na kusangula bintu byatukisha nabyo kapapi na binangu. Mu bintu by’abakambaa kulesha ku Televizion na mu ma video, mwi myanda i butete. Abitungu tusukye yaya mishindo ya kukisha kapapi, mwanda ngilombene kubofusha kapelakapela kifulo kyetu bwa Yehowa. Atuuku’shi Yehowa mushikwe bantu be na mwikyelo wi butete, na bantu be na wawa mwikyelo abelwishishaa abo banabene na kulwishisha bangi.​—Ef. 5:5, 6.

14. Kapatupatu kabaadi kakwashe Daniel naminyi?

¹⁴ Daniel atudi bapwe kutemuna, babangile kutundula’shi kwasha maasha a video e na myanda ya bu ntomboshi na malenganyi kwi bubi. Baadi mukimbuule mu Watchtower Library myanda ilombene kumukwasha. Bino bibekele na bukitshishi kinyi kwadi? Balekyele kwaasha maasha a video e bubi. Na aye nkutshiba kipwano na ba kuuku baye babaadi aasha nabo ano maasha. Daniel amba’shi: “Pamutwe pa kwashaa ano maasha, nabangile kukisha nsaa pamune na bakwetu balume na bakashi ba mu kakongye.” Binobino, Daniel taadi mbala-mashinda na mmukulu mu kakongye.

15. Bwakinyi myanda ya madimi i na masaku?

¹⁵ Nka bu Timote, abitungu twikale na kapatupatu ka kutundula masaku e nao myanda ya madimi yabapalakasha kwi bantu basumbule lukumiino. (1 Tim. 4:1, 7; 2 Tim. 2:16) Bu kileshesho, mbalombene kupalakasha myanda ya madimi pabitale bakwetu bena Kidishitu, sunga kwitutakula mu kukutwa kukulupila ndumbulwilo a Yehowa. Ino myanda ya madimi ilombene kubofusha lukumiino lwetu. T’abitungu tukumiine ino myanda ya madimi nya. Bwakinyi? Mwanda ino myanda i bino, bakwete kwiyipalakasha kwi “bantu basha binangu bilwile abápu kushimisha kiûkilo kya bya bînyibînyi.” Kepatshila kabo ka kutusha “mpaka ishyaipu.” (1 Tim. 6:4, 5, EEM) Abakyebe’shi  tukumiine ano madimi na tulekye kukulupila bakwetu bena Kidishitu.

16. Nkinyi akitungu kudimukila bwa kupela kuumbakasha binangu byetu?

¹⁶ Toumbakashanga binangu byobe. Bubibadi “musalayi ebuwa a Kidishitu Yesu,” bibaadi abitungu’shi Timote atuule binangu byaye ku mudimo wa bulungudi pamutwe akwibiumbakasha mu ku kimba bintu bya ku mbidi. (2 Tim. 2:3, 4) Nka bu Timote, t’abitungu tuumbakwashwe na lukalo lwa kukimba bintu bibungi bya ku mbidi. “Madimi a mapeta” ngalombene kwitutakula mu kushimisha kifulo kyetu bwa Yehowa, lutumbu bw’Eyi dyaye, na lukalo lwetu lwa kulungula bangi mukandu wibuwa. (Mat. 13:22, Kilombeeno kipya 2014) Abitungu tutungunukye na kulama nshalelo etu mupelepele, na kufubisha nsaa na bukome bwetu bwa ‘[kutungunuka, NWT] . . . na kukimba bufumu bw’Efile Mukulu kumpala.’​—Mat. 6:22-25, 33.

17-18. Nkinyi kyatudya kukita bwa kukalwila kipwano kyetu na Yehowa?

¹⁷ Ikala mwilumbuule bwa kukita myanda lubilolubilo. Musalayi ekalaa na mpángo ya kwikalwila. Su atukumiina kulama bintu bitupe Yehowa, abitungu twate mpángo bukidibukidi nsaa yatumono masaku. Nkinyi kilombene kwitukwasha bwa kwibikita? Abitungu tubaadile kwata mpángo ya kya kukita nsaa y’atumono masaku.

¹⁸ Bu kileshesho, mudimi sha kinangu ayibakaa kashibo kumpala kwa kipungo kya mpeshi. Bwakinyi? Bwa’shi sunga mpeshi amukwatshila kwakwa, asukila mu kashibo kaye. Mu mushindo umune, abitungu twikale belumbuule bwa’shi, nsaa y’atumono bifwatulo bya bantu be muswa, myanda ya buntomboshi, sunga malongyesha a bantu basumbule lukumiino lwabo abituuku ku Televizion, nsaa y’atutala ma video sunga nsaa yatudi mu Internete, twibikatushe musango umune sunga kushima televizion sunga kamo ketu. Su twekala belumbuule bwa kilombene kukitshika, twi kukita bukidibukidi bwa kukalwila kipwano kyetu na Yehowa na kushaala beselele ku meeso aye.​—Mis. 101:3; 1 Tim. 4:12.

19. Myabi kinyi yatupete su twalama bintu bi na muulo bitupe Yehowa?

¹⁹ Abitungu tulame bintu bi na muulo bitupe Yehowa​—bya binyibinyi bi mu Bible na kineemo kya kwibilongyesha bangi. Su twakita byabya, atwikala na kondo k’eshimba katoka, muloo mu nshalelo etu, na dingi atwikala na muloo wa kukwasha bangi bwabaadya kuuka Yehowa. Ku bukwashi bwa Yehowa, atwikala na ngobesha ya kulama bintu byadi mwitupe.​—1 Tim. 6:12, 19.