1-2. San Timoteyus ben kisi, soleki fa 1 Timoteyus 6:20 e sori?

A E PASA furu tron taki wi e gi son sma den warti sani fu wi fu luku den. Fu eksempre, kande wi e poti wi moni na bangi. Te wi e du disi, dan wi e fruwakti taki den o luku wi moni bun èn taki den o sorgu taki a no lasi noso sma no fufuru en. A no de fu taki dati wan sma musu frutrow wan trawan trutru fu gi en den gudu fu en fu luku den.

² Leisi 1 Timoteyus 6:20. Na apostel Paulus ben memre Timoteyus taki a ben kisi wan gudu fu sorgu gi en: A ben kon sabi finifini san Gado abi na prakseri gi libisma. Timoteyus ben kisi a frantwortu tu fu „preiki a wortu” èn fu „du a wroko fu wan preikiman” (2 Tim. 4:2, 5). Paulus ben gi Timoteyus a deki-ati fu sorgu gi den sani di a ben kisi. Neleki Timoteyus, wi srefi musu sorgu tu gi wan tu gudu di wi kisi. San na den gudu disi? Èn fu san ede wi musu sorgu bun gi den gudu disi di wi kisi fu Yehovah?

3-4. Fu san ede wi kan taki dati den leri fu Bijbel de leki gudu?

³ Yehovah meki wi kon sabi finifini san en Wortu Bijbel e leri trutru. Den leri disi prenspari fu di den e sori wi fa wi kan tron mati fu Yehovah èn fa wi kan de koloku trutru. Efu wi e bribi den sani disi èn wi e gebroiki den na ini wi libi, dan wi o kon fri fu falsi leri èn wi o man libi wan krin libi.​—1 Kor. 6:9-11.

⁴ Wan tra reide fu san ede wi kan taki dati den leri na ini Gado Wortu de leki gudu, na taki Yehovah no e meki ala sma sabi den sani disi. A e leri soso den sma di abi sakafasi èn di „abi a yoisti denki” (Tori 13:48). Den sma disi e bribi taki Yehovah e gebroiki a koni srafu fu gi wi Bijbel leri  na ini a ten disi (Mat. 11:25; 24:45). Wi no o man frustan den leri fu Bijbel efu den no yepi wi èn nowan tra sani warti so, leki den leri disi.​—Odo 3:13, 15.

5. Sortu tra gudu Yehovah gi wi?

⁵ Yehovah gi wi a grani tu fu yepi sma fu kon sabi en nanga den sani di a o du (Mat. 24:14). A boskopu di wi e tyari prenspari srefisrefi fu di a e yepi sma fu kon na ini a famiri fu Yehovah èn a e gi den na okasi fu kisi têgo libi (1 Tim. 4:16). Awinsi wi e du furu noso awinsi wi no man du so furu, wi alamala e yepi fu du a moro prenspari wroko di de na ini a ten disi (1 Tim. 2:3, 4). A de wan bigi grani fu wroko makandra nanga Gado!​—1 Kor. 3:9.

6. San pasa nanga son sma di no ben e si en leki wan grani moro fu wroko makandra nanga Gado?

⁶ Son sma na ini a ten fu Timoteyus no ben e si en leki wan bigi grani fu wroko makandra nanga Gado. Fu di Deimas ben lobi a grontapu disi, meki a gowe libi Paulus nanga a diniwroko fu en (2 Tim. 4:10). A sori leki Figelus nanga Hermogenes ben tapu nanga a diniwroko fu den, fu di den ben e frede taki den ben o kisi hebi frufolgu neleki Paulus (2 Tim. 1:15). Himeneyus, Aleksander nanga Fileitus ben drai baka gi a tru bribi (1 Tim. 1:19, 20; 2 Tim. 2:16-18). Soleki fa a sori, dan ala den sma disi ben den fayafaya bribiman fosi, ma bakaten den no ben si den gudu di Yehovah gi den leki warti sani moro.

7. Na sortu fasi Satan wani kori wi?

⁷ Satan wani taki wi lasi den gudu di wi kisi fu Yehovah. Fa a e pruberi fu du disi? Meki wi luku wan tu fasi. A e gebroiki sani soleki buku, telefisi, radio nanga Internet fu meki sma denki èn du sani di no bun. Na so a wani kisi wi tu, so taki te fu kaba wi no o lobi Yehovah moro èn wi no o gi yesi na en. A e meki sma frufolgu wi tu noso tapu skreki gi wi, so taki wi no o wani preiki moro. Boiti dati, a e meki sma di drai baka gi a tru bribi taki sani fu kori wi, so taki wi srefi ben o drai baka gi a tru bribi tu.​—1 Tim. 6:20, 21.

8. San yu e leri fu na ondrofenitori fu wan brada di nen Daniel?

⁸ Efu wi no de na ai, dan safrisafri wi kan gowe libi a tru bribi. Luku san ben pasa nanga Daniel * di ben lobi video game. A taki: „Mi bigin prei video game di mi ben abi sowan 10 yari. Biginbigin mi ben e prei video game di no ben fowtu. Ma bakaten mi ben e prei game di ben abi  ogridu nanga sani fu ogri yeye na ini.” Te fu kaba a ben e prei game sowan 15 yuru ibri dei. „Na ini mi ati mi ben sabi taki den game di mi ben e prei no ben bun èn mi ben gebroiki tumusi furu ten fu prei den. Mi ben sabi taki safrisafri den sani disi ben e pori a matifasi fu mi nanga Yehovah. Ma mi ben e kori misrefi taki den warskow na ini Bijbel no ben de gi mi”, na so Daniel taki. Sobun, efu wi no de na ai, dan den sani di wi e du fu abi prisiri kan meki taki wi no e si den leri fu Bijbel leki prenspari sani moro. Efu disi pasa, dan wi kan lasi den warti sani di Yehovah gi wi.

9. Soleki fa 1 Timoteyus 1:18, 19 e sori, dan nanga suma Paulus agersi Timoteyus èn sortu deki-ati a gi en?

⁹ Leisi 1 Timoteyus 1:18, 19. Paulus ben agersi Timoteyus nanga wan srudati èn a ben gi en a deki-ati fu „tan feti a bun feti”. A feti disi no ben de wan trutru feti. A ben de wan feti fu tan na bribi. Na sortu fasi Kresten de leki srudati di de na ini wan feti? Sortu fasi wi musu abi fu man de wan srudati fu Krestes? Meki wi luku feifi sani di wi kan leri fu na agersitori fu Paulus. Den sani disi kan yepi wi fu tan ini a tru bribi.

10. Fu san ede wi musu du muiti fu dini Gado fayafaya?

¹⁰ Du muiti fu dini Gado fayafaya. Wan bun srudati o du ala muiti fu feti gi wan sma di a lobi noso gi wan sani di warti gi en. Paulus ben gi Timoteyus a deki-ati fu du muiti fu dini Gado fayafaya. Sobun, a ben musu du muiti fu tai hori na Gado (1 Tim. 4:7). O moro wi lobi Gado èn o moro wi e dini en fayafaya, o moro wi o du muiti fu tan na ini a tru bribi.​—1 Tim. 4:8-10; 6:6.

11. Fu san ede wi musu dwengi wisrefi?

¹¹ Leri fu dwengi yusrefi. Wan srudati musu leri fu dwengi ensrefi efu a wani teki prati na wan feti. Timoteyus ben de srekasreka ala ten, fu di a ben teki a rai fu Paulus. Paulus ben taigi en taki a ben musu wai pasi gi takru lostu, a ben musu du muiti fu kisi den fasi di Gado wani wi fu abi, èn a ben musu bumui nanga sma di ben de na ini a tru bribi (2 Tim. 2:22). Timoteyus ben musu dwengi ensrefi fu du den sani disi. Wi musu dwengi wisrefi tu fu man wini a feti di wi e feti nanga den sondu firi fu wi (Rom. 7:21-25). Boiti dati, wi musu du ala san wi man fu kisi den nyun fasi di Gado wani wi fu abi (Ef. 4:22, 24). Èn te wi weri fu di wi wroko heri dei, dan kande wi o abi fu dwengi wisrefi tu fu go na konmakandra.​—Hebr. 10:24, 25.

12. San wi kan du fu gebroiki Bijbel moro bun?

¹² Wan srudati musu man gebroiki den fetisani fu en bun tu. Dati meki a musu oefen doronomo. Wi srefi musu oefen doronomo tu fu man gebroiki Gado Wortu bun (2 Tim. 2:15). Na den konmakandra wi kan leri pikinso fa fu gebroiki en. Ma efu wi wani overtoigi sma taki Bijbel kan yepi den trutru, dan wi o abi fu studeri en doronomo. Wi musu gebroiki Gado Wortu fu tranga wi bribi. Disi wani taki dati wi no musu leisi Bijbel nomo. Wi musu meki ten tu fu denki fu san wi leisi èn wi musu ondrosuku sani moro fini na ini den buku fu wi. Te wi e du disi, dan wi o man frustan den leri fu Bijbel moro bun èn wi o man fruklari den gi tra sma (1 Tim. 4:13-15). Na so wi o man gebroiki Gado Wortu fu gi sma leri. Sobun, wi no musu leisi Bijbel gi den sma nomo. Wi musu yepi den sma di e arki wi fu frustan den  Bijbel tekst èn wi musu yepi den fu si fa den kan gebroiki dati na ini den libi. Te wi abi wan schema fu studeri Gado Wortu doronomo èn wi e hori wisrefi na dati, dan wi o tron moro bun Bijbel leriman.​—2 Tim. 3:16, 17.

13. Te yu e luku Odo 22:3, dan fu san ede wi musu du sani nanga koni?

¹³ Du sani nanga koni. Wan srudati musu man si te ogri e kon, so taki a kan wai pasi gi dati. Wi srefi musu leri tu fu man si te ogri o miti wi, so taki wi kan wai pasi gi dati (Leisi Odo 22:3; Hebr. 5:14.) Fu eksempre, wi musu luku bun na sortu fasi wi abi prisiri. Nofo tron den felem nanga show na telefisi abi sani di abi fu du nanga seks èn hurudu. Gado no lobi den sortu sani disi èn sani no o waka bun nanga wi efu wi tan luku den. Dati meki wi e sorgu taki wi no e luku den sani di kan meki wi drai baka gi Gado te fu kaba.​—Ef. 5:5, 6.

14. Fa sani kenki gi Daniel di a bigin du sani nanga koni?

¹⁴ Daniel, di wi ben taki fu en na a bigin, kon si taki a ben o kisi bigi problema efu a ben o go doro fu prei game di abi ogridu nanga sani di abi fu du nanga ogri yeye. Na ini a Waktitoren Library a go suku artikel di ben kan yepi en nanga a problema disi. San ben de a bakapisi? A stop prei video game di no bun. A no ben pai moro fu prei game tapu Internet èn a no ben e prei game moro nanga den tra sma di e prei game tapu Internet. Daniel taki: „Na presi fu prei game ini oso, mi bigin du sani na dorosei èn mi bigin bumui moro nanga den brada nanga sisa na ini a gemeente.” Daniel e dini now leki pionier èn owruman.

15. Fu san ede wi musu luku bun nanga den leitori fu sma di drai baka gi a tru bribi?

¹⁵ Neleki Timoteyus, wi musu man si tu o ten sma di drai baka gi a tru bribi e kon nanga den lei fu den (1 Tim. 4:1, 7; 2 Tim. 2:16). Fu eksempre, kande den e panya leitori fu den brada nanga sisa fu wi, noso den e taki sani di kan meki wi tweifri na a organisâsi fu Yehovah. Den sortu tori disi kan meki wi bribi kon swaki. Wi musu luku bun taki wi no bigin bribi den. Fu san ede? Fu di den sma di e panya den, na sma „di abi soso takru prakseri èn di no sabi fa sani de trutru”. Den e taki den sani disi  soso fu meki „trobi èn fu haritaki” nanga wi (1 Tim. 6:4, 5). Den wani taki wi bribi den ogri-ati lei disi, so taki wi no o frutrow den brada nanga sisa fu wi moro.

16. Sortu sani kan puru wi prakseri na a diniwroko fu wi?

¹⁶ No meki nowan sani puru yu prakseri na a diniwroko fu yu. „Leki wan bun srudati fu Krestes Yesus”, Timoteyus ben musu tan poti prakseri na a diniwroko fu en. A no ben musu meki gudu noso tra sani puru en prakseri (2 Tim. 2:3, 4). Neleki Timoteyus, wi no musu meki gudu noso tra sani puru wi prakseri tu. „A bedrigifasi fu gudu” kan „kiri” a lobi di wi abi gi Yehovah, a warderi di wi abi gi Gado Wortu, èn na angri fu fruteri sma sani fu Bijbel (Mat. 13:22). Wi musu pruberi fu libi soso nanga den sani di wi abi fanowdu trutru, so taki wi kan gebroiki wi ten nanga krakti fu ’tan suku a Kownukondre fosi’.​—Mat. 6:22-25, 33.

17-18. San wi kan du so taki wi matifasi nanga Yehovah no pori?

¹⁷ De srekasreka fu du wan sani wantewante te a de fanowdu. Wan srudati musu denki na fesi san a o du, so taki a kan du dati wantewante te ogri e kon. Efu wi wani kibri den gudu di Yehovah gi wi, dan wi srefi musu man du wan sani wantewante te wi e si taki ogri e kon. San kan yepi wi fu du disi? Wi musu denki na fesi san wi o du na ini situwâsi pe ogri kan miti wi.

¹⁸ Fu eksempre, na son skoro noso wrokope, sma e oefen san den o du te a presi teki faya. Fu san ede? Den e du disi, so taki ala sma sabi wantewante san den musu du efu a presi bigin bron trutru. Na so wi srefi kan oefen tu san wi o du efu wantronso wi si sani tapu telefisi noso Internet di abi fu du nanga hurudu, ogridu, nanga leitori fu sma di drai baka gi a tru bribi. Efu wi e sreka wisrefi gi den sortu situwâsi disi, dan wi o man du wan sani wantewante fu kibri wisrefi. Na so wi matifasi nanga Yehovah no o pori èn a o si wi leki sma di krin.​—Ps. 101:3; 1 Tim. 4:12.

19. Sortu blesi wi o kisi te wi e sorgu bun gi den gudu di Yehovah gi wi?

¹⁹ Wi musu sorgu bun gi den gudu di Yehovah gi wi. Den gudu disi na den leri fu Bijbel nanga a grani fu de leriman fu Bijbel. Te wi sorgu taki wi no lasi den sani disi, dan wi o abi wan krin konsensi, wi o abi wan koloku libi èn wi o abi prisiri fu yepi sma fu kon sabi Yehovah. Nanga a yepi fu Yehovah, wi o man sorgu bun gi den gudu di wi kisi fu en.​—1 Tim. 6:12, 19.