1-2. Tumuhụ 1 Timotius 6:20, apa harusẹ̌ koateng i Timotius?

I KITẸ masau měgělị barang maarěga gunang pakiriagạ su taumata wal᷊inẹ. Contone, i kitẹ aramanung mẹ̌taho doiti kitẹ su bank. Su tempong někoạ ene, i kitẹ mělẹ̌harapẹ̌ doiti kitẹ sarung tatapẹ̌ aman kụ tawe mailang arau takongu taumata. Hakị u ene, i kitẹ nakaěna apa mangal᷊ene měgělị barang maarěga su taumata wal᷊inẹ gunang pakiriagạ.

² Basa 1 Timotius 6:20. Rasul Paulus naul᷊ị si Timotius, i Timotius seng nakatarimạ sěmbaụ hal᷊ẹ̌ maarěga ene kai kasingkạ nihino soal u kapulung Mawu gunang taumata. Yehuwa lai něgělị si Timotius hak istimewa gunang ’měhabarẹ̌ hengetang’ dingangu gunang ’měkoạ tugasu měnganginjilẹ̌’. (2 Tim. 4:2, 5) Paulus němahangsang si Timotius gunang měndiagạ pakapia apa seng nighělị si sie. Kere i Timotius, i kitẹ seng nighělịkangu hal᷊ẹ̌ maarěga gunang pakiriagạ. Apa ene? Kụ kawe nụe i kitẹ harusẹ̌ měndiagạ apa seng nighělị i Yehuwa si kitẹ?

3-4. Apa piram baụ alasang něnodẹ katěngadẹ̌ su Alkitapẹ̌ kai maarěga?

³ Yehuwa seng něgělị si kitẹ kasingkạ nihino soal u katěngadẹ̌ maarěga su Hengetang’E, Alkitapẹ̌. Katěngadu ene kai maarěga ual᷊ingu něněntiro si kitẹ carane mědal᷊ahapị mapia dingangi Yehuwa, kụ ene lai nělahẹ apa wotonge makakoạ pěbawiahi kitẹ mal᷊uasẹ̌. Su tempong i kitẹ něnarimạ katěngadẹ̌ ene, i kitẹ nawebasẹ̌ bọu těntiro nẹ̌sal᷊a dingangu kakanoạ amoral.​—1 Kor. 6:9-11.

⁴ Alasang wal᷊inẹ kawe nụe katěngadẹ̌ su Hengetangu Mawu kai maarěga ute ual᷊ingu Yehuwa nělahẹ ene kětạeng su taumata masanạ naung dingangu ”piạ kapulu nihino”. (Kis. 13:48) Taumata kerene něnarimạ saluran nipakẹ u Mawu gunang měněntiro katěngadẹ̌ orasẹ̌ ini. (Mat.  11:25; 24:45) I kitẹ tawe makaěna manga katěngadẹ̌ ene mạeng i kitẹ kětạeng měngěndung hala, kụ tawẹ apa hal᷊ẹ̌ wal᷊inẹ limembong maarěga sul᷊ungu makaěna manga katěngadẹ̌ ene.​—Amsal 3:13, 15.

5. Apa lai seng nighělị i Yehuwa si kitẹ?

⁵ Yehuwa lai něgělị si kitẹ hak istimewa gunang měněntiro katěngadẹ̌ soal i Sie dingangu kapulu-Ne su taumata wal᷊inẹ. (Mat. 24:14) Habarẹ̌ bẹ̌bawang i kitẹ ene kai sěbạe maarěga ual᷊ingu makatul᷊ung taumata makoạ bageang bọu kěluargang i Yehuwa dingangu něgělị si sire kesempatan gunang makaěbạ pěbawiahẹ̌ kěkalẹ̌. (1 Tim. 4:16) Tawẹ soale pira kal᷊awọe tempo nipakẹ i kitẹ gunang měnginjilẹ̌, i kitẹ kěbị seng nẹ̌tul᷊ung někoạ hal᷊ẹ̌ paling penting orasẹ̌ ini. (1 Tim. 2:3, 4) I kitẹ tantu mal᷊uasẹ̌ ual᷊ingu nakoạ hapị sěngkapěhal᷊ẹ̌ dingangu Mawu!​—1 Kor. 3:9.

6. Apa nariadi su pirang katau apang tawe něngarěga hak istimewang i sire?

⁶ Su zaman i Timotius, pirang katau tau Kristen tawe měngẹ̌ngarěga hak istimewa nakoạ hapị sěngkapěhal᷊ẹ̌ dingangu Mawu. Ual᷊ingu makěndagẹ̌ su dunia ini, i Demas něněntang pelayanan dingangi Paulus. (2 Tim. 4:10) Figelus dingangi Hermogenes samurine něněntang pelayanan i sire ual᷊ingu matakụ sarung darihang kere i Paulus. (2 Tim. 1:15) Himeneus, Aleksander, dingangi Filetus nakoạ murtad kụ něněntang katěngadẹ̌. (1 Tim. 1:19, 20; 2 Tim. 2:16-18) Humotong i sire kěbị piạ pangangimang matoghasẹ̌, katewe samurine i sire tawe něngarěga katěngadẹ̌ seng nighělị si sire.

7. Apa piram baụ cara nipakẹ u Setang?

⁷ Kerea Setang mětẹ̌tawakal᷊i měkoạ si kitẹ měněntang hal᷊ẹ̌ maarěga seng nighělị i Yehuwa si kitẹ? Pěmanda piram baụ cara nipakẹe. I sie něpakẹ hiburan dingangu media tadeạu i kitẹ kakạrěngụe seng tawe kuměndagẹ̌ si Yehuwa dingangu tawe tumuhụ manga hukung’E. I sie měkẹ̌koạ si kitẹ matakụ heghesang arau darihang tadeạu i kitẹ měngědo měnginjilẹ̌. Kụ, i sie lai mětẹ̌tawakal᷊i měkoạ si kite dumaringihẹ̌ těntirong taumata murtad tadeạu i kitẹ měněntang katěngadẹ̌.​—1 Tim. 6:20, 21.

8. Apa wotonge kaěndungangu bọu pengalaman sěngkatau saudara arenge Daniel?

⁸ Mạeng tawe maingatẹ̌, kakạrěngụe i kitẹ seng tawe měněngal᷊ẹ̌ matoghasẹ̌ katěngadẹ̌. Pẹ̌tiněna pengalaman i Daniel, * sěngkatau saudara puluang měnalang video game. I sie nẹ̌běke, ”Iạ něnětạ něnalang video game dongkeng umurẹ̌ku mapul᷊o taung. Humotong, iạ měnẹ̌nalang  jenis video game tawe limawang hukungu Mawu. Katewe, kakạrěngụe iạ něnětạ něnalang game kekerasan lai game piạ sěmpụe dingangu spiritisme.” Samurine, i Daniel něnalang video game karěngụe ěndịu 15 su kaorase su ral᷊ungu sahěllo. I sie nẹ̌bera, ”Sěběnarẹ̌e, iạ masingkạ jenis game nipileku dingangu kal᷊awọe tempo nipakẹku gunang měnalang game, ene seng nakarau si siạ bọu i Yehuwa. Katewe, iạ naul᷊ị su watangengku iạ tawe harusẹ̌ tumol᷊e apa niul᷊ị u Alkitapẹ̌.” Hakị u ene, mạeng i kitẹ tawe maingatẹ̌, hiburan gampang makakoạ si kitẹ tawe měněngal᷊ẹ̌ matoghasẹ̌ katěngadẹ̌. Mạeng ene nariadi, i kite sarung kailangengu hal᷊ẹ̌ maarěga seng nighělị i Yehuwa si kitẹ.

9. Tumuhụ 1 Timotius 1:18, 19, Paulus napẹ̌sul᷊ung i Timotius dingangu apa?

⁹ Basa 1 Timotius 1:18, 19. Paulus napẹ̌sul᷊ung i Timotius dingangu sěngkatau prajurit kụ němahangsang si sie gunang ”turusẹ̌ mẹ̌sekẹ gunang timona mapia”. Paulus tawe nẹ̌bisara soal u sekẹ lumawang taumata. Kerea tau Kristen botonge isul᷊ung kere prajurit su pẹ̌seketang? Manga sipatẹ̌ apa harusẹ̌ piạ su prajurit i Kristus? Mahi měmanda lima tatěntiro penting bọu sasihing i Paulus. Ene makatul᷊ung si kitẹ měněngal᷊ẹ̌ matoghasẹ̌ katěngadẹ̌.

10. Apa mangal᷊ene mẹ̌tahamawu su Mawu, kụ kawe nụe i kitẹ měkoạ ene?

¹⁰ I kitẹ harusẹ̌ mẹ̌tahamawu su Mawu. Prajurit mapaelẹ̌ ene kai prajurit masatia. I sie sarung turusẹ̌ mẹ̌sekẹ gunang měndiagạ taumata ikẹ̌kěndage arau hal᷊ẹ̌ maarěga si sie. Paulus němahangsang si Timotius gunang mẹ̌tahamawu su Mawu, ene mangal᷊ene masatia su Mawu. (1 Tim. 4:7) Kakạguwạe kakěndagẹ̌ dingangu kasasatiang i kitẹ su Mawu, kapulung i kitẹ gunang měněngal᷊ẹ̌ matoghasẹ̌ katěngadẹ̌ lai sarung kakạtoghase.​—1 Tim. 4:8-10; 6:6.

11. Kawe nụe i kitẹ harusẹ̌ piạ disiplin diri?

¹¹ I kitẹ harusẹ̌ piạ disiplin diri. Sěngkatau prajurit harusẹ̌ piạ disiplin diri tadeạu sěntiniạ sadia mẹ̌sekẹ. Timotius tatapẹ̌ piạ kerohanian matoghasẹ̌ ual᷊ingu timol᷊e sasasang i Paulus gunang tumal᷊ang bọu kapulu ral᷊akị, gunang mẹ̌tawakal᷊i piạ sipatẹ̌ mapaelẹ̌, lai gunang mědal᷊ahapị dingangu anạu sěmbaụ. (2 Tim. 2:22) Tadeạu makakoạ ene, Timotius harusẹ̌ piạ disiplin diri. I kitẹ lai harusẹ̌ piạ disiplin diri tadeạu makauntung lumawang kapulu nẹ̌sal᷊a. (Rm. 7:21-25) Bọu ene lai, i kitẹ harusẹ̌ piạ disiplin diri gunang měmal᷊ui pěbawiahẹ̌ těbe kụ měpakẹ pěbawiahẹ̌ buhu. (Ef. 4:22, 24) Kụ su tempong bawělo i kitẹ nal᷊owe, i kitẹ aramanung harusẹ̌ mẹ̌tawakal᷊i gunang duměnta su pěngangibadang.​—Ibr. 10:24, 25.

12. Kerea tadeạu i kitẹ limembong matahuěna měpakẹ Alkitapẹ̌?

¹² Prajurit harusẹ̌ mělatihan měpakẹ sěnjatane. Tadeạu matahuěna měpakẹ ene, i sie harusẹ̌ masau mělatihan. Kerene lai, i kitẹ harusẹ̌ matahuěna měpakẹ Hengetangu Mawu. (2 Tim. 2:15) I kitẹ makaěndung cara měpakẹ ene su pěngangibadang. Katewe, mạeng mapulu mẹ̌tul᷊ung taumata tadeạu mangimang katěngadu Alkitapẹ̌ botonge makatul᷊ung si sire, i kitẹ harusẹ̌ marading měkoạ pěngangěndungang Alkitapẹ̌ hala. I kitẹ lai harusẹ̌ měpakẹ Hengetangu Mawu gunang měnoghasẹ̌ pangangimang i kitẹ. Ini bal᷊inẹ kětạeng mẹ̌basa Alkitapẹ̌, katewe lai mẹ̌tiněna apa niwasa kụ měkoạ riset tadeạu i kitẹ kahěngang-hěngang makaěna dingangu měkoạ apa niul᷊ị u Alkitapẹ̌. (1 Tim. 4:13-15) Hasile, i kitẹ sarung matahuěna měpakẹ Alkitapẹ̌ gunang měněntiro taumata wal᷊inẹ.  Ini bal᷊inẹ kětạeng mẹ̌basa ayatẹ̌ gunang i sire. Katewe lai, mẹ̌tul᷊ung si sire makaěna ayatẹ̌ ene dingangu carane měkoạ sasasa su ayatẹ̌ ene su pěbawiahi sire. Mạeng turusẹ̌ tumol᷊e jadwal pěngangěndungang Alkitapẹ̌ hala, i kitẹ sarung limembong matahuěna měpakẹ Alkitapẹ̌ gunang měněntiro taumata wal᷊inẹ.​—2 Tim. 3:16, 17.

13. Kere niul᷊ị su Ibrani 5:14, kawe nụe i kitẹ harusẹ̌ matahuěna?

¹³ I kitẹ harusẹ̌ matahuěna. Prajurit harusẹ̌ mẹ̌sasadia tumatěngo bahaya dingangu mẹ̌těngkarau bọu bahaya ene. I kitẹ lai harusẹ̌ mẹ̌tiněna situasi makawahaya si kitẹ kụ mẹ̌těngkarau bọu situasi ene. (Amsal 22:3; basa Ibrani 5:14.) Contone, i kitẹ harusẹ̌ matahuěna měmile rekreasi dingangu hiburan. Acara televisi dingangu film masau měnodẹ kakanoạ amoral. Kakanoạ kerene makatědụ naungu Mawu kụ sarung makawahaya si kitẹ. Hakị u ene, i kitẹ mẹ̌těngkarau bọu hiburan makailang kakěndagi kitẹ su Mawu.​—Ef. 5:5, 6.

14. Kerea katatahuěna nakatul᷊ung si Daniel?

¹⁴ I Daniel, seng nisěbạ kanini, něnětạ nẹ̌tiněna měnalang game kekerasan lai game piạ sěmpụe dingangu spiritisme kai nakarěntang masalah. I sie něrisetẹ̌ su Watchtower Library gunang mědeạ bahan makatul᷊ung si sie tumatěngo masalah ene. Apa pěngarune si sie? I sie něngědo něnalang game tawe nẹ̌tatahino dingangu hukungu Mawu. I sie lai něngědo něnalang dingangu taumata apang měnẹ̌nalang game ene. Daniel nẹ̌bera, ”Sul᷊ungu měnalang game, iạ něnětạ něpakẹ tempoku gunang měkoạ hal᷊ẹ̌ wal᷊inẹ su luar ruangan arau mědal᷊ahapị dingangu anạu sěmbaụ su sidang.” Orasẹ̌ ini, i Daniel seng nakoạ perintis dingangu penatua.

15. Kawe nụe běke konti ene makawahaya?

¹⁵ Kere i Timotius, i kitẹ lai harusẹ̌ maingatẹ̌ su informasi konti bọu taumata murtad. (1 Tim. 4:1, 7; 2 Tim. 2:16) Contone, i sire aramanung měnawuhẹ̌ běke konti soal u anạu sěmbaụ arau měkoạ si kitẹ ragu su organisasing Yehuwa. Informasi konti kerene makal᷊ome pangangimang i kitẹ. I kitẹ tawe wotonge mangimang su konti kerene. Kawe nụe? Ual᷊ingu běke kerene nisawuhu ”taumata apang tiněnane narusa dingangu nikailangengu katěngadẹ̌”. Timonangu taumata kerene ute mẹ̌darendehẹ̌. (1 Tim. 6:4, 5) I sire mapulu i kitẹ mangimang su konting i sire kụ seng tawe mangimang su anạu sěmbaụ.

16. Tadeạu tatapẹ̌ fokus, apa tawe wotonge koateng i kitẹ?

 ¹⁶ I kitẹ harusẹ̌ tatapẹ̌ fokus. I Timotius kai ”prajurit i Kristus Yesus mapaelẹ̌”, hakị u ene i sie harusẹ̌ tatapẹ̌ fokus su pelayanan sul᷊ungu měnahusu hal᷊ẹ̌ materi arau měkoạ cita-cita wal᷊inẹ su pěbawiahe. (2 Tim. 2:3, 4) Kere i Timotius, i kitẹ lai tawe měmala watangeng i kitẹ měnahusu hal᷊ẹ̌ materi. ”Akal᷊u kakakalạ” sarung makailang kakěndagi kitẹ si Yehuwa, pěngangarěga su Hengetangu Mawu, lai makailang kapulu gunang měnginjilẹ̌. (Mat. 13:22) I kitẹ harusẹ̌ měndiagạ pěbawiahẹ̌ tatapẹ̌ sederhana kụ měpakẹ tempo lai katatoghasẹ̌ gunang ’turusẹ̌ mědeạ kal᷊imona Kararatuang’.​—Mat. 6:22-25, 33.

17-18. Apa wotonge koateng i kitẹ tadeạu makatal᷊ang bọu bahaya rohani?

¹⁷ I kitẹ harusẹ̌ měkoạ rencana. Prajurit harusẹ̌ měkoạ rencana soal u kerea i sie sarung měndiagạ watangenge. Ual᷊ingu Yehuwa seng něgělị si kitẹ hal᷊ẹ̌ maarěga, i kitẹ harusẹ̌ masahawụ měndiagạ ene su tempong nakasilo bahaya. Apa makatul᷊ung si kitẹ měkoạ ene? I kitẹ harusẹ̌ měkoạ rencana kal᷊imona soal u apa sarung koateng i kitẹ.

¹⁸ Sasihinge, su tempong duměnta su sěmbaụ acara, hadirin aramanung dẹ̌dorongang gunang mědeạ tukadẹ̌ sasěbangeng karaniange těntal᷊ang acara ene bědang tawe něněta. Kawe nụe? Tadeạu su tempong piạ situasi darurat, i sire botonge lighạ makasěbang bọu tampạ ene. Kerene lai, i kitẹ harusẹ̌ měkoạ rencana kal᷊imona soal u apa sarung koateng mạeng sěngkělěndịu piạ barang amoral, kekerasan, arau bahan bọu taumata murtad siměpụ su tempong i kitẹ něpakẹ Internet, nẹ̌biala film, arau acara televisi. Mạeng mẹ̌sasadia kal᷊imona, i kitẹ sarung masahawụ makatal᷊ang bọu bahaya rohani kụ tatapẹ̌ burěsi su těngong Yehuwa.​—Mz. 101:3; 1 Tim. 4:12.

19. Al᷊amatẹ̌ apa sarung kaěbakeng mạeng i kitẹ měndiagạ hal᷊ẹ̌ maarěga seng nighělị i Yehuwa si kitẹ?

¹⁹ I kitẹ harusẹ̌ měndiagạ hal᷊ẹ̌ maarěga seng nighělị i Yehuwa si kitẹ. Ene kai katěngadẹ̌ su Alkitapẹ̌ dingangu hak istimewa měmahiạ ene su taumata wal᷊inẹ. Mạeng měkoạ ene, i kitẹ sarung piạ hati nurani burěsi, pěbawiahẹ̌ mal᷊uasẹ̌, dingangu karal᷊uasẹ̌ ual᷊ingu nẹ̌tul᷊ung taumata wal᷊inẹ něngěndung soal i Yehuwa. Ual᷊ingu tulumang i Yehuwa, i kitẹ sarung makariagạ apa seng nighělị’E si kitẹ.​—1 Tim. 6:12, 19.