1-2. Nisy raha nankinegne tamy i Timoty arake ty 1 Timoty 6:20. Inogne zay?

MATETEKE ro ankinentikagne amy ndaty atokisantika ty raha sarobily anagnantikagne ndra ahajantikagne amy ty toeragne raike voaro soa. Apetrantikagne amy banke agne ohatse ty volantikagne satria matoky tika fa tsy ho montso ndra hisy hangalatse naho fa ahajantikagne agne.

² Vakio ty 1 Timoty 6:20. Naniahy i Timoty ty apostoly Paoly tie nisy raha sarobily nimeigne aze. Tsy inogne zay, fa ty fahalalagne maregne miomba ty safirin’Andrianagnahare hoahy o ndatio. Nimey i Jehovah tombotsoa ‘hagnambara i talily soay’ ka reke. (2 Tim. 4:2, 5) Nandrisike i Timoty ty Paoly mba hitagne mafe o raha nankinegne tama’e rehoe. Misy raha sarobily ka nankinegne tamantikagne, manahake i Timoty. Inogne iaby zay? Le nagnino tika ro tsy maintsy mitagne mafe o raha sarobily nankine i Jehovah tamantikagne rehoe?

3-4. Nagnino ty hamarenagne amy i Baiboly ao ro tena sarobily?

³ Tena soa fagnahy ty Jehovah, le nampahafantare’e antika ty hamarenagne sarobily agnate ty Saontsi’e ao ndra amy Baiboly ao. Tena sarobily i hamarenagne rey satria manoro antika ty raha toko’e mba hahavy antika hifandrambe marine amy i Jehovah naho ho sambatse amy ty fiaignagne. Tsy ho andevoze ty fampianaran-diso sasa tika sady hanjare ho soa ty findesam-batantikagne naho mino sady hampihatse i hamarenagne rey tika.​—1 Kor. 6:9-11.

⁴ Nagnino ka i hamarenagne amy Baiboly ao rey ro tena sarobily? Satria ze ndaty miambane avao ndra ze managne toe-po soa ro ampahafantare i Jehovah aze. (Asa. 13:48) Eké o ndaty rehoe fa ty mpanompo mahihitse naho mahimbagne ty ampiasae i Jehovah mba hampianatse antika ty hamarenagne amy izao. (Mat. 11:25; 24:45) Tena tsy ho takantikagne i hamarenagne rey naho tsy misy ndaty magnampe antika, sady tsy misy raha sarobily  ambone tihoe mahatakatse i hamarenagne rey.​—Ohab. 3:13, 15.

5. Ino ka ty raha nankine i Jehovah amantikagne?

⁵ Nisy raha hafa ka nankine i Jehovah tamantikagne. Tsy inogne zay fa ty tombotsoa hampianatse ty hafa ty hamarenagne miomba aze naho ty raha safiri’e. (Mat. 24:14) Tena sarobily i hafatse asae i Jehovah torientikagne amo o ndatioy satria magnampe iareo hanjare ho agnisa ty keleia i Jehovah sady magnampe iareo hahazo havelogne nainai’e. (1 Tim. 4:16) Ndra bey ndra kede ty vitantikagne amo o asa fitoriagne iohoe, le tena magnampe amy ty famitàgne o asa lahibey atao amo o androntikagne hinane zaò tika. (1 Tim. 2:3, 4) Tena voninahitse ho antika ty manao o asa iohoe satria miara miasa amy i Jehovah tika naho fa manao aze!​—1 Kor. 3:9.

6. Ino ty nanjo ty Kristiana ila’e tsy nahavita nitagne mafe ty raha nankinegne tamy iareo?

⁶ Tsy nankasitrake ty tombotsoa’e hiara hiasa amy i Jehovah ty Kristiana ila’e tamy ty andro i Timoty. Fa nagnino iareo ro nanjare tsy nankasitrake o tombotsoa sarobily nanagna iareo iohoe? Manahake i Demasy zao nitea ty tontolo toy, le nafoe’e ty tombotsoa’e hiarake nanompo tamy i Paoly. (2 Tim. 4:10) I Fygelo naho i Hermogena nanjare tsy nanao ty asa fitoriagne sasa, satria va’e natahotse tie henjehegne manahake i Paoly. (2 Tim. 1:15) Nanjare nivadi-pinoagne ka ty Hymeneo naho i Aleksandra vaho i Fileto, le nisintake tamy ty hamarenagne. (1 Tim. 1:19, 20; 2 Tim. 2:16-18) Sambe tena nanagne hatea i Jehovah iaby o ndaty rehoe, faie naho fa nandeha ty fotoagne le nanjare nieretseretse tie tsy tena sarobily i raha nimey i Jehovah iareo rey.

7. Ino iaby ty raha atao i Satana mba hahavy antikagne hisintake ty hamarenagne?

⁷ Ino ka ty atao i Satana mba hahavy antika hieretseretse tie tsy sarobily i raha nankine i Jehovah amantikagne rey? Mampiasa tele reke, filma, Internet naho boke vaho gazete. Misy toe tsaigne naho raha raty mahavy antika hanao raha tsy mampifale i Jehovah ty amy i raha rey. Mampiasa ndaty ka reke mba hirehake raha tsy to miomba antika ndra hagnenjeke antika, amy izay tika matahotse le tsy mitory sasa. Atao’e ka ze hahavy antika ho liagne amy ty ‘fahalalagne sandoke’, amy izay tika misintake ty hamarenagne.​—1 Tim. 6:20, 21.

8. Ino ty ianarantika boake amy ty raha nanjò i rahalahy Daniel?

⁸ Naho tsy mitao tika, le va’e hanao raha hahavy antika hisintake tsikedetsikede amy ty hamarenagne. Dineho ohatse ty raha nanjo i Daniel. * Tea nihisa jeux reke. Hoe reke: “Tamy izaho folo taogne teo ho eo ty nanomboke nitea nihisa jeux. Tamy ty voaloha’e, le tsy nisy raha raty ty tamy i jeux nihisakoy tao. Faie naho fa nandeha  ty fotoagne, le nanjare nanomboke nitea nihisa jeux misy alialy naho mazia raho. Tamy ty fara’e aza, le eo ho eo amy 15 lera isan’andro ty lera nilaniko nihisàgne jeux avao! Naho fa nidineheko o jeux nataoko iohoe naho ty fotoagne nilaniko tama’e, le nitsapako tie nanimba tsikedetsikede ty fifandrambesako tamy i Jehovah. Faie nireseko lahatse avao ty vatako tie tsy raha mifanipake amy ty toro lala ty Baiboly anio o jeux ataokò!” Naho tsy mitao ka tika, le va’e hahavy antika hisintake amy ty hamarenagne ty fihisagne ataontikagne. Naho izay ty raha miseho, le hoe magnary i raha sarobily nimey i Jehovah antika rey tika.

9. Ino ty raha nirisihe i Paoly hatao i Timoty naho henteagne ty 1 Timoty 1:18, 19?

⁹ Vakio ty 1 Timoty 1:18, 19. Nohare i Paoly tamo o maramilao ty Timoty sady nirisihe’e mba ‘hanohy i aly fanjakay.’ (2 Tim. 2:3) Aly ara-pagnahy o aly rehafe i Paoly etò fa tsy ara-bakiteny. Manahake o maramila agn’aly agneo ka tika Kristiana. Ino iaby ty toetse mila anagnantika amy ty maha maramila i Kristy antika? Andao tika handineke lesogne dime azontika ianaragne boake amo o fagnoharagne nirehafe i Paoly iohoe. Hagnampe antika hitagne mafe i hamarenagney o lesogne rehoe.

10. Ino ty atao tihoe fahafoezan-tegna ho an’Andrianagnahare, le nagnino tika ro mila managne o toetse iohoe?

¹⁰ Managna fahafoezan-tegna ho an’Andrianagnahare. Tsy mora mivalike o maramilao. Vognogne hialy mafe reke mba hiarovagne ty ndaty tea’e ndra ty raha sarobily ama’e. Nandrisike i Timoty ka ty Paoly mba hanagne fahafoezan-tegna ho an’Andrianagnahare, ndra tsy hivalike amy i Jehovah fa hanompo aze avao. (1 Timoty 4:7) Naho fa mitombo ty hateantikagne i Jehovah ndra ty fahafoezan-tegnantika ho aze, le manjare magniry hitagne mafe i hamarenagney avao tika.​—1 Tim. 4:8-10; 6:6.

11. Nagnino tika ro mila managne fifehezan-tegna?

¹¹ Managna fifehezan-tegna. Mila mifehe tegna o maramilao, le mikontragne mateteke amy izay reke ho vognogne naho fa misy aly. Nahavita nanohetse ty toe-tsay i Satana ty Timoty satria nagnorike i toroheve i Paoly tihoey tie: ‘Ilaiso ty fagnirian-draty, mikezaha hanagne toetse soa sady miharoa lognandro amo o Kristiana nama’ò.’ (2 Tim. 2:22) Nahavita izay reke satria nahay nifehe tegna. Hahavita handrese ty fagnirian-draty agnatentikagne ao ka tika sady hahavita hagnafake ty toetsentikagne taloha, le hiakanjo ty toetse vaovao naho mikezake mifehe tegna. (Rom. 7:21-25; Efes. 4:22, 24) Naho mahatsiaro ho rokake ka tika naho fa boake niasa, le mila manere ty vatantika mba handeha hivory.​—Heb. 10:24, 25.

12. Ino ty hagnampe antika hahay hampiasa soa o Baibolio?

¹² Mila mahay mampiasa o fitaovagne fialia’eo o maramilao. Mila manao fagnazaran-tegna tsy tapake reke naho te hahavita izay. Toko’e hikezake hahay hampiasa soa ty Saontsin’Andrianagnahare ka tika. (2 Tim. 2:15) Naho fa mivory ohatse tika, le mianatse ty fomba fampiasagne aze. Mila manao fianaragne raike tsy tapake ka tika, amy izay ho haintika ty handrese lahatse o ndatio tie tena sarobily ty hamarenagne agnate’e ao. Mila ampiasaentika mba hagnatanjahagne ty finoantikagne ka o Baibolio. Faie naho te hahavita izay tika, le tsy ampe avao ty mamaky Baiboly isan’andro. Mila misaintsaigne ze vakientikagne ka tika, sady manao fikarohagne amy i boke naho gazete naboa i fandaminagne rey. Ho maregne soa amy izay ty fomba fahazoantikagne ty raha rehafe o Baibolio, sady ho haintikagne ty hagnazava aze amy ty hafa. (1 Tim. 4:13-15) Naho manao izay tika, le ho afake hampiasa soa o Baibolio mba hampianaragne ty hafa. Faie tsy ampe avao ka ty mamaky andinin-teny naho fa mampianatse ty hafa tika. Toko’e hampeantikagne ka iareo mba hahazo soa ze andinin-teny vakientika  amy iareo, sady atao tsapa’e fa mahakasike aze i andinin-tenỳ. Naho mazoto mianatse Baiboly tsy tapake tika, le vao mainke ho haintikagne ty mampiasa aze naho fa mampianatse ty hafa tika.​—2 Tim. 3:16, 17.

13. Nagnino tika ro mila mahay magnambake naho ty Hebreo 5:14 ro henteagne?

¹³ Mahaia magnambake. Tsy maintsy mamantatse mialoha ty loza va’e hiseho o maramilao, le miomagne ka amy ty fomba hialàgne izay. Mila fantarentikagne mialoha ka tie ino ty raha va’e hagnoho-doza antika, le mila manao raha tika mba hialàgne amy izay. (Ohab. 22:3; vakio ty Hebreo 5:14.) Mila filientikagne soa ohatse ty raha hisantikagne naho ty raha henteantikagne amo o teleo. Ty anto’e, ahatreavagne findesan-tegna raty ty amy raha rey mateteke, le va’e hampihegne tsikedetsikede ty hateantika i Jehovah ty fagnenteantikagne aze. Haintikagne tie heje i Jehovah ty findesan-tegna raty sady manimba ty vata’e naho ty ndaty hafa ze manao raha raty.​—Efes. 5:5, 6.

14. Nagnino ty fahaiagne magnambake ro nagnampe i Daniel?

¹⁴ Nahay nagnambake avao ty Daniel naho fa tafara tatoy, le nitsapa’e fa tsy mete ty mihisa jeux misy alialy naho mazia. Nanao fikarohagne tamy Watchtower Library reke mba hahatreava’e fagnazavagne afake magnampe aze. Ino ty voka’e? Tsy nihisa jeux hoe irey sasa reke. Nisoratse agnaragne tamy fihisagne jeux tamy Internet ao reke tie taloha faie nifafa’e ty agnara’e sady tsy nifandrambe sasa tamy i ndaty niarake nihisa tama’e taoy reke. Hoe ty Daniel: “Tsy nihisa i jeux fihisako rey sasa raho fa ndra aleoko nihisa bisikileta ndra raha hafa mitovitovy amy izay ndra manao raha miarake amy ty ndaty agnivo fiangonagne eo.” Mpisava lalagne ty Daniel amy izao sady fa androanavi-pagnahy.

15. Nagnino o vande aparita o mpivadi-pinoagneo ro magnoho-doza?

¹⁵ Mila mahay magnambake manahake i Timoty ka tika, le mitadidy avao tie magnoho-doza ty fagnazavagne aparita o mpivadi-pinoagneo. (1 Tim. 4:1, 7; 2 Tim. 2:16) Va’e hampiparitake vande miomba o mpiara-manompo amantikagneo ohatse iareo, ndra atao iareo ze hahavy antika tsy hatoky i fandaminagne sasa. Va’e hampihegne ty finoantikagne ty raha hoe izay. Mila mitao areke tika mba tsy voafita iareo sady hino ty raha rehafe iareo. Fa nagnino? Satria ndaty “maloto eretseretse naho tsy managne ty hamarenagne sasa” ty mampiparitake i vande rey. Ty “hialy hevetse” avao ka ty tena tanjo iareo.  (1 Tim. 6:4, 5) Tea iareo naho mino i vande iareo rey tika, amy izay tsy matoky o rahalahy naho o rahavaventikagneo sasa.

16. Ino ty raha mila itaoantikagne?

¹⁶ Mitaoa mba tsy ho tondregne amy ty raha amy ty tontolo toy. “Maramila fanjaka i Kristy” ty Timoty. Tsy maintsy nifantoke tamy ty fanompoagne avao areke reke, fa tsy nitondregne namory fanagnagne ndra nagnatratse tanjogne hafa. (2 Tim. 2:3, 4) Mila manahake i Timoty ka tika, le tsy toko’e ho tondregne hampitombo ty harenantikagne. Ty anto’e, naho tsy mitao tika fa magneke ho voafita o harenao, le va’e hanjare tsy ho tea i Jehovah sasa sady tsy hankasitrake ty Saontsi’e sasa naho tsy hazoto hitory naho hampianatse ty hafa sasa ka. (Mat. 13:22) Mila mikezake areke tika mba hanagne fiaignagne tsotra avao, amy izay ho afake hampiasa soa ty fotoantika naho ty herintika mba hanoagne voalohan-draha i Fanjakagney.​—Mat. 6:22-25, 33.

17-18. Ino ty azontikagne atao mba hahavitantikagne hiaro avao ty fifandrambesantikagne amy i Jehovah?

¹⁷ Miomàna mba ho vognogne hanao raha malaky. Mila miomagne mialoha o maramilao mba hahatreava’e ty raha toko’e hatao’e mba hiarova’e ty tegna’e. Naho teantikagne ka ty hiaro ze raha nankine i Jehovah tamantikagne, le mila vognogne hanao raha malaky tika naho misy raha magnoho-doza antika tampoke. Ino ty hagnampe antika hahavita izay? Mila eretseretentika mialoha ty raha hataontika naho miseho vata’e i raha hagnoho-doza antikagney.

¹⁸ Intoy misy ohatse raike. Naho fa misy spekitakila ty amy ty tane ila’e agne, le irehafagne hey i mpagnatrekey tie aia ty lalagne hiakaragne naho misy loza tampoke. Tsy manomboke i spekitakilay naho tsy vita ze fitaliliagne zay. Ino ty anto’e? Le avy le hay i mpagnatrekey amy izay tie aia ty hilaisa iareo naho avy vata’e i lozay. Mila fantarentikagne mialoha ka ohatse tie ino ty hatao naho mahatrea sare va’e hahavy antika hieretsere-draty tampoke tika amy Internet ao ndra amy tele, ndra naho mahatrea filma feno aly ndra fagnazavagne aboa o mpivadi-pinoagneo. Naho miomagne mialoha amy ze raha va’e hiseho tika, le hahavita hanao raha malaky. Voka’e, halio avao tika agnatreha i Jehovah eo sady hifandrambe soa ama’e avao ka.​—Sal. 101:3; 1 Tim. 4:12.

19. Ino ty soa ho rambesentikagne naho miaro o raha sarobily nimey i Jehovah antikagne reo tika?

¹⁹ Tsy maintsy arovantikagne ze raha sarobily nimey i Jehovah antika. Agnisa izay zao ty hamarenagne amy Baiboly ao naho ty tombotsoa hampianatse ty hafa i hamarenagne rey. Naho manao izay tika, le tsy hagnenjeke antika ty eretserentikagne sady hisy dika’e ka ty fiaignantikagne. Ho fale ka tika satria afake magnampe ty hafa hahafantatse i Jehovah. Mila matoky tikagne tie hagnampe antika ty Jehovah, amy izay ho vitantikagne ty hiaro ze raha nankine’e tamantika.​—1 Tim. 6:12, 19.