1-2. Lo ndjela 1 Timɔte 6:20, kakɔna kakawasha Timɔte?

MBALA efula sho mbishaka anto akina diangɔ diaso dia nɛmɔ dia vɔ tombɛdiɔ. Ɛnyɛlɔ, sho koka totshika falanga yaso lo bankɛ. Etena kasalaso dui sɔ, sho nongamɛka ɔnɛ falanga yaso yayolamema dimɛna ndo ɔnɛ yɔ hayooshishɔ kana mbivama. Kɛsɔ tokimanyiyaka dia sho nshihodia kɛnɛ kalembetshiya mbisha onto okina ɛngɔ kɛmɔtshi kɔsaso la nɛmɔ.

² Adia 1 Timɔte 6:20. Ɔpɔstɔlɔ Pɔɔlɔ akohola Timɔte dia nde akalongola ɛngɔ kɛmɔtshi ka nɛmɔ, mbuta ate ewo k’oshika kendana la sangwelo diaki Nzambi lo dikambo di’anto. Timɔte akalongola nto diɛsɛ dia “sambishaka ɔtɛkɛta” ndo dia “kamba olimu w’osambisha.” (2 Tim. 4:2, 5) Pɔɔlɔ akatɛ Timɔte dia nde namaka kɛnɛ kakawawosha. L’ɛnyɛlɔ ka Timɔte, wakatosha diangɔ dia nɛmɔ. Naa diangɔ diakɔ? Ndo lande na kahombaso namaka diangɔ dia nɛmɔ diatosha Jehowa?

3-4. Naa ɛkɔkɔ ɛmɔtshi wɛnya di’akambo wa mɛtɛ wa lo Bible wekɔ la nɛmɔ?

³ Jehowa akatosha ewo k’oshika k’akambo wa mɛtɛ wa nɛmɔ watanema lo Ɔtɛkɛta ande, Bible. Akambo wa mɛtɛ asɔ wekɔ la nɛmɔ nɛ dia vɔ tetshaka woho wakokaso monga la diɔtɔnganelo dia dimɛna la Jehowa ndo vɔ tɛnyaka kɛnɛ kakoka tosha ɔngɛnɔngɛnɔ wa mɛtɛ lo lɔsɛnɔ. Naka sho mbetawɔ akambo wa mɛtɛ asɔ ndo nsɛna lo yoho yɔtɔnɛ l’akambo akɔ, kete tayotshungɔ oma lo lɔhɔmbɔ la wetshelo wa kashi ndo ditshelo dia mindo.​—1 Kɔr. 6:9-11.

⁴ Ɔkɔkɔ okina wele akambo wa mɛtɛ watanema l’Ɔtɛkɛta wa Nzambi wekɔ la nɛmɔ ele nɛ dia Jehowa mbasholɛka paka wanɛ wele l’okitshakitsha wele “suke dia mbetawɔ.” (Ets. 13:48)  Anto asɔ mbetawɔka ehomɔ kakamba la nde dia tosha akambo wa mɛtɛ asɔ ɛlɔ kɛnɛ. (Mat. 11:25; 24:45) Hatokoke nshihodia akambo wa mɛtɛ asɔ aha l’ekimanyielo, ndo ndooko dui dioleki ohomba ko ndeka oshihodielo w’akambo akɔ.​—Tok. 3:13, 15.

5. Naa ɛngɔ kekina kakatosha Jehowa?

⁵ Jehowa akatosha nto diɛsɛ dia mbetsha anto akambo wa mɛtɛ wendana la nde ndo wendana la asangwelo ande. (Mat. 24:14) Losango lasambishaso lekɔ la nɛmɔ efula nɛ dia lɔ kimanyiyaka anto dia monga lo nkumbo ka Jehowa ndo mbashaka diaaso dia nkondja lɔsɛnɔ la pondjo. (1 Tim. 4:16) Oyadi tekɔ l’akoka wa nsambisha efula kana bu, teye dia tekɔ lo nsukɛ olimu woleki elimu ekina tshɛ wasalema lo nshi yaso nyɛ. (1 Tim. 2:3, 4) Ande nɛmɔ diele la so dia monga ekambi kaamɛ la Nzambi lee!​—1 Kɔr. 3:9.

6. Kakɔna kakakomɛ anto amɔtshi waki kotetemala nama kɛnɛ kakawawasha?

⁶ Anto amɔtshi wa lo nshi ya Timɔte kotetemala monga la lowando lo diɛsɛ diaki la wɔ dia monga ekambi kaamɛ la Nzambi. Lam’ele Dɛmasɛ akalange dikongɛ nɛ di’akambo, nde akatshike diɛsɛ diaki la nde dia nkamba kaamɛ la Pɔɔlɔ. (2 Tim. 4:10) Mɛnamaka dia Fingɛlɔ la Hɛrɛmɔngɛnɛ wakatshike olimu awɔ nɛ dia vɔ wakoke wɔma diaha ndjɔhɛnyahɛnyama oko wakahɛnyahɛnyama Pɔɔlɔ. (2 Tim. 1:15) Himeneya, Alɛksandɛrɛ la Filɛtɔ wakayonga waa apɔsta ndo wakatshike akambo wa mɛtɛ. (1 Tim. 1:19, 20; 2 Tim. 2:16-18) Mɛnamaka di’anto asɔ tshɛ waki la lonyuma la wolo l’etena kɛmɔtshi, koko wakayotshika mbɔsa akambo wa mɛtɛ la nɛmɔ.

7. Tolonga takɔna takamba la Satana dia tɔlɔsha?

⁷ Ngande wasala Satana dia tokonya dia sho ntshika diangɔ dia nɛmɔ diakatosha Jehowa? Tɔsɛdingole tolonga tɔmɔtshi takamba la Satana. Nde kambaka la tɔkɛnyɔ ndo tita sango dia tokonya dia nkanyiya ndo nsala akambo lo yoho yakoka tokonya dia ntshika akambo wa mɛtɛ. Nde salaka la wolo dia totsha wɔma lo ntshimbo ya tɔsɛngiya t’oma le asekaso kana ɛhɛnyɔhɛnyɔ dia sho ntshika nsambisha. Ndo nde salaka la wolo dia tokonya dia sho mpokamɛ “kɛnɛ kelɛwɔ welelɛ ɔnɛ ‘ewo’” ka waa apɔsta dia sho ntshika akambo wa mɛtɛ.​—1 Tim. 6:20, 21.

8. Wetshelo akɔna wakondjaso oma lo kɛnɛ kakakomɛ ɔnangɛso lelɛwɔ Daniel?

⁸ Naka hatendji ɔlɔlɔ, kete sho koka ndjotshika akambo wa mɛtɛ yema yema. Tɔsɛdingole kɛnɛ kakakomɛ Daniel, * ɔnɛ lakalangaka tɔkɛnyɔ ta vidɛo. Nde mbitaka ate: “Lakatatɛ nkɛnya tɔkɛnyɔ ta vidɛo etena kakimi l’ɛnɔnyi  oko dikumi. L’etatelo, lakakɛnyaka tɔkɛnyɔ taketawɔmaka. Koko yema yema, lakayotatɛ nkɛnya tɔkɛnyɔ ta ngala ndo t’awui w’ɛdiɛngɛ.” L’ekomelo, nde akakɛnyaka tɔkɛnyɔ ta vidɛo wenya oko 15 lushi tshɛ. Daniel mbutaka ate: “Lo mbita mɛtɛ, lakeyaka dia weho wa tɔkɛnyɔ wakamakɛnyaka ndo wenya wakametshaka dia nkɛnya tɔkɛnyɔ takɔ wakamanganyaka la Jehowa. Koko, otema ami wakonge lonyu ndo wakambetawoyaka ɔnɛ atɔndɔ wa lo Bible hendana la mi.” Diakɔ diele naka hatendji ɔlɔlɔ, kete tɔkɛnyɔ koka tokonya esadi eto dia ntshika akambo wa mɛtɛ. Naka dui sɔ diambotokomɛ, kete sho koka ndjotshika akambo wa mɛtɛ wa nɛmɔ wakatosha Jehowa.

9. Lo ndjela 1 Timɔte 1:18, 19, Pɔɔlɔ akɛdika Timɔte la na?

⁹ Adia 1 Timɔte 1:18, 19. Pɔɔlɔ akɛdika Timɔte la ɔsɔlayi ndo akookeketsha dia “ndɔ ta di’ɔlɔlɔ.” Ta sɔ komonga ta dia mɛtɛ mɛtɛ, koko ta dia lo nyuma. Lo toho takɔna tele Akristo oko asɔlayi walɔ ta? Waonga akɔna wahombaso nkɛnɛmɔla oko weso asɔlayi wa Kristo? Nyɛsɔ tɔsɛdingole wetshelo etanu wakokaso nkondja oma l’ɛnyɛlɔ kakakambe la Pɔɔlɔ. Wetshelo ɛsɔ koka tokimanyiya dia sho nkukutɛ akambo wa mɛtɛ.

10. Mamema Nzambi kɛdikɛdi na, ndo lande na kahombaso nsala dui sɔ?

¹⁰ Ɛnya dia wɛ mamemaka Nzambi. Ɔsɔlayi wa dimɛna ekɔ la kɔlamelo. Nde ndɔshaka la wolo dia nkokɛ onto ɔmɔtshi lokande ngandji kana ɛngɔ kɛmɔtshi kɔsande la nɛmɔ. Pɔɔlɔ akakeketsha Timɔte dia nde mɛnya dia nde mamemaka Nzambi, mbuta ate mamema Nzambi la kɔlamelo. (1 Tim. 4:7) Naka sho ndeka mboka Nzambi ngandji ndo mbomamema, kete nsaki kaso ka nkukutɛ akambo wa mɛtɛ kayoleka mfula.​—1 Tim. 4:8-10; 6:6.

11. Lande na kahombaso ndjahokolaka?

¹¹ Ɛnya dia wɛ ndjahokolaka. Ɔsɔlayi pombaka ndjalowanyaka dia nde mongaka nshi tshɛ suke dia ndɔ ta. Timɔte akatetemala monga la lonyuma la dimɛna, nɛ dia nde akayele dako dia Pɔɔlɔ diakasambiyama dia ndawɔ nsaki ya kɔlɔ, mbesa waonga w’amɛna ndo sanganaka kaamɛ l’asekande ambetawudi. (2 Tim. 2:22) Dui sɔ nɔmbaka dia sho ndjahokola. Sho pombaka ndjahokola dia mbidja otshumba lo ta dialɔso la nsaki yaso ya demba. (Rɔmɔ 7:21-25) Laadiko dia laasɔ, sho pombaka ndjahokola dia ntetemala nkolola lonto l’edjedja ndo ndɔta lonto l’oyoyo. (Ɛf. 4:22, 24) Ndo naka tambɔlɛmba l’ekomelo ka lushi l’otale, sho koka ndjaketembola dia mbɔtɔ lo losanganya.​—Hɛb. 10:24, 25.

12. Lo toho takɔna takokaso ndjalowanya lo okambelo aso wa la Bible?

¹² Ɔsɔlayi pombaka ndjaekesanyiyaka lo kambaka la dihomɔ diande dia ta. Dia monga la diewo, nde pombaka salaka dui sɔ mbala la mbala. Woho akɔ waamɛ mbele, sho pombaka kakambaka l’Ɔtɛkɛta wa Nzambi la diewo tshɛ. (2 Tim. 2:15) Sho kokaka mbeka toho tɔmɔtshi takokaso nsala dui sɔ lo nsanganya yaso. Koko naka sho nangaka mbetawoya anto akina di’awui wa lo Bible wekɔ mɛtɛ la nɛmɔ, kete sho pombaka salaka wekelo wa Bible w’onto ndamɛ mbala la mbala. Sho pombaka kambaka l’Ɔtɛkɛta wa Nzambi dia nkeketsha mbetawɔ kaso. Dui sɔ nɔmbaka akambo efula, koko aha tsho mbadiaka Bible. Dui sɔ nɔmbaka dia kanaka yimba la kɛnɛ kadiaso ndo salaka eyangelo lo ekanda aso dia sho monga la eokelo ka dimɛna ndo kambaka l’Afundelo dimɛna. (1 Tim. 4:13-15) Lo nsala ngasɔ, tayonga l’akoka wa nkamba l’Ɔtɛkɛta wa Nzambi dia mbetsha anto. Dui sɔ nɔmbaka akambo efula, aha tsho mbadia  avɛsa wa lo Bible. Sho nangaka nkimanyiya ampokami aso dia vɔ nshihodia divɛsa ndo woho wendanadiɔ la wɔ. Lo nɛmiyaka ekongelo kaso ka wekelo wa Bible w’onto ndamɛ mbala la mbala, sho kokaka ndowanya akoka aso wa nkamba la Ɔtɛkɛta wa Nzambi wakasambiyama dia mbetsha anto akina.​—2 Tim. 3:16, 17.

13. Lo ndjela Hɛbɛru 5:14, lande na kahombaso mongaka la shɛnɔdi?

¹³ Onga la shɛnɔdi. Ɔsɔlayi pombaka monga l’akoka wa mbeya waale la ntondo ndo mbeewɔ. Sho la wɔ pombaka mbeya awui amɔtshi wakoka tosalɛ kɔlɔ ndo oma laasɔ mbewɔ waale. (Tok. 22:3; adia Hɛbɛru 5:14.) Ɛnyɛlɔ, sho pombaka sɔnaka awui wa nkɔkɔla demba ndo tɔkɛnyɔ la lomba. Mbala efula televiziɔ ndo filmɛ mɛnyaka awui wa mindo. Ɛnyɛlɔ, lɔkɛwɔ lanyangiya Nzambi ndo lele ndooko onyake layotokonya lo waale. Diakɔ diele, sho mbewɔka tɔkɛnyɔ takoka nkitshakitsha ngandji kokaso Nzambi yema yema.​—Ɛf. 5:5, 6.

14. Ngande wele shɛnɔdi yakakimanyiya Daniel?

¹⁴ Daniel, lakatatɛkɛtshi la diko akayotatɛ nshihodia dia nkɛnya tɔkɛnyɔ ta vidɛo t’awui wa ngala ndo w’ɛdiɛngɛ komonga dimɛna. Nde akasale eyangelo lo Watchtower Library dia ntana awui wakakoke mbokimanyiya dia ndɔshana l’okakatanu ɔsɔ. Shɛngiya yakɔna yakonge la dui sɔ le nde? Nde akatshike nkɛnya tɔkɛnyɔ ta vidɛo ta kɔlɔ. Nde akahembola losambi la sitɛ y’Ɛtɛrnɛtɛ yaki la tɔkɛnyɔ takɔ ndo akahembola losambi l’anto wakatikɛnyaka. Daniel mbutaka ate: “Lo dihole dia kɛnyaka tɔkɛnyɔ ta vidɛo, lakayotatɛ mbetsha wenya dia nsala awui lo sɛkɛ kana kaamɛ l’angɛnyi wa l’etshumanelo.” Daniel ekɔ lo nkamba nshi nyɛ oko ombatshi mboka ndo ekumanyi.

15. Lande na kele ɛkɔndɔ wa kashi wekɔ waale?

¹⁵ L’ɛnyɛlɔ ka Timɔte, sho pombaka nto nshihodia waale wele l’awui wa kashi wadianganya waa apɔsta. (1 Tim. 4:1, 7; 2 Tim. 2:16) Ɛnyɛlɔ, vɔ koka dianganya ɛkɔndɔ wa kashi lo dikambo di’anangɛso kana mbidja taamu dia kana sho koka ndjaɛkɛ l’okongamelo wa Jehowa. Awui wa kashi wa ngasɔ koka nkitshakitsha mbetawɔ kaso. Sho pombaka mbewɔ diaha kesama l’awui wadianganyawɔ asɔ. Lande na? Nɛ dia “anto wele la tokanyi ta kɔlɔ ndo wahate mɛtɛ” mbadianganya ɛkɔndɔ wa ngasɔ. Oyango awɔ ele ntatɛ “l’ewanu ndo lo  mbidjana taamu.” (1 Tim. 6:4, 5) Vɔ nangaka dia sho mbetawɔ emamatanya ndo kashi yawɔ ndo ntshika ndjaɛkɛ le anangɛso.

16. Naa awui wekola yimba wahombaso mbewɔ?

¹⁶ Ewɔ awui wekola yimba. Oko “ɔsɔlayi w’ɔlɔlɔ wa Kristo Yeso,” Timɔte akahombe ntetemala mbidja yimba l’olimu lo dihole dia mbekola yimba lo diangɔ dia l’andja ɔnɛ kana l’oweso wa lomombo la l’emunyi. (2 Tim. 2:3, 4) L’ɛnyɛlɔ ka Timɔte, hatokoke mbetawɔ mbekola yimba yaso lo monga la nsaki ka ndeka monga la lomombo la l’emunyi. “Lokeso lele la ɔngɔnyi” koka toshishɛ ngandji kokaso Jehowa, lowando lele la so l’Ɔtɛkɛta wa Nzambi, ndo nsaki kaso ka nsambisha anto akina. (Mat. 13:22) Sho pombaka ntetemala mbetɛ lɔsɛnɔ laso ɔsɛlɛngɛ ndo nkamba la wenya ndo wolo aso dia “n[tetemala] nyanga ntondo Diolelo.”​—Mat. 6:22-25, 33.

17-18. Kakɔna kakokaso nsala dia mbewɔ waale wa lo nyuma?

¹⁷ Kongɛ dia salaka akambo la shamanya. Ɔsɔlayi pombaka nkongɛ la ntondo kɛnɛ kayondosala dia ndjakokɛ. Naka sho nangaka nkokɛ diangɔ diakatosha Jehowa, kete sho pombaka nsala akambo la nshamanya etena kɛnaso waale. Kakɔna kakoka tokimanyiya dia nsala dui sɔ? Sho pombaka nkongɛ akambo la ntondo dia mbeya kɛnɛ kayotosala etena katomba waale.

¹⁸ Ɛnyɛlɔ, okambi wa dikambɔ wele la lomba mbikaka hiombo l’ekambɔ kande la ntondo k’eleko k’amvula. Lande na? Dia nde ndjokamaka lɔkɔ etena kende l’ekambɔ naka mvula ɔlɔ. Woho akɔ waamɛ mbele, sho kokaka ndjalɔngɔsɔla la ntondo dia mbeya kɛnɛ kayotosala naka la shashimoya osato wa mindo, awui wa ngala kana awui wa waa apɔsta wambotomba etena kakambaso l’Ɛtɛrnɛtɛ kana kendaso filmɛ kɛmɔtshi kana televiziɔ. Naka sho ndjalɔngɔsɔla lo dikambo dia kɛnɛ kakoka ntomba, kete tayosala akambo la nshamanya dia nkokɛ diɔtɔnganelo diasaso la Jehowa ndo ntshikala pudipudi lo washo ande.​—Os. 101:3; 1 Tim. 4:12.

19. Ɛtshɔkɔ akɔna wayotokondja naka sho nama diangɔ dia nɛmɔ diakatosha Jehowa?

¹⁹ Sho pombaka nama diangɔ dia nɛmɔ diakatosha Jehowa, mbita ate akambo wa mɛtɛ wa nɛmɔ wa lo Bible, ndo diɛsɛ diele la so dia mbaetsha anto akina. Naka sho nsala ngasɔ, kete tayonga la nkum’otema ka pudipudi, tayonga la lɔsɛnɔ lele mɛtɛ l’oyango, ndo tayɔngɛnangɛna dia nkimanyiya anto akina dia mbeya Jehowa. L’ekimanyielo kande, tayonga l’akoka wa nama kɛnɛ kakawatosha.​—1 Tim. 6:12, 19.