1-2. Guya khu 1 Thimoti 6:20, ginani egi Thimoti a nga ba a yede gu gira?

SI OLOVELEGIDE gu silo sathu nya lisima si khathaledwa khu vambe. Khu giyeyedzo, dzitsapawu dzathu ha gu vega bhanko gasi dzi si dzimeyi mwendro gu bidwa. Khu kharato, hi ngu si pwisisa gwadi gu khethu so thula ginani gu pharisa silo sathu nya lisima mumbe muthu.

² Leri 1 Thimoti 6:20. Mupostoli Pawulo dundrugiside Thimoti gu khuye guti lisine khesi Nungungulu a na gireyago vathu thomba nya yikhongolo. Thimoti manide gambe lithomo ‘nyo ganeye mahungu nya yadi’ ni gu hevbudza vambe lisine. (2 Thim. 4:2, 5) Khu gighelo gyogyo Pawulo kutside Thimoti gu vegisa gukhodwa ogu a gu hakhidego. Gu fana ni Thimoti, Jehovha a hi ningide silo nya lisima ngudzu. Silo muni nya lisima esi Jehovha a hi ningidego? Nigu hi nga sayisa kharini thomba eyi Jehovha a hi ningidego?

3-4. Khu sevbini sighelo si girago gu lisine nya Bhibhiliya li khala thomba?

³ Khu gu dzina gwaye, Jehovha a hi dzumelede gu hiti lisine li gomogo omu nya lito laye a gu Bhibhiliya. Lisine lolo thomba nya yikhongolo kholu li ngu hi phasa gu khala dzipari dza Jehovha ni gu mana womi nyo tsakise. Tepo hi hevbulago lisine nya Bhibhiliya hi bwe hi vbanya khesi hi si hevbulago ha gu tshudwa avba nya sihevbudzo nya malipha ni mavbanyelo nyo vivbe. — 1 Kor. 6:9-11.

⁴ Gimbe gilo gi girago gu lisine nya Bhibhiliya li khala thomba khu gu Jehovha a gu li embeya basi ga vale va dzi nogisago ‘ni ava va dzi emisedego gu hakha womi nya gupindruge.’ (Mith. 13:48) Vathu vava nya gudzinogise va ngu dzumeya esi Jehovha a va hevbudzago  khu gu thumisa githumi nya gutumbege ni nya gugengeye. (Mat. 11:25; 24:45) Kha si kodzegi gu hiti lisine habune nigu gu mwalo gilo nya lisima gu vbindra guti lisine leli.—  Mav. 3:13, 15.

5. Lithomo muni gambe eli Jehovha a hi ningidego?

⁵ Hi na ni lithomo gambe nyo hevbudze lisine khu Nungungulu ni situmbiso saye. (Mat. 24:14) Mahungu hi tshumayelago ma na ni lisima nya likhongolo ngudzu kholu ma ngu phasa vathu gu khala sivbango nya ndranga ya Nungungulu ni gu va tuleya lithomo nyo mane womi nyo pindruge. (1 Thim. 4:16) Gani hi ngu gira nya singi thumoni nyo tshumayele, gani hi ngu gira nya sidugwana lisine khu gu hatshavbo hi ngu patega avba nya thumo wowu nya lisima. (1 Thim. 2:3, 4) Khu lisine, lithomo nya likhongolo ngudzu gu thuma ni Nungungulu.— 1 Kor. 3:9.

6. Ginani gi dugeledego mambe maKristo?

⁶ Mambe maKristo ma vbanyidego teponi ya Thimoti ma digide gu sayisa lithomo nyo thume gumogo ni Nungungulu. Khu giyeyedzo, Dhemasi a di gu gola ngudzu silo nya litigo khu gighelo gyogyo a digide gu sayisa lithomo nyo thume gumogo ni Pawulo. (2 Thim. 4:10) Figelo ni Herimogeni anavo va digide thumo wawe nyo tshumayele khu gu thava gu tshaniswa kha nga Pawulo. (2 Thim. 1:15) Heminewu, Alesandre ni Fileto va digide lisine va khala vawugeyi. (1 Thim. 1:19, 20; 2 Thim. 2:16-18) Adzina vama vava va di vidzidwe khu liphuvboni ganiolu khu gu gimbiya nya tepo va digide gu sayisa thomba va nga ba va ningidwe.

7. Dzindziya muni edzi Sathane a dzi thumisago gasi gu hi digisa lisine?

⁷ Gu fana ni vama vale, muhuno Sathane o vbweta gu khuye hi diga gu sayisa thomba eyi hi ningidwego khu Jehovha. Khu dzevbini dzindziya a dzi thumisago gasi gu gira isoso? Nyo pheye, Sathane o thumisa sivbungadzo gasi gu phalalegiseya mavbanyelo nyo vivbe ma nga hi girago hi diga lisine. Nya wuvili, Sathane o thumisa hwanga. Khu giyeyedzo, a nga thumisa sihevbulo khwathu ni valongo vathu gasi gu hi digisa gu tshumayela. Nya wuraru, Sathane o thumisa vawugeyi gasi gu phalalegiseya “malipha” khethu, satshavbo soso na vbweta gu khuye hi diga lisine. 1 Thim. 6:20, 21.

8. Ginani u gi hevbudego khesi si dugeledego Daniel?

⁸ Ha gu mba dzi woneya hi nga pheya gu diga lisine vbadugwanavbadugwana. Wona esi si dugeledego Daniel, * a nga ba a gola ngudzu gu jogari dzivhidhiyu ghemi. Uye wari khuye: “Nyi phede gu jogari dzivhidhiyu ghemi na nyiri ni 10 myaga. Gupheyani gi mwalo gi nga ba gi vivbide avba nya dzivhidhiyu ghemi dzangu. Ganiolu  khu gu gimbiya nya tepo nyi di pheya gu jogari dzivhidhiyu ghemi dzi nga ba dzi yeyedza vathu na va gu dwana ni wudhemoni.” Daniel a di gu vbedza 15 dziora khu litshigu na jogari dzivhidhiyu ghemi. Uye gambe wari khuye: “Nyi di gu dziti gu kheni dzivhidhiyu ghemi dzile nyi nga ba nyi jogari ni tepo eyi nyi nga ba nyi yi vbedza si di gu nyi hambanisa ni Jehovha. Ambari ulolo, nyi di si veta khu magata. Nyi di gu dzi embeya gu kheni matshina nya milayo nya Bhibhiliya kha ma thumi avba gwangu.” Esi si dugeledego Daniel si nga hi dugeleya nethu. Sivbungadzo si nga hi gira vbadugwanavbadugwana hi pheya gu diga lisine. So tshuka si hi giregeya isoso, si na hi gira hi luza silo nya lisima esi Jehovha a hi ningidego.

9. Guya khu 1 Thimoti 1:18, 19, Pawulo fananiside Thimoti ni ginani?

⁹ Leri 1 Thimoti 1:18, 19. Mupostoli Pawulo fananiside Thimoti ni lisotshwa nigu a mu kutside gu ‘simama gu dwana litunga nya ladi.’ Litunga li ganedwego khu Pawulo khandri litunga nyo dwane sibhakeya. Ganiolu, gu yelana muni gu gomogo avba nya litunga li dwanwago khu maKristo ni litunga li dwanwago khu masotshwa? Nigu makhalelo muni ethu masotshwa ya Kristo hi yedego gu manega nawo? Avba nya giyeyedzo gya Pawulo hi na hevbula khu livbandre makhalelo hi yedego gu manega nawo. Makhalelo yaya ma na hi phasa gu sayisa thomba hi ningidwego khu Jehovha.

10. Khu ginani hi yedego gutumbega?

¹⁰ Simama gu tumbega. Lisotshwa nya ladi li ngu tumbega. Ilo la gu dwana khu tshivba yatshavbo gasi gu vhikeya silo nya lisima mwendro gu vhikeya oyu li mu haladzago. Pawulo kutside Thimoti gu simama gutumbega ga Jehovha. (1 Thim. 4:7) Ha gu engedzeya lihaladzo lathu khu Nungungulu si na hi phasa gu hi si dzumeleyi ni gevbini gi hi digisa lisine.  — 1 Thim. 4:8-10; 6:6.

11. Khu ginani si vbwetago gu hi dzi garadza?

¹¹ Dzi garadze. Gasi gu lisotshwa li kodza gu dwana gu vbweta li dzi dongiseya gwadi. Thimoti a dzi dongisede gwadi khu liphuvboni khu gu landreya sileletelo a nga ba a ningwa khu Pawulo. Uye a di gu potsa mavbanyelo nyo vivbe a haguleya makhalelo nya yadi nya wuKristo ni gu dzi tshanganisa ni vandriyaye gukhodwani. (2 Thim. 2:22) Isoso si di gu vbweta gu a dzi garadza. Anethu gu vbwetega hi dzi garadza gasi hi pala mavbanyelo nyo vivbe. (Rom. 7:21-25) Gu diga isoso, gu vbweta hi dzigaradza gasi hi diga mavbanyelo ya gale hi ambala mavbanyelo nya maphya. (Efes. 4:22, 24) Gu vbwetega hi dzi garadza gambe gasi gu hi si dzumeleyi migaralo ya tshigu ni tshigu yi hi tandregisa gu hongola mitshanganoni. — Hebh. 10:24, 25.

12. Ginani gi na hi phasago gu kodza gu thumisa gwadi Bhibhiliya?

¹² Lisotshwa gu vbwetega li trenari gwadi gasi liti gu thumisa matshari li na ma thumisago nyimbituno nigu gu vbwetega li trenari tshigu ni tshigu. Khu gufana, anethu gu vbwetega hi trenari gasi hi kodza gu thumisa gwadi lito la Nungungulu. (2 Thim. 2:15) Dzimbe dzindziya nya gu thumise gwadi lito la Nungungulu ha gu hevbula mitshanganoni. Ganiolu, gasi gu phasa vambe gu wona lisima nya Bhibhiliya gu vbwetega gu ethu hi yi hevbula tshigu ni tshigu, hi dundrugeya khesi hi si hevbulago ni gu bwe hi gira wugevisisi omu nya mabhuku yathu gasi hi tiyisa gukhodwa gwathu. Ha gu gira isoso, hi na pwisisa gwadi milowo hi bwe hi vbanya khesi hi si hevbulago. (1 Thim. 4:13-15) Nigu hi na si kodza gu thumisa gwadi milowo gasi gu hevbudza vambe lisine. Isoso gambe so pata gu leri milowo hi bwe hi yi tshamuseya gwadi gasi vaengiseyi vathu va si pwisisa va bwe va vbanya khiso. Ha gu hevbula Bhibhiliya litshigu ni litshigu ni gu gira gihevbulo nya muthu enga si na hi phasa gu  tshukwadzisa mahevbudzelo yathu. — 2 Thim. 3:16, 17.

13. Guya khu Vahebheru 5:14, khu ginani hi yedego gu manega ni guti?

¹³ Manega ni guti. Lisotshwa gu vbwetega liti edzi li nga dzi vhikeyago khidzo go tshuka gu dugeleya mhango nyo khaguri. Ethu gu vbwetega hiti siemo si nga hi bedzago mhangoni hi bwe hiti dzindziya hi nga si potsago khidzo. (Mav. 22:3; leri Vahebheru 5:14.) Khu giyeyedzo, gu vbwetega hi hatha gwadi sivbungadzo sathu kholu dzifilimi nya dzingi dzi yeyedzwago muhuno ni milongoloko nya TV sa gu yeyedza mavbanyelo nyo vivbe aya ma gu mba tsakisa Nungungulu. Nigu khu gu gimbiya nya tepo mavbanyelo yoyo ma na pheya gu hi vangeya sigaradzo guvbanyani. Khu kharato, gu vbwetega hi potsa ni sevbini sivbungadzo si na hi girago vbadugwanavbadugwana hi luza wupari wathu ni Jehovha. — Efes. 5:5, 6. 

14. Guti gu mu phaside kharini Daniel?

¹⁴ Daniel hi ganedego khuye hegiside khu si wona gu khuye dzivhidhiyu ghemi dzile a nga ba a dzi gola gu jogari dzi diri ni gigaradzo. Uye giride wugevisisi omu nya Watchtower Library, a vbweta mahungu ma na mu phasago gu emisana ni gigaradzo gyaye. Isoso si mu phasago kharini? Daniel a di diga gu jogari dzi ghemi dzile dzi nga ba dzi yeyedza mavbanyelo nya mba handzega a bwe a ema gu dzi tshanganisa ni mitsawa a nga a jogari nayo khomu nya interneti. Daniel wari khuye: “Vbavbandze nyo jogari dzivhidhiyu ghemi nyi di pheya gu gira yimbe mithumo nyi bwe nyi dzi tshanganisa ni vandriyathu va libandlani.” Olu hi gu ganegane, Daniel lidhota nigu a gu thuma kha nga piyonero.

15. Mhango muni yi gomogo avba nya malipha ma swayedwago khu vawugeyi?

¹⁵ Kha nga Thimoti, anethu gu vbwetega hi dzi woneya avba nya malipha ma swayedwago khu vawugeyi. (1 Thim. 4:1, 7; 2 Thim. 2:16) Khu giyeyedzo, avo va nga swayeya malipha khu Jehovha va bwe va ganeya silo si nga hi girago hi kanakaneya hengeledzano ya Jehovha. Malipha yoyo ma nga khuha gukhodwa gwathu mwendro gu vbungula lihaladzo lathu khu Jehovha. Gu vbwetega hi dzi woneya gasi hi si kanganyiswi khavo. Khu ginani? Khu gu mahungu yoyo ma gu swayedwago khu “vathu nyambana mapimo va guromo hwindzo ni lisine” makungo yawo “gu wusa maregera ni guphikizana.” (1 Thim. 6:4, 5) Makungo yawe khya gu khavo ethu hi khodwa malipha yawe ni gu bwe hi kanakaneya vandriyathu.

16. Silo muni si nga hi tsolopeteyago thumoni wathu nyo tshumayele?

 ¹⁶ U nga dzumeleyi gilo gi gu tsolopeteya. Khu gu ba ari “musotshwa wa Kristo Jesu,” Thimoti a di yede gu vega gupima avbo nya thumo nyo tshumayele. Uye kha nga ba a yede gu dzumeleya dzitsapawu mwendro simbe silo si tsolopeteya thumo waye. (2 Thim. 2:3, 4) Kha nga Thimoti, kha hi yeli gu dzumeleya dzitsapawu mwendro simbe silo nya litigo si tsolopeteya thumo wathu. “Dzithomba nya mafu” dzi nga songa lihaladzo lathu khu Jehovha ni lito laye a gu Bhibhiliya. Nigu dzi nga gira gu hi si wu tsakeyi gambe thumo wathu nyo tshumayele. (Mat. 13:22) Khu kharato, gu vbwetega hi vbevbugisa womi wathu ni gu thumisa tepo yathu, tshivba yathu ‘gasi gu thangisa Mufumo wa Nungungulu.’ — Mat. 6:22-25, 33.

17-18. Ginani hi yedego gu gira gasi hi sayisa wupari wathu ni Jehovha?

¹⁷ Khala na wu dongide. Lisotshwa li yede gu khala na li dongide gasi gu dwana. Anethu gu vbwetega hi khala na hi dongide gasi gu sayisa thomba eyi Jehovha a hi ningidego. Ginani gi na hi phasago? Gu vbwetega hi khala na hi dongide gasi guti edzi hi na hlamulago khidzo go tshuka gu dugeleya gigaradzo.

¹⁸ Khu giyeyedzo, omu nya dzifesta nyo khaguri vathu vo dongisedwa gasi guti esi va na girago go tshuka gu dugeleya mhango nya avba ni avba. Khu ndziya nyo fane, anethu hi yede gu dzi dongiseya gasi guti esi hi na “girago” go tshuka go dugeleya silo nyo vivbe omu nya milongoloko nya TV mwendro omu nya interneti. Nya nga dzifoto nya vathu va nga mba ambala sombo, dzivhidhiyu nya mayunga mwendro mahungu nya vawugeyi. Ha gu khala na hi dongide hi na si kodza gu dzi vhikeya hi bwe hi sayisa wupari wathu ni Jehovha. — Ndzi. 101:3; 1 Thim. 4:12.

19. Makategwa muni hi na ma manago ha gu sayisa thomba eyi Jehovha a hi ningidego?

¹⁹ Ethu gu vbwetega hi sayisa silo nya lisima esi Jehovha a hi ningidego, nya nga lisine hi li hevbulago omu nya Bhibhiliya ni lithomo nyo hevbudze vambe. Ha gu gira isoso hi na manega ni livhalo nyo age, womi nyo tsakise nigu hi na dzi buza khu gu tsaka gu reswago khu gu phasa vambe guti Jehovha. Tiyisega gu khuwe Jehovha a na gu phasa gu sayisa thomba a gu ningidego. — 1 Thim. 6:12, 19.