1, 2. Chuna la wan 1 Timoteo 6:20, ¿tuku xlitlawat xwanit Timoteo?

AKXNI wi tiku kgalhi tuku lu xtapalh, min kilhtamaku maxki atanu lataman xlakata nakuentajtlawani. Akgtum liʼakxilhtit, max namaki xtumin anta kbanco xlakata ni namakgatsankga o nalakgakgalhankan. Akgatekgsaw tuku kilhchanima pi tiku lipawana namaxkiya tuku lanka xtapalh liʼakxilha.

² (Kalikgalhtawakga 1 Timoteo 6:20). Apóstol Pablo malakapastakalh Timoteo pi xla xmakglhtinanit tuku lu xtapalh: xmasiyanikanit xtalakaskin Dios xpalakatakan latamanin. Jehová na xlakgayawanit Timoteo nalichuwinan xTachuwin chu lu naliskuja uma (2 Tim. 4:2, 5). Pablo wanilh Timoteo pi kuentajxtlawalh tuku xlakgayawakanit. Jehová na kinkalakgayawanitan tuku lu xtapalh. ¿Tuku uma? ¿Chu tuku xlakata kuentajkilitlawatkan?

3, 4. Kalichuwinanti makgapitsi tuku xlakata xaxlikana nema tatekgsa kBiblia lu xtapalh.

³ Xlakata xtalakgalhaman, Jehová kinkamaxkinitan talakaskin nalakgapasaw tuku xaxlikana nema wi kxTachuwin, Biblia. Umakgolh tuku xaxlikana, lu xtapalh xlakata kinkamasiyaniyan la tlan xʼamigos Jehová nalitaxtuyaw chu la tlan nakgalhiyaw tapaxuwan. Akxni makgamakglhtinanaw umakgolh tuku xaxlikana chu lilatamayaw, nialh xatachin kinkawilinitan nixaxlikana tamasiy chu tuku tlawakan nema xalixkajnit (1 Cor. 6:9-11).

⁴ Xaxlikana nema tatekgsa kxTachuwin Dios na lu xtapalh xlakata Jehová kajwatiya kamasiyani latamanin tiku taktujukgo chu «tiku makgamakglhtinamputunkgo» uma (Hech. 13:48). Umakgolh latamanin makgamakglhtinankgo tuku maklakaskin Dios la uku xlakata nakinkamasiyaniyan tuku xaxlikana (Mat. 11:25; 24:45). Akinin nila kiʼakstukan katsiniyaw umakgolh tuku xaxlikana.  Ni anan atanu tuku tlakg xtapalh nixawa akxni akgatekgsniyaw uma (Prov. 3:13, 15).

5. ¿Tuku atanu kinkalakgayawanitan Jehová?

⁵ Jehová na kinkamaxkinitan talakgalhaman xlakata nakamasiyaniyaw amakgapitsin latamanin tuku xaxlikana xpalakata chu tuku xtalakaskin (Mat. 24:14). Umakgolh tamakatsinin lu xtapalh xlakata kamakgtaya latamanin namakgtapakgsikgo kxfamilia Jehová chu kamaxki talakaskin nalatamakgo putum kilhtamaku (1 Tim. 4:16). Maski lhuwa o ni lhuwa tuku tlawayaw kxtaskujut Jehová, makgtayanamaw xlakata natatlawa lu xlakaskinka taskujut nema anan kkinkilhtamakujkan (1 Tim. 2:3, 4). ¡Lu lanka talakgalhaman xlakata akxtum taskujmaw Dios! (1 Cor. 3:9).

6. ¿Tuku kaʼakgspulalh makgapitsin kstalaninanin Cristo?

⁶ Kxkilhtamaku Timoteo, makgapitsin kstalaninanin Cristo ni xtapalh liʼakxilhkgolh talakgalhaman nema xkgalhikgo xlakata tlan akxtum xtaskujkgo Dios. Akgtum liʼakxilhtit, Demas paxkilh uma kakilhtamaku chu wa xlakata lakgmakgalh talakgalhaman xlakata akxtum xtaskujli Pablo (2 Tim. 4:10). Figelo chu Hermógenes nialh lichuwinankgolh Dios xlakata pekuankgolh pi na xkaputsastalanika chuna la putsastalanika Pablo (2 Tim. 1:15). Himeneo, Alejandro chu Fileto apóstatas litaxtukgolh chu makgxtakgkgolh xaxlikana (1 Tim. 1:19, 20; 2 Tim. 2:16-18). Putum umakgolh latamanin milh kilhtamaku tliwakga xkgalhikgo xtakanajlakan, pero nialh xtapalh liʼakxilhkgolh tuku tlakg xlakaskinka.

7. ¿Tuku maklakaskin Satanás xlakata nialh xtapalh naliʼakxilhaw tuku kinkamaxkikanitan?

⁷ ¿Tuku maklakaskin Satanás xlakata nialh xtapalh naliʼakxilhaw tuku kinkamaxkinitan Jehová? Kaʼakxilhwi makgapitsi tuku maklakaskin. Limaklakaskin lilakgastan, televisión, Internet, películas, periódicos, libros chu revistas. Na kamaklakaskin amakgapitsin latamanin xlakata nakinkamatlawiputunkgoyan tuku ni xlilat o taputsastalanit xlakata napekuanaw chu nialh nalichuwinanaw Dios. Chu kinkaʼakgskgawiputunan xlakata wa kuentajnakatlawaniyaw tiku wankgo pi «lakgskgalalan» pero masiyakgo xtalakapastaknikan apóstatas chu namakgxtakgaw xaxlikana (1 Tim. 6:20, 21).

8. ¿Tuku kinkamasiyaniyan tuku akgspulalh Daniel?

⁸ Komo ni kuentajnatlawayaw, max tsinu tsinu natsukuyaw makgxtakgaw xaxlikana. Kaʼakxilhwi tuku titaxtulh Daniel, * tiku lu xlakgati likgamanan videojuegos. Xla wan: «Ktsukulh likgamanan videojuegos akxni max xakkgalhi 10 kata. Xapulana, umakgolh vidiojuegos xtasiya pi nitu xʼamakgolh kintlawanikgo. Pero tsinu  tsinu ktsukulh klikgamanan videojuegos niku xlatlawanikan tuku nitlan chu xlimin tuku xla demonios». Milh kilhtamaku asta akgkukitsis hora xkgamanan kvideojuegos. Daniel lichuwinan: «Xakkatsi pi umakgolh takgaman chu kilhtamaku nema xakmaklakaskin xlakata xakkgamanan xkimamakgatlinima Jehová. Pero kintalakapastakni nialh xkisakgali chu xaklakpuwan pi xtastakyaw Biblia ni xkilimakwani». Uma kinkamasiyaniyan pi talakgastan max tsinu tsinu natlawa pi namakgxtakgaw xaxlikana. Komo chuna nakinkaʼakgspulayan, max namakgatsankgayaw tuku xtapalh kinkamaxkinitan Jehová.

9. Chuna la wan 1 Timoteo 1:18, 19, ¿tuku tamalakxtumilh Pablo Timoteo?

⁹ (Kalikgalhtawakga 1 Timoteo 1:18, 19). Pablo tamalakxtumilh Timoteo chatum soldado chu wanilh pi “chuntiya xtalatlawanalh ktatalachipat”. Pero uma tatalachipat ni tasiya, xlakata xaʼespiritual. ¿Tuku kilhchanima pi kstalaninanin Cristo litaxtuyaw chuna la soldados kʼakgtum guerra? ¿Tuku tayat kilikgalhitkan ksoldados Cristo? Liʼakxilhtit nema lichuwinalh Pablo kinkamasiyaniyan pulakkitsis tuku kilitlawatkan xlakata ni namakgxtakgaw xaxlikana. Kaʼakxilhwi tuku uma.

10. ¿Tuku kilhchanima kakninanikan Dios, chu tuku xlakata lu xlakaskinka?

¹⁰ Kajwatiya kakakninaniw Dios. Chatum xatlan soldado ni makgxtakgnan. Talatlawanan xliputum xlitliwakga xlakata nakuentajtlawa tiku paxki o tuku xtapalh liʼakxilha. Pablo makgpuwantinilh Timoteo pi kajwatiya Dios xkakninanilh, uma kilhchanima pi xpaxkilh chu ni xmakgxtakgli (1 Tim. 4:7). Komo tlakg napaxkiyaw Jehová, uma natlawa pi tlakg tliwakglh nachipayaw xaxlikana (1 Tim. 4:8-10; 6:6).

11. ¿Tuku xlakata kiliskujatkan xlakata wi tuku namakgantaxtiyaw?

¹¹ Kaliskujwi xlakata natlawaya tuku tlan. Chatum soldado lu xliskujat komo makgantaxtiputun tuku lakgayawakanit. Timoteo makgantaxtilh tuku xlakgayawakanit chuna la ksoldado Cristo xlakata stalanilh xtastakyaw Pablo akxni wanilh pi ni natlawa tuku ni xlilat, nakgalhi tayat nema xlikgalhit kstalanina Cristo chu akxtum nakatala xnatalan (2 Tim. 2:22). Xlakata chuna xtlawalh xtalakaskin pi lu xliskujli. Chu akinin nachuna kilitlawatkan komo makgatlajaputunaw tuku nitlan tlawaputunaw (Rom. 7:21-25). Nachuna, kiliskujatkan komo chuntiya makgxtakgputunaw xamakgan tayat chu lilhakganamputunaw xasasti tayat (Efes. 4:22, 24). Chu, akxni lu tlakgwanitaw akxni sputa akgtum kilhtamaku, max natalakaskin pi lu naliskujaw xlakata naʼanaw ktamakxtumit (Heb. 10:24, 25).

12. ¿Tuku nakinkamaktayayan xlakata tlakg tlan makgalhtawakgenanin nawanaw?

¹² Komo chatum soldado liwana limaklakaskimputun tuku litalatlawanan, xlakaskinka pi ankgalhin nalimakgatawakga. Xtachuna la uma, akinin kstalaninanin Cristo na talakaskin liwana nalimaklakaskinaw xTachuwin Dios (2 Tim. 2:15). Tamakxtumit kinkamakgtayayan nakatsiyaw la tlan natlawayaw. Pero komo lakaskinaw pi latamanin naʼakgatekgskgo la xlilhuwa xtapalh tuku xaxlikana, talakaskin pi kiʼakstukan nalikgalhtawakgayaw Biblia. Talakaskin nalimatliwakglhaw kintakanajlakan xTachuwin Dios. Pero ni kajwatiya talakaskin nalikgalhtawakgayaw. Talakaskin nalilakpuwanaw chu nalakputsananiyaw tuku lichuwinanit kilikgalhtawakgakan xlakata liwana naʼakgatekgsniyaw chu nakatsiniyaw la namasiyayaw tuku kilhchanima (1 Tim. 4:13-15). Chuna nakatsiniyaw la namaklakaskinaw Biblia akxni nakamasiyaniyaw amakgapitsin. Ni kajwatiya talakaskin nakalikgalhtawakganiyaw akgtum texto. Kamakgtayaputunaw xlakata naʼakgatekgskgo chu la nalitamakgtayakgo.  Chuna, komo ankgalhin nalikgalhtawakgayaw Biblia, tlakg tlan makgalhtawakgenanin nawanaw (2 Tim. 3:16, 17).

13. Chuna la wan Hebreos 5:14, ¿tuku xlakata talakaskin nalimaklakaskinaw kintalakapastaknikan?

¹³ Kamaklakaskiw kintalakapastaknikan. Chatum soldado xlikatsit akxni nala tuku nitlan chu nakatsi tuku xlitlawat xlakata nitu nalani. Akinin na talakaskin nakatsiyaw akxni nala tuku nitlan chu talakaskin nakatsiyaw tuku natlawayaw xlakata nitu nakikaʼakgspulayan (kalikgalhtawakga Hebreos 5:14; Prov. 22:3). Akgtum liʼakxilhtit, liwana kililaksakatkan tuku nalilakgastananaw. Ktelevisión taxtukgo lhuwa programas chu películas nema liminkgo tuku masiya talakgxtumit xalimaxana. Akinin kstalaninanin Cristo lakgmakganaw umakgolh lilakgastan xlakata max tsinu tsinu namaxlajwani tapaxkit nema kgalhiniyaw Jehová. Katsiyaw pi Dios ni akxilhputun talakgxtumit xalimaxana chu latamanin tiku tlawakgo talakgxtumit xalimaxana xʼakstukan katlawanikan tuku nitlan chu amakgapitsin (Efes. 5:5, 6).

14. ¿Tuku kitaxtulh xlakata Daniel maklakaskilh xtalakapastakni?

¹⁴ Daniel, tiku lichuwinaw kpárrafo 8, tsukulh akxilha pi likgamanankan videojuegos nema limin tuku nitlan chu tuku xla demonios nitlan xwanit. Putsalh tamakgtay anta kWatchtower Library xlakata namakgatlaja tuku nitlan xtlawa. ¿Tuku kitaxtulh? Makgxtakgli videojuegos nema xtlawanima tuku nitlan, nialh tsukulh likgamanan videojuegos anta kʼInternet chu nialh tsukulh katalalin amakgapitsin tiku na xlakgatikgo xkgamanankgo. Xla wan: «Nialh klikgamanalh videojuegos, wata ktsukulh limaxtu kilhtamaku xlakata akxtum nakkatatawila natalan xalak congregación». La uku Daniel precursor chu kgolotsin litaxtu.

15. ¿Tuku xlakata lu nitlan taʼakgsanin?

¹⁵ Xtachuna la Timoteo, na talakaskin pi akinin naʼakgatekgsaw pi tuku malakgatumikgo apóstatas lu nitlan tuku tlawaninan (1 Tim. 4:1, 7; 2 Tim. 2:16). Akgtum liʼakxilhtit, max namalakgatumikgo taʼakgsanin xlakata kinatalankan o natlawaputunkgo pi ni nakanajlaniyaw xkachikin Jehová. Umakgolh taʼakgsanin max namaxlajwani kintakanajlakan. Ni kamastaw talakaskin pi nakinkaʼakgskawikgoyan «lakchixkuwin ti lixkajnit takgalhi ixtalakapastaknikan porque ni tamakgachakgxi tanks talakapastakni» chu kaj wiliputunkgo taʼakglhuwit (1 Tim. 6:4, 5). Xlakan lakaskinkgo pi kakanajlaw xtaʼakgsaninkan chu pi ni kakalipawaw kinatalankan.

16. ¿Tuku max natlawa pi nialh nakuentajtlawayaw tuku xaxlikana?

 ¹⁶ Nitu katlawalh pi nialh nakuentajtlawayaw xaxlikana. Xlakata Timoteo tlan ksoldado Cristo xlitaxtulh, xtalakaskin pi wa lu kuenta xtlawalh tuku xlakgayawanit Dios chu ni xmastalh talakaskin pi tuku lhuwa xtapalh o atanu tuku xtlawaputun xmalaktlawilh (2 Tim. 2:3, 4). Chuna la Timoteo, ni mastaputunaw talakaskin pi tuku lhuwa xtapalh natlawa pi nialh nakuentajtlawayaw tuku xaxlikana. Komo “nalipawanaw tumin” max natlawa pi nialh napaxkiyaw Jehová, nialh xtapalh katiliʼakxilhwi xTachuwin chu nialh katikalitachuwinamputuw amakgapitsin latamanin (Mat. 13:22). Talakaskin pi ni lhuwa tuku nakgalhiyaw chu nalimaklakaskinaw kinkilhtamakujkan chu kilitliwakgakan xlakata chuntiya “pulana naputsayaw xTamapakgsin Dios” (Mat. 6:22-25, 33).

17, 18. ¿Tuku kilitlawatkan xlakata nitu nalani kintakanajlakan?

¹⁷ Lakapala wi tuku katlawaw. Chatum soldado pulana xlilakapastakat tuku natlawa akxni wi tiku natlawaniputun tuku nitlan. Komo kuentajtlawaputunaw tuku kinkalakgayawanitan Jehová, lakapala wi tuku kilitlawatkan akxni akxilhaw pi wi tuku kinkatlawaniputunan tuku nitlan. ¿Tuku nakinkamakgtayayan? Pulana nalilakpuwanaw tuku natlawayaw akxni wi tuku kinkatlawaniputunan tuku nitlan.

¹⁸ Akgtum liʼakxilhtit, akxni wi tuku tlawamaka niku wilakgo lhuwa latamanin, akxni nina tsuku programa kawanikan pi kaputsakgolh niku tlan lakapala nalaktaxtukgo. ¿Tuku xlakata? Komo wi tuku lakapala nala nakatsikgo niku lakapala nalaktaxtukgo. Xtachuna la uma, nalakkaxwiliyaw tuku lakapala natlawayaw xlakata «nataxtuyaw» komo akxni maklakaskimaw Internet o akxilhmaw akgtum película o akgtum programa ktelevisión, nataxtu tuku masiyakgo apóstatas o niku tlawamaka talakgxtumit xalimaxana o niku latlawanikan tuku nitlan. Komo pulana lakkaxwilinitaw tuku natlawayaw, wi tuku lakapala natlawayaw xlakata nitu natlawani kintakanajlakan chu skulunku natawilayaw kxlakatin Jehová (Sal. 101:3; 1 Tim. 4:12).

19. ¿Tuku tasikulunalin nakgalhiyaw komo nakuentajtlawayaw tuku lhuwa xtapalh nema Jehová kinkamaxkinitan?

¹⁹ Akinin kstalaninanin Cristo kuentajkilitlawatkan tuku lhuwa xtapalh kinkalakgayawanitan Jehová: tuku lhuwa xtapalh xalak Biblia chu talakgalhaman xlakata tlan nakamasiyaniyaw amakgapitsin. Komo chuna natlawayaw, kintalakapastaknikan tlan natawila, nakgalhiyaw tlan latamat chu tapaxuwan xlakata tlan nakamakgtayayaw amakgapitsin nalakgapaskgo Jehová. Xla nakinkamakgtayayan nakuentajtlawayaw tuku kinkalakgayawanitan (1 Tim. 6:12, 19).