1-2. Olsem 1 Timoti 6:20 i kamapim, Timoti i bin kisim wanem samting?

PLANTI taim yumi save larim ol narapela i lukautim ol gutpela samting bilong yumi. Olsem, ating yumi bin putim mani bilong yumi long benk. Taim yumi mekim olsem, yumi save olsem mani bilong yumi bai stap seif na em i no inap lus na ol man i no inap stilim. So yumi save gut long pasin bilong putim ol gutpela samting bilong yumi long han bilong narapela long lukautim.

² Ritim 1 Timoti 6:20. Aposel Pol i kirapim Timoti long tingim gutpela samting em i bin kisim—em stretpela save long ol samting God i tingting pinis long mekim long ol manmeri. Timoti i kisim tu wok bilong “autim tok” na long “mekim wok olsem wanpela evanjelis.” (2 Tim. 4:2, 5) Pol i tokim Timoti long lukautim gut samting i stap long han bilong em. Olsem Timoti, yumi tu i bin kisim ol samting i dia tumas. Em wanem ol samting? Bilong wanem yumi mas lukautim gut ol dispela samting i dia tumas em Jehova i givim long yumi?

3-4. I gat wanem ol risen na tok i tru bilong Baibel i gutpela samting tru?

³ Jehova i givim yumi stretpela save bilong ol gutpela tok i tru i stap long Tok bilong em long Baibel. Ol dispela tok i gutpela samting tru bikos ol i skulim yumi long rot bilong pas gut wantaim Jehova na i kamapim klia wanem samting i save helpim man long stap amamas tru. Taim yumi kisim ol dispela tok i tru na bihainim long laip bilong yumi, yumi no kalabus moa long ol bilip giaman bilong ol lotu na ol pasin doti bilong dispela graun.—1 Kor. 6:9-11.

⁴ Narapela risen na ol tok i tru bilong Baibel i gutpela samting  em olsem, Jehova i kamapim klia dispela tok i tru long ol man i gat pasin daun “em bel bilong ol i gutpela.” (Apo. 13:48) Dispela ol manmeri i gat pasin daun i save olsem Jehova i save yusim gutpela wokboi i gat savetingting long givim yumi ol dispela tok i tru long nau. (Mat. 11:25; 24:45) Yumi mas kisim helpim bilong kliagut long ol dispela tok i tru, na ol i gutpela samting tru winim olgeta narapela samting.—Prov. 3:13, 15.

5. Jehova i givim wanem narapela samting long yumi?

⁵ Jehova i givim yumi dispela gutpela wok bilong skulim ol narapela long tok i tru bilong em na ol samting em i tingting pinis long mekim. (Mat. 24:14) Dispela tok yumi autim i dia tumas bikos em i helpim ol man long kam insait long lain famili bilong Jehova na em i opim rot long ol inap kisim laip oltaim. (1 Tim. 4:16) Maski yumi lusim bikpela haptaim o liklik haptaim long autim tok, yumi helpim dispela nambawan bikpela wok i kamap long taim bilong yumi. (1 Tim. 2:3, 4) Em i gutpela samting tru long stap olsem wanwok bilong God!—1 Kor. 3:9.

6. Wanem samting i painim sampela man em ol i no was i stap?

⁶ Long taim bilong Timoti, sampela Kristen i no tingim tumas dispela gutpela wok ol i holim olsem wanwok bilong God. Demas i laikim tumas ol samting bilong graun, olsem na em i lusim gutpela wok em i holim long wok wantaim Pol. (2 Tim. 4:10) Figelus na Hermogenes i lusim wok autim tok bikos ol i pret olsem ol man bai kalabusim ol wankain olsem ol i kalabusim Pol. (2 Tim. 1:15) Himeneus, Aleksander, na Filetus i pundaun na insait long pasin apostet na ol i lusim tok i tru. (1 Tim. 1:19, 20; 2 Tim. 2:16-18) I klia tru olsem bipo ol dispela man i bin stap strong long bilip, tasol ol i no holim strong gutpela samting ol i bin kisim.

7. Satan i save yusim wanem ol trap bilong pundaunim yumi?

⁷ Satan i traim long mekim wanem bambai yumi lusim ol gutpela samting Jehova i givim long yumi? Tingim sampela trap bilong Satan. Em i yusim TV, ol muvi, Intenet, na ol nius samting long kamapim ol tingting na ol pasin bilong kirapim yumi long lusim tok i tru. Em i laik pretim yumi long rot bilong ol wanlain o pasin birua na bai yumi lusim wok autim tok. Na em i traim long pulim yumi long putim yau long “ol toktok nating” bilong ol apostet na bai yumi lusim tok i tru.—1 Tim. 6:20, 21.

8. Yu kisim wanem skul long stori bilong wanpela brata nem bilong em Daniel?

⁸ Sapos yumi no was gut, yumi inap lusim tok i tru. Skelim stori bilong Daniel, * em i save laikim ol vidio gem. Em i tok: “Mi kirap long pilai ol vidio gem taim mi gat 10-pela  krismas. Pastaim mi pilaim ol gem i no gat ol pasin nogut long en. Tasol isi isi mi kirap long pilaim ol gem i gat pasin pait na wok bilong spirit nogut long en.” Bihain em i wok long pilai ol vidio gem inap 15 aua insait long olgeta wan wan de. Daniel i tok: “Long bel, mi save olsem dispela kain gem mi pleim na haptaim mi lusim long pleim i bagarapim pasin bilong mi long pas gut wantaim Jehova. Tasol mi tokim mi yet olsem i no gat wok long mi bihainim ol stiatok bilong Baibel.” Sapos yumi no was gut, ol amamas inap mekim na yumi lusim bilip. Na dispela inap mekim na yumi inap lusim ol gutpela samting Jehova i bin givim long yumi.

9. Olsem 1 Timoti 1:18, 19 i kamapim, Pol i tok Timoti i stap olsem wanem samting?

⁹ Ritim 1 Timoti 1:18, 19. Pol i tok Timoti i stap olsem wanpela soldia na em i strongim Timoti long “insait yet long dispela gutpela pait.” I no olsem em i insait long wanpela pait tru tru, nogat, em wanpela pait long sait bilong bilip. Olsem wanem ol Kristen i olsem ol soldia i insait long wanpela pait? Yumi mas kisim wanem ol pasin na bai yumi inap stap olsem ol soldia bilong Krais? Yumi ken stori long 5-pela samting yumi inap kisim skul long en long tok piksa bilong Pol. Ol dispela skul inap helpim yumi long holimpas tok i tru.

10. (a) Pasin bilong givim bel tru long God i makim wanem samting? (b) Wai na yumi mas kisim dispela pasin?

¹⁰ Givim bel tru long God. Gutpela soldia i save stap gut long narapela. Em bai pait strong bambai em inap lukautim wanpela em i laikim tru o wanpela samting i dia tumas long em. Pol i kirapim Timoti long kisim pasin bilong givim bel tru long God, dispela i makim olsem em i mas stap gut long God. (1 Tim. 4:7) Sapos yumi laikim tru God na givim bel tru long em, dispela bai strongim laik bilong yumi long holimpas tok i tru.—1 Tim. 4:8-10; 6:6.

11. Bilong wanem yumi mas kisim pasin bilong bosim bel?

¹¹ Kisim pasin bilong bosim bel. Soldia i mas trenim em yet na bai oltaim em i redi long insait long pait. Timoti i stap gut long sait bilong bilip bikos em i bihainim edvais bilong Pol long sakim ol laik nogut, na long bihainim pasin bilong God, na long bung wantaim ol wanbilip. (2 Tim. 2:22) Dispela i makim olsem em i mas bosim bel. Yumi tu i mas bosim bel na bai yumi inap daunim ol laik nogut bilong bodi. (Rom 7:21-25) Na tu, yumi mas i gat pasin bilong bosim bel na bai yumi inap wok strong yet long rausim olpela pasin na kisim nupela pasin. (Efe. 4:22, 24) Maski yumi pilim taiet long pinis bilong de, yumi mas subim yumi yet long go long miting.—Hib. 10:24, 25.

12. Olsem wanem yumi inap kamap gutpela moa long pasin bilong skulim ol manmeri long tok bilong Baibel?

¹² Soldia i mas lain gut long yusim ol samting bilong pait. Sapos em i laik lain gut, em i mas yusim planti taim. Olsem tasol, yumi mas lain gut long yusim Tok Bilong God. (2 Tim. 2:15) Yumi inap mekim olsem long taim bilong ol miting. Tasol sapos yumi laik helpim ol narapela long bilip tru olsem tok bilong Baibel inap helpim ol, oltaim yumi mas mekim stadi bilong yumi yet long Baibel. Yumi mas yusim Tok Bilong God long strongim bilip bilong yumi. Yumi mas ritim Baibel na mekim sampela samting moa. Dispela i makim olsem yumi mas tingim tingim ol tok yumi ritim na mekim ol wok painimaut long ol pablikesen bilong yumi na bai yumi inap kliagut na bihainim ol dispela tok bilong Baibel. (1 Tim. 4:13-15) Dispela bai helpim yumi long skulim ol narapela long Tok Bilong God. Na tu, bai yumi eksplenim gut ol tok bilong  Baibel yumi ritim long ol. Yumi laik helpim ol man i putim yau long yumi long kliagut long mining bilong ves na hau dispela tok i stret long ol. Taim yumi bihainim gut sediul bilong yumi long mekim stadi bilong yumi yet long Baibel, yumi bai kamap gutpela moa long pasin bilong yusim tok bilong God long skulim ol man.—2 Tim. 3:16, 17.

13. Olsem Hibru 5:14 i kamapim, bilong wanem yumi mas skelim gut tingting long wanem samting i stret na wanem samting i no stret?

¹³ Skelim gut tingting. Soldia i mas luksave long hevi i laik kamap na abrusim. Yumi tu i mas kisim pasin bilong luksave long ol samting inap nogutim yumi na mekim ol samting bilong abrusim. (Prov. 22:3; ritim Hibru 5:14.) Olsem, yumi mas skelim gut ol amamas yumi insait long en. Planti taim ol program bilong TV na ol muvi i save soim ol manmeri i mekim pasin pamuk. God i heitim tru ol kain pasin olsem, na ol dispela pasin inap nogutim yumi. Olsem na yumi sakim ol amamas em isi isi ol inap daunim pasin bilong yumi long laikim God.—Efe. 5:5, 6.

14. Daniel i skelim gut tingting na olsem wanem dispela i helpim em?

¹⁴ Daniel em yumi stori pinis long en, em i luksave olsem i no stret long pleim ol vidio gem i kamapim pasin pait na wok bilong ol spirit nogut. Em i yusim Watchtower Library long mekim wok painimaut long ol pablikesen we inap helpim em long daunim dispela hevi. Dispela i mekim wanem long em? Em i stop long pleim ol vidio gem i gat ol pasin nogut long en. Em i kenselim sabskripsen bilong em long pleim ol gem long Intenet, na tu, em i stop long poromanim ol narapela pleia. Daniel i tok: “Mi no moa pleim ol vidio gem, mi lusim haptaim long mekim ol wok ausait long haus na go bung wantaim ol pren long kongrigesen.” Long nau, Daniel i mekim wok olsem wanpela painia na elda.

15. Bilong wanem ol tok giaman inap nogutim yumi?

¹⁵ Olsem Timoti, yumi mas luksave long ol tok giaman em ol apostet i kamapim. (1 Tim. 4:1, 7; 2 Tim. 2:16) Olsem, ol inap kamapim ol tok giaman long ol bratasista bilong yumi o kirapim yumi long holim tupela tingting long oganaisesen bilong Jehova. Ol kain tok giaman inap daunim bilip bilong yumi. Yumi no ken tru larim ol dispela tok giaman i paulim tingting bilong yumi. Bilong wanem? Long wanem, ol kain tok giaman olsem i kam long “ol man em tingting bilong ol i bagarap na ol i no save liklik long tok i tru.” Astingting bilong ol em long  kirapim “tok kros na tok resis.” (1 Tim. 6:4, 5) Ol i laik bai yumi bilipim ol tok giaman bilong ol na kisim pasin bilong i no trastim ol wanbilip bilong yumi.

16. Yumi mas sakim wanem ol samting inap pulim nabaut tingting bilong yumi?

¹⁶ Sakim ol samting i pulim nabaut tingting. Timoti i stap olsem “wanpela gutpela soldia bilong Krais Jisas,” olsem na em i putim tingting olgeta long wok autim tok na em i no larim pasin bilong laikim tumas mani kago na wok mani i pulim nabaut tingting bilong em. (2 Tim. 2:3, 4) Olsem Timoti, yumi no ken larim pasin bilong laikim tumas mani kago i pulim nabaut tingting bilong yumi. “Strong bilong mani long giamanim man” inap daunim pasin bilong yumi long laikim Jehova, laikim tok bilong em long Baibel, na laik bilong yumi long skulim ol narapela long dispela tok. (Mat. 13:22) Yumi mas holim liklik samting tasol na yusim taim na strong bilong yumi long “wok yet long painim Kingdom pastaim.”—Mat. 6:22-25, 33.

17-18. Yumi mas mekim wanem na bai yumi inap lukautim pasin pren bilong yumi wantaim Jehova?

¹⁷ Redi long mekim samting hariap. Soldia i mas wokim plen long hau em bai lukautim em yet. Sapos yumi laik lukautim gut ol samting em Jehova i givim long yumi, orait yumi mas mekim samting hariap taim hevi i laik kamap. Wanem samting bai helpim yumi long mekim olsem? Yumi mas wokim plen paslain tru long samting yumi bai mekim taim hevi i laik kamap.

¹⁸ Tingim dispela tok piksa: Long taim bilong wanpela bung, odiens i mas luksave long dua bilong go ausait paslain long program i kirap. Wai? Bikos sapos hevi i kamap, ol bai inap long lusim kwik dispela ples bung. Olsem tasol, taim yumi yusim Intenet o watsim muvi o TV program samting, yumi mas tingting gut long ol samting yumi bai mekim sapos piksa bilong pasin pamuk, pasin pait, o tok bilong ol apostet i kamap. Sapos yumi redi gut paslain long wanem samting inap kamap, yumi inap mekim samting hariap na lukautim pasin pren bilong yumi wantaim Jehova na stap klin long ai bilong em.—Sng. 101:3; 1 Tim. 4:12.

19. Yumi bai kisim wanem ol blesing sapos yumi lukautim gut ol samting i dia tumas em Jehova i givim long yumi?

¹⁹ Yumi mas lukautim gut ol samting i dia tumas em Jehova i givim long yumi, em ol tok i tru bilong Baibel na gutpela wok yumi holim bilong skulim ol narapela long en. Taim yumi mekim olsem, maus bilong bel bilong yumi bai stap klin, laip bilong yumi bai i gat mining, na yumi bai kisim amamas long helpim ol narapela long kisim save long Jehova. So wantaim helpim bilong Jehova, yumi inap long lukautim gut ol samting em i givim long yumi.—1 Tim. 6:12, 19.