1-2. E ‵tusa mo te 1 Timoteo 6:20, se a te mea ko oti ne tuku ki a Timoteo?

SE MEA masani ke tuku ne tatou a ‵tou kope tāua ke tausi ne nisi tino. E pelā me se fakaakoakoga, kāti e faulu ne tatou a ‵tou tupe ki te page. Kafai e fai penā e fakamoe‵moe tatou ke tausi faka‵lei ne latou a ‵tou tupe ke mo a ma kaisoa io me ‵galo. Tela la, ko malamalama tatou i te uiga o te talitonu ke tuku ne tatou a ‵tou kope tāua ki nisi tino.

² Faitau te 1 Timoteo 6:20. Ne fakamasaua atu ne te apositolo ko Paulo ki a Timoteo me ko oti ne maua ne ia se mea tāua ‵ki—ko te iloaga tonu e uiga ki fuafuaga a te Atua mō tino. Ne tuku atu ki a Timoteo a te tauliaga ke “folafola atu te muna” kae ke “fai te galuega a te tino talai.” (2 Timo. 4:2, 5) Ne fakamalosi atu a Paulo ki a Timoteo ke puipui faka‵lei a te mea telā ko oti ne tuku atu ki a ia. E pelā mo Timoteo, ko oti foki ne tuku mai ki a tatou ne mea tāua. Ne a mea konā? Kae kaia e tāua ei ke puipui ne tatou a mea kolā ne tuku mai ne Ieova ki a tatou?

3-4. Ne a pogai e fai ei a muna‵tonu i te Tusi Tapu e pelā me ne mea tāua?

³ Ko oti ne tuku mai ne Ieova mo te alofa ki a tatou a te iloaga tonu e uiga ki muna‵tonu tāua i loto i tena Muna ko te Tusi Tapu. E tāua eiloa a muna‵tonu konei me akoako mai ei ki a tatou a te auala ke maua se fesokotakiga ‵lei mo Ieova kae fakamatala mai ei te auala ke maua te fiafia tonu i te olaga. Kafai e talia ne tatou a muna‵tonu konā kae ola e ‵tusa mo mea konā, ko saoloto i ei tatou mai akoakoga ‵se mo faifaiga fakatauavaga sē ‵tau.—1 Koli. 6:9-11.

⁴ A te suā pogai e tāua ei a muna‵tonu i te Muna a te Atua me e fakaasi fua ne Ieova ki tino loto maulalo kolā “ko tino loto  ‵lei katoa.” (Galu. 13:48) E talia ne tino taki tokotasi konā a te auala e fakaaoga ne ia ke fakasoa mai ei a muna‵tonu konā ki a tatou. (Mata. 11:25; 24:45) E se mafai o tauloto ne tatou a muna‵tonu konei i a tatou eiloa, kae seai foki loa se mea e tafasili atu tena tāua māfai ko malamalama tatou i ei.—Faata. 3:13, 15.

5. Se a te suā mea ko oti ne tuku mai ne Ieova ki a tatou?

⁵ Ko oti foki ne tuku mai ne Ieova ki a tatou a te tauliaga ke akoako atu ki nisi tino a te munatonu e uiga ki a ia mo ana fuafuaga. (Mata. 24:14) A te fekau e folafola ne tatou e tāua ‵ki me fesoasoani atu ki tino ke fai latou mo kāiga o Ieova kae ke maua foki te avanoaga ke maua te ola se-gata-mai. (1 Timo. 4:16) Faitalia me lasi me foliki te ‵tou tusaga e fai i te galuega talai, kae ko ‵lago atu eiloa a tatou ki te ‵toe galuega tāua telā ko fai i te taimi nei. (1 Timo. 2:3, 4) Mafaga o tauliaga ke ga‵lue fakatasi tatou mo te Atua!—1 Koli. 3:9.

6. Ne a mea ne ‵tupu ki tino kolā ne fakata‵mala o puipui a mea ne tuku atu ki a latou?

⁶ A nisi tino kolā ne ola i aso o Timoteo ne seki fakatāua ne latou te lotou tauliaga ke ga‵lue fakatasi mo te Atua. Ne tiakina ne Tema a tena tauliaga ke ga‵lue tasi mo Paulo ona ko tena fiafai ki mea o te lalolagi nei. (2 Timo. 4:10) Ne tiaki ne Fogelu mo Hemokene te lā galuega talai me ma‵taku i a lāua ma fakasauagina e pelā mo Paulo. (2 Timo. 1:15) A Humenio, Alesana, mo Fileto ne liu aposetate kae tiakina ne latou te munatonu. (1 Timo. 1:19, 20; 2 Timo. 2:16-18) A latou konei ne tino ma‵losi i te feitu faka-te-agaga muamua, kae ne seki fia fakatāua ne latou a mea tafasili i te tāua.

7. Ne a aofaga e fakaaoga ne Satani ke taua mai ki a tatou?

⁷ E fai pefea ne Satani ke tiaki ne tatou a koloa tāua kolā ne tuku mai ne Ieova ki a tatou? Mafaufau ki nisi aofaga a Satani. E fakaaoga ne ia a fakafiafiaga mo mea fakasalalau tala ke fakamalosi i ei a talitonuga, mafaufauga, mo faifaiga kolā e mafaufau a ia me ka fai ei ke mo a ma puke ‵mau tatou ki te munatonu. E taumafai a ia o fakamatakutaku tatou e auala i taugasoa ma‵sei io me ko fakasauaga ko te mea ke se olo tatou o talai. Kae taumafai foki a ia o fakakolekole tatou ke fakalogo‵logo ki “mea kolā e fakaigoa ‵se ki te ‘poto’” a aposetate ko te mea ke tiakina ne tatou a te munatonu.—1 Timo. 6:20, 21.

8. Ne a au mea ne tauloto mai te tala o te taina ko Daniel?

⁸ Kafai tatou e se fakaeteete, e mafai o mamulu malielie mai ‵tou lima a te munatonu. Mafaufau ki te tala o Daniel * telā ne fiafia malosi ki tafaoga vitio. Ne fai mai a ia, “Ne  kamata au o tafao i tafaoga vitio kae ko sefulu oku tausaga. Muamua la, ne tafao au i tafaoga kolā e ‵lei. Oti aka ne kamata o tafao au i tafaoga fakasaua mo mea fakatemoni.” Fakamuli loa, ne tafao a ia i tafaoga vitio mō itula e 15 i te aso. “I loto loa i toku loto, ne iloa ne au me i vaegā tafaoga e tafao ei au pelā foki mo te aofaki o itula ne fakamāumāu ne au ki ei e fai ne ia au ke ‵mao mai i a Ieova. Kae ne talitonu au mo te loto makeke me i fakatakitakiga i te Tusi Tapu e se aoga ki a au,” ko pati a Daniel. A te gali fai lēmū o fakafiafiaga e faigofie o fai ei ke mamulu mai ‵tou lima a te munatonu. Kafai e tupu te mea tenā, ka ‵galo atu eiloa i a tatou a mea tāua kolā ne tuku mai ne Ieova ki a tatou.

9. E ‵tusa mo te 1 Timoteo 1:18, 19, se a te mea ne fakatusa ne Paulo a Timoteo ki ei?

⁹ Faitau te 1 Timoteo 1:18, 19. Ne fakatusa ne Paulo a Timoteo ki se sotia kae fakamalosi atu ki a ia ke “taua atu i te taua ‵lei tenei.” A te taua tenā e sē se taua faka-te-foitino kae se taua faka-te-agaga. I auala fea e fai ei a Kelisiano e pelā me ne sotia e taua atu i se taua? Ne a uiga e ‵tau o ati aka ne tatou e pelā me ne sotia a Keliso? Ke sau‵tala nei tatou ki akoakoga e lima e mafai o tauloto ne tatou mai te tala fakatusa a Paulo. E mafai o fesoasoani mai a akoakoga konei ke puke ‵mau tatou ki te munatonu.

10. Se a te tapuaki fakamaoni ki te Atua, kae kaia e ‵tau ei o fai tatou penā?

¹⁰ Fakamasani o tapuaki fakamaoni ki te Atua. A te sotia ‵lei e fakamaoni. Ka taua malosi a ia o puipui se tino e alofa a ia ki ei io me se mea e fakatāua ne ia. Ne fakamalosi atu a Paulo ki a Timoteo ke fakamasani o tapuaki fakamaoni ki te Atua—telā ko te fakamaoni katoatoa ki te Atua. (1 Timo. 4:7) Ko te lasi o te ‵poko o te ‵tou a‵lofa mo te ‵tou fakamaoni ki te Atua, ko te lasi foki o te ‵tou manakoga ke puke ‵mau ki te munatonu.—1 Timo. 4:8-10; 6:6.

11. Kaia e manakogina ke akoako a tatou eiloa ke fai te mea tonu?

¹¹ Akoako a koe ke fai te mea tonu. E ‵tau o galue malosi se sotia ko te mea ke toka a ia mō te taua. Ne malosi faeloa a Timoteo i te feitu faka-te-agaga me ne tautali a ia i pati fakatonutonu a Paulo ke tele kea‵tea mai manakoga ma‵sei, ke ati aka a uiga ‵lei, kae ke ‵kau fakatasi mo taina tali‵tonu. (2 Timo. 2:22) Ne ‵tau o akoako ne ia a ia eiloa ke fai te mea tonu. E ‵tau o akoako ne tatou a tatou eiloa ke fai te mea tonu ke mafai o manumalo tatou i ‵tou manakoga faka-te-foitino. (Loma 7:21-25) E se gata i ei, e manakogina ke akoako tatou ke fai te mea tonu ko te mea ke mafai o tapale kea‵tea ne tatou a uiga mua kae ke ‵pei ki uiga ‵fou. (Efe. 4:22, 24) Kae kafai ko fi‵ta tatou i te fakaotiga o se aso, e faimālō ne tatou a tatou eiloa ke olo ki se fakatasiga.—Epe. 10:24, 25.

12. I auala fea e mafai o momea aka te apo o tatou i te fakaaogaga o te Tusi Tapu?

¹² E ‵tau mo se sotia o fakaakoako a ia eiloa ke fakaaoga a meatau. Ke apo a ia, e ‵tau o fakaakoako faeloa a ia ki ei. E ‵tau foki mo tatou o apo i te fakaaogaga o te Muna a te Atua. (2 Timo. 2:15) E mafai o tauloto ne tatou a nisi atamai penā i ‵tou fakatasiga. Ko te mea ke fakatalitonu ne tatou ki nisi tino me i muna‵tonu i te Tusi Tapu e tāua eiloa, e ‵tau o ‵piki ‵mau tatou ki ‵tou faifaiga masani ko te faiga o sukesukega totino ki te Tusi Tapu. E ‵tau o fakaaoga ne tatou te Muna a te Atua ke fakamalosi aka ei te ‵tou fakatuanaki. E se gata fua i te faitau ki te Tusi Tapu, e manakogina ke mafaufau ‵loto tatou ki ‵tou mea ne faitau kae fai a sukesukega ki ‵tou tusi ko te mea ke mafai o malamalama faka‵lei kae fakagalue ne tatou a mea i Tusitusiga Tapu. (1 Timo. 4:13-15) Tenā ko mafai ei o fakaaoga ne tatou a te Muna a te Atua ke akoako a nisi tino. E tonu, e se ‵tau fua mo tatou o fai‵tau ki  se tusi faitau i te Tusi Tapu. E ma‵nako tatou o fesoasoani ki tino ke malamalama i te tusi faitau tenā mo te auala ke fakagalue aka i ei. Mai te ‵piki ‵mau ki te faifaiga masani o ‵tou sukesukega totino, ka mafai o atamai tatou i te fakaaogaga o te Muna fakaosofia a te Atua ke akoako atu a nisi tino.—2 Timo. 3:16, 17.

13. E ‵tusa mo pati i te Epelu 5:14, kaia e ‵tau ei o ‵poto tatou?

¹³ Ke ‵poto tatou. E ‵tau o iloa ne se sotia māfai ko pili a ia ki se tulaga fakamataku kae ‵kalo kea‵tea mai i ei. E ‵tau foki mo tatou o iloa ne tatou a tulaga kolā e mafai o fakama‵taku ki a tatou kae ga‵sue o ‵kalo kea‵tea mai i ei. (Faata. 22:3; faitau te Epelu 5:14.) E pelā me se fakaakoakoga, e ‵tau o ‵poto tatou i te filifiliga o ‵tou fakafiafiaga. A ata i televise mo ata vitio e masani o fakamalosi mai i ei a a amioga fakatauavaga sē ‵tau. A vaegā amioga konā e takalialia ki ei te Atua kae mautinoa me ka fakamasei mai ki a tatou. Tela la, e ‵tusa mo te mea tenā, e ‵kalo kea‵tea tatou mai fakafiafiaga kolā e fakavāivāi malielie ne ia te ‵tou a‵lofa ki te Atua.—Efe. 5:5, 6.

14. Ne aoga pefea a te poto ki a Daniel?

¹⁴ A Daniel, telā ne taku muamua mai, ne kamata o iloa ne ia me ne fakalavelave atu ki a ia a te tafao ki tafaoga fakasaua mo mea fakatemoni. Ne fai ana sukesukega ki te Watchtower Library ki mataupu kolā ka fesoasoani atu ki tena fakalavelave. Ne aoga pefea te mea tenā ki a ia? Ne fakagata tena tafao ki tafaoga sē ‵lei konā. Ne taofi aka ne ia tena aofia i tafaoga i te itaneti kae ‵kati te fai taugasoa mo nisi tino kolā e ta‵fao sāle i tafaoga vitio. Muna a Daniel, “I lō te tafao i tafaoga vitio, ne kamata o fakaaoga oku taimi o fai a galuega i tua i te fale io me ‵kau fakatasi mo taina i te fakapotopotoga.” Ko tavini atu nei a Daniel e pelā me se paenia kae se toeaina foki.

15. Kaia e fakama‵taku ei a tala sē ‵tonu?

¹⁵ E pelā mo Timoteo e ‵tau foki o ‵poto tatou ke iloa ne tatou te fakamataku o fakamatalaga sē ‵tonu kolā e fakasalalau ne aposetate. (1 Timo. 4:1, 7; 2 Timo. 2:16) E pelā me se fakaakoakoga, e mafai o fakasalalau ne latou a tala sē ‵tonu e uiga ki ‵tou taina io me fai ne latou ke fakalotolotolua tatou e uiga ki te fakapotopotoga a Ieova. A fakamatalaga sē ‵tonu konā e mafai o fakavāivāi mai ki ‵tou fakatuanaki. E se ‵tau o talia ne tatou a tala konei ke fakavāivāi mai ki a tatou. Kaia? Me i vaegā tala penei e fakasalalau ne “tino kolā ko ma‵sei olotou mafaufau kae ko galo i a latou te munatonu.” E taumafai latou ke kamata a “kinauga.” (1 Timo. 6:4, 5) E ma‵nako latou ke  tali‵tonu tatou ki olotou pati fatufatu kae ke ati aka a mafaufauga ma‵sei e uiga ki ‵tou taina.

16. Ne a mea e ‵tau o ‵kalo kea‵tea tatou mai i ei?

¹⁶ Ke saga tonu. E pelā me “se sotia ‵lei a Keliso Iesu,” e ‵tau mo Timoteo o saga tonu ki te galuega talai i lō te saga atu ki galuega ‵togi io me ko kope faka-te-foitino. (2 Timo. 2:3, 4) E pelā mo Timoteo, e se ‵tau mo tatou o ‵saga atu ki te manakoga ke maua a kope faka-te-foitino e uke. “A te ‵gali fakaloi‵loi o koloa” e mafai o fai i ei ke galo i a tatou a te alofa ki a Ieova, te ‵tou loto fakafetai ki te Muna a te Atua, mo te ‵tou manakoga ke fakailoa atu a mea konā ki nisi tino. (Mata. 13:22) E ‵tau o fakafaigofie ne tatou a ‵tou olaga kae fakaaoga a ‵tou taimi mo ‵tou malosi “ke ‵sala muamua faeloa . . . te Malo.”—Mata. 6:22-25, 33.

17-18. Se a te mea e mafai o fai ne tatou ke puipui ‵tou feitu faka-te-agaga?

¹⁷ Fakatoka o gasue fakavave. E ‵tau mo se sotia o fai ana fakatokaga ke puipui a ia. Ko te mea ke puipui ne tatou a mea ne tuku mai ne Ieova ki a tatou, e ‵tau o ga‵sue tatou fakavave māfai ko lavea ne tatou se mea fakamataku. Se a te mea ka fesoasoani mai ke ga‵sue fakavave tatou? E ‵tau o na fai ‵tou palani ki te auala ke ‵saga atu ki te mea fakamataku tenā.

¹⁸ Ke fai se fakatusaga, kafai e fanatu koe i se vakalele, e masani o fakaasi atu ki pasese a nisi mataloa aka i luga i te vakalele kae koi tuai o eva te vakalele. Kaia? Ko te mea ke iloa ne latou te auala ke olo i ei māfai ko tupu se fakalavelave. I se auala tai ‵pau, e mafai o palani ne tatou te “mataloa” ka olo tatou i ei māfai ko ‵sae fakavave aka a ata ma‵sei, ata fakasaua, io me ko fakamatalaga a aposetate i te itaneti io me māfai e onoono i se vitio io me i te TV. Kafai e fakatoka tatou ki mea kolā ka mafai o ‵tupu, e mafai o ga‵sue fakavave tatou kae ‵kalo kea‵tea mai te fakamaseiga o ‵tou feitu faka-te-agaga kae ke ‵ma tatou i te kilokiloga a Ieova.—Sala. 101:3; 1 Timo. 4:12.

19. Ne a fakamanuiaga ka maua ne tatou māfai e puipui faka‵lei ne tatou a mea tāua kolā ne tuku mai ne Ieova ki a tatou?

¹⁹ E ‵tau o puipui ne tatou a mea tāua ko oti ne tuku mai ne Ieova ki a tatou—ko muna‵tonu tāua mai te Tusi Tapu mo te tauliaga ke akoako atu a mea konā ki nisi tino. Kafai e fai tatou penā, ka maua ne tatou se loto lagona ‵ma, se olaga aoga, mo te fiafia e maua mai te fesoasoani atu ki nisi tino ke iloa ne latou a Ieova. Mai tena fesoasoani ka mafai eiloa ne tatou o puipui faka‵lei a mea kolā ko oti ne tuku mai ki a tatou.—1 Timo. 6:12, 19.