1-2. Ia au i te Timoteo 1, 6:20, eaha tei titauhia ia Timoteo ia rave?

 PINEPINE tatou i te tuu i ta tatou mau taoˈa faufaa i te rima o vetahi ê. Ei hiˈoraa, e vaiiho paha tatou i ta tatou moni i te fare moni ma te manaˈo e haapao-maitai-hia te reira e eita atoa e moˈe aore ra e eiâhia. Ua taa ïa ia tatou i te huru ia tuu i te taoˈa faufaa i te rima o vetahi ê.

² A taio i te Timoteo 1, 6:20. Ua haamanaˈo te aposetolo Paulo ia Timoteo i te taoˈa faufaa tei tuuhia ˈtu ia ˈna, oia hoi te ite papu no nia i te opuaraa a te Atua no te huitaata. Ua horoa-atoa-hia ia Timoteo te fanaˈoraa ia “poro i te parau” e ia “rave i te ohipa a te hoê taata poro evanelia.” (Tim. 2, 4:2, 5) Ua faaitoito Paulo ia Timoteo ia haafaufaa i tei tuuhia ˈtu ia ˈna. Mai ia Timoteo, e taoˈa faufaa atoa tei tuuhia mai ia tatou. Eaha te reira? No te aha mea titauhia ia tapea maite tatou i ta Iehova i horoa mai?

3-4. No te aha tatou e haafaufaa ˈi i te pue parau mau Bibilia?

³ Ma te hamani maitai, ua horoa mai Iehova te ite papu i te pue parau mau Bibilia. Mea faufaa te reira no te mea e tauturuhia tatou ia faatupu i te auhoaraa piri e o Iehova e ia oaoa mau. Ia farii e ia ora tatou ia au i te pue parau mau Bibilia, eita tatou e vare i te mau haapiiraa hape e e rave i te mau peu iino.—Kor. 1, 6:9-11.

⁴ E haafaufaa atoa tatou i te pue parau mau Bibilia no te mea e faaite Iehova i te reira i te feia haehaa anaˈe e te “aau farii.” (Ohi. 13:48) Te farii ra teie feia haehaa na te tavini haapao maitai e te paari e opere i taua pue parau mau Bibilia i teie mahana. (Mat. 11:25; 24:45) E hinaaro  tatou i te tauturu no te taa i te Bibilia e aita ˈtu e mea faufaa maori râ te taaraa i te parau mau.—Mas. 3:13, 15.

5. Eaha ta Iehova i horoa atoa mai ia tatou?

⁵ Ua horoa atoa mai Iehova i te fanaˈoraa ia haapii ia vetahi ê i te parau mau no nia ia ˈna e i ta ˈna mau opuaraa. (Mat. 24:14) Mea faufaa roa te poroi ta tatou e faaite ra no te mea e tauturu te reira i te taata ia riro ei mero o te utuafare o Iehova e ia fanaˈo i te tiaturiraa ia ora e a muri noa ˈtu. (Tim. 1, 4:16) Mea rahi aore ra mea iti ta tatou e rave ra i roto i te taviniraa, te turu nei tatou i te ohipa faufaa roa ˈˈe o to tatou nei tau. (Tim. 1, 2:3, 4) Auê ïa fanaˈoraa ia riro ei hoa ohipa no te Atua!—Kor. 1, 3:9.

6. Eaha tei tupu a ore ai vetahi i haafaufaa i tei tuuhia ˈtu ia ratou?

⁶ I te tau o Timoteo, aita vetahi Kerisetiano i haafaufaa i te fanaˈoraa ia riro ei hoa ohipa no te Atua. No to ˈna nounou i te faanahoraa o te ao, ua faarue Dema i ta ˈna taviniraa faufaa na muri i te aposetolo Paulo. (Tim. 2, 4:10) E au ra e ua faaea Phugelo e Heremogene i te tavini ia Iehova no to raua mǎtaˈu i te hamani-ino-raa ta Paulo i faaruru. (Tim. 2, 1:15) Ua taiva Humenaio, Alesanedero e Phileto e faarue atura i te parau mau. (Tim. 1, 1:19, 20; Tim. 2, 2:16-18) E au ra e e faaroo puai to teie mau Kerisetiano na mua ˈˈe, aita râ ratou i tamau i te haafaufaa i te mau taoˈa faufaa i tuuhia ˈtu ia ratou.

7. Eaha te tahi mau raveraa a Satani ia faatupu tatou i to ˈna hinaaro?

⁷ Eaha te tahi mau raveraa a Satani ia faaea tatou i te haafaufaa i ta Iehova i horoa mai? E faaohipa oia i te mau faaanaanataeraa e te mau ravea haapurororaa no te faaturori i to tatou feruriraa e haerea a faaea mǎrû atu ai tatou i te haafaufaa i te parau mau. E haamǎtaˈu oia ia tatou maoti te faaheporaa a vetahi ê aore ra te hamani-ino-raa ia faaea tatou i te poro. Ia faarue tatou i te parau mau, e haavare oia ia tatou na roto i te haapiiraa a te feia taiva, te parauhia ra “ma te hape e ‘ite.’”—Tim. 1, 6:20, 21.

8. Eaha te haapiiraa ta tatou e huti mai i te tupuraa o Daniel?

⁸ Ia ore tatou e ara, e nehenehe tatou e faarue mǎrû noa i te parau mau. Mea au roa na te taeae Daniel i te mau hauti video. * Te faataa ra oia: “Ua haamata vau  i te hauti i te mau hauti video i te ahururaa o to ˈu matahiti. I te haamataraa, e ere te mau hauti i te mea ino. I muri mai râ, ua farii mǎrû noa vau i te mau hauti taparahi taata e tahutahu.” E hauti na oia 15 hora te maoro i te mahana hoê. Te na ô faahou ra Daniel: “Ua ite au e na roto i tera mau hauti video, ua atea ê au ia Iehova. No te etaeta râ o to ˈu aau, aita vau i farii i te mau faaueraa Bibilia.” E nehenehe te huru haavarevare o te mau faaanaanataeraa e turai ia tatou ia faarue i te parau mau. Ia na reira tatou, e ere ïa tatou i te hoê o te mau taoˈa faufaa ta Iehova i horoa mai.

9. I roto i te Timoteo 1, 1:18, 19, ua faaau Paulo ia Timoteo ia vai?

⁹ A taio i te Timoteo 1, 1:18, 19. Ua faaau Paulo ia Timoteo i te hoê faehau e ua faaitoito atoa ia ˈna ia “aro noa i te aroraa maitai.” E aroraa pae varua ta Paulo e manaˈo ra. E nafea te mau Kerisetiano e au ai i te faehau i roto i te aroraa? Eaha te mau huru maitatai e titauhia ia faatupu te hoê faehau na te Mesia? E huti mai tatou e pae haapiiraa i ta Paulo faahohoˈaraa o te tauturu ia tatou ia haafaufaa noa i te parau mau.

10. Eaha te auraa ia haamori i te Atua anaˈe, e no te aha mea titauhia ia na reira?

¹⁰ A haamori i te Atua anaˈe. Eita te hoê faehau maitai e taiva i to ˈna raatira. E aro oia no te paruru i te taata ta ˈna e here aore ra te hoê mea ta ˈna e haafaufaa. Ua faaitoito Paulo ia Timoteo ia haamori, aore ra ia ati maite, i te Atua anaˈe. (Tim. 1, 4:7) Rahi atu â tatou i te here e i te haamori i te Atua anaˈe, rahi atu â tatou i te hinaaro e haafaufaa i te parau mau.—Tim. 1, 4:8-10; 6:6.

11. No te aha e titauhia ia haamataro i te rave i te mea maitai?

¹¹ A haamataro i te rave i te mea maitai. Mea titauhia i te faehau ia tutava ia ineine noa oia no te aroraa. Ua tia ia Timoteo ia patoi ia Satani no te mea ua pee oia i te aˈoraa a Paulo ia horo ê i te mau hinaaro tia ore, ia tapi i te mau huru maitatai e ia amuimui i te mau hoa Kerisetiano. (Tim. 2, 2:22) Ua titauhia ïa ia haamataro oia i te rave i te mea maitai. E titauhia ia na reira atoa no te aro i to tatou mau hinaaro tia ore. (Roma 7:21-25) Hau atu â, ia haamataro atoa tatou i te tatara i te huru taata tahito e i te ahu mai i te huru taata apî. (Eph. 4:22, 24) E mai te peu ua rohirohi tatou i te hopearaa o te mahana, e titauhia paha ia haavî ia tatou iho no te apiti i te putuputuraa.—Heb. 10:24, 25.

12. E nafea tatou ia aravihi atu â i te faaohipa i te Bibilia?

¹² No te faaohipa maitai i ta ˈna mauhaa, e titauhia ia faaineine tamau te hoê faehau ia ˈna. Mea na reira atoa tatou e faaohipa maitai ai i te parau o te parau mau. (Tim. 2, 2:15) I te mau putuputuraa tatou e haapiihia ˈi e nafea ia aravihi i roto i tera tuhaa. Mai te peu râ e hinaaro tatou e tauturu ia vetahi ê ia haafaufaa atoa i te parau mau, mea titauhia ia haapii tamau tatou iho i te Bibilia ia puai noa to tatou faaroo. Eita e navai ia taio noa i te Bibilia, mea faufaa atoa ia feruri maite e ia rave i te maimiraa no te taa e no te faaohipa i ta tatou i taio. (Tim. 1, 4:13-15) I reira noa tatou e nehenehe ai e haapii i te taata i te Parau a te Atua. Eita  râ e navai ia taio noa i te hoê irava Bibilia, mea faufaa atoa ia tauturu i te taata ia taa e ia faaohipa i te reira. Ma te rave tamau i ta tatou iho haapiiraa Bibilia, e aravihi atu â tatou i te faaohipa i te Parau a te Atua no te haapii i te taata.—Tim. 2, 3:16, 17.

13. Ia au i te Hebera 5:14, no te aha mea faufaa te haroˈaroˈa no te hoê Kerisetiano?

¹³ A haroˈaroˈa. Mea faufaa ia ite atea te hoê faehau i te mea atâta no te ape i te reira. Mea titau-atoa-hia ia feruri i teie nei â no te ape i te mau tupuraa o te nehenehe e haafifi ia tatou. (Mas. 22:3; a taio i te Hebera 5:14.) E maiti maite anaˈe i ta tatou mau faaanaanataeraa. Pinepine te mau peu taotoraa tia ore i te itehia i roto i te mau hohoˈa teata. Eita te Atua e mauruuru i tera mau peu e e haafifi te reira ia tatou. E haapae anaˈe i te mau faaanaanataeraa o te faaiti mǎrû noa i to tatou here i te Atua.—Eph. 5:5, 6.

14. Mea nafea Daniel i te tauiraa a faaohipa ˈi oia i te haroˈaroˈa?

¹⁴ Ua haamata Daniel i te haroˈaroˈa ua haafifi ta ˈna mau hauti video ia ˈna. Maoti te faanahoraa roro uira Watchtower Library, ua rave oia i te maimiraa no te ite eaha te tauturu ia ˈna ia faaea i ta ˈna peu. Ua haapae oia i te mau hauti video tano ore, ua tatara i to ˈna iˈoa i nia i te mau tahua natirara no te feia hauti video e ua faaea atoa i te amuimui ia vetahi ê no te hauti. Te na ô ra Daniel: “Ua tuu vau i te mau hauti video i te hiti no te rave haere i te ohipa na rapae aore ra no te amuimui i te mau hoa o te amuiraa.” I teie nei, e pionie e e matahiapo atoa te taeae Daniel.

15. No te aha mea atâta ia vare hanoa i te mau parau haavare?

¹⁵ Mai ia Timoteo, mea titau-atoa-hia ia haroˈaroˈa tatou i te mau parau haavare no ǒ mai i te feia tei taiva i te Atua. (Tim. 1, 4:1, 7; Tim. 2, 2:16) E haaparare paha ratou i te mau parau haavare no nia i to tatou mau taeae aore ra i te faanahonahoraa a Iehova. E nehenehe to tatou faaroo e paruparu, mea faufaa roa ïa ia ore tatou ia vare i ta ratou mau parau. No te aha? No te mea no ǒ mai te reira i  te feia “feruriraa viivii e tei ere i te parau mau.” E hinaaro noa hoi ratou e faatupu i “te mau uiuiraa e te aimârôraa parau” ia vare tatou i ta ratou mau parau faaino a ore atu ai e tiaturi faahou i te mau taeae.—Tim. 1, 6:4, 5.

16. Eaha te titauhia ia haapae ia tiatonu noa tatou i nia i te mea faufaa aˈe?

¹⁶ A tiatonu noa i nia i te mea faufaa aˈe. “Ei faehau mau na te Mesia ra o Iesu,” ua titauhia ia Timoteo ia ore e tapi i te mau mea o teie nei ao e te taoˈa materia no te tiatonu i nia i ta ˈna taviniraa. (Tim. 2, 2:3, 4) Mai ia Timoteo, eiaha atoa tatou ia titau ia rahi ta tatou taoˈa. E nehenehe “te mana haavarevare o te taoˈa” e tapoˈi roa i to tatou here ia Iehova, i to tatou mauruuru no ta ˈna Parau e i to tatou hinaaro e haapii i te parau mau ia vetahi ê. (Mat. 13:22) E titauhia ia rave i te mau haapaeraa e ia horoa i to tatou taime e puai no te “tamau i te imi na mua i te Faatereraa arii a te Atua.”—Mat. 6:22-25, 33.

17-18. Eaha te titauhia ia ape ia piri noa tatou ia Iehova?

¹⁷ Ia ineine noa oe i te haa oioi. E feruri atea te hoê faehau i ta ˈna e rave no te paruru ia ˈna. No te haapao maitai i ta Iehova i horoa mai, e titauhia ia haa oioi tatou i mua i te tupuraa atâta. Eaha te nehenehe e tauturu mai? Mea faufaa ia faaineine i teie nei â no te ite i ta tatou e rave i tera taime.

¹⁸ Ei hiˈoraa, hou te hoê rururaa rahi e haamata ˈi, e anihia i te taata ia imi i te eˈa piri roa ˈˈe no te haere i rapae. Ia tupu noa ˈtu te hoê ati ru, e nehenehe ratou e horo oioi i rapae. E nehenehe atoa tatou e feruri atea i ta tatou e rave no te horo ê ia faura mai te hoê hohoˈa tano ore i nia i te natirara aore ra i roto i te afata teata. Ma te faaineine atea ia tatou, e ape oioi tatou i te mau mea ta Iehova e au ore ra ia mâ noa tatou i mua i to ˈna aro.—Sal. 101:3; Tim. 1, 4:12.

19. Eaha ta tatou e fanaˈo ia haafaufaa tatou i ta Iehova i horoa mai?

¹⁹ Mea titauhia ia haafaufaa tatou i ta Iehova i horoa mai, oia hoi te pue parau mau Bibilia e te fanaˈoraa ia haapii i te reira ia vetahi ê. A na reira ˈi, e fanaˈo tatou i te hoê manaˈo haava maitai, te hoê oraraa mauruuru mau e te oaoa ia haapii ia vetahi ê o vai Iehova. Maoti te tauturu a Iehova, e tia ia tatou ia haapao maitai i ta ˈna i tuu mai i roto i to tatou rima.—Tim. 1, 6:12, 19.