1, 2. Jich bitʼil ya yal 1 Timoteo 6:20, ¿bin-a te ya skʼan ya spas te Timoteo?

TEME ay bin toyol stojol kuʼuntike, ayniwan machʼa ya kakʼbeytik skʼej. Kʼalal ay jtakʼintik yaniwan jkʼejtik ta banko yuʼun maba ya xchʼay o maʼyuk machʼa ya yelkʼan. Jaʼ yuʼun ya xkʼot ta koʼtantik te mukʼ skʼoplal te ay machʼa ya kakʼbeytik skʼej te bin toyol stojol kuʼuntike.

² (Kʼopona 1 Timoteo 6:20). Te jpuk-kʼop Pablo la yal te ay bin mukʼ skʼoplal akʼbot snop te Timoteoe: jaʼ te skʼanojel yoʼtan Dios ta stojol te ants winiketike. Te Jehová ay bin mukʼ skʼoplal la yakʼbey spas te Timoteo, jaʼ te ya schol te skʼop Diose (2 Tim. 4:2, 5). Jaʼ yuʼun te Pablo la yalbey te Timoteo te yakuk skanantay te bin akʼbil ta swentae. Jaʼnix jich te joʼotike ay bin mukʼ skʼoplal yakʼoj ta jwentatik te Jehovae. ¿Bintik-a? Sok ¿bin yuʼun ya skʼan ya jkanantaytik?

3, 4. ¿Bin yuʼun mukʼ skʼoplal te bin ya yakʼ ta nopel te Bibliae?

³ Ta swenta te yutsil yoʼtan te Jehová ya yakʼ jnoptik te smelelil kʼop te ay ta Biblia. Te smelelil kʼop ini mukʼ skʼoplal, melel ya yakʼ jnoptik bin-utʼil ya kamigointik te Jehová sok te bitʼil ya jtatik te stseʼelil koʼtantik. Kʼalal ya jchʼuuntik spasel te bin ya jnoptik ta Biblia maba ya kakʼ jbatik ta mosoinel yuʼun te lotil nojptesel sok te spasel mulil (1 Cor. 6:9-11).

 ⁴ Mukʼ skʼoplal te smelelil kʼop ya jtatik ta Biblia, melel te Jehová jaʼnax ya yakʼbey snop te machʼatik pekʼel yoʼtanik sok te «jich yoʼtanik te ya xkuxinik ta sbajtelkʼinal» (Hech. 13:48, TNM). Jaʼnix jich lek ya yilik te jaʼ ya xnojptesotik yuʼun «te aʼbat te jun yoʼtan soc pʼij» (Mat. 11:25; 24:45). Teme ta jtukeltiknax ya jnoptik te Biblia maba ya kichʼbeytik swentail, kʼax mukʼ skʼoplal te ya xkʼot ta koʼtantike (Prov. 3:13, 15).

5. ¿Bin yakʼoj ta jwentatik te Jehová?

⁵ Te Jehová yakʼoj ta jwentatik snojptesel te ants winiketike (Mat. 24:14). Kʼax mukʼ skʼoplal te bin ya kakʼtik ta nopele, melel jich ya xjuʼ ya yamigoinik te Jehová sok ya sta skuxlejalik ta sbajtelkʼinal (1 Tim. 4:16). Chikan teme bayal o jtebnax ya jcholtik skʼop Dios, jaʼ mukʼ skʼoplal te yakotik ta spasel te aʼtelile (1 Tim. 2:3, 4). ¡Jaʼ mukʼul majtanil te ayotik ta aʼtel sok te Jehovae! (1 Cor. 3:9).

6. ¿Bin kʼot ta stojolik te machʼatik maba la skanantayik te schʼuunel yoʼtanike?

⁶ Ta skʼajkʼalel te Timoteo, ay jchʼuunjeletik te maba mukʼ skʼoplal la yilik te ya x-aʼtejik sok te Jehová. Jich bitʼil te Demas te jaʼ la smulan te bintik ay ta balumilal, jaʼ yuʼun maba abatin sok te Pabloe (2 Tim. 4:10). Te Figelo sok Hermógenes la yijkitayik te scholel skʼop Dios ta skaj te la xiʼik te ya xkʼax swokolik jich bitʼil te Pablo (2 Tim. 1:15). Te Himeneo, Alejandro sok Fileto la yijkitayik te smelelil kʼop sok ochik ta apostata (1 Tim. 1:19, 20; 2 Tim. 2:16-18). Tulan schʼuunel yoʼtanik-a, pero ta patil maba mukʼix skʼoplal la yilik te smelelil kʼope.

7. ¿Bintik ya stuuntes te Satanás swenta ya sloʼlayotik-a?

⁷ ¿Bintik ya stuuntes te Satanás swenta ya xchʼay ta koʼtantik te bin yakʼoj jnoptik te Jehová? Kiltik cheʼoxebuk. Ya stuuntes te bintik ya smon koʼtantik, jich bitʼil te telebision, te selular, te Internet sok yantikxan swenta ya sjin te jpensartik, te lekil jtaleltik yuʼun jich ya kijkitaytik te smelelil kʼop. Jaʼnix jich ya skʼan te yakuk jxiʼtik te tenel o kontrainel swenta ya kijkitaytik te scholel skʼop Dios. Sok ya skʼan ya sloʼlayotik yuʼun ya jchʼuuntik te bin ya yalik te apostataetike (1 Tim. 6:20, 21).

8. ¿Bin ya yakʼ jnoptik te bin kʼax ta stojol te Daniele?

⁸ Teme maba ya jkanantay jbatik ya xjuʼ  te kʼunkʼun ya kijkitaytik te smelelil kʼope. Kiltik te bin kʼax ta stojol te Daniel * te bayal la smulan te bideojuegoetik. Jich la yal: «Kajon ta stuuntesel te bideojuegoetik te kʼalal 10 kaʼbilal-ae. Ta sjajchibal maba chopol-a te bin ya kile, pero kʼunkʼun kaj kil bideojuegoetik yuʼun majtamba sok te ay spukujile». Ta patil bael te Daniel ya yil 15 ora ta jujun kʼajkʼal te bideojuegoetike. Jich la yalxan: «Jnaʼoj-a te jaʼ ya snamajteson ta stojol te Jehová te bideojuegoetik sok te jayeb tiempo ya kile. Pero tulanajix-a te koʼtane jaʼ yuʼun maba ya xtuunix kuʼun ya kaʼiy-a te bin ya yal te Bibliae». Jaʼ-abi ya yakʼ jnoptik te kʼunkʼun ya yutsʼin koʼtantik te bin ya jkʼasestik kʼajkʼal-ae. Teme jich ya xkʼot ta jtojoltike, yaniwan kijkitaytik te smelelil kʼope.

9. Jich bitʼil ya yal 1 Timoteo 1:18, 19, ¿bin la yichʼ pajaltaybeyel skʼoplal-a te Timoteoe?

⁹ (Kʼopona 1 Timoteo 1:18, 19). Te Pablo la spajaltaybey skʼoplal te Timoteo jich bitʼil jtul soldado te ya spas guerra. Te guerra-abi jaʼ ta swenta te schʼuunel yoʼtane. ¿Bin-utʼil pajalotik sok jtul soldado? ¿Bin talelil ya skʼan ayuk kuʼuntik te soldadootik yuʼun Cristo? Te ejemplo la yakʼ te Pablo ya yakʼ jnoptik joʼchajp te bin ya skʼan ya jpastik yuʼun maba ya kijkitaytik te smelelil kʼope.

10. ¿Bin ya jpastik teme kichʼojtik ta mukʼ sok spisil koʼtantik te Diose?

¹⁰ Kichʼtik ta mukʼ sok spisil koʼtantik te Diose. Te lekil soldado jun yoʼtan ya yakʼ sba. Ya stuuntes spisil yip yuʼun ya skanantay te machʼa kʼux ta yoʼtan o te bin ay skʼoplal ta yoʼtane. Te Pablo la yalbey te Timoteo te yakuk yichʼ ta mukʼ sok spisil yoʼtan te Diose, jaʼ ya skʼan ya yal te kʼux ta yoʼtan sok te jun yoʼtan ta stojole (1 Tim. 4:7). Teme kʼux ta koʼtantik te Jehová maba ya kijkitaytik te smelelil kʼope (1 Tim. 4:8-10; 6:6).

11. ¿Bin yuʼun ya skʼan ya jpastik tulan?

¹¹ Jpastik tulan. Te soldado ya skʼan ya spas tulan yuʼun ya spas te yaʼtele. Te Timoteo la stsal te Satanás, melel maba la spas te bin ya smulan te bakʼetalil, la yakʼ ta ilel lekil talelil sok jaʼ la sjokin te yermanotake (2 Tim. 2:22). Pero la spas tulan swenta ya xjuʼ yuʼun-a. Jaʼnix jich te joʼotike ya skʼan ya jpastik tulan swenta ma jpastik te bin chopol ya smulan te koʼtantike (Rom. 7:21-25). Soknix ya skʼan ya jpastik tulan yuʼun ya kijkitaytik te jpokoʼ jtaleltik sok te ya jlaptik te yachʼil kuxlejal (Efes. 4:22, 24). Teme lujben ya xjulotik ta aʼtel jaʼnix jich ya skʼan ya jpastik tulan yuʼun ya xbootik ta tsoblej (Heb. 10:24, 25).

12. ¿Bin-utʼil lekil jpʼijubteswanej ya xkʼootik?

¹² Te soldado ya skʼan ya snaʼ stuuntesel ta lek te yaʼtejib yuʼun guerra. Jaʼnix jich te joʼotike ya skʼan ya jnaʼtik stuuntesel ta lek te sKʼop Diose (2 Tim. 2:15). Te tsoblejetik ya skoltayotik ta snaʼel stuuntesel. Pero ya skʼan ya jnop ta jtukeltik te Biblia swenta ya jkoltaytik te yantik yuʼun ya xkʼot ta yoʼtanik te smelelil kʼope. Te Biblia jaʼme ya yakʼbey yip te schʼuunel koʼtantike. Pero mame tikʼuk-a te ya jkʼopontike, ya skʼan ya jnopilan ta koʼtantik sok ya skʼan ya jpastik inbestigar ta publikasionetik swenta  ya xkʼot ta koʼtantik sok yuʼun ya xjuʼ ya jcholbeytik yaʼiy te ants winiketike (1 Tim. 4:13-15). Jichme ya xjuʼ ya jnojptestik-a te yantike. Pero ma tikʼuk-a te jaʼnax ya jkʼopontik jun teksto. Jaʼ ya jkʼantik te ya xkʼot ta yoʼtanik sok te ya yilik bitʼil ya xkoltayotik. Jich yuʼun teme spisil-ora ya jkʼopontik te Biblia, lekil jpʼijubteswanej ya xkʼootik (2 Tim. 3:16, 17).

13. Jich bitʼil ya yal Hebreos 5:14, ¿bin yuʼun ya skʼan ya jnaʼtik stsael te bin ya jkʼasestik kʼajkʼal-ae?

¹³ Jnaʼtik «stsahtayel te bintic lec soc te bintic ma lecuque». Te soldado ya skʼan ya snaʼ yilel te bin ya x-akʼot ta wokol yuʼune. Jaʼnix jich te joʼotik ya skʼan ya jnaʼtik bin ya xjuʼ ya yakʼotik ta wokol (kʼopona Hebreos 5:14; Prov. 22:3). Ya skʼan ya jnaʼtik stsael te bin ya jkʼasestik kʼajkʼal-ae, melel te telebision sok te pelikulaetik ya yakʼik ta ilel mulil tey-a. Te j-abatotik yuʼun Dios ya jpʼajtik te bin ya yakʼ xpejkʼaj te kʼuxul koʼtantik ta stojol te Jehová. Te Jehová ya yilay te spasel mulil sok jnaʼojtik te ya sta swokolik te machʼatik jich ya spasike (Efes. 5:5, 6).

14. ¿Bin la spas te Daniele?

¹⁴ Te Daniel te la kalbeytik skʼoplal ta parrafo 8, la sta ta ilel te maba lek te ya yil bideojuegoetik yuʼun majtamba sok te ay spukujile. La sle informasion ta Watchtower Library yuʼun ya yijkitay-a. Jich juʼ yuʼun yijkitayel te bin ya x-utsʼinbot yoʼtane, la yijkitay te tajimal ta Internet sok te machʼatik ya sjokin tey-ae. Jich la yal: «Te kʼalal la kijkitay te bideojuegoetik jaʼ kaj jokin ta paxial te ermanoetike». Ta ora ini jaʼix prekursor sok ansiano te Daniele.

15. ¿Bin yuʼun kʼax chopol te bin ya yalik te apostataetike?

¹⁵ Jich bitʼil la spas te Timoteo, ya skʼan ya jnaʼtik te kʼax chopol te bin ya spukik ta alel te apostataetike (1 Tim. 4:1, 7; 2 Tim. 2:16). Yaniwan spukik ta alel lotil kʼopetik ta stojol te ermanoetik o ta stojol te organisasion yuʼun te Jehová. Te bin ya yalike ya xjuʼ ya schebajtes koʼtantik, jaʼ yuʼun mame xkakʼ sloʼlayotik, melel «chopol spensaric» sok «ma snaʼic bin utʼil ay te smelelil cʼop» jaʼnax ay ta yoʼtanik sjachel  kʼop (1 Tim. 6:4, 5). Jaʼ ya skʼanik te yakuk jchʼuuntik te bin ya yalik sok te maʼyuk smukʼul koʼtantik ta stojol te kermanotaktike.

16. ¿Bin ya xjuʼ ya schʼaytes koʼtantik?

¹⁶ Mame ayuk bin ya schʼaytes koʼtantik. Jich bitʼil lekil soldado yuʼun Cristo te Timoteoe, jaʼ bajt ta yoʼtan te scholel skʼop Dios sok maba chʼaytesbot yoʼtan te sleel biluketik (2 Tim. 2:3, 4). Jtʼunbeytik te stalele sok mame kakʼtik schʼaytes koʼtantik te sleelxan jbiluktik. Te sleel kʼulejalil ya spejkʼan te skʼuxul koʼtantik ta stojol te Jehová, te ma jkʼopontikix te Biblia sok te ma xlokʼotikix ta scholel skʼop Dios (Mat. 13:22). Mame jletik bayal jbiluktik, jtuuntestik ta lek te jtiempotik sok kiptik yuʼun jaʼ nail ya kakʼ ta jkuxlejaltik te Wentainele (Mat. 6:22-25, 33).

17, 18. ¿Bin ya xjuʼ ya jpastik yuʼun ya jkanantaytik te schʼuunel koʼtantike?

¹⁷ Chapalukotik spisil-ora. Te soldado nail ya skʼan ya yil te bitʼil ya skoltay sba te kʼalal ay bin ya xtal ta stojole. Teme maba ya jkʼan ya kijkitaytik te smelelil kʼop te yakʼojbotik te Jehová, ya skʼan te chapalukotik spisil-ora. ¿Bin-utʼil ya jchajpan jbatik? Jaʼ te nail ya jnoptik te bin ya skʼan ya jpastik kʼalal ay bin ya xtal ta jtojoltike.

¹⁸ Kiltik jun ejemplo. Te kʼalal ay machʼa ya stsʼet jtejkʼ mukʼul teʼ, nail ya skʼan ya yil banti ya xlokʼ ta anel te kʼalal ya xyal te teʼe. ¿Bin yuʼun? Melel te kʼalal ya xyal te teʼe ya snaʼ banti ya xbajt ta oranax. Jaʼnix jich te kʼalal ya jtuuntestik te Internet, ya kiltik jun pelikula o te telebision, nail ya skʼan ya jnoptik bin ya jpastik teme ya xchiknaj tal te bin ya yilay te Jehová jich bitʼil te bintik ya yal te apostataetik, te spasel mulil o majtamba. Teme chapalotike oranax ya jtupʼtik o ya jeltaytik te bin yakotik ta yilele, jich ya jkanantaytik te schʼuunel koʼtantik sok lek ya yilotik-a te Jehovae (Sal. 101:3; 1 Tim. 4:12).

19. ¿Bin ya jtatik teme ya jkanantaytik te bin yakʼojbotik te Jehová?

¹⁹ Te j-abatotik yuʼun Jehová ma skʼan ya kijkitaytik te bin jnopojtik ta Biblia sok kakʼbeytik snop-euk te ants winiketike. Teme jich ya jpastike, jun koʼtan ya kaʼiy jbatik, ay swentail ya xkʼot te jkuxlejaltik sok ya jtatik stseʼelil koʼtantik te kʼalal ya jkoltaytik yantik ta snaʼbeyel sba te Jehová. Te Jehová ya skoltayotik ta skanantayel te bin mukʼ skʼoplal yakʼoj ta jwentatike (1 Tim. 6:12, 19).