1, 2. Мар Тимофейлы оскемын вал, 1 Тимофейлы 6:20 лыдэ басьтыса?

 ӴЕМ дыръя дуно арбериосмес чакланы ми мукетъёсызлы оскиськомы. Кылсярысь, коньдонмес ми банке поныны быгатӥськомы но малпаськомы, сое чакласа возёзы но соин номыр уз луы шуыса. Куке ми дуно арберимес кинэ ке чакланы куриськомы, со возьматэ, та адямилы ми оскиськомы шуыса.

² Лыдӟе 1 Тимофейлы 6:20. Апостол Павел Тимофейлы тодаз вайытӥз, солы дуно мар ке оскемын шуыса,— адямиос пумысен Инмарлэсь эриксэ пыр-поч тодон-валан. Озьы ик Тимофейлы дан сётэмын вал ӟеч иворез тодытыны (2 Тим. 4:2, 5). Павел Тимофейлэсь мылкыдзэ ӝутӥз утьыны сое, мар солы оскемын вал. Нош мар оскиз Иегова милемлы? Но малы ми сое дунъяны кулэ?

3, 4. Малы Библиысь зэмлыкъёс туж дуноесь луо?

³ Иегова усьтӥз милемлы дуно зэмлыкъёсты, кудъёссэ шедьтыны луэ солэн Кылысьтыз, Библиысь. Та зэмлыкъёс дуноесь, малы ке шуоно соос дышето милемыз Инмарен умой кусыпъёс возьыны но валэкто, кызьы зэмзэ ик шудо луоно. Библиысь зэмлыкъёслы ми оскиськомы ке, соку зэмос луисьтэм дышетонъёслэсь мозмытскомы но ум лэсьтэ сое, мае Инмар адӟемпотостэм каре (1 Кор. 6:9—11).

⁴ Малы эшшо Инмарлэн Кылысьтыз зэмлыкъёс дуноесь луо? Малы ке шуоно Иегова та зэмлыкъёсты усьтэ соослы гинэ, кинъёс асьсэды зӥбыт-востэм возё но Инмарез утчало (Евр. 11:6). Сыӵе адямиос соглаш соин, малы дышетэ «оскиськымон, визьмо ляльчи» (Матф. 11:25; 24:45). Ми ас  поннамы та зэмлыкъёсты валаны ум быгатӥське, но соослэсь дуноез номыр ӧвӧл ни (Мад. 3:13, 15).

5. Мар эшшо оскиз на милемлы Иегова?

⁵ Озьы ик Иегова оскиз милемлы мукетъёсты дышетыны ачиз сярысь но аслаз эрикез сярысь зэмлыклы (Матф. 24:14). Ивор, кудзэ ми вераськомы туж дуно луэ, малы ке шуоно со юрттэ адямиослы Иеговалэн семьяяз пырыны но соослы луонлык сётэ пырак улон басьтыны (1 Тим. 4:16). Кӧня гинэ ми медам тодытэ — трос-а яке ӧжыт-а — ми пыриськиськомы уже, кудӥзлэсь кулэгес туннэ ӧвӧл ни (1 Тим. 2:3, 4). Макем бадӟым дан «Инмарлэн ужасьёсыз» луыны! (1 Кор. 3:9).

6. Мар луиз куд-ог христианъёсын, куке соос Инмарлэн ужасьёсыз луонэз дунъямысь дугдӥзы?

⁶ Тимофей улон нуналъёсы куд-ог христианъёс Инмарлэн ужасьёсыз луонэз дунъямысь дугдӥзы. Кылсярысь, Димас та дуннеез яратӥз но кельтӥз Павелэз, кудӥныз ӵош ужаз-тыршиз (2 Тим. 4:10). Фигелл но Ермоген тодытэмысь дугдӥзы, малы ке шуоно кышказы, вылды, Павелэз сямен ик, соосты но уйылозы-уллялозы шуыса (2 Тим. 1:15). Именей, Александр но Филит зэмос йыбырттонлэсь палэнскемъёслы оскизы но зэмлыкез кельтӥзы (1 Тим. 1:19, 20; 2 Тим. 2:16—18). Ваньзы соос куке но Иеговаез яратӥзы, луоз, нош дыр ортчыса, дунъямысь дугдӥзы сое, мар соослы оскемын вал.

7. Кыӵе амалъёсты уже кутэ Шайтан?

⁷ Мар каре Шайтан, ми мед кельтомы шуыса сое, мае оскиз милемлы Иегова? Тани куд-ог амалъёс, кудъёссэ со уже кутэ. Телевидение, интернет, фильмъёс, газетъёс, журналъёс но книгаос пыр Шайтан милесьтым мылкыдмес ӝутэ малпаськыны но лэсьтыны озьы, ми Иеговаез яратэмысь но солэсь кылзӥськемысь мед дугдомы шуыса. Озьы ик со кышкатыны тырше огъёзъёсмылэн пумитъяськеменызы но уйылон-уллянъёсын, ми медам тодытэ ни шуыса. Со сяна, зэмос йыбырттонлэсь палэнскемъёслэн ӧрекчи дышетонъёссы пыр Шайтан кескич амалэн милемыз зэмлыклэсь палэнтыны тырше (1 Тим. 6:20, 21).

8. Малы дышетэ тӥледыз Дэниеллэн учырез?

⁸ Ми ӧм ке чаклаське, пумен-пумен зэмлыкез дунъямысь дугдыны быгатомы. Тани Дэниел b нимо агайлэн учырез, кудӥз видеошудонъёсты яратӥз. Со вера: «Мон видеошудонъёсын шудыны кутски, куке мыным 10 арес котыр вал. Нырысь соос номыр уродзэ ӧз вае. Нош собере мон шудыны кутски сыӵе шудонъёсын, кудъёсыз герӟаськемын вал кужмысь каронэн но периослэн ужъёсынызы». Дыр ортчыса, Дэниел нуналлы быдэ  ог 15 час ӵоже шудыса улӥз. Со азьланьтэ: «Зэмзэ вераса, мон валасько вал, сыӵе шудонъёс но соослы сомында дырез быдтон Иеговаен кусыпъёсме сӧро шуыса. Но мынам сюлмы чурытомиз, озьы ик мон асме оскытӥ, сыӵе шудонъёсын шудон Библиысь эсэпъёслы пумит уг мыны шуыса». Луыны быгатэ озьы, шутэтскон амалъёс сэрен ми асьмеос но ум шӧдэ, кызьы зэмлыкез дунъямысь дугдомы но ыштомы сое, мае оскиз милемлы Иегова.

9. Мар карыны Павел Тимофейлэсь мылкыдзэ ӝутӥз, 1 Тимофейлы 1:18, 19 лыдэ басьтыса?

⁹ Лыдӟе 1 Тимофейлы 1:18, 19. Павел Тимофейлэсь мылкыдзэ ӝутӥз «ӟечлыко ожмаськись кадь» нюръяськыны. Павел адямиосын нюръяськон сярысь ӧз вера ке но, малы милемыз ожмаськисьёсын ӵошатыны луэ но кыӵе сямъёс милемлы будэтоно? Эскеромы, малы дышетскыны луэ Павеллэн примерысьтыз. Со юрттоз утьыны сое, мар милемлы оскемын.

10. Малы милемлы тыршоно Инмарлы оскымон луыны?

¹⁰ Азьланяз но Инмарлы оскымон луыны тырше. Умой ожмаськись оскымон луыны тырше. Со вань кужмысьтыз нюръяське, утён понна сое, кинэ яратэ, яке сое, мае дунъя. Павел Тимофейлэсь мылкыдзэ ӝутӥз «Инмар азьын шонерлыко улыны», яке Инмарлы оскымон луыны (1 Тим. 4:7). Макем золгес ми Инмарез яратомы но солы оскымон луомы, сокем юнгес луоз мылкыдмы утьыны сое, мар милемлы оскемын (1 Тим. 4:8—10; 6:6).

11. Малы милемлы дышетсконо лэсьтыны сое, мар шонер луэ?

¹¹ Дышетске лэсьтыны сое, мар шонер луэ. Ожмаськисьлы ассэ кыдатоно, ожмаськонлы котьку дась луон понна. Тимофей Шайтанлы сётскытэк улыны быгатӥз, малы ке шуоно Павеллэсь визь-кенешсэ уже кутӥз но шонертэм мылпотонъёсыныз нюръяськиз, Инмарлы ярамон сямъёс будэтӥз но огъя оскисьёсыныз дырзэ ортчытъяз (2 Тим. 2:22). Нош со понна солы дышетсконо вал лэсьтыны сое, мар шонер луэ. Милемлы но солы дышетсконо, сьӧлыко мылпотонъёсмес вормон понна (Рим. 7:21—25). Озьы ик шонерзэ лэсьтыны дышетсконо, «сисьмоно вужмем адями» луонлэсь куштӥськон понна но «выль адями» луон понна (Еф. 4:22, 24). Кузь нуналлэн пумаз, куке ми туж жадемын, секыт луыны быгатэ кужым шедьтыны кенешлэн пумиськоназ мыныны. Соку но милемлы дышетсконо лэсьтыны сое, мар шонер луэ (Евр. 10:24, 25).

12. Мар юрттоз милемлы Библиез эшшо но быгатыса кутыны?

¹² Ожтӥрлыкез быгатыса кутон понна, ожмаськисьлы ялан солы дышетсконо. Озьы ик милемлы но дышетсконо Инмарлэсь Кылзэ быгатыса кутыны (2 Тим 2:15). Талы ми дышетскыны быгатӥськомы кенешлэн пумиськонъёсаз. Нош милям мукет адямиосты оскытэммы потэ ке, Библиысь зэмлык зэмзэ ик дуно луэ шуыса, милемлы ас поннамы Библиез эскерыны кулэ. Инмарлэн Кылыз милесьтым осконмес юнматыны быгатэ. Нош со понна Библиез лыдӟыны гинэ тырмыт ӧвӧл. Милемлы кулэ лыдӟеммы вылын малпаськыны но, публикациосмес кутыса, эскерон ортчытъяны. Озьы ми Библиысь зэмлыкъёсты шонер валаломы но тодомы, кызьы соосты валэктоно (1 Тим 4:13—15). Соку ми быгатомы Инмарлэсь Кылзэ кутыны, мукетъёсты дышетон понна, малы ке шуоно адямилы Библиысь кылбур лыдӟыны гинэ тырмыт ӧвӧл. Милемлы солы валаны юрттоно, мар сярысь отын вераське  но кызьы со соин асэныз герӟаськемын. Ас поннамы Библиез ялан эскерыса, ми эшшо но усто дышетӥсьёс луомы (2 Тим 3:16, 17).

13. Малы кышкытлыкъёсты азьло ик адӟыны тыршоно, Еврейёслы 5:14 лыдэ басьтыса?

¹³ Тырше кышкытлыкъёсты азьло ик адӟыны. Ожмаськисьлы валаны кулэ, кыӵе кышкытлыкен со пумиськыны быгатэ, но солэсь палэнскыны тыршоно. Милемлы но дышетсконо кышкыт учыръёсты адӟыны но соослэсь ватӥськыны (Мад. 22:3; лыдӟе Еврейёслы 5:14). Кылсярысь, милемлы шутэтскон амалъёсты но шулдыръяськонъёсты визьмо быръёно. Ӵем дыръя телепередачаосын но фильмъёсын азон-калгонэн герӟаськем ужъёс возьматӥсько. Сыӵе ужъёс Инмарез сантэмало но вӧсь каро. Соин ик ми палэнскиськомы шутэтскон амалъёслэсь, кудъёсыз сэрен Инмарез яратонмы пумен сӥяны быгатэ (Еф. 5:5, 6).

14. Кызьы кышкытлыкез азьло ик адӟыны быгатон Дэниеллы юрттӥз?

¹⁴ Дэниел, кудӥз сярысь вераськиз ини, валаны кутскиз, кыӵе кышкытлык вайыны быгато шудонъёс, кудъёсыз кужмысь каронэн но периослэн ужъёсынызы герӟаськемын. Электрон библиотекаез кутыса, со эскериз та юанэз. Кыӵе пайда со солы вайиз? Дэниел шудэмысь дугдӥз видеошудонъёсын, кудъёсыз солэсь Иеговаен кусыпъёссэ сӧро вал. Со сяна, Дэниел онлайн-шудонъёслы гожтӥськемзэ дугдытӥз но мукет шудӥсьёсын ӵош шудэмысь дугдӥз. Со вера: «Шудыса пукем интые, мон дырме ортчытъяны кутски кырын но кенешысь эшъёсыным». Али Дэниел пионер но тӧро луыса ужа-тырше.

15. Кыӵе кышкытлык вае зэмос йыбырттонлэсь палэнскемъёслэн пӧяса верамъёссы?

¹⁵ Тимофейлы сямен ик, милемлы но валаны тыршоно, кыӵе кышкытлык вайыны быгатэ зэмос йыбырттонлэсь палэнскемъёслэн верамъёссы (1 Тим. 4:1, 7; 2 Тим. 2:16). Кылсярысь, соос вераны быгато вын-агайёсмы сярысь шонертэмзэ яке сое, маин сэрен Иеговалэн организациезлы туж ик ум оске ни. Зэмос йыбырттонлэсь палэнскемъёслэн пӧяса верамзы милесьтым осконмес лябӟытыны быгатэ. Милемлы та сьӧлтэтэ сюрыны уг яра. Малы ке шуоно сыӵе веранъёсты вӧлмыто «визьзы сӧриськем адямиос», кудъёсыз «уг тодо, мар со зэмлык». Соослэн ужпумзы — милемыз «ченгешонъёсы, кыл тэкшеронъёсы» кыскыны. Соослэн потэ, ми  соослэн пӧяса верамъёссылы мед оскомы но вын-агайёслы оскемысь мед дугдомы шуыса (1 Тим. 6:4, 5).

16. Малэсь милемлы палэнскыны кулэ?

¹⁶ Саклыктэс висъялэ валтӥсезлы. «Иисус Христослэн ӟечлыко ожмаськисез кадь», Тимофейлы саклыксэ висъяно вал ужан-тыршонлы, нош ваньбурлы но мукет ужпумъёслы укыр трос саклыксэ висъяно ӧй вал (2 Тим. 2:3, 4). Милемлы но тросгес ваньбур люкан мылкыдлы сётсконо ӧвӧл. «Узырлыклы синмаськон» сэрен ми Иеговаез яратэмысь, Инмарлэн Кылыз понна тау каремысь но зэмлыкез мукетъёсызлы верамысь дугдыны быгатомы (Матф. 13:22). Милемлы огшоры улоно но кужыммес но дырмес кутоно, «нырысь ик Инмарлэсь Эксэйлыксэ» утчан понна (Матф. 6:22—25, 33).

17, 18. Мар кароно, Иеговаен кусыпъёсмес утён понна?

¹⁷ Дась луэ ӝегатскытэк мар ке карыны. Ожмаськисьлы азьло ик малпано, мар со кароз, тушмонъёсыз со вылэ урдскизы ке. Милям потэ ке утеммы сое, мае милемлы Иегова оскиз, кышкытлыкез адӟыса, ми ӝегатскытэк мар ке каромы. Мар милемлы юрттоз? Милемлы азьло ик малпано, мар каромы сыӵе учыръёсы.

¹⁸ Эскеромы одӥг примерез. Самолёт лобӟон азьын пассажиръёслы азьло ик валэкто, мар кароно, кышкытлык кылдыку, но возьмато, кытысь шедьтыны луэ соослы матысь потонъёсты. Малы? Кышкытлык кылдыку, самолётысь ӝог потыны мед луоз шуыса. Озьы ик милемлы но азьло ик малпано, кыӵе «потон» шедьтомы, куке фильмын, телепередачаын яке интернетын адӟомы сое, мар герӟаськемын азон-калгонэн, кужмысь каронэн яке зэмос йыбырттонлэсь палэнскемъёслэн пӧяса верамъёсынызы. Ми сыӵе учырлы дась ке, соку ӝегатскытэк мар ке но карыны быгатомы, Иеговалы оскымон кылён понна но солэн син азяз чылкыт луон понна (Пс. 100:3; 1 Тим. 4:12).

19. Кызьы ми бакель каремын луомы, дунъяськомы ке сое, мае оскиз милемлы Иегова?

¹⁹ Милемлы дунъяно сое, мае оскиз милемлы Иегова,— Библиысь зэмлыкъёсты но соослы мукет адямиосты дышетыны курон-косонэз. Соку милям чылкыт возьытлыкмы луоз, ми валаломы, малы улӥськомы, но шумпотыса мукетъёсызлы юрттомы Инмарен тодматскыны. Иегова милемлы одно ик юрттоз но, ми быгатомы утьыны сое, мае со милемлы оскиз (1 Тим. 6:12, 19).