1-2. Moovarihana ni 1 Timótheyo 6:20, Timootheyo aavahiwe exeeni?

IKWAHA SINCEENE, ninnaahiya atthu akina akhapelelaka mireerelo sahu sa faita yinceene. Mwa ntakiheryo, anamunceene a hiyo annipweha musurukhu aya obanko. Nto ninnikupali wira musurukhu owo ori woovareleleya khonrowa orimeela nnakhala wiiyiwa. Nlikanyiho nna, ninninikhaliherya woona ele entaphulela aya omuroromela mutthu nimunnyaka etthu ahu ya faita yinceene.

² Mmusome 1 Timótheyo 6:20. Murummwa Paulo aahimuupuxerya Timootheyo wira aahivahiwa etthu ya faita yinceene, eyo piiyo, ekeekhai ya itthu Muluku onrowa awe waapakela apinaatamu. Nave Timootheyo aahivahiwa eparakha ekina ya ‘olaleya masu’ ni ‘onvarela Muluku muteko womalela’. (2 Tim. 4:2, 5) Eyo ti etthu yaamwiirinhe Paulo omutumererya Timootheyo osuka itthu aaroromeliwe awe. Ntoko Timootheyo, Yehova ooniroromela itthu sa faita yinceene. Itthu xeeni? Ninrowa wooniherya sai wira ninnikhapelela itthu sa faita Yehova onivanhe awe?

3-4. Itthu xeeni siniiriha ikeekhai sa mBiibiliyani okhala sa faita yinceene?

³ Mooreerela murima, Yehova oonisuweliha ikeekhai sa faita siri Nuulumo nawe, Biibiliya. Ikeekhai iyo siri mBiibiliyani ti sa faita yinceene mwaha woowi sinniniixuttiha moota wookhalana waataana wooloka ni Yehova ni sinninooniherya etthu nikhanle ahu oopaka wira niphwanye ohakalala wekeekhai mookumini mwahu. Nto vaavo nneemererya ahu ikeekhai iyo ni nniiwelela ahu, ninniphwanya otaphuwa wekeekhai. Okathi owo, hiyo khaninkhala-tho ipottha sa sowiixuttiha sowoothiwa ni soowiira soohiloka.—1 aKor. 6:9-11.

⁴ Etthu ekina eniiriha ikeekhai siri Nuulumo na Muluku okhala sa faita, okhala wira Yehova ohaasuweliha paahi atthu oowiiyeviha yaawo aniphavela. (Mit. 13:48) Nave atthu awo, anneemererya  enamuna Yehova onirumeela awe olelo-va wira onooniherye ikeekhai iyo. (Math. 11:25; 24:45) Mekhihu paahi khinaarowa owerya ophwanya ikeekhai iyo niixuntte ahu, maana khiivo etthu moolumwenkuni erina efaita ovikana ikeekhai iyo niixuntte ahu.—Mir. 3:13, 15.

5. Yehova onivanhe eparakha xeeni?

⁵ Yehova oonivaha eparakha ya owiixuttiha atthu akina voohimya sa yena ni ele onrowa awe opaka muhoolo. (Math. 24:14) Nto muhupi ninlaleya ahu wookhalana efaita yinceene. Maana atthu ale aneemererya annikhalana eparakha wiirela mpantta emusi ya Yehova ni anookhalaka mahiku otheene muhoolo. (1 Tim. 4:16) Moohicikha okathi ninviriha ahu nlaleeryaka, okhale vakhaani wala munceene, otheene ahu ninniirela mpantta muteko wootepa otthuneya onivariwa olelo-va. (1 Tim. 2:3, 4) Moohaanyiherya, eparakha yuulupale ovara vamosa ni Muluku!—1 aKor. 3:9.

6. Exeeni yaawiirinhe maKristau makina ohiya eparakha yaavahiwe aya?

⁶ MaKristau makina a okathi wa Timootheyo, yaahihiya ovaha efaita eparakha ya ovara vamosa ni Muluku. Mwa ntakiheryo, okhala wira Dema aaniphenta itthu sa valaponi, owo aahihiya ovara vamosa ni Paulo. (2 Tim. 4:10) Nave Fijelo ni Hermojene yaahihiya muteko woolaleerya mwaha woowi woonasa wene yaanoova olupatthiwa ntoko murummwa Paulo aalupatthiwa awe. (2 Tim. 1:15) Hemineyo, Alexandre ni Fileto yaahihiya ekeekhai khukhala anammwareya. (1 Tim. 1:19, 20; 2 Tim. 2:16-18) Vanikhala ntoko wira alopwana awo otheene yaari oolipa momunepani, masi yaahihiya ovaha efaita ele yaavahiwe aya.

7. Miraakho xeeni Satana onirumeela awe wira onihapuxe?

⁷ Olelo-va, Satana onniimananiha wira onihiihe ovaha efaita mihakhu Yehova onroromenle awe. Miraakho xeeni Satana onirumeela awe wira onihiihe? Muraakho woopacerya, Satana onnirumeela matthekulelo ohela muhina TV, muusika, interneti, irevista ni iliivuru wira omwara-mware muupuwelo ni moonelo waarowa oniiriha ohiya ekeekhai. Muraakho wa nenli, woova. Satana onnaarumeela ale ninsomana ahu oxikola wala ninvarana ahu muteko aahiiso onninlupattha mwa enamuna yooluluwanya wira onihiihe olaleya ihapari sooreera. Wa neeraru, anammwareya. Satana onneererya onihapuxa orumeelaka “osuwela” wowootha wa anammwareya wira onihiihe ekeekhai.—1 Tim. 6:20, 21.

8. Yowiiraneya ya munna Daniel, ewiixuttinheni exeeni?

⁸ Nihaana wiivaha ephoole, maana vakhaani-vakhaani, hiyo pooti ohiya ekeekhai. Nwehe yowiiraneya ya Daniel, * yoowo yaamusivela  vanceene axooku a munternetini. Owo onihimya so: “Kaahipacerya oweetta axooku ale kirina ene iyaakha 10. Wanipacerya, axooku kaaweetta aka kuupuwela wira khiyaarowa okikumiherya mixankiho. Masi vakhaani-vakhaani kaahipacerya oweetta axooku ootakhala ni anivarihana ni minepa sootakhala”. Waahiphiya okathi Daniel aaviriha awe iwoora 15 wala nihiku ntero oweettaka axooku ale. Owo onincererya oriki: “Ohimya ekeekhai, miyo kaanisuwela wira okathi kaaviriha aka ni axooku kaaweetta aka, yaanikivalaanyiha vakhaani-vakhaani ni Yehova. Masi murima aka waahikhutureya, miyo kuupuwela wira malakiheryo a mBiibiliyani khiyaavarihana ni miyo”. Tthiri eyo pooti oniiraneela otheene ahu, maana vakhaani-vakhaani matthekulelo pooti oniiriha ohiya ekeekhai. Nto eyo yiiraneya, hiyo pooti oyeleela itthu sa faita Yehova onivanhe awe.

9. Moovarihana ni 1 Timótheyo 1:18, 19, Paulo aamulikanyinhe Timootheyo naani?

⁹ Mmusome 1 Timótheyo 1:18, 19. Paulo aahimulikanyiha Timootheyo ni nakhotto ni aahimuleela wira “nwane ekhotto”. Ekhotto ya Timootheyo, khahiyo yaari ya weerutthuni masi yaari ya omunepani. Masi ovarihana xeeni okhanle eriyari ya ekhotto ya maKristau ni ekhotto ya anakhotto? Mikhalelo xeeni hiyo anakhotto a Kristu ninreerela ahu okhalana? Ninrowa oweha itthu 5 nlikanyiho na Paulo ninniixuttiha aya. Itthu iyo sinoonikhaliherya ovarexexa ekeekhai.

10. Omukokhorela Muluku paahi onitaphulela exeeni ni xeeni vari aya vooloka opaka eyo?

¹⁰ Mmukokhoreleke Muluku paahi. Nakhotto ooloka toororomeleya. Owo onniwana ni ikuru sawe sotheene wira aakhapelele ale onaaphenta awe wala etthu ya faita ororomeliwe awe osuka. Paulo aahimutumererya Timootheyo omukokhorela Muluku paahi, eyo piiyo, ororomeleya moomalela wa Yehova. (1 Tim. 4:7) Vaavo omphenta wahu Muluku oninnuwa aya, ninrowa otepaka ovarexexa ekeekhai.—1 Tim. 4:8-10; 6:6.

11. Xeeni vanireerela aya wiimananiha opaka itthu sooloka?

¹¹ Mwiimananiheke opaka itthu sooloka. Nakhotto ohaana wiimananiha opaka itthu sooloka wira owerye owana ekhotto enittharelana. Timootheyo aahiilokiherya momunepani mwaha woowi aanitthara miruku aavahiwe awe ni murummwa Paulo. Timootheyo aanikhootta soophavela soohiloka, aaniimananiha okhalana mikhalelo sa eKristau ni apatthani awe yaari anna ni arokora oowaamini. (2 Tim. 2:22) Wira opake eyo, owo aahaana wiimananiha opaka itthu sooloka. Etthu emosaru enniniiraneela otheene ahu, nihaana wiimananiha opaka itthu sooloka wira nisyake opaka etampi. (aRom. 7:21-25) Nave nihaana wiimananiha opaka itthu sooloka wira nihiye omutthu wa khalai wira niware omutthu wa niinaano. (aÉf. 4:22, 24) Opaka itthu sooloka onoonikhaliherya orowela mithukumano hata nikhulumunwe ene.—aHéb. 10:24, 25.

12. Ninrowa owerya sai omurumeela oratteene Biibiliya?

¹² Nakhotto ohaana osuwela orumeela ikaruma sawe sa ekhotto. Ohaana opaka eyo ikwaha sinceene wira osuweleke orumeela oratteene. Mwa enamuna emosaru, hiyo nihaana osuwela orumeela oratteene Nuulumo na Muluku. (2 Tim. 2:15) Inamuna sikina ninniixutta omithukumanoni. Masi wira naakupalihe atthu akina efaita Biibiliya orina awe, nihaana wiimananiha omusoma Biibiliya khula nihiku. Nto nihaana orumeela Nuulumo na Muluku wira nlipihe waamini wahu. Eyo enihela muhina ohiya paahi omusoma Biibiliya. Nihaana wuupuwelela ele ninsoma ahu ni otokosa muliivuruni mwahu. Niira siiso, nnoowerya wiiwexexa oratteene Soolempwa ni ovarihela muteko mookumini mwahu. (1 Tim. 4:13-15) Niira siiso, nnoowerya orumeela oratteene Nuulumo na Muluku wira niwiixuttihe atthu akina. Masi muhiliyale wira khoniphiyerya paahi waasomela  iversu sa mBiibiliyani, nihaana waakhaliherya wiiwexexa ele yoolepa eyo enihimya aya ni moota woovarihela muteko mookumini mwaya. Akhala wira nnoomusomaka Biibiliya khula nihiku, nnookhala alipa-oowiixuttiha oratteene Nuulumo na Muluku.—2 Tim. 3:16, 17.

13. Moovarihana ni aHéberi 5:14, xeeni vari aya vooloka okhalana ankhili?

¹³ Mukhalaneke ankhili. Nakhotto ooloka onnisuwela etthu enrowa omukumiherya mixankiho, onasyaka. Mwa enamuna emosaru, hiyo nave nihaana osuwela itthu sinrowa onikumiherya mixankiho ni opaka etthu wira nisyake. (Mir. 22:3; mmusome aHéberi 5:14.) Mwa ntakiheryo, nihaana othanla mwa miruku itthu ninweha ahu ni matthekulelo ahu. Iprokrama sinceene sa TV ni iviidiyu sinceene, sinooniherya orupihana woohiloka, nto mweettelo owo onninveeha Muluku. Nave hata vapisaka itthu iyo pooti onikumiherya mixankiho. Tivonto nihaana osyaka matthekulelo yaarowa vakhaani-vakhaani ohonona omphenta wahu Muluku.—aÉf. 5:5, 6.

14. Ankhili yaamukhalihenrye sai Daniel?

¹⁴ Daniel nimulavunle ahu, aahoona wira oweetta axooku a munternetini ootakhala ni anivarihana ni minepa sootakhala waari muxankiho muulupale. Nto aahisoma myaha saarowa omukhaliherya oxintta muxankiho awe va Watchtower Library. Nto exeeni yaakhumelenle? Daniel aahihiya oweetta axooku ootakhala munternetini. Nave aahaakumiha axooku onlaine ni aahaapolokeyari atthu otheene aaweettana awe axooku. Daniel onihimya so: “Ohiya oweetta axooku a munternetini, kaahipacerya ovara miteko sikina mapuro makina ni oviriha okathi kitthekulaka ni anna ni arokora a mmulokoni”. Olelo-va, Daniel onirumeela ntoko pioneero ni mutokweene.

15. Xeeni myaha sowoothiwa siri aya sootakhala?

¹⁵ Nimutakihaka Timootheyo, hiyo nihaana osuwela ni osyaka myaha sowoothiwa sinlaleiwa ni anammwareya. (1 Tim. 4:1, 7; 2 Tim. 2:16) Mwa ntakiheryo, awo pooti olaleya myaha sowoothiwa voohimya sa annihu ni oniiriha ohoverya mutthenkeso wa Yehova. Myaha iyo sowoothiwa pooti ohonona waamini wahu. Nto nihaana okhalana ephoole wira nihiwokiwe ni anammwareya. Mwaha wa xeeni? Mwaha woowi myaha iyo sowoothiwa sinlaleiwa ni atthu “òpahuwa miruku, ahinsuwela-tho ekekhai”. Maana yoolakela aya “ovanyihana n’unyakulihana” paahi. (1 Tim. 6:4, 5) Awo aniphavela wira hiyo nikupaliki wootha waya ni nihaaroromeleke anna ni arokora.

16. Exeeni ekhanle oonikhoottiherya owehexexa yoolukama ahu?

 ¹⁶ Nwehexexeke yoolukama anyu. Okhala wira aari “nakhotto òroromeleya a Yesu Kristu”, Timootheyo aaniwehexexa muteko woolaleerya. Owo kheemerenrye mihakhu ni itthu sa werutthuni simuliyalihaka yoolukama awe mookumini. (2 Tim. 2:3, 4) Nimutakihaka Timootheyo, niheemererye ohapuxiwa ni itthu sa werutthuni. “Wototha wa muhakhu” pooti ohonona omphenta wahu Yehova ni Biibiliya. Nave pooti oniiriha ohiphavela waalaleerya atthu akina ihapari sooreera. (Math. 13:22) Nto nihaana okhweiherya okumi ahu wira nirumeeleke ikuru ni okathi ahu wira nipaceryeke “ophavela Omwene wa Muluku”.—Math. 6:22-25, 33.

17-18. Nihaana opaka exeeni wira niikhapelele momunepani?

¹⁷ Mwiilokiherye wira mpakeke etthu mowaakuveya. Nakhotto ohaana wuupuwela vahinatthi wira opake etthu moowaakuveya wira iikhapelele. Akhala wira ninniphavela okhapelela ele Yehova onroromenle awe, nihaana opaka etthu mowaakuveya vaavo enikhumelela aya etthu yootakhala. Exeeni enrowa onikhaliherya opaka etthu mowaakuveya? Nihaana ompaka palano vahinatthi a moota ninrowa ahu wiikhapelela yakhumelela etthu yowoopiha.

¹⁸ Nkahaya nwehe nlikanyiho nna: Mapuro makina anithukumaniwa, atthu otheene annileeliwa mapuro ookhuma yaattamenle nipuro akilaathale aya. Mwaha wa xeeni? Mwaha woowi yakhumelela etthu yootutuxerya, atthu awo ahaana okhuma mowaakuveya. Mwa enamuna emosaru, hiyo nihaana osuwela etthu yoopaka sakhumelela itthu soohiloka TV, munternetini, ilatarato sintumererya orupihana woohiloka, otakhala aahiiso myaha sa anammwareya. Akhala wira nnimwiilokiherya niinaano-va, nnoowerya opaka etthu mowaakuveya, wiikhapelela momunepani ni nnoovikaniha okhala atthu ooloka vamaithoni va Yehova.—Esal. 101:3; 1 Tim. 4:12.

19. Mareeliho xeeni ninrowa ahu ophwanya akhala wira nnoosuka oratteene itthu sa faita nivahiwe ahu ni Yehova?

¹⁹ Nihaana osuka oratteene itthu sa faita nivahiwe ahu ni Yehova, ntoko ikeekhai sa faita sa mBiibiliyani ni eparakha ya owiixuttiha atthu akina. Niira siiso, nnoophwanya itthu sinceene sooloka ntoko okumi wooloka, murima wooloka ni ohakalala mwaha wowaakhaliherya atthu akina omusuwela Yehova. Mukupaliki ni murima wotheene wira mukhaliheriwaka ni Yehova, munoowerya osuka ele muroromeliwe anyu.—1 Tim. 6:12, 19.