1-2. As e dey for 1 Timothy 6:20, which important things they give Timothy?

MANY times, we de give people important things make they help us keep-am. For example, we fit keep our money for bank. We de do this one so that they no go thief our money and e no go lost. So we know wetin e mean to give another person important thing to keep for us.

² Read 1 Timothy 6:20. Apostle Paul remind Timothy say Timothy don receive one important thing. This thing na the truth about the things wey God want for man. Another thing wey Timothy receive na the preaching work. E go “continue to preach.” (2 Tim. 4:2, 5) Paul advice Timothy say make e protect the thing wey e don receive. Like Timothy, they don give us important things too. Wetin be this things? And why we go protect this important gift wey Jehovah don give us?

3-4. Wetin be some reasons why the truth for Bible dey important?

³ Jehovah don teach us fine-fine things for inside Bible. This things dey important because they don help us know how to be tight friend with Jehovah, and know wetin fit make us really dey happy for life. When we follow this things wey we don learn, people no go fit de deceive us with lie-lie things wey them de teach, and we no go be slave to bad things.​—1 Cor. 6:9-11.

⁴ Another reason why the things wey we learn for Bible dey important be say, Jehovah de teach only humble people wey “the condition of their heart dey good.” (Acts 13:48) This kind people don accept say Jehovah de use the faithful and discreet slave de teach us for this our time. (Matt. 11:25; 24:45) We no go fit learn this truth for Bible by ourself, and  nothing dey important pass to understand wetin dey Bible.​—Prov. 3:13, 15.

5. Which other important thing Jehovah don give us?

⁵ Another important thing wey Jehovah don give us na, the honor wey we get to teach people the truth about Jehovah and the things wey e go do for future. (Matt. 24:14) Make we no play with the message from Jehovah wey we de tell people, because this message go help them join Jehovah’s organization. Another thing na say, the message fit make them live forever for Paradise. (1 Tim. 4:16) Whether we de do plenty for the preaching work or na small we de do, we de do the number one important work for our time. (1 Tim. 2:3, 4) Na really special thing say we de work with God!​—1 Cor. 3:9.

6. Wetin happen to some people wey no protect wetin Jehovah don give them?

⁶ For time of Timothy, some Christians no care for the gift wey they get to work with God. For example, because Demas love the world, e stop to follow Paul. (2 Tim. 4:10) And e fit be say because Phygelus and Hermogenes no want face the suffer wey Paul face, they abandon the preaching work. (2 Tim. 1:15) Hymenaeus, Alexander, and Philetus start to talk wicked lie about the truth and they stop to worship Jehovah. (1 Tim. 1:19, 20; 2 Tim. 2:16-18) E clear say all this people love Jehovah before, but the things wey Jehovah give them no come dey important to them again.

7. Which traps Satan de use to make us do wetin e want?

⁷ How Satan de try to make us troway the important things wey Jehovah don give us? Make we talk about some traps wey Satan de use. E de use things like television and Internet to make us de think and do things for way wey go make us de leave Jehovah small-small. Satan de try to use wetin people de talk, or suffer-suffer from people to make us fear so that we go stop to preach. And e de try to make us listen to “the lie-lie” wey people wey don leave Jehovah de teach, so that we go leave the truth.​—1 Tim. 6:20, 21.

8. Wetin the experience of Brother Daniel teach you?

⁸ If we no dey careful, small-small, we fit leave the truth. Think about one brother wey love video games before. E name na Daniel. * E talk say: “I start to play video  game when I dey ten years. I first de play game wey no bad. But small-small, I start to play game wey them de fight for inside and wey things about demons dey inside.” As time de go, Daniel begin spend about 15 hours everyday de play video game. E talk say: “To tell myself the truth, that time I know say, the games wey I de play and the time wey I de spend to play them, de make my friendship with Jehovah de weak small-small. But, my heart don strong sotey I don believe say the advice for Bible no concern me.” So if we no dey careful, the things wey we de use relax and enjoy ourself fit make us stop to obey Jehovah small-small. If that one happen, e fit make us troway the important things wey Jehovah don give us.

9. As e dey for 1 Timothy 1:18, 19, which kind person Paul compare Timothy to?

⁹ Read 1 Timothy 1:18, 19. Paul compare Timothy to soldier and advice-am say make e “continue to fight the fine fight.” The kind war wey Paul de talk about no be the one wey people de fight today. Which things make Christians be like soldiers wey de fight war? Which fine-fine character we need to get as soldiers of Christ? Make we talk about five things wey we fit learn from the example wey Paul use. This things go fit help us protect the truth.

10. Why we need to get strong love for God?

¹⁰ Get strong love for God. Better soldier no de leave wetin e love. The soldier go do everything wey e fit do to protect person wey e love or something wey e see as important. Paul advice Timothy say make e get strong love for God. (1 Tim. 4:7) The more we love God, the more we go want protect the truth.​—1 Tim. 4:8-10; 6:6.

11. Why we need to train ourself?

¹¹ Train yourself. If soldier want dey ready to fight anytime, e must train e self. Timothy continue to get strong faith because e follow the advice from Paul, and e work hard to fight the bad things wey e body want, to get fine-fine character, and to spend time with brothers and sisters. (2 Tim. 2:22) That one mean say Timothy really train e self to do the correct thing. We need to fight and win the bad things wey our body want. (Rom. 7:21-25) Apart from that one, we must train ourself so that we go fit continue to remove the old character and de wear the new one. (Eph. 4:22, 24) And even when we don tire after we close from work, we fit need to force ourself go meeting.​—Heb. 10:24, 25.

12. Which ways we fit de make the way we de use Bible de better?

¹² Soldier go need to learn how to use the things wey e de use fight war. And if e want really know how to use them well, e need to always practice. For the same way, we need to really know how to use Bible. (2 Tim. 2:15) For our meeting, we fit learn some ways about how to use Bible. But if we want help people to believe say the truth for Bible fit really help them, we need to always de study Bible. Make we use Bible to make our faith dey strong. We no go only de read-am. We go still need to think deep about wetin we de read and do research for our books. This one go help us fit understand and use the Bible well for our life. (1 Tim. 4:13-15) Then we go fit use-am teach other people. And we no go only de read the Bible give people. We want help them understand the verse and know how they fit use-am for their life. So the more we de always study  our Bible, the more the way we de use-am teach people go de better.​—2 Tim. 3:16, 17.

13. With wetin dey Hebrews 5:14, why e good make we try know the correct thing?

¹³ Try know the correct thing. Soldier de know how to prepare for danger and protect e self. For the same way, we need to know situation wey fit put us for danger and then we go do wetin fit protect us. (Prov. 22:3; read Hebrews 5:14.) For example, when we de choose wetin we go use relax and enjoy ourself, we need to choose-am well. Many times, the programs wey them de show for television and for films de get bad-bad things for inside. This bad things de make God vex and they go put person for trouble. So make we no use this kind things relax and enjoy ourself, because e fit make our love for Jehovah de weak small-small.​—Eph. 5:5, 6.

14. Wetin help Daniel know the correct thing to do?

¹⁴ Daniel wey we don talk about before, start to see say to play video game wey fight-fight and things about demons dey inside, na problem. E study more things for Watchtower Library and this things help-am handle e problem. How this one affect Daniel? E stop to play bad video game. And e still stop to play game with other people for Internet. Daniel talk say, “Instead of me to play video game, I begin do other things for outside or de spend time with friends for congregation.” Now, Daniel don de serve as elder and pioneer.

15. Why lie-lie story dey bad?

¹⁵ Like Timothy, make we still try know the danger wey lie-lie from some people wey don stop to serve Jehovah fit cause. (1 Tim. 4:1, 7; 2 Tim. 2:16) For example, this kind people fit try to spread lie-lie story about our brothers. Or, they fit make us want doubt Jehovah’s organization. This kind lie-lie fit make our faith weak. Make we no ever allow them deceive us with the things wey them de talk. Why? Na because na “people wey get bad mind and people wey no de understand the truth again” de spread this kind story. Their plan na to begin “argue and de drag.” (1 Tim. 6:4, 5) They want make we believe their wicked lie and stop to trust our brothers.

16. Which things we no go allow to comot our mind from God work?

 ¹⁶ Always put your mind for God work. Bible talk say Timothy na “correct soldier of Christ Jesus.” So Timothy put e mind for the preaching work. E no put e mind for money and property, or other things for life. (2 Tim. 2:3, 4) Like Timothy, make we no allow our mind comot from the work of God because we want gather money and property. The “lie-lie hope wey money de give” fit make us stop to love Jehovah. The things for Bible fit no dey important to us again, and e fit no de hungry us to preach to people again. (Matt. 13:22) We must live simple life, and use our time and power to always ‘make the Kingdom the number one thing for our life.’​—Matt. 6:22-25, 33.

17-18. Wetin we fit do to protect the friendship wey we get with Jehovah?

¹⁷ Quick plan wetin you go do. Soldier de plan wetin e go do to protect e self from danger. If we want protect the things wey Jehovah don give us, we need to do something quick-quick when we see danger. Wetin fit help us do something quick-quick? We need to first plan wetin we go do when problem come.

¹⁸ For example, imagine say you go one occasion and before the occasion start, the person wey invite you show you another door wey you fit pass come out quick. Why e do like that? E do-am so that if something happen, you go fit pass the door wey go dey easy for you to go outside. For the same way, we fit plan wetin we go do when we just see something about sex, fight-fight, or lie wey person write about Jehovah’s organization, for Internet, for film, or television program. If we don already plan for wetin fit happen, we fit do something quick-quick to protect our friendship with Jehovah. And this one go make Jehovah continue to see us as clean people.​—Ps. 101:3; 1 Tim. 4:12.

19. Which better things we go get if we protect the important things wey Jehovah don give us?

¹⁹ We must protect the important gift wey Jehovah don give us. This gift na the truth for Bible and the special chance wey we get to teach people this truth. When we protect this things wey we get, we go get clean conscience, we go live better life, and we go dey happy say we help people come know Jehovah. Jehovah go help us make we fit protect the things wey e don give us.​—1 Tim. 6:12, 19.