1, 2. პირველ ტიმოთეშ 6:20-ის თანახმას, მუქ მიენდჷ ტიმოთეს?

ხშირას ჩქინო ძვირფას მუდგარენეფს შხვეფს ვაბარენთ, ნამდა ქიზრუნან თინეფშე. მაგალთო, შილებე ფარას ბანკის ფჩუანდათ, მუშენდა იმენდ მიღნა, ნამდა თექ დაცულ იჸი, ვადინუ დო მითინ ვეხირს. თაშ ნამდა, ჩქი მარჩქილენა, მუს ნიშნენს ჩქინო ძვირფას მუდგარენ შხვას მივანდათ.

² წეკითხით 1 ტიმოთეშ 6:20. მოციქულ პავლექ ტიმოთეს გაშინ, ნამდა თის ძვირფას მუდგარენქ მიენდჷ — კაცობრიობაწკუმა დაკავშირებით ღორონთიშ განზრახვაშ ზუსტ რჩქინა. თეს გეძინელ, ტიმოთეს მიენდჷ ქადაგებაშ დო „მახარობელიშ საქმეშ“ კეთებაშ პატიქ (2 ტიმ. 4:2, 5). პავლექ ელუჩ ტიმოთეს, დეცვუკო თინა, მუდგაქ მიენდჷ. ტიმოთეცალო, ჩქი ხოლო მუმანდეს ძვირფას მუდგარენეფ. მუ რე თინეფ დო მუშენ ოკო დეფცვათ განძ, ნამუთ იეჰოვაქ მუმანდეს?

3, 4. ნამ მიზეზეფიშ გურშენ რე ბიბლიურ ჭეშმარიტება ძვირფას?

³ იეჰოვაქ მუჩეს პატი, მიღდან ბიბლიურ ჭეშმარიტებაშ ზუსტ რჩქინა. თე ჭეშმარიტება ძვირფას რე, მუშენდა მოგურუანა, მუჭო შემლებნა, მიღდან ჯგირ ურთიერთობა იეჰოვაწკუმა დო მუ მომღანა ნამდვილ ბედნერობას. მუჟამსით ბწანა ჭეშმარიტება დო თიშ თანახმას ფცხოვრენთ, თავისფალეფ ვორეთ ტყურა გურაფეფიშ დო უზნეო საქციელიშ მონობაშე (1 კორ. 6:9—11).

⁴ ბიბლიურ ჭეშმარიტება თიშენ ხოლო რე ძვირფას, ნამდა იეჰოვა თის ხვალე თანდაბლეფს უცხადენს, მით „სწორას განწყობილ“ რენა (საქ. 13:48). თეცალ ადამიანეფ აღიარენა, ნამდა იეჰოვა ამდღა ართგურ დო გონიერ მონას გიმირინუანს ჩქინდა ჭეშმარიტებაშ დაგურაფალო (მათ. 11:25; 24:45). ჩქი ვეშემლებნა, ჩქინით ქინვანჭათ ბიბლიურ ჭეშმარიტებას. მუთუნ ვა რე ჭეშმარიტებაშ გაგებაშე უმოს ძვირფას (იგავ. 3:13, 15).

5. ხოლო მუ მუმანდეს იეჰოვაქ?

 ⁵ თეს გეძინელ, იეჰოვაქ მუმანდეს მუშ განზრახვეფიშ დო ჭეშმარიტებაშ შხვეფშა გურაფაშ პატი (მათ. 24:14). თე ცნობა მანგარ ძვირფას რე, მუშენდა ოხვარ ადამიანეფს, გინირთან იეჰოვაშ ოჯახიშ წევრეფო დო მარადიულ სიცოცხლეშ მეღებაშ საშვალებას არზენს თინეფს (1 ტიმ. 4:16). ვა უღჷ მნიშვნელობა პირადო ჩქი მუსხიშ კეთება შემლებნა მსახურებას, ბრელიშ დოვარ ჭიჭეშ, ჩქი მონაწილებას ბღებულენთ არძაშ უმოს მნიშვნელოვან საქმეს, ნამუთ ამდღა ისრულებ (1 ტიმ. 2:3, 4). მუშმადიდა პატი რე, ვორდათ იეჰოვაშ თანამშრომელეფ! (1 კორ. 3:9).

6. მუქ აღოლეს თინეფს, მიდგაქ ვა დაფასეს ღორონთწკუმა თანამშრომლობაშ პატი?

⁶ ტიმოთეშ დროს ნამთინექ ვა დაფას ღორონთწკუმა თანამშრომლობაშ პატი. მაგალთო, დემასიქ ქვეყნიერება ქიჸოროფუ დო ათეშენ, მიოდინუ პავლეწკუმა თანამშრომლობაშ პატი (2 ტიმ. 4:10). მუჭოთ იძირენ, ფიგელექ დო ჰერმოგენექ თიშენ მიოტეს მსახურება, ნამდა ოშქურდეს თიცალ თხოზინს ვეშეხვადესკო, მუნერსით პავლექ შეხვად (2 ტიმ. 1:15). ჰიმენეოსიქ, ალექსანდრექ დო ფილეტექ განდგომილეფო გინირთეს დო მიოტეს ჭეშმარიტება (1 ტიმ. 1:19, 20; 2 ტიმ. 2:16—18). მუჭოთ იძირენ, თე ადამიანეფ ართ დროს სულიერო ძალიერეფ რდეს, მარა დროშ მიკულაწკუმა ართო, თინეფიშ თოლს ფასიქ მეუდინ თის, მუთ სინამდვილეს მანგარ ძვირფას რდუ.

7. მუ მეთოდეფს გიმირინუანს სატანა ჩქინ წინააღმდეგ?

⁷ მუჭო ოცად სატანა, მიმოდინაფუან განძ, ნამუთ იეჰოვაქ მუმანდეს? ქობძირათ სატანაშ ნამთინე მეთოდ. მაგალთო, თინა გიმირინუანს გართობას დო მედია საშვალებეფს, ნამდა თიცალ ფასეულობეფ, აზროვნება დო საქციელ გამვითარან, ნამუთ მუშ აზრით ჭეშმარიტებაშე გენკმოჸოთანა. თინა თხოზინით ვარდა ადამიანეფიშ გავლენათ ხოლო ოცად, მიმოტებაფუან ქადაგება. თეს გეძინელ, სატანა ოცად, ქუმურჩქილუათ განდგომილეფიშ „ითამ რჩქინას“, ნამდა მივოტუათ ჭეშმარიტება (1 ტიმ. 6:20, 21).

8. მუს ბგურაფლენთ ართ ჯიმაშ, დანიელიშ მაგალითშე?

⁸ ფრთხილას ვა ვორეთ-და, შილებე ჭიე-ჭიეთ ქიდიპტუათ ჭეშმარიტება. გუვარჩუათ დანიელიშ * შემთხვევა, ნამდგას უჸორდჷ ვიდეოლაჸაფეფ. თინა იჩიებ: „სოდგარენ ვით წანერ ვორდჷ, მუჟამსით ვიდეოლაჸაფეფიშ ლაჸაფ დიბჭყჷ. დუდშე თიცალ ლაჸაფეფს ბლაჸაფენდჷ, ნამუთ იშენდოიშენ გლახა ვარდჷ. მარა ჭიე-ჭიეთ თიცალ ლაჸაფეფიშ ლაჸაფ ქიდიბჭყჷ, ნამუთ დემონურ დო ძალადობათ ეფშა რდუ“. საბოლათ, თინა ირდღას სოდგარენ 15 საათის უთმენდჷ ლაჸაფის. „ალალას ქოფთქუენ, მიჩქუდ, ნამდა  თეცალ ლაჸაფეფ დო თი დრო, ნამდგას თინეფს ვუთმენდჷ, ჭიე-ჭიეთ იეჰოვას მაშორენდჷ. მარა ჩქიმ დუდის ვარწმუნენდჷ, ნამდა თეცალ ლაჸაფეფ ბიბლიურ პრინციპეფს ვაწინააღმდეგუდ“, იჩიებ დანიელ. ფრთხილას ვა ვორეთ-და, გართობაქ შილებე თეშ იმოქმედას ჩქინდე, ნამდა ადვილო მიმოდინაფუან ჭეშმარიტება. თექ ქუმოხვად-და, შილებე საქმექ თეიშახ ქიმერთას, ნამდა მივოდინუათ თი ძვირფას მუდგარენეფ, მუთ იეჰოვაქ მუმანდეს.

9. მუჭოთ 1 ტიმოთეშ 1:18, 19-ს ჭარჷ, მის შეადარ პავლექ ტიმოთე?

⁹ წეკითხით 1 ტიმოთეშ 1:18, 19. პავლექ ტიმოთე ჯარიშკოჩის შეადარ დო ელუჩ, გაგრძელკო „ღირსუან ბრძოლას მონაწილება“. პავლე სულიერ ბრძოლას გულისხმენდჷ დო ვართ ხოლო პირდაპირ გაგებათ ბრძოლას. მუ გაგებათ გუნა ქრისტიანეფ ჯარიშკოჩის, ნამუთ ბრძოლას მონაწილენს? მუ თვისებეფიშ გავითარება მოსაჭირნა, მუჭოთ ქრისტეშ ჯარიშკოჩეფს? მორთ გუვარჩუათ ხუთ მხარე, მუდგას პავლეშ მოჸუნაფილ მაგალითშე ბგურაფლენთ. თენა მიმეხვარებნა, ვა ვოდინუათ ჭეშმარიტება.

10. მუშენ მოსაჭირნა ღორონთიშ ართგურობაშ გავითარება?

¹⁰ გევითარით ღორონთიშ ართგურობა. ჯგირ ჯარიშკოჩ ართგურ რე. თეცალ ჯარიშკოჩ ირნერო იბრძოლენს, ნამდა დეცვას თინა, მით უჸორს ვარდა თინა, მუდგას მანგარო აფასენს. პავლექ ელუჩ ტიმოთეს, გევითარკო ღორონთიშ ართგურობა (1 ტიმ. 4:7). მუთ უმოსო მიჸორა იეჰოვა დო თიშ ართგურ ვორეთ, თით უმოს ძალიერ სურვილ მიღნა, ნამდა ვა ვოდინუათ ჭეშმარიტება (1 ტიმ. 4:8—10; 6:6).

11. მუშენ მოსაჭირნა თვითდისციპლინა?

¹¹ გევითარით თვითდისციპლინა. ჯარიშკოჩშო აუცილებერ რე თვითდისციპლინა, მუშენდა ირიათო მზათ რდას ბრძოლაშო. ტიმოთეს შეულებუდ სატანაშ წინააღმდეგ ბრძოლა, მუშენდა მეჸუნდჷ პავლეშ რჩევას, ნამდა ებრძოლკო არასწორ სურვილეფს, გევითარკო ღორონთიშ მოსაწონ თვისებეფ დო ხოლოშიან ურთიერთობა უღუდკო თანაქრისტიანეფწკუმა (2 ტიმ. 2:22). თე ირფელშო თვითდისციპლინა რდუ საჭირო. ჩქი ხოლო მოსაჭირნა თვითდისციპლინა, ნამდა ხორციელ სურვილეფიშ წინააღმდეგ ბრძოლა მიბგათ (რომ. 7:21—25). თეს გეძინელ, თვითდისციპლინა მოსაჭირნა, ნამდა გუვაგრძელათ ჩქინ ჯვეშ პიროვნებაშ თირუა დო ჯგირ თვისებეფიშ გავითარება (ეფეს. 4:22, 24). მაგალთო, მთელ დღაშ ნაშულედის შილებე დუდშა დანძალებერქ მაჸუან, მიდაფრთათ კრებაშ შეხვალამაშა (ებრ. 10:24, 25).

12. მუ მიმეხვარებნა, უჯგუშო გეგმიბრინუათ ღორონთიშ სიტყვა?

¹² ჯარიშკოჩიქ ოკო ივარჯიშას იარაღეფიშ გიმორნაფას. თე იარაღეფ ჯგირო გეგმირინუასინ, რეგულარულ ვარჯიშ რე საჭირო. თეშნერო, ჩქი ხოლო ოკო შემლებდან ღორონთიშ სიტყვაშ, ბიბლიაშ ეფექტურო გიმორნაფა (2 ტიმ. 2:15). ართ-ართ, მუთ თეშ კეთებას მოხვარნა, კრებაშ შეხვალამეფ რე. მარა ხვალე თენა ვა რე დასაბაღ. საჭირო რე ბიბლიაშ პირად გურაფაშ ჩვევა, მუთ მიმეხვარებნა, შხვეფ დუვარწმუნათ თიშა, ნამდა ბიბლიურ ჭეშმარიტება ნამდვილო ძვირფას რე. ჩქი ღორონთიშ სიტყვაშ გიმორნაფათ ოკო გუვამანგარათ ჩქინ რწმენა. თენა უბრალოთ ბიბლიაშ კითხირს ვა ნიშნენს. საჭირო რე, დეფიფქრათ ნაკითხერშე დო გეგმიბრკვიათ ჩქინ პუბლიკაციეფ, ნამდა სწორას ქინვანჭათ დო გემწყათ წმინდა წერილეფ (1 ტიმ. 4:13—15). შედეგო, შხვეფშა ჭეშმარიტებაშ დაგურაფალო, შემალებენა ღორონთიშ სიტყვაშ გიმორნაფა. თენა ვა ნიშნენს, ნამდა უბრალოთ წუკითხათ თინეფს ბიბლიურ მუხლეფ. მოკონა, მივეხვარათ მარჩქილეეფს, ქინანჭან ბიბლიურ მუხლის დო ქოძირან, მუჭო ოხუ კითხირებულ მუხლ თინეფს.  ბიბლიაშ პირად გურაფაშ ჯგირ ჩვევა მიმეხვარებნა, უჯგუშო გეგმიბრინუათ ღორონთიშ სიტყვა შხვეფშა ჭეშმარიტებაშ დაგურაფალო (2 ტიმ. 3:16, 17).

13. ებრაელეფიშ 5:14-იშ თანახმას, მუშენ ოკო მიღდან გაგებაშ უნარ?

¹³ გიღდან გაგებაშ უნარ. ჯარიშკოჩის ოკო შეულებდას საფრთხეშ გიშაჩინება დო თიშა დუდიშ ეჩილითაფა. ჩქი ხოლო ოკო ქიდიბგურუათ ზიანს მომღანან ფერ სიტუაციეფიშ გიშაჩინება დო საფრთხეშა დუდიშ ეჩილითაფა (იგავ. 22:3; წეკითხით ებრაელეფიშ 5:14). მაგალთო, საჭირო რე, ჭკვერულო გიშებგორათ გართობა. საშვალებეფ. სატელევიზიო შოუეფს დო კინოეფს ხშირას უზნეობას ოძირანა. უზნეო საქციელს ზიან მოუღ დო გურს უწყუნუანს ღორონთის. ათეშენ ჩქი დუდის ევუჩილითუანთ თიცალ გართობას, ნამდგაქ შილებე ჭიე-ჭიეთ გენკმოჸოთან ღორონთიშ ჸოროფას (ეფეს. 5:5, 6).

14. მუჭო მეხვარ დანიელს გაგებაშ უნარქ?

¹⁴ დანიელქ, ნამუთ ჟიშე მიფშინეთ, ჭიე-ჭიეთ ქიმეხვად, ნამდა ძალადობათ ეფშა დო დემონურ ვიდეოლაჸაფეფიშ ლაჸაფ გლახა რდუ. თიქ „გინაჯინალ კოშკიშ ბიბლიოთეკას“ თიცალ მასალა დოგორ, ნამუთ მეხვარებუდ, ქებრძოლკო თე პრობლემას. მუქ მაჸუნ თეს შედეგო? თიქ მიოტუ თეცალ ვიდეოლაჸაფეფიშ ლაჸაფ. დანიელქ ონლაინ ლაჸაფეფიშ საიტის გაუქმჷ მუშ გვერდ დო მიოტუ შხვა მოლაჸაფეეფწკუმა ურთიერთობა. დანიელ იჩიებ: „ვიდეოლაჸაფეფიშ მანგიორო დროს გალენ საქმეეფიშ კეთებას ვარდა ჩქიმ კრებელ მეგობრეფწკუმა ურთიერთობას ვუთმენდჷ“. ასე დანიელ პიონერო დო უხუცესო მსახურენს.

15. მუშენ რე საშიშ განდგომილეფიშ ტყურეფ?

¹⁵ ტიმოთეცალო, ჩქი ხოლო ოკო გეგშეფჩინათ თი საფრთხე, მუთ განდგომილეფიშ გავრცელებურ ტყურა ინფორმაციას მოჸუნს (1 ტიმ. 4:1, 7; 2 ტიმ. 2:16). მაგალთო, თინეფქ შილებე ეცადან, გავრცელან ტყურეფ ჩქინ და დო ჯიმალეფიშ გურშენ ვარდა ეჭვეფ გომრჩქინან იეჰოვაშ ორგანიზაციაშ მიმართ. თეცალ ტყურა ინფორმაციაქ შილებე დასუსტას ჩქინ რწმენა. ჩქი ოკო ვედებღორათ თეცალ ტყურეფით. მუშენ იფჩიებუთ თეს? თეცალ ტყურეფს თინეფ ავრცელენა, „მიდგას გონება აფჷ გარყვნილ დო ჭეშმარიტება — მიდაღალირ“. თინეფიშ მიზან ნირზიშ წუმოჭყაფა რე (1 ტიმ. 6:4, 5). თინეფს ოკონა, დებჯერათ მუნეფიშ ტყურეფ დო ჯიმალეფიშ მიმართ ეჭვეფ გომრჩქინან.

16. მუშა ოკო ვეგნიბღათ ყურადღება?

¹⁶ ყურადღება შხვა მუდგარენშა ვეგნიღათ. მუჭოთ „ქრისტე იესოშ ღირსუან მეომარს“, ტიმოთეს  ყურადღება მსახურებაშა ოკო აფუდკო გინოღალირ დო ვართ ხოლო მატერიალურ ნივთეფშა ვარდა ქვეყნიურ მიზნეფშა (2 ტიმ. 2:3, 4). ტიმოთეცალო, ვართ ჩქი ოკო გინიბღათ ყურადღება მატერიალურ სურვილეფშა. „სიმდიდრეშ ძალაქ, ნამუთ ოჩილითუანს“, შილებე მიმოდინაფუან ჸოროფა იეჰოვაშ მიმართ, მარდულობა ღორონთიშ სიტყვაშ მიმართ დო სურვილ, შხვეფს ჭეშმარიტება ვოგურუათ (მათ. 13:22). ათეშენ, ოკო გუვამარტივათ ჩქინ ცხოვრება დო დრო დო ენერგია თიშო გეგმიბრინუათ, ნამდა „პირველ რიგის [ბგორათ] სამეფო“ (მათ. 6:22—25, 33).

17, 18. მუშ კეთება შემლებნა, ნამდა დუდ დეფცვათ სულიერ ზიანშე?

¹⁷ მზათ რდათ, ნამდა ხეთეშე ქიმოქმედათ. ჯარიშკოჩიქ წინასწარ ოკო დაგეგმას, მუჭო იმოქმედენს. იეჰოვაშე მონდებულ განძიშ დაცვება ქუმოკონან-და, საფრთხეშ დროს ხეთეშე ოკო იმოფქმედათ. მუ მიმეხვარებნა თეშ კეთებას? წინასწარ ოკო დაბგეგმათ, მუჭო იმოფქმედენთ თეცალ დროს.

¹⁸ მაგალთო, ნამთინე შენობას საევაკუაციო გეგმა რე, ნამდგას საავარიო გიმაულარეფ რე მითითებულ. საგანგებო სიტუაციაქ ქიჸუ-და, თეცალ გეგმა მიმეხვარებნა, ხეთეშე ქიდიპტუათ თექიანობა. თეშნერო, ჩქი ხოლო შემლებნა, წინასწარ დაბგეგმათ, ნამ „გიმაულარს“ გიმიბრინუანთ, მუჟამსით ინტერნეტიშ გიმორნაფაშ, კინოშ ვარდა სატელევიზიო პროგრამაშ ჯინაშ დროს, უცფას უზნეო, ძალადობრივ ვარდა განდგომილეფიშ მასალა მიკორჩქინდუ. წინასწარ მივემზადებუთ-და, შემალებენა ხეთეშე ქიმოფქმედათ, ნამდა დუდ დეფცვათ სულიერ ზიანშე დო იეჰოვაშ თოლს სუფთას ქუდოფსქიდათ (ფსალმ. 101:3; 1 ტიმ. 4:12).

19. მუ კურთხევეფს მიბღენთ, მუჟამსით დეფცვენთ თი ძვირფას მუდგარენეფს, მუთ იეჰოვაქ მუმანდეს?

¹⁹ ჩქი ოკო დეფცვათ თი ძვირფას მუდგარენეფ, მუთ იეჰოვაქ მუმანდეს — ბიბლიურ ჭეშმარიტება დო თიშ შხვეფშა გურაფაშ პატი. თაშ ქიმიფქციებუთ-და, მაღვენუნა სუფთა სინდის, აზრიან ცხოვრება დო ხიოლ, ნამუთ შხვეფშა იეჰოვაშ გაჩინებაფაშ მოხვარას მოუღ. ღორონთიშ მოხვარათ შემალებენა, დეფცვათ თინა, მუთ თიქ მუმანდეს (1 ტიმ. 6:12, 19).