1-2. Dedi bummonisina 1 Timoteo 6:20, mbi Timoteo katambula?

ZIKHUMBU ziwombo befu tumvananga biuma bitu kuidi batu bankaka muingi ba tulundila. Dedi, befu bawombo tunlundisilanga zimbongo ku banco. Befu tunlundilanga ziawu kuna, kibila tuzebi ti kidi kibuangu ki nsika, ki lufiatu ayi mivi bammonanga phasi muingi kukuiba. Mawu mansundula ti befu boso tuzebi nkinza widi mu kuvana mutu wu lufiatu kiuma befu tumvananga beni luvalu muingi ka tulundila.

² Tanga 1 Timoteo 6:20. Mu matangu amomo, mvuala Polo wutebula Timoteo moyo ti nandi wutambula kiuka ki—nzayilu yikiedika yitedi lukanu lu Nzambu mu batu. Timoteo mvandi wutambula luaku lu ‘kulonga diambu di Nzambi’ ayi ‘kuvanga kisalu ki nsamuni.’ (2 Timoteo 4:2, 5) Diawu mvuala Polo kadindila Timoteo muingi kakieba buboti luaku beni voti kiuka katambula. Dedi Timoteo, befu mvitu tutambula biuma voti kiuka ki luvalu. Biuma mbi? Ayi kibila mbi tufueti kiebila buboti kiuka Yave ka tuvana?

3-4. Bibila mbi binkaka malongi ma Kibibila madidi luvalu?

³ Yave wutuvana luaku lu kuzaba kiedika kidi mu Kibibila, Diambu di Nzambi. Kiedika beni ki tusadisanga kuba kikundi kifikama na Yave ayi kiawu ki tusadisanga kuzaba mbi bilenda tutuadisa mayangi makiedika mu luzingu. Befu kukikinina kiedika beni ayi kuzingila mu kiawu, befu tumvukanga va kivika ki malongi mawombo ma luvunu banlonganga mu binganga ayi tumbikanga nzingulu yi butsuza.—1 Kolinto 6:9-11.

⁴ Malongi madi mu Kibibila madidi mvandi luvalu, kibila Yave wunzabikisanga to mawu kuidi batu ba kikululanga voti bo ‘badi mintima mikubama muingi kubaka luzingu lu mvu  ka mvu.’ (Mavanga 13:48) Ayi wumvanganga mvandi mawu kuidi bo bankikininanga tho Nandi kadi mu kusadila bubu, muingi kudikila dikabu diandi bidia bi kiphevi. (Matai 11:25; 24:45) Vasi ko diambu dilutidi nkinza kena kuvisa kiedika kidi mu Diambu di Nzambi. Ayi buboti beni kutomba lusadusu lu bankaka muingi tuvisa kiawu buboti.—Zingana 3:13, 15.

5. Luaku mbi lunkaka Yave ka tuvana?

⁵ Yave mvandi wutuvana luaku lu kulonga bankaka kiedika kitedi Nandi ayi lukanu luandi. (Matai 24:14) Zitsangu beni tunlonganga, luvalu luwombo zidi kibila zinsadisanga batu kuba mu khati dikanda di Yave ayi kuba vana luaku lu kuzinga mvu ka mvu. (1 Timoteo 4:16) Kheti tunnunganga kuvanga mawombo voti maluelu mu kisalu ki kusamuna, vayi diambu dilutidi nkinza mu befu didi, kuzaba ti tuidi mu kubuela mioko kisalu akiokio kilutidi nkinza mu bilumbu abibi bitsuka. (1 Timoteo 2:3, 4) Bukiedika, luke luaku lunneni beni kusala va kimueka na Yave!—1 Kolinto 3:9.

6. Mambu mbi mamonikina baklisto bankaka mu thangu yikhulu?

⁶ Baklisto bankaka bazinga mu thangu yimueka na Timoteo, basa vana ko luvalu mu luaku baba lu kusala va kimueka na Yave. Dedi Demasi, bo kaba zolanga beni biuma bi nza ayiyi, diawu kabikila kiyeku ki kusala na mvuala Polo. (2 Timoteo 4:10) Ayi ḿba Fingelo ayi Alemongene babikila kusamuna kibila baba boma bu kumonikinina ziphasi mvuala Polo kaviokila. (2 Timoteo 1:15) Mvandi Imene, Alesandelo ayi Fileto babalukila kimvuka ki Yave ayi babika kumbuongimina. (1 Timoteo 1:19, 20; 2 Timoteo 2:16-18) Batu boso abobo baba kiphevi kimboti, vayi babika kumonisa nkinza mu biuma bi luvalu baba vana.

7. Mbi Satana kamvanganga muingi ku tuvukumuna?

⁷ Mbi Satana kamvanganga muingi ku tuvukumuna? Nandi wunsadilanga internet, zifilme, zijornal, zibuku ayi zilevista zi nza, muingi ku tuvanga kubika zola ayi kutumukina zithumu zisonga zi Yave. Mvandi, nandi wu tususulanga mu mambu batu bankaka banyindulanga ayi bantubanga mu matedi befu mu bisengu bintiamunanga zitsangu. Ayi wunsadilanga zithotolo zi batu bankotanga yitu kikola muingi tubika kubue samunanga. Mvandi wu tuvanganga kuvukumuka, mu kukuwa malongi ma batu babika ayi babalukila kimvuka ki Yave.—1 Timoteo 6:20, 21.

8. Mbi tulenda longuka mu mambu khomba Daniel kaviokila?

⁸ Befu khambu ba keba keba, tulenda tona  kutatuka kiedika. Mawu mamonikina Daniel, * khomba yi ditoko waba zolanga beni kuta bisavu mu telefoni. Nandi wutuba: “Minu yitona kuta bisavu beni bo yiba kumi di mimvu. Va thonono minu yibasa tanga ko bisavu biba monisanga mambu ma ziphevi zimbi. Vayi buviokila thangu, minu yitona kuta biawu.” Nandi wuba viokisanga 15 di bilokulu mu kadika kilumbu mu kuta bisavu beni. Danieli wubue tuba: “Ku tsi ntim’ami, minu yizaba ti bisavu yiba tanga ayi thangu yaba viokisanga mu kuta biawu, mawu maba kuphanga kutatuka Yave. Vayi minu yitatamana kuvanga mawu mu kuyindula ti yabasa tombila ko kulandakana minsua mi Kibibila.” Bukiedika, bisavu bilenda kutuvanga kutatuka kiedika. Ayi ma kumonika tulenda bika kuvana luvalu biuma Yave ka tuvana.

9. Dedi bummonisina 1 Timoteo 1:18, 19, buidi mvuala Polo kafuanikisila Timoteo?

⁹ Tanga 1 Timoteo 1:18, 19. Mvuala Polo wufuanikisa Timoteo buka disodi ayi wunkamba katatamana “kunuana nzingu.” Nzingu beni wisa ba ko wu kinsuni, vayi wu kiphevi. Mu ziphila mbi baklisto boso badidi buka masodi badi mu mvita? Mu kuba masodi ma Klisto, zikhadulu mbi tufueti kuna? Tuemmona malongi mbi tulenda longuka mu kifuani mvuala Polo katubila. Malongi beni malenda tusadisa tutamana kukieba buboti kiedika tutambula.

10. Mbi binsundula kuba boma bu Nzambi, ayi kibila mbi tufueti bela buawu?

¹⁰ Kuna boma mu Nzambi. Disodi dimboti, dikala dikuikama kuidi mfumu’andi. Ayi wunnuananga muingi kukieba mutu nandi kanzolanga voti kiuma nandi kamvananga beni luvalu. Diawu mvuala Polo mvandi kakindisila Timoteo muingi kaba boma bu Nzambi—voti kuba wukuikama mu kusadila Nzambi. (1 Timoteo 4:7) Bo tunluta zola Nzambi, buawu mvandi tunluta muenanga phuila yi kukieba buboti kiedika nandi katuvana.—1 Timoteo 4:8-10; 6:6.

11. Kibila mbi tufueti kunina khadulu yi kukiyala?

¹¹ Kuna khadulu yi kukiyala. Disodi kafueti kubamanga buboti muingi kanunga mvita. Timoteo wununga mintambu mi Satana kibila nandi wulandakana dilongi di mvuala Polo di kuvanga mangolo ma kutulula mayindu ayi mavanga mambi muingi kukuna zikhadulu zimboti mu kuviokisanga beni thangu na zikhomba ziandi zi kiphevi. (2 Timoteo 2:22) Vayi muingi kununga vaba tombulu nandi kukiyala. Befu mvitu, tufueti kuna khadulu yi kukiyala muingi tununga zinzinunu zimbi tuidi. (Loma 7:21-25) Mvandi, tufueti kuna khadulu yi kukiyala muingi tubika kimutu kikhulu ayi kuvuata kimutu kimona. (Efeso 4:22, 24) Ayi kheti tuidi beni bavonga kutsuka kilumbu mu kibila ki kisalu voti mambu mankaka, tufueti vanga mangolo ma kukuenda mu lukutukunu.—Ebeleo 10:24, 25.

12. Mu kuvanganga mbi, tuala luta pisukila mu kusadila Kibibila?

¹² Disodi kafueti longuka kusadila mata mandi. Vayi muingi kanunga kuvanga mawu, nandi kafueti kubamana khumbu ziwombo. Bobuawu mvandi, befu tufueti zaba buboti kusadila Diambu di Nzambi. (2 Timoteo 2:15) Ayi mu zikhutukunu muawu tunlongukilanga mua ziphila tulenda vangila mawu. Vayi boti tutidi kusadisa bankaka kumonisa luvalu mu kiedika ki Diambu di Nzambi, tufueti ba minlonguki mimboti mi Kibibila. Tufueti sadila Diambu di Nzambi muingi kukindisa kiminu kitu. Mawu mansundula kubotula thangu muingi kuyindulanga mu mambu tuntanga, kufiongunina bilongulu bitu muingi tuluta  visa mambu tuntanga, ayi kusadila mambu tuma longuka. (1 Timoteo 4:13-15) Befu kuvanga mambu moso amomo, befu tuala ba bakubama muingi kulongisa bankaka. Mawu masinsundula ko to kuba longisa kutanga vayi, kusundula kuba sadisa kuvisa ayi kusadila mambu bama longuka. Befu kuba kifuza mu kisalu ki kusamuna, befu tuala luta ba bapisuka mu kusadila Diambu di Nzambi muingi kusadisa bankaka.—2 Timoteo 3:16, 17.

13. Dedi bummonisina Ebeleo 5:14, kibila mbi tufueti monisina nduenga?

¹³ Ba nduenga. Disodi kafueti zaba fika bakula mintambu ba kunlekila ayi kutina miawu. Befu mvitu tufueti longuka kuzaba mambu malenda ku tutuadisa ziphasi ayi kuvanga mangolo muingi kutatuka mawu. (Zingana 22:3; tanga Ebeleo 5:14.) Dedi, tufueti zaba kusola buboti biuma tumviokisila thangu. Kibila zifilme ayi ziprograma ziwombo bammonisanga mu televisão, zidi mambu ma kitsuza, makhambu fuana voti manniongisanga ntima wu Nzambi. Ayi mambu beni tummona, malenda tulula kikundi kitu ayi nandi. Diawu tuvanganu mangolo ma kubika talanga mambu amomo malenda dekula luzolo luitu mu Nzambi.—Efeso 5:5, 6.

14. Buidi nduenga yisadisila Daniel?

¹⁴ Daniel tube tubila kumbusa, bo kabakula ti bisavu kaba tanga mu telefoni biawu biba kuntatula kuidi Yave, nandi wutomba lusalusu mu Watchtower Library muingi kubakula bilongulu bintubila mambu beni kaba viokila. Mambu mbi mayiza monika? Nandi wubika kubue tanga bisavu beni. Mvandi wubotula dizina diandi mu zinzila zi khondi mayo kaba telanga bisavu beni na bankaka. Tala mambu Daniel katuba: “Minu yibika bisavu beni ayi yitona kuviokisanga thangu na bakundi mu kimvuka.” Bubu Daniel widi ntuami ntuala ayi nkulutu wu kimvuka.

15. Kibila mbi tufueti tinina mambu batu babika ayi babalukila kimvuka ki Yave bantubanga?

¹⁵ Dedi Timoteo, befu mvitu tufueti ba nduenga muingi kutina mambu batu babika ayi babalukila kimvuka ki Yave bantiamunanga. (1 Timoteo 4:1, 7; 2 Timoteo 2:16) Dedi, bawu balenda tubila zikhomba zitu mambu ma luvunu voti kutuba mambu malenda tutula divuda mu matedi kimvuka ki Yave. Befu kukuwa voti kutanga mambu beni bantiamunanga, mawu malenda dekula kiminu kitu. Diawu buboti kutina mambu amomo, muingi tubika vukumuka mu mambu ma luvunu.  Kibila tuisintomba ko kuvuvuka mu binongu bi ‘batu basumuka mu diela diawu ayi bakhambulu kiedika.’ Mambu beni bantiamunanga matedi to muingi kutuadisa “ziphaka ziphamba.” (1 Timoteo 6:4, 5) Bawu bantomba tukikinina mu mambu ma luvunu bantuba ayi tuba divuda mu zikhomba zitu voti tubika kuba fiatila.

16. Mambu mbi tufueti bika tsikika mayindu mitu?

¹⁶ Bika kuvuvuka. Timoteo wuba ‘disodi dikiedika di Yesu Klisto’ kibila kasa tsikika ko mayindu mandi mu biuma bi nza, vayi nandi wutula kisalu ki kusamuna va theti mu luzingu. (2 Timoteo 2:3, 4) Dedi Timoteo, tufueti vanga mangolo ma kubika tsikika mayindu mitu mu biuma bi nza ayiyi. Kibila “kimvuama ki luvunu” ki nza ayiyi, kilenda tulula luzolo tuidi mu Yave, mu Diambu Diandi ayi kumanisa phuila befu tuidi mu kusamuna diawu kuidi bankaka. (Matai 13:22) Diawu buboti beni kubika nata nzingulu yi kikhafi muingi tubaka bu kutudila ‘Kintinu ki Nzambi va theti mu luzingu luitu.’—Matai 6:22-25, 33.

17-18. Mbi tulenda vanga muingi tubika bua mu masumu?

¹⁷ Ba wukubama muingi wufika baka makani. Disodi kafueti baka makani mu mambu kafueti vanga muingi kuyikieba. Befu mvitu boti tutidi kukieba buboti biuma Yave katuvana, tufueti fika bakanga makani ava kuviokila mu zithotolo. Buidi tulenda vangila mawu? Tufueti botula thangu ayi kuyindula mbi tuala vanga bo mambu beni mala tumonikina.

¹⁸ Tulenda fuanikisa mawu na zindubu bamvananga va thonono kuidi batu banlandakananga minkungi mu bibuangu binneni. Bawu banzabikisanga batu boso mielu balenda fika basikila, boti diambu dimbi didi mu kumonika. Bobuawu mvandi tufueti baka makani, mu mambu tunkuiza vanga mu thangu mambu makhambu fuana mammonika mu kinzimbukila bo tuntala televisão voti bo tuidi mu internet. Befu kukubama mu mambu malenda monika, mala tusadisa tubika bua mu masumu ayi kutatamana kuba lunungu va meso ma Yave.—Minkunga 101:3; 1 Timoteo 4:12.

19. Lusakumunu mbi tuala tambula befu kukieba bumboti biuma Yave katuvana?

¹⁹ Tufueti kiebanga buboti biuma bi luvalu Yave ka tuvana dedi—kiedika ki Kibibila ayi luaku tuidi lu kulonga kiawu kuidi bankaka. Ayi mu thangu tumvanga mawu, tuala tambula lusakumunu lu kuba kilunzi kisama, mayangi makiedika mu luzingu ayi mayangi ma kusadisa bankaka kuzaba Yave. Bukiedika, mu lusalusu lu Yave, tulenda nunga kukieba buboti biuma katuvana.—1 Timoteo 6:12, 19.