Jaˇliꞈ teu deuˆ˗ahˇ “Iˇ shaˬ zaˬ deuˬ˗ahˇ sahˬ paˬ sahˬ ma deuˬ kʼehˬ˗awˇ kʼaˆ˗awˇ nawˬ dzaˬ kʼaˆ dzaˬ gaˇ ya mawˇ ngeh, taˬ zahˬ leˇ. Sahˬ paˬ sahˬ ma aˬ geu gʼaˬ maˬ kaˬ, aˬ yawꞈ taꞈ˗ehˇ huiˬ dzehˬ˗eu gʼaˬ jawˇ˗awˇ, tiˬ gʼaˬ kʼoeˇ taˆ tiˬ gʼaˬ huiˬ daˆ leꞈ˗eu meh” lehˇ ehˇ taˬ˗euˬ meh.—Dawˬtsoˆ 5:8.

Tsawˇ haˬ myaˆ˗ahˇ neh haw ngeh, aˬ dui Jaˇliꞈ heu deuˆ naˇ, tsawˇ haˬ˗euˬ uˆ lahˇ˗eu aˇ maꞈ˗ahˇ tehꞈ˗ehˇ ngehˬ keuˆ mawꞈ˗eu meh lehˇ noeˬ˗eu meh. Ehˇ kʼawꞈ aˬ dui yaw muiˬ˗ehˇ shaˇ noeˬ naˇ, Jaˇliꞈ heu deuˆ Yeˬhawˇbaˬ nehˬ˗ehˇ taꞈ˗eu maˇ maˇ ni gʼeh˗eu jeˬ˗ahˇ jiˇ ngehˬ keuˆ taˬ˗awˇ, aˬ dui˗ahˇ gʼaˬ biꞈ˗eu meh.

Dawˬtsoˆ 5:8-ahˇ iˇ shaˬ zaˬ˗ahˇ kʼehˬ nehˬ kʼaˆ nehˬ˗awˇ nawˬ dzaˬ kʼaˆ dzaˬ˗eu maˬ tsaˬ maˬ dawˇ˗eu sahˬ paˬ sahˬ ma deuˬ˗ahˇ ngehˬ keuˆ taˬ˗euˬ meh. Heu loꞈ˗ehˇ gʼeh˗eu deuˬ aˬ yawꞈ maꞈ taꞈ˗ehˇ huiˬ dzehˬ˗eu gʼaˬ haw luꞈ meh lehˇ maˬ ya ngehˇ˗a. Kʼoeˇ uˬ taꞈ, teu deuˬ taꞈ˗ehˇ huiˬ dzehˬ˗eu nui deuˬ jiˇ jawˆ meh. Teu loꞈ˗ehˇ gʼeh kʼawꞈ, sahˬ paˬ sahˬ ma deuˬ myawꞈ dzaˬ shuiˇ dzaˬ˗eu miˇ neh, zaˬ lahˇ deuˬ maˬ tsaˬ maˬ dawˇ˗eu jeˬ hawˇ˗eu shaˬ˗eu zahˬ˗eu jeˬ˗ahˇ ya tahˬ puˬ˗eu meh.

Gaˇ kawˆ heu˗ahˇ haw ngeh noeˬ tmˬ kʼaˇ maˬ za gaˇ duˇ kʼawꞈ, aˬ dui Yeˬhawˇbaˬ tsawˇ haˬ zaˬ˗ahˇ ‘uˆ lahˇ˗eu sahˬ paˬ sahˬ ma deuˬ’˗ahˇ haw luꞈ meh lehˇ ya siˬ˗euˬ miˇ neh gʼaˬ ahˇ laˇ nya˗eu meh. Aˬ dui caw ba nehˬ laꞈ lehˇ Miˬyehˇ˗ahˇ guiˬ lahˬ shaˇ nya˗awˇ, aˬ dui˗euˬ shaˬ zahˬ aˬ yawꞈ˗ahˇ a nehˬ nya˗eu meh. (Ja ceuˬ 55:22; Piˇliˇpiˆ 4:6, 7) Aˬ dui “miˇ tsaˬ dawˬ tawˆ luꞈ˗ahˇ Sahˬpaˬ Miˬyehˇ yaw muiˬ paˬ˗ehˇ haw luꞈ˗awˇ, aˬ yawꞈ˗ahˇ saˇ jaˇ ziꞈ˗eu deuˬ˗ahˇ gʼaˬ biꞈ luꞈ˗eu meh” lehˇ siˬ nya˗eu ma.—2 Laˬsaˬbaˬ 16:9.

Teu miˇ neh Dawˬtsoˆ 5:8 aˬ dui˗ahˇ tiˬ gʼaˬ kʼoeˇ taˆ tiˬ gʼaˬ huiˬ dzehˬ meh lehˇ nymˬ˗mˇ miˇ tsaˬ kʼoeˇ taˆ pyeuꞈ luꞈ˗eu jeˬ˗ahˇ bi noeˬ mawˇ˗eu meh. Kʼoeˇ uˬ taꞈ, Jaˇliꞈ heu deuˆ aˬ dui˗ahˇ Yeˬhawˇbaˬ huiˬ dzehˬ mahˇ dzehˬ˗eu gʼaˬ pyeuꞈ˗awˇ, Baoˬ huiˬ dui dui˗eu meh lehˇ jiˇ bi siˬ laꞈ˗eu meh. Nymˬ˗mˇ Yeˬhawˇbaˬ aˬ yawꞈ˗euˬ Zaˬmaˇ Yeˬsuˇ˗ahˇ, aˬ yawꞈ˗euˬ miˇ kʼahˬ˗ahˇ bi uˆ lahˇ˗eu heu neh aˬ yawꞈ uˆ lahˇ luꞈ˗eu meh. Yeˬhawˇbaˬ yawˬ jeˬ na luꞈ˗ahˇ haw mawˇ˗eu Baoˬ huiˬ˗eu Miˬyehˇ pyeuꞈ˗awˇ, aˬ yawꞈ kʼaˇ mˇ kʼaˇ shaˇ˗eu jeˬ yaw tsaˬ yaw dawˇ laꞈ kʼoeˇ mˇ˗awˇ, aˬ yawꞈ˗euˬ Zaˬmaˇ jiˇ teu loꞈ˗ehˇ gʼeh˗eu meh.